البطل المغمور "شمس الغروب"

الجزء السادس عشر

💐...
مقعمزة على سرير بنت خوها وتشبح فيها كيف مقعمزة ع طاولة مكتبها وتقرا..
مش عارفه علاش وقتها رجعت بيها السنين للخلف واذكرت روحها وهي في عمرها كيف كانت تقرا وحواليها امها وبوها كل واحد فيهم مغرقها بإهتمامه..
تعبوا عيونها دموع وهي تتخيل لو كانوا معاها في يوم زي هدا فقدتهم هلبه..
خصوصا وانها حاسه بعدم راحه..ادير في شي بدون رغبه منها...
حست ان الظروف جبرتها عليه...
قطع عليها سلسله تفكيرها طقة باب الدار..
شبحوله الزوز هي وساره لما انفتح وخشت أسيمه..
اسيمه:هي نوضي نوسه..
يدوب ابتسمت وناضت بدون ماتقول شي..
طلعت..وطلعت اسيمه وراها وصكرت الباب..
وسارة اللي كانت تراقب فيهم ابتسمت بعدين رجعت تشوف لكتابها الدراسي وتقرا...
.........
"السلام عليكم"
شبحوا عواطف وجيهان ومرت خوها لنسيبه..
نسيبه كانت طالعه جميله بالفستان اللي لابساته مع بساطة زينتها..
لكن هدا كله مادرقش انها كبيره في العمر.
يعني الفرق بينها وبين راجح مش حيكون اكثر من سنتين ثلاثه..
استغربت جيهان في اختيار خوها..
اما امه فدرقت عدم رضاها ع اختيارها لانها تبان كبيره..
والعروس..
ابدا ماتقبلتش ولا وحده من الموجودات..
ومع هدا سلمت عليهم سلام كويس ومشت قعمزت جنب خالتها..
جيهان:راجح قال مدرسه؟
نسيبه بإبتسامه مجاملة :مدرسة جغرافيا في مدرسة الامة الليبيه للبنين..
رفعت جيهان حواجبها..
عواطف"تقري في الأولاد!":واكيد عاد متعبك تدريس صغويرة الأبتدائي؟
نسيبه:لالا..المدرسة ثانويه..
بلعت عواطف ريقها وهي مبتسمه بالسيف..
وجيهان تشبح لنسيبه وهي مبتسمه ابتسامة صفرا..
ماجده:مدرسة مافيش زيها مدرسه قديرة بنت خوي في مدرستها..
اسيمه:نسيبه يعتمد عليها في كل شي قد اي مسؤولية تتحملها..
عواطف:امم ربي يحفظها...
.........
في المربوعه..
راجح:هادي كلها مجرد شكليات معاليك الموضوع بالنسبه ليا منتهي..
هيثم بضحكه:كيف منتهي وانت مازال تقول معاليك!
راجح:ههههه..مسألة تعود بس..مع الوقت نحول الكلفه..
هيثم بإبتسامه:يفضل من توا تحولها..
راجح هز راسه بإبتسامه وقال:حاضر..
هيثم تنهد وقال:شن صار في قضية خالد؟
راجح:محاكمته عشرين رمضان..ع الغالب حياخد فيها مؤبد..
هيثم رفع حواجبه بصدمه وقال:مؤبد!؟
راجح ابتسم وقال:25سنه للي في عمره مؤبد اكيد..
هيثم هز راسه وقال:فعلا..مافيش فرق..
راجح ضيق عيونه وقال:وبخصوص الموظفين الفاسدين التابعين للوزارة؟
هيثم:النائب العام اتخذ فيهم اجراءاته..اما الأطباء سحبوا منهم الشهاده ومنعوهم من مزاولة المهنه ..
راجح:وهدا اقل شي..
هيثم هز راسه وقال:اقل مايستحقوا فعلا...
🌺وبعد ساعتين بالضبط..
جي الوقت اللي بيروحوا فيه الضيوف..
سقدوهم هيثم ومرته وخالته...
ولما وصلوا للباب وهيثم فتح الباب وطلعوا..
وقفوا كلهم في الباب مصدومين..
عواطف:هدا شنو اللطف!!
جيهان حاطه يدها ع فمها من صدمتها..ومرت خوها حاطه يدها ع خدها وعاضه ع شفها السفلي..
هيثم وهو عاقد حواجبه قال:شن هدا!! عمره ماصار شي زي هدا من قبل !!
راجح شبح جهة حوش خالد..
وهيثم لما شافه وين شبح قاله بشي من الإحراج:اسف جدا ع اللي صار..بصدق ماصارش الشي هدا من قبل بتاتا اني مصدوم اكثر منكم..
عواطف:شكله الشارع متاع مجارم..
شبحلها هيثم برفعة حواجب..وولدها التفتلها وفنص فيها..
عواطف:ماتفهمنيش غلط يادكتور لكن مافيش تفسير تاني للي نشبح فيه قدامي..
هيثم غير عيونه عنها وهو ويمصمص في شواربه بغضب يحاول يكبته..بعدين شبح لراجح وقال..تفضلوا خشوا..
راجح:لا شكرا معاليك..تو نتصل بشركة النقل تبعت تاكسي.
هيثم:لا والله ماصايره..ارجوكم خشوا للحظات بس..
تنهد راجح وشبح لأمه وقال:خشوا..
امه واخته ومرت خوه خشوا بالسيف...وهو وراهم..
قعدوا واقفين في الجنان..
خش هيثم بسرعه للمربوعه جاب مفتاح سيارته وطلع بسرعه..
وصل في راجح وقاله:تفضل..
راجح:لامعاليك لا...
قاطعه هيثم وهويقول:والله تاخده..
ضم راجح شواربه لداخل بضيق بعدين خدي المفتاح من هيثم وقال:مشكور جدا..
هيثم بأسف:اني اللي أسف جدا...
....واتصلوا بشركة خاصه بعتت من ياخد السياره وراجح روح بأهله في سيارة هيثم..
في الطريق..
عواطف:تبي الصراحه الموضوع ماعجبنيش..
راجح:رأيك امي ونحترمه..لكن اني بناخدها البنت..ورسم ع وجهه ابتسامه عريضه..
جيهان قلبت عيونها وهي تحرك في راسها يمين ويسار وشبحت للروشن..
اما امه شبحتله بربع عين وهي تغلي من داخل وفضلت السكوت ع النقاش معاه لأنها عارفه مش حتطلع منه بفايده اللي فراسه حيديره..
••••••°°°°°
"عمرها ماصارت قبل"
هيثم:واضح من اللي دار هكي..
اسيمه:وخيرهم مادروهاش قبل!؟.
هيثم:اسيمه حبيبتي واضح علاش داروها توا..
اسيمه قعدت تفكر..وعقلها جابلها خليل طول..
ماجده:من كان يكون المهم انحطينا في موقف بايخ قدام الناس..
هيثم تنهد وقال:ان شاء الله هدا حدها وماتطورش لأكثر من هكي..
ومشي بطريقه للدار..
ماجده:ان شاء الله...بعدين قالت..خل نمشي نكمل باقي الماعين
اسيمه قعدت معاها بعيونها لين خشت الكوجينه..
بعدين مشت طول للدروج كانت في هالوقت نسيبه تستعد لصلاة القيام..
لبست اسدال الصلاه ومشت بتاخد الصلايه..طق الباب..
نسيبه:خش..
انفتح الباب وخشت أسيمه..
اسيمه:نوسه..ماعلقتيش؟
نسيبه:ع شني ؟
اسيمه:ع اللي صار لسيارة العريس..
تنهدت نسيبه وقالت:ماعندي شي نقوله.
شبحتلها شويه بعدين قالت:حبيبتي نوسه زيدي فكري..
نسيبه ابتسمت بتهكم وقالت:في شن بنزيد نفكر وعلاش؟
اسيمه:فكري في نفسك وع خاطرها يانوسه..المواضيع هادي القرارت فيها مصيريه ماتتاخدش كردة فعل..
نسيبه بلعت ريقها وقالت:استخرت ياأسيمه..واكيد اختيار ربي احسن
اسيمه هزت راسها بإيجاب وقالت:ممكن
نسيبه بإستغراب:ممكن اختيار ربي احسن!؟
اسيمه اشرت عليها وقالت:ممكن انتي مشيتي بإختيار الله..ونقول ان شاء الله يكون هكي
نسيبه هربت منها ومشت فرشت الصلايه قدام القبله
اسيمه ابتسمت بأسف بعدين مشي طلعت وصكرت الباب
نسيبه غمضت عيونها بقوة..بعدين فتحتهم ورفعت ايديها لمستوى وذانها وقالت بنبرة ألم
"الله أكبر"
🍁🍁🍁🍁
"عزمتنا كلنا المراة"
عبدالمجيد:باهي ان شاء الله
ماجده تنهدت وقعدت تشبح لروشن السيارة..
شافت سيارة خليل اللي جت فايته من جنبهم خاشه الزنقه قعدت تشبحله..ولاإراديا ارتسمت ع وجهها ابتسامه حزن..
ماجده تعز خليل هلبه..وتمناته لنسيبه...لكن مع الأسف زي ماقالت اسيمه الواقع اللي اختاروه لأنفسهم يخلي هالأمنيه بعيده عن التحقيق...
وقالت في نفسها الكلمه اللي تختصر كل شي...
"نصيب"
🍁🍁🍁🍁
ومرت أيام الشهر المبارك..
وولاد خالد اغلب وقتهم مع محامي بوهم في قضيته كل اللي يبوه الحكم يكون مخفف عنه...
وبرغم منع الزيارات عنه هالفتره لكن بالمعارف قدروا يزوروه مره وحده...
لاحظوا فيها بوهم زي ماهو ماتغير فيه شي...حتى نفسيته مرتاحه..
وبرغم انهم استغربوا في حاله...لكن ارتاحت قلوبهم المشغوله عليه..
وجي يوم 20رمضان..
محاكمة خالد...
في قاعة المحكمه..
بدت الجلسه بكلام وكيل النيابه اللي كان كله ضد خالد..
كلام اثار حفيظة ولاده اللي ضبطوا أنفسهم بالسيف في القاعه..
لكن كلام محاميه برد عليهم..وعطاهم امل كبير...
وبوهم كان مسلم ومستسلم تماما للأمر الواقع اللي هو اختار بنفسه ينحط فيه...
وجي وقت النطق بالحكم..
والقاضي بعد مقدمه طويله..نطق بالحكم...
الحكم ع المتهم خالد عبدالناصر ****بالسجن 20 عاما مع الأشغال الشاقه"
خالد لما سمع الحكم ابتسم تهكما..
اما ولاده قلوبهم انفطرت ألما وحزنا...بالذات خليل اللي كان محمل نفسه مسؤولية اللي صار في بوه...
.........
بنبرة باكيه تنخنق في بعض الكلمات كانت عفاف تكلم في ولادها بعد ماعرفت منهم الحكم اللي اصدر في حق بوهم..
اهي فرصه وجتكم لعندكم..ولاول مرة بوكم يدير حاجه باهيه في عمره..ع خاطره مش ع خاطري ع خاطره ماضيعوش اللي داره ع الفاضي..بالله عليكم بالله عليكم..ابعدوا عن الحرام وعيشوا حياة طبيعيه زيكم زي الناس..بالذات انتم الزوز اللي درتوا نساوين في رقابكم..
مسحت دموعها بيد وحده وقالت بوعيد..اللي بيولي لهديكا الطريق...غاضبه عليه دنيا واخره ومتبريه منه..ايه نتبرا منه ومعاش نعرفه..
جهاد نزل راسه ومشي من حداهم بيطلع من الحوش..
اما خليل جي لأمه وضمها وهو يقول بنبرة ألم وهو ماسك دموعه بالقوة:حاضر يام حاضر..اللي تبيه حني فيه..
وهي تبكي في حضنه بحرقه..
ورفيق وتهاني واقفين يشوفولها ودموعهم تنزل بحزن شديد..
ومرت خليل وصالحه يسمعوا فيهم وهما واقفين في الكوجينه وكانوا متأثرين ودموعهم غالبتهم...
...وفي مكان تاني...
"بتفضحي بروحك ياغبيه"
سماح وهي تبكي:مش قادره...حاسه روحي بنموت ياسجى..
سجى بإزدراء:اني مش عارفه شن هالذوق اللي عندك مالقيتيش الا هالمجرم المعفن..
سماح:ع اساس رفيق خيرمنه!
سجى:لالا في فرق ياعمري فرق كبير..
سماح رشفت وقالت:بالله صكري فمك وخليني في همي..
سجى مطت شواربها للاسفل بإزدراء ورجعت تنقي في حواجبها قدام المرايه..
وسماح حداها تبكي..
••••°°°°°•••••°°°°°•••••
الساعه التاسعه ليلا..
"كولي دانيه حبيبتي "
هادي اسيمه وهي تحط قدام دانيه طروف كفته دجاج..
دانيه بإبتسامة خجل:ناكل خالتي..
اسيمه بإبتسامه:صحتين حبيبتي..وقعمزت..
سدينه بإبتسامه:والله ماشاء الله ماخليتوا مادرتوا تعبناكم..
اسيمه:مافي شي من قيمكتم اقل من قدركم..
رتاج:ربي يحفظك خالتي اسيمه..
اسيمه:ويحفظك ياعسوله..
ابتسمت رتاج..
ماجده:مرت ولد اختي مراة فالحه وكريمه لابعد حد ومادير الحاجه الا بأصولها..
اسيمه بإبتسامه خجل:تسلمي خالتي..شويه من اللي عندك..
نسيبه عكرشت وجهها وقالت:شن تقعميزة المدايح والشكرانيات هادي طلعونا من جو الرسميات هدا انخنقت..
ماجده:نسيبه بنت اختي ربي يحفظها اجدع بنت اخت في الدنيا..
نسيبه بضحكه احراج:ربي يعزك خويله..
كلهم:ههههههه...
........
في المربوعه..
عبدالمجيد:الناس كلها تشكر في الحكومه يقولوا احسن حكومه شدت البلاد..
هيثم:ان شاء الله ديمه نكونوا حسن الظن...
عبدالمجيد:ربي يعاونكم..
هيثم:هدا هو اللي محتاجينه الدعاء بس..
عبدالمجيد هز راسه وهو ياكل..
وزياد بحداهم ياكل بصمت..
وكذلك رشيد ياكل معاهم وهو ساكت...
وبعد العشي..
خشوا النساوين مع بعض يغسلوا الماعين بعد ماحلفت سدينه تخش هي وبنتها معاهم وتعاون..
اما سارة خدت دانيه وخشت بيها لدارها..
دانيه وهي تدهور بعيونها في الدار:الله يبارك تهبل دارك..
سارة بضحكه:ممكلتي هادي..نحس فيها اني ملكه..وحره ليا حرية التصرف في كل شي فيها وممنوع يخشلها اي حد من غير ماياخد اذني..
دانيه بضحكه:احني دارنا يضربوا في بابها كالشو ويخشوا..
ضحكت سارة..
بعدين دانيه تبتت نظرها ع مكتبة صغيره قالت:تحبي تقري هلبه شكلك؟
سارة شبحت لمكتبتها وقالت:ايه..ماما شربتني حب القرايه شراب من لما كنت نقرا صف سادس..
ابتسمت دانيه..
سارة شبحتلها وقالت:تحبي تقري انتي؟
دانيه:عادي يعني..كان لقيت شي حلو نقرا..
ابتسمت سارة وناضت مشت لمكتبتها وخدت كتاب وجت بيه لدانيه وقالت..تسلي بهدا في العطله..
دانيه شبحت للكتاب وقالت:غزل البنات..روايه؟
سارة:ايه حلوة هلبه...كملتها في اسبوع مع القرايه..
دانيه شبحتلها وقالت:امم تمام تو نشوفها..ابتسمت وكملت تقول..شكرا..
سارة بإبتسامه:العفو..امم..قوليلي شن صار معاك انتي وهداكا الأستاذ..
تعكرت ابتسامة دانيه..وبدت تحكي لسارة اللي صار معاها كله..
في هالوقت في الجنان...
كانت رتاج واقفه تشم في ريحة الورد وهي مغمضه عيونها..
وقعدت لحظات وهي تنعش في نفسيتها بالهواء النظيف المعطر بأريج ورد الجوري..
بعدين فتحت عيونها وقالت بضحكه:تو نصحح وجهي ونطلبه من خالتي اسيمه..
ومشت طول بطريقها لباب الكوجينه الخارجي..
ولما وصلت في الباب وقفت لما سمعت..
سدينه:هي جايها عريس توا..
اسيمه بأسف:اممم خسارة..قبل نبيها لخو مدرسه معاي شاب ماشاء الله عليه وقداش ليه يدور..
سدينه قالت:هو لتوا ماعطيناش كلمه اخيره..تو نشاور بوها ونرد عليك..
اسيمه بإبتسامه:خطبه ع خطبه ماتجيش ياسدينه..انتم شوفوا الخاطب اللي جاكم لو هي رفضت بعدين نفتحوا موضوعنا حني..
سدينه بإبتسامه توتر:ان شاء الله..
ورتاج واقفه ورا الباب تسمع وهي مصدومه...
............
"مش عارفه قتلك مش عارفه كان امك كذبت ولاقالت الحق"
دانيه بإستغراب:غريبه! علاش امي ادرق علينا حاجه زي هادي..
رتاج بإنفعال ودموعها تنزل:اللي نعرفه اني مش واخده حد غير جهاد لوتطبق السمي ع الوطى..
دانيه:وينه السي جهاد متاعك خيره ماجاش لتوا..
رتاج:عنده ظروف..
دانيه بتهكم؛قصدك بدالك بدسكة الظروف!..معناها ياقعادك تراجي..
رتاج طنشت كلامها وخشت تحت غطاها ورقدت..
اما دانيه حركت راسها يمين ويسار بأسف..بعدين مشت طلعت من الدار متوجهه للحمام..
وهي ماشيه شافت خوها رشيد في داره يشبح للتليفون بطريقه غريبه..
شبحتله بشك..بعدين مشت للحمام وهي تفكر فيه..
ديما وهو في داره وتليفونه مايفارقش فيه بكل..وعقلها بدي يرفع ويجيب..
•••••°°°°°••••••°°°°°°••••
"هاه نبي كلمة اخيرة"
نسيبه تشبح لخوها وقلبها مليان خوف..
واسيمه تشبحلها وتراجي في الإجابه..
هيثم:شنو؟
نسيبه :احمم..موافقه..
اسيمه نزلت عيونها بأسف..
اما هيثم قال:على بركة الله تو نكلمه اليوم الظهر ان شاء الله ونعطيه الرد..
نسيبه:احمم..تمام..باهي هيا الوقت تأخر..
هيثم خدي مفتاح سيارته وقال:قدامي..
ومشت نسيبه طلعت..
وطلع وراها هيثم...وين شاف لسيارة اخته جو عيونه فعيون زياد..
زياد غير عيونه بسرعه..
وهيثم ابتسم تهكما ومشي لسيارته..
🥀العلاقه بين الأب والأبن الاكبر غالبا تكون علاقة نديه..
الابن يبي يفرض شخصيته ويثبت وجوده..والأب يعتبر هالشي تعالي عليه ويقول "يحساب روحه كبر عليا" ويحاول يكبح جماح شخصية ولده خوف من انه معاش يقدر يسيطر عليه بعدين ويضيع الولد بطريقه او بأخرى...وهكي يشوف الولد ان بوه يحارب فيه ومايبيشي يكون خير منه..وتبدأ المواجهات الحاميه بيناتهم اللي يطلعوا منها في النهاية الزوز خاسرين..في الوقت اللي كانوا يقدروا فيه الزوز يقربوا من بعض يفهموا على بعض ويتفهموا بعض ويكسب كل واحد فيهم الثاني لأخر العمر🥀
•••••°•••••••°•••••••°••••••
تحت سواد الليل الحالك..اللي اخترق ظلمته بريق نجوم خافت...واضواء اهل الأرض اللي في كل حوش..وع طول الشارع..
كان هو مقعمز قدام الورشه...سرحان في عالم هالسواد القاتم اللي يشبه فيه بشكل حياته ومعناها...
اللي زيه هو المثقلين بالهموم والمثخنين بالجراح..اكثر شي يدورول عليه ويتمنوه في هالحياه...الراحه..
الراحه من كل شعور مؤلم ملازمهم في كل وقت...ومش عارفين كيف يتخلصوا منه...
وهالآلام قاعده تزيد شدتها يوم عن يوم...وهو مش قادر يخفف ع نفسه حتى شويه..ولاعارف سبيل للخلاص..
فجأة...
رن تليفونه...تنهد...بعدين قامه وشاف من المتصل..
مط شواربه بملل..بعدين فتح الخط ورد..
خليل:ايوه..
ملاك:وينك لتوا بنحطوا السحور..
خليل:مش فاضي...
ملاك سكتت شويه بعدين قالت:باهي تو نخليلك ع تركينه روح قبل يأذن عليك الفجر..
خليل:تسحري وارقدي ملاك مادورنيش..ونزل تليفونه وصكر..
وملاك حتى هي نزلت تليفونها بإحباط وقعدت تشبحله..
ع خشة تهاني:بيروح توا خليل؟
ملاك التفتتلها وقالت:تس تس..
تهاني:خلاص مادوريشي تعالي تسحري..
ملاك:تهاني..
تهاني:نعم..
ملاك:نسألك سؤال تجاوبيني بصراحه..
تهاني:أسالي!
ملاك بلعت ريقها وقالت:خليل..يحب وحده تانيه؟
تهاني نزلت عيونها وبانت ع وجهها ملامح الضيق..
ملاك عيونها تعبوا دموع وقالت:جارتكم هديكا ولا؟
تهاني قامت عيونها وشبحتلها بحزن وقالت:مش مهم توا تعرفي الحاجه..المهم ان نصيبه فيك انتي وانتي تقدري تخليه ينساها..
ومشت بسرعه وطلعت..
وخلت ملاك واقفه تشبح لمكانها بنظرة حاده وحاجبها مرفوع وهي تقول:حنخليه ينساها ومايتفكر حد تاني غيري..
•••••°°°°°°••••••°°°°°°•••••
وطلع نهار تاني..
ويجي الوقت المناسب فيه اللي بلغ فيه هيثم راجح بموافقة نسيبه على الزواج منه..
وبرغم مشغوليات راجح يومها الا انه من فرحته قطع جزء من وقته ومشي بلغ امه..وقاللها تستعد للبيان اللي حيرفعوه ليلة السابع والعشرين من شهر رمضان..كما جرت العادة عند اهل هالبلاد..
وع مضض..امه واخته بدوا يجهزوا ليوم البيان بين طلعات للسوق ودعوة فلانه وعلانه..
وكذلك بالسيف طلعت نسيبه مع خالتها واسيمه بش تاخد مايلزمها لهاليوم..
ماكانت حاسه شي..ولاتبي تعطي رايها في شي الا اذا سألوها وكأن الأمر مايعنيهاش...من داخل مش راضيه..مش فرحانه..
لكنها مفوضه الأمر كله لله...وتشوف لوين بتوصل ع في سيرها على كف القدر..
▪▪▪▪▪
◇حتى لو كنت بعيد..كل شي قدامي كان واضح وكنت نشوف فيه كويس..وعارف ان اختي مش حابه الموضوع..اساسا نعرف فكرتها عن الزواج ورفضها ليه المستمر..واستغربت في وجهة نظرها اللي تغيرت تماما..يعني حسيت ان في شي صاير معاها..بس شن هو مش عارف..
احمم..امم..هههه...سبحان الله..في القدر في هلبه مفاجآت مدسوسه للبني آدم..هلبه منها الظاهر متاعها شر..لكن في باطنها خير كبير..والله عليم وحكيم..سبحانه..
▪▪▪▪▪
يوم الخامس والعشرين من شهر رمضان..
في الطريق...
عواطف ببكي:ياناري عليك ياوخيتي ياناري عليك ...
جيهان ببكي:واجعني ياناري كان يستعد لامتحانات الشهاده..ناوي يخش الطب....ياناري..
راجح بحزن ممزوج بالضيق:هادي ساعته وهدا حد عمره..وانا لله وانا اليه راجعون..ادعوله بالرحمه والمغفره خير من النواح والتولويل..
عواطف رشفت وقالت:الله يرحمه وليد اختي الله يغفرله..
جيهان:الله يرحمه..
.............
"ولد خالته!"
هيثم وهو يكلم في اسيمه بالهاتف:ايه..ولد خالته توفى في حادث سيارة..
اسيمه بفجعه:انا لله وإنا اليه راجعون..لاحول ولاقوة الابالله..
هيثم تنهد وقال:وتي روحك بعد العصر نمشوا نطقوا فيهم عشرة دقايق نعزو ونروحوا..
اسيمه وخرت شعرها للخلف وقالت:إن شاء الله..ان شاء الله...
بعدين نزلت التليفون وصكرت وهي مضايقه..ولما التفتت بتمشي للدار..لقت نسيبه واقفه تشوفلها...
اسيمه بضيق:ولد خالة راجح توفى..
نسيبه وهي عاقده حواجبها بضيق:الله يرحمه ويغفرله..بعدين مشت بطريقها للكوجينه..
واسيمه تشوفلها وتقول:فيها خيره..فيها خيره..
بعدين تنهدت ومشت لدارها...
••••••°°°°°°°•••••••°°°°°°°•••••••
"وعلاش نرفعلها والعرس بعد العيد!؟"
عفاف:هدا السبر...ارفعلها اي حاجه..
رفيق بإنزعاج:نعطيك فلوس وانتي خوديلها..
عفاف بحده:ابدا ولاليا بيها دخل..انت اشري واني نرفعه لأمها وخلاص..ماتروحش للحوش كان ماجبت شي..
ومشت وخلاته..
وهو في قمة غضبه لف بيطلع خبط رشاده قدامه واطلق الفاظ سب نابيه..وبعدين طلع من الحوش وصكر وراه الباب بقوة...
وملاك كانت واقفه في روشن الدار تتفرج بالدرقه...
ملاك:شكله واخدها بالسيف عليه حتى هو...بعدين سكتت وهي تفكر وقالت في نفسها"بنت خالتهم هادي لاتطاق وبيجيبوها تعيش هني!!ا"..هفففف...
ومشت رقدت ع السرير كالعاده...
من اول النهار لأخره وهي راقده وماتمس في شي..ومخليه الكيد كله ع حناها وعفاف وتهاني...
🌺ومش حتكون سجى خير منها اللي تعودت بالنوم حتى هي والنت ولا تقعد بالساعات قدام المرايه تجرب في المكياج..
وكان طلبت منها امها تتحرك..اعتراضها صوته يوصل لأخر الدنيا..
وعفاف اللي كانت شايفه وعارفه هدا كله..متحسره على نفسها وع حظها فهالدنيا اللي ماكانش معدل معاها فولا حاجه..
بس مع هدا كانت ديما ع لسانها عبارة..
"إن شاء الله عند ربي خير"....
.......وعدا رمضان...وجي العيد...
وعدا العيد...
وعرس رفيق بدي..
ماكانش عرس كبير..يومين فقط..يوم عزومه...ويوم الدخول..
داروه كيف ماداروه..
اساسا ماعندهم من يعزموا..
ولافي من يجيهم ويفرح معاهم ولاهما خاطرهم في فرح وبوهم مش حاضره..
بوهم..اللي مشوله الثلاته زيارة يوم عقد القران..
كان يحاول يبينلهم ان وضعه كويس في الحبس بش يطمن قلوبهم عليه..
وكذلك وصى رفيق..
خالد:اسمع اني نبيك تعيش خير من عيشتي ياولد..كول بالحلال وربي صغارك..وعاون مرتك ع الحياة معاك تعلموا من اللي صار بيني وبين امكم تعلموا..وماتعاودوش تغلطوا نفس الغلط..
رفيق بضيق:ان شاء الله..
خالد تنهد وشبح لخليل وقال:وانت!!؟ خيرك مادرتش عرسك مع خوك؟
خليل عقد حواجبه ونزل عيونه وقال:نبي نبني فوق شقه ع حالي نتزوج بيها مانبيش نضيق الحوش ع اللي فيه..
خالد:باهي..لكن استعجل..ماتتمرخاش..
هز خليل راسه وهو ساكت..وبوه يشبحله..
جهاد:بوي..
شبحله..
جهاد:شن الجو داخل جاوب بصراحه بالله عليك..
ابتسم خالد وقال:خير من برا بهلبه..اقل شي مافي شرب هنايا..
جهاد بضحكه:غريبه توقعت الحاجه هادي تعفلقك..
ضحكوا خوته ضحكه خفيفه..
خالد بإبتسامه:بالعكس..وشبح لخليل وقال..بالعكس..هي اريحلي..البني آدم كان ريح عقله لاتقعدله هيبه ولايقعدله قدر حتى قدام روحه..
خليل نزل راسه وهو مضايق ومحرج في نفس الوقت..
وخوته قعدوا ساكتين..مش مقتنعين بكلام بوهم..
لأنه ثقيل ع انفسهم..حب الشرب تمكن من قلوبهم وزينه الشيطان في نفوسهم..لما خلاه المنفذ الوحيد ليهم من الهموم والأحزان..ومصدر للترويح عن النفس..
وللأسف هما اكثر من تأثر بالقدوة الموجوده قدامهم اللي حلوا عيونهم ع الدنيا وهما يشوفوا فيه رفيق للخمر ماسيباش ولا مرة...
...القدوة..
احيانا الأنسان يقتدي بحد..في الظاهر لايوده ولاهو قريب منه..بس يتطبع بنفس طباعه ويلقى روحه رغم عنه مولي نسخه منه..
وهدا حال زياد مع بوه..
زياد اللي حاليا منعكف ع كتابته ويقرا بشغف وحاط قدامه هدف يبي يوصله...
وكذلك سارة اخته..اللي حاطه قدامها هدف تحبه وتبي توصله وقاعده تجتهد بكل جهدها بش توصل فيه..
يمكن للتحدي يكون دافع للوصول للهدف..
ويمكن للحب كذلك يكون دافع..
وحتى الألم ممكن يكون اكبر دافع..
اكبر دافع لتهاني اللي قاعده تقرا وهدفها انها توصل لمكانه مرموقه في المستقبل تنتشلها من الواقع المرير اللي عايشه فيه...
••••••°°°°°°
تعرفي كان مانضتيش توا تاكلي طريحه تخربلك منظرك الخارب..
سجى:تي شن انت جايبني خدامه لأمك واختك ومرت خوك!
شدها من ذراعها بقوة وهو يقول:وهلبه ع وحده زيك تكون خدامه لأمي هلبه...كانك ناسية انتي شني يامعفنه نذكرك...
سجى بألم:باهي حول يدك وجعتني..
طلقها بقوه وقال:نطلع من الدار بعد عشرة دقايق تلحقيني..طول للكوجينه..
سجى وهي تتحسس في ذراعها:حاضر..
هو شبحلها من فوق لتحت..
بعدين مشي طلع...
سجى بصوت منخفض:مرض يرفعك انت وياهم...
برا..
كانت تهاني واقفه في الجنان تراجع وتراجي رفيق امتى يطلع بش يوصلها..
ورفيق ماطلعش لين شاف سجى خاشه الكوجينه..
تهاني:هيا رفيق..
رفيق لبس نظاراته وقال:اركبي..
مشت تهاني ركبت السيارة..
وهو ركب بعدها شغل السيارة وتحرك طلع من الحوش..
ع طلعتهم..
طلعت سيارة اسيمه اللي رافعه بنتها للمدرسه...
شبحوا رفيق وتهاني للسيارة بحزن..
وساره كان تشوف لتهاني ودموعها فعيونها لين ادرقت عنها..
مشت سيارة اسيمه..
وسيارة رفيق وراهم...
بعد طلعوا من الزنقه..
خش خليل بسيارته مروح بملاك من الكليه كانت ادير في امتحاناتها حتى هي..
ملاك:نبوا نطلعوا زردة نفرهدوا ع ارواحنا..
خليل:بعد تنجح تهاني..
ملاك:نهاري!! حني وين ونتيجة تهاني وين!؟
خليل:هدا اللي عندي..
ملاك قعدت تشبحله بضيق..
وهو يشبح القدام..
درس قدام الحوش وقال:انزلي..
فتحت الباب ونزلت وهي معصبه..
وصكرت الباب ومشت لباب الحوش...
دفاته وخشت..وهو لف ورجع للورشه..
بعد ماخشت ملاك للحوش داخل..
مشت طول للكوجينه بتشرب لقت سجى فيها تغسل في الماعين..
رفعت حاجبها ودارت روحها تضحك ومشت بتاخد طاسه..
سجى شبحتلها برفعة حاجب وقالت:شن يضحك فيك؟!
خدت الطاسه من الشباك وقعدت تتفحص فيها وهي تقول:لالاشي..حاجه بيني وبين زوزي يعني..
ومشت عبت ميه وشربت..
بعدين جت لوحت الطاسه في غسالة الماعين ومشت طلعت..
سجى غمضت عيونها بنفاذ صبر..
بعدين فتحتهم ..وخدت الطاسة اللي شربت منها ملاك كسرتها..وخدت جزء منها وجرحت بيه يدها..
بعدين طلعت تجري لخالتها...
خشت عليها الصاله..ومعاها صالحه..
سجى بألم:خالتي ..
عفاف شافتلها وانفجعت:حي عليا خيرك!
سجى:ااه..هادي ملاك خشت الكوجينه شربت ميه ولوحت الطاسه في الغساله انكسرت واني حطيت يدي فيها مانحسابش الطاسه مكسوره...اااي..
عفاف مشت تجري بتجيب الإسعافات وهي تقول:لاحول ولاقوة الابالله..
اما صالحه ناضت ومشت لدار حفيدتها..
قلعت الباب وخشت..
ملاك وهي مخلوعه:خيرك خاشه هكي!
صالحه:صبرت وسكتت عليه هلبه..توا بعد تبدلي شلاتيتك تطلعي تكملي باقي الكوجينه..
ملاك:والله!
صالحه:وربي المعبود كان مادرتي اللي قلت عليه نحرش فيك خليل وانتي تعرفيه زين..
وشبحتلها بنظرات حاده..
بعدين مشت طلعت من الدار وصكرت البال بقوة..
ملاك بغيظ:الحقيره سجى..الحيوانه...
•••••••°°°°°
واستمرت هالمكائد بين الزوز شغاله..وعفاف حاصله بيناتهم وادرق عليهم..خافت لو يوصل شي من اللي يديروا فيه لولاده ينجنوا عليهم ويديروا فيهم مالايحمد عقباه..لهدا فضلن تسكت تتحمل وتحاول تهدي الوضع بيناتهم..
لعند ماجي يوم..جلا الهم والغم عنها وفرحها فرحه كانت عطشانه ليها من سنين...
فرحة نجاح تهاني..بتقدير ممتاز..
هداكا اليوم انبح صوت عفاف من الزغاريد...والغني...
وتهاني كانت تشوف لفرحة امها ودموع الفرح مابطلتش نزول..
وخوتها حتى هما عبروا عن فرحتهم بيها بالنوبه اللي قلبت شارعهم قلب...
في نفس الوقت..
كانت فرحة اسيمه لاتوصف وفي تخبر في هيثم..
اسيمه بفرحه:الأولى ع طرابلس والثالته ع ليبيا ياهيثم..
هيثم وهو قدام غرفة الأجتماعات:ماشاء الله ماشاء الله..كويس..
اسيمه بضحكه:الحمد لله...قولي امتى مروح؟
هيثم:اليوم صعب اسيمه مشغول للصبح..
خفت ضحكة اسيمه وهي تقول:باهي ربي يعاونك..
هيثم:امين..هي حبيبتي نستأذن وراي اجتماع مهم..
اسيمه:اذنك معاك..
نزلت التليفون وصكرت وهي مضايقه..
لعند ماسمعت صوت زغرودة نوسه..قعدت تضحك..
ومشت طول لدار بنتها المجتمعين فيها كلهم مع ساره...
🍁طلعتهم نسيبه كلهم لعزومه عشي ع حسابها واحتفلت ببنت خوها وزادت فرحتها..
وسارة وقتها كانت فرحانه بزياده لفرحة احبابها بيها..
عكس امها اللي كانت موجوعه هلبه لغياب بوها عن مناسبه مهمه جدا...محطة نجاح كبيرة في حياة بنته..هو تجاهلها عن غير عمد..
▪▪▪▪▪
◇ابدا ماكنتش متعمد..كنت فرحان هلبه لدرجة لاتوصف..بس كانت في مشاكل صايرة عندي فالخدمه لقيت انها اولى بهلبه من اي شي تاني بوقتي..ماروحتش لين حليتها...
ولما روحت الصبح...
نذكر اني وقفت عند باب دار سارة هلبه..ترددت نخشلها..وللأسف..فضلت اني نكمل طريقي لداري..
تكبرت ع الإعتذار..وكنت حاس وقتها ان امر مبالغ فيه لو درته لأني راجل مشغول غيابي كان لحجه قويه..وفالنهايه هي نجحت لروحها مانجحتش ليا..هكي كنت نفكر...
اممم..اتصلت وحده من القنوات الفضائيه وطلبت اديرمعاها لقاء هي والعشرة الأوائل ع مستوى البلاد..
وهاللقاء حضرته واني في قاعة الاجتماعات في الوزارة...
▪▪▪▪▪
وامها خواتها يتفرجوا عليه وهما في شقة نسيبه مع نسيبه وزياد..
وتهاني تتفرج في حوشهم مع امها ونساوين خوتها والحاجه صالحه...ورفيق اللي كان يراجي فيه بفارغ الصبر..
ودانيه..مع اختها رتاج وامها وماجده...ومجاهد...
🌟🌟🌟
المذيعه:وتوا مع سارة هيثم الكاتب الحاصله ع الترتيب الثالث ع مستوى الجمهوريه..سارة هيثم الكاتب بنت الوزير هيثم الكاتب اعتقد هدا يكفي..اكبر دافع وصلك لهني ياساره اكيد..
سارة:احمم..هو ليس العظيم من قال هذا ابي بل العظيم من قال هذا انا...الحمد لله رب العالمين انعم عليا بذهن متفتح وحب شديد للتميز والنجاح في اي شي نديره في حياتي..
ولو بيكون في دافع وداعم كبير ليا في الدنيا من بعد ربي..بعيد عن اضواء المناصب والمراكز العليا..المراة اللي فازت بأعلى منصب في قلوب صغارها..المعلمه الفاضله..اسيمه عبدالعزيز المسعودي..امي..
💎حاول هيثم يحافظ ع ابتسامته بقوة وهو يتفرج ع بنته..
وعيون اللي حواليه تتفرج عليه ومن بينهم لجين اللي حست ان سارة تتجنب الكلام عن بوها..
اما امها فكانت مش عارفه تفرح ولازعل من كلام بنتها..
الكلام اللي ضايق نسيبه..وعجب زياد هلبه...
وخلا تهاني تضحك بصمت لأنها عارفه صاحبتها كويس لاتعرف تجامل ولاتكذب ولاتزين صورة اي حد حتى لو كان بوها..
ورفيق كان سرحان فيها وهو يشوفلها كيف تتكلم وسجى كان تلقى تطلق عليهم الموت..
🌟🌟🌟
المذيعه:كيف كان شكل دعم الوالده ليك؟.
سارة بإبتسامه:امي..كانت زي الميه اللي نازله من مزن السماء طول ميه طاهره وحلوه نزلت ع كل شي حلو فينا اني وخواتي ونماته وكبراته..شافت ان عندي خيال واسع عززاته ونماته لما شرتلي القصص المصورة ومع تقدمي في العمر بدتلها بروايات وكتب خلت خيالي غني بكل ماهو مفيد وخلت لغتي العربيه الفصحى غنيه بالمفردات..لين وليت نكتب وننشر في قصص..
نمت في خوي الكبير موهبه الرسم لما كانت تقعمز معاه وتختارله حاجات حلوة يرسمها..وكانت تعطي فيه معلومات عنها..زي الورد..الشجر..البحر..اي شي..وتزيد تعزز في خياله لين ولى رسام محترف مافيش مسابقه يخش فيها مايربحش والي جانب هدا كله..كان تخلي فينا نفكروا في مستقبلنا لوين بنوصلوا وشن نولوا بعدين..امي خلتنا نحلموا ونمسوا احلامنا بإيدينا..ومازالت مكمله مشوارها مع خواتي الصغار..
المذيعه:ماشاء الله..فعلا كلام مؤثر..وزادت اثرت فيا لمعة الدمعه في عينك وانتي تحكي عنها..شبحت للكاميرا وقالت..تحيه كبيره للأم الفاضله اسيمه..وكل الامهات اللي زيها..محتاجين لنموذج هدا يكون موجود في كل حاجه بش يطلع اجيال تقيم هالبلاد..
.........
:ربي يحفظ كريمتك معاليك..
:ياريت النساوين كلهم هكي..
هيثم مرر نظره عليهم وقال بإبتسامه:فعلا...المراة هادي هي اللي وصلت هيثم هني...من بعد الله..
لجين شبحتله بإبتسامه..
وهو برغم الأبتسامه المرسومه ع وجهه..
كان حاسه بضلوع صدره مطبقات ع بعض بقوة...
........
زياد ضم امه وباسها ع راسها وقال:ياعمري تستاهلي اكثر من هكي..
اسيمه تمسح في دموعها وهي متأثرة بكلام سارة ومش قادره تتكلم..
ونسيبه تمسح ع ظهرها بحنان وهي مبتسمه...
ريحان:حتى اني تونخش المدرسه وننجح زي سارة ونطلع في التلفزيون..
جنان:واني معاك..
شبحولهم وقعدوا يضحكوا...
.........
ماجده:ماشاء الله بنية ولد اختي كيف تتكلم تقول عمرها اربعين عام..
دانيه:ساره ع صغر سنها مثقفه وعاقله..
تعجب فيا هلبه..
سدينه:ربي يحفظها ويخليلها ميمتها..
ماجده:آمين..
ومجاهد يشرب في القهوة ويتفرج علي ساره كيف مقعمزة بحجابها واحتشامها..وقوة شخصيتها اللي كانت واضحه هلبه في نظراتها وابتسامتها الجاده..
واللي يزيد يبهرها في العين..انها صغيرة في السن وعقلها راجح رجاحة الراشدين...
••••••°°°°°°••••••°°°°°°•••••
وبدي زياد امتحاناته...
وابلى فيهم حتى هو بلاء حسن..وكان راضي عن أدائه فيهم تمام الرضا..وقعد يستنى في نتيجته بلهفه...
🍁🍁🍁🍁
وكعادة الأيام في انصرام عقدها...
عدت بسرعه...وجي اليوم اللي طلعت فيه نتيجة زياد...
ونجاحه كان نجاح باهر...
يمكن مايكونش بتفوق اخته ساره اللي تميزت ع مستوى البلاد..
لكن ع مستوى البلديه متاعهم كان هو الأول...
والفرحه بنجاحه كانت اكبر من الفرحه بنجاح ساره بإعتبارها اهم مرحله دراسيه يتخطاها الطالب وهي اللي بتحطه ع درجه توصله لهدفه اللي خطط يوصله سنين..
داروله عزومه كبيره..
عزموا فيها معارفهم..ع جميع المستويات...اللي تربطهم بيهم صلة الدم..وصلة العمل..
وقدام الناس كان الأب وابنه يبانوا ع وفاق تام..لدرجة ان هلبه من الموجودين تمنوا علاقتهم بصغارهم تكون زي علاقه هيثم بولده...
بعد ماتمت العزومه...وروحوا المعازيم...
في الصاله..
كانوا كلهم مقعمزين...
هيثم:هدا زميل قديم ليا ايام كندا كان تذكري اسيمه..
اسيمه بإبتسامه:ايه تفكرتهم هو واخته ومرته..
نسيبه بضحكه:ماشاء الله انت معارفك هلبه هيثومه..
هيثم:الحمد لله..
نسيبه بإبتسامه:يدوم عليك..بعدين ناضت وقالت..هيا يابطل الليله..
ضحك زياد وناض..
اسيمه بضيق:مش خلاص انت وياها..سادكم ماقعدتوا جيبوا حاجاتكم غدوه ان شاء الله وتعالوا..
زياد:ماطلعتش بإرادتي..
هيثم شبحله برفعة حاجب..
اسيمه:زياد..
زياد:هدا اللي صار..
اسيمه شبحت لهيثم..
هيثم ناض ومشي متوجه لداره وهو يقول؛ماقلت لحد اطلع بش نقوله اقعد..
زياد شبح لأمه وابتسم بتهكم ومشي طول لباب الحوش..
نسيبه بتوتر؛تصبحوا على خير..وطول لحقاته تجري...
اسيمه غمضت عيونها وتنهدت بضيق..
سارة شبحتلها بضيق وقالت:شفتي ياماما بعينك..شفتي..حتى في يوم زي هدا ياماما...
اسيمه حطت سبابتها ع فمها وهي تشوف لسارة تسكت فيها..
سارة ضمت شواربها لداخل بضيق..وناضت ومشت لدارها..
وامها معاها بعيونها ..مجرد مادرقت سارة نزلت يدها...
وخدت نفس عميق..
وسندت راسها ع حافة الكنبه وغمضت عيونها وهي تقول..
"يارب..اصلح بينه وبينهم كيفما وبما شئت يارب..اني مش قادرة نديرلهم شي يارب..."
🍁بعد مرور شهر...
"من غدوة الباص بيجي"
تهاني:باهي..
خليل:سجلتك في احسن مدرسه منظمه وادراتها كويسه..
تهاني:ايه شفت صفحتهم ع الفيس..
خليل:كويس..ماتبي شي تاني..
تهاني:لالا شكرا..
خليل مسح ع شعرها بعدين لف ومشي..
وهي مشت خشت لدارها...
وخليل وهو ماشي بيطلع..شاف للكوجينن لقي امه بروحها تعاند فيها وفي الماعين..
ارتسمت ع وجهه ملامح الغضب ومشي طول لدار ملاك..
فتحها عليها..
لقاها حاطه السماعات في ودانها وتغني..
جاها طول هاجم..وجبد من ودانها السماعات لين قطعهم..
هي انخلعت وقالت؛خيرك!
خليل:توا..توا..نبيك تختفي من قدامي وتمشي الكوجينه اطلعي امي منها واضميها تحركي..
ملاك:دور هديكا اليوم مش دوري..
خليل بغضب مكبوت:ملاك..
تأففت وقالت؛باهي باهي....
لوحت تليفونها ع السرير وطلعت..
وهو قعد يشبحلها من فوق لتحت لين طلعت..
بعدين مشي طلع من الدار..
فاتت قدامه مرت خوه وهي شاده ظهرها..حامل..
سجى:شن جو خليل..
خليل قلب عيونه بملل ومشي من حداها من غير مايعبرها بكلمه..
هي مطت شواربها بإزدراء وكملت طريقها لجناحها..
ع طلعة عفاف من الكوجينه شافتها وهي تمشي في مشيه مايعه...ولبسها ضيق ومش لايق تلبسه قدام سلافها..
طارتلها وقررت تكلم رفيق يدير معاها حل لانها معاش قدرت عليها...
•••••°°°°°•••••°°°°°°••••••
في مكان تاني..
كله خضرة ومناظر حلوة وهواء نقي..
كانت اسيمه مقعمزة ع الصلايه بعد ماصلت العصر...
وبناتها الصغار يشبحولها..
اما زياد وسارة ونسيبه مشغولين بالهدرزة..
اسيمه؛اللهم صل على محمد وعلى آل محمد..كما صليت على ابراهيم وعلى آل ابراهيم وبارك على محمد وعلى آل محمد كما باركت على ابراهيم وعلى آل ابراهيم..في العالمين انك حميد مجيد..
تنهدت..بعدين لفت صلايتها وناضت..
شبحتلهم لقت بناتها الصغيرات يشبحولها..
ضحكت..وجتهم قعمزت حداهم وقالت..خيركم؟
ريحان:ماما نبي نصلي..وندعي لربي ونقوله..ياربي غدوة يكون يوم حلو في المدرسه..
ضحكت اسيمه..
جنان:ماما علمينا نصلوا..
اسيمه شدت ايديهم مع بعض وقالت:امم..باهي تو نعلمكم..
لكن تعرفوا قبل حني علاش نصلوا؟
ريحان وجنان قالوا:لالا..
اسيمه:امم...اسمعوني حلواتي..حني نصلوا بش ربي نحبوا ربي زي ماهو يحبنا...ربي اللي عطاكم هالشعرات الحلوات..وهالعيون الحلوات..والوجه اللي يهبل..وعطاكم رجلين وايدين تلعبوا بيهم تاكلوا بيهم تمشوا بيهم..ربي اللي عطاكم ماكله وماخلاكمش جيعانين..ربي اللي عطاكم حوايج وماخلاكمش عريانين.ربي اللي عطاكم بابا وماما..وخوات..واخ..وعمة سموحه زي نوسه..
التفتوا لعمتهم لقوها تصب في القهوة وتضحك..
بعدين التفتت ريحان شبحت لامها وقالت:باهي علاش عطاني قلب مريض؟
انصدموا في سؤال ريحان..
لكن اسيمه ابتسمت ابتسامه تخفي بيها ألمها وقالت:لأنه يبيك تولي قويه...لما تتحملي المرض تولي قويه هلبه وربي يحبك اكثر..ويخليك مميزة ان شاء الله لما تكبري وتنجحي زي ساره الناس يقولوا شوفوا هالبنيه قداش قويه برغم ان قلبها تعبان لكن ردت بالها ع روحها وقرت واجتهدت ونجحت..
جنان:واني ماما؟
اسيمه: حتى انتي يبيك تكون قويه زيها..لما تردي بالك ع اختك وتساعديها..وتنجحوا انتم الزوز مع بعض ويديروا معاكم في التلفزيون لقاء ويقولوا..ريحان هيثم الكاتب وجنان هيثم الكاتب التوأم الخارقات ..
ضحكوا جنان وريحان ع تسمية امهم ليهم..
اما نسيبه وسارة كانوا يضحكوا وهما يمسحوا في دموعهم..
لكن زياد..كان يتأمل في وجهه امه وقلبه ذايب في حبها..الحب المقدس المربوط بحب الإله الأحد..
اسيمه قامت راسها وشبحتله..ابتسمت وقالت:زيزو..
ابتسم وقال:امم..
اسيمه:مستعد لغدوة ان شاء الله؟.
زياد:احمم..اكيد..
اسيمه:كويس..بس نبيك قبل تخش الكليه تعقد النيه..انك ماتطلعش منها الاوانت ناوي تكون للناس زي البلسم بوجهك البشوش وكلامك الطيب... مفروض اول حاجه يتعلمها الدكتور ان نص العلاج في سماحة اخلاقه وطيب نفسه مع مرضاه..زي بوك توا..
ابتسم ع جنب وقال:ان شاء الله..
اسيمه ابتسمت وشبحت لسارة وقالت؛وانتي..توا خاشه ع مرحله مهمه...اللي انغرس فيك زيدي كبريه اكثر واكثر...واعرفي ان راس مالك في حاجتين...في عفتك...وعقلك...واعرفي ان عفتك عمرها ماحتوقف بينك وبين اي درجة نجاح توصليلها في حياتك كلها...
عفتك مش بس في لبسك..في لسانك..في بصرك..في قلبك..قلبك ياسارونه حبيبتي حافظي عليه واحفظيه..
سارة تنهدت من قلبها بحب وقالت:حاضر ياعمري..
نسيبه:واني..غمزت بعينها وقالت.. ماعنديش نصيب في نصيحه ع الماشي ولاكيف!؟
ضحكوا..
واسيمه بعد ضحكت قالت:نصيحه وحده..زيدي استخيري..
ابتسمت نسيبه وهزت راسها بإيجاب بعدين قالت:هيا تعالوا اشربوا قهوه تعدلوا بيها دماغتكم مع النصايح..
ضحكوا..
وقربتلهم اسيمه مع البنات...
وقعدوا يشربوا في قهوتهم مع بعض..ويهدرزوا..
ونسيبه مرة مرة تحدف في نكته يضحكوا عليها..
بعدين اقترحت عليهم نسيبه يلعبوا كورة...
انقسموا فريقين وقعدوا يلعبوا..
نسيبه وزياد وريحان فريق..
واسيمه وسارة وجنان فريق..
كانت الكوره لما تجي عند اسيمه ولدها يخلي تسجل هدف..
مرة واتنين وتلاته..لين فصلت عليه نسيبه وطاحت فيه ضرب وهو هرب يجري منها..
والباقي يضحكوا عليهم بدموعهم...
ومر هاليوم عليهم وكان من اجمل الأيام اللي تنحفظ في الذاكرة لأخر العمر..
لكن للآن هيثم مالاش دور او وجود في هالأيام الحلوة...
للآن مازال بعيد..وكل ماله يزيد يبعد اكثر..
••••••°°°°°°••••••°°°°°•••••••
وفي صباح اليوم التالي..
خودي هادي سارونه..
ساره بعد ماساوت حجابها خدت التفاحه من امها وقالت:سلام ماما..
اسيمه:سلام حبيبتي..ربي يفتح عليك..
ومشت سارة تجري فتحت الباب وطلعت..
ع جية هيثم وقف قدام اسيمه وقال:شن رايك؟
جاته وساوت رقبة القميص وقالت:هكي تمام..
هو زفر وقال:متوتر هلبه..
هي ابتسمت وقالت:ميسرة بحول الله..انت خدمت بجهدك كلها وحققت انجازات كبيره في اقل من عام وهما حيلاحظوا هالشي لانه واضح وبقوة..
هيثم:يارب..يارب..
اسيمه:نقولك حاجه..من اول ماتخطي عتبة الحوش ابدا بالصلاة ع النبي وماتسيبهاش بكل لين يوصل الوفد للمستشفى..
هيثم ابتسم وقال:حاضر...
قرب وباسها ع راسها..بعدين مشي طول للباب..
وهي تراقب فيه بإبتسامه..
لما وصل في الباب وقف..وشبحلها..
اسيمه بإبتسامه:شنو؟
هيثم قعد يشبحلها للحظات..وهو حاس بشعور مش قادر يفسره..يدوب رسم ع وجهه ابتسامه وقال:صوريلي جنان وريحان وهما في المدرسه وابعتيلي الصورة..
ضحكت بفرح وقالت:حاضر..
هو كان حاس روحه مايبيش يطلع ويخليها..بس مجبور يطلع..
بإبتسامه قال:السلام عليكم..
وطلع وصكر الباب وراه..
هي تنهدت وقالت؛ربي ييسر امرك وينولك ماتبي..
بعدين خشت داخل وهي تقول:جنونه..ريحونه...تعالوا افطروا ماما..
وخشت للكوجينه خدت تليفونها من فوق حافظة الخبزة واتصلت بنسيبه..
حطت التليفون ع وذنها وهي تراجي فيها ترد..
ع خشة البنات..
اسيمه:بروا قعمزوا ماما..ايوه نوسه السلام عليكم..صباح الخير..
قعمزوا البنات ع الكراسي وهما يشبحوا لأمهم..
اسيمه:شن صار مع زياد.............وصلتيه؟.........ايه ايه بوه قال غدوة يمشي ياخد سيارته..........باهي...تمام موفقه حتى انتي.....هههه....في امان الله..وعليكم السلام..
نزلت التليفون وصكرت وجت لبناتها وقالت..هيا ماما سموا بالله و افطروا..
🌺🌺🌺🌺
الساعه الثانيه عشر ونصف قبل الظهر..
انفتح باب الحوش..
وطلعت سيارة اسيمه...
شبحت ايمينها جو عيونها ع حوش خالد..لقت عفاف واقفه في الباب تسقد في وليد صغير..
استغربت فيه..
بعدين شبحت لعفاف..
عفاف شبحتلها وابتسمت..
اسيمه ردتلها الأبتسامه..بعدين قدمت للولد بالسيارة ووقفت قدامه نزلت المرش وقالت:اركب حبيبي نوصلك للمدرسه..
هو قعد واقف يشبحلها..
جاه صوت عفاف وهي تقول"اركب معاها اركب"
اسيمه فتحتله الباب الخلفي
هو مشي ركب..
وصكر الباب..
واسيمه شبحت لعفاف وحيتها بحركة الراس..
وعفاف ردت التحيه..
بعدين اسيمه تحركت طول..
عفاف تنهدت بإبتسامة وقالت:هالمراة قداش نعزها...ربي يعطيها ع قيس نيتها دنيا وآخره..
وخشت داخل وصكرت الباب..
فهالوقت فاتت سيارة اسيمه جنب الورشه..
شافت الولاد فيها يخدموا..
هما شبحوا للسيارة لما فاتت..
هي ابتسمت وحيتهم بحركة اليد..
وهما ابتسموا وردوهالها...
وفاتت السيارة..
رفيق:خو ملاك راكب معاها..
خليل:بالله!..والله ماشفته..
جهاد:حتى اني مكرت كان رفعته شن بيصيرلك..
خليل:نبيه ياخد ع مشي والجي ع رجليه بنديرله باص حتى هو ع هالخطوتين!..
وطبس راسه وكمل شغله..
ورفيق وجهاد كذلك وهو يضحكوا بدون صوت..
•••••••°°°°°°•••••••°°°°°°°•••••••
"اللهم صل وسلم وبارك على محمد".
"اللهم صل وسلم وبارك على محمد"
لجين؛وصلوا معاليك..
هيثم ساوا البالطوا الابيض اللي لابسه ومشي لمدخل المستشفى ووراه لجين وهو يردد بهمس..
"اللهم صل وسلم وبارك على محمد"
🍁🍁🍁🍁
"واحشنا يارسول الله...ياسيدنا شوقنا زاد والله..
ومهما طول الغياب..محمد مشتاق اليك والله..
محمد..صلى عليك الله"
كانت تغني بشجن وهي تسوق..فجأة رن في وذانها صوت بناتها وهما يقولوا...
ضحكت..وجتهم قعمزت حداهم وقالت..خيركم؟
《ريحان:ماما نبي نصلي..وندعي لربي ونقوله..ياربي غدوة يكون يوم حلو في المدرسه..
ضحكت اسيمه..
جنان:ماما علمينا نصلوا..》
ابتسمت وقعدت تشوف ايمين ويسار لين طاحوا عيونها ع مبتغاها..
درست ونزلت...
وخشت للمحل...
لحظات...وطلعت بكيسه في زوز بدلات صلاة صغيرات وصلايات...الوانهم ورديه وحلوة...
فتحت باب السيارة الخلفي..
وحطت الحاجات..وصكراته..
بعدين مشت ركبت..
شغلت السيارة وتحركت..
.............
في احدي شاحنات النقل الكبيره..
كان السائق متاعها يتكلم بالتليفون وهو في قمة الأنفعال..
السايق:مادخليش بيكم اني مادخليش حقي يوصلني........والله توصل للدم..والله الدم نوصله للركاب الله...
........
اسيمه:زعمه نمشي نطيب في حوش نوسه ولانروح للحوش ونطيب وهما يجوا يتغدوا عندنا؟!...تس..اليوم هيثم مش مروح بكري..يجوا هما يتغدوا وخلاص...
..........
سائق الشاحنه بإنفعال شديد:افهمني ياراجل افهم..خيرك ماتبيش تفهم #####....لااالالالا...اني قلت لااااا..
.......
اسيمه انعطفت وهي تسوق...
فجأة طلعت في وجهها الشاحنه..
صابها ذعر شديد وفزع كبير وهي تقول بعياط:لالاالاااااا..لاإله الا الله..لاإله الا الله..
وفي نفس اللحظه السايق لوح الهاتف وحاول يتدارك الموقف..
لكن مع الأسف ماقدرش يسيطر ع شاحنته اللى ضربت سيارة اسيمه بكل قوة وخلتها تنحرف عن الطريق وتنقلب اكثر من مرة لين استقرت ع ظهرها..
وهو لما وقف وقفت حركة السير كلها فالطريق...
وفي ناس نزلت تجري من سياراتهم بش يشوفوا شن صار للسيارة المنكوبه باللي فيها...
🍁🍁🍁🍁🍁
قدام المستشفى الموجود فيها هيثم..
لجين كانت واقفه تتكلم بالتليفون..
لجين:باهي تمام جميل انت روح للحوش توا واني لما نكمل شغل نروح طول...لالا في معاه من يعاونه...ايه طبعا واسطات...هههههه.....
فجأة شافت سيارة اسعاف خاشه لباحة المستشفى..
قعدت معاها بعيونها وهي تقول:لالا ماتجيب شي كل شي موجود في الحوش...
انفتح باب سيارة الأسعاف ونزلوا منها الحاله ودكاترة الطوارئ طلعوا يجروا..
وهي لما شافت الحاله اللي نازله..برغم ان معالم الوجه كانت غارقه بالدم..هي طول عرفتها..
وكيف ليها تقاسيم وجه مراة حبتها من اول ماشافتها..وزاد حبها ليها من كلام زوجها الدائم عنها..
زوجها!!
هو توا داخل في نفس المكان..
هي من صدمتها..والفجعه اللي صابتها..
نزلت تليفونها وخشت تجري داخل...
.............
"الحديث باللغة الإنجليزيه"
هيثم:لدينا كوادر طبيه في ليبيا متفانيه جدا في عملها وهم ع درجة عاليه من الكفاءة..
واحد من اعضاء الوفد الطبي الانجليزي:جيد جدا..
واستمر حديثهم وهما واقفين في غرفه لأحد المرضى طالع من العنايه المشدده مؤخرا..
فجأة وهو يتكلم..
خشت عليهم لجين وهي تلهث..
وع وجهها ملامح الفزع..
هيثم لما شافها بهالحاله استغرب...لكن قلبه انقبض بقوة..
وهي تشوفله وتبلع في ريقها ودموعها ينزلوا...
.........
"بسرعه بسرعه صدمات كهربائيه.."
شغلوا الجهاز...وبعد مادهنوا سطحه بمادة ما..
حطوه ع صدر اسيمه..ودارو اول صدمه..
....وع قد ماكنت قوة هديكا الصدمات كهربائيا مش حتكون اقوى من صدمته هو..
اللي بعد ماعرف بالفاجعه من لجين..
طلع يجري من الغرفه وهو مش حاس بروحه..
ومش عارف من اللي حسيبق التاني رجليه..ولا قلبه..
وصل في الدروج وقعد ينزل وهو يجري...
وكأنه الدنيا خلاص الوقت فيها قرب يوقف..وكأنها حتوقف خلاص..
ووراه لجين تجري وهي تشوفله وجسمها يرجف باللي فيه..
........
بعد اخر صدمه..اخر تجربه...اخر محاوله لبث الأمل..
مات الأمل..زي ماتت هي...
ماتت...وارتفعت الروح لمالكها...من وقت طويل..بس البشر لأخر لحظه لازم يحاولوا بيأس يأخروا لحظات هالآجل اللي لايمكن تتأخر ولو جزء من الثانيه..
بحزن شديد..
كان الطبيب يرفع في الغطا بش يغطيها..
وماكانش عند سارة اللي قاعده مركزة مع الأبله في الفصل ادني فكره ان لقائها اليوم الصبح بأمها كان اخر لقاء ومن بعده معاش بتشوفها ليوم القيامه..
ولاكان يندري زياد اللي مقعمز في المدرج ياخد في اول محاضرة ليه في الكليه انه امس نظرات تأمله في امه كانت نظرات وداع..ملا فيها عيونه منها بش ترسخ ملامحه فعقله وماينسهاش...
وكيف ليه ينسى ملامح انحفرت في القلب حفر!
ولا ريحانات قلبها الصغار اللي ياخدوا في اول حصة دراسيع في مدرستهم..
كانوا يعرفوا...ان اهم ركن في دينهم...اللي طلبوا من امهم تعلمهولهم..
حيتعلموه ع يد حد تاني غيرها...
زي مايتعلموا هلبه حاجات تانيه....وهي مش معاهم..
🍁لكن هو توا بش فهم وعرف ماهية الشعور المبهم اللي حس بيه قبل ليطلع من الحوش..
شعور الوداع..
بأنفاس متقطعه لاهثه..بقلب يدق بكل قوة...
بروح كادت تبلغ تراقي...
وصل وين ماهي موجوده..
بيده اللي ترجف زي المروحه...حط يده ع ستار وجبده بقوة..
وشاف اخر شي توقع يشوفه في حياته...
الغطا الأبيض وهو يغطي وجه احب انسانه ع قلبه معلن مفارقتها للحياة.....
زوجته...نصه...روحه التانيه...عزيزة قلبه...

اسيمه....

...يتبع....