البطل المغمور "شمس الغروب"

الجزء الثاني والثلاثين "القسم الثاني"

  Salaat Frist💕💕💕
الصلاة أولا🌸🌸🌸🌸🌸
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐..
ناض من ع الصلايه ولفها...ومشي بيحط في مكانها بش يرجع لمكان عمله...
بعد حط الصلايه مشي بيطلع..وطلع تليفونه من القامجو الأحمر متاع الخدمه..
شافه لقي اكثر من مكالمة فائته من اخته..
عقد حواجبه بخوف وهو يعاود يتصل بيها..
..........
وهي كانت راقده ع فراشها وتبكي بصمت...
لعند ماسمعت صوت تليفونها وهو يرن..
فزت قعمزت وقامت التليفون وفتحت الخط طول..
دانيه ببكي:مجاهد..
مجاهد بخوف:خيرك صوتك شن صاير؟
دانيه ببكي:بالله روح مجاهد روح..
مجاهد بخوف وعصبيه:علاش شن في تكلمي...
دانيه حاولت تهدي روحها وهي تقول:صايرة مشكله بين بوك وماجده سببها رشيد.
مجاهد؛شن دار الزفت هدا!؟
دانيه وهي تحاول تشد روحها عن البكي:ياما مداير خوك هدا..مجاهد انت لازم تروح وخيي لازم..
مجاهد هز راسه وقال:تمام تمام..وسكر عليها..
ومشي طلع بسرعه..
ودانيه بعد سكر قعدت تبكي...
🍁وماكانش حال اختها خير من حالها...
اللي واقفه ع طاوله الأكل وهي تصب في العشي لراجلها وبنته اللي ماريحتهاش لانظراتها ولاتصرفاتها..
وبوها كان ناسي رتاج في وجودها..
عادل بإبتسامه؛قتلك ديري بيشاميل ع خاطر همانه تموت فيها..
همانه شبحت لبوها وابتسمت..
رتاج شبحتلها وابتسمت مجامله وقالت:صحتين..وقعمزت ع الكرسي..
وبدوا ياكلوا..
رتاج شبحت لهمانه...لقتها شاده الكاشيك بروس صوابعها  هي تاخد من المكرونه اللي في صونتها..قعدت تلعب بيها وتقلب وتشوف بعدين سيبتها وقالت لرتاج:ترا عصير..
عادل شبح لرتاج..
هي طول ناضت وقالت:ترا طاستك..
همانه خدت الطاسه من قدامها وقعدت تشم فيها..
ورتاج تشوفلها...
ابتسم عادل وقال:همانه بنتي عيافه هلبه..
رتاج:امم..
مدت همانه الطاسه وقالت:صبي..
خدت رتاج الطاسه وهي تحاول تحافظ ع هدوئها وصبتها العصير ومدتهولها..
همانه:حطيه..
رتاج شبحت لعادل لقاته ياكل عادي...
حطت الطاسه قدامها وولت قعمزت..
همانه خدت الطاسه وشربت منها شويه..
بوها شبحلها وقال:تعشي بابا..
همانه:ماعجبتنيش بابا..
شبح عادل لرتاج..
رتاج:انتي غير ذوقيها قبل..
همانه شبحتلها وقالت؛مافيش مراة دير في البيشاميل زي ماما والفرق بين اللي دير فيها هي وهادي كبير..
رتاج شبحت لعادل ودموعها عبوا عيونها..
ابتسم عادل وقال:طبيعي يعني ماكلة الأم لايعلى عليها..
همانه:اممم..اكيد..بابا في مطعم ولامقهى قريب من هني نطلب منهم..
عادل؛في واحد تلقي رقمه في المفكره جنب التليفون اللي حدا المدخل..
ناضت من مكانها ومشت وين ماقاللها بوها..
شبح عادل لرتاج وقال بإبتسامه؛مدلعه شويه ..
رتاج هزت راسها وولت بتاكل وهي تقول:واضح..
هو شبحلها شويه بعدين رجع ياكل...
•••••••°°°°°°°••••••
"ماريتش معاه يوم نحكي بيه ومانبيش نحكي ع اللي دايره في مرته التانيه وبناته"..
نسيبه؛عارفاته مش وقته كلامي هدا لكن ياما نبهتك ياخالتي..
ماجده تنهدت بضيق وقالت:اني كنت خايفه من الوحده يا نوسه..كنت نقول بعد يجيك نصيب شن بيصير فيا!؟ ماكنتش نبي نثقل ع وليد اختي وعويلته مانبيش نثقل ع حد..قلت لروحي لازم نتزوج لازم نلقالي ونيس في باقي حياتي يتحملني ونتحمله يعانيني ونعانيه حد ملزوم بيا اكثر من اي حد في الدنيا..ومالقيتش قدامي كان مجيد حتى وهو متزوج رضيت بيه قلت عادي المهم مانقعدش بروحي..وهادي النتيجه..
سارة؛سامحيني خويله لكن تفكيرك غلط اهلك اولى بيك ولابابا حني نخلوك مستحيل خويله..
نسيبه؛مالا اني بنسيبك !؟اني مفهمه خليل وهو عارف اصلا انك امي مش بس خالتي ومافيش بنت تسيب امها..
هزت ماجده راسها وهي مبتسمه بأسف بعدين قالت؛عارفتكم والله عارفه..بس هدا عقلي وهكي فكرت وقتها..ومع هذا نرجع ونقول مافيش ونس للمراة زي راجلها..
نسيبه:وكان مالقتش راجل باهي يستاهل يكون ونسها قعادها في حوش اهلها خيرلها الف مرة..
ماجده وهي مبتسمه قالت؛عندك حق..
وسارة تشوف لماجده بإبتسامه..
شويه شبحوا لروشن الصاله لما سمعوا باب الحوش الخارجي انفتح..
سارة؛روح بكري..
ماجده شبحتلهم وقالت؛كويس خل نتكلم معاه في الموضوع الليله..
سارة:بس طلب خويله بعد يتعشى..
ابتسمت ماجده وقالت:حاضر..
ع جية البنات يجروا...
نسيبه بضحكه:جو يجروا للشكلاطه..
ضحكوا سارة وماجده..
ع خشة هيثم سمع ضحكاتهم ابتسم...
سكر الباب...
والبنات جوه يجروا وهما ينادوا..
"بابا"
هيثم وهو يحول في كندرته ضحك وقال:استقبال من فم الباب اليوم..
ريحان وهي تضحك بحماس:بابا حصلت 15 ع15 في الحساب..
هيثم بدهشه مصطنعه؛ماشاء الله!
جنان بإحراج؛اني 14ونص بابا رقم نسيته طيرلي النص..
هيثم قعد يضحك..بعدين مدلهم شكارة الشوكلا وقال...
هيثم بضحكه:خودوا انتم واعطوا لاختكم وعمتكم وخالتكم..
خدت ريحان الشكارة وقالت:حاضر..
ومشوا يجروا للصاله..
وهيثم مشي وراهم وهو يضحك لين وصل للصاله وقال:السلام عليكم.
ردوا عليه السلام وسارة ناضت وهي تقول؛خل نوتي العشي..
ومشت طول للكوجينه..
هيثم شبح لخالته وقال؛شن حالك خالتي توا؟
ماجده هزت راسها وقالت:الحمد لله ولدي..
شبح لنسيبه وقال:الحمد لله..ايه حقه كلمتي عيلة راجلك يجوا غدوة يتغدوا؟
نسيبه؛ايه بكري كلمت عمتي وقالوا جايين..
هيثم؛تمام...ايه..يسلم عليكم زياد..
ابتسموا الزوز بفرح ونسيبه قالت:والله استاحشته هيثم بالله ارفعني نشوفه..
هيثم بإبتسامه؛بإذن الله اخر الاسبوع الجاي تشوفوه كلكم..
وقفت سارة ع البار وقالت وهي متفاجئة:حقه بابا!
هيثم التفتلها وقال بضحكه؛حقه بابا...ومشي بطريقه لممر الديار..
نسيبه؛غير تعالى فهمنا علاش اخر الاسبوع الجاي!
ماجده؛المهم نمشوا نشوفوه..
سارة ضحكت من فرحتها وولت توتي في العشي..
نسيبه كلت من الشوكلا وشبحت للبنات وقالت:ماتاكلوش الشكلاطه توا معاش تتعشوا بعدين..
ماجده شبحتلها برفعة حواجب..
ريحان؛وانتي عمتو مش متعشيه؟
نسيبه وهي تاكل:امم..لانتعشى حبيبتي لكن اني كبيرة وبطني كبيره مش زيكم انتم مازال صغيرات وبطونكم صغيره تشبعوا فيسع كان كليتوا..
ريحان؛اها..
نسيبه:ايوه دسوها توا وكولوا بعدين..غيرت عيونها لخالتها لقتها تشبحلها من فوق للوطا وهي رافعه حواجبها..
كلت نسيبه من الشكلاطه وهي شاده ضحكتها..
••••••°°°°°°••••••°°°°°°•••••
كملت غسل الماعين وحولت المريول متاع الكوجينه وهي تقول بهمس:خيره ماناضش روح بيها ان شاء الله غير مش عابي يبيتها هني!؟
وطلعت من الكوجينه ومشت بطريقها للدار النوم..
لما خشتلها وشافت اللي قدامها جمدت في مكانها مصدومه..
لقت البنت فاتحه دولابها ومطلعة حوايجها..
همانه:هدا كله خداهولك بابا من برا ولا؟
رتاج وهي مصدومه هزت راسها بإيجاب..
همانه اشرت عاللي قاعد معلق وقالت؛هدا انتي واخديته من هني واضح الفرق...
رتاج رفعت حواجبها وقالت:وين الفرق؟!
همانه بضحكه؛مش مهم..امم حقه..عجبوني هادم هلبه..
واشرت ع لبس جديد لرتاج مالبستاش قبل..
رتاج قعدت تشبح للدبش وهي ساكته..
همانه؛قوليلي تفضلي حتى بالكذب..
شبحتلها رتاج ومازال ساكته..
جت همانه خدتهم وقالت؛مانراجيش لين تقول كله من رزق بابا اصلا..
وخدت الدبش ومشت للزيانه خدت منها قلم كحل ومسكره وقالت..حتى هادم..
ومشت طلعت بيهم كلهم..
وهدا كله ورتاج تشبحلها وهي مصدومه في وقاحتها ومش قادره تتكلم..
بعد استاقظت للي صار لحقتها..
لقتها وصلت الصالون وهي تقول؛تهبل مرتك يابابا شوف شن عطتني..
وقفت رتاج في مكانها وانصدمت مرة تانيه..
ضحك عادل وقال:مش قتلك يابابا طيبه وعسوله..
قعمزت همانه حدا وشبحت لرتاج وقالت؛ايه تو نروح نحكي للعيله عليها وتاخد تأشيرة الدخول..
هو قعد يضحك ع كلام بنته..بعدين قرص خدها وقال؛كان نعرف منين تجيبي فيه الكلام هدا..
همانه تضحك وبس..
ورتاج واقفه تمرر في نظرها عليهم وهي مازال  مصدومه..
عادل شبحلها وقال؛رتاج بنمشي نروح بهمانه نص ساعه مش معطل..
رتاج ماقدرتش درق فرحتها بانت على ملامحها وهي تقول: باهي..
همانه وهي تشوفلها قالت:شكلك ماتبنيش نروح ولا؟
تعكرت ملامح وجه رتاج..
عادل؛مرة تانيه بابا نجيبك تباتي امك منبهه انك تروحي ع خاطر امتحانك غدوة..
همانه ضحكت وقالت:ايه عارفه ماتزعليش ياحلوة في العطله تو نجي نقعد عندك اسبوع..
اغتصبت رتاج ابتسامه ع وجهها وهي تقول:إن شاء الله..
ناضت همانه وهي تقول:هيا بابا..
ومشت طول وهي شاده في يدها الحاجات..
وعادل ناض...جي لرتاج مسح ع شعرها وقال:مش معطل..
ومشي لحق بنته...
وعيون رتاج عليه وهي مضايقه وتفكر بقلق...
بعد طلعوا...مشت بسرعه لدارها بش تتصل بدانيه وتحكيلها..
وين وصلت في دارها شبحت لحوايجها اللي ع السرير ..
بعدين خدت تليفونها من ع الزيانه وحطت ع رقم اختها واتصلت..
.........
ودانيه كانت متمدده على فراشها..حاسة روحها تعبانه وفاشله...
حتى انها سمعت التليفون يرن ومالقتش حيل بش تنوض وترد...
شويه وخشت عليها امها وهي تقول..
سدينه:خيرك ماترديش ع تليفونك..
دانيه بتعب:مش قادره..
سدينه خافت وقالتلها:خيرك!! وجهك اصفر وتحت عيونك اسود.!سكرك هابط..
وطلعت تجري من الدار بش تجيبلها حاجه..
والتليفون مازال يرن...لعند ماسكت..
......
رتاج:خيرها ماتردش هادي!...
حطت هاتفها ع الزيانه..ومشت لحوايجها بش تردهم للدولاب وهي معصبه...
••••••°°°°°°••••••°°°°°••••••
بعد تعشوا...
خشوا سارة والبنات لدارهم ومعاهم نسيبه..
وقعدت ماجده مع هيثم بش تكلمه في موضوعها اللي مش عارفه كيف تفتحه...
هيثم وهو حاط رجل ع رجل ومربع ايديه ويشبح لخالته..
هي كانت تكلم فيه بإرتباك ومش عارفه من وين تبدا:بالذات اللي يجرب حاجه ويفشل فيها احسن حاجه يديرها يعترف انه فشل وانه غلط من البدايه لأنه جربها و....
قاطعها هيثم وهو يقول بإبتسامه:صايرة حاجه بينك وبين مجيد؟..
هي شبحتله شويه بعدين قالت؛نبي نطلق..
هيثم ضيق عيونه وقال:السبب..
غيرت عيونها عنه وقالت:اسباب..متخلف وبخيل وداره كبد..وضربني..
فك هيثم ايديه وفتح عيونه ع وسعهم وقال بصدمه؛شنو!!!؟
ماجده شبحتله بخوف وقالت:اللي سمعته..
هيثم قعد يشبحلها ودمه يفور ويغلي من الغضب بعدين قال:
اني من الاول مش مرتاحله ومش عاجبني لكن انتي اصريتي عليه..
نزلت عيونها لوطا وهي محرجه ومتضايقه وتفرك في ايديها ببعض...
هو تأفف وقال:استغفر الله العظيم..
وناض مشي طلع من الصاله..
ماجده قعدت معاه بعيونها لين ادرق..وشويه وسمعت باب الحوش انفتح وتسكر..
ناضت من مكانها ومشت وقفت في الروشن..
شبحت هيثم وهو طالع يتكلم بالتليفون...
كان يتكلم بعصبيه وهو يمشي ويجي في الجنان...
ماجده بقلق:سترك ياربي..
....برا....
هيثم بعصبيه:لاتجيني لانمشيلك ومعاش في بيني وبينك دوة...ياطلقها بالحسنى ياالمحاكم تفصل يينا.. وسكر في وجهه..شي يطلع الواحد من طوره..
•••••°°°°°°••••••°°°°°••••••
الساعه العاشرة ليلا...
حول ساعته وحطها ع الزيانه وقال؛تخش القلب طول همانه ولا؟
رتاج وهي تقرا في الشيت قالت:ايه..
لف وشبحلها بعدين قدملها وقعمز مقابلها وقال:تعرفي هي اللي اصرت تجي تتعرف عليك وبسبب كلامها عنك لعمامها وعماتها لما روحنا شوقتهم يتعرفوا عليك..
قامت عيونها وشبحتله..
عادل ابتسم وقال؛اختي الكبير بدير بنتها بعد اسبوعين وعزماتك...
رتاج؛عزمتني؟
عادل هز راسه بإيجاب..
رتاج غير عيونها عنه وقالت؛باهي..
عادل بإبتسامه:تو تتعرفي ع باقي العيله وتحبيهم طول زي ماحبيتي همانه..
رتاج وهي تشوف للشيت:وام همانه؟
عادل؛كل وحده فيكم في حالها لاهي تجي جنبك ولاانتي تفوتي من ركنها..
تنهدت رتاج وقالت:باهي...
ناض ومشي للدولاب وهو يقول؛ماتخافيش ماتقدرش تجي جنبك...
رتاج؛ان شاء الله..
عادل؛قتلك مادوريش..
رتاج؛باهي...وقالت في نفسها"مش لازم تجي جنبي العقربه الصغيره تكفي وتوفي"....
🍁🍁🍁
وتعدي ساعات الليل طويله..
ع المهموم اللي شايل جبال هم ع قلبه...اللي هدا حاله النوم مايعرفلاش طريق...
زي دانيه...وخوها مجاهد اللي يراجي امتى يطلع الصبح بش يروحلهم..
وامهم اللي مابطلتش تخميم في بعدين خايفه من اللي جاي هلبه...
وسبب هالخوف وهالقلق وانعدام الأمان...
اللي مفروض يكون سبب أمانهم...أب العيله...
اللي كان ناوي يسكر راسه ويعاند الكل ويدير مايبرد قلبه
هدا مجيد مايهمه شي كان نفسه...
....عكسه....
هيثم...اللي كان مجالس صديقه...يقرا...ويتقوى..ويزيد ايمانه..وأمله بأن الجاي حيكون احسن يكبر....
▪▪▪▪▪
◇حنقعد نتكلم هلبه على تأثير القرآن في حياتي..القرآن احسن صديق...صديق ينفعك في كل احوالك..صديق تلقاه في اصعب المواقف..أنيس في القبر..حتى في يوم القيامه..شفيع يشفعلك عند رب العالمين..القرآن هو روحي التانيه اللي عايش بيها...
هدا غير الحسنات اللي يعطيهالي...يعني لو على كل حرف عشرة حسنات...معناهافي ختمه كامله...3226040 حسنه..
ثلاثة مليون وميتين وسته وعشرين الف واربعين حسنات..
...بجديات...نشفق ع اللي عنده مصاحف في الحوش مايفتحش فيها الا من رمضان لرمضان..ونشفق اكثر ع اللي فات عمره ومافي مرة فكر فيها يفتح المصحف....
بجد مساكين...
▪▪▪▪▪
••••••••°°°°°°°••••••••
تاني يوم...
طلعت من العمارة ماشيه بطريقها للباص..
كانت زي الوردة الذابله...السهر والحزن والهم مذبلين ملامحها الجميله...
برغم تعبها مشت للمدرسه هربا من واقعها المر في الحوش..
مانبيش تحضر اللي حيصير بين بوها وخوتها...
ولاتبي تشوف اللي حيصير لو عرفوا بمصيبة خوها الصغير..
وفي وسط تفكير بخوف من هدا كله...
كانت دور عليه...هالشخص اللي ولى يعينلها شي..
شي يدخل السعاده ع قلبها بإهتمامه بيها...
بس مع الأسف حتى اليوم ماجاش..
وزادت كآبة كآبتها....
....طول الطريق في الباص...
كانت تحاول صديقتها هبه تعرف خيرها وتغير جوها لكن بلافايده..كانت دانية كئيبه جدا..
وصلت لمدرستها وقعدت ادور ع سارة لين لقتها مقعمزة تراجع...
.........
دانيه ببكي:قعد يهدد ويقول لما ناخد التالته ونو نوريكم...دار ليله سودا ياسارة..
سارة بحزن:لاحول ولاقوة الا بالله..
دانيه مسحت دموعها وقالت:تعرفي ساره...نكرهه نكرهه هلبه..عمري ماحسيت ان بوي..هو عمره ماحسسنا انه بونا بخيل علينا في كل شي ياسارة حتى بالكلمه الطيبه حتى بالضحكه في وجوهنا..ديما يحسس فينا اننا مش بناته وكأننا بنات امي بس...عمري..عمري ماسمعت منه كلمة بنتي..وحطت يدها ع فمها وقعدت تبكي..
سارة قعدت تمسح ع ظهرها ودموعها ينزلوا مش قادره تقول شي لدانيه وعارفه ان مافيش كلمه تقدر تواسيها...
رن جرس الطابور..
سارة:خلاص دنون حبيبتي اذكري الله وامسحي دموعك ونوضي..
مسحت دانيه دموعها ورفعت عيونها فوق وهي تقول:يارب..
بعدين ناضت مع صاحبتها ومشوا وقفوا في الطابور..
والاساتذه والابلات طالعين بش يحضروا الطابور واولهم جمعه..
اللي لما شاف دانيه وشاف ملامح وجهها الحزينه وعيونها الباكيات قلبه وجعه...وكان خاطره يعرف شن صايرلها...
•••••••°°°°°°•••••••°°°°°°•••••••
الساعه العاشرة صباحا..
خشوا الزوز للمصحه وواحد فيهم يتكلم والتاني يسمع فيه..
هيثم:غير جد عليا جديد ظرف خاص يعني خلاني نغير معاك الموعد..
احسان وهو يمرر في نظره ع المصح:مافيش مشكله اني اليوم كله شبه فاضي...ماشاء الله تغير تماما صيانته ممتازة..
هيثم:لكن مازال يبي..
احسان :اكثر من هكي مااظنش مازال فيه..
هيثم:مانقصدش المبنى والهيكل الخارجي..قصدي النظام..والكوادر..والخطط العلاجيه النفسيه بالذات..
احسان شبحله وقال:تتكلم وكأنك مدير المصحه..
هيثم ضيق عيونه وشبحله وابتسم بعدين رجع شاف القدام بدون مايعلق..
ابتسم احسان ...
كملوا طريقهم وسألوا موظف في المصح عن مكان وجود زياد..
قاله كلهم موجودين في المطعم يفطروا..
مشوا مع بعض غادي...
ولما وصلوا وقفوا في الباب لما شافوا "شو" جديد دايره فاتح..
...فاتح وهو واقف في مكان الراجل اللي يدير في القهوة:بعون الله اليوم ذوقوا قهوة عمركم ماشربتوا زيها..ونحلف بالله..
زياد كان يشبحله وهو مبتسم بتهكم..
خميس:قطاف العريان..
زياد شبحله وقال بضحكه:شني؟!
خميس:على فاتح قطاف العريان..يهدرز هلبه ويتفزلك هلبه ويدير في روحه يفهم في كل شي..وهو ماعنده شي..
زياد بضحكه:عجبتني التسميه..
خميس ضحك..
وقعدوا الزوز يتفرجوا ع فاتح كيف يدير في القهوة بتركيز..
إحسان:ريحتها تدمغ..
هيثم:فعلا...
........
زياد:ريحتها مش عاديه..
خميس:ايه والله حتى اني دوختني..
..وطابت قهوة فاتح...
وبدي يصب فيها في الفناجين المحطوطات في سفرة..
بعدين خداها وطلع بيها من المكان اللي هو فيه وجاي بيمشي لزملائه..شاف هيثم ومعاه واحد واقفين فباب المطعم..
ابتسم ع جنب ومشالهم طول...
هيثم ابتسم...
مدله الصفرة وقال:ذوق وافهم..
هيثم فهم قصد فاتح من كلامه..خدي فنجان ورشف منه ..بعدين رفع حواجبه وقال..الله يبارك..
فاتح مد لإحسان وقال:تفضل..شكلك المدير جديد؟
ضحك احسان وقال:القهوة مرة؟
فاتح:ايه..
احسان؛نشربها حلوة ..
فاتح:اها..معناها المدير جديد قهوته حلوة..وجوه حلو..
هيثم بضحكه:هدا مالاش علاقه بالطب لمن قريب ولا من بعيد..هدا محامي..
فاتح:اها..والتفت لزياد..
لقاه يشبحلهم..
هيثم:ياريت تسمحلنا..
فاتح بضحكه:اه ايه..وسعله وقال..تفضلوا..
هيثم:شكرا..
ومشي هو واحسان وين ماموجود زياد...
وصلوا فيه...
هيثم:صباح الخير..
زياد وخميس:صباح النور..صباح الخير..
هيثم:زياد..هدا احسان الفيتوري المحامي..
احسان حط يده ع جبهته ورفعها تحيه لزياد..
زياد ابتسم وهو يتفحص في ملامح وجهه بنظره وهز راسه ردا ع التحيه....
.......في مكان فاضي في المصح.....
احسان:اممم..تمام...يعني تبي تقنعني انك مش مذكر شكل البنت اللي شفتها اكثر من مرة...
زياد:ماشفتهاش..
ابتسم احسان وحط يده ع كتف زياد وقال:شوف زياد..اني هلبه ناس قالولي ان عندي ميزه هي اللي خلتني ننجح في مهنتي...الفراسه..يعني في ناس نعرفها من ملامح وجهها وتصرفاتها بدون مانتعمق فيهم..وبهكي نعرف المذنب من البريئ ببساطه..وهلبه منهم قالولي مفروض ماوليت محقق لأنك حتنجح اكثر بهالميزة..كلامهم صح..بس اني فضلك المحاماه لان هالمهنه انسانيه اكثر...نقدر بيها ننقد مظلوم من بعد توفيق الله ...واني واثق ومتأكد انك بريء لكن فراستي بروحها يازياد ماتقدرش تثبت برائتك..زي مااثبتلي انك تكذب عليا لما قلت انك ماتعرفش شكلها..
زياد هرب بعيونه عنه وقعد ساكت..
احسان:اني هكي زدت احترمتك...ونبي نأكدلك يازياد مادام اني خشيت في القضيه هدا نعطيك وعد ربي شاهد عليه البنت هادي مش حيعرف حد عنها اي شي..
زياد قعد ساكت..
احسان:زي مااني وثقت فيك وفي صدقك نبيك حتى انت تبادلني نفس الشعور ضروري جدا يازياد..
زياد شبحله وقاله:باهي لو عرفت شكلها شن حنتسفيد لو هي مختفيه.!؟
احسان:انت عطيني المواصفات ومالكش دخل بالباقي...
زياد تنهد وشبح القدام وقاله:طويله..مش سمينه ومش ضعيفه...بيضا هلبه...وانيقه..وتبان اكبرمني يعني مش دفعتنا ولا الدفعه اللي قبلنا..متوقعها في السنوات الاخيره...هكي يبان عليها..وع مانعرفه الزفت هداكا انه يعطي في ماده لطلبة سنة خامسه..
ضيق احسان عيونه وقال:حلو..حلو..باهي مافيهاش ميزة شي يميزها..
زياد قعد ساكت شويه بعدين قال:عيونها حور..
احسان:جميله ع هكي..
زياد شبح لإحسان برفعة حواجب..
احسان ضحك وقال:مانتغزلش فيها ماتفهمش غلط..بس لإثبات شي في بالي قلت هكي..
زياد:فهمت عليك..ايه نظرات الديوث هداكا ليها استفزتني هلبه وقتها..
احسان شبح القدام وقال:تمام..تمام...رجع شاف لزياد وقال..نبيك توا تتوكل ع الله..وتطمن بحول الله وقوته يازياد حنطلعك منها ونحط كل حد في مكانه الطبيعي..
زياد شبحله وابتسم وقال:ان شاء الله..
احسان بإبتسامه:قالي عندك معرض بديره هني اخر الاسبوع..
زياد:هو هكي يبي واني ماقلتش لا..
احسان حط يده ع كتف زياد وقال:احمد ربي ليل نهار اللي عندك اب زي هدا...هلبه من اللي قاعدين هني يتمنوا هالنعمه اللي عندك..
نزل زياد عيونه اللي تعبوا دموع وقال بإبتسامه:الحمد لله...
🍁🍁🍁
وطلع احسان من المصح..طول للجامعه..
تحديدا لكلية الطب...
وتوجه طول لمكتب العميد..
قعد معاه ساعه وهو يتكلم معاه حول القضيه..
بعدين سأله عن طلبة السنه الأخيره وهل في منهم حد غاب عن الامتحانات.. ولو في شن سبب غيابه..
العميد وهو يشوف للاب توب:في 5...
طالبه اسمها وجدان علي عبدالله...سبب الغياب...عارض صحي..وطالبه تانيه اسمها..
رنيم محمود رزق....هادي جتني امس ومعاها بوها وكان عذر غيابها عن الامتحان ظرف خاص..
احسان:اللي هو..
العميد:تعب نفسي ممكن خوف من الامتحانات خلاها تتوعك فتره الامتحانات..
احسان:شن اللي خلاك تتوقع انه تعب نفسي..
العميد:بوها لمح بشي زي هدا والبنت كان واضح عليها انها مش تمام من هالناحيه..كانت طول الوقت ساكته وماتكلمتش الامرة وحده..ع الغالب صايره معاها مشاكل عائليه..
احسان قعد يفكر وهو مضيق عيونها بعدين قال:الطلبه هادم يدربوا في المستشفى ولا؟
العميد:ايه...في مستشفى بشير السعدواي العام...
احسان:اها....ابتسم وقاله..ع العموم مشكور جدا ع تعاونك حضرة العميد...
العميد بضحكه:حني تحت امر الحكومه..
احسان ابتسم وقال:حني اللي في خدمتكم..
....كان مفهم العميد انه مفوض من مركز الشرطه لغرض ما في نفسه.....
🍁🍁🍁🍁
ومن الجامعه..
تحرك طول للمستشفى...
وقعد يدور فيها ع رنيم....
ماسأل حد عنها...كانت في باله المواصفات اللي حكي عنهم زياد..
وع قد مادور مالقاش بنت بهالمواصفات..
لعند ماوصل في اخر واحد من الممر اللي يفتح ع ممر فيه رواشن مطله ع الخارج..
شاف وحده واقفه بروحها ع واحد من الرواشن..
ركز ع جسمها اللي كان يهز...مبين انها ياتضحك ياتبكي..
قدم القدام بخطوات هاديه..
لعند ماوقف ع الروشن جنبها بمسافه وشافها...
كانت تبكي..
هي حست ان في حد واقف حداها ..
شبحت جنبها شافاته...
هو طول سألها:رنيم رزق؟..
هي شبحتله شويه ونظراتها كانت نظرات استغراب ممزوجه بالخوف..
هو عاود السؤال:دكتورة رنيم..
هي شكت فيه وزادت خفت..
وخرت خطوه بعدين لفت ومشت بسرعه..
هو لحقها وقعد يقول:لوسمحتي اوقفي..اسمعني بس..اني جاي نتكلم معاك مش اكثر....انتي غير اسمعيني قبل وبعدين قرري...دكتورة رنيم..
هي زادت سرعت مشيتها..
وهو زاد سرعتها لين سبقها وجي قدامها..
احسان:مستقبل وليد قاعد ماخشش العشرين مربوط بكلمه منك..اني قدام ربي المسؤوله الوحيده عن ضياع مستقبله..
مشت وخلاته وهي تجري من الخوف..
وهو لحقها...
لعند ماتصادفت مع شباب قالتلهم بخوف: زودوله هدا يلحق فيا ويناشب..
واحد منهم قال:تي تحشم ع وجهك ياراجل..
احسان شبحلها بإزدراء:قصدك طلعتي هكي انتي! والله ماتستاهلي...
:توكل خونا توكل ماتخليناش نطلعوك من هني بلاقدر..
هو رفع ايديه وغمض عيونه وهو يقول:خلاص..
بعدين فتحهم ولف ومشي...
ورنيم واقفه تشبحله ودموعها ينزلوا..
هو التفت شافلها وقال بصوت عالي:مادامك هكي عمرك لاحتشوفي راحه ولانوم...
هي لفت وهربت تبكي...
والشباب قعدوا يهزبوا في احسان لين ادرق من قدام من عيونهم..
...طلع احسان من المستشفى....
فتح باب سيارته وقال :نخلوها لبعدين..توا بنلهى في الوافي...
وركب سيارته...شغلها...وتحرك....

....يتبع....