البطل المغمور "شمس الغروب"

الجزء الرابع

💐..
الساعه التاسعه ليلا..
بعد تعشوا قعمزوا مع بعض في صاله الحوش يهدرزوا في الحدث اللي حيصير في عيلتهم وهيثم بناءا عليه قرر قرار  وفي نفس الوقت كان أمر مفروغ منه
هيثم:فاضينالك دار انتي شوفيها نحس فيها تسدك
نسيبه بشي من الإحراج:باهي وين المشكله لو خليتوني فالشقه؟!
فنص هيثم وقال:بروحك؟!هدا مامازال!
نسيبه:مانبيش نضيق عليكم يادكترة..
اسيمه بإبتسامه؛ربي يهديك يانوسه ضيق شني اللي بديريه انتي حوش خوك ماشاء الله سياح نياح وحتى لو ماكانش كبير تقعدي معانا ونحطوك هني..وحطت يدها ع راسها..
ماجده:ياودي كلا هيثم رضي والدين اللي طيحه ربي فيك..
شبحلها وابتسم..
وهي نزلت عيونها وابتسمت بخجل..
💓اما صغارهم..
زياد وسارة مجرد مايشوفوا النظرات هادي من بوهم لأمهم تتحرك قلوبهم بالحب ليه ويتمنوا هالنظرات تكون ليهم حتى هما..من داخلهم كانوا طامعين هلبه لحنانه الحب اللي يشوفوا فيه من بوهم لأمهم مخليهم يحسوا ان الراجل هدا عنده قلبه حنون هلبه كان اكرم بحبه يغرق اللي حواليه..
بس هو حابسه حنان اتجاههم..
▪▪▪
◇والله ماحبس مقصود..لا
هي علاقة الزوج بزوجته تكون منفصله عن علاقته بصغاره..
اسيمه حب حياتي الانسانه اللي نحس ربي نزلهالي من الجنه طول..ملكتني باسلوبها الحلو بطيبة قلبها بعقلها برزانتها بقدرتها ع ادارة حياتها وحياتنا حني بعدين..
وصغاري اللي هما منها اكيد نحبهم..ههه..قصدي والله مايجي نقوله الكلام هدا..هادو صغاري..بس حبي ليهم يختلف علاش لأنهم مسؤوليتي من المهد وربما للحد نبي نكون معاهم جاد وحازم وصارم نبي نكون اني الطرف اللي يشد في الوقت اللي تكون امهم فيه هي الطرف اللي يرخي..
نرجع ونقول الأب حبه لصغاره يبان من خوفه عليهم وخوف الاب ع صغاره هو اللي يخليه جاد وصارم غالبا..
بس..
ماكنتش نعرف ان الأصلح والأفضل..اني نكون طرف ممزوج بين الزوز الشدة واللين...بش نكسب قلوبهم بالحب والإحترام..
مش نخليهم يخافوا مني وطاعتهم ليا تكون بناءا ع الخوف مش ع المحبة والإحترام..
▪▪▪▪▪
☆قدام ورشة خالد..
"جاك؟"
خالد وهو يشرب في الشاهي:امم..درس قدام الورشه ونزل سلم وعزمني..
جهاد بضحكه:الراجل هدا غريب الحق..
رفيق بإبتسامه:هو كويس راهو..
خليل رشف بعدين ربع ايديه وقال:ايه كويس لكن متحفظ..
خالد:متحفظ ؟!
خليل شبح لبوه وقال:يتعامل مع الناس هكي زي ماتقول وهو راد باله بحذر يعني فهمت عليا حاج؟
خالد: اها..هز راسه وقال..ياودي حتى حني نقعدوا معاه متحفظين وخلاص..
رفيق خدي طاسة الشاهي وشربها وهو عاقد حواجبه وخليل وجهاد يشبحوله..
خالد ضحك وقال:باهي نبي نفهم اني هادي كيف جت اخته؟
طول خليل رفع حواجبه والتفت..
شاف سيارة نسيبه طالعه من الزنقه تجري جري وهي تحرق في العجل..
ناض خليل ومشي بسرعه للسياره..
فتح الباب وركبها..
وشغلها طول وطار يجري وراهم ومن الآستعجال صكر الباب والسيارة تمشي
وبوه وخوته يتفرجوا بصدمه
شويه خالد اشر بسبابته ع الطريق اللي مشي منها خليل وقال:اني مانبيش نعرف خيره ولانبي حد يشرحلي
جهاد ورفيق شدوا ضحكتهم شويه بعدين طلقوها وقعدوا يضحكوا..
اما خالد ناض وخش للورشه وهو يقول بتعجب:ولله في خلقه شؤون!..
••••••°°°°°°••••••°°°°°•••••
"هههههه والله الا ورانا يانواسه"
نوسه وهي تسوق بغضب:شن يبي مني الحيوان هدا؟!
ماجده :يريدوا منكي قلبكي يابنت اختي..
نوسه حست بهداكا الشعور المزعج اللي يضايق فيها لما تحس بيه عيونها تعبوا دموع وهي تقول بعصبيه:ياسر من البصارة المالغه هادي ياخالتي.
ماجده:والله لندوي من جدي..الولد يحبك يانوسه تصرفاته كلها تقول..
فجأة قلب نسيبه دق دقه قويه..
خلتها زادت سرعتها وهي تسوق بعصبيه..
ماجده بفجعه:حيي عليا ياحليلي بتقتليني قبل نخش دنيا..وبدت تبكي بمبالغه وهي تقول..حرام عليك تبي تقتلي فرحتي في مهدها يامسمومه..
شبحت لخالتها ع جتب وهي معكرشة وجهها بإزدراء..
بعدين شبحت القدام بنفس النظرة ونقصت سرعتها شويه.
💓وراهم..
كان شاد الدومان بإيديه الزوز وهو يسوق وع وجهه ابتسامه جانبيه وهو عاض ع شفه السفلي..
وقعد وراها لين وصلت لقدام العمارة..
درست وراها بمسافه بسيطه..
قعد يشوف للسياره..
طولوا مانزلوا..
لين شويه شاف ماجده نازله وخشت للعماره..
بعدين نزلت نسيبه من السيارة وصكرت الباب وقعدت واقفه حداه..
هو ضحك ضحكه خفيفه..بعدين فتح باب السيارة ونزللها..
شبحلها..
وهي واقفه مربعه ايديها ورافعه حاجبها وتشبح القدام..
صكر الباب..
بعدين حط ايديه فجيوبه..ومشالها وهو يشبحلها..
لعند ماوصل فيهاووقف قدامها مباشرة..
هي رفعت عيونها فعيونه...
شافت فيهم نظره خلتها تحس ان قلبها ضاق عليه قفصها الصدري..
بلعت ريقها وقالت بحده:شن تبي من الأخير..
خليل بنفس الإبتسامه:من الاخير من الأخير!؟
نسيبه:اسمع التسهويك الزايد مانحباش بتقول شن تبي ولا والله من غدوة نشكي فيك ونقول يتحرش بيا..
خليل تبدلت ابتسامته الجانبيه لإبتسامه حلوه وهو يقول: تعرفيني التهديد مايمشيش معاي وبنقولك شن نبي من الأخير لاني مانحبش نلف وندور..
هي انتابها شعور بالخوف الشديد تحاول تخفيه بحده ملامح وجهها وهي تشبحله..
خليل وهو مركز ع عيونها عقد حواجبه وهو مبتسم وقال:من الاخير..اني مكبد فيك..
قالها بنبرة صوت واسلوب..خلا قلبها من قوة الدق وكأنه يبي يكسر الضلوع ويطلع..
وهالشعور انعكس ع ملامح وجهها..
اللي العيون فيه توسعوا ع الآخر..
والحواجب ارتفعوا...والوجه شويه شويه بدي يكتسي باللون الأحمر..
وجاه الرد طول رد كان عكس كل اللي حست بيه فهاللحظات:لااا انت شكلك مجرب حاجه من اللي تبيعوا فيه رسمي!!..حركت يدها جنبها راسها حركه دائريه وهي تقول..واضح عقلك مش عليك ومش واعي انت واقف قدام مني وتكلم في مني وناسي انت مني تكون وشن تكون..اشرت عليه وهي تقول..فيق ع روحك يااسطى فيق واعرف حدك واوقف عنده..
وختمت ردها بنظرة استحقار مررتها عليه من فوق لتحت..
بعدين لفت ومشت طول خشت للعماره..
وخلاته واقف مصدوم بقوة فردها..
هو عارفها وعارف لسانها وعارف نظرتها ليهم..
لكن ماتوقعش انها تكون محتقرتهم..ومش شايفتهم ناس اصلا...
خليل لان قلبه يحبها بجد انجرح بعمق من ردها..
واول مرة ينجرح في حياته جرح باطني زي هالجرح..
كان مؤلم بكل معنى الكلمه..يوجع هلبه..هلبه..
لدرجة ان الدموع عبوا عيونه..لكن كبريائه منعهم من انهم ينزلوا شدهم بقوة..
بعدين رسم ع وجهه ملامح الحده الممزوجه بالكبر..
وخدي نفس عميق..
بعدين لف ومشي لسيارته..
ركبها وتحرك طول ..
وشن يحول كلامها من راسه..كلامها اللي قاعد يرن فودانه رن...ويمزق في قلبه تمزيق..
••••••°°°°°•••••°°°°•••••°°°••••••
خشت فراشها وهي تقول بضيق:اليوم ماجاش..
دانيه وهي مبتسمه بتشوق:خاطري نشوفه رتوجه..
رتاج:ماعندك علاش بتشوفيه..
دانيه بضحكه:من توا بديتي تغاري!
رتاج ضحكت بعدين قالت:والله يارتوجه وهلبه مش شويه نقعد نخمم زعما يعرف بنات تانيات! زعمه ملعب ومتاع جو البنات! ماهو زي ماقتلك شكله هكي يبين..
دانيه تنهدت وقعدت ساكته وهي تفكر بعدين قالت:نقولك حاجه رتوجه حني ديما نحلموا بحاجات مش لينا بكل..اخرتك لحسام واني اخرتي لخوه نور الدين..
رتاج دمعت وهي تقول:ننتحر وماناخده حسام هدا والله ننتحر..
وغمت وجهها بالغطا..
واختها قعدت تشوفلها ودموعها نزلوا..
•••••°°°°°
والراجل اللي حاسم امرهم وشبه عاطيهم من زمان مقعمز في المربوعه حاط ع فيلم هندي ولاهي بتليفونه يكلم في خطيبته..
وولده اللي عمره بس 13 سنه فاتح عيونه فالتلفزيون ويتفرج ومعروفه الأفلام الهنديه ومعروف محتواها...
ولأنه ولد مش مدور بوه خطر تأثير هالأفلام عليه...
فالوقت اللي حارم فيه بناته يتفرجوا حتى ع المسلسلات الليبيه..
••••°°°°••••°°°°•••°°°••••
تاني يوم..
الجمعه..الساعه العاشرة صباحا..
لبس شنطه ع كتفه وقال:لما نوصل نتصل..
اسيمه:ايوه رد بالك تنسى..
هيثم وهو حاط ايديه فجيوبه:خليك ديما في مكان فيه تغطيه..
شبحله زياد وهز راسه بإيجاب بعدين شبح لأمه وقال:سلام..
ولف وفتح الباب وطلع ونسيبه وراه تقوله؛في امان الله..
طلعت ووقفت في الباب وقعدت تشوفله كيف يمشي لين وصل فالباب الخارجي فتحه وطلع منه وصكره وراه..
اسيمه:استودعك الله الذي لاتضيع ودائعه..
بعدين مشت خشت وصكرت الباب..
بعدها التفتت بتكلم راجلها مالقتاش ضحكت وحركت راسها يمين ويسار...
▪▪▪▪▪
◇هديكا كانت اول زردة يمشيلها زياد..كنت في قمة القلق لدرجة ماكانش عندي نيه نمشي للخدمه..
بعد طلع طول مشيت ركبت فوق السطح..كنت نبي نشوفه وهو طالع من الزنقه..
▪▪▪▪
بعد ماشاف زياد طلع من الزنقه طول مشي نزل لوطا..
بعد نزل مشي للكوجينه وخش ع مرته وهو يقول..
هيثم:كان خلتيني نوصله ياأسيمه..
اسيمه وهي تحط فالشاهي ع النار:خليه يعتمد ع نفسه ياهيثم عززله ثقته بنفسه ماتخليشي يحس انه من غيرك مايقدر يدير شي..
هيثم شبحلها شويه بعدين قال:باهي اني ماشي للمستشفى..
اسيمه التفتت شبحتله وقالت؛افطر بعدين امشي!
وهو طالع حرك سبابته يمين ويسار بالنفي..
اسيمه ضحكت بعدين مشت لسلة الخبزة بتاخد فردة اديرله بيها سندويتش..
••••°°°°••••°°°°°•••••°°°°°••••
مقعمزة تفطر وتشبحلها كيف تاكل بالسيف..
تمرر في نظرها ع ملامح وجهها..
عيونها حمر...وملامح حزن وضيق باينات ع وجهها..
خالتها مابتش تسألها شن صار بينها وبين خليل امس في الليل لأنها لما خشت الشقه كانت معصبه..طول مشت لدارها بدون ماتقول كلمه وصكرتها عليها معاش طلعت..
فكرت ان ممكن خليل يكون قايللها كلام جارحها بيه
وقالت في نفسها ان حتى هي طويلة لسان اكيد بدت عليه بكلام جارح بش هو رد عليها..
شويه وناضت نسيبه..
ماجده بلعت لقمتها وقالت:كملي فطورك!
نسيبه بصوت يدوب طالع:مانبيش..
ومشت من حداها طول لدارها..
وخالتها تشوفلها بإستغراب وفي نفس الوقت خافت عليها اول مرة تشوفها هكي..
•••••°°°°°•••••
ماشيه للكوجينه وهي تسمع فأصوات التخبيط والتقربيع جاي منها..
وقفت فالباب وين شافاته يصب في بكرج القهوة الكبير في طرمس ستيل خاص بيه..
ترددت هلبه تكلمه وفي الأخير حسمت امرها وسألاته:بتطلع خليل..
ماباش يرد عليها مشي طول للباب..
هي وخرت..وهو طلع من حداها..
مشت وراه وهي تشبحله بقلق لين طلع من الحوش وخدي وراه الباب بقوة..
تهاني بقلق:خيره !؟
"تهاني"..
تنهدت ولفت ومشت لوسط الحوش..
خشتله وهي تقول:خدي طرمس القهوة متاعه وطلع وماباش يقول وين ماشي..
عفاف بقلق:اشبح خيره..
تهاني قعمزت حداها وهي تقول:تي عادي يام مش اول مرة كملي فطورك انتي..
عفاف:باهي خوتك التانيين ماناض منهم حد؟
تهاني حركت راسها يمين ويسار بالنفي وهي تاكل في الخبزة..
تنهدت عفاف وكملت فطورها بالسيف وهي تخمم فولادها
هي امتى بطلت تفكير فيهم وفي حالهم!؟
🌿🌿🌿
ولا هيثم بطل تفكير في زياد..
ولابطل اتصال بيه يفوت ساعتين ويتصل بش يطمن..
وطبعا هالإتصالات كانت مزعجه وجدا محرجه لزياد..
🌾شكلك اول مرة تطلع زردة؟!
زياد ابتسم ع جنب وهز راسه بإيجاب..
واحد من اقارب زملائه انضملهم فالزرده قاله:شكلك دلوع الحاج..
ضحكوا الولاد..
زياد حاول يخفي احراجه بإبتسامه وهو يقول:بوي نوعه حريص
صديق زياد قال:بوه الدكتور هيثم الكاتب اللي يجي في قناة **** برنامجه اسمه صحتك لايف
رد الولد وهو يقول:بالجودة..لكن يكون دكتور ولارئيس وزراء خليه يفك عليك الحصار شويه هدا وانت ماطلعتش من طرابلس وهكي!طيب فيك مش ماشي لتونس
🌿زياد ماعرفش يرد بغير الضحك مع الموجودين بعدين واحد من اقرب اصدقائه ليه كان عارف وضعه هو وبوه غير الموضوع وطلع زياد من حالة الاحراج اللي كان فيها..
ظاهريا تغاضى زياد عن الكلام اللي سمعه بس من داخله كان يغلي غلي..لهدا حط هاتفه ع الصامت وكمل باقي يومه في الزردة وهو مستمتع بكل اجوائها
وبوه تقول حاطينه ع نار..الراجل وصل لذروة الشعور بالقلق..
قطع دوامه وروح للحوش طول...
••••••°°°°
الساعه التاسعه ليلا..
نزلت التليفون وهي تقول بقلق ودموعها فعيونها:عطاني مقفل ياهيثم!..
غمض عيونه بشده وهو يقول:هدا اللي كنت نفكر فيه..فتح عيونه وكمل كلامه بعصبيه وهو يقول..هدا اللي حسبت حسابه يانسيبه..وتقوليلي عامله كراجل!
سارة كانت ميته من الخوف وهي تشوف لبوها كيف واصل لأقصى مراحل الغضب..
اسيمه بلعت ريقها وقالت:خل نكلم نوسه..
هيثم:كلمتها قبل نجي قالتلي نتصل بيه مايردش..
اسيمه شدت التليفون بإيديها الزوز وحطاته ع ذقنها وغمضت عيونها بشده وهي ترجف من الخوف..
هيثم لف للحيط خبطه بقوه بقبضة يده وقال:غير يروح بس..
فتحت اسيمه عيونها وشبحتله وزاد خوفها اكثر واكثر..
سارة من خوفها من بوها فكرت تقول شي يطمنهم بالك يهدا غضبه:بالك تم شحن تليفونه وهما في الطريق..
هيثم عكرش وجهه وقال:تم شحنه! مايعرفش يتكلم من تليفون حد تاني!!
سارة:مرا...
قاطعها وهو يقول بنرفزة:بالله بري خشي ارقدي..بري..
سارة نزلت عيونها ومشت طول لدارها ودموعها نزلوا..
واسيمه تشوف لهيثم بخوف ومش قادره تكلمه..
••••°°°°°
قدام ورشة ولاد خالد..
درست سيارة صديق زياد..
فتح زياد الباب ونزل وهو يقول لصاحبه:منور حجي..تصبح ع خير..وصكر الباب..
صاحبه:تصبح ع خير..
تحرك الولد بسيارته..
وزياد توجه للزنقه..
كانوا رفيق وجهاد قدام الورشه يخدموا ع سيارة شبحوله.
رفيق:اووو زيااد..
زياد بدون مايشبحله يدوب رفع يده واشرله يحي فيه وخش الزنقه..
رفيق:مريض..
جهاد:علاش تعبر في بوه انت!؟
رفيق سكت وماباش يرد وطبس ع السيارة وكمل تصليح..
وجهاد مط شواربه للاسفل بعدم رضا بعدين كمل خدمه حتى هو..
•••••°°°°°
في دار سارة..
كانت تكلم في تهاني مكالمه هاتفيه..
سارة:خايفه يضربه ياتهاني
تهاني بدهشه:معقوله!؟قصدك خوك في عمره هدا بوك مازال يضرب فيه!؟
سارة:لالا ياتهاني بابا عمره مامد يده علينا..لكن المرة هادي غير شكله يخوف هلبه ياتهاني..
حطت تهاني ابهامه في فمها وهي تفكر بقلق..
فجأة..
سارة سمعت باب الحوش تصكر قالت:حي شكله روح..
نزلت التليفون والخط مفتوح ومشت طلعت من الدار تجري..
🌾واخيرا شرفت!
اسيمه:وينك هدا كله ياامي معقوله هكي!؟
زياد بشي من العصبيه: علاش هدا كله!!شن تشوفوا فيا قدامكم عيل روحت زي مامشيت..
هيثم قدمله وقال:وانت تكلم في امك صوتك نقصه هدا اولا..تانيا علاش صكرت تليفونك؟
زياد من فوق نفسه قال:شحنه تم..
هيثم بصوت عالي:كذااب..
اسيمه بخوف:هيثم!
زياد شبحله بحده وقال:ايه كذاب..صكرته صكرته بالعاني صكرته..بش ماننحطش في موقف زي الزفت قدام الولاد وبوي كل ساعه يتصل ويسأل خليتهم يهزوا عليا ويديروني مضحكه..
هيثم رفع حواجبه وقال:لانك ماتعرفش تختار صحبة كويسه..
زياد بتهكم:ع اساس انت عندك صحاب!!
هيثم؛تكلم بأدب احسنلك..
اسيمه جت لولدها وقال:خلاص زياد برا خش لدارك..
هيثم؛مش قبل مايتعاقب ع وقاحته واستهتاره..
ضحك بسخريه وحرك راسه يمين ويسار..
هيثم عقد حواجبه وقدمله اكثر وقال:بالك مش عاجبك ياتافه!
اسيمه بخوف:هيثم..
زياد حط عيونه فعيون بوه ورفع حاجبه بتحدي وقال:ايه مش عاجبني..
رد فعل هيثم كان متوقع من اسيمه اللي حطت ايديها ع وجهها وانتفضت اول ماشافت هيثم رافع يده وبعدها سمعت صوت الصفعه اللي نزل بيها ع خد ولده..
اما سارة حطت يدها ع فمها وهي تكتم فشهقتها..
زياد ضم شواربه لداخل بغضب بعدين قال:ايه مش عاجبني ولاتصرفاتك عاجبتني ولااسلوبك ولاانت....
ومشي من حداه طول لداره..
فات من حداه اخته اللي كانت تشوفله بألم..
بعدين رجعت شافت لبوها اللي قال لأمها وهو ياشرلها بسبابته:ردي بالك مازال تكلميني عنه ردي بالك..
اسيمه قعدت تشبحله بألم ودموعها ينزلوا.
وهيثم غير عيونه عنها ومشي للباب..
لبس فرجليه وفتحه وطلع طول وصكر وراه الباب..
اسيمه وهي تشوف للباب بعد تصكر..
غمضت عيونها بألم..بعدين مسحت ع شعرها ووخراته للخلف وقالت:تس..فتحت عيونها وقالت..ربي يهديك ياهيثم...ربي يهديك..
ولفت بتمشي لقت سارة واقفه تشوفلها بحزن..
مشتلها وصلت فيها شدت راسها بإيديها وباساته بعدين قالت:خشي ارقدي ماما وماتفكري في شي غير قرايتك تصير مشاكل اكبر من هكي في كل العائلات..
ساره:ماما زياد كان يبكي لما مشي للدار..
مسحت ع شعر بنتها وقالت:ماشيتله..المهم انتي بري ارقدي وراك مدرسه غدوة مانبيش نفيقك بطريحه حتى انتي..
ضحكت سارة من بين دموعها..
اسيمه بإبتسامه؛هي ماما بري..
هزت راسها وقالت وهي تمسح فدموعها:تصبحي ع خير..
اسيمه؛وانتي من اهله ماما..
مشت سارة لدارها..
واسيمه مشت لدار ولدها..
طقت الباب..
بعدين فتحاته وقالت؛زياد..
"خشي"..
خشت وصكرت الباب..
لقاته يمسح فدموعه بقوة وهو يقول:ريتي وين وصلت معاه يام!؟
قدمت اسيمه وقالت؛ياريتك شفت حالته قبل تروح قريب هبل من خوفه عليك..
زياد ابتسم بتهكم وغير عيونه للروشن..
صكرت اسيمه الباب وقالت:لما تكبر وتتزوج وربي يرزقك بصغار تو تفهم بوك اكثر يازياد..مشت قعمزت ع سريره وقالت بضحكه..فوت توا وقولي شن درتوا فالزردة وكان في صور وريني..
شبحلها وابتسم بعدين قال:شن مخليني نحبها الدنيا هادي اني غيرك انتي..
ضحكت وقالت:حتى اني نحبها ع خاطركم انتم وبوكم..
هز راسه وقال:خل نوريك جو الزرده..
وجي قعمز حداها  وهي تضحك عليه..
••••°°°°°••••°°°°°•••••
الساعه العاشرة والنصف ليلا..
خشوا جهاد ورفيق للحوش..
امهم طلعت من وسط الحوش وجتهم وهي تقول:خليل وينه؟
جهاد:بيبات في الحوازة يام..
عفاف:صايرة حاجه مع خوكم!؟
رفيق:مافي شي يام هكي مشاكل عاديه تجي وتمشي..
عفاف وعيونها معبيات دموع:قولوا الحق!
جهاد قدملها وطبس باس راسها وقال:وراسك الغالي يام مافي حاجه تخافي منها..اسمعي من الاخير بيناتنا ولدك مكبد..
ضحك رفيق..
وهي ابتسمت بألم من دموعها وقالت:والبنيه اللي يبيها مايقدرش يوصلها ولا؟
تلاشت ضحكتهم هما الزوز وهما يشبحولها..
هزت راسها بأسف وقالت؛نصيحه وليداتي خودوها من امكم ماتحطوش عيونكم ع حاجه ماتمشيش معاكم بش ماتتعبوش..
قعدوا يشوفولها الزوز بملامح وجه كلها ضيق..
تنهدت وقالت:عشاكم مغطي ع الطاوله..
بعدين لفت ومشت لدارها..
جهاد :عندها حق..
ومشي لدارهم وخشلها..
ورفيق يشبحلهم وهو يقول:والله ماني فايتها ساره..
ومشي خش للكوجينه..
🌿كل حد يمد بساطه ع قد رجليه..
ماينطبقش المثل هدا ع التكافؤ المادي بس حتى الإجتماعي والعلمي
وللأسف فرق كبير بين وضع نسيبه ووضع خليل..
كيف حب خليل نسيبه اصلا!؟
نسيبه من الخارج مافيهاش المميزات اللي تجذب اي راجل عادي ليها..
لاتلبس زي البنات لاتتجمل لاتتغنج..
اطارها الخارجي بعيد هلبه عن الأنوثه اللي تخلي الراجل يميل للمراة كأول سبب..
لكن كانت تبان جدعه وقويه وقد روحها ومافي حد يقدر يدوسلها ع طرف..
وهادي هي الاسباب اللي جذبت خليل لنسيبه انها مراة بمية راجل..
ومع الوقت ومع كترة المشاكل والمناقرة..
خليل بدي يشوف فيها فحاجات اعمق هي تحاول تخفيهم
براءة وطيبة قلب ونظافة نيه..
لقي روحه بدون مايشعر طايح في حبها غارق لودانه...
خليل لما حبها مافكرش في أي إعتبارات تانيه...
هالإعتبارات اللي خليل امس انصفع بيها صفعه ورا التانيه صفعات فيقاته..
🌿كان راقد ع السرير وهو حاط ذراعه فوق جبهته ويشبح للروشن وهو سرحان..
فاق من سرحانه لما سمع صوت هاتفه يرن..
تنهد بملل..بعدين مد يده وخداه من طرف السرير..
شاف المتصل..
ابتسم ع جنب وفتح الخط وحط ع وذنه وقال:شن مفيقك لتوا انتي؟
ملاك بضحكه؛قلت ننشد عليك يلي ماينفع فيك الخير..
خليل:شن جو
ملاك:تمام..وانت شن جوك؟
خليل:ماشي الحال
ملاك:خيره صوتك هكي؟!
خليل:بنرقد..
ملاك:خزي توزع فيا!
خليل بضحكه؛لا والله ناعس بنرقد..
ملاك ضحكت وقالت:باهي تجيني غدوة الجامعه نهدرزوا شويه..
خليل فكر شويه بعدين قال:باهي نتلاقوا غدوة..هي طيري توا..
ملاك بضحكه؛باهي ياشارون..بايات..
خليل وهو مبتسم ؛هوينا..وصكر وبعدين داره صامت..
ولوحه حداه..وخدي المخده وحطها ع راسه وهو يحاول يرقد..
🌾وهي..
كانت مقعمزة وهي مربعه رجيلها ع السرير..
تعد في وراقي الاختبار اللي بديره لطلبتها غدوة..
كانت تعد بعصبيه...
بعد كملت حطتهم ع تركينه وقالت:خل نشوف قداش فرطاس هما..
خدت الورقه اللي فيها اسماء الطلبه وبدت تعد: فرطاس اتنين تلاته اربعه..
وكملت عد وهي تشوف في الأسماء لين وصلت في اسم طالب عندها..
 خالد خليل المحجوب..
نسيبه:كملت باقي الفورمه قريب العيله كلها في بنادم واحد..هدا بالذات بنقصله درجة ع الأسم..غمضت عيونها بأسف بعدين قالت..اففف..استغفر الله العظيم واتوب اليه..فتحت عيونها وقالت..بيخلوني نخون ضميري عيلة الهم هادم..
سكتت شويه بعدين رفعت عيونها وقعدت تشبح في الفراغ..
جو بين عيونها نظرات عيونه الحلوات وهو يقول..
"أني مكبد فيك"..
ارتسمت ع وجهها ملامح الحزن..
وعيونها تعبوا دموع وطاحوا..بعدين مسحتهم وقالت:مالقاش غيري التافه يكسد عليها ويفوت الوقت..واطي ولد واطي..
••••°••••°•••••°•••••
تاني يوم..
الساعه الثامنه الا ربع...
طلعوا سارة وزياد من الحوش..
وقعدوا يمشوا مع بعض بطريقهم لباص ساره..
زياد:اليوم عمتك مدايرتلنا اختبار..
سارة ضحكت وقالت:مزاجها زي الزفت ع خاطر عرس خالتي ماجده بتحط غيظها كله فيكم..
زياد ابتسم ع جنب وقال:نراجي امتى تتزوج خالتي ماجده وتجي هي تقعد معانا..
ساره ضحكت بحماس وقالت:نراجي فيها اكثر منك..
وكملوا طريقهم الزوز وهما يهدرزوا..
لما قربوا يوصلوا وين مافي الباص..
جي رفيق فايت من حداهم..
قعد يشوف لسارة ووجهه يشع شوق..
اما هي كانت تهدرز مع خوها ولاعبراته..
هو قال:صباح الخير..
الزوز ماردوش عليه دارو رواحهم ماسمعوشي..
هو لف راسه ليهم وقعد واقف وهو يشوفلهم..
شويه خطر عليه كلام امه..
《 نصيحه وليداتي خودوها من امكم ماتحطوش عيونكم ع حاجه ماتمشيش معاكم بش ماتتعبوش..》
رفيق بضيق:نحبها يام نحبها مش بيدي..
ولف ومشي للورشه وهو مضايق ع الآخر..
🌾وصل زياد اخته للباص..
شبح من ورا النظارات لتهاني اللي كانت مقعمزة فالروشن وشاده كتاب وتقرا..
لما سمعت صوت الباب شافتله ابتسمت وين شافت سارة راكبه..
هو ابتسم ع جنب ورفع حواجبه بعدين لف ومشي بيوقف تاكسي بش يمشي للمدرسه..
••••°°°°°°
فهالوقت..
امه طلعت بالسيارة من الحوش والتوأم معاها رافعتهم للروضه..
اسيمه وهي تتكلم بالتليفون؛تلقاها واتيه فوق السرير..
هيثم:شكرا غاليتي..
اسيمه:العفو..
هيثم ابتسم وقال:بعد نروح من السفر على خير ان شاء الله نتفاهموا..
ابتسمت بحب وقالت:تمشي وتجي سالم غانم يارب..
هيثم:نحبك والله نحبك هلبه هلبه..
ضحكت وقالت:باهي سلام..
هيثم بضحكه:سلام..
وصكر بعدين تلاشت ضحكته وقعد يشوف للتليفون وهو يفكر في اللي صار امس بينه وبين ولده..
▪▪▪▪
◇اسيمه كانت فاهمه عليا حتى لو ماكانش يعجب فيها اسلوبي..لهالسبب كان تعذر فيا وتفوتلي..
هو نفسه زياد لو يعرف السيناريوهات اللي خطرت عليا لما صكر هاتفه وعطل في مرواحه كان هو بروحه عطاني خده بش نضربه..بس مع ذلك تصرفي الغير محسوب كان نقطة سودا فوق النقاط السودا اللي سجلتهم لنفسي في صفحة ولدي الكبير..
هالصفحة اكيد خلت من اللون الأبيض هداكا الوقت..
▪▪▪▪
الساعه الحادية عشر صباحا..
"عيونك فورقتك انت وياااه مااطلعونيش عن طوري "
زياد غطس فورقته..
ومش غير هو وبس كلهم..
نسيبه:اسهل من هكي مافيش وجبتلكم اسهل قارة ترسموها وعيونكم مغمضات ترسموها..
زياد"قارة اوروبا اسهل قاره نرسموها!"
نسيبه وقفت عليه وقالت:عاد انت بيكاسو المدرسه حي عليك وحي تغلط فيها حتى شويه..
حط يده ع عيونه وشد ضحكته..
والولاد يشبحوله ويضحكوا..
وزملائه ضحكوا ع الصامت..
هي وزعت نظرهم عليهم وهي تفنص:عيونك فورقتك انت وياااه..
كلهم دفنوا روسهم فوراقيهم..
وهي رفعت حاجبها وقعدت تمرر فنظرها عليهم وكملت دورتها..
•••••°°°°•••••°°°°°••••
شكرا ياسموح..
شرب من القهوة وهويشوف القدام..
وهي تاكل فالشكلاطه وتتأمل فيه بعدين قالت:خلو..
خليل:اممم..
ملاك:امم..عيونك حزينات..
خليل شبحلها وهو رافع حاجبه اليسار وقال:والله!
ملاك:نحكي جد خلو حاساتك حزين هلبه..
رجع شاف القدام وقال:لاحزين ولاهم يحزنون..مافي شي..
ملاك كلت من الشكلاطه تاني وهي تشوفله..
اما هو شبح لساعته بعدين ناض وقال؛وراي خدمة لازم نمشي..ماتبي شي؟
ملاك"نبيك انت":لالا مانبي شي لكن ماتنسناش بالمرة كان مافيش مانخدموا اتصل وانشد مرة مرة..
خليل هز راسه بإيجاب بعدين مشي وهو يقول:سلم ع جداك صالحه وخوك..اوينا..
ومشي..
وهي تشبحله وتقول:يوصل...بعد اختفي من قدامها تنهدت وقالت بحزن..ااخ منك ياخليل مرجتلي قلبي..
••••°°°°•••••°°°°••••
بعد الظهر...
ماشيه بطريقها للمحل وهي تقول بتذمر:يبعت فيا بلعاني لمحل دراه الكبد لكن والله اللي فباله ماهو صاير منه..
خشت رتاج للمحل وهي معصبه ع الآخر..
بعد خشت تفاجئت لما شافت جهاد واقف ع واحد داخل..
وحسام يشبحله بحقد..
قالت بصوت هادي:السلام عليكم..
جهاد طول شاف لباب المحل..ابتسم ع جنب ورجع شاف للولد وكمل كلامه معاه..
وحسام لما شافها جاها طول وقال:قولي شن تبي تو نوصلهولكم بروحي..
رتاج بحده:نبي ناخد بروحي..ومشت جهة الرفوف..
وكيف جاي حسام بيلحقها ناداه الولد اللي كان واقف عليه جهاد وقاله:تعالى نصكروا الحساب متسعجل..
حسام بالسيف مشاله...
اما جهاد مشي طول جهة الرفوف من الطرف التاني...
لمحاته رتاج فرحت قريب طارت..
قعدت واقفه في الطرف..
وهو كمل يمشي لين وصل في طرف الجهة المقابله..
شبح لباكو كريمة شانتي جاي قدامه حوله..
وشافها...ولما شافها فتح عيونه ع الآخر وهو مبهور بشكل وجهها الجميل اللي كانت رافعه عنه الخمار..
جهاد بهمس وهو منبهر:هدا شني!؟
هي ابتسمت بخجل ونزلت طرف الخمار ع وجهها ومشت بسرعه..
 مشي وراها طول وهو منسبه طلع من المحل ووقف قدامه وقعد يشوفلها وهي تمشي بسرعه لين خشت عمارتهم..
استاقظ لما سمع صاحبه يقوله:اشهب..
شبحله وقال:همم!..
حسام:وين ماشي بيها خونا!؟
عقد جهاد حواجبه وقال:شن!؟
صاحبه بضحكه:اللي فيدك ياحجي!..
انتبه انه شاد حاجه فيده اليمين شافلها بعدين ضحك ع روحه وقدم لحسام وقاله:كم حقها..
حسام :10..
طلع جهاد من جيبه عشرين مدهاله..
خداها..
جهاد وهو ماشي:الباقي ليك..بعدين رفع يده وقال..نتلاقوا يامعلم..
صاحبه بضحكه:تم يابرادر..بعدين شبح لحسام وقال..تشاوات حسو..
ومشي...
حسام بهمس:تفو عليك وعليه يا####..
ولف وخش للمحل وهو معصب ع الآخر..
••••°°°°°
حييي عليك!!
رتاج وهي حاطه ايديها ع خدودها وتتحسس فيهم:ياريتني مادرت هكي مش عارفه كيف درتها يادانيه.
دانيه بضحكه:بالعكس احسن مادرتي تي هدا وين بيشد فيك
رتاج:عطيه نقطه هو عليك جمال وشخصية عنده يادانيه يجنن هلبه من قريب..
دانيه بمزح:اما احلى هو ولاحسام!!
رتاج:مبردك عمك..وكأنك قلتي من احلى نبيل شعيل ولامهند التركي..
دانيه:هههههههههه..
ضحكت رتاج وهي مازال تتحسس في خدودها وتشوف لروحها في المرايه..
"رتاااج"
انتفضوا الزوز من الخلعه..
طول دانيه مشت فتحت الباب وقالت:نعم يابوي!
جاهم وقال:اختك روحت..
رتاج جت وراها وقالت:ايه يابوي..
عبدالمجيد:باهي تحركي ديري الغدي..
رتاج؛حاضر..
عبد المجيد لف ومشي وهو يقول:اني الحمار اللي طاوعت مجاهد وخليته يسفر امه هي تهيج وحني هني سايبين..
دانيه بصدمه:بعد اللي نديروله فيه هدا كله يديرنا مخلينه سايب!!
رتاج؛هدا بوك من نهار عرفانه وهو بنادم جحود..
دانيه:ياخوفي يارتاج بعدين يخلينا نطيبوا لمرته الجديده!!
رتاج:يمشي مسواق هو وياها..
وخشت وهي تحول فملايتها..
ودانيه مشت طلعت من الدار وصكرت الباب بطريقها للكوجينه وهي تفكر في قالاته وتتخيل فشكل مرت بوها وحياتها معاهم...
🌿🌿🌿🌿
وتمر الأيام..
وماجده كملت تجهيز نفسها من جميع النواحي..
ونسيبه كانت توتي في حاجتها بش تنتقل لحوش لخوها..
جو في اليوم اللي يسبق يوم الفاتحه اسيمه وزياد رفعوا حاجتها لحوشهم ومعاهم كنتر رافعه اثات دارها..
🌾فاتت من قدام ورشة خالد الكنتر اللي خليل شاف شن فيها وهو عارف ان عذاب قلبه حيزيد هلبه الفترة الجايه بالذات وانه نوي ينساها بعد اللي الموقف اللي صار بيناتهم..
🌿والمحب كل ماينوى ينسى يزيد يحب اكثر واكثر🌿
🌿🌿🌿🌿
يوم الفاتحه..
◇اني كنت وكيل خالتي ولي امرها بإعتباري كبير العيله اللي كبارها خداهم الموت بكري بكري..سبحان الله مكتوب عليا نكون ولي امر لخالتي واختي وصغاري..وغيرهم..وربي مايحمل حد فوق طاقته...
حطيت يدي فيد عبدالمجيد اللي كان وكيل نفسه..
وعيوني مرة مرة يجوا ع ولده الكبير مجاهد قداش عجبني الشاب هدا راكز عاقل جدا يفرض ع الجميع احترامه..
بس في حاجه قهرتني وقتها..بر الولد ببوه حبه ليه واضح..
زي حب ولاد خالد لخالد..وخالد ومجيد..استغفر الله وخلاص..المهم لهداكا الوقت كنت شايف اني قليل حظ فالذريه وهو هدا..مافيش تفسير تاني..
▪▪▪▪
بعد ماانقرت الفاتحه..
ولاد خالد دارو الواجب لماجده اللي ديما تقدر فيهم...
لما جو مروحين من الجامع..روحوا وهما جايبين فرقة نوبه..
بدت تخبط في الشارع اللي فيه العمارة ..
وسكان العمارة كلهم يتفرجوا..
من رواشن شقة ماجده..
ماجده؛ياوخيتي سلمهم ونجيهم ربي يفرحك بيهم ياعفاف..
عفاف بإبتسامه:تسلمي ياماجده..
اسيمه:ماشاء الله عليهم تبارك الرحمن علاش لابسين زي بعض بس..
عفاف بضحكه:البدله العربيه هادي بوهم خدي منها وحده هما  التلاته شروا زيها..
ماجده بضحكه:مقنييينهم..
ابتسمت عفاف..
وتهاني وسارة يتفرجوا من فوق وهما يضحكوا..
اما اسيمه فكانت مبتسمه بأسف وهي تشوف لهيثم وزياد كيف كل واحد فيهم واقف في جهه ولاكأنهم يعنوا لبعض حاجه...
في الوقت اللي فيه كانوا خالد وولاده يرقصوا مع بعض ع النوبه.. وكاميرا سليم ولد خو ماجده تصور فيهم..
بس في روشن المخزن العالي...
كانت نوسه واقفه فوق كرسي تتفرج بالدرقه..
وعيونها ع خليل كيف يرقص هو وبوه والزوز يغنوا..
"ونحبه ونحبه والغالي مقوى حبه"
نسيبه رفعت حاجبها وقالت:محلا جوهم الزفت اه لو نقز ونجي في نصهم نقلبها قلب..
تبتت نظرها ع خليل شويه وجهها لى احمر..
بعدين بسرعه نزلت من ع الكرسي وقالت:مفضاني حتى اني..
ومشت بسرعه طلعت من المخزن...
🌿🌿🌿🌿
وانطوي هاليوم..
وجي اللي بعده
يوم حفلة ماجده
دارتها فالصاله بالزمزامات
وجتها حفله مش عاديه احبابها كلهم فرحوا معاها فيها ماعدا نسيبه اللي ماكانتش راضيه ع الزواجه من اساسها..
🌾طبعا بعد قربت اتم الحفله..
جي العريس بيروح بعروسته..
وطبعا اهلها بعد يطلعوها بيطلعوا معاها يوصلوها..
اسيمه:مش ماشيه نوسه؟!
نسيبه برفعة حاجب:اني في مقام امها الام ماتلحقش بنتها وهي مروحه مع راجلها..
ماجده بضحكه:لكن اني بنلحقك نواستي..
نسيبه عكرشت وجهها وقالت: ماتبيش تختميها بالمسك..طلعوها طلعوا..
ضحكوا عليها..
بعدين لبسوا ماجده كابها...وطلعوها لراجلها..
كانت اسيمه ماشيه معاها وبنتها سارة تساعد فيها وخلت البنات التوأم مع عمتهم..
جنان:وين بتمشي خالتو ماجده؟
نسيبه بحزن:لأفغانستان..
ريحان:وين؟!
نسيبه؛لحوش راجلها يابنياتي..
شبحولها الزوز وقعدوا يضحكوا..
وهي تمسح فدموعها وتشوفلهم..
وصلوا سارة واسيمه بماجده لهيثم اللي خداها بش يوصلها لراجلها..
كانت سارة واقفه تشوفلهم كيف رافعينها السيارة..
شويه..
وانفتح الباب متاع السواق ونزل مجاهد بيمشي يفتح الباب الخلفي..
وهو ماشي..
عيون سارة المبهورات كانوا معاه..
من اول ماجو عليه والبنت اتاخدت بيه وبوسامته وشخصيته واناقته..
اول مرة تشوف شاب بالمواصفات هادي..
صغيرة في السن صح ومراهقه عقلها كله فالقرايه...
لكن توا اللي حست بيه وهي تشوف لمجاهد جديد عليها هلبه
وقوي هلبه..
وقداش وحده فينا مرت بهالمشاعر اول مرة..
في اللي تغيرت فيها وتبدلت وانتست مع التقدم فالعمر والزياده فالنضج..
وفي اللي كبرت معاها وزادت تعمقت اكثر واكثر وكانت نهايتها..عقد قران...وليلة عمر 💓
🌾بعد ركبوا ماجده السيارة..
اسيمه شدت يد ساره وقالت:هيا ماما..
مشت وهي معاها وعيونها يسرقوا في النظر لمجاهد وهو راكب السيارة..
بعدين وصلت في سيارة بوها وركبت وامها معاهم وهيثم جي ركب وتحرك ورا مجاهد طول...
نسيبه تنهدت وقالت:الله يسامحك ياموجي..
شويه وسمعت صوت زياد ينادي:جنان ريحان..
شبحوله التلاته..
اشرلهم بيده يجوا..
نسيبه شدت البنات ومشت بيهم لسيارتها وصلت فيها..
ركبوا البنات الصغيرات بعدين قالت نسيبه:زيزو تسوق انت؟
زياد بضحكه:هاتي..
عطاته المفتاح خدي ومشي ركب وهي ركبت جنبه..
وشغل زياد السيارة وتحرك بيها بطريقه لحوشهم..

...يتبع...