البطل المغمور "شمس الغروب"

الجزء الثامن عشر القسم الثاني..

هو اني مش عارفه يعني الكلام اللي نكتب فيه تقروا فيه ولالا!؟
مش متفقين ان مواعيد تنزيل الرواياتين..
جزئين السبت والاثنين البطل المغمور..
وجزء واحدMyteacher
وان التنزيل ع حسب الظروف..وان مرات يكون عندي وقت نزل فيه في يوم من ايام الفراغ!!
علاش توا نشبح في تعليقات متاع نسينا احداث الروايه وخيرها عطلت وتخلي فينا نترجوا فيك ومن هالدوة!!!؟
نحس فيكم قاصدين معليشي ناس قاصده انها توقفني عن الكتابه بأي شكل بتعليقاتهم هادي..
ع العموم التمسولي الاعذار ارجوكم راني معاش زي قبل...
وولا مرة عاملتكم بمزاجي..لهدا اتقوا الله..
🍁🍁🍁🍁🍁🍁🍁🍁🍁🍁🍁🍁🍁🍁🍁
💐..
الساعه الخامسه عصرا..
في الطريق..
مروحه ببنات خوها وهي تتكلم بالتليفون..
نسيبه بإبتسامه ضيق:مرحبتين بيكم........تمام...ان شاء الله.....بالسلامه...ونزلت التليفون وصكرت وهي تقول...مش وقتكم بكل..تأففت وقالت..أستغفر الله..
جنان:خيرك عمتو؟
نسيبه:شي حبيبتي...شي..
وزادت سرعتها...
لعند ماوصلت في شارعهم..
فاتت من قدام الورشه بسرعه..
خلت ولاد خالد الثلاته يشبحولها..
خليل طلع اللي في يده ومشي لراس الزنقه..
وخوته يخدموا وهما يشبحوله..
وقف في راس الزنقه وشاف السيارة وهي كيف واصله للحوش..
ولحظات وخشت طول..
هو تنهد..بعدين مشي ولى للورشه...
🍁🍁🍁🍁
روحت نسيبه وكالعاده اللي خدت عليها مؤخرا..
ادخل البنات لديارهم بش يبدلوا..
بعدين تركب هي فوق تبدل وتتوضى وتصلي..وتنزل تجري للبنات تغديهم...
بس هالمره بدت تجهز لجية اهل راجح..
وبعد كملت تجهيزاتها...مشت لسارة في الدار..
طقت الباب...وفتحت الباب..
لقت سارة راقده..تنهدت بحزن..
بعدين لفت وطلعت من الدار...
بعدين مشت لدار البنات الصغار..
نسيبه:خليكم هني حبيباتي باهي..اكتبوا الواجب بعد يروحوا الناس اطلعوا باهي؟.
الزوز قالوا:باهي..
ابتسمت نسيبه بعدين طلعت وصكرت الباب..
جنان طبست ع كراستها وقعدت تكتب في واجبها..
اما ريحان مشت لسريرها وخشتله ورقدت بتعب..
جنان التفتت شافتها..بعدين رجعت شافت لكراستها وقعدت تكتب..
••••°°°°°•••••°°°°°•••••°°°°•••••
في عاصمة احدى الدول الأوروبية..
كان ماشي وهي ماشيه جنبه تكلم فيه..
لجين:اليوم مافيش غير هالإجتماع بس..وبعد تلات ساعات موعد الرحله ل*****..
هيثم هز راسه وقال:تمام..تمام..
لجين تنحنحت وقال :شن حال الصغار كلمتهم اليوم؟!
هو ارتبك من السؤال اللي مش عارف شن يجاوب عليه..
وبإستعجال لقي اجابه اسعفه بيها عقله هز راسه وقال:حالهم باهي..باهي..كويسين..
وخش للفندق بسرعه..
هي تنهدت وخشت وراه...
....وفهالوقت....
اللي يقول ع حالهم باهي..وكويسين...
كبيرهم كان واقف ع محل في احد المناطق الراقيه اللي يسكن فيها الصديق الجديد اللي تعرف عليه..
زياد وهو يشوف للحوش:تسكن هني؟.
عبدالملك:اها..بس مش ملك مأجره ايجار..
زياد شبحله بإستغراب وقال:حوش كبير زي هدا مأجره بش تسكن فيه بروحك!؟
عبدالملك ابتسم ع جنب وقال:عندي فيه مصالح..
زياد مافهمش شن يقصد ولا يبي يفكر اصلا انه يعرف كل اللي يبيه كان شي واحد:المهم..نبي منك دورلي ع شقه صغيره اوحتى استديو ندك راسي فيه..
عبدالملك سكت شويه بعدين قال:عندي الدور الفوقاني فاضي تجي تقعد فيه؟.
زياد بضحكه:انت مأجره وتبي تأجره..
ضحك عبدالملك وقال:تجي تقعد معاي هدا قصدي والاجار بالنص..
زياد:مرات مانقدرش عليه..
عبدالملك ضرب صدر زياد ضرب خفيفه وقال بضحكه:ولايهمك مادورش ايجار تلاته شهور شن رايك!؟
زياد:مش كأنه هلبه هكي مانبيش نثقل عليك..
عبدالملك:لاثقل عليا لاشي..الناس لبعضها يابرو..وقتلك قبل انت خشيت خاطري يازياد..
زياد ابتسم وقال:تمام نروح نجيب حوايجي ونجي..
عبدالملك:هاك شد..وحدفله مفتاح السياره وقال...قضي بيها مشاوريك..
زياد تلقى المفتاح وقال:صحيت ريقا..
ضحك عبدالملك...
وزياد لف ومشي للسيارة..ركب وشغلها..وتحرك طول...
وعبدالملك معاه بعيونه لين ادرقت السيارة..بعدين خش وصكر الباب..
••••••°°°°°°••••••°°°°°•••••
الساعه الخامسه والنصف عصرا...
وصلت سيارة راجح لباب حوش هيثم..
فالوقت اللي طلعوا فيه جهاد وامه من حوشهم ماشيين للورشه بش ياخد السيارة من خوه ويرفعها لمشوار...
جيهان لما نزلت السيارة..جو عيونها ع عفاف وولدها..
قلبت عيونها ومشت للباب تلحق في خوها وامها..
وراجح عيونه من ورا النظارات ع جهاد وامه...
جهاد كان متجاهلهم...لكن عفاف كانت تسرقلهم في النظر..
عواطف:تي هيا رن الجرس..
شبحلها راجح..بعدين تنهد ومشي رن الجرس...
....عفاف كانت وهي ماشيه مع جهاد تفكر في خليل اللي أكيد شاف سيارة راجح وهي جايه....
جهاد:ماقتليش يام وين تبي؟
عفاف:قتلك بعدين تعرف..
جهاد:ماهو مش اني بنسوق يام!
عفاف:في الطريق تو ندلك..
جهاد تنهد بملل وقعد ساكت...
وصلوا قدام الورشه...
شافوا خليل واقف وهو يشوف للفراغ ويحرك في المفتاح متاع السياره ع صدره..
جهاد:هات ترا..
شبحلهم بعدين حدفله المفتاح ولف خش داخل طول..
جهاد بعد ماتلقى المفتاح مشي للسيارة...
وعفاف واقفه في مكانها تشوف لخليل داخل كيف يحوس ويبان متوتر...
انفجعت لما سمعت صوت كلاكس..شبحت للسياره لقت جهاد يأشرها..
تنهدت بحزن ومشتله..
ركبت السياره..ورجعت شبحت لولدها...
وقعدت معاه بعيونها لين تحركت السيارة....
خليل بعد مامشت السيارة...شبح لرفيق وقاله:طالع شويه..
رفيق هز راسه بإيجاب..
خليل مشي خش داخل..غير حوايجه..
بعدين طلع من الورشه ماشي ع رجليه وهو مضايق..
فجأه...
خطمت جنبه سيارة صاحبها حرق العجل..
انفجع خليل وشبح للسياره..
شاف صاحبها وهو مبتسم بمكر...
بعد فاتت من جنبه شبحله بحقد واطلق لفظ نابي...
اما راجح فكان يردله اللي داره في سيارته ولو بردة فعل بسيطه زي هادي...
خليل بغضب ضرب رشاده جت قدامه وقال:خايف نزيد ع ذنوبي ذنوب ونولي قاتل...ااخ بس..لولا العيله اللي فرقبتي كنت درتها وارتحت..اني هكي ولاهكي مش حنوصل فيها يعدموني خير....
بدون ماينتبه لقي نفسه خاطم من قدام جامع كان طالع منه ولد صغير ومعاه بوه...
سمع الولد يقول بنبرة طفوليه:بويا بويا..
رد عليه بوه وهو يساوي في الكندره متاعه:نعم يابويا..نعم..
الولد:ارفعني معاك الصبح الجامع..مش انت قتلي..ولا الراجل..يصلي كل الصلوات في الجامع!؟
ابتسم بوه وقال:ايه..
الولد:ايه باهي واني معاش نبي نصلي الفجر في الحوش...نبي نوض معاك..
ضحك بوه وقال:حاضر...
الولد فرح فرحه لاتوصف بانت من الضحكه اللي ارتسمت ع وجهه ومشي يجري للسيارة..
فتح الباب وركب..
وبوه مشي ركب حتى هو...بعدين شغل السيارة وتحرك..
وعيون خليل اللي كانت معبيه دموع معاهم....
وهو يفكر بينه وبين نفسه...
لابونا ربانا هكي..ولاحني نقدروا نربوا صغارنا هكي...
ووصل لنتيجه ان اللي زيه مايديرش صغار وعيله افضل..وان اللي زي نسيبه مستحيل تفضله ع شخص زي راجح...
اي انسانه عاقله لايمكن تفضل انسان زيه ارتكب جرايم وتجاره المخدرات من اكبر الجرايم..وغير هكي عيلته تعتبر بيئة غير صالحه لتربية الصغار...يعني الصغار اللي حيجوا في بيئة زي هادي حيطلعوا زيه هو وخوته ويمكن اسوأ...
هي هاللحظه...اللي وقف فيها قدام المسجد...خلاته يقتنع بشي ويسلم بيه..شي مؤلم وموجع لأبعد حد..
انه يتخلى عن حلمه الوحيد اللي قعدله...زواجه من نسيبه..
لأن فعلا يحبها بصدق...واللي يحب يتمنى للي يحبه كل خير حتى لو كان مع غيره...
وهو متأكد ان خير نسيبه حتما حيكون مع غيره...
لهدا تخلى عنها ع خاطرها....
وهالقرار اللي خداه في لحظه كان زي السيف اللي قاعد يقطع فيه فقلبه ..فعروقه الحيه النابضه...
كان هكي يحس وهو ماشي من قدام الجامع....
والدموع من العين تنزل وهو يمسح فيها بقوة...
🌺ولعل هالدمعه اطلع عليها من هو ارحم بخليل من امه عفاف اللي قلبها واجعها عليه...ولعله شاف في قلبه خير..يدبرله بيه تدبير يغير حياته كلها...إنه على كل شيء قدير🌺
••••••°°°°°°•••••••°°°°°°•••••
"الحمد لله على كل حال"
عواطف:ايه والله الحمد لله ع كل حال بنتي..وشربت من القهوة..
وجيهان تشرب وهي ساكته..
نسيبه تنهدت وشبكت ايديها في بعض..
ناضت جيهان حطت الفنجان ع الطاوله..
نسيبه:صحه.
جيهان:سلمك..
عواطف:هاك بنتي..
التفتت جيهان خدت فنجان امها وحطاته ع الطاوله..
وولت قعمزت..
نسيبه مررت نظرها عليهم بعدين تنحنحت وقالت:والله اني تشرفت بمعرفتكم..ناس كويسه وتعرفوا الأصول وقفتوا معانا في محنتنا هادي..ولايشكر الله من لايشكر الناس لهدا بارك الله فيكم..
الزوز ردوا بأصوات متقطعه وهما مستغربات في كلامها:فيك بارك الله..
نسيبه:احمم..زي ماتشبحوا توا كيف تغيرت هلبه حاجات بعد وفاة مرت خوي الله يرحمها..واني بصراحه متعلقه بصغار خوي ولايمكن نخليهم لا توا ولابعدين..تنهدت وقالت..هدا علاش بنقوللكم تشوفوا نصيب لراجح في مكان تاني نصيبه مش هني..اني مش من نصيبه..
جيهان وعواطف شبحوا لبعض بصدمه..
نسيبه:عارفه ان كلامي صعب شويه لكن..خدت نفس وقالت..هدا الصح..اني مانصلحش بيه..ربي يرزقه باللي خير مني يارب العالمين...
شبحولها الزوز...وكل وحده فيهم من داخلها كانت فرحانه..
ولا وحده كانت عاجبها الموضوع..
عواطف بحزن مصطنع:الله غالب كله نصيب..
جيهان:ربي يعوضكم خير انتي وياه..
نسيبه ابتسمت مجامله وقالت:شكرا..
....ومعاش فيها قعاد بعد هكي...اتصلت عواطف براجح بش يجيهم..وبعد عدوا عشرة دقايق جي راجح ونسيبه سقدتهم وروحوا....
بعد ماخشت صكرت الباب..
اتكت عليه وزفرت بقوة وقالت:هم وانزاح..
بعدين مشت للصاله..خدت صفرة الضيافه ومشت بيها للكوجينه...
🌺هدا كله..
وجنان قاعده في الدار تكتب في الواجب..
وريحان راقده بس كان وجهها شاحب....
زي شحوب وجه اختها سارة اللي كانت راقده في دارها..
والباين انها كانت تشوف في منام...
🍁كانت تشوف في المنام..
انها مقعمزة في صالة حوشهم والحوش كان خالي حتى من الأثاث...وهي كانت حاضنه روحها وكأنها صقعانه...
فجأة سمعت صوت مألوف ليها ينادي...
"أم كلثوم..أم كلثوم..."
هي قعدت ادور ع صاحب الصوت..
لين جو عيونها ع اجمل انسانه شافتها وعرفتها في حياتها..
امها....
كانت واقفه في مكان كله اخضر...وهي لابسه ثوب اخضر وتشوف لبنتها وتقول بإبتسامه..
ام كلثوم...
ساره بلهفه واستغراب:ماما اني سارة..اسمي سارة مش ام كلثوم..
اسيمه بإبتسامه:ايه..انتي زيها..زي ام كلثوم...حنونه...ودافيه...
سارة:من ام كلثوم ياماما!؟
اسيمه اكتفت بالإبتسامه وماردتش...
سارة:ماما...من هي قوليلي...من ام كلثوم...
"اااااااه..عمتي..ياعمتي ريحااان"
خش صوت جنان وهي تعيط حلم اختها..خلاها تنوض مفجوعه...
"خيرها ريحان خيرها!!"
بعد سمعت صوت عمتها وهي تتكلم يخوف وفجعه..
ناضت تجري وفتحت الباب وطلعت..
مشت تجري لدار خواتها..
لقت نسيبه طالعه تجري وريحان في حضنها وهي
ببكي وعياط:حي عليا ماتت...ياربي ياربي..
ساره خبطت بيدها ع وجهها..
نسيبه وهي تبكي خبطت ريحان ع وجهها:ريحان بنتي..نوضي ريحان بالله عليك..
وجنان تبكي وتعيط..
سارة نزلت يدها وجت تجري لعمتها...
سارة ودموعها ينزلوا:عمتي لازم نرفعوها بسرعه...بسرعه..
ومشت تجري للشماعه جبدت ملايات الصلاة...
وقالت لعمتها:اطلعي بسرعه عمتي..
طلعت تجري نسيبه وهي في قمة الارتباك والتوتر..
وصلت برا..
طلعت تجري للسيارة..
فتحت الباب حطت ريحان من الخلف..
وجوا يجروا ساره وجنان...
ساره لبست الملايه وعطت لعمتها وحده..
لبستها نسيبه بسرعه..
ولما جت بتركب..حست روحها ترعش مع بعضها ماتقدرش تسوق..
نسيبه بألم:اااه ياربي..ياااارب..
ساره:خيرك عمتي!؟
نسيبه:مش قادره ..خبطت ع وجهها وقالت..مش قادره نسوق..
سارة كانت في حالة تخليها تتصرف طول..
مشت طلعت تجري من الحوش بتكلم حد من الجيران..
صدفه...لقت خليل مروح للحوش..
سارة بخوف شديد:بالله عليك تعالى تعالى..
هوطول جاها يجري..
وصل فيها وقال:خيرك؟
سارة ببكي:اختي بتموت عمتي مش قادره تسوق..بالله عليك..
وشهقت بالبكي..
هو خش يجري وجي لنسيبه قال بإستعجال قال:هاتي المفتاح بسرعه..
عطتهوله نسيبه..
خداه وركب السياره..
وساره جت لعمتها جبدتها وركبوا كلهم من الخلف..
وطول خليل تحرك...وطلع من الحوش..
وهو يسمع في صوت بكي جنان وساره ونسيبه..
خليل بلع ريقه من الخوف وقال:خير ان شاء الله خير ماتخافوش..
ونسيبه تمسح ع وجه ريحان اللي كانت راقده ع رجلها وهي تقول ببكي:يارب يارب....
••••••°°°°°°•••••••°°°°°•••••
في احدى سجون العاصمه طرابلس...
وقت الزياره..
كانت مقعمزة وهو مقابلها...وولدهم بعيد عليهم وهو يشوفلهم..
عفاف:انت متأكده مش حيدوروا صغارك مرة تانيه..
خالد:متأكد..اكثر مامتأكد انك مقعمزة قدامي توا..
عفاف ابتسمت بملل وقالت:عارفني مش جايه الا ع خاطر صغاري..
ضحك وقال:اها..عارف..عارف..
ناضت وهي تقول:جابولك ولادك لبس وماكله..
خالد هز راسه وقال:سلمي عليهم..
عفاف:يوصل...بالسلامه..
ومشت لجهاد..
جهاد مشي سلم ع بوه...
بعدين مشالها وطلع هو وياها..
جهاد بضحكه:جو عليك يام انتي والله جو..
عفاف وهي تساوي في شاربتها:ترا صكر فمك صكر..
ضحك جهاد..
بعدين حاوط كتاف امه بيده ومشي هو وياها لين طلعوا برا المبنى..
لما وصلوا للسيارة..
رن تليفون جهاد...قامه وشاف المتصل..وجهه تغير..
داره صامت...وركب...
..........
"خيره مايردش!؟"
رتاج قالت الكلام هدا بعد اتصلت بجهاد وماردش عليها..
دانيه اللي كانت مقعمزة تقرا قالت:كلمتيني..
شبحتلها رتاج وقالت:لا..
دانيه تنهدت بعدين صكرت الكتاب وقالت:تعرفي ماراحتش من عقلي سارة قداش توجع القلب حالتها..
رتاج بحزن:حتى هي امها اللي ماتت..الله يرحمها..
دانيه بحزن:الله يرحمها ويصبرهم..
"رتاااج..رتاج"
شبحوا لبعض بخوف..
بعدين ناضت رتاج وهي تقول:شن يبي فيا!؟
ومشت للباب فتحاته وطلعت.. سمعت بوها ينادي مرة تانيه ردت عليه تقول...جاايه جايه..
ومشت طول للمربوعه وخشت..
ودانيه كانت طالعه وراها قعدت ادور ع امها مالقتهاش زبطت انها في المربوعه..
وصلت في الصاله وقعدت واقفه..بعدين شبحت داخلها..
جو عيونها ع تليفون خوها رشيد...
شبحتله شويه بعدين مشتله طول خداته...
فتحت الشاشه انفتحت طول كانت من غير رمز..
بعدين خشت ع الأستديو..
قعدت تفتش فيه مالقت شي كلها صور ليه هو وفيديوا واحد للعبه..
بعدين خشت ع اليوتيوب وشافت محرك البحث..
طلعتلها عناوين الحاجات اللي يبحث عليهم..
فنصت عيونها بصدمه وحطت يدها على فمها وهي ترعش من اللي تشوف فيه...
طلعت طول من اليوتيوب..وحطت التليفون ع الطاوله ومشت بسرعة طلعت من الصاله...
لحظات..وخش رشيد..خدي تليفونه ومشي طلع من الحوش..
ع طلعة رتاج من المربوعه وهي تمشي بخطوات ثقيله بعض الشي من صدمتها...
وصلت في الدار وخشت..
خبطت بإيديها ع وجهها وقالت:بوك هدا شنو..شنو!؟
دانيه اللي كانت سرحانه في عالم تاني حتى هي..استاقظت لما سمعت شن قالت اختها شبحتلها وقالت:خيره؟!
ع خشته عليهم وهو معصب قال:قاعد نكلم فيك ولا كيف تطلعي قبل نكمل كلامي؟!..
التفتت رتاج وقالت بصدمه:شن تبيني نسمع قولي!؟ الراجل اكبر مني بتلاتين سنه راهو!
عبدالمجيد:27 مش تلاتين..والعمر مش مشكله المهم راجل متريح وعنده..تعيشي ملكه معاه..
رتاج بصوت عالي باكي:مانبيش نعيش ملكه مانبيش..
جبدها من شعرها عيطت..
ودانيه ناضت وقفت من الخوف..
عبدالمجيد بغضب:تبي ولاماتبيش واخدك واخدك...جبدها بقوة تاني وعيطت وقال بصوت مرعب..سمعتي..
ودفها ع المندار ومشي طلع من الدار وهو يقول بصوت عالي:من هني وبرا غادي البنت هادي ماتطلع من الحوش بكل تطلع حسابي معاك انتي..
ورتاج غمت وجهها في المندار وقعدت تبكي بعبرتها..
واختها دانيه اللي مش فاهمه شي طلعت من الدار بش تسأل امها ع اللي صار..
لقت امها مقعمزة في الصاله حاطه راسها بين ايديها وتبكي..
جتها وهي تقول بخوف:يام شن صار فهميني؟!
رشفت سدينه ومسحت دموعها اللي كانوا واصلات لفوق فمها بطرف محرمتها وهي تقول بنبرة باكيه:اختك رتاج فاتحتها الخميس هدا..
دانيه بصدمه:كيف !!؟
سدينه رشفت تاني وقالت:بياخدها واحد اكبر منها بتلاتين عام ومتزوج وعنده صغار..
خبطت دانيه بيدها ع خدها بقوة من الصدمه...
..فهالوقت...
كانت رتاج وهي تبكي وترجف تحاول تتصل بجهاد..
لين رد عليها..
رتاج بصوت باكي:جهاد!
جهاد عقد حواجبه بخوف وقال:خيره صوتك خيرك!
رتاج ببكي:بوي بيعطيني ياجهاد بيعطيني لواحد نديد جدي ياجهاد..
هو رفع حاجبه وضم شواربه القدام وقعد ساكت..
رتاج:آلو ..جهاد..سمعتني!؟
جهاد هز راسه وقال:امم..سمعتك..لكن زي ماقتلك قبل يارتاج اني ماعندي شي يعني كان جيت لبوك يلزني...
رتاج بصدمه:قصدك بتخليني!؟
جهاد قعد ساكت..
رتاج بتوسل:لالا بالله عليك جهاد ماتتخلاش عليا جهاد معقوله هكي!! وينه كلامك قبل..وينه لما كنت تقول..كنت تقول انك مستحيل تخليني لغيرك ياجهاد!
مازال محتفظ بصمته..
هي سكتت شويه..بعدين قالت:اسمع...اني...مستعده..بلعت ريقها وقالت...مستعده نهرب معاك..
هو رفع حواجبه متفاجئ...بعدين نزلهم ورسم ع وجهه ابتسامة ماكرة...
رتاج:جهاد
جهاد:وتتحملي اللي يصير بعدين ولا؟يعني تتحملي تعيشي مع اماليا في دار..
هي حست وقتها بإحساس الغريق لما يسترجع يتنفس بعد انقاده..حست انها شدت طوق النجاه...
بس طوق هالنجاه قال عبارة عن حبل هوا دايب...
رتاج هزت راسها بسرعه وقالت:ايه ايه نتحمل عادي..اي شي اهون من جهنم اللي يبوا يحدفوني فيها..
جهاد وهو مبتسم ابتسامة ماكره قال:تمام مالا..وتي روحك الليله نجي ناخدك..
هي هزت راسها بفرح وقالت:باهي باهي...
جهاد:مالا تشاو توا ياقلبي خل نمشي نظم اموري..
رتاج بإبتسامه من بين دموعها:باي..
بعدين صكرت...وصكر جهاد بعدها..
واتصل طول بواحد من صحابه...
جهاد:هاه يابرو..اسمع...نبي منك خدمه.........تسلم حبيبي....نبي منك شقتك اللي في****..
•••••°°°°°°•••••°°°°°°••••••
"اللهم صل على محمد وعلى آل محمد"
"اللهم صل على محمد وعلى آل محمد"
كانت ساره متكيه ع الحيط وهي مغمضه عيونها وتردد في ذكر الصلاة ع النبي وهي مغمضه عيونها بشده..
وعمتها جنبها مقعمزة حاطه ايديها ع ركابها وتقول من قلبها بخوف وقلق شديدين..
"يارب..يارب..يارب"
من بعيد شويه كان خليل مقعمز ع روس صوابعه قدام ريحان..يهدرز عليها ويحاول يغير جوها..
خليل بضحكه:ياريت عند توأم حتى اني..
جنان:لكن عند خوات هلبه..
خليل ضحك وقال:قصدي نبي اخت توأم حلوة هكي زيك تحبني هلبه وتخاف عليا..
جنان شدت ذقنها بيدها فكرت شويه بعدين نزلت يدها وقالت:ماهو انت مش محظوظ..
تعكرت ضحكته..
جنان:ماما قالت اني وريحان محظوظات لما جينا مع بعض..بش نحبوا بعض اكثر..
ابتسم بعدين قال:فعلا محظوظات..
ارتسمت ع وجه جنان ملامح الحزن وهي تقول:لكن ريحان ديما مريضه..تخلي فيا ديما نخاف..
هو ابتسم بحزن وحط يده ورا راس ريحان وقربه ليه وباس جبينها...بعدين بعد وقال:ماتخافيش بإذن الله تشفى وتقعدوا عمركم كله مع بعض..تلعبوا..وتقروا..وتنجحوا..وتكبروا..وتولوا عرايس..
ابتسمت جنان..
وخليل ردلها الابتسامه..بعدين قرص خدها قرصة خفيفه وشبح جهة الحجرة اللي فيها ريحان..
عيونه جو ع نسيبه وشاف حالة الخوف اللي هي فيها قلبه وجعه...
شويه شاف الدكتور طلع..
ناض فيسع وخدي يد جنان ومشولهم..
ونسيبه وساره جو للدكتور وهما ملهوفين بخوف..
نسيبه:طمنا بالله عليك طمنا ماتقولش شر..
وصل فيهم خليل وهو يشوف لحالة نسيبه وساره بعدين شبح للدكتور ..
الدكتور:اطمني اختي اطمني حالها باهي..
نسيبه وسارة غمضوا عيونهم بشدة وقالوا:الحمد لله..
الدكتور:لكن لازم تردوا بالكم منها من دواها من حالتها النفسيه..
نسيبه قالت:نعطي فيها الدوا في وقته..
الدكتور بأسف:اني عندي خلفيه عن ظروفكم وطفله في سنها تتأثر هلبه باللي صار بس هما الأطفال غالبا مايبانش عليهم زينا حني الكبار..لهذا حاولوا ع قد ماتقدروا تطلعوا من حالة الحزن ع الأقل ع خاطرهم..
نزلوا دموع سارة..
نسيبه هزت راسها وهي تقول بحزن:ان شاء الله..
خليل تنهد وقال:تقدر تطلع توا؟
شبحوله..
الدكتور:لا..الليله تقعد تحت الملاحظه بش نطمنوا عليها وغدوة بإذن الله تطلع..
هز خليل راسه بإيجاب..
الدكتور:طهور ان شاء الله..عن اذنكم..
ومشي..
ونسيبه قالت:شكرا دكتور...بعدين شبحت لسارة وقالت...قبل يجوا يهدرزوا عليا...ضمت شواربها لداخل بغضب وقالت..كله من عيلة راجح الزفت مش وقت جيتهم بكل..
خليل رفع حواجبه..
سارة شدت يد عمتها وقالت:عمتي المغرب اذن..
نسيبه تنهدت وقالت:ايه صح..راح وقته...تعالي ندوروا ع مصلى هني..
التفتت جو عيونها فعيون خليل نزلتهم طول وشبحت لجنان وقالت:تعالي عمتو..
خليل:خليها معاي لين تكملوا وتجوا..
نسيبه برفعة حاجب دون ماتشوفله:وانت شن مش مسلم!؟
هو انصعق من سؤالها...
وسارة شبحت لعمتها بصدمه بعدين شبحتله..
نسيبه :هيا عمتو تعالي فات الوقت..
جتها جنان شدت يدها وشدت يد ساره ومشوا مع بعض..
وخلت ورا خليل في حالة صدمة واحراج...
وقلبه يدق بقوة...ومازال سؤالها يرن في وذنه...انت مش مسلم!؟
شويه ولف ومشي بيطلع من المستشفى مرة وحده...
•••••°°°°°•••••°°°°°°•••••••
ع طاولة فيها ماكله كانوا مجتمعين يتبادلوا اطراف الحديث..
هيثم:اسفين جدا ياجميل عطلناك عن مشاغلك..
ابتسمت لجين..
وجميل قال بضحكه:بالعكس في جرة لجين نحصل دهويرة مرة مرة..
هيثم:ديما تسافر معاها؟
جميل:كيف عاد يادكتور مايجوزش تسافر من غيري يعني من غير محرم..
شبح هيثم في الفراغ ورسم ع وجهه ابتسامه وسرح بتفكيره وهو يقول:المرحومه بعد تخرجت حصلت بعثه برا البلاد لكن ماقدرتش تسافر من غير محرم..ماكانش عندها غير بوها وبوها راجل كبير ومريض واللي زيه مايتحملوش العيشه برا بلادهم..ع خاطره تخلت عنها..وبعد تزوجنا طلعنا لكندا طلعت اني بعته غادي...كنت نبيها تقرا حتى هي ..لكن بعد ماربي رزقنا وحملت رفضت تقرا..قالت صغاري اولى بوقتي كله...
لجين:فعلا..المراة صغارها اولى بوقتها..تنهدت  وقالت..الله يرحمها..
هيثم شبحلها وابتسم بألم بعدين شبح لخوها وقال:مااعترضتش ع طبيعة شغل اختك؟
لجين شبحت لخوها..
جميل:لما تعينت قلتلها اني حنوقف معاك في كل وقت..وفي حالة انك شفتي شي في الخدمه يحط من قدرك ويهينك كمراة سيبي فورا قعادك في الحوش افضلك..شبحلها وقال..والحمد لله لأنها تخدم بإحترامها وحشمتها استمرت في خدمتها طول الاربع سنوات اللي فاتوا..
ابتسمت لجين وشبحت لطاسة العصير قدامها..
شبحلها هيثم وقال:فعلا..فارضه احترامها ع الجميع واني اولهم..
ابتسم جميل..
ولجين قالت:بارك الله فيك دكتور..شرف ليا كلامك هدا..
هيثم:قلت الحق...بعدين شبح للماكله وقال..كولوا صقع..
ضحكوا الزوز وجميل قال:ناكلوا..
قعدوا ياكلوا..
لكن هيثم كان يساير مسايرة ولجين مركزة معاه...
•••••°°°°•••••°°°°°•••••
بعد ماصلوا سارة ونسيبه المغرب..
نسيبه خدت سارة وجنان بالغصب روحت بيهم للحوش سارة كانت تقعد مع اختها لكن عمتها رفضت..
بعد حطتهم في الحوش..
وولت للمستشفى وهي تتصل بزياد تبيه يجي يقعد مع خواته
لكن هو كعادته مايردش..
نسيبه لوحت التليفون ع الكرسي اللي في جنبها وقالت:الله يسامحك يازياد الله يسامحك..وربي يهديك ويصلح بالك ياهيثم ياخوي...
••••••°°°°°°
"خيرك ماتردش!؟"
زياد:من غير شي مصدع مش ناقص وجع راس..
عبدالملك بضحكه:زي حالاتي انت..حتى اني مطنشهم مليت وتعبت وفديت..سيبتلهم كل شي وشريت راحة راسي..
زياد تنهد وقعد ساكت..
عبدالملك:تعشى زيزو تعشى..
زياد:لا خلاص كليت الحمد لله..
عبدالملك:صحتين..
زياد:تسلم..
طلع عبدالملك باكو الدخان من جيبه وطلع طرف سيجارة...
وزياد يشبحله..
كيف ولعها..وكيف بادي يدخن..
فهاللحظه رن تليفونه تاني..
تأفف وشبح للشاشه شاف المتصل...فصل بالحمرا وصكر التليفون ولوحه جنبه..
عبدالملك:هدي ياوحش...ونفخ دخان السيجارة من فمه..
شبحله زياد وقال:ترا هات واحد..
عبدالملك:متأكد!؟
زياد:غير جيب خل نجرب شن بيصريلي يعني..
عبدالملك ابتسم وقال:اوكين..
وطلعله طرف مدهوله...
خداه زياد وحطه في فمه طول..
ناض عبدالملك وقدمله ولعهوله...
بعدين ولا قعمز..
زياد لما جبد اول نفس قعد يكح لين عيونه دمعوا..
عبدالملك بضحكه:خلاص ياراجل فوته ماتقدرش عليه..
استفزت زياد كلمة ماتقدرش عليه وقال:تو نتعود..
عبدالملك :باهي ركز معاي وشوف كيف ندير ودير زيي بش ماتمشيش في الكحاحه الحكايه..وضحك..
وزياد ابتسم ع جنب وقال:ورينا....
•••••°°°°°•••••
"الرقم المطلوب مفقل"
تنهدت سارة بضيق بعد ماسمعت رد البداله..
بعدين قالت...وينك يازياد وينك!
شبحت لجنان اختها اللي كانت راقده حداها ع السرير..
غطتها كويس..
بعدين ناضت ..ومشت طلعت من الدار..
دارت ع بيبان الحوش الخارجيات كلهم صكرتهم كويس..
بعدين ولت لدراها..
خشتلها وصكرت الباب..
مررت نظرها ع دارها..
فكرت تقرا..لكن تراجعت ع فكرة لأنها غير مرغوبه حاليا بالنسبه ليها..
شويه واذكرت الحلم اللي حلماته وسرحت وهي تفكر في معناه..
بعدين شبحت لمكتبتها الصغير..
مشتلها بدور على كتاب تفسير الأحلام..
وهي ادور..جو عيونها على آخر كتاب هدتهولها امها..
حطت يدها عليه وطلعاته...وفتحاته...
بعدين لفت ومشت قعمزت ع السرير وبدت تقرا..
ودموعها ينزلوا بروحهم...
من جمال اللي كانت تقرا فيه..قعدت تقلب صفحة ورا التانيه وهي مش حاسه بروحها..
لين وصلت في قصة عنوانها..
"الحنان الدافئ"
توسعوا عيونها وهي تشوفلها..
وبدت تقرا...
كانت القصه تحكي عن أم كلثوم بنت الرسول..
هي واختها رقيه كانوا الكبار..الفرق بينهم تقريبا عام
كانوا ديما مع بعض حتى نصيبهم جاهم مع بعض وعقدوا عليهم ولاد عم بوهم...
لكن بعد بعثة الرسول عليه الصلاة والسلام اول حاجه داروها ازواجهم طلقوهم بتحريض من الأب "أبو لهب"..
وأكيد قلوبهم انكسرت وانجرحوا وتألموا من اللي صار..
ومع هدا كل وحده فيهم صبرت التانيه..واستمروا عايشين حياتهم زي قبل...لعند تزوجت رقية وهاجرت للحبشه..
وقعدت ام كلثوم وحست روحها بروحها..لكن وجود اختها الصغيره فاطمه عبى الفراغ اللي خلاته رقيه.
وقعدت ترعى فيها مع امها السيده خديجه..
ونعم البنت البارة ببوها...والصابرة ع حالها...
لعند ماجي يوم تاني زاد كسرها...
موت امها...ماكانش ساهل بكل عليها وع اختها وبوها...
لكن مع ذلك قوت وصبرت وتحملت مسؤولية الحوش واختها الصغيره وكانت سند معنوي لبوها...
كانت حنونه عليهم هلبه ومغرقتهم بحبها...
لكن حال المؤمن في الدنيا بين الابتلاء والعافيه..
وصلها خبر موت اختها توأم روحها....
انكسرت في الاول بطلاقها..بعدين موت امها..وتوا موت اختها...
وبرغم الألم..كانت تزيد صبر وقوة وتزيد حنان وحب للي حواليها...
وبعد كل كسر كان يزيد يقوى ايمانها اكثر واكثر...
لعند ماتزوجت...عاشت سته سنوات..ربي مارزقهاش بالصغار...
ابتلاء جديد..وكانت ام كلثوم تنجح بعد كل امتحان تخشه بقوة صبرها..
وكان الصبر لزيمها لعند مامرضت وكان فهالمرض موتها...
برغم انها بنت نبي...لكن عاشت حياة صعبه مليانه بالابتلاءات..
ومع هدا كانت انسانه حنونه محبه...كانت تعطي لغيرها برغم اوجاعها وآلامها لأخر لحظه في حياتها...
🍁صكرت سارة الكتاب وهي تربط في اللي قراته بالحلم اللي شافاته...
وبكلام امها ليها في الحلم...
جي بين عيونها منظر ريحان وهي بين ايدين عمتها فاقده الوعي...
كلام الدكتور عن حالتها النفسيه..
دموع وبكي جنان وخوفها الشديد...
حالة عمتها وتخبطها والتعب اللي كان باين عليها لانها تتحمل في مسؤوليه ثقيله زي هادي بروحها..
وهي كانت في عزلتها اللي خشتها بسبب الحزن...
وغفلت عن مسؤولية تحملتها ام كلثوم بنت النبي وهي في سنها...
مايقولش حد لاهادي بنت نبي..
وعلاش ابناء الانبياء هما بس اللي لازم يكونوا اقوياء للهدرجه بإيمانهم!؟
لو هكي فعلا..ماكانوش ابناء يعقوب حساد وكايدين...
ماكانش ولد نوح عاصي وكافر...
الايمان..الايمان هو المقياس..هو المعيار...هو الأساس..
وسارة فهمت هالشي في اللحظه هادي بس...
لازم تقوي ايمانها وتصبر..وتتحمل مسؤولية خوتها..هي الملزمه بيهم اكثر من اي حد تاني من بعد امها...
شبحت للكتاب وهي تذكر امتى هدتهولها امها...
♦️فلاش باك..
"خودي"
سارة بإبتسامه:لنفس الكاتبه ماما؟
اسيمه بإبتسامه:ايه..بس هالمره كتاب مش روايه..حلو هلبه...
وحينفعك بعدين هلبه..
سارة بإبتسامه وهي تقرا في العنوان:
"كوني صحابيه"..
شبحت لأمها وضمتها وقالت..نحبك سومتي..
واسيمه حضنتها وهي تضحك...
♦️الوقت الحاضر..
مسحت سارة دموعها اللي كانت تسيل...
بعدين قربت من ريحان...
قامت الغطا ورقدت جنبها..وحطت الكتاب ع الكامدينو...
بعدين ضمت اختها لحضنها وغمضت عيونها اللي مازالت تنزل منهم الدموع..
....في الوقت اللي كانت فيه بنت تانيه...
ضايعه وتايهه وعقلها مش عليها....ادمر سمعة عيلتها كامله..
اضيع مستقبل خوتها واختها...
لأنها فكرت في نفسها بس...حتى امها هانت عليها...
بعد منتصف الليل...
طلعت من الدار....
الحوش كان مظلم...والدنيا هاديه...
استغلت بيات بوها عند مرته التانيه...
وقررت تهرب في الوقت هدا...الوقت هدا هو الأنسب للهروب بدون مايطب عليها حد ويمنعها...
وصلت في باب الحوش...
فتحاته بالشويه...
وطلعت وصكرت الباب بالشويه...
وقفت في الباب وهي في قمة الخوف...
بعدين مشت بسرعه..رفعت الملايه من لوطا وبدت تنزل...
■فهالوقت..
ناضت دانيه عطشانه...
قعمزت وخدت الشيشة وبدت تشرب فيها...
بعد شربت ناضت بتمشي للحمام...
مشت للحمام...وشويه وطلعت وجت للدار..
وهي خاشه شافت لمكان رتاج..تهيألها انه فاضي..
مشت فتحت الضي...وشافاته لقاته فعلا فاضي..
عقلها جابلها طول ان اختها دارت في روحها حاجه..
طلعت تجري من الدار وقعدت ادور عليها...
وهي ترعش وتقول بهمس..
حي عليا...حي عليا..ياربي...ياربي..
وين مادور فيها ماتلقهاش..
وقفت وهي تقول بإستغراب:وينها هادي!؟
قعدت تفكر وتفكر وتفكر...
لعند ماوصلت لنتيجه..خلتها تخبط خدودها بكفوفها وتقول بصدمه صوت يادوب طالع:غبارتك غبارة يارتاج!!!
.........
في الطريق...
كانت رتاج تفرك في ايديها ببعض وهي في قمة التوتر..
وجهاد جنبها والع المسجل ويغني معاه...
رتاج شبحتله وهي تفكر..
زعمه حق جهاد يحبها حق!
جهاد اللي تهرب منها واستكردها اول ماقالتله تعالى اخطبني!!
جهاد اللي عمره ماحسسها ان علاقتهم جديه ولابان منه اي شي يخليها تحس انه متمسك بيها!
جهاد اللي كانت يبناله من نظراته ليها انها ماكانتش نظرات بريئة نهائيا..بس تغاضت عنها...
رتاج...شن درت في عمرك يارتاج!.
شن درت في امك...وخوتك...!؟
شن درتي في سمعة عيلتك..
شن درتي في خوك مجاهد!؟..
بعد اللي داره واللي قاعد يدير فيه ع خاطركم والثقه اللي حاطها فيكم ..
هدا مايحصل منك!؟
قعدت صورة مجاهد بين عيونها...كلامه الطيب..
نظراته الحنونه...معاملته اللي كلها حب ولطف...
فجأة..
رتاج ودموعها ينزلوا:ولي بيا..
عقد جهاد حواجبه وقال:شني!!؟
رتاج ببكي :ولي بيا ولي ولي بيا خلاص معاش نبي..
جهاد بعصبيه:شن تلعبي بيا انتي..تلعبي!؟
رتاج ببكي وتوسل:وليا بيا ياجهاد خلاص معاش نبي بالله عليك..مانبيش نضيع عيلتي في جرتي مانبيش..
جهاد ضحك بسخريه وقال:توا فكرتي فيهم ماليك توا!!..
انسي..خلاص توا..
رتاج بعياط:ولي بيا قتلك ولي بيا..
جهاد بعصبيه:ماتحلميش قبل ناخد مانبي...
رتاج بصدمه:جهاد!..
جهاد:لاجهاد لا####...
رتاج بصدمه:جهاد..انت عمرك ماحبيتني!
جهاد بقرف:فكيني من القطاف الفارغ ترا...مش ليا الدوة الفاضيه وكان جاني يوم كبدت فيه حق..نكبد في بنات ناس تخليني نتفاهم مع تريسها..
رتاج قعدت تشبحله وعيونها جاحظات فيه...
حاسه الدم جمد في عروقها....وقلبها قاعد يتمزق...
وروحها بتطلع...
جهاد:ماضربتكش ع يدك ايوه انتي اللي قلتي بنهرب معاك..انتي..وتوا تحملي بروحك..اني حطيت في راسي في حاجه نبيها ناخدها...يعني تاخدها..
خبط كفوفه ببعض وقال...تم..خلاص..
وحط ايديه الزوز ع الدومان وزاد السرعه..
بعدين علا المسجل وقعد يغني معاه..
ورتاج مازالت ع حالتها...وقعدت من قلبها تدعي الموت تجيها في اسرع وقت....

...يتبع...