البطل المغمور "شمس الغروب"

الجزء الثاني والعشرين القسم الاول

💐...
الثانيه بعد منتصف الليل..
في الفيلا اللي يسكن فيها مالك ومعاه زياد..
ولأنها ليلة خميس...
كانت بالنسبه لأهل الهوى ليلة أنس المباح فيها كله حرام..
وزي مانقولوا بالعاميه ليلة هياجه وجو مليح..
خمر..ع بائعات هوى..ع كل موسيقى صاخبه وغناء..
ع كل مايذهب العقل ويدمره...
وحل...غارق فيه زياد لوذانه..
بعد ماخدي الحبه...اللي اذهبت عقله كعادتها..
غاص في الحرام كله ..كله بدون استثناء...
🥀هلبه ممكن يستغربوا..كيف ممكن لزياد اللي تربي في عيله محترمه متدينه ع يد مربيه فاضله زي اسيمه..كان يأدي في كل فروضه الدينيه..كان بعيد كل البعد عن اي شي محرم..ينتكس هالانتكاسه..ينقلب حاله بهالشكل!؟
الجواب بسيط وساهل..
في واقعنا الحالي توا لو دورنا حنلقوا هلبه امثال زياد..
بل غالبا حنلقوا ماهو افضع..نلقوا شيخ حافظ كتاب الله تربى في عيله متدينه..وكذلك طالب علم شرعي..يمارس في كبائر الذنوب..وفي وسط بيت الله يخي..
هني العقل يوقف...والسؤال الوحيد اللي يقعد خاطر ع بالنا طول الوقت..كيف حافظ كتاب الله ويدير هكي!!؟
معقوله مأثرش فيه القرآن!!؟
ايه مأثرش فيه..لأنه كان حافظ حفظ في عقله مش في قلبه..
ماتخلقش بيه..ماترباش عليه...والوسط اللي يكون فيه واخدين الدين مجرد شكليات ومظاهر..
تقصير ازار...اطلاق لحيه..سواك في الفم اربعه وعشرين ساعه...كتب علم شرعي معبيه الحوش..خمارات وملايات..
وطول الوقت مشغلين قرآن في الحوش او دروس شرعيه..
ولو فتشنا داخلهم..نلقوا القلوب خاليه تماما من الدين الصحيح..
والأخلاق مالهاش وجود تعاملاتهم مع الناس...
لهدا بالساهل جدا ناس زي هادي تنحرف وتنقلب ع عقبيها..
لأن رصيدهم الديني في قلوبهم صفر..
والاخلاقي كذلك صفر...
بالعودة لحالة زياد..اللي كان يعشق امه عشق ويدير ع خاطرها كل شي..
نقولوا ان دينه كان معلق بيها واخلاقه كذلك..لهدا لما رحلت عن الدنيا رحل كل شي معاها...
يعني ممكن اسيمه ماقدرتش تغرس بعض المبادئ غرس في قلب زياد..
عكس ماصار مع سارة..
ممكن لحرصها ع تربية سارة اكثر من زياد بإعتبارها بنت والخوف عليها اكبر..
او ممكن لأن زياد كان ولد مطيع..ويدير في كل شي علمتهوله لهدا هي فهمت انها نجحت في غرس المبادئ في قلبه..
او ممكن لأن تربية الولد غالبا محتاجه للأب والأم مع بعض..
بالذات اللي زي شخصيه زياد..متمردة غالبا...
هادي كلها اسباب واردة للانتكاسه اللي صارت لزياد..
مع الاخد بعين الاعتبار ان زياد فنان..والفنان حساس جدا..
والنوعيه هادي من الناس حالتهم النفسيه تتحكم فيهم هلبه...🥀
🍁وحال الولد...
اللي مايندريش الأب ع تفاصيله..بل شاف منه مجرد علامات لااكثر..خلاته في حالة يرثى لها من القهر والألم والحزن..والعجز..
قاتل الله العجز....
كان هيثم فهديكا الليله متكي في فراشه ويفكر...
كيف يقدر يلقى ولده؟..
وكان لقاه على أي حال يلقاه؟
ولو لقاه بحال اسوء من المتوقع كيف يقدر يصلحه؟!
هو وزياد ولامرة كانوا على توافق..الولد نافر من الأب..
واذا كان نافر منه كيف يقدر يقرب منه ويخلي ولده يتقبله !؟
بالذات وزياد في عمر جدا صعب..كيف يقدر يتفاهم معاه ويرده للطريق الصح قبل مايضيع منه!؟
وقعد هيثم يتخيل في هلبه سيناريوهات سودا..
ومسيطرة على عقله قصة خو رضوان بوكراع..
وتخيل لو تكون نهاية زياد زي نهايته..
مجرد ماتخيل هالشي..مسح ع وجهه بقوة...
بعدين زفر...وقال..يارب..يارب لا..يارب..يارب..شبح فوق وقال..ماتعاقبنيش بيه يارب..
نزل عيونه وهو يشبح القدام ودموعه ينزلوا وهو يقول..يارب..يارب....
•••••°°°°°••••••°°°°°••••••
جهرا دعوتك ياكريم وخفية...
رفق بعبد تائب يتألم..
أعلم بأني مذنب لكنك...
مني بذنبي ياإلهى أعلم....
كلمات الانشودة هادي كان يسمع فيها خليل وهو متكي في سيارته..
صدفه فتح الراديو جت قدامه..
كان خليل خلال الايام اللي فاتوا في حالة حزن ومراجعة نفس خلاته ينعزل عن عيلته وعن خدمته ..
كان يبي يقعد مع روحه..ويرتب كل اوراقه..ويعرف كيف يعيش حياته وهو ثابت ع توبته...
يتجنب اي شي ممكن يرده للمربع الاول..
يعني بإختصار..خليل كان يهيء في نفسه لحياة جديده..
مطلوب منها فيها يتخلى عن هلبه عادات عاشت معاه عمر..وهالعادات لازم يخليهم كلهم لأنهم ممكن يردوه لما كان عليه..
وكذلك..كان يبي يتجنب يظلم أي حد خش حياته...
ساده ماظلم من قبل...
وتوا يبي يزاحم سيئاته بالطاعات..
يعني لازم يتقي الله في كل حد يعرفه...
واولهم...ملاك...
اللي كانت تتصل بيه مرارا وتكرارا...
واخيرا قرر يرد عليها..
خليل:السلام عليكم..
ملاك بقلق:وعليكم السلام خليل وينك !!؟
خليل:علاش شن في صايرة حاجه!؟
ملاك:لالا بس خفت عليك..
خليل تنهد وقال:لو سألتي امي عني راهي قالتلك اني وين..
ملاك بلعت ريقها وقالت:سألتها وقالتلي..بس اني نبي نطمن بروحي..
سكت خليل..
ملاك تنهدت بضيق وقالت:خليل..لأمتى بنقعدوا هكي؟
خليل تنهد وقال:اليوم العشيه وتي روحك والبسي لبس كويس محترم..بنجي نطلعك نهدرزوا شويه..
هي ابتسمت بفرح وقالت:حاضر..
خليل:خلاص بري ارقدي.
تصبحي على خير..
ملاك بنبرة فرح:وانت من اهله..
خليل:السلام عليكم...وصكر..
بعدين نزل تليفونه...واتكي ع كرسي السيارة وهو يشبح من ورا مرشها القدامي للسمي اللي كاسيها اللون الأسود ويدوب باينه فيها شوية نجوم...
وبدي يغني...
مولايا..قد نامت عيون..وتيقظت ايضا عيون..
نامت عيون الخائنين..وعين نجمك لاتخون...
نزل عيونه وشبح للمسجل..صكر الراديو وفتحه وكان فيه سيدي شاريه مؤخرا فيه الأنشوده هادي بس..
اللي كانت تخلي اللي يسمعها يسرح في عالم تاني...
مولايا قد نامت عيون..وتيقظت..ايضا عيون..
نامت عيون الخائنين..وعين نجمك لاتخون...
ترنو إلينا وهي ساهيه عن الدنيا الخؤون
اتراه اذهلها جلال الله أن مر القرون..
أم ان من فوق الثرى..لايسمعون ولا يعون..
ويح نفسي أفلم ترى وهي ترصف في سجود...
....ومن بين العيون اللي كانت نائمه...
عيون هيثم..اللي غشيه النعاس وماقدرش يقاومه من التعب..
لكن لعل هالنومه ماكانتش من تعب...
بل بريد يوصل رسالة ما...
......
في مكان كله ظلام...كان ماشي وفيده مصباح صغير قديم "كيروسين" كان يمشي ويدور وينادي...زياد..
مافيش حد يرد على ندائه..
وهو تابع ينادي.."زياد"..ومامن مجيب..
لعند ماسمع اصوات لأطفال يأنو آنينهم كان موجع..
مشي بالمصباح متاعه وهو ينادي"زياد" ويتبع في صوت..
لين بدي يقرب منه..ووصل فيه..
قرب المصباح من مصدر الأصوات..
لقاهم اربعه اطفال مطروحين ع الارض ويأنوا من الوجع..
وهو واقف يشبحلهم..
لما دقق بنظره ع واحد منهم..لقاه ولده زياد وهو في عمر قريب من عمر الاطفال اللي معاه من 6 لسبع سنوات..
...فتح عيونه...
مرر نظره قدامه..بعدين ناض قعمز وهو عاقد حواجبه متسائل..
هيثم:الصغار التلاته التانيين شايفهم حتى هما لكن وين؟!
《 المراة:اني مانبي منك شي..غير انك اطلع راجلي من الحبس ع خاطر هالصغويره..
هيثم بآستغراب:نطلع راجلك من الحبس!؟هني وزاره الصحه مش العدل اختي..
المراة ودموعها ينزلوا:اني..مرت الراجل..اللي دار الحادث مع المرحومه مرتك..
المراة بتوسل:ع خاطر هالصغويره..والله ماكان يقصد والله..بالله عليك مالينا حد غيره بعد ربي.ع خاطر هالوليدات..》
رفع حواجبه وتوسعوا عيونه وهو يشوف قدامه بصدمه..
شويه ورفع عيونه فوق...
بعدين غمضهم بشده...وتنهد بحرقه...
"الله أكبر...الله أكبر"
فتح عيونه وشبح القدام...
"الله أكبر...الله أكبر"
بلع ريقه وقال بصوت شبه هامس:الله اكبر..الله اكبر...
🍁🍁🍁🍁
أشهد أن لاإله إلا الله...أشهد ان لاإله إلا الله..
يردد خليل وهو ماشي للجامع في الآذان ورا المؤذن..
وهو يتنفس في هوا الفجر الصافي النقي اللي يرد للقلب الحياة..ويشرح الصدر..
بعد ماتم الآذان...
خليل:لااله الا الله وحده لاشريك له له الملك وله الحمد وهو على كل شيء قدير...اللهم صل وسلم وبارك على محمد وعلى آل محمد..
اللهم رب هذه الدعوة التامه والصلاة القائمة آت محمد الوسيله والفضيله وابعثه اللهم المقام المحمود الذي وعدته..
وقف وغمض عيونه وقال من قلبه"يارب ثبتني يارب وساعدني ندير الصح ديما يارب"
فتح عيونه وتنهد..بعدين كمل طريقه...
وراه...ع بعد مسافه لابأس بيها...كان هيثم ماشي بطريقه للجامع...وكانت هادي المرة الاولى اللي يمشي فيها للجامع مشيا ع الأقدام..
كان حاس روحه محتاج يمشي..ويشم هوا نظيف..بالك يرتاح شويه..
قعد يمشي ويمشي..
لين وصل للجامع...
خشله...
وكمل طريقه للباب الداخلي وحواليه شويه من الناس جايه تصلي..
رمي كندرته..وخش للجامع..
ومشي طول بش ياخد مكان يصلي فيه تحية المسجد..
لما وقف في مكان  وبيبدا يصلي..شاف قدامه ع اليمين خليل راكع..
رفع حواجبه بعدين نزلهم..بعدين غير عيونه لمحل سجوده ورفع ايديه لورا اذنيه...وقال:الله اكبر..
.....فهالوقت..
كانت نسيبه في دار بنات خوها كيف كملت صلاة الفجر...
بعد سلمت شبحت جهة بنات خوها وهما راقدات حدا بعض..
وتذكر في اللي صار في ليلة امس..
نسيبه"اكيد عرف شي عن زياد خلاه فهالحاله"..
تنهدت بقلق بعدين شبحت القدام وقالت:يستر الله..
.....وفي الدار اللي قدام دار البنات...
كانت سارة مقعمزة في سريرها تدعي وتبكي بوجع....
اللي صار في الليل ماخلاهاش ترقد..حست بخيبة امل كبيرة بعد ماشافت تصرف بوها مع خواتها..
كانت اكثر وحده فرحانه بالتغيير اللي طرأ على بوها..لكن اللي صار امس..صدمها...وخيب املها فيه..
••••في الوقت اللي كان فيه بوها....
يصلي ورا الامام وهو يسمع فيه يتلى في آيات القرآن بصوت خاشع...
¤واصبر وماصبرك الا بالله ¤
دموعه عبوا عيونه...وقعد يسمع في باقي الآيات لين وصل في القراءة ل...
¤إن الله مع الذين اتقوا والذين هم محسنون¤
الله اكبر..
ركع الإمام...والمصلين ركعوا وراه ومن بينهم هو وقاعده اخر آيه تتردد ع مسامعه...
لعند ماتمت الصلاه وهو يفكر في اخر ايه..
والمصلين بدوا يطلعوا واحد ورا التاني...
وخليل ناض ومشي لواحد من المصلين في الصفه الأماميه..
وقف عنده وقال:شيخ..
الشيخ التفت ورفع راسه فوق..وقال:من خليل!
هيثم استاقظ وشبحلهم..
وقف الشيخ ٠وحضن خليل وهو يقول:مرحبا بمسك الختام..
ابتسم خليل وهو يقول:شن حالك وحال صحتك..
الشيخ :الحمد لله على كل حال..
خليل:الحمدلله..قعمز ياشيخ قعمز..
قعمز الشيخ ومعاه خليل...
الشيخ:كيف حالك انت وحال التوبه معاك..
خليل بإبتسامه:الحمد لله..باهي اللي ريتك توا قبل كنت نجيك الحوش..عندي سؤال..
الشيخ:تفضل اسأل..
خليل تنهد وقال:ياشيخ..المده اللي فاتت في واحد قالي اللي ماكانش يصلي وبعدين تاب ويولي يصلي لازم يقضي صلاته.. اني الحق قلبي اطبق..كيف بنقضي صلوات 25سنه فاتت!؟
صعب هلبه..
الشيخ تنهد وقال:شوف ياولدي اختلفوا العلماء في الموضوع هدا..في من قال يقضيها..ومن قال التائب بتعامل معاملة اللي خش الاسلام جديد..الرسول قال"الاسلام يجب ماقبله" ومافي حد خش الاسلام قاله الرسول اقضي صلواتك اللي فاتت..
وحتى التائب..عن عائشه رضي الله قالت انها سمعت الرسول صلى الله عليهم وسلم يقول"التوبه تجب ماقبلها"
لهدا في علماء افتوا انه تارك الصلاة عمدا..مايقضيش اللي فاته من صلوات..لكن لازم يدرك مافاته من اجر بالنوافل..
واني نرجحلك الحكم التاني..هو انها لاتقضى....
ولو تبي تدرك مافاتك من اجر..تمسك بالنوافل اللي هما..
2قبل الفجر...و6 في الظهر 4قبله واتنين بعده...
العصر ماعندهاش نافله...المغرب زوز بعده..والعشاء زوز بعده..
ورب العالمين قال في حديث قدسي"ومازال عبدي يتقرب الي بالنوافل حتى احبه"
ورسول الله"من صلى اثنتي عشرة ركعة غير الفريضه بني له بيهن بيت في الجنه"
وبيوت الجنه البلوك متاعها فضه وذهب..والجنه..ضحك وقال..جنه عاد غير اسمها ساد..
ابتسم خليل براحه وقال:ربي يوصلنا ان شاء الله..
الشيخ:آمين ياولدي آمين..
خليل تعكرت ابتسامته وهو يقول:غير ادعيلي شيخ ربي يقويني ونتحمل همز ولمز الناس وكلامهم..مازال قاعدين يتجنبوا فيا..ونفس النظرة قاعده هي هي ليا في عيونهم..
الشيخ:انت تبت ع خاطرهم وع خاطر خالقهم؟
خليل:اكيد ع خاطر ربي..
الشيخ:خلاص تريح..مادام توبتك لله مايهمك حد غير هو الباقي كله زايد..
خليل هز راسه بإيجاب وهو يشوف لصوابعه اللي مشبكهم في بعض..
طبطب الشيخ ع كتفه وناض وهو يقول:اعانك الله ياولدي..
خلينا نشوفك وامتى ماتبي تعال للحوش مرحبتين بيك في اي وقت يامسك الختام..
ابتسم خليل وقال:ان شاء الله..
الشيخ بإبتسامه:السلام عليكم..
خليل:وعليكم السلام...وقعد معاه بعيونه لين طلع..
بعدين تنهد وناض وقف..
جو عيونه ع هيثم اللي كان مقعمز يشبحله..
ابتسم هيثم لخليل..خليل ردهاله بتردد..
ناض هيثم وقال:مروح..
خليل وهو متفاجئ:ايه..
هيثم بإبتسامه:نتسايروا؟
ابتسم خليل وهز راسه بالموافقه..بعدين قدم لهيثم..
مد يده بيصافحه وهو يقول:كيف الحال..
هيثم صافحه وقال:الحمد لله..كيف حالك انت..
خليل:الحمد لله..
ومشوا الزوز للباب مع بعض..
لبسوا في رجليهم...
ومشوا مع بعض وطلعوا وهما ساكتين..
لعند ماقطع هيثم الصمت وهويقول:مبارك..
خليل ابتسم وقال:الله يبارك فيك..
هيثم:امم..شن حال الوالد؟.
خليل تنهد وقال:الحمد لله ماشي حاله..
هيثم هز راسه وقعد ساكت..
خليل:شن حال بنتك ريحان..
شبحله هيثم وقال:الحمد لله كويسه..
خليل:باهي الحمد لله...لتوا قاعد بين عيوني منظرها يوم تعبت..الدكتور قال لازم تغيرولهم جوهم بش تتعدل نفسيتهم..
هيثم "كان معاهم هو!؟":امم..ايه مزبوط..بس تجاوز محنة زي محنتنا مش ساهل..
خليل:اكيد..ربي يساعدنا جميعا كل نحاولوا نتجاوزوا المحن ونكملوا حياتنا..
هيثم هز راسه وقعد ساكت..
ورجع الصمت سائد بيناتهم...
وماينسمعش الا صوت هيثم لو فات حد سلم عليه..
وكانوا يتجاهلوا في خليل..
وهيثم ملاحظ هالشي واذكر الكلام اللي صار بينه وبين الشيخ عن نظرة الناس ليه..
وصلوا بحدا الورشه..
خليل:السلام عليكم..وجاي بيمشي يفتح الورشه..
شده هيثم من كتفه...شبحله خليل بإستغراب..
خليل ابتسم وقال:عندك علم من دون خوتك ومن دون شباب المنطقه انت الوحيد اللي كنت عاجبني ولازلت..
ارتسمت ع وجه خليل ملامح المفاجأة..
نزل هيثم يده وهو يقول:وكنت نكنلك الاحترام وتوا زاد اكثر  من قبل .
خليل وهو متفاجئ:بارك الله فيك دكتور..
هيثم بإبتسامه؛فيك بارك الله..بس نبي نصيحه..نظرة الناس ليك ماتخليهاش في قائمة همومك حتى مادامك ماشي صح..الناس راهم بشر ناقصين زيك زيهم بالزبط..وكل واحد فيهم عنده من الذنوب ماساده..ممكن انت تكون احسن منهم هما عجبتهم روحهم لما قارنوا ارواحهم بيك واستخفوا بذنوبهم وزكوا انفسهم..ومافي حد يقدر يزكي نفسه على الله..وانت ربي فتحلك عيونك لما شافك نادم وتبي تصلح من نفسك..لهدا ييسرلك توبه وتبت..
ارتسمت ع وجه خليل ابتسامه تعجب من الكلام اللي يسمع فيه..
هيثم تنهد وكمل يقول:اني مش خير منك..غير ربي ستر القبيح وطلع الباهي..والناس ماليها الا الظاهر وهني اكبر علامه لنقص الانسان..هدا علاش نقولك..خل همك نظرة الكامل..وفوت نظرة الناقصين..فهمت عليا؟
خليل هز راسه بإيجاب وقال وهو مبتسم:فهمت..
طبطب هيثم ع ذراعه بعدين مشي وهو يقول:السلام عليكم..
خليل وهو يشوفله بنظرات امتنان:وعليكم السلام..
▪▪▪▪▪
◇صبح هداكا اليوم..خديت طاقه عاليه..حاجات ورا بعضها درتها كانت سبب كبير في اني نحس...نحس هكي بشي مريح..راحه..سعاده..ايه سعاده..كنت سعيد يومها ومليان طاقه وحيويه عكس حالتي قبل لنمشي للجامع..هدا علاش اول حاجه درتها لما خشيت الحوش ومشت لداري..خديت المفكره متاعي وكتبت ع وحده من صفحاتها...صلاة الفجر..
▪▪▪▪
حط المفكره ع الطاوله..
وخدي نفس عميق..بعدين بدل ملابسه ولبس توته لاشتويه ولاصيفيه...وطلع من الدار...
وبدي بالعاده اللي ماقدرش يخليها..التسبيح...
قعد يسبح لين وصل للكوجينه..
حط ايديه في نصه..وقعد يمرر في نظره عليها وقال:نحاولوا...
ومشي طول للثلاجه..
قعد حوالي نص ساعه وهو يقربع..
وصوت تقربيعه نوض سارة..
فتحت باب دارها وطلعت ومشت للكوجينه..
لما وصلت فيها وقفت في مكانها..
لقاته واقف يصب في الفروبي من الخلاط للمالقي"الكاس"
وشافت الطاوله عليها صواني فطور..
وخرت وطلعت وهي مستغربه..
ع جية نسيبه:صباحو سارونه درتيلنا فطور..
سارة حركت راسها بالنفي..
رفعت نسيبه حاجبها وقالت:مالا مني اللي والع الخلاط من الفجر!؟.
وخشت للكوجينه..
هيثم وهو يحط في الشاهي شافها قال:صباح الخير..
نسيبه وهي مدهوشه:صباح الفل والياسمين..مشتله وهي تقول..هدا كله درته انت بروحك!؟.
هيثم وهو يشوف للطاوله:ايه....
نسيبه ابتسمت وقالت:عطيك الصحه يادوك..خل نمشي نوض الكعبورات..
هيثم:لالا خليك اني تو نوضهم..
ومشي طول طلع وقف في الباب لما لقي سارة واقفه جنبه..
هيثم:صباح الخير .
سارة وخرت شعرها ورا وذنها وقالت بتوتر:صباح الخير..
هو تنهد ومشي لدار البنات..
وهي فضولها خلاها تلحقه..
وصل في الدار خش..
لقاهم الزوز راقدات ع سرير واحد..
فكر ينوضهم بطريقه ماتكونش باردة وعاديه..
حك حاجبه بعدين حط ايديه في نصه..
شويه ونزل ايديه وجاههم..طبس عليهم..
وقرص خدودهم بخفه واستمرار وهو يقول بصوت متوسط:ريحان..جنان...
هما بدوا يتحركوا..
وهو مستمر في قرص خدودهم وهو يقول:جنونه ريحونه..
ابتسمت ساره وهي تشوفله من حافة قوس الباب..
فتحوا عيونهم وشبحوله..
هو ابتسم..
وطبس ضمهم الزوز..
وهما ماصدقوا حضنهم..حضنوه بايديهم الصغيره بكل قوة وكل وحده فيهم تقول:بابا..
هيثم باسهم من خدودهم بعدين شبحلهم وقال:اسف..
هما الزوز ابتسموا بسعاده وناضوا مع بعض وكل وحده باساته من خد..
قعد يضحك..
وسارة تشوفلهم بإبتسامه حب ممزوجه بالغيره..
هيثم قعمزهم بعدين قعمز ع رووس صباعه قدامهم وقال:اليوم جو حلو..شن رايكم نمشوا نتغدوا في جردينه حلوة ونظيفه..
ريحان:ونمشوا للملاهي بعدين ..
جنان:ايه ايه بابا..
هيثم بإبتسامه:حاضر..ع عيني وراسي..
هي نوضوا..ووقف ع حيله وقال:اغسلوا وجوهم ونشفوهم وتعالوا للكوجينه..
الزوز مع بعض:باهي..حاضر..
ومشوا يجروا ورا طلعوا من الدار..
وهو لحقهم وقال:بالشويه...
🌹فطروا في جو عائلي حلو..ماسكتش صوتهم طول ماهما قاعدين..الوحيده سارة..قعدت ساكته وهي تراقب في بوها..
••••••°°°°°°•••••••°°°°°•••••
الساعه الحادية عشر صباحا...
"والله خايفه عليها هلبه..لكن عادل مريحني"
ماجده:كلكم تقولوا باهي الا اني لأنه صاحب مجيد..
ضحكت سدينه وهي تقول:ماهو اني هدا اللي مستغربتله الراجل يبان هكي هادي وراقي وماشاء الله عليه شن جابه لمجيد!؟
ماجده:واتي هدا اللي مخوفني..
ضحكت سدينه..
ع خشة دانيه قالت:شن الغدي ياحريم المجدوب..
ضحكوا الزوز..
ماجده بضحكه:بازين يابنت المجذوب..
دانيه :الله! احلى حاجه..
ع خشة مجاهد:بالله دنون مشيلي ع سوريتي..
دانيه:من عويناتي...وطلعت بسرعه..
مجاهد ابتسم وقال:شن الغدي؟
سدينه بإبتسامه:بازين..
مجاهد:تمام..وكيف جاي بيطلع وقفاته امه وقالت..
سدينه:مجاهد..
التفت وقال:نعم!
سدينه:وليدي..مازال مش ناوي..
مجاهد بإستغراب:شنو؟.
ماجده طلقت اللي فيدها وقالت:الزيزة الزيزة..
ضحك وقال:اها..لالالا..مازال..
سدينه:راك قريب تخش التلاتين نهاري لامتى بتقعد تأجل..اقل شي اخطب بس..
مجاهد:يام حكينا فيه الموضوع قبل وقتلك بعد نولي واتي  تو نتزوج....وبش نريحك اني حاط في بالي وحده..لكن مازال قاعدن صغيره على ماتكبر وتكمل قرايتها اني نكون واتي بإذن الله..تمام هكي حبيبتي؟!.
سدينه بفضول:من هي!؟
مجاهد بضحكه:تو تعرفيها في الوقت المناسب..ولف ومشي طلع..
سدينه بتساؤل:زعمه من هي هادي؟!
ماجده وهي تقرض في البطاطا قالت بإبتسامه:تو يجي الوقت المناسب وتعرفيها ان شاء الله ماتستعجليش..
سدينه تنهدت وناضت بصونيه البصل المقرض وهي تفكر...
....في دار البنات....
"لالا كله عجبني"
عادل:باهي..ماقلتي شي بخصوص حكاية السفر؟.
رتاج:عادي لأي مكان..
عادل بضحكه:معاش تتحشمي يارتاج خليك منطلقه في حاجه في خاطرك قولي عليها نديرها..
رتاج ابتسمت وقالت؛توا ماخاطري في شي..
عادل ابتسم وقال:باهي على راحتك..خل توا بنصكر نوتي روحي للصلاة..وامتى تكوني فاضيه كلميني..
رتاج:ان شاء الله...مع السلامه..
عادل:في امان الله
وصكرت رتاج وتنهدت وهي تشوف للتليفون.
هي مرتاحه لعادل..لكن مقهورة ع حالها....مازال مش مستوعبه انها بتزوج بطريقه تخلي الناس تقول انها مدايرة شي بش بوها عطاها لواحد اكبر منها بعقود..
وهي للأسف رضت مجبرة لأن مافيش فيدها شي..
اللي مهون عليها شويه انها سلمت امرها كله لله..وهي عارفه ان ربي مايخيب حد سلم امره كله ليه..
...من جهة تانيه...
كانت دانيه طالعه من دار مجاهد تنادي:مجاهد...يامجاهد..
جاها وهو يقول:كملتي..
دانيه:ايه..
مجاهد:صحيتي يابطه..وخش..
هي ضحكت وجت بتمشي وقفت لما شافت رشيد خاش الكوجينه..
دانيه"زعمه نقول لمجاهد خير يديرله حل قبل يمشي؟باهي وكان جيت بنقوله..شن نحكيله بالزبط!؟ عليك موقف بايخ..تس تس مانقدرش ندوي معاه في حاجات زي هادي."
ومشت بسرعه لدارها...
•••••°°°°°•••••°°°°••••
الساعه الثانية عشرة والنصف..
توجه خليل لباب الحوش وهو يلبس في الكندرة..
ع جية رفيق وهو يقول:راجي يابرو..
شافله خليل وتفاجئ وقال:ماشي للصلاة؟.
رفيق بضحكه:ان شاء الله..
ابتسم خليل وهو يشوفله كيف يلبس في كندرته..
بعدين مشي للباب وقاله:هيا..
خليل حط يده ع ظهر خوه وقال بإبتسامه:هي..
ومشوا طلعوا مع بعض..
وعفاف واقفه في في اخر الممر تشوفلهم بإبتسامه وهي تقول:الحمد لله ياربي..
•••••°°°°°••••••°°°°°••••••
واقف ع روشن الدار يشوف للمئذنة الجامع البعيده وهو يدخن..
ع خشة صاحبه وهو يقول:بتتغدا..
التفت زياد وقال لعبدالملك:قولي الحق اول مرة ولا؟
عبدالملك:من لما نضت وانت تسأل فيا نفس السؤال..ايه اول مرة..
زياد لوح السيجارة وجاه وهو يقول:معاش بنسهر معاكم بندير جوي بروحي هني في الدار..
عبدالملك:برغم اني ولامرة جبرتك تجي تسهر معانا..لكن باهي زي ماتبي..هي انزل تغدا..
ومشي طلع..وزياد لحقه وهو مضايق ع الآخر لحقه..
••••°°°°°°•••••°°°°•••••
بعدصلاة الجمعه..
"هيا عمتي"
نزلت نسيبه وهي تجري في الدروج:هيا هيا جيت..
وصلت فيها وخدت منها حافظه وقالت:هيا..
ومشوا الزوز طلعوا من الحوش..
في السياره..
كان هيثم مقعمز القدام وبناته معاه من الخلف..
فتحت نسيبه الباب وركبت وهي تقول:ااه بسم الله..
سارة ركبت من الخلف هي تقول:سبحان الذي سخر لنا هدا وماكنا له مقرنين وانا الى ربنا لمنقلبون..
شغل هيثم السيارة وقال:قعمزي ريحان بابا بش نشوف كويس..
ريحان:حاضر بابا..
وقعمزت..
تحرك هيثم طول ..وطلع من الحوش..وهو يردد في سره..
"اللهم صل على محمد وعلى آل محمد"
نسيبه بضحكه:جبت معايا مش عاديه..
وطلعت من جيب شنطتها سيدي وقالت:مش حتصدق شن فيه هدا هيثومه...
ابتسم بإستغراب..
نسيبه حطاته في مسجل السيارة وهي تقول:زمان واني صغيره كنت نحبهم هلبه..
ولعت المسجل وبدت المقدمه الموسيقيه..
وقعدت نسيبه تميل  في راسها يمين ويسار معاها..
هيثم:اها ..هههههههه..زبطتها زبطتها..
ريحان وجنان قعدوا يشبحوا لعمتهم وع وجوههم ابتسامة فضول..
سارة بإبتسامه:حتى اني عرفتها..
وبدت الاغنيه ونسيبه تغني معاها..
بسم الله..بسم الله..احلى كلام تعلمناه..
بسم الله..بسم الله احلى كلام تعلمناه..
وقعدوا البنات يسمعوا فيها..وسارة ونسيبه يغنوا معاها..
وهيثم يشوفلهم مرة مرة من المرايا وهو مبتسم..
شويه وبدوا البنات يغنوا فيها مع عمتهم واختهم..
وهيثم مستمع معاهم لأبعد حد..
▪▪▪▪
◇اول مرة نعرف ان البساطه حلوة..وان الانسان لما يعيش حياته بعيد عن حياة العمل والخدمه مع عيلته وصغاره يكون سعيد اكثر...برغم السعاده اللي حسيت بيها..كانوا في قلبي غصتين..الأولى غياب زياد...والتانيه غياب حبيبة عمري اسيمه اللي ياما تمنت تعيشني هالجو الحلو اللي اني كنت حارم روحي منه...
▪▪▪▪▪
...في الجردينه...
تغدوا غداهم...وهيثم طول الوقت منسجم مع هدرزة التوأم وعمتهم...وملاحظ سارة ملتزمه الصمت غالب الوقت وتشوفلهم بإبتسامه..
بعد ماكملوا غداهم ..تمشوا شويه في الجردينه...
وبعدين وفى هيثم بوعده للبنات ورفعهم لمدينه الملاهي...
في الدراجيح..
ريحان:بابا لقيت فكره بش يعرفوني في المدرسه..
ابتسمت نسيبه ع جنب وهي ادرجح في جنان..
هيثم برفعة حواجب:شن هي؟
ريحان:نقص شعري..
سارة وهي تدرجح:تقصي عينك..
شبح هيثم لسارة..هي ارتبكت ونزلت عيونها لوطا..
رجع شاف لريحان وقال:انتي ماتبيش شعرك يقعد طويل صح؟
ريحان:ايه..وجنان تحبه طويل..
جنان:صح بابا..
هيثم قعد ساكت شويه وهو يفكر بعدين قال:تمام..نسيبه كان تعرفي تقصي قصيلها..
نسيبه بضحكه:لالا مانعرفش لكن تو نرفعهم للمزينه في شارعنا مزينه كويسه ومحترمه..
هيثم:تمام ماعنديش مشكله..
ريحان صفقت بفرح..
وجنان ونسيبه يضحكوا..
اما هيثم ركز ع سارة اللي باين ع وجهها ملامح الضيق..
فجأة..آذن العصر..
هيثم تنهد وقال:هي نوضوا بابا..
ريحان:بتصلي؟...
هيثم:ايه...
وجاهم نزلهم من ع الدراجيح..
ريحان:بابا انتم كلكم تصلوا الا حني علمنا..
جنان:ايه بابا علمنا..
هيثم وقف ع حيله وشبحلهم الزوز وهويفكر..
كيف بيعلم بنات في عمرهم الصلاه!!؟
ع رنة تليفونه..
طلعه من جيبه وقال:لحظه بابا..
ومشي من حداهم يرد ع المكالمه وهما يشبحوله..
سارة:اكيد العمل..
نسيبه قعدت تشوفله وهو يتكلم حاسة ان المكالمه ليها علاقه بزياد..
هيثم:نبي كل شي يتم بسريه رجاءا.........بارك الله فيك........باهي الموضوع التاني شن صار فيه؟...............كويس كويس..ابعتلي العنوان...........مشكور جدا..بارك الله فيك....السلام عليكم...
صكر ولف شبحلهم...لقاهم يشبحوله...عقد حواجبه وقال:هيا..
هما مشوا بعدين هو مشي وراهم لكن عقله مش معاهم...
•••••••°°°°°°•••••••°°°°°°°••••••
الساعه الخامسه والنصف بعد العصر...
في وحده من الجرادين..
كان مقعمز هو وياها ع كرسي طويل..
هي تاكل في ذرة مشويه...وهو في جنبها يشبحلها..
خليل:ملاك..تعرفي اني نعزك ولا؟.
وقفت مضغ وشبحتله وقلبها يدق بقوة..
خليل:كنت نشوف فيك زي تهاني ومازال قاعد نشوف فيك زيها..
عيونها تعبوا دموع..
خليل تنهد وقال:عارف كلامي واعر عليك..لكن هدا الحق..اني مانبيش نظلمك يا ملاك..ملاك..اني قلبي مش خالي واظن انتي عارفه..ومانقدرش نكمل معاك حياتي وقلبي مع غيرك..هدا علاش...بعد مافكرت هلبه..قررت اني نطلقك بعد مانتفاهم ان ومولى الحوش اللي حدانا يأجرهولكم..تقعدوا فيه براحتكم اللي تبوه يوصللكم وحنقعدوا وراكم زي قبل..
تقوسوا شوارب ملاك..والدموع نزلوا..
شبحت القدام ومسحت دموعها برسغ يدها...
خليل بضيق:سامحيني ملاك..وصدقيني هكي خيرليك انتي اكتر مني اني..
هي هزت راسها وقالت بنبرة باكيه:باهي باهي..اللي تبيه ديره..شبحتله وقالت..لكن ياريتك غير بتحصل حاجه..عمرها ماحتشوفلك اخت الوزير ولاحترضى بيك لو وليت شيخ ع خاطرها..حتقعد ديما في عيونها خليل تاجر المخدرات ولد خالد..مش حتلقى وحده تحبك من قلبها وتبديك ع روحها اكثر مني اني..
خليل بحده:اني ماندورش في نظرة اخت الوزير ع قولتك ولارضاها...ايه صح نحبها ونتمناها..لكن كان ربي مش قاسمهالي مش حنولي ع تالياتي ع خاطرها..هادي حاجه..والحاجه التانيه..اني كلمت بأسلوب كويس مانبيش نجرحك ولانوجعك وياريت حتى انتي اديري نفس الشي..مانتخليش المعزة تنقلب كره ياملاك..
ملاك رشفت وقالت:باهي..باهي..خلاص..ناضت وقفت وهي تقول..نوض روح بيا..
تنهد بغضب..بعدين ناض وقال:نتحركي قدامي..
مشت قدامه وين جت جنب جردل قمامه لوحت الذره..
خليل بضيق:استغفر الله العظيم..
وصلوا في السيارة...وركبوا وتحرك طول....

....يتبع....

ملاحظه

الفتوى للشيخين ابن باز وابن عثيمين رحمهما الله