البطل المغمور "شمس الغروب"

نهاية الفصل الاول...

اللي فايتاته صلاة او خش عليه وقت صلاة يصلي الأول بعدين يقرا...اول ماتتحاسب عليه الصلاة يوم غدوة...💕
انتم الآن مع نهاية الفصل الأول من روايه #البطل_المغمور
"شمس الغروب"
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
في المدرسة الثانويه للبنات...
في الإستراحه..
مقعمزات الزوز تحت الرايه وحده فيهم قالت للثانيه..
سارة بقلق:اهو قعدنا بروحنا احكي شن صاير معاك؟
رهف دموعها بدوا ينزلوا وهي تحكي؛بابا ياسارة بابا سبب عذابي فهالدنيا..
سارة عقدت حواجبها وقالت؛خيره شن دارلك؟
رهف بنبرة باكيه:يبي يزوجني ياسارة...
سارة بصدمه:كيف؟ وقرايتك!!؟
رهف:مش مهمه خلاص مدام عمي طلبني لولده لاعاد في قراية مهمه ولاشي تاني..
سارة سكتت شويه وهي تشوفلها بعدين قالت:كيف يعني يبي يزوجك توا ولاتنخطبي بس!؟
رهف وهي تبكي:زواج طول ياسارة توا..وياريت من واحد يستاهل اكبر مني بهلبه ياسارة وجاهل ومش مكمل قرايته ومتخلف هلبه ياسارة..
سارة دموعها عبو عيونها اللي كان يشوفوا لرهف بصدمه ومش عارفه شن تقوللها..
رهف:مش عارفه شن ندير ياسارة حاسه روحي بنموت..اني مانبيش نتزوج توا مازال بكري عليا مازال هلبه اني نبي نقرا نبي نخش طب نبي هلبه حاجات تانيه غير الزواج ياسارة.
رشفت وقالت..حتى لو جي يوم وتزوجت نبي ناخد واحد يناسبني مش واحد زي ولد عمي هدا يدفني بالحياه..
سارة نزلوا دموعها وهي تقول:باهي حاولتي تكلمي بوك..
رهف ضحكت بتهكم من بين دموعها وقالت:شن تقولي ياسارة بوي مايقدر يدوي معاه ولايناقشه اني غير نسمع صوته لحمي ينوض شوك شوك من الخوف..
سارة:امك تكلمه تحاول معاه..
رهف:ماما ماتقدر دير شي من طول عمرها وهي تقول باهي وحاضر ماتقدرش تخالفه حتى بنظرات عيونها سارة..
بلعت سارة ريقها وقالت:لاحول ولاقوة إلا بالله..
رهف حطت ايديها ع وجهها وقعدت تبكي..
سارة حطت يدها ع ظهر رهف ومررت نظرها حواليها وهي تقول...خلاص حبيبتي خلاص..الساحه تتفرج عليك رهف حاولي تتماسكي..
حولت رهف ايديها وهي تمسح في دموعها وتقول:شن دير ياسارة قوليلي..
سارة مسحت ع ظهرها وهي تقول:الدعاء يارهوفه الدعاء ماليكش غير ربي رهوفه ادعيله في كل وقت يصرف عنك ولد عمك هدا ويهدي بوك..
رهف:ماظني بوي ينهدى..
سارة:ماتقوليش هكي يارهف ان الله على كل شي قدير..خلي عندك ثقة بالله يارهوفه ارجوك..
رهف تنهدت وهزت راسها وهي ساكته..
~~~~~~~
♡تنهدت بعدين قالت...كنت حاسه انها مش مقتنعه بكلامي وسايرتني مسايرة..رهف كانت عندها مشكله واضحه معندهاش..كيف بنقولها...مررت نظرها حواليها وهي تفكر بعدين قالت...ان صح التعبير ماعندهاش مخزون ايماني او ديني قوي...حتى اني لما كنت نحاول  نرغبها في الحجاب كنت نحس فيها تضايق من الموضوع..ماعرفتش هدا شن سببه..ممكن البيئة المحيطه بيها السبب وشكل حياتها..يعني عيلتها زي مايسموا فيها توا..ودارت اشارة بين الظفرين وهي تقول"open maind"  منفتحين يعني...وطبيعي جدا الناس هدا يكون بعاد عن الدين بكل شي فيه...الله اعلم ممكن كلامي ماينطبقش ع الجميع بس هدا اللي استنتجته في اللي صار مع...تنهدت وقالت...مع رهف...
~~~~~~~
■فهالوقت ..
في الساحة..
كانت دانيه واقفه تهدرز ع صاحباتها...ومرة مرة تشبح لسارة ورهف..
وعيون جمعه من نفس الشباك تراقب فيها..وهو يشرب في قهوته...
قطع عليه انسجامه...اكثر صوت مزعج بالنسبه ليها حاليا..
صوت خطيبته وهي تنادي بإسمه بطريقه مستفزة...
"جومعه"..
التفتلها..
كانت ملامح وجهها الحاده محسساته انها حتفتح معاها موضوع مزعج..
جاته وقفت جنبه..شبحت للساحه من الروشن..بعدين شبحتله برفعة حاجب وهي تقول:نبي نكلمك في موضوع مهم..
جمعه؛اللي هو..
جيهان:موعد العرس..
جمعه بضجر:تس..اففف..
جيهان:اسمع جومعه من البدايه اهلي وضحولكم تطويل الخطوبه مايبوشي وماعندنا علاش نطولوها..
جمعه؛واني توا مش واتي ولا الصيف هدا حنكون واتي ولا العام هدا من اصله..
عقدت حواجبها وهي تقول:ماتقوليش انت خيرك شن صاير معاك شن اللي مغيرك هكي؟
جمعه:من قبل اني معاك هكي شن تغير يعني..
جيهان؛ايه صح بس الفترة الاخيرة بزياده..بدال مع الوقت اسلوبك معاي ومعاملتك يتحسنوا زادو سوء..
جمعه عكرش وجهه وهو يقول:اسمعي راسي مصدع وبعدين حصة مش ناقصك انتي وقطافك الفارغ..
رفعت حاجبها وقالت:عندك حصه؟! شبحت للساحه بعدين رجعت شافتلها وقالت؛تمام بنسكت توا بس..لكن بعدين تو نعرف شن ندير..
جت بتمشي وقفها لما قال:تهددي انتي!
جيهان:افهمها زي ماتبي تفهمها..
جمعه؛وانتي مانتهددش بابنت اللواء...واني اللي اليوم نعرف شن ندير..
شبحتله بحده..
وهو رجع شاف للروشن وهو يشرب في القهوة..
مررت نظرها عليه من فوق لتحت..
بعدين مشت من حداه وهي في قمة العصبيه..
وصلت لحجرة المدرسات خدت حاجاتها ومشت طلعت بسرعه وهي شاده دموعها وحده من الابلات قالت..
"مش عاطيه حصتك ياابله"
جيهان ماردتش وكملت طريقها وهي ماتشوفش قدامها كانت صورة دانيه وماتسمع في شي غير كلام جمعه..
نزلت لوطا ومشت طلعت من المدرسه..ركبت سيارتها وتحركت طول...
••••••••°°°°°°°°••••••••°°°°°°°°•••••••
في مكتبه مقعمز يشوف في للاب توب...
يقرا عن اهم الابحاث الجديده اللي تخص علاج الإدمان نفسيا..وكذلك يبحث عن اهم المراكز لعلاج الادمان وشن الأنظمه اللي اتبعوها ويحاول يستفيد منها..
طق باب المكتب..
هيثم:ادخل..
انفتح الباب وخش وظف السكرتاريه وهو يقول:دكتور في واحد برا قال انه محامي لوحده اسمها نوال فتحي..
هيثم شبحله شويه بعدين قال:خليه يخش..
طلع الموظف ولحظات وخش المحامي..
المحامي:السلام عليكم..
هيثم وقف وهو يقول؛وعليكم السلام..
وصل فيه المحامي ومد يده وهو يقول:ابراهيم خليفه محامي المستشارة القضائيه نوال فتحي..
صافحه هيثم وهو يقول:تفضل..
قعمز المحامي وهو يقول؛شكرا..
قعمز هيثم وقال:تفضل بشن نقدر نخدمك..
المحامي:بعتتني الاستاذة نوال بناء ع قضية حترفعها ع المركز..
هيثم عقد حواجبه وقال:شني؟!
المحامي؛حضرتكم هني ملتزمين بالسريه التامه في علاج نزلائكم..
هيثم:طبعا..
المحامي:والفيديو اللي طلع من هني لفاتح بشر!؟
رفع هيثم حواجبه وقال:قصدك تقول ان الاستاذ نوال المستشارة..والدة النزيل فاتح بشر!؟
المحامي:ايه والدته
ضحك هيثم وقال:ع حسب علمي النزيل فاتح ماعنداش اهل او بمعنى اصح..تبروا منه...
المحامي:مافيش منه الكلام هدا...
هيثم:لافي منه..فاتح من لما خش للمصحه ماجي حد شافه ولاسأل على حاله من عيلته حتى بالتليفون..
المحامي:مجرد خلافات عائليه لاأكثر..
هيثم:الخلافات هادي تخليهم يقطعوا ولدهم بالمرة ماخطرش ع بالهم يوم يتصلوا يسألوا عن وضعه؟! حتى بعد ماحاول ينتحر..!كان قريب من الموت لولا الطاف الله معقوله ماوصلش لمسامعهم الشي هدا..تفكروه كان لما طلع في فيديو بمحض ارادته!
المحامي:فاتح يعتبر مريض يادكتور ومش مسؤول عن تصرفاته..
عقد هيثم حواجبه بغضب وهو يقول:شن غير مسؤول عن تصرفاته! مش مجنون هو ياسيد ولاهادي مستشفى امراض عقليه..
المحامي:معناها انت عندك علم والموضوع مش فارق معاك ..كويس هكي نعرفوا على من نرفعوا القضيه..
هيثم ابتسم بتهكم وقال:كان قدرت تكسبها ارفعها..
المحامي قعد يشبحله شويه بعدين ناض..ومشي بيطلع..
هيثم:وصل لأمه او بوه ان اي تصرف يديروه يضر مصلحة المركز والنزلاء اللي فيه حنرد عليه رد مايعجب حد..
فتح المحامي الباب والتفت شبح لهيثم..
هيثم رسم ع وجهه ابتسامه مستفزة..
المحامي طلع وسكر وراه الباب..
تبدلت ملامح وجه هيثم للغضب وهو يقول:مش عارف شن هالناس هادي..ورجع شاف للاب توب..بعدين قال..استغفر الله واتوب إليه...
•••••••°°°°°°••••••°°°°°•••••••
ع الموطو..واقف بيه قدام واحد من المحلات يتكلم بالتليفون..
راجح:وصلنا لبعض الناس المشكوك في امرهم واكتشفنا علاقات تجمعهم بناس تانيه ليها مكان في البرلمان وفي الحكومه سيدي.........................وزير الداخليه امتى مروح....................تمام..........لا حاليا مانبيش يكون في تواصل بيني وبينه بناء ع طلبه هو مايبيش يثير الشك عنده حق................تمام سيدي.......اني ساعه تانيه ونكون في المديريه...........السلام عليكم.....
نزل التليفون وحطه في جيبه..بعدين خدي الخوذه ولبسها..
وشغل الموطو وتحرك طول بإتجاه المدرسه...
بعد طول مسافه لما وصل فيها لقي الطالبات بدوا يطلعوا..
وقف يستنى...شافها طالعه هي وسارة كالعاده..
دانيه:هو معقد الحق ماينفهمش لكن قلت بالك انتي تقدري تفهميه..
ابتسمت سارة بخجل وهي تقول:بجد احلى حاجه وصلتني لتوا..وقداش نتمنى يكون هديه..
دانيه رفعت حواجبها ونزلتهم وهي تقول:تو نشوف صاحبه ونرد عليك..
ضحكت سارة وقالت:تمام...سلام..
دانيه ابتسمت وقالت؛سلام..
وكل وحده فيهم مشت للباص وركبت...
ودانيه قلبها يرقص من الفرحه..
تحرك باصها ولحقهم راجح...ووراهم....
جمعه....
......قعدوا الزوز يلحقوا في الباص لين درس في اول الشارع.....
نزلت منه دانيه...
وراجح راجاها لين مشت ونزل من الموطو ولحقها بعد ماحول الخوذة..
جمعه لما شافه شبه عليه..
حول النظارات وحاول يشوفه كويس...مازبطاش..
فتح باب السيارة ونزل ومشي لحقهم بمسافه...
وهو يلحق فيهم بدون ماحد يحس بيه..
شاف راجح وقف حدا وحده من السيارات...
خشت دانيه للعمارة بعد ماشبحتله...
وهو ابتسم بعدين لف بيولي..
ادرق جمعه ورا وحده من السيارات..
قعد يمشي راجح بإتجاه الموطو لين فات من حدا جمعه...
جمعه شافه عن قرب وركز فيه..عرفه...وانصدم...
وصلت راجح في الموطو ركبه ولبس الخوذة وتحرك...
جمعه وهو مصدوم مشي لسيارته..
وفي وسط صدره جمرة تلهب...وعقله مش مستوعب اللي شافه واللي عرفه...
وهدا كله كان على عيون حسام...
اللي قاله وهو يحرك في يده حركه دائريه؛ياسلام ياسلام ياسلام...طلعت وحده.......حرك راسه يمين ويسار وولى خش للمحل وهو يقول...اللهم جيرنا...
••••••°°°°°°••••••°°°°°°••••••
"قتليهم غدوة جايين ان شاء الله"
عفاف وهي تشوف في طنجرة الغدي:ايه..
خليل تنهد وقال:كويس..تعرفي يام..
غطت عفاف الكسكاس وشبحتله..
خليل:هدا وين استريحت بعد اطمنت ع ملاك اللي كان ضميري يوجع فيا هلبه عليها..كنت خايف نكون ظالمها يام ويقعد ذنبها في رقبتي..
عفاف:مش انت اللي ظلمتها ولدي ملاك وخوها اللي ظلموهم والديهم اللي لوحوهم مع عزوز كبيرة ان شاء الله تقدر تعاني روحها..ام ماريتش بقسوة قلبها جابتهم ونستهم..وبو حيوان حاشاك يجري ورا متعته وبس..ياويلهم يوم غدوة من ربي..
خليل قعد ساكت وهو يفكر في كلام امه وع وجهه مرسومه ملامح الاسف..
عفاف:وكان نسوهم ماليهم ربك سبحانه ماينساهمش سخرنا حني ليهم وخلاهم تحت حمايتنا واهو الحمد لله بعت للبنيه نصيب باهي عن طريقنا حني..
خليل ابتسم وقال:الحمد لله اللي استخدمنا في الخير وحني في عز شرنا..
عفاف:هدا ربك ياخليل..حكيم ورحيم..ومافيش ارحم منه..
خليل هز راسه بإبتسامه وهو يقول:الحمد لله..
رن تليفونه..طلعه من جيبه وشاف المتصل ضحك وهو يقول:كنتك..
عفاف بضحكه:برا رد عليها رد..
ضحك خليل وطلع من حدا امه ورد..
خليل:ياآلو..
"ياآلوات...وينك"
خليل:في الحوش..
"باهي مكسده ماعندي شي نديره مقعمزة في المدرسه نش الذبان..قصدي الصغار..هدرز عليا"
خليل بضحكه:باهي...وفتح الباب وطلع...
وامه وهي طالعه من الكوجينه سمعاته يضحك..
ابتسمت وقالت؛ربي يكمل عليك فرحتك يارب..
ومشت بطريقها لوسط الحوش..
••••••°°°°°°••••••°°°°°°°••••••
الساعه السابعه مساءا...
"مازال يارتاج"..
رتاج غطت راسها بكاب العبايه وهي طالعه من الدار..
وصلت في وسط الحوش وهي تقول واتيه..
ابتسم عادل وقال:ترا شويه..
وجاها نزل خمارها ع وجهها..
رتاج:كيف بنمشي هكي!؟
عادل بضحكه:اني معاك خيرك..
وشدها وقعد يمشي بيها وحده وحده لين طلع بيها من الحوش ووصلها للسيارة...
ركبها للسيارة بعدين ركب هو وطلع بالسيارة من الحوش..
....في الطريق....
عادل:خليك عاديه وماتخافيش خواتي طيبات هلبه راهو..اما بالنسبه لزوجتي الأولى تجنبيها وحاولي تتجاهليها...
تنهدت وقالت؛حاضر..
ابتسم وقال:ايه ماتنسيش تقري ع نفسك جماعة اختي ياخدوا بالعين ردي بالك..
ضحكت وقالت:باهي..
وكملوا الطريق وعادل يهدرز عليها ويضحك يحاول يخفف عنها التوتر..
اللي كل ماله يزيد لما يقربوا من حوش اخته...
لعند ماوصلوا كانت خلاص رتاج حتفقد وعيها من شدة التوتر والخوف...
اتصل عادل بأخته بش تستقبلهم..
بعدين نزل ونزل مرته ومشي بيها للباب اللي يخشوا منه النساوين..
وغادي كانت تراجي فيهم اخته..
اخت عادل:يامرحبتين بالعريسه..
صافحتها رتاج وهي سلمت عليها بالاحضان سلام حار صدم رتاج وزاد خوفها..
عادل:في امانتك راهو..
اخته:اكيد ماتخافش عليها ياغالي..
عادل بإبتسامه؛هي نستأذن اني ماشي المربوعه..
اخته:سلامتك وخيي..
مشي عادل..
واخته قالت لرتاج:هي تعالي خشي حبيبتي..
وخشت معاها رتاج للحوش..
اخت عادل:هاتي عبايتك..
رتاج حولت العبايه...واخت راجلها تشوفلها..ارتسمت ع وجهها ملامح الإنبهار وهي تقول:الله يبارك الله يبارك..
رتاج ابتسمت وهي تقول:تسلمي..
اخته:عنده حق ياكبدي شن جاب لجاب هدا وين عاش وخيي..
ابتسمت رتاج بمجامله ومابتش تعلق..
اخت عادل:هي خشي حبيبتي خشي..
وقعدت تمشي هي وياها لين قربوا للصاله..
سمعت صوت ضحكة همانه بطنها وجعتها..
واول ماوصلت للصاله وطلت ع الموجودات..
كلهم اتفاجئوا وفتحوا فيها عيونهم وهما منبهرين بيها..
اخت عادل:رتاج مرت عادل التانيه..
باقي خواته ارتسمت ع وجوههم ابتسامة فرح وناضوا يرحبوا برتاج المصدومه في موقفهم..
وعيون همانه تشبحلهم بحقد...وتشبح لوحده مقعمزة في طرف الصاله كانت تشوف لرتاج بملامح حزن ودموعها معبيات عيونها....المراة هادي ام همانه...ضرت رتاج...
••••••°°°°°°••••••••°°°°°••••••
الساعه العاشرة ليلا..
عواطف بقلق؛من لما روحت وهي حابسه روحها في دارها لابت تاكل لابت تطلع..
راجح:صايرة مشكله بينها وبين خطيبها؟
عواطف:مافيش غير هكي ياولدي واكيد ع حكاية موعد العرس..
راجح:بيني وبينك يام اني خطيبها هدا لاتريحتله ولاتريحت لعيلته ولانزلي من زور..
عواطف:والله الوليد كويس وهما ناس باهيه لكن اختك مدلعه زياده عن اللزوم وانت عارفها..
تنهد راجح وقال:نوض انشوفها؟
عواطف:نوض سلم وليدي نوض..
هز راسه وناض ومشي توجه لدار جيهان..
....اللي كانت راقدة فيها ع سريرها وهي تبكي..
وتشوف لتليفونها في يدها يرن وماتبيش ترد عليه..
كان من جمعه وهي عارفاته شن يبي..
يبي ينهي كل شي...وهي ماتبيش...ولاحتقدر تتحمل فراقه...
فهاللحظه دق باب دارها..
ماكانتش مهتمه لأمره..
"جيهان...جيجي"
جيهان ببكي:خلوني حالي خلوني مانبي حد مانبي نكلم حد ولاحد يكلمني...خلوني...وانهارت بالبكي...
وراجح ماتحملش حالتها هادي طول فتح الباب وخشلها..
🍁🍁🍁🍁
وجمعه يتصل بيها ويعاود  ولما أيس انها ترد عليه قال:تمام انتي تبيها هكي..غدوة تو نهيها مع بوك بروحه...
وحط التليفون ع الكامدينو..بعدين سرح بتفكيره فاللي شافه اليوم..
كان يبي يسابق الوقت..ويخطف محبوبته من اللي ناوي يخطفها منه بدون قصد...
••••••°°°°°••••••°°°°°°••••••
تاني يوم...
في المدرسة الثانويه للبنات...
الساعه الثامنه صباحا..
كانت دانيه جايه للمدرسه وهي تجري..
دانيه بإستعجال؛صباحو بنات صباحو صباحو..صباحو سارونتي عليا النظافه اليوم..
ومشت تجري ..
والبنات يضحكوا...
هبه:قريب جت للمدرسه طايره..
سارة ضحكت ع كلام هبه..بعدين قعدت تمرر في نظرها وادور في رهف..بدت تتلاشى ضحكتها وتحل محلها ملامح القلق..
....ودانيه....
وهي راكبه تجري وصلت الدور التاني توجهت تجري لفصلها..
فجأة وقفت..
لما شافت جمعه طالع من المعمل..
خافت وغيرت عيونها عنه وجت بتمشي..
هو وقف قدامها..
وقفت وهي خايفه..قامت عيونها وشبحتله..
وهو قعد يشبحلها بإبتسامه..
وخرت دانيه خطوه وقالت؛تبي حاجه استاذ!؟
جمعه هز راسه بإبتسامه وقال:اممم...نبيك توافقي لما نخطبك..
توسعوا عيون دانيه بصدمه..
وجمعه يشبحلها بنفس الابتسامه...
وفي هاللحظه وصلت جيهان لنفس الممر اللي هما واقفين فيه..
وقعدت واقفه في مكانها تشبحلهم ودموعها بدوا ينزلوا بروحهم...
ومافيش موقف اصعب من موقف دانيه في هاللحظه اللي من الصدمه خلتها مش قادره تتحرك ولادير اي ردة فعل...
••••••••°°°°°°°•••••••
في احد الحدائق العامه في العاصمه..
كانوا نسيبه وجنان مقعمزات يفطروا...
وماجده تتمشى...
وهيثم وريحان مقعمزين تحت شجرة برواحهم ..
الأب يهدرز على بنته..
ريحان:بنصح بابا بعد العمليه!
هيثم بإبتسامه:ايه حبيبتي بعد ديري العمليه تقعدي فترة بسيطه هكي ماتلعبيش ولاتمشي للمدرسه لين تبري زين بإذن الله بعدين تقعدي تلعبي وتجري وتنقزي وتخشي نادي الكارتيه..
ريحان وهي مذهوله:حقه بابا..
هيثم:حقه ياروح بابا..
ريحان ضحكت بفرح..
ضمها وهو يضحك قال:قصدك بيولي عندي زوز نسيبه!
ريحان:ايه بنولي زي عمتو..
هيثم:إهييه ربحت ياهيثم ربحت..
وريحان تضحك..
.....وماجده واقفه من بعيد شويه تشوفلهم....
تنهدت بعدين لفت وبعدت شويه..
قامت تليفونها واتصلت برقم محدد..
حطت التليفون ع وذنها وراجت الرد..
ورد اللي اتصلت بيه..
"ماجده!"
ماجده تنهدت وقالت:صباح الخير مجيد...
▪▪▪▪▪
◇فترة صعبه...كانت هلبه صعبه...ممكن تكون عند ناس تانيه  مواقف عاديه لأنهم مروا بأصعب من هكي..
لكن اني اللي عشت سنين حياة هاديه مافيها مشاكل تذكر
حتكون المواقف هادي عندي ازمات صعبه..كل مانذكرها نقول...سبحان من طلعني منها واني واقف على رجليها...
سبحان اللي كان معاي..في كل لحظه..في موقف...
كنت نحس بيه وهو يرفع فيا لما نطيح..وهو يطبطب عليا لما يتملكني الحزن ...وكأني نسمع فيه وهو يقولي..
لاتحزن اني معك...
ولما نخاف والقلق يسيطر عليا يقول..
لاتخاف اني معك اسمع وارى...
ولما نتعب من ثقل الحمل...من كيد الاشرار ومكر الماكرين يقولي..
《واصبر وماصبرك الا بالله ولاتحزن عليهم ولاتك في ضيق مما يمكرون..إن الله مع الذين اتقوا والذين هم محسنون》
...إن الله مع الذين....اتقوا....والذين هم....محسنون...
▪▪▪▪▪
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
بعد مرور شهر ونصف...
التاسع عشر من شهر يوليو...
الساعه الحادية عشر صباحا..
في الطريق...
احسان يسوق في السيارة وهيثم راكب جنبه..
شاد المصحف ويقرا في القرآن...
الزوز متوجهين بطريقهم للمحكمه..
احسان:دكتور وصلنا..
هيثم؛سبحانك اللهم وبحمدك اشهد ان لاإله الا انت استغفرك واتوب اليك..
سكر المصحف وحطه في درج السيارة..
احسان:اهم شي توا تحافظ ع هدوئك دكتور..الصحافه والتلفزيون قدام المحكمه ممكن يستفزوك بالأسئله انت تجاهلهم تماما لين نخشوا داخل..
هيثم:تمام تمام..
ورجع يهمس بذكر..
《لاحول ولاقوة الا بالله》
.....فهالأثناء....
في حوشه..
في الجنان...نسيبه مقعمزة تتكلم بالتليفون..
نسيبه:قلبي يدق بقوة من الخوف..
"اطمني نواستي بإذن الله حيكون الحكم لصالح زياد ومش هكي بس حيعطوه اذن يحضر العرس"
نسيبه ابتسمت وهي تقول برجاء:يارب ياخليل يارب..
خليل وهو يشوف في العمال كيف يركبوا في المطبخ في الشقه متاعه:يارب..
رن تليفونه البيلا..
طلعه من جيبه وقال:معليشي حبيبتي جاني تليفون مهم..
نسيبه:ولايهمك تكمل كلمني..
خليل:تمام...سلام..
نسيبه؛وعليكم السلام..
سكرت..وهو رد ع تليفونه التاني..
خليل:ايوه..
"تأكدنا من المعلومات اللي عطتيهالنا...لكن على هكي العمليه حتكون بعد تلاته ايام من فرحك خليل"
ابتسم خليل بحزن وعيونه معيبات دموع وهو يقول:عارف...
"مستعد لكل شي"
خليل تنهد وقال:اكيد..والله المستعان..
"طلعت راجل حقاني ياخليل "
ضحك خليل وحك مقدمة انفه بعدين هز راسه بإيجاب وقال:بارك الله فيك..تصدق متمنيك تحضر..
ضحك ورد عليه يقول
"والله حتى اني نتمنى...ع كل حال مش حنقدر نحضر عرس اختي في نفس الأسبوع"
خليل:اها...مبارك..ربي يكمل ع خير.
"اجمعين ان شاء الله"...
........في المدرسة الثانويه للبنات.....
امتحانات اخر السنه..
في امتحان الفيزياء..
كان واقف يمرر في نظره ع الطالبات وهو يقول:اسئله بسيطه وساهله ماتاخدش ساعه..
سارة شبحتله بعدين نزلت راسها لورقتها..
وعيونها يشوفوا لمقعد رهف ومكانها فيه اللي كان فاضي..
نزلت من عينها دمعه مسحتها طول ورجعت شافت لورقتها...
............°°°°°°°°°°°°
"كانك مراة تنزلي..انزلي وريني شن بديري"
سدينه بخوف:ت تعالي جاي يابنت ياسر من العار الناس تتفرج..
رتاج:مانيش متحركه لين تنزل الحقيره ونوريها قدرها...
سدينه:ياحليلي اني ياحليلي راك حامل يابنت كان تصير فيك حاجه..
رتاج؛ان شاء الله تصير ان شاء الله..
..............
في الطريق..
عادل:اني والله مانبي ولاناويه لكن بنت مسكرة راسها..
مجيد:نكسرلهوها راسها هدا غصب عنها تولي..
عادل ؛لا رد بالك يامجيد تمد يدك عليها والله مايصير خير بعدين..اني المهم عندي ولدك يطلع منها..
مجيد:ماتخممش فيه تو نتفاهم اني وياه....
عادل هز راسه وقعد ساكت..
ومجيد قعد يشبحله وهو مبتسم براحه..
بعدين شبح القدام...
فجأة طلعت عليهم سيارة صاحبها مايسوقش بوعيه ...
عادل وهو مفجوع؛خيره هدا!.
مجيد بهلع؛عادل..ياعادل...لااا لااا.
وعادل حاول يجتازه...لكن مع الأسف...
..قضاء الله...حل وصار....ولامفر....
🍁🍁🍁🍁🍁
قضاء الله اللي كنت متأمل فيه هيثم كل خير...مش قضاء البشر...
وهو خاش للمحكمه برفقه صديقه ومحامي ولده احسان...
عيونهم جت في عيون الخصوم اللي كانوا يشبحولهم بنظرات تحدي مستفزة..
جلال...ومحاميه..
احسان:ياكان تندروا ع اللي يراجي فيكم..
ابتسم هيثم وشبحله..بعدين رجع شاف لجلال وقال...
"إن الله يدافع عن الذين ءامنوا ان الله لايحب كل خوان كفور"

..............كنتم مع نهاية الفصل الأول من رواية #البطل_المغمور  "شمس الغروب"....نلتقي لنكمل باقي رحلة هيثم البطل المغمور في الفصل القادم ان شاء الله تعالى..
"ازهار"....والله ولي التوفيق

                           مع حبي   #جمان_فريد