البطل المغمور "شمس الغروب"

الجزء الرابع عشر القسم الثاني

💐..
🍁ومر من هداكا اليوم أربعه أيام..
من هداكا اليوم وخليل من الورشه للحوازة ومن الحوازة للورشه معاش يبي يخش للزنقه اللي فيها حوشهم..او اللي فيها حوشها..
نسيبه...اللي كانت يوميا تصلي استخاره وتفكر في موضوع راجح..وتكلمت مع هيثم..وهالمرة حست روحها متقبله الموضوع..
ممكن لانها تبي تقتل مشاعر انولدت في قلبها للشخص الغلط في وقتها...
والشخص الغلط انجبر رفيق يكمل معاه حياته...
او ممكن هدا اللي يناسب رفيق...والله اعلم وادرى...
دارو فضانيه وحددوا العرس بعد العيد..
وسجى تطلع وتبتت وهي فرحانه وناسيه كيف قدرت توصل اللي تبيه...تحساب روحها بتعيش مرتاحه ولابتتهنى...
مابني ع باطل فهو باطل..
وسماح بتهبل وتبي تعرف كيف صار من رفيق وسجى..وسجى اللي قطعت علاقتها بيها بالمرة ماقدرتش تعرف منها شي...
لكن مع هذا فكرت في الموضوع بطريقه تانيه..
توا حججها ولت اقوى بش تخيم في حوش اختها...
اختها...عفاف..
اللي قاعده تحط ع جروحها ملح وساكته..وماشيه في هالحياة زي قبل..ومكمله حياتها مع غصايص ماتنتهيش..
حاجتين كانوا مهونات عليها...
صلاتها...وتواصلها مع اسيمه اللي كانت تساند فيها وتقوي فيها..
وطبعا بدون علم هيثم...
هيثم..اللي كان مشغول هلبه بمسؤولياته...قاعد يصلح مافسد..وينظف في قذارات من سبقه...
وطبعا واحد زيه..جاي يخدم بقلب..بشرف..بأمانه مش حيخلوه في حاله الناس اللي وقف في وجه مصالحهم..
🍁مقعمز في مكتبه يخدم...
طق الباب..
هيثم:ادخل..
انفتح الباب وخشت لجين بسرعه وصكرت الباب..
لجين بقلق:دكتور...
قام عيونه وشبحلها وشاف ملامح الذعر والقلق ع وجهها عقد حواجبه وقال:شن في؟!
لجين:زي ماتوقعت دكتور شكوكي في محلها كانوا ناويين يورطوك في صفقة ادويه ومعدات فاسده ومنتهيه الصلاحيه..
وحطت قدامه ملف..
خداه هيثم وقعد يشوف فيه...
ولجين تشبحله بخوف..
ناض من مكانه وقال:للنائب العام طول..ليه مده يستنى فيا بعد خبرته بالمعلومات اللي جبتهالي قبل..
لجين هزت راسها بإيجاب ومشت بسرعه طلعت.
وهيثم خدي هاتفه ومفتاح سيارته والملف ومشي طول طلع وراها...
••••••°°°°°°••••••
في كلية الشرطه..
كان المسرح معبي بالطلبه والضباط...
وع الستيج...كان مقعمز ورا طاوله كبيرة...
زوز ضباط كبار يتوسطهم وزير الداخليه اللي كان يحاضر في الطلبه..
ومن ضمن الحاضرين كانوا راجح وزملائه..
راجح اللي كان يسمع لكلام الوزير بإعجاب وفخر..
رضوان...
لازم تعرفوا حاجه مهمه جدا..هي ممكن تعرفوها..لكن لازم تحسوها...تستشعروها..بش تعرفوا شن هي وظيفتكم الحقيقيه..
ضابط الأمن..مفروض يكون مصدر أمن للمواطن..
مصدر راحه ليه..وين يشوفه المواطن..يرتاح..مايخافش..
اللي لازم بس يخاف من ضابط الأمن..هو الخارج ع القانون..المجرم بس..
يعني على عكس ماقاعد يصير توا واللي كنت نشوف فيه..
لازم تتغير المفاهيم..لازم..ولابد...لأن بيكم انتم البلاد هادي تتقدم..
بدون أمن..مايتحقق شي...وبالأمن بعون الله يتحقق كل شي..
اني توا درت برنامج للسجون بالتعاون مع وزير العدل..
البرنامج هدا حيغير وضع السجناء بالكامل..برنامج يخلي السجين يطلع فرد صالح للمجتمع...ويخلي اللي انكتب عليه يكمل عمره فيه..يكمله وهو يدير في شي ينفعه وينفع بيه..
حتتعدل اوضاع السجون من جميع النواحي..
واسأل الله التوفيق...
صفقوله...هو ضيق عيونه ورفع بد بش يوقفهم وقفوا..
رضوان:علاش تصفقوا!! مازال ماصار شي قاعدين كيف قلنا بسم الله..وحتى لو انجز هالبرنامج...هدا واجب وهادي خدمتنا..يعني كل حد بيخدم خدمته ويدير واجبه يصفقوله!!
بتقولوا تشجيع..نقوللكم شجعوني لما نشوفكم عناصر نافعين في منظومة الأمن كامله..
في خدمة الشعب بمعنى الكلمه..مش بس كلام وشعارات..
ابتسم راجح وهو يشبحله بنظرات كلها اعتزاز...
•••••°°°°°••••••
خالد:هاه شن قلتوا؟
:اممم..بصراحه فاجئتني هلبه..وفي نفس الوقت هدا احسن شي ممكن يصير للكل...حني وهما..بس ع هكي حنضطروا نضحوا بكم واحد..
خالد:تلقوا غيرهم..
:اكيد...تمام ياخالد..غدوة نعطيك الكلمه الأخيرة..
خالد هز راسه بإيجاب وهو ساكت..
••••••°°°°°••••••°°°°°°••••••
الساعه الثانيه ظهرا...
كان هيثم مروح من مكتب النائب العام لحوشه..
قرر يتغدا في حوشه بش يريح اعصابه شويه ...
لما وصل بالسيارة للحوش...شاف اسيمه واقفه قدام حوش خالد مع عفاف..
انصدم...
🍁اسيمه:باهي الحمد لله اهي انسترت من ربي..
عفاف:الحمد لله..لولاك من بعد ربي كان هرب وخلاني نرقع في عمايله من وراه..مرات كانت موتي فيها..
اسيمه حطت يدها ع ذراع عفاف وقالت بإبتسامه:ربي يطول في عمرك..صدقيني بإذن الله الجاي خير من اللي عدى..مش ديما عسر راهو..سيوره يجي اليسر..المهم خليك ديمه مستعينه يالله ياعفاف..خليك قوية ايمان..
فجأة..سمعوا صوت كلاكس..
شبحوا يمين..
تلاشت ابتسامه اسيمه وهي تقول:هيثم روح..هي بالسلامه توا..
ومشت بسرعه...
عفاف: صحيتي اسيمه...بالسلامه...
بعدين خشت وصكرت الباب...
اما اسيمه وصلت في حوشها وخشت ورا سيارة راجلها...
والباب وراها تصكر..
نزل من السيارة وهو يشبح لأسيمه بحده...
هي بلعت ريقها بخوف وقدمتله...
لما وصلت فيه..
هيثم كيف جاي بيتكلم..
رن تليفونه..سكت وهو يشبحلها..بعدين طلع تليفونه من جيبه وشاف المتصل كان زياد..استغرب..
فتح الخط ورد:ايوه.................ايه...................فتح عيونه ع وسعهم وقال...شن تقول ياخوي متأكد انت!!..زياد ولدي!!!؟............................غمض عيونه بشده من الغضب..بعدين هز راسه وقال...باهي باهي..جاي فورا...
ونزل التليفون وصكر...
اسيمه بخوف:خيره زياد!؟
هيثم بغضب:تبي تعرفي خيره..بري اركبي ونرفعك وين ماهو بش تعرفي خيره..بري..
مشت اسيمه تجري وركبت...وهو ركب ورجع شغل السيارة وتحرك...
لفت السيارة وطلعت من الحوش بعد انفتح الباب ..
ونسيبه وسارة يشبحولها من الروشن..
نسيبه بخوف:حي غبارة..اكيد زياد دار حاجه بالسيارة بعد خداها..
سارة بقلق:المصيبه انه خداها وماما ماتندريش..
نسيبه:غير هو يكون سليم والباقي ينحل عادي...
🍁في الوقت اللي كانت فيه اسيمه في حوش خالد جي زياد خدي سيارة امه بدون مايحس عليه حد..لولا انه نسيبه شافاته من البلاكونه طالع بيها....🍁
••••••°°°°°°••••••
في الكوجينه..
ماجده:خلاص رمضان يبدا السبوع الجاي لازم نوتوله ورقة طلبات اطول من برج ايفل..
سدينه ضحكت..
شويه سمعوا باب الحوش انفتح..
ماجده:اهو جي...وضحكت..
شويه وخش عليهم وباين ع وجهه ملامح الغضب..
عبدالمجيد بصوت عالي:انت قلتي لأم حسام ع مرض دانيه!؟
سدينه:ايه اتصلت تنشد قتلها..
عبدالمجيد:ماشاء الله عليك ماشاء الله فالحه هاك خربتي ع بنتك اهو نور الدين قال معاش نبيها..لا وخوه قال مرات يطلع وراثي..خربت حتى ع اختها..
في الدار..
رتاج عيطت بدون صوت من الفرحه وجت لدانيه تجري ضمتها وقعدت تنقز..
ودانيه تضحك..
برا..
ماجده:مالا فكه من هالشكلات..
عبدالمجيد:شن تقولي ياماجده!؟
ماجده:ايه هدا الحق..وبعدين شن كنت تبي تعطيهم من غير ماتقوللهم بش يولولك بناتك مطلقات!! اين خير هكي..ولايجوك مطلقات!!!؟
عبدالمجيد سكت شويه وهو يشوف لسدينه بحده..بعدين لف ومشي طلع...
ماجده:الحمد لله ياربي غمه وانزاحت..
ضحكت سدينه...
وفي الدار...
كانت رتاج تكتب في رساله لجهاد بتبلغه باللي صار ..ع بالها بيجي يخطبها طول لما يعرف..
اما دانيه كانت فاتحه الفيس ودموعها فعيونها..
تفكر ان فرصتها فالزواج اصبحت شبه معدومه بسبب المرض اللي جاها..
اللي قليل النادر من اللي انصابوا بيه حالفهم الحظ وتزوجوا...
مسحت دمعتها بسرعه...
وقعدت تتصفح لين جي قدامها منشور لسارة...
《اغلقي جميع نوافذك في وجوه العابرين..وحصني روحك وقلبك..ودعي نافدة واحده فقط تنظرين منها إلى السماء تناجي فيها ربا مجيبا:أيا رب..ياولي الصالحين هب لي برحمتك منهم..》
ابتسمت وغمضت عيونها ودعت في نفسها..
"يارب..ياولي الصالحين هب لي برحمتك منهم"💓
••••••°°°°°°••••••°°°°°•••••••
من امام مبنى كلية الشرطه..
اصوات ضحكات راجح وزملائه عاليه ع بعض الطرف اللي يطلق فيها راجح..
:راجح اليوم فرحان بيخطب عاد..
راجح:كويس اللي ذكرتني خل نزيد نأكد ع الراجل..
ومشي من حداهم...قام هاتفه ودور رقم هيثم..
بعدين ضرب عليه...
........
في هالوقت ..
وصل هيثم بسيارته قدام المركز...
نزلوا هو واسيمه..
ومشوا بسرعه خشوا داخل...
وفي واحد شافهم خاشين وشاف وجه هيثم وعرفه..
رفع هاتفه ودار اتصال...
:ايوه..وزير الصحه هيثم الكاتب توا شفته خاش مركز الشرطه ومعاه وحده شكلها زوجته...فيسع تعالوا...
داخل..
وصل هيثم لمكتب الضابط..
وخش طول هو واسيمه..
عيونه اول ماخش جو ع زياد اللي كان منزل راسه لوطا ومش قادر يرفعه فيهم..
وامه تشوفله ودموعه نزلوا...
▪▪▪▪▪
◇طبعا هديكا اللحظه تمنيت لو كنت متت ولاجبت ولد زي زياد..حطني في موقف مخزي للغايه..سيء لأبعد حد...
ولدي اني اني الراجل اللي ماشي حياته كلها ع القانون ولدي خاش سباق غير قانوني وهو تحت السن القانوني ماعنداش رخصه يعني وفوق هكي داير حادث بسيارة امه مدمرها تماما...
طبعا هو طلع منها سليم وهدا الأهم عندي..بس المهم طبعا سمعتي ومنظري قدام الناس...ااخ ياولدي الله يسامحك..
بعد ماطلعناه بتعهد...وطلعنا بيه من المركز..
صار اللي ماكنتش متوقعه..الأسوأ من التوقع...
▪▪▪▪▪
كانت الصحافه قدام المركز موجوده..
وفلاشات الكاميرات اشتغلت عليهم..
هيثم:تحركوا للسيارة طول بسرعه..
مشوا بسرعه للسيارة وركبوا التلاته..
وهيثم بسرعه تحرك ومشي طلع من محيط المركز..
هيثم:لاحول ولاقوة الابالله..لاحول ولاقوة الا بالله...
شن بنقول توا..شن بنقول...حسبي الله ونعم الوكيل وخلاص..
شبحتله اسيمه بحزن بعدين التفتت لزياد لقاته يشبح للروشن ويبان مضايق هلبه ودموعه فعيونه..
فجأة رن تليفون هيثم..
وقف السيارة ع تركينه ورد..
هيثم:ايوه..
راجح:ايوه السلام عليكم معالي الوزير..
هيثم:من معاي؟!
راجح:احمم..معاك راجح ***** ..
هيثم:من راجح؟.
راجح :احمم..راجح ..الضابط اللي جيتك في الموضوع اللي يخص اخت حضرتك..
هيثم غمض عيونه بشده وقال:اها اذكرتك اذكرتك..
راجح بضحكه:تمام..غير نبي نأكد ع موعد اليوم..
هيثم فتح عيونه وقال:والله ياراجح نبيك تأجل الموعد ليوم تاني صارت معانا ظروف مفاجئة..
راجح بقلق:ان شاء الله خير!!
هيثم:خير خير ظروف عائليه..المهم خلينا ع تواصل وتو نحددوا موعد الثاني..
راجح:فيها خيرة..خلاص ان شاء الله نتفاهموا ع يوم تاني..مانعطلش عليك..السلام عليكم..
وهيثم صكر من غير مايرد وهو يقول بتهكم:ظروف عائليه..شويه وهالظروف العائليه تولي عالميه...والفضل يرجع لولدي الكبير..بارك الله فيك..
وشغل السيارة وتحرك..
اسيمه حطت يدها ع فمها ودموعها ينزلوا..
وزياد كان يعض في قبضة يده بقوة..
سكت هيثم وهو يسوق بغضب...
لين وصل للحوش....
🍁في الحوش...
تهاني:صحيتي سارة..
سارة:سلمك ياحنه..سعدودكم عندكم عرس خاطري في عرس..
تهاني بضحكه:ان شاء الله يواتيكم عرس قريب..
سارة بضحكه:ان شاء الله عرس عمتو نوسه جاها عريس ماهو ..
تعكرت ضحكة تهاني ..
سارة:اهله اليوم جايين يخطبوا..
تهاني:اها..
فجأة انفتح باب الحوش اللي هما واقفين قدامه..
وخشوا زياد واسيمه..
ووراهم هيثم يقول:خش يابطل خش ياصاحب الأنجازات العظيمه..
سارة وتهاني قعدوا يشبحولهم بإستغراب..
اسيمه انصدمت لما شافت تهاني..
وهيثم كذلك ولانها كان في حالة غضب شديد قال:شن اديري هني انتي!.
انصدمت تهاني واشرت ع روحها وشبحت لسارة..
وسارة تشبح لبوها بعدم استيعاب..
هيثم:شن اللي قاعد يصير اني نبي نفهم وين نمشي نلقى الدنيا خاربه..ونلقى من يدير فبلاوي من وراي..
اسيمه:هيثم....
هيثم بعصبيه:اسكتي انتي...وانتي..اشر ع تهاني...معاش نبي نشوفك هني..وبنتي معاش نبي اي علاقه تربطك بيها فاهمه..وهي تفضلي اطلعي..اطلعي..
سارة حطت يدها ع فمها وهي في قمة الصدمه..
اما تهاني لوحت الكيسه اللي كان فيها قفطان سارة اللي قبل بتلبسه في الحفله الليله..
ومشت طلعت بسرعه ودموعها ينزلوا..
وزياد قعد معاها بعيونه لين طلعت..
هيثم صكر وراها الباب بقوة ..
سارة بصدمه:كيف ادير هكي!!؟
التفت وشبح لسارة وحواجبه مرفوعات..
سارة ودموعها ينزلوا:كيف دير هكي قولي..كيف تكلم البنت هكي..وع اي اساس تقطع علاقتي بيها...علاش!! انت علاش هكي علاش..الحاجه اللي تقهرنا اللي ديرها علاش!
ع جية نسيبه ووراها البنات الصغار..
نسيبه بقلق:خيركم!!
هيثم ضحك بسخريه وقال:خيرنا!!تو نقولك خيرنا..
اني راجل مش قادر نسيطر ع حوشي..
مش قادر نخلي مرتي تسمع كلامي بدون ماتغافلني وادير ماتبي..
اسيمه كانت حاطه يدها ع فمها ومغمضه عيونها بشده..
وهو كمل يقول...ولابنتي اللي ناس تغني بأدبها وتدينها قاعده تعيط ع بوها تنهر فيه وتتمادى عليه..
ولا...شبح لزياد وقال بضحكه ساخره..ولا خوها الكبير اللي خلاني اليوم ماده مشوقه لجماعة الصحافه الصفرا..
زياد لف وجهه عنه..
هيثم شبح لأسيمه وقال:ريتهم صغارك ريتي ريتهم هادم صغارك..هادم صغاري...اللي مش عارف كيف نتصرف معاهم عجزت والله عجزت..عجزت خلاص..
ومشي طول لداره....
ونسيبه معاه بعيونها ودموعها ينزلوا...
والبنات الصغيرات خايفات..
مشوا لأمهم يجروا وضموها من رجليها..
وهي تشبح لزياد وسارة بحده..
شويه سمعوا هيثم يقول..
قداش مني اني قداش مني نقعد نصلح برا وداخل..قداش مني..
وخش للدار..
ونسيبه تشبحلهم بألم..
طلع تاني وقال..
هيثم:مافي حد مقدر مافي حد عارف اني شن قاعد نواجه برا شن قاعد يصير معاي..مافي حد..
وخش تاني للدار..
شويه وطلع تاني وهو محول سوريته وقاعد في فانيلية داخليه..قال..
يوم البنت اطلعني شيطان رجيم..ويوم الولد يطلع غول ويقولوا قاهرنا..واللي ديروا فيهم توا شنو شنو!!..
البنت مادير في شي غير انها تكسر كلامي...والولد مايدير في شي غير انه يفضحني بس..
زياد بعصبيه مشي لداره وخشلها....
وهيثم خش للدار..
مشت نسيبه لاسيمه وقالت:شن صاير لهدا كله شن دار زياد؟!..
اسيمه مسحت بيدها ع وجهها وهي تتنهد بحرقه..
وسارة تشبحلها بحزن..ودموعها سيل..
شويه وطلع زياد وفي يده شنطه..
سارة شبحتله وقالت:زياد!!
نسيبه:وين ماشي!!
زياد بصوت عالي:ماشي ومسيبوله معالي الوزير خل يتبرا مني بالمرة شن ماندير هو مالاش بيا دخل..
هيثم طلع وهو يلبس في حزام سرواله:اطلع اطلع امشي اطلع..بالك هادي الحاجه الوحيده الصح اللي ديرها في حياتك..
مشي زياد طول بعد سمع كلامه..فتح الباب وطلع..
اسيمه:الحقيه يانسيبه ارجوك..
بسرعه نسيبه توجهت للدروج بش تركب دارها تلبس عبايتها وتاخد مفاتيحها...
ع طلعة هيثم وهو يلبش في دجاكته...
وهو ساكت ويمشي بغضب توجه للباب فتحه وطلع وصكره وراه بقوة..
واسيمه تشبح للباب بحزن...
سارة:كيف خليتي زياد يطلع..
شبحتلها بحده:نخليه يمشي..ولو فيها كيف كنت لحقتك بيه..مع الاسف خيبتوا ظني انتي وخوك اللي استغفلني واستغل ليني معاه ودار اللي داره..وانتي بقلة ادبك وتعلياتك صوتك ع بوك ياعديمه الإحترام..من اليوم برا غادي مانبيش لسانك يخاطب لساني..
سارة من صدمتها في كلام امها مشت تجري لدارها وهي تبكي خشتلها وصكرت عليها...
فالوقت اللي نزلت فيه نسيبه تجري..
ومشت طول حتى هي وطلعت من الحوش..
بعد طلعت نسيبه..
اسيمه قعمزت ع الأرض بهده..وحطت راسها بين ايديها..
ريحان ببكي:ماما..
جنان ببكي:ماما..
هي رفعت راسها وشبحتلهم ..
بعدين ضمتهم لحضنها بقوة وقعدت تبكي بألم وهي حاسه بشعور الفشل...شعور اللي قعد سنين يبني ويبني وفي لحظه كل شي انهد قدام عيونه....
اسيمه وقتها حست انها افشل زوجه و أم في العالم...
•••••••°°°°°°°°••••••°°°°°°°°••••••
في مديرية الأمن..
كان مقعمز راجح في مكتبه يطلع ع ملف ما..
ع خشة واحد من العناصر..
:سيدي المدعو خالد**** برا..
راجح بإستغراب:خالد!
:وقال يبي يخشلك...
راجح:ترا دخله..
حياه العنصر وطلع...
وشويه وخش خالد..
راجح برفعة حواجب:خالد ***** عندنا..يامرحبا..
خالد ابتسم تهكما..
راجح:خير ان شاء الله ياخالد شن الريح اللي حذفاتك علينا..
خالد بلع ريقه وقال...
"جاي نسلم نفسي"

...يتبع....