البطل المغمور "شمس الغروب"

الجزء الثامن عشر "القسم الأول"

💐...
....بعد مرور أربعين يوم....
'''
في منزل هيثم الكاتب..
الساعه السادسه مساءا...
طلعت نسيبه من الكوجينه ومشت طول بطريقها لدار التوأم..
طقت الباب وقالت:كملتوا؟!
جاهم صوتهم وهما يقولوا مع بعض...
"ايه كملنا"
نسيبه:باهي تعالوا للكوجينه بش تتغدوا..
ومشت بتولي للكوجينه..وقفت لما جت جنب دار سارة..
شبحت للباب بنظرات حزن..
وبتردد مشت للباب..حطت وذنها عليه..
كالعاده سمعت صوت شهقات بكائها وهي تقرا في القرآن..
حطت يدها على مقبض الباب وحركاته بالشويه وفتحاته..
شافت ساره كعادتها من بعد وفاة امها..
مقعمزة ع الصلايه وهي لابسه اسدال الصلاه وفيدها مصحف..
تقرا وتبكي..
تنهدت بألم..وصكرت الباب..
جو حداها جنان وريحان..
ريحان:هيا عمتو..
حطت يدها عليهم..وقالت بإبتسامه:هيا بروا قدامي..
مشوا الزوز يجروا للكوجينه وخشوا..
وهي وراهم..
قعمزوا على كراسيهم..
وقعمزت حتى هي وبدت تصب لكل وحده في صونيتها..
وبدوا البنات يتغدوا..
قعدت تشبحلهم كيف سموا بالله وبدوا ياكلوا..
ابتسمت ابتسامه حزن..بعدين تنهدت وشبحت لتليفونها قاماته وحطت ع رقم ما..واتصلت بيه..
..........
ع احد جسور العاصمه..
كان واقف يتفرج ع السيارات وهي تمشي بسرعه..
هو كان في حابس روحه في كهف حزن كبير..مظلم..
من بعد ماشمس حياته غابت..حس ان الحياة معاش ليها طعم ولالوجوده فيها معنى..
حزنه هكي خلاه يشوف لكل شي بنظرة سودوايه..
يسمع في صوت تليفونه يرن..ومايبيش يرد..
ماعنده نيه يكلم حد ولايتناقش هو وحد...
فجاه..
سمع صوت قريب عليه لحد يتكلم في الهاتف..
:والله يابيرا الحوش كرهته معاش نبي نخشله بكل.......خل يشبعوا بيه اني ماقعدتش فيه الا ع خاطر امي..وامي توا عند ربها..علاش مازال بنقعد فحوش وهي مش فيه!؟.............
كاره امها الدنيا هادي.......خلاص خلاص بيرا بالله صكر ع الموضوع..........تمام...نتلاقوا الليله في الحوازة.....تشاو...
وصكر...وقعد يطلق في الفاظ نابيه..
زياد اللي جنبه لما سمعها اشمئز شويه...لكن قعد شاغل باله حالة الشاب هدا..اللي برغم منظره المزري..
ولبسه الغير مقبول...لكن حس ان وجعهم مشترك..
شافه وهو يطلع في باكو دخان..طلع منه طرف وولعه وقعد يدخن..
يشبحله كيف يطلع في الهوا المشبع بالنيكوتين..
وكأنه يطلع في همه وغمه...او هكي تهيأ لزياد وقتها..
شبح الشاب جنبه...شاف لزياد كيف يشبحله..
زياد غير عيونه طول .
الشاب ضحك وطلع طرف تاني ومده لزياد وقال:هاك هاك..مايحشمك شي..
شبحله..بعدين شبح للسيجاره شويه وقال:ماندخنش..
رفع حواجبه وقال:اها..ورده لجيبه...
زياد:امك قداش ليها ميته؟
الشاب ابتسم وقال:كنت حادف وذانك هني..
زياد:اسف مش قصدي..لكن كلامك ع امك هو اللي سمعته..شبح القدام وقال..حتى اني فاقد امي من اربعين يوم..
الشاب شبح القدام وهز راسه وقال:اها..هدا علاش..
سكتوا الزوز وهما يفكروا...
بعدين قال الشاب:ليا 15يوم فاقد امي..كنت عايش ع خاطرها..وبعد..احمم..ماربي خدي امانته..مش عارف بجديات مش عارف علاش قاعد عايش لتوا!؟
شبحله زياد وعيونه تعبوا دموع..
الشاب:ماريتش حن في حياتي كان منها هي..هي بس اللي طفطف...هي بس اللي تحن..هي بس اللي تفقد فيا..هي بس اللي حاسه بيا..لابو ولاخوت ولاخوات..ولاغيرهم...
نزلت من عين زياد دمعه مسحها فيسع وشبح القدام..
الشاب شبحله وقال:لكن باين عليك هكي ولد عيله..نحس في حالك خير من حالي..
زياد حرك راسه بالنفي وهو يقول:مافيش خير في حال اللي يفقد امه..ونزلت منه دمعة تانيه..ورجع مسحها وقال..احمم..حالك مش احسن من حالك..
قرب منه الشاب وحط يده ع كتف زياد وقال بضحكه:تصدق والله خشيت خاطري..مش عارف كيف سبحان الله..استريحتلك..
زياد ابتسم ع جنب وقال:ماهو في بيننا حاجه مشتركه..
ضحك الشاب وقال..ريقا...ولا..عبدالملك اختار اللي يعجبك..
ابتسم زياد ع جنب وقال:زياد..
عبدالملك:زياد..عاشت الاسامي..
زياد:تعيش..
عبدالملك:فيها مشكله لو عزمتك ع قهيوه في مكان قنين هني..نهدرزوا شويه..فضفضه يعني..
زياد شبح القدام وتنهد بعمق..بعدين قال:اوكي..
خبط عبدالملك بيده ع ظهر زياد خبطة خفيفه بعدين قال:هيا بنا..
زياد ابتسم ابتسامه خفيفه...
بعدين مشي هو عبدالملك..وهما الزوز يتجاذبوا في اطراف الحديث...
وتليفونه يرن..لين انزعج منه وصكر تليفونه مرة وحده..
•••••°°°°°°••••••°°°°°°•••••
"اني فديت منكم الزوز كبدي درهت خلاص..تو نقول لرجالتكم يتفاهموا معاكم"
ملاك:ياعمتي هي اللي دور في المشاكل..
سجى بعصبيه:اني اللي ندور فيها المشاكل ولاانتي يالفعه..
ملاك :صار اني اللفعه ياشيطانة الرجيم..
صالحه:خلاص يابنية بري خشي دارك وفكينا من النشاف..
ملاك:لا مانيش ماشيه ولاجايه بنقعد هني..
وقعمزت وحطت رجل ع رجل..
عفاف شبحتلها من فوق لتحت..
وتهاني ماعجبتهاش الحركه كيف دارتها قدام امها وقالت:شنو هدا انتي وياها تعيطوا وتلعلعوا قدام امي لااحترام لاتقدير! مش كان سكتنا ع تصرفاتكم التافهه معناها مانقدروا نديرولكم شي..
عفاف:تهاني..
تهاني:معليشي يما الوضع زاد عن حده ولى لايطاق..
سجى برفعة حاجب:توا انتي تتكلمي ع الاحترام وقاعده تكلمي فينا وحني اكبر منك بقلة ادب..
تهاني:كل حد يتعاملوا معاه باللي يناسبه..
ملاك؛ماتكتريش تهاني.
تهاني بنظره حاده:انتم اللي كترتوا ع ماوصوكم..كرهتونا في حوشنا بمشاكلكم ونشافاتكم...
ملاك ناضت وقالت:شن قصدك!! تلزي فينا انتي!.
سجى:هكي الباين!
تهاني:افهموها كيف ماتفهموها..
سجى:والله حبيبتي لما يبدا الحوش حوشك تكلمي..
تهاني بتحدي:الحوش حوش بوي معناها حوشي تمام!
ملاك بضحكه ساخره:ياعيني ياعيني من توا هكي وانتي مازال ماطلعتي من الدحيه!!
تهاني :ايه..من توا وبرا غادي..
سجى:والله...
"خلاااااص..اصص..اسكتوااا"..
انفجعوا كلهم لما سمعوا عياط عفاف وهي حاطه ايديها ع راسها..بعدين حولتهم وقالت:نشفتولي راسي مرضتوني..بتهبلوني..اقسم بالله قريب نشرك شلاتيتي ونطلع في الشارع نجري..
فجأه..سمعوا باب الحوش انفتح..
عفاف:ان شاء الله يطلعوا رجالتكم..
ملاك وسجى شافوا لفم الصاله وهما خايفات..
لعند مابانوا عليهم خليل ورفيق..جمد الدم في عروقهم من الخوف..
خليل وهو عاقد حواجبه:صوتكم واصل لاول الزنقه!
رفيق:شن في!؟.
عفاف:اسمع انت وياه كل واحد يشد مرته ايوه بيركبوني الضغط والسكر بعراكاتهم ونشافاتهم..تحملت فوق طاقتي راهو..
من سكات..
قدموا الزوز..
كل واحد فيهم جبد مرته من ذراعه..
سجى بخوف:اسمعني رفيق بالله عليك..
عفاف بقلق:راك تضربها ياولد..
رفيق:مادوريش امي..
وطلعوا من الصاله..
اما ملاك ماقدرتش ترفع عيونها في خليل من الخوف طلعها طول ومشي بيها للدار..
صالحه بضيق:سامحينا حتى حني ضيقنا عليكم..
كيف جت عفاف تتكلم قالت تهاني:لا والله خالتي صالحه ماقصدي عليك انتي ولاعرفه بكل..
عفاف ابتسمت وقالت:اني متونسه بيك ياحاجه صالحه لو جيتي بتطلعي مش مخلياتك..
صالحه ضحكت وقالت:لكن والله هلبه هكي الحوش ضاق..
عفاف:الضيق في القلوب ياحاجه صالحه وحني قلوبنا مش ضيقه..قعمزي قعمزي سلم وخيتي بنمشي نجيب العاله..
ومشت طلعت من حداهم..
قعمزت صالحه وتهاني مشت طلعت ورا امها بتمشي لدارها..
وين وصلت في دارها سمعت صوت خليل وهو يكشخ قالت:تستاهل..
وخشت لدارها وصكرتها عليها..
في دار ملاك واهلها..
ملاك بدموع:طلعنا من الحوش باهي سكننا في مكان تاني..
خليل بعصبيه: ونخلي امي واختي...احلمي..
ملاك برفعة حاجب:امك واختك قاعد معاهم رفيق..
خليل:اني الكبير..
ملاك:الكبير الله..لكن مرات تقعد بالأسابيع ماتجيش هني..ولا توا ع خاطر...وسكتت وهي تشوفله برفعة حاجب وعيونها معبيات دموع..
هو ضيق عيونه وقال:ع خاطر شنو!!؟ترا قولي..كانك مراة تقولي..
ملاك قعدت ساكته مابتش تتكلم..
هو هز راسه وقال:تمام..اسمعي جاي اخر مرة نسمع امي تشكي منكم..باهي!؟
ملاك قعدت تشبحله شويه..بعدين هزت راسها بإيجاب وقالت يصوت يدوب طالع...باهي..
هو شبحلها من فوق لتحت بعدين لف ومشي طلع من الدار..
وهي قعمزت ع السرير وقعدت تهز في رجلها بعصبيه ودموعها ينزلوا...
🍁🍁🍁
اما هو بعد ماسمع تلميح ملاك اللي فهمه طول..
ولى طلع من الحوش مرة تانيه...
وهو يمشي شبح لحوش هيثم بنظرات حزن...بعدين شبح القدام...
وكمل طريقه..وهو حامل هموم الدنيا في قلبه...
•••••°°°°°••••••°°°°°•••••
الساعه الثامنه والنصف مساءا..
"وينه هدا وينه!؟"
ولوحت تليفونها جنبها وخدت الريموت وقعدت تقلب في التلفزيون..
ع جية جنان وريحان وفي يدهم كراساتهم وهما يقولوا..
"عمتي..عمتي"
ابتسمت وشبحتلهم..
وصلوا فيها ومدولها كراساتهم وقالوا:شوفي..
خدت الكراسات وشافت واجباتهم...قالت بإبتسامة حلوة:شطورات حبيباتي..ممتازات..
ابتسموا الزوز وهما يشوفوا لعمتهم..
نسيبه مدت الكراسات وقالت:خلاص كملتوا واجباتكم؟
الزوز قالوا:ايه..
نسيبه:تمام..معناها بروا اغسلوا ايديكم بش نتعشوا..
الزوز قالوا:باهي..
ومشوا يجروا الزوز....
وهي تنهدت بعدين ناضت ومشت لدار سارة..
وصلت فيها ووقفت قدامها وطقت..
طقت مرة...واتنين..وتلاته...
بعدين قالت:سارة...!
ماردتش..
فتحت الباب بخوف وخشت..
لقت سارة راقده ع سريرها وهي لابسه المصليه..
كانت ملامح وجهها حزينه وهي راقده...
قعدت تشبحلها بنظرات الم..بعدين طلعت وصكرت الباب..
مشت بطريقها للكوجينه وهي تفكر..
تفكر في حال صغار خوها كلهم..
ابداهم بكبيرهم..اللي مايبيش يولي للحوش ولايبي يخشله بعد موت امه...وهي ماقدرتش تقعد معاه وتخلي صغار خوها بروحهم..
اضطرت نسيبه تسيب مدرستها وتنتقل للمدرسه اللي يقروا فيها بنات خوها..وخلوها تشد الإشراف بش تقعد معاهم الدواك كله..
وبالنسبه للماكله والشراب..كانت لما تروح بالبنات تخطم ع حوش خالتها ماجده تجيب منها الغدي..
لأنها للاسف ماتعرفش اطيب..
وسارة اللي كانت امها معلمتها بعض الشي..عازله روحها تماما في دارها..ماتطلعش منها الا للمدرسه..وحتى في المدرسه ديما تقعد بروحها..
شاده المصحف وتقرا في القرآن وبس زي مادايره في الحوش..
نزل وزنها لنص من قلة الماكله..وع قد ماحاولت فيها نسيبه ماقدرتش اطلعها ولو شويه من الحاله
اللي هي فيها...
مش عارفه كيف ادير ولاكيف تتصرف مع الكبار بالذات..
اللي في سن حرجه..يبوا حد يعرف يتعامل معاهم صح..
وهي ماعندهاش خبرة..ولاتقدر تتعامل مع حالتهم هادي..
هما يبوا حد يكون اقربلهم منها...
حد يحسهم ويحسوه..وليه سلطه عليهم اكثر منها...
وهالحد اللي يبوه الصغار....
ابعد مايكون عنهم...
للأسف..زاد ابتعد عنهم اكثر واكثر..
▪▪▪▪
◇هروبا...انكبيت كب ع الخدمه...عزلت نفسي حتى اني فيها هي..كنت هارب من اي شي..وأي حد يذكرني بأن اسيمه ماتت..
البلاد كلها سيبتها هداكا الوقت..وكنت مداير رحلة مكوكيه زي مايقولوا تخص الوزارة...
ونسيت كل شي ممكن يذكرني بحزني...وقعدت عايش ع أمل اني في يوم حنروح ونلقى اسيمه تستنى فيا...
ونسيتهم...ايه نسيت صغاري تماما...
▪▪▪▪
كان مقعمز في داره في احد الفنادق في دوله اوروبيه..
شاد في يده تليفونه..يتفرج فيه ع الشاشه ويستنى..
يستنى في اتصال..مستحيل يجيه..
اتصال..من هي..زوجته...اللي غابت غياب نهايه لارجعة فيه للدنيا..
فجأة..رن تليفونه..
انفزع..بعدين شاف المتصل كويس..
مسح بيده ع شعره...وحط يده ع راسه بالجنب وهو يشوف للشاشه..
شويه وفتح الخط..ورد..
هيثم:السلام عليكم..
لجين بقلق:وعليكم السلام دكتور..وينك؟
هيثم:في داري وين بنكون؟
لجين:دكتور!..حضرتك نسيت الاجتماع في وزارة الصحه ****!؟
شد جبهته وهو مغمض عيونه بشده..بعدين نزل يده وقال :تمام تمام..لحظات ونكون غادي..
تنهدت لجين وقالت:تمام دكتور...
هو فتح عيونه ونزل التليفون وصكر..
وناض..ومشي طول للدولاب بش يطلع حوايجه ويلبس..
🍁🍁🍁🍁
فهالوقت..
في ليبيا...
تحديدا طرابلس...في احد المزارع...
اصوات الاغاني الصاخبه..
متداخله مع اصوات شباب يغنوا ويعيطوا...
وسط هالشباب..
كان موجود زياد..مقعمز حاط ايديه في جيوب في كبوطه وهو يتفرج عليهم كيف يشربوا ويرقصوا ويغنوا..
يسأل في نفسه وهو يشبحلهم..
"اني جابني هني!!..شن ندير في وسط ناس زي هادي!!؟"
شويه جاه واحد مدله الشيشه وقاله:هيا نوض..عيش اللحظه..نوض..يامتوحد!
هو قعد يشبح للشيشه وخلاص..
شويه جي عبدالملك وجبد صاحبه وقال:فوته هدا..ماتجيش شوره..
ومشوا الزوز وين مافي باقي صحابهم..
عايشين لحظتهم..مع الشيطان...
وهو كان قرينه بادي يزن في وذنه..ويحاول يزينله اللي يشوف فيه..
زياد توا في حالة حزن وتعاسه..وكآبه..
واللي يشوف فيه قدامه..شي مناقض تماما للي هو فيه..
وطبعا المشاعر اللي يحس بيها هو مؤلمه..مؤذيه للقلب والروح..
وهو اكيد..يبي يتخلص من الشعور..واللي يشوف فيه قدامه مغري لأبعد حد..
والقرين..والنفس..مازالو يزينوا قدامه في اللي يشوف..
لكن قلبه..اللي مازال فيه شي من الإيمان..
خلاه ينوض طول...
ويلف ويمشي بسرعه بطريقه لبوابة المزرعه..
وعبدالملك اللي كان يشرب ويرقص مع صحابه شافه وهو ماشي..
قعد معاه بعيونه لين طلع..
بعدين شرب من الشيشه وكمل غني ورقيص..
🍁زياد..
بعد طلع...
ضم نفسه من الصقع..
وقعد يمشي لراس الشارع بش يطلع ع الطريق ويوقف تاكسي تروح بيه..
لما وصل لأول الشارع..
قعد يدور بين السيارات اللي تفوت ع تاكسي مالقاش..
لين يأس..
وكمل بعدين طريقه مشي..
لين وصل في جامع..
شبحله..لقي تلاته نفار طالعين منه..
اذكر..
انه لاصلى مغرب ولاعشاء..
وهادي مش المرة الاولى اللي يتهاون فيها زياد فصلاته في الجامع..
بل حتى في الحوش معاش ولى يصلي فيها في وقتها..
كان اذكر..يجمعهم مع بعضهم..
وكان راح يوم نسي صلاه فيه..معاش يدورها..
هو عارف تمام المعرفه..وزي ماعلماته امه..
ان الصلاه...سبب قوته...وسبب سعادته..وسكينته وراحت باله..
بس القلب اللي فيه شويه ايمان..
كان بادي يقسى شويه شويه...وبادي يعرض مع الأسف..
لهدا قال في نفسه..
"تو نصليهم مع بعض في الحوش وخلاص"
ومشي طول..
لعند ماعتر في تاكسي..وقفها..وركب..
وتحركت بيه للحوش....
...ولما روح...
طول خش داره وارتمي ع سريره ونسي كل شي..
🍁الحزن🍁
احد احب البيبان المفضله للشيطان اللي يقدر يخش منها للأنسان...يدمره..يدمر كل شي فيه حلو واولهم ايمانه اللي غالبا يضعف مع الحزن الشديد..
وزياد لأنه في سن يصير فيه هلبه تقلبات وتغييرات..
معرض جدا للإنتكاسات القويه...
خصوصا..مع عدم وجود حد كبير فوق راسه..يردع وينصح ويوجه..
••••••°°°°°°••••••°°°°°••••••
تاني يوم الصبح..
طلعت ساره من الحوش وهي ماشيه بطريقها للباص..
شافت قدامها تهاني ورفيق ماشيين..تجاهلتهم وكملت طريقها..
لعند ماجت جنبهم وفاتت من حداهم..
تهاني بلهفه:بنمشي لساره..
وسرعت خطواتها ولحقتها..
ورفيق يشوف لساره بحزن..يشوف لشكلها وحالها كيف تغيروا هلبه للأسوا..
تهاني:سارة صباح الخير..
سارة:صباح النور..
تهاني:شن جوك اليوم..
سارة بكآبه:الحمد لله على كل حال..
تهاني سكتت وهي تشوفلها بحزن..
وسارة لما شافت باصها واقف مشتلها بسرعه وركبت..
وتهاني تشوفلها وهي شاده شنطتها بقوة وعيونها معبيات دموع..
جاها رفيق وقال بحزن:منظرها مولي يخوف..خايف تصيرلها حاجه..
تهاني:واني خايفه اكثر منك..ياريتني معاها في نفس المدرسه..
تنهد رفيق وقال:بري لباصك جي..
شبحت للباص..ومشتله..
ورفيق قعد واقف يشوفلها لين ركبت ومش باصها..
بعدين لف ومشي بطريقه للورشه بش يفتحها...
•••••°°°°°••••••°°°°°•••••
الساعه العاشرة صباحا..
"مالا عابي وهما في حالهم هدا يتموا الموضوع انسى حبيبي"
راجح :عارف يام عارف..عارف حالتهم..لكن نبيكم تمشوا تطمنوا عليهم..تشوفوا شن وضعهم..
عواطف:بصفتنا شنو؟
راجح بإنزعاج:يام بالله عليك ماتعبنيش معاك..بري وخلاص..
عواطف بضجر:اووفف..باهي..باهي..ارفعنا العشيه اني واختك..
راجح ابتسم وناض باس راس امه..بعدين لف ومشي بيطلع من الحوش..
عواطف رشفت بإنزعاج من فنجان قهوتها وقالت:مش عارفه امتى يفهم ان هالموضوع نحس في نحس..من لما بدي فيه والمصايب بدت تنزل ورا التانيه..!
•••••°°°°°•••••••°°°°°°•••••
في مدرسة البنات الثانويه...
تحديدا..
الفصل اللي تقرا فيه سارة..
في حصة الفيزياء..
كانت طالعه ع السبورة تحل في مسأله..
واستاذ جمعه مركز معاها..حسها مش مزبوطه..
جمعه:سارة..خشي قعمزي..
سارة التفتت وقالت:ماكملتش استاذ..
جمعه:حليتي نصها تو تكمل عليك وحده من زميلاتك..
سارة:لااستاذ تو نكمل اني..
ولفت للسبورة  وكملت تحل وهو يشبحلها بأسف..
بعد كملت..
حطت الخطاط..
وكيف جت بتلف موليه لمقعدها..حست بدوخه..
لكن شدت روحها لين وصلت في مقعدها..
ولما وصلت فيه..قعمزت بالسيف..
لكن ماقدرتش تقاوم اكثر من هكي..
فقدت وعيها..وطاح راسها ع كتف زمليتها في المقعد..
وناضوا يجروا البنات يشوفوا فيها..
وجمعه ناض بسرعه وطلع للفصل متوجه لغرفة الأخصائيه..
...........
■فهالوقت..
في الفصل التاني..
كانت في حصة عربي..تعطي فيها جيهان لطالبات ثانيه ثانوي علمي..
جيهان:من يعرب الجمله هادي..
مدوا البنات ايديهم..ومن ضمتهم دانيه اللي ع قد ماتحاول تشارك معاهم ماتبيش جيهان تعبرها..
جيهان:نوضي انتي..
نوضت طالبه تانيه..
ودانيه برغم غضبها الشديد فضلت كاالعاده تسكت اتقاء لشرها...
وبعد عشرة دقايق بالزبط..
رن الجرس..
جيهان:الحصة الجايه الاختبار..اقروا كويس وركزوا وماتوثقوش في ارواحكم هلبه..
وابتسمت بمكر..ومشت طلعت..
دانيه:ماتوتكوش في ارواحكم. ننننننن..
هبه بضحكه:قاصداتك..
دانيه؛عارفتها الابليسه هادي..لكن ماعندها مادير معاي اني..
ضحكت هبه .
ودانيه حتى هي ضحكت وناضت..
ومشوا كلهم طلعوا للآستراحه..
في الساحه..
كانت سارة مقعمزة وشاده فيدها باكوا عصير صغير الحجم وتشرب فيه وهي سارحه..وزوز من زميلاتها حداها يفطروا ويهدرزوا..
:لالا ماعنديش نيه نمشي..
:اني بنمشي غير نراجي ماما تفضى مانمشيش مولات من غيرها..
نزلوا دموع سارة..
شبحتلها وحده منهم..نخصت صاحبتها..
وصاحبتها شبحت لسارة وحطت يدها على فمها..
سارة ناضت من حداهم وهي تمسح في دموعها ومشت..
:والله ماقصدي ندوي عادي..نسيت بكل..
:مسكينه حالتها تقطع القلب..ربي يصبرها..
...وسارة...
تمشي وهي تمسح فدموعها اللي ينزلوا وحده ورا التانيه..
ع جية دانيه تجري..
وقفت قدامها وقالت بخوف:سارة حقه اغمى عليك في الفصل!
هي رشفت وهي تمسح في دموعها وتقول؛عادي مافيا شي اهو واقفه قدامك..نتكلم ..نتحرك نتنفس..مامتش..
ولولا ان النبي قال"لاتتمنوا الموت"...كنت تمنيته..
ومشت من حدا دانيه وخلتها واقفه تشوفلها بحزن...
وساره مشت للتركينه اللي تعودت تقعمز فيها..
طلعت مصحف صغير من جيبها وقعدت تقرا في القرآن...
••••••°°°°°°••••••°°°°°••••••
الساعه الواحده ظهرا..
في مدرسة "شروق العلم"
كانت نسيبه واقفه تكلم في زميله ليها..
نسيبه:بالله وخيتي شدي مكاني ساعه ساعه ونص بش..
زميلتها؛ولايهمك حبيبتي نوسه..كان تبيني نشد اليوم كله ماعندكش مشكله..
نسيبه بإبتسامه مجامله؛لالا صحيتي ساد ساعه ونص..هي السلام عليكم...ومشت بسرعه..
وزميلتها ردت عليها بعدين قالت:الله يرحم ابله اسيمه..تشتتوا من بعدها..
ومشت بتشوف شغلها..
•••••°°°°°•••••°°°°°••••••
بعد مشوار خدي من وقتها نص ساعه..
وصلت للعماره..
خشتلها وركبت بالسرعه للشقه..
فتحتها وخشت..
بعد صكرت الباب وراها..خشت داخل وهي تشوف حواليها بصدمه..
الحوش كان في حالة فوضى..
وملابس زياد ملوحات هني وهني...
قعدت تقيم فيهم من الوطى وهي مش مستوعبه وضع الحوش كيف مولي ليها اسبوع بس ماجاتاش..
وقفت وشبحت لدار زياد بضيق..
وهي تتذكر كيف كان منظم ويكره الفوضى ومايتحملهاش..
كيف توا انقلب حاله وولى مايهتم لشي..
فجأه..
انفتح الباب وطلع زياد من الدار ويبان كيف نايض من النوم..
وواضح انه راقد بحوايجه اللي طلع بيهم..
نسيبه بصدمه:قصدك مامشيتش الجامعه!
هو انخلع وشبحلها وقال:امتى جيتي!؟
نسيبه عقدت حواجبها بحزن وهي تقول:لامتى يازياد هالحال قولي لأمتى!معقوله انت هكي!!امتى وليت هكي!؟ فوضوي مستهتر من امتى!؟
زياد بإنزعاج؛هدا علاش مانردش عليك عارفك بتنفخيهم.
ومشي للحمام..
نسيبه بحده؛نكلم فيك قاعده..
زياد قلب عيونه بعصبيه والتفت وقاللها:كان واجعاتك شقتك تو نطلع منها
نسيبه رفعت حواجبها وهي تشوفله بدهشه..
اما هو بعد ماشبحلها بغضب..لف ومشي للحمام..
خشله وخبط باب بقوة لين انفزعت نسيبه..
نسيبه بعجز:لا اني هدا معاش نقدر عليه خلاص..
والتفت للشقه وهي مضايقه ومعصبه وقعدت اضم فيها ودموعها ينزلوا..
عمرها ماحست روحها عاجزة زي توا..
ممكن لأن الحزن حتى هي خدت منه نصيبها وخلاها ضعيفه..
من داخل هشه ومعاش قادره على شي...
قعدت تضم وقلبها موجوع..وبعد كملت فكرت تحكي مع زياد مرة تانيه بهدوء..
لكن زياد ماعطهاش الفرصه طول لبس حوايجه وطلع بدون مايشبحلها حتى الشبح..
ونسيبه بعد طلع قعدت تبكي.....
•••••°°°°°°••••••°°°°°°•••••
"يوم الخميس!!"
عبدالمجيد:ايه يوم الخميس..
سدينه بصدمه:اني حسبتك نسيت الموضوع..معاش تكلمت فيه بكل!
عبدالمجيد:معاش تكلمت فيه لان الراجل ماكانش فاضي كان ينظم في اموره مع مرته الأولى..
سدينه ودموعها ينزلوا:حرام عليك ياراجل والله حرام تلوح بنتك هالتلويحه..
عبدالمجيد بتهكم:تلويحه! ياغشيمه يادرويشه هلبه غيرك يتمنوا لبنتهم راجل زيه..راقد ع خميره باهيه تو تشوفي بنتك كيف تولي من وراه وكيف تخلينا حني بعدين كان عرفت تشغل دماغها..
سدينه حطت ايديها ع خدودها وقعدت تبكي بصمت..
عبدالمجيد بإزدراء:وجه فقر..
ومشي طلع من حداها..
وسدينه تقول بألم:حسبي الله ونعم الوكيل..حسبي الله ونعم الوكيل...

....يتبع...