البطل المغمور "شمس الغروب"

الجزء الاول

💐..
في هداكا اليوم بالذات حسيت بوجع في قلبي مش عارف علاش...
لالا عارف..حسيت اني تسببت في خذلان لولدي ولزوجتي واكيد خواته عرفوا ان بوهم عطي وعد وخلفه..
هو اني كنت واثق ان زياد مافرقش معاه هلبه..اساسا متأكد انه ماصدقش اني بنجيه..او ممكن اني كنت هكي نفكر..
▪▪▪▪
للأسف..زياد صدق هلبه ان بوه جاي كان يراجي فيه اكثر مايراجي في اعلان فوزه في المسابقه..
قدام امه وعمته بين العكس..بان بارد..عادي..وفرح هلبه بفوزه وشاركهم فرحته..
لكن امه مستحيل توه عنه..ولدها وتعرفه..عيونه بروحهم يحكوا...والأم غالبا تفهم صغارها من عيونهم..
•••••°°°°°°°•••••••°°°••••••
خشت للكوجينه لقت امها تسخن في الغدي..
لاحظت انها معصبه من حركتها في الكوجينه وهي تقيم وتحط بقوة في الطناجر الصواني الصفر الكواشيك..
ولت من وين ماجت..تعرف امها وهي فهالحاله ماتحب تكلم حد ولاتحب حد يكلمها..
خشت لدارها وصكرت الباب ومشت طول لتليفونها اللي قاعد محطوط في شنطتها المدرسيه..
طلعاته منها واتصلت بصديقتها تهاني..
🥀وتهاني ياسارة مش في حال احسن من حالك..
بعد كملت باقي الغدي..
مشت لدارها لبست عبايتها ووشاحها..بعدين مشت بطريقها للباب..
لبست في رجليها وطلعت من الحوش لحوش جارتهم اللي فجنبهم بتاخد جهاز الحاسب المحمول متاعها اللي عاراته لبنت جيرانهم تبي تخدم عليه..
لما وقفت في الباب وطقت..
فتحلها جارهم بو البنت..
كان وجهه متجهم ويشبحلها بنظره دخلت الخوف لقلب تهاني..
قاللها بنبرة حاده..
شن تبي؟!!
تهاني ابتسمت بإرتباك وردت:كيف حالك عمي الساعدي؟
الساعدي بنرفزة:مادخلكش بيه حالي قولي شن تبي جايه..
انصدمت تهاني في اسلوبه وردت وهي تقول:نبي لاب توبي من هبه..
الساعدي قال بغضب:ومازال ياخدوا منكم ويعطوكم انتم!..
ولف ومشي خش داخل..
تعبوا عيون تهاني بالدموع..
عرفت تغير موقف جارها منهم..
هو يعرف بوها كويس بس تعامله معاهم كان كويس هلبه بعيد جدا عن خالد بوها وافعاله..الا هالمره..
لان بوها اخر مادار روح للحوش وهو سكران طينه..
بالغلط طق ع بابهم هما ودار عار مابعده عار..
وتعارك هو وجارهم وحطله كلام تقشعر له الأبدان من بذائته وفضاعة معانيه..
ولولا ان ولاده لحقوا عليه كان صارت جريمه..
الموقف هدا صار من يومين..
والبنت واخده من تهاني جهاز الحاسب من يومين..
وتهاني ع رغم من اللي صار ماحطتش في بالها ان موقف جارهم حيكون قوي لهالدرجه..
قامت عيونها في جارهم لما جي وفيده الجهاز مده لتهاني وهو يقول:لا عاد نبوا منكم شي ولانبوا نعرفوكم ولانبوكم تعرفونا والله يخلصنا منها جيرتكم الحرفه..
هي خدت الجهاز ولفت ومشت طول لحوشهم ودموعها ينزلوا وحده ورا التانيه..
خشت لحوشهم وصكرت الباب بقوة..
وبدت تقول بصوت عالي وهي منفعله وتبكي:ربي ياخدني ويفكني من هالعيشه السودا ياربي زي ماحطتيني ارفعني..
وخشت لدارها وصكرت الباب عليها بقوة وهي تبكي..
وتسمع في هاتفها يرن ومش قادرة ترد..
🥀وامها مسكينه..
سمعتها شن قالت وقعدت تبكي حتى هي وتقول:يارب ماتمملي حملي بهادي يارب...
•••••••°°°°°°••••••°°°°°••••••
☆الزوز يشبحوله وهو منهمك فشغله ع سيارة عاليه لونها اسود موديل قديم شويه..
صاحبتها توا بس خشت للورشه وهي تقول:السلام عليكم..
هو ابتسم وماباش يغير وضعيته..
وخوته يشبحولها..
هي لما شافت سيارتها رفعت حاجبها وقالت؛شنو هدا انت وياه!!!؟ اشرت بسبابتيها الزوز وهي تقول..ليها اسبوع هني وقاعدين تخدموا عليها!!
جهاد ورفيق الزوز اشروا ع خليل
اللي بحواجبه واللي بيده..
هي عقدت حواجبها بغضب وجت وقفت حداه وحطت ايديها فنصها وهي تقول:اسمع انت هات المفتاح جاي.
هو وقف ع حيله وقعد يحرك في مفتاح التصليح حركة دائريه وبدون مايشوفلها قال؛هدا وين فضيت..
هي مدت يدها وقالت وهي مغمضه عيونها بنفاد صبر:جيب المفتاح جاي نرفعها لواحد فاضي..
شبحلها وقال:سيارتك مش طالعه لورشه تانيه لو توقفي ع رموش عيونه..
شبحتله وقالت:هات المفتاح خير مانوقفك انت ع رموش عيونك..
رفيق وجهاد يشبحولهم وهما شادين الضحكه..
خليل اشر عليها بالمفتاح وقال:سيارتك ماتطلعش من هني قبل نكملوا خدمتنا عليها ياااآبله..
هي مابتش ترد عليه..صكرت غطا السيارة من القدام..
ومشت من حداه وركبت سيارتها..
وصكرت الباب بقوة..
التلاته قعدوا يشبحولها وهما مش فاهمين شن بدير..
يشبحولها كيف مغطسه راسها وتبان تبربش في حاجه..
فجأة ولعت السيارة..
التلاته فنصوا عيونهم بصدمه..
هي شبحت القدام وشدت الدومان بيدها اليسار وتحركت طول..
بعد خليل بسرعه قريب عفست عليه..
طلعت من الورشه...
هو مشي بسرعه وراها وهو مذهول..
وقف فم الباب شاف السيارة كيف خشت الزنقه..
شويه وارتسمت ع وجهه تدريجيا ابتسامه اعجاب وحاجبه اليسار مرفوع..
بعدين قعد يخبط ع جهة قلبه بمفتاح التصليح وعض ع شاربه..
شويه وتنهد..
ولف وولى للورشه وخش وهو مبتسم ويحرك فراسه يمين ويسار..
وخوته يشوفوله
رفيق تكلم وقال:تو بجديات بجديات شارون انت محصل عليها جو البنت هادي ولااا..شبح لجهاد وقال..عجباتك خليل قعد يشبح لرفيق..
ورفيق بعد كمل سؤاله شبحله..
وجهاد كذلك يراجي في الإجابه..
هني خليل رجعت بيه الذاكرة خمسه سنين لتالي..لأول مرة شاف فيها نسيبه..
♦️فلاش باك..
كان وقتها عمره 25سنه..ذراع بوه اليمين في كل شي في خدمته فالورشه وحاجات تانيه..
ورشة خالد معروفه هو ميكانيكي ممتاز وولاده مش اقل منه مافيش سيارة تخش ورشة خالد وماتتصلحش كيف ماكان وضعها..
في هداكا اليوم..
خليل واقف قدام الورشه جنب بوه اللي مقعمز قدامها ويكحل في الماشيه والجايه قدام ولده ولاهاماته حاجه..
شويه وخطمت سيارة هيثم من قدامهم..
خليل:هادو جدد في الشارع؟
خالد:ايه..دكتور قالوا..
خليل:اها..
شويه وخطمت سيارة فيها وحده..
وقفت قدام الورشه..
ونزلت المرش وهي تتكلم بالتليفون..
نسيبه:هاه دكترة...ايه......اني..شبحت للورشه وقالت..قدام ورشه اسمها ولاد خالد..
وخالد وخليل يشبحولها..
شويه خالد قال بسخريه:تو هادي محسوبه علينا وعليهم..
طاحت الكلمه في وذن نسيبه..
شبحتلهم الزوز بنظرة تخوف وقالت؛تمام دكترة خلي الباب مفتوح...وصكرت وهي تشوف لخليل وهو يضحك قالت:انت خالد..
رفع خالد حواجبه ووقف وقال:ايوه تفضلي..
شبحت لخليل واشرت عليه بسبابتها وقالت:هدا ولدك؟
خليل رفع حواجبه حتى هو وقعد ساكت..
خالد شبح لولده وقال:ايه ان شاء الله خير!؟
نسيبه ابتسمت بتهكم وقالت:من وين بيجي الخير والبو يكحل قدام ولده ويضحك هو وياه لاحشم لاجعرة لمنك ولامنه..
خليل:ترا قصري لسانك ماتخلنيش نبدا فيك مانغلطش فالنساوين اني ماتخلنيش نديرها معاك..
خالد شبح لولده وقال:خليل..
نسيبه:لا عادي خليه يبدا ويتلقى..اني محسوبه ع التريس ونعرف نتعامل مع الذكورة كويس..
خليل شبح لبوه وهو مفنص عيونه..
خالد شبح لنسيبه وقال:باهي خلاص توكلي ع حالك..
شبحتلهم الزوز بإزدراء وحركت سيارتها ومشت لين خشت الزنقه..
خليل بغضب:ال.....
بعدين بلع باقي الكلمه قدام بوه ومشي خش للورشه وبدي يسب ويلعن...
اما بوه ولى قعمز ع الكرسي وهو يضحك..
♦️الوقت الحاضر..
خليل تنهد وقال:كملوا خدمه كملوا تلاته يبوا سياراتهم اليوم..
ومشي يشوف في سيارة تانيه..
اما هما شبحوا لبعض شويه بعدم فهم..
بعدين اللي هدا مشي كمل باقي خدمته..
•••••••°°°°°°°•••••••°°°°°°••••••
◇مجبر..لقيت روحي طالع من المستشفى وماشي لسيارتي وركبت وشغلتها وتحركت طول مروح للحوش..مانرتاحش كان خليت أسيمه زعلانه مني..
طول الطريق نفكر بس امتى نوصل..
ولما قربت نوصل خطرلي شي تاني..
وقفت السيارة ع تركينه وخشيت محل ورد خديتلها باقه من الورد اللي تحبه تحب الاوركيد والجوري اسيمه يشبهولها..اي شي حلو فنظري يشبه أسيمه...
المهم..بعد خديت الورد روحت طول...
وصلت في الباب واني ندرب ع كلمات الإعتذار المناسبه اللي بنقولهالها لما نشوفها..
نزلت من السيارة وخليتها برا لأني بنولي لعملي...
بعدين فتحت باب الحوش وخشيت..ضحكت لما شفت سيارة نسيبه..كويس تسهل عليا شويه وتزيد ترطب الجو بيني وبينها..
▪▪▪▪▪
خش لحوشه من الباب الدخلاني..
وهو خاش..
لقي بنته سارة تحط فالشلايك فالمدخل..
لما شافاته ارتبكت شويه..صكرت دولاب المدخل وكيف جايه بتلف وتمشي سألها..
هيثم:امك وين؟
التفتت وهي تشوفله بنظرات مرتبكه:في الكوجينه..
هز راسه وصكر الباب..
اما هي مشت طول خشت داخل..
هو نزل عيونه وقعد يشوف لكندرته اللي يحول فيها..
بعد ماحولها مشي توجه للكوجينه..
وصل فيها وخش وهو مبتسم قال:السلام عليكم..
اسيمه مابتش تتلفت لكن ردت..
شبح لنسيبه غمزتله بعينها وبدت تغني وهي تمشيله:جابها جابها سلم خوها جابها...
 وقفت عليه وقالت..هدا الوخي الباهي اللي مرة مرة يتفكر وخيته بوريدات..
هيثم بإبتسامه:انتي كان بنذكرك بشي..بوكسينج..كورة..موطو..لكن ورد لا..الورد للورد بس
شدت اسيمه ابتسامتها..
نسيبه بضحكه:اها...شبه زبطت لمني الورد..ومشت لأسيمه ضربتها بكتفها وهي تقول..عن اذنك ياورد انت ياورد..
واسيمه تقرض فالسلاطه وهي شاده ضحكتها.
ضحكت نسيبه ومشت من حداها طلعت من حدا خوها وهي تغمزله...
هو ضحك..بعدين صكر باب الكوجينه ومشي لمرته..
حط قدامها الباقه وهو يقول:اسف..
شافت اسيمه للباقه شويه..بعدين تنهدت وحطت اللي فيدها وشبحت لهيثم وقالت:كلمة آسف ماتنقاليش اني ياهيثم..اشرت عليه بسبابتها وهي تقول..انت تعرف كويس لمني مفروض تنقال..
هيثم غمض عيونه وهو مبتسم وهز راسه بإيجاب وقال:حاضر..تو نقولهاله غير ترضي انتي بس...
ابتسمت بيأس وهي تحرك فراسها يمين ويسار..
مد الباقه ورفع حواجبه وهو يشوفلها..
هي ضحكت وخدتها..
قرب منها وحضنها وطبع قبله ع خدها..
هي ابتسمت بعدين بعداته وقالت:اطلع هدرز ع نسيبه شويه لبين مايوتى الغدي..
هيثم هز راسه وهو مبتسم..
بعدين مشي للباب..فتحه وطلع..
وهي قعدت معاه بعيونها تلاشت ابتسامتها وتبدلت لملامح الضيق بعدين مشت حطت الباقه ع تركينه وكملت تجهيز الغدي..
اما برا في الصاله..
وهو ماشيلها لقي اخته مقعمزة فيها مع بناته الصغار وهي تهدرز معاهم..
جنان "وحدة من التوأم":
ايه عمتو عطيتها بوني ع وجهها..
نسيبه:صحة لبنت عمتها..
قعمز هيثم وقال:ماشاء الله عليك وعليها!
نسيبه شبحتله وقالت:نعلم فيها كيف ادافع ع روحها واختها..
شبح هيثم لريحان التوأم التانيه اللي كانت لاهية بتليفون عمتها...
ريحان عندها ثقب في القلب من الولادة وكلهم يعاملوا فيها معامله خاصه..
هيثم:تمام علميها لكن بالعقل قبل العضلات..
نسيبه:وراسك يادكترة الشكلات اللي برا ماينفع معاهم غير التعامل باليد..
هيثم تنهد وقال:الله يرحمه بوي وخلاص ماقدرش يخليني بطل كاراتيه زيه مالقاش غيرك يورثه..
نسيبه:واحسن مادار الله يرحمه ويوسع عليه ويدخله الفردوس الأعلى..
ضحك هيثم وقال:آمين..
جنان:حتى اني نبي كاراتيه..
هيثم شبحلها وقال:تكبري يصير خير.
"نوسه"..
خفت ابتسامة هيثم..
ونسيبه شبحت لهيثم وقالت:فالصاله يازييزو..
شويه وخش زياد..لما شاف بوه وجهه تغير..
لكن تجاهل وجوده وقال لعمته:شويه ترا..
ناضت نسيبه وهي تشبح لهيثم وتقول:باهي..ومشتله..
وهيثم عيونه ع زياد لين طلع وعمته لحقاته..
مط شواربه بملل بعدين اتكى ع الكنبه وحط رجل ع رجل..
البنات شبحوا لبعض شويه..
بعدين نزلوا الزوز من ع الكنبه ومشوا طول طلعوا من حداه وهو يشبحلهم..
فجأة رن تليفونه..
طلعه من جيبه وشاف المتصل فتح الخط طول وقال:ايوه السلام عليكم..
•••°°°°°°
معليشي زيزو هدا بوك فالنهايه وانت عارفه وعارف شن يخدم راهو مدير مستشفى كل شي ع دماغه..
زياد بضجر:باهي صكري عليه الموضوع هدا وقوليلي شن قصة الرحله اللي بيديروها في نص العام؟
•••••°°°°°
في هالوقت..
خواته الزوز كانوا جايبين وراقي في ايديهم..
كانوا كاتبين فيها الأرقام من 1 الى 20 والابله في الروضه دايرتلهم نجمه نجمه وكاتبه كلمات شكر..
وروهم لأمهم وكالعاده سمعوا منها احلى كلام وشافوا في عيونها احلى فرحه..
لكن هالمرة خاطرهم يسمعوا الكلام الحلو ويشوفوا الفرحه من بوهم...
لما وصلوا فالصاله لقوه يتكلم بالتليفون..
جوه يجروا..وصلوا فيه ومدوله الوراقي..
هيثم:ايه تمام..........باهي شن صار في العمليه متاع الساعه 4؟.......
ريحان:شوف بابا..
يدوب شبحلها..هز راسه وناض من حداهم وهو يقول:خلاص جاي توا..توا........باهي....وصكر ومشي للباب والبنيات يتبعوا فيه لين وصل الباب لبس كندرته وفتح الباب وطلع..
الزوز قعدوا واقفات يشوفوا الباب بنظرة زعل وكسرة..
ع جية امهم اللي شبحت للباب وقالت:بابا طلع؟
ريحان بنبرة زعل:ايه..
تنهدت اسيمه بعدين قالت:باهي تعالوا ماما تغدوا..تعالوا..
مشوا البنيات وامهم مشت وراهم..
••••••°°°°°°•••••••°°°°°°°•••••
ياولاد..
رفيق وهو يمسح فالسيارة:هممم..
اما خليل فقعد يساوي في حوايجه بعد غير لأنه بيطلع..
جهاد وهو يلبس في طاقيته:ماشي لوليد فالشارع اللي ورانا نص ساعه مش مطول..
خليل مشي بإتجاه الباب:ماتعطلش ع خوك...
ومشي طلع..
جهاد جي لرفيق خبطه ع كتفه وقال:نص ساعه مش اكثر..
ومشي للباب وخوه يشوفله لين طلع بعدين ولى لهي بخدمته..
برا...
ركب خليل سيارته الأشبه بالسيارات الصحروايه..
وخوه كان طالع يمشي ع رجليه..
كيف شغل خليل السياره...
خطمت من حداه سيارة نقل سيارات بانت عليه منها سيارة نسيبه..
رفع حاجبه..بعدين تحرك طول وراها...
فاتوا الزوز من حدا جهاد اللي كان يمشي ع رجليه..
رن تليفونه قامه وفتح الخط ورد:هاه حجي....نكعبلك توا....باهي نتلاقوا..ونزل التليفون وحطه في جيبه..
مشي مسافه لابأس بيها لين وصل في شارع فيه تلاته عمارات وكلها كانت عمارات اربعه ادوار...
العمارة الوسطانيه في تحتها محل مواد غذائيه..
وقف قدامه..
شويه جاه واحد وقف عليه..
تصافحوا وهو يقوله:شن جو يااشهب..
جهاد:تمام..شن امورك انت..
طلق الولد يده وقاله:ع الحاشيه..المهم بنقولك الليله الرهان ع مباراة في الدوري الإيطالي..
جهاد:ايه عارفها قوللهم قال جهاد اليوفي بيفوز
ضحك الشاب وقال:شن تقول انت اليوفي طايحه بيه والله مايقدرهم..
جهاد:اسمع مني وشوف بعينك بعدين مانراهنش ع حاجه ونخسر..
الشاب قال:والله كان هما فازوا اني نبزيلك اكثر مايبزولك الأولاد..
ضحك جهاد وقال:باهي خليك عند كلمتك..
مد يده الولد وقال:واني ديما عند كلمتي يااشهب..
صافحه جهاد وهو يشوفله بإبتسامه..
الشاب:بيناتنا تليفون..هوينا..
جهاد:تشاويتو...
طلقوا ايدين بعض..مشي الشاب وجهاد التفت للمحل ومشاله بياخد منه ميه...
🌷من اول الشارع وقفت باص الجامعه..
نزلت منها مختمره كانت تمشي وهي رافعه الدوسي فيد وع كتفها شنطة لاب توب
كانت تمشي بإتجاه وحده من العمارات..
لما قربت توصل في العمارة متاع المحل..
طاحت من الدوسي نجارة"برايه" دائريه..
ولانها تمشي وعيونها لوطا شافتها وهي تتكركب..
تأففت وقالت:استغفر الله..
قامت الطرف الشفاف متاع الخمار وقعدت تسرع في مشيتها بش تلحق النجارة اللي ماوقفتش الا عند سيبدرو جهاد الاسود..
هي كيف جت بطبس تاخدها استاقظت وين وقفت النجارة.
رفعت عيونها وهي توقف ع حيلها جو فعيونه...
عيونه كان لونهم ازرق خفيف يميل للاشهب..
اما هي زرق غامقات مظللاتهم رموشها اللي كانوا طوال زي السيف وكثيفات وكأنهم مكحلات..
هو قريب داخ لما شافهم..
اما هي انجذبت لزينه غصب عنها لأن جهاد كان قنين هلبه
بعدين انتبهت لنفسها نزلت عيونها ووخرت خطوتين مااستاقظتش انها مش منزله طرف الخمار اللي يدرق العيون..
هو ارتسمت ع وجهه ابتسامة خفيفه طبس وقام النجاره..ومدهالها وقال:خودي..
هي مد يدها اللي مغطيها القفاز الأسود وهي مبسوطه..
زاد ابتسم وحط فيها النجاره..
صكرت عليها بقبضة يدها وفاتت من حداه وهي تمشي بسرعه..
وهو التفت وقعد معاها بعيونه وهي تمشي لين وصلت عمارتهم اللي كانت جنب عمارة المحل..
وخشتلها..
ضحك ضحكه خفيفه..
بعدين فتح شيشة الميه ورفعها وبدي يشرب فيها وهو مبتسم...
كملها كلها في مرة..بعدين نزل الشيشه وقال:عليك عيون ولعوا في امي النار..
زفر..بعدين ضحك..ولف ومشي..
ومرة مرة يلتفت جهة عمارتها..
🌷اما هي لما خشت للعمارة قعدت تركب الدروج بسرعه وكأنه يجري وراها..
لما وصلت الدور التاني وين مافي حوشهم انتبهت انها مش منزله طرف الخمار اللي يغطي العيون..
بخوف نزلاته طول..
وهي داهشه طقت ع باب الشقه..
طول الباب انفتح..
استقبلتها امها اللي كانت تتكلم بهمس وخوف كذلك:خشي تحركي بوك هني..
خشت بسرعه..
رمت كندرتها..
امها صكرت الباب وهي تقول:بري للدار طول..
مشت تجري بسرعه للدار ..
وامها خدت كندرتها حطتها في المدخل..
بعدين مشت طول للكوجينه..
اما هي خشت الدار لقت اختها راقده ع الفراش لكن مش بالنوم..
صكرت الباب وقالت:امتى روح؟
اختها:مالاشي هلبه..
حولت الملايه وهي تقول:نشد عليا؟
اختها:تس تس..
تنهدت بخوف..
بعدين حطت ملايتها ع تركينه ومشت لأختها وهي لابسه بلوزة طويله ع سروال..
قعمزت حداها وقالت؛حي عليا يا دانيه حي..
قعمزت اختها وهي تقول:خيرك رتاج؟!
رتاج:توا صار معاي موقف حسام شافه مليون في الميه وتو بيعاوده لبوك..
دانيه بخوف:موقف شني..
وحكت رتاج الموقف لأختها واختها تسمعلها وتضحك..
بعد كملت قالت بنرفزة:شن يضحك فيك؟
دانيه بضحكه؛عجبني الموقف..
رتاج بتهكم ؛ايه حتى بوك لما يسمع بيه تو يعجبه!
دانيه بضحكه:مايديرلك شي..
رتاج:وعلاش بتحزيه عليا انتي!؟
دانيه؛ياعبيطه خوك مجاهد اليوم مروح من الصحرا..
رتاج من فرحتها عيطت لكن بدون بصوت..
ودانيه تضحك عليها..
□مجاهد خوهم الكبير بوهم ماعنداش معاه الروح وفي حضوره عاطيه القدر كله والكلمه كلمته هو..
بوهم "عبدالمجيد" راجل متزمت مش متدين..مصكر ع بناته هلبه ويعامل فيهم بجفاف هما وامهم اللي عايشه معاه زي الجاريه لااحترام لاقيمه وهي شخصيتها ضعيفه هلبه..
امهم"سدينه" مراة بسيطه جدا جابت من عبدالمجيد زوز ولاد وزوز بنات..
الكبير مجاهد عمره27 عام..
وبعده رتاج..21
وبعدهم دانيه16 عام..
والاخير..رشيد 13 عام..
بعد جاباته بالعمليه حولت الرحم بسبب خطأ طبي..
وهالشي تعب نفسيتها هلبه وزاد حطمها حست روحها مراة بلا فايده بعد حولاته..
وهو زادها ع مابيها..قعد يتزوج ويطلق بش يستمتع لاأكثر
ومايبيش صغار زياده لأنه بخيل..
لولا مجاهد راهم عاشوا في عازة هلبه حاجات..
طبعا بناته بالسيف مخليهم يكملوا قرايه..لسبب واحد بش يخدموا ويصرفوا ع ارواحهم..
جوهم خطابه وهو يرد فيهم لأنه مايبيش يتحمل مصاريف اعراسهم..يبيهم يخدموا ويديروا قرشين ويصرفوا بارواحهم..
🌿وياكثرهم اللي زي عبدالمجيد🌿
••••••°°°•••°°°•••••°°°°°°•••••
عصرا...
ماشيه في الحوش تبخر فيه بالوشق..
وبنت اختها مقعمزة تصلح فالكراسات بعصبيه..
شبحتلها وقالت بضحكه:اللطف ياربي ياسيدي مابعدهم الصغويرة..
نسيبه:صغويرة شني ياخالتي تي كل واحد فيهم ثور اكبر من التاني كان تشوفيهم وهما مقعمزين ع المقاعد..
ضحكت خالتها وجتها وهي تقول؛شن صار في سيارتك حلوات خالد صلحوها..
مطت شواربها بإزدراء وقالت؛ تبي تكرهيني فالحلوات انتي نعرفك بش ننقص شويه ولا....
قعمزت خالتها وهي تضحك بعدين قالت:تو شهاده من دينك يانويسه مش طروف يسحنوا الكبد..
نسيبه:راك تكبري ياخالتي شويه..
خالتها:خليتهولك انتي الكبر ياانتر تيكر..
وناضت ومشت من حداها وهي تغني:
هو انت جيت منين حبيتك بالتلاته..
نسيبه وهي تشوفلها ومبتسمه بإزدراء قالت:شن خالتي هادي كيف جت هي وامي الله يرحمها خوات مش عارفه؟!
حركت راسها يمين ويسار وطبست ع الكراسات وبدت تصلح وهي تقول..تي شنو هاللبز هدا تو هادي كراسه طالب هادي!!
قامتها شركت منها كم صفحه وحطتهم فالكراسه وصكرتها وحطتها ع تركينه وجبدت كراسه تانيه..
•••••°°°°°°••••••°°°°°•••••°°°••••
مقعمز في سيارته وفاتح اغنيه للسوكني ويغني معاها..
شويه طق روشن سيارته..
نزله وقال:10سنين!؟
هي ردت تقول؛سقدني شن تبي؟
خليل:الليله وتي روحك انتي وخوك وحناك..
هي ردت وقالت؛خدمة الليل عارفها كم تبي ياشارون ولا؟
شبحلها برفعة حاجب وقال:بالله!!
هي قالت:نوقض فيك بس خلو..
خليل؛لوووكااا..
ضحكت وقالت:باهي نتلاقوا في الليل..
ومشت من حداه..
وهو شغل سيارته وتحرك..
•••••°°°°•••••
ماشيات هي هي وبنت اختها بطريقهم لحوش عفاف مرت خالد..
البنت شاده فيدها حافظه مصكرة وتمشي وهي تساوي في قصتها اللي مطلعتها برا الوشاح..
خالتها قالت:كإنك مزودتيها شويه لبستك اوفر راهو..
البنت:الولاد يموتوا فالجو هدا خالتي سماح..
سماح:ماعدا ولاد خالتك عفاف الجو هدا مايحبوشي يا سجى..
سجى:اضحكي ياسموحه كلهم يموتوا في الجو هدا...
مطت خالتها شواربها بملل وسكتت..
وصلوا في حوش خالد..
رنت سماح ع رقم اختها..
شويه وانفتح الباب البراني..
سماح؛ريفو شن جو ياسمح..
وعيون سجى قريب ياكلوه..
رفيق وهو يشوف لخالته قال:تمام..خشوا..
خشوا خالته وبنت خالته..
صكر الباب وقال:وين خالتي سالمه؟
سجى:خالتك سالمه مشت لعمتي مريضه اطير عليها فالسو..
رفيق ماعبرهاش بكل شبح لخالته وقال:امي داخل خالتي..
وفتح الباب وطلع وصكره وراه..
شبحتلها سماح وقالت؛تعالي يامطيورة تعالي..
لفت سجى وهي معصبه مشت مع خالتها للباب الدخلاني..
••••°°°°°••••°°°°••••
طالعين بالسيارة من الحوش..
امهم كانت تسوق..
فجنبها ولدها الكبير ووراهم بناتها التلاته..
اسيمه:نحط اختك في المعهد بعدين نمشوا غادي..
زياد هز راسه بإيجاب..
شويه وشافت اسيمه رفيق ماشي فالطريق..
قربت منه وقفت نزلت المرش وهي تقول؛رفيق ولدي..
رفيق وقفلها طول وابتسم وبدي قلبه يدق بقوة لما طبس بيكلم اسيمه ولمح سارة لاهيه بهاتفها قال:خالتي اسيمه كيف حالك؟
اسيمه بإبتسامه:الحمد كيف حالك وحال امك؟
رفيق:الحمد لله خالتي..
اسيمه:ولدي بعدين شويه بنجيبلكم سيارتي فيها مشكله ادير في صوت ماعرفتاش شن هو..
رفيق: انتي بس جيبيها خالتي شن مافيها نصلحوه بالمحبه..
اسيمه:لا مش بالمحبه ولدي هادي خدمه مقابلها فلوس وتم الكلام..
ضحك رفيق وقال:اللي تبيه حني فيه..
ابتسمت اسيمه..
شاف رفيق لزياد لقاه يشبح القدام وحاجبه مرفوع قاله:شن جو زياد..
زياد من فوق نفسه:تمام..
اسيمه شبحت لولدها بعدين قالت:تمام ولدي بعدين انطق فيكم..
وخر رفيق ع السيارة وهو يهز فراسه بعد مشت السيارة قال رفيق:مريض..
في السيارة..
اسيمه:شن الأسلوب هدا زياد؟
زياد بشي من الإنفعال:اني مش عارف انتي كيف مازال تتعاملي معاهم بعد اللي سمعناه وريناه
اسيمه؛ضروني ولاضروكم!!؟ اني ماريت منهم كان الإحترام ماغلطوش معاي حتى بنظره
سارة: وانتي تراجي لين يغلطوا فيك ماما!؟
زياد:شورها!
سارة:ماما صح تهاني كويسه وخالتي عفاف حتى هي لكن ولادها مش كويسين بكل واختهم تحكي عليهم ماينفعوش ماما اقطعيهم بالله عليك..
زياد:حتى بوي قالهالك الف مرة...
اسيمه قعدت ساكته وهي مضايقه مابتش تزيد تناقشهم..
زياد شبحلها شويه بعدين شبح القدام وحرك راسه يمين ويسار..
اما سارة مطت شواربها ع جنب ولهت باللعبه في هاتفها..
والبنات الصغار الزوز يشبحوا للشارع من الروشن..
••••°°°°°•••°°°°°•••••
◇طلعت من المستشفى وركبت سيارتي وتوكلت لعياده فاتحها صديق..خيريه هي..كنت مشترك معاه فيها بخبرتي..
نعاين في الناس مجانا وندير في عمليات مجانيه للناس اللي مايقدروش يدفعوا تكاليف المشفى اللي نخدم فيه..
الشي الحلو في الموضوع هدا كله هو سيل الأدعيه اللي نسمع فيها من الناس..
ومن قلبي نفرح لما نسمع اي دعاء لصغاري...
ربي يتقي ع ضراريك..
ربي يباركلك في عمرك وصغويرتك..
ربي يخليلك صغارك ويفرحك بيهم..
الله يستر عليك وعلى عويلتك دنيا وآخره..
حجم الفرح اللي يكبر في قلبي واني نسمع فيها لايمكن وصفه ولاتخيله..
بعد كملت شغلي طلعت من العياده ووليت للمستشفى من جديد...
يومها روحت متأخر للحوش...ممكن مع الساعه واحد..
خشيت للحوش بهدوء..
ومشيت بطريقي لدار النوم
وين جيت فايت من قدام دار بنتي سارة...
وقفت لما سمعتها تبكي وتقول...
سارة ببكي:بنتقطع ياماما بنموت..
اسيمه وهي طبطب عليها؛معليشي ماما يفوت بنتي يفوت..
◇فهمت خيرها..
ماعندي مانديرلها..مشيت طول للدار وخشيت..واني حاس بوجع في قلبي صوت بكاها قعد فوداني..
لكن مابيدي شي...مانقدر نديرلها شي في ظرف زي هدا امها بس اللي تعرف تتصرف
اني مانقدر ندير شي... المهم بعدين فجأةسمعت صوت دوشه جاي من الشارع
تأففت وقلت...كان نلقى جهة خير من هالجهه والله ماقعدت فهالشارع دقيقة زياده..
••••°°°°°••••
ونحبه ونحبه والغالي مقوى حبه..
رفيق وهو شاد بوه ويضحك؛ياودي باهي غير خش..
شبح لجهاد وقال:اووو..اشهب..امتى كبرت انت..!!
جهاد بضحكه:امس بس..
خالد:وماتقولش ياولد الكلب..
ضحكوا الزوز ودخلوه وصكروا الباب..
في الحوش..
عفاف في دارها:عطيك مايرفعك ياخالد عطيك مايزرفك..
ومش هي وبس حتى بنتها..
تهاني وهي تبكي:امتى يختفي صوتك من الدنيا بس امتى..
"عفوووفه"..
وبدي خالد يقول فكلام ماينقالش..
رفيق غمله فمه ووصله لدارهم..
حطوه ع السرير هو خوه..
وطلعوا وصكروا الباب....
بدي يغمض فعيونه وهو يغني بصوت خافت..
لين رقد...
••••••°°°°°••••••°°°°°••••••
مقعمزة فالسيارة تشوفله من المرايا وهي تراجي..
شافاته صكر الكوفني..
وجي فتح باب السيارة وركب..
ملاك:كله تمام..
خليل وهو يشغل في السيارة:ايه..
شبح من المرايه للعزوز وقال:حاجه صالحه..
العزوز وهي غامه وجهها بالفراشيه:شن تبي..
خليل بضحكه:شن جو..
صالحه بنتة:مابيشي غير تحرك وسقد روحك..
ضحكوا هو وملاك..
وتحرك طول..
🌿ملاك وحناها وخوها الصغير كانوا جيران قدم لحوش خالد..بوها كان صاحبه ويخدم معاه في نفس الخدمه..
بوها مطلق امها وقاعده عايشه هي وخوها الصغير بعد تخلت عليهم امهم مع حناهم ام بوهم..
بعد سنه من الطلاق..بوها حتى هو هج للمغرب وتزوج غادي وفاتهم مرة وحده..
وخالد وولاده تكفلوا بيهم..وطبعا دخلوهم معاهم فالخدمه..
حناها وافقت مضطرة المهم بنت ولدها ماتبيعش روحها بش تجيبلهم ماياكلوا..كانت واثقه في خالد وولاده
صح حتى هما طريقهم بطاله لكن مازال عندهم شرف ونخوه..
خليل:عيت الطبه القدام شويه..نوصل للعشرين ابدي..
ملاك حطت يدها ع بطنها وقال:باهي..
خليل:واحد..اتنين..تلاته..اربعه....
وقعد يعد خليل لين وصلوا لنقطة التفتيش ع رقم 20..
وهني ملاك بدت تأن وتتوجع..
الضابط:وراقيك..
خليل وهو متصنع التوتر طلع الوراقي وعطاهمله وقال:بالله فيسع خوي تربح تشوف قدامك في الوضع..
ملاك؛ووك عليا زوودلي..وووه..
صالحه بتكشيخ؛تي خلونا نفوتوا ياايامنا السود المراة بتجيب في السيارة..
الضابط مد الوراقي لخليل وقاله:توكل..
صالحه:شن سماك ياوليدي..
الضابط ضحك وقال:احمد..
صالحه؛العيل اللي بتجيبه بنسموه ع اسمك..
ملاك؛ووووك ياخليييل ووووووك..
خليل بفرفشه:هيا هي..
وتحرك طول..
والضابط هو وصحابه يضحكوا..
وكملت ملاك وصلة عياطها لين بعدوا بمسافه..
خليل:خلاص اسكتي..
ملاك ضحكت وهي تقول:وووك وووك وووك ياخليل وووك..
خليل:ضمي فمك ياحماره..
ملاك بضحكه:والله ياحناي منظره وهو داير روحه خايف عليا خلاني عشت الدور حق تقول راجلي..
صالحه ضحكت وقالت:تي اني بروحي صدقت..
ضحك خليل..
ملاك شبحتله وبدت تغني:حتى راجلي يخاف عليا..حتى راجلي يموت عليا..حتى راجلي يدلل فيا...
وصالحه تزغرط..
وخليل يضحك وهو يحرك فراسه يمين ويسار...
🌿وصل ملاك وحناها وخوها لزنقتهم قعد يمشي معاهم لين وصلهم للعمارة..
بعدين ولى لسيارته..
ركبها وتحرك لمكان تسليم البضاعه وين مافي الجماعه اللي يخدموا مع بوه..
عطاهالهم ومقابلها خدي حقها..
بعد دس فلوسها فالسيارة كويس..
توكل لحوشهم.....
••••••°°••••°°°••••••°°••••
تاني يوم الصبح....
في الجنان..
خالد وهو يشرب في القهوة:لا الفلوس تامات..
خليل هز راسه وقعد يشرب في قهوته..
خالد:خديت نصيبك؟
خليل:حاج قتلك قبل مانبيش ناخد ومش حناخد..
خالد رجع رشف من القهوة وسكت..
ع طلعة تهاني ورفيق معاها..
خالد شبحلها وقال؛تعالي جاي..
هي وقفت والتفتت ومشتله وعيونها لوطا..
حط الفنجان ع الطاوله وقال:الجهاز اللي عطتيه لبنت هداكا الكلب بري لوحيه فالكناسه جبتلك غيره واحسن منه..
تهاني:بفلوس شني..
خليل ورفيق شبحولها بحده..
خالد؛بفلوس الورشه وانشدي خوتك كان اني نكذب..
خليل:هي تفكر تنشد بس نقص لسانها من جذوره..
خالد شبحله وقال:مادخلكش انت خليك فحالك..
سكت خليل وهو يفنص فيها..
نزلت عيونها بخوف..
خالد شبحلها وقال:بري..
مشت طول..
ورفيق مشي وراها..
وخالد رجع يشرب فالقهوة..
وخليل شبحله ورجع شرب حتى هو..
•••••°°°°°•••••°°°°°°•••••
مقعمز ع راس طاولة الأكل..
وحواليه مرته وبناته يفطروا..
هو مرة مرة يسرق في النظر لبنته ساره اللي لاحظ شحوب لون وجهها..
وهي تاكل بالسيف..
شويه وجي زياد شبح لأمه وقال:طالع..
شبحله..
اسيمه:موفق ولدي..
كيف جاي بيمشي وقف لما سمع بوه قال..
"تبي نظارات"
شبحوله مرته وبنته..
التفتله ولده وقال:نعم؟
هيثم وهو رافع حواجبه:نظرك نظرك فيه مشكله؟!باك تبي نظارات بش تشوف كويس..ع نطاق واسع..
قال كلامه ويحرك في سباباته ويلف بيها ع الطاوله..
اسيمه شبحت لزياد..
زياد ابتسم بتهكم وقال؛اها ايه ممكن..حك حاجبه وقال..وصي ع زوز..حرك سبابته بينه وبين بوه..بعدين قال..سلام..
ولف ومشي..
بلعت ساره ريقها وشبحت لبوها..
اللي رفع حواجبه وهو يشوف للجهه اللي مشي منها ولده..
اسيمه شبحتله وقالت:هيثم..
رفع يده في وجهها وسكتها...بعدين ناض خدي دجاكته وشنطه..
ومشي من حداهم..
اسيمه غمضت عيونها بغضب وقالت:غير تروح يا زياد..
سارة بعد سمعت الباب تصكر قالت:عنده الحق ماما.
فتحت اسيمه عيونها وفنصت فيها..
هي طول نزلت عيونها..
فجأة رن تليفونها..
اسيمه بحده:تحركي لباصك..
ناضت طول سارة خدت شنطتها ومشت بسرعه..
بعدين اسيمه التفتت لبناتها وقالت؛شويه ونطلعوا ماما هي نوضوا..
ناضوا البنات ومشوا يجروا لدارهم..
وهي ناضت وبدت تلم فالماعين وهي معصبه..
•••••°°°°°°••••°°°°°••••••
 الساعه التاسعه والنصف..صباحا...
فتحت باب الفصل وخشت..
الطلبه وقفوا استعداد..
هي قعدت تحرك فيدها فوق ولوطا بمعنى قعمزوا.
قعمزوا..
شبحتلهم بنظرة امتعاض وقالت:كويز..
هما وجوههم انقلبت..
رفعت حاجبها وقالت:باك مش عاجبكم!!
واحد قال:ماقلنا شي ياابله!
نسيبه؛وماتقولوا شي ماتتنفسوش حتى النفس ع العار اللي ريته فكراساتكم لين نوريكم يا كمشة مستهترين..
هما طلعوا وراقيهم من سكات ومن داخلهم يسبوا فيها..
اماهي قالت:هي بسرعه اكتبوا السؤال..
تكلم عن المناخ في القطرة اللي حني عايشين فيها..
واحد منهم قال:ليبيا ياأبله؟
ضحكوا اللي معاه...
ابتسمت بسخريه وقالت:لالا النمسا وليدي..
وجاته جبدت الورقه وكمكمتها ولوحتها وهي تقول:اعمال السنه صفر يانمساوي ياحانط انت..
الولد قعد يحك في شعره بإحراج..
والولاد شادين ضحكتهم..
فجأة رن تليفونه..
طلعاته من جيبها وشافت المتصل فتحت الخط وردت:ايوه..
"ياابله والله مش عارف شن بنقولك استغفر الله وخلاص.. الصبح جينا الورشة لقينا سيارتك مهناش"

...يتبع...