البطل المغمور "شمس الغروب"

الجزء الثامن

💐..
◇خلاص النوم طار بعد مكالمة الدكتور أحمد..
لقيت روحي تلقائيا حاط ع اسمها وضاغط ع رز الإتصال..
▪▪▪▪
كيف رقدت اسيمه وقتها..كيف جاها النوم..
لما رن تليفونها انفزعت وناضت طول شبحت لتليفونها لحظات..بعدين قعمزت وخداته من ع الكامدينو..
ضحكت ضحكه خفيفه بعدين فتحت الخط وردت..
اسيمه بإبتسامه:ماجاكش نوم؟
ضحك وقال:لا والله كنت راقد وغارق فالنوم يخي لكن قبل شويه جاني اتصال طير النوم ياسومه..
اسيمه وهي مبتسمة بإستغراب:اتصال شنو ان شاء الله خير؟!
هيثم بضحكه:حاجه زي الحلم ياسومه..حك جبهته وقال..مانبيش نسبق الاحداث..لكن واضح واضح هلبه من كلام الدكتور احمد ان اللي نفكر فيه صح..
اسيمه بضحكه:باهي قول شن قال الدكتور احمد وشن هو اللي تفكر فيه!؟
••••°°°°••••°°°°•••
《 الزواج مش لينا يارفيق مافيش حوش عيله يفتحلنا بابه حني..》
الجمله اللي قالها خوه..تتكرر ع مسامعه..ترن فودانه وهو يفكر فيها..
باهي هو عارف الشي هدا كويس لكن مش قادر يقبله..
هو بس يحب ومن وسط قلبه حب حقاني..حب خلاه يتمنى البنية اللي يحبها تكون ليه ويكمل معاها عمره..
بس حتى البنيه اللي يبيها هي نفسها يوم من الأيام صفعاته بكلام يشبه كلام خوه ويمكن بلهجة اقسى واقوى..
يقول ننساها..يضحك عليه قلبه ويقوله أنسى انك تنساها..
باهي شن هو الحل!؟
يقعد يحبها من بعيد وخلاص..يحبها بروحه..حب لافيه امل ولاليه مستقبل!!؟
باهي كان جي يوم وجي حد تاني وخداها!؟..
ناض قعمز ع السرير وهو يتنفس بسرعه من شعور الغضب اللي انتابه..
بعدين وقف..ومشي لباب داره فتحها وطلع..
مشي طول لدار الدروج وركب طول يجري وهو حافي..
وصل فوق..
خش السطح ووقف...
هبت نسمه مصقعه لفحت وجهه..
خلاته يغمض عيونه وياخد نفس عميق...ويطلعه وهو يزفر...
كانه يبي يطفي بيه نار قلبه..
بعد ماكرر هالعمليه تلاته مرات..
فتح عيونه..ومشي قدم للسياج..
وصل فيه ووقف عليه..اتكى عليه بمراقفه وضم كفوفه لبعض وقعد يشبح جهة حوش جيرانهم..
لدارها اللي فالدور التاني المطفي ضيها..
ارتسمت ع وجهه ابتسامه خفيفه وعيونه تلمع فيهم الدموع وهو يشوف للدار ويذكر في الكلام اللي صار بينه وبينها في المستشفى..
《 اني نقولك انت ماتقول شي..تبي تعرف قصدي من هديكا الحركه ولا!؟..نبيك تعرف من هي نوسه الكاتب مش نماذجك انت اللي يضحكوا عليها ولايكسرولها خشمها..》
ضحك نص ضحكه..بعدين تنهد من قلبه وضم شواربه لداخل بحسرة..
وقعد واقف في مكانه وهو يشبح لدارها وبس..
🌾ودور عقارب الساعه..
ساعه ورا ساعه لين طلعت خيوط الشمس واعلنت عن قدوم صباح يوم جديد..
رن المنبه اللي كانت دايراته هي نغمة سيارة اسعاف...
ناضت مخلوعه..وشبحت للتليفون وهو حداها ع الكامدينو بتفنيصه..
شويه بدت تستاقظ وهي تقول:اليوم جمعه!!..
ارتخت ملامح وجهها وغمضت عيونها بنفاد صبر وهي تقول:يانوسه ياجحشه يانوسه ياحمارة..فتحت عيونه وقالت:شن بيرقدني تاني!؟..
ارتسمت ع وجهها ملامح الإنزعاج ممزوجه بالتذمر وهي تقول:واااااك ياربي..واااك..
ناضت قعمزت..لمت شعرها فوق بفوضويه..
بعدين نزلت من ع السرير..
شافت للروشن..بعدين شافت للبالكونه..
تبتت نظرها عليها وهي تقول:خل نفتحها شويه وخلاص..
ناضتلها وهي تقول..كان نعرف بس شن فايدتها بلكونه تفتح ع حياش الجيران!كان نحصل عليه المهندس اللي صمملك الحوش ياهيثومه..
وصلت في البالكونه..حولت الستار وفتحتها..
وطلعت برا...شمت ريحة الصبح..
ومحلا ريحة الصبح تفتح النفس ع الحياة..
ابتسمت ووقفت وهي حاطه ايديها فجيوبها وقالت:احسن حاجه الجيران كلهم في سبات عميق خودي راحتك يانوسه..
غمضت عيونها وبدت تاخد في شهيق وزفير..
💓فهالوقت..
كان خليل راقد في دار الخزين اللي فوق السطح كان فيها فراش تمدد عليه في الليل وراح فالنوم..
فاق..لما سمع اصوات العصافير اللي كانوا واقفين في روشن الدار..
ناض وع وجهه ملامح النعس الممزوجه بالعصبيه وهو يقول:خلاص معاش لقيتو غير روشن الدار هادي..
وناض وقف..
وطلع من الدار..
حط ايديه ع وجهه وقعد يمسح فيه بعنف بش يصحصح..
بعدها نزلهم ومشي بخطوات ثقيله للسياج وقف عليه وشبح جهة حوش هيثم...
لقي نسيبه حاطه ايديها ع سياج البالكونه وهي دير في تمرين اشبه بتمرين الضغط..
لابسه توته رصاصيه في الأزرق تشبه لوحده من تواته..
والشعر ملخبط وحالته حاله ومرة مرة اطير فيه النسمه..
نسيبه:احلا حاجه ع الصبح....تحريك عظام وعضلات وهوا نظيف...وهدوء.......خلاص يانوسه تبتي المنبه ع الساعه هادي..واكتبي عليه....رياضه.....
طلقت السياج ووقفت ع حيلها ورجعت تاخد في شهيق وزفير..
تلاته مرات بعدين ضحكت وقالت:بعد نصلي ندير قهيوه ونقعمز هني شويه قبل تفيق زنقة السعاده..
مررت نظرها ع حياش الجيران لين تبتوا عيونها ع سطح حوش خالد..
بدت تتلاشى ضحكتها وهي تشوف جيهته..
هو لما شبحتله رفع حاجبه اليمين وهو مبتسم ورفع يده اليمين..واشرلها يحي فيها..
هي ضمت شواربها لداخل بغضب وغمضت عيونها بعصبيه..
بعدين فتحتهم وشبحتله بطرف عينها..
هو رفع حاجبه اليسار بعدين رفع يده اليسار وقعد يحي فيها..
شبحتله من فوق لتحت بعدين غيرت عيونها عنه وشبحت الجهة التانيه..
هو ضحك..
شويه طاحت خصله من شعرها ع عيونها اذكرت انها من غير حجاب..فنصت..
بعدين خشت طول داخل..
وهو يضحك بدون صوت..
وقف ضحك ورفع حواجبه لما لقاها طالعه وهي مغطيه شعرها بالستار اللي مدايرينه فوق باب البالكونه..
وحاطه يدها في نصها وهي تشبح الجهة التانيه برفعة حاجب..
نسيبه في نفسها"والله ماني خاشتها لين هو يمشي"
💓تتسبلي يانويسه راك...
وهو قعد واقف يشوفلها بضحكه..
وقلبه يرفرف في صدره من سعادته بهاللحظات...
يحس روحه انسان تاني معاها..انسان مرح فرفوش خفيف ماعنده فالدنيا هموم ولاغموم...
كأنه خليل نوسه وبس...
فجأة..
خشت عفاف السطوح بتجيب حشيشه حمرا من المخزن..
شافت ولدها واقف ع السياج ويبان يضحك..
تلقائيا ابتسمت بإستغراب ومشتله..
وهو مش حاس بوجودها نهائي..
لعند ماهي وصلت فيه وشافت وين يشبح..تفاجئت ع الآخر..
عفاف"هي هادي البنيه ياخليل!"
لما شافتها كيف واقفه ضحكت ومشت وقفت حدا ولدها وقالت؛صباح الخير يانوسه..
هو انصدم وقعد يشبح لأمه..
اما هي التفتت وفنصت عيونها لما شافت عفاف بلعت ريقها ورفعت يدها ونزلتها وقالت؛صباح الخير..
شبحت عفاف لخليل وقالت وهي عاقده حواجبها؛شن دير هني!؟
خليل حك لحيته وقال وهو عاقد حواجبه وعيونه لوطا :شي..بعدين رفع عيونه فيها وقال..تبي حاجه؟
عفاف بنفس النظرة:حشيشه حمرا من المخزن..
خليل سرق نظرة للبالكونه بعدين شبح لامه وقال:انزلي تو نجيبهالك..
ومشي طول للمخزن..
عفاف قعدت معاه بعيونها وهي شاده ضحكتها بعدين شبحت للبالكونه مالقتش نسيبه وشافت باب البالكونه مصكر..
ضحكت بعدين حركت راسها يمين ويسار وهي تقول:نوسه ياخليل! مانحسابه تعجبه المراة القويه..
مشت للدروج وهي تقول بشي من تهكم..نحسابه زي بوه يحب الضعيفه المذلوله..
وصلت فالدروج ونزلت..
شويه..
وطلع خليل من المخزن وفيده باكو حشيشة حمرا وهو يقول:عليك موقف قدام امي الزفت..
وصل فالدورج ونزل وحتى هو...
••••°°•••••°°••••°°•••••
الساعه الثامنه والنصف صباحا..
ياااه يامجوده شنو هدا معقوله امس معاناه وجري واليوم معاناة وجري راهو ليا يومين بس معاك !
مجيد:غير من قالك تحركي ولاديري حاجه بس ياعبمبرة انتي اللي تلحقي فالشقا..
ماجده شبحتله شويه بعدين قالت:ياخوفي من الندم..
مجيد حط ايديه ع كتافها وقال:ندم شني ياعبمبرتي بس في شن قصرت معاك اني؟!
بعدت عنه وناضت وقفت وهي تقول بنبرة إنزعاج:اسمع يامجوده لو بتقعد هكي هاد حيلي نفكر ننهيها حياتي معاك
ومشت من حداه لدار النوم..
وهو طول ناض وراها وقال:ياعبمبرتي غير راجي شويه اسمعيني جاي..
•••••°°°°
صبت في فنجان كبير قهوه وحليب وخداته والتفتت للطاوله في المطبخ وحطاته قدامه وقالت:هي اشرب هي..
رشيد:امي..
سدينه:شن تبي تاني..
طلع رشيد من جيب التوته متاعه باكو صغير لونه ابيض مرسوم عليه زهر الياسمين ومده لأمه وقال:خودي..
ضيقت عيونها بإستغراب وقالت:شن هادي!؟
رشيد:افتحيه وشوفي بروحك..وخدي الفنجان وشرب منه..
وهي تفتح في الباكو لقت شيشة عطره شكلها خماسي صغيره وهي راسها مربوطه بشريطة بيضا..شبحتله وقالت:ليا اني؟
رشيد:ايه اليوم عيد الأم..
ضحكت سدينه وهي متفاجئة وقالت:نجيه ياربي حبيب امه..
وجاته ضماته بقوة..وهو غمض عينه اليمين وقال:قتلتيني يام..
وامه زادت ضماته وهي تضحك..
🌾وماكانتش سدينه الوحيده اللي جتها هالمفاجأة ع الصبح..
"جنونه ريحونه تعالوا خدوا كيكه ماما"..
شويه وخشوا عليها هما الزوز..
كانوا مع بعض شادين حاجه...هي لما شافتهم ضحكت بإستغراب..
وقفوا عندها ومدوها..
هي خدتها منهم وعيونها عليهم..
كانت حاجه مغلفه بغلاف هدايه ومربوطه بشريطه وواضح ان هما اللي مغلفينها..
بدت تفتح فيها وهي تشبحلهم لعند ما بانت عليها شنطه يد مربعة الشكل صغيره لونها بنفسجي غامق..
ارتسمت ع وجهها ملامح الإنبهار وهي تقول:الله!!تهبل تجنن..
الزوز قالولها مع بعض:كل عام وانتي يا احلى ام في الكون..
اسيمه رفعت حواجبها فوق وقالت:في الكون!!
ع خشة سارة ومعاها نسيبه اللي كانوا يضحكوا..
وسارة تقول بضحكه:ومافيش احلى منك..
ضحكت اسيمه وهي تشوفلها..
جتها ساره وضمتها وقالت:بطول عمرك سومتي
اسيمه بإبتسامه:حبيبتي
بعد سارة وقالت:طبعا اني ماعرفتش نجيبلك حاجه من قدرك ماما لكن فكرت نفرحك بطريقة تانيه..
طلعت من جيبها ساعه قديمه شويه ومدتهالها..
حطت اسيمه يدها ع جبهتها وهي تقول:كل مانجي بنصلحها نلهى مالبستش غيرها بعد انقطع سيرها
نزلت يدها خدتها وقربت منها وباست خدها بعدين بعدت وقالت:بنتي ام قلب كبير..
ضحكت سارة بخجل..
جنان:ماما مازال في هديه وحده تانيه..
عقدت حواجبها وقالت بضحكه:شن هي؟!
شبحت جنان لريحان وقالت:هيا هي..
ريحان :هي..
وشبحوا لأمهم وبدوا يغنوا...
انتي احب الناس إليا انتي احب الناس..
انتي اعز الناس عليا انتي اعز الناس..
وشاركتهم ساره الغني وكملوا مع بعض..
امي انتي حياة الروح..امي انتي حياة الروح..
انتي الأغلى من عينيا انتي احب الناس..
هما يغنوا وامهم تشبحلهم بإبتسامه حب وعيونها غارقات بالدموع..
ونسيبه واقفه وراهم وهي حاطه يد في جيبها والتانيه تمسح فيها بدموعها وهي مبتسمه..
🌿خطرت عليها أمها🌿
اما زياد..
فكان يسمع فيهم ويغني معاهم بصوت منخفض وهو مشغول بهديته اللي ناوي يفاجئ بيها امه..
انتي الأغلى من عينيا انتي احب الناس..
▪▪▪▪
◇يانسمة تمر بي..خدي فؤادي واذهبي
وقدميه عاطرا هدية إلى أبي..
أبي الذي من اجلنا يسعى ويبني مابنى...
ههههه..ماكنتش حافظها ولانعرفها الاغنيه هادي تعلمتها منهم..
اااه...اني الحق عمري ماسألت علاش الام ليها عيد والأب لا..
لأن الأم ماتتقارن بحد ولايتقارن بيها حد..هو ربي عز وجل ذكرها بروحها في القرآن لعظم شأنها..
غير شهور الحمل وماادراك ماالحمل يكفي..ولا الولاده بروحها بس تكفي تخلي الأم مخلوق معزز من الله..
بس عاد حتى الأب كان مذكور كذلك بمواقف في القرآن ماتمرش مرور الكرام..
زي موقف نوح عليه السلام مع ولده العاصي..زي علاقة دواد وسليمان عليهما السلام ببعض..زي موقف ابراهيم وولده اسماعيل عليهما السلام الموقف هدا بروحه يبين العلاقه الفريده بين الأب والإبن..ولايعقوب ويوسف هادم بروحهم يبوا ايام بش نوصفوا عظمة عاطفة الأبوة معاهم عليهم السلام..
ناهيك عن مواقف الرسول عليه الصلاة والسلام مع بناته اللي كبروا من غير امهم..وكمل معاهم بوهم مسيرة حياتهم بالحلو والمر وفيها..عاطفة الابوة اللي كانت عنده كفت بناته عن الحاجه للأم..
وراهو مش لأنه رسول لا..بل لأن الأب هكي وين يجي يعطي حنان وعطف ويكون سخي بيهم ع صغاره يخليهم يشوفوا فيه الكفايه عن كل الناس..
يختلف من يختلف معاي ويتفق من يتفق..الام مهما حاولت تاخد الدورين في حياة صغارها مش حتقدر تغطي مكان الاب حيقعد ديما فاضي في قلوبهم..
عكسها الأب..يقدر ياخد الدورين ويغطي الفراغ اللي تخليه لدرجة ان الصغار يحسوا احيانا ان هو الام فعليا..
مالا علاش الله سبحانه شبه الاب بالشمس والام بالقمر في القرآن في سورة يوسف..
ومعروف الفرق بين الشمس والقمر..
كلامي هدا مش انحياز..بس هادي الحقيقة من وجهة نظري اني...
▪▪▪▪
🌾ممكن يكون عندك حق ياهيثم..
الأب لما يكون سيء ومكروه من صغاره وامهم تحاول ع قد ماتقدر تعوضهم عن اللي هو حرمهم منه ماتقدرش تعبي المكان الكبير اللي الصغار يتمنوا بوهم بس هو اللي يعبيه..
زي صغارك..وصغار عبدالمجيد..
••••°°°••••
فلوسي كلهم تموا في الشيتات ماقدرت ندس شي بش ناخدلها حاجه..
دانيه بإبتسامه؛خودي..
جبدت يد اختها وحطت فيها الكيسه وقالت؛خديناه اني وياك..
رتاج عيونها تعبوا دموع وهي تقول:دنونه..
دانيه:غير خودي ومادرهليش كبدي..
ابتسمت رتاج وخداته بعدين ضمتها بقوة..
ودانيه تضحك وهي تقول:حولي ياقردونه قتلتيني..
•••••°°°°
حي هدا شنو؟!
دانيه:افتحي وشوفي..
سدينه فتحت الكيسه وطلعت منها وشاح حرايري حلو ضحكت وقالت:ليش يابنياتي تبزعقوا في الفلوس انتوا اولى بيهم..
رتاج:مش خسارة فيك امي..
دانيه:تنعطالك الروح سوسو..
سدينه بضحكه؛ربي ينجحكم ويفرحني بيكم..
الزوز قالوا:آمييين..
سدينه بإبتسامه:باهي توا سلم بنياتي افطروا وابدوا فالضمان عمتكم "بريكه" بتجي تتغدا هني هي وولادها..
رتاج:عليك صبح اسود حاشا يوم هالجمعه..
ولفت ومشت طلعت من الكوجينه وهي معصبه..
سدينه عقدت حواجبها وقالت:البنت هادي خير دعوتها نبي نفهم علاش ماتبيش تقتنع ان حسام نصيبها كيف ماانتي مقتنعه وراضيه بنور الدين..
دانيه بحزن؛ومن قالك مقتنعه يام..اني مغلوبه ع امري بوي خدي عني قرار يحدد مصير حياتي من لما جبتيني من هداكا الوقت..ولانقدر نقول لا ولاناقشه اصلا..ماعندي ماندير غير اني نرضى بالسيف عليا..زي ماتقولي انتي..هدا قسمك يابلقاسم خود ولاخلي..واني حتى خلي مانقدرش نديرها..
سدينه بدموع؛مرات بنيتي خيرتكم فيهم يحبوكم حق وع خاطركم ياما جابوا وحطوا ودارو تعيشوا معاهم مدللات وفي عز..مانبيكمش تعيشوا عيشي يابنياتي نبيكم خير مني في كل شي..
نزلوا دموع دانيه وجت لأمها وضمتها..
وامها تقول بنبرة باكيه:نبيكم خير مني...
🌾مغلوبات ع امرهم..مافيدهم شي غير انهم يسلموا للأمر الواقع وخلاص..
لكن رتاج رافضه تسلم وتستسلم وحتحاول تقاوم وهي معتمده اعتماد تام ع خوها مجاهد اللي ممكن يقدر يأثر في بوه ويغير قراره
••••°°°••••°°°••••
الساعه العاشرة صباحا..
مقعمزة تفطر بروحها في وسط الحوش وحداها وهي تسمع في الراديو..
خشت عليها بنتها وهي تمشي بخطوات خجوله..
هي حست بيها لكن طنشت وقعدت تاكل عادي..
لين جت جنبها قعمزت ع ركابها وقالت:صباح الخير امي..
عفاف بدون ماتشبحلها ردت بحده:صباح الخير..
ثنت ركابها وقعمزت براحه مدت لأمها كيسة مكتوب عليها
"عبايات الشيخه" اسم محل..
شبحتلها عفاف بطرف عينها وقالت:شن هدا؟!
تهاني:حاجه بسيطه يام..
عفاف:وشن المناسبه..
رفعت تهاني حواجبها وقالت؛عيد الام..
عفاف:مانبي منك عيد خوديها وبري..
شبحتلها شويه بعدين قربتلها وقعدت ادغدغ فيها وهي تقول:هيا عاد عفوفه حبي انتي..
عفاف وهي شاده ضحكتها ومتصنعه العصبيه:حولي عليا غادي حولي بري..
تهاني بضحكه:انلاااا لااا لاا..
وضمتها وباستها من خدها بقوة..
عفاف بضحكه؛هالغلا المكرمش..
ضحكت تهاني وقالت:والله نحبك هلبه فيفي ياعسل..مالينا الا بعض راهو بنقعد معاك لاخر يوم في عمري..
عفاف:لالا ان شاء الله يجيك وليد الحلال اللي يستاهلك بنيتي ربي حنين مايظلم حد..
حطت تهاني راسها ع كتف امها وعيونها معبيات دموع..
وعفاف حط راسها ع راس بنتها ويدها ع خدها وقعدت تمسح عليه وهي تقول:بجاه ربي واسمه الرحيم الكريم يجيك سعد زي الرعد يابنتي..
ضحكت تهاني من بين دموعها بعدين بعدت عنها شويه وقالت:ايه حقه امي بعد العصر بنمشي نقرا مع سارة..
عفاف:لكن خالاتك العشيه بيجوني..
ضيقت عيونها بتوسل وهي تشبح لأمها..
شبحتلها عفاف شويه بعدين قالت:باهي بنتي بري..
ضحكت تهاني وولت باست امها من خدها مرة تانيه بقوة..
وعفاف تضحك..
•••°°°•••
"خشي امي"
فتحت الباب وخشت..
وقفت فمكانها وارتسمت ع وجهها ملامح الدهشه وهي تشوف للوحه متوسطة الحجم محطوطه ع سرير ولدها..
كان راسم سمي زرقا واسعه..في قلب هالسمي..
راسم ملامح وجه امه وحواليها شعاع..بانت كأنها شمس..
اطل ع ارض خضرا..فيها اربعه من زهرات دوار الشمس
وكلهم متوجهين للشمس وكانهم يشبحولها..
الرسمه كانت حلوة ومتقنه..مبهرة..
قعدت اسيمه واقفه لحظات وهي تتأمل فيها..
زياد وهو واقف بمساعدة عكاز حدا السرير قال بإبتسامه وهو يشوفلها:حاولت نطلع اللي فقلبي ولتوا نحس فروحي ماطلعت شي..
شبحتله وابتسمت بحب وعيونها مليانات بالدموع بعدين رجعت شافت للوحه ومشتلها خدتها وهي تقول:بنعلقها في الصاله..
ضحك وقال:مش لهالدرجه!
اسيمه شبحتله بنص عين بعدين لفت ومشت طلعت باللوحه من الدار..
هو ضحك ومشي طلع وراها..
هي لما وصلت فالصاله مررت نظرها ع حيوطها بتشوف انسب مكان تتعلق فيه ركزت على مكان الساعه..
مشتلها طول حطت اللوحه ع الكنبه بعدين ركبت فوق الكنبه..
وزياد واقف يشوفلها ويقول:ردي بالك يام..
ع جية عمته نسيبه من الكوجينه وفيدها فرده تاكل فيها وقفت وهي تشوف لأسيمه شن دير بإستغراب..
حولت اسيمه الساعه..
مشتلها نسيبه وقفت حداها وقالت وهي تاكل:هاتي..
خدت الساعه وأسيمه قالت:هاتي اللوحه..
حطت نسيبه الساعه وحطت في فمها فردة الخبزة وخدت اللوحه لما شافتها ارتسمت ع وجهها ملامح الانبهار..
بعدين مدتها لأسيمه والتفتت لزياد غمزتله وهي مبتسمه..
هو ضحك..
خدت نسيبه اللوحه وعلقتها في مكان الساعه..
"محلاااااهاااا"..
شبح زياد جنبه لقي خواته التلاته واقفات يشوفوا للوحه بإنبهار..
ضحك..
التفتت اسيمه شافتلهم الأربعه..
قعدت تتأمل فيهم والدموع عبو عيونها بعدين ابتسمت بتنهيده ونزلت من ع الكنبه ومشتلهم وهي فاتحه ايديها وتقول:تعالوا سنافري تعالوا
ضحكوا وجوها..
البنات الصغيرات حضنوها من رجليها اما الكبار ضمتهم لحضنها وهما ضموها وضحكتهم ع وجوههم..
نسيبه ودموعها ينزلوا قالت بنرفزة:باهي وبعدين..خلاص ياسر ياعيت الحساسين بتخلوني حساسه زيكم..
ضحكوا وبعدوا عن بعض وشبحولها بعدين زياد قال..
زياد بضحكه:الاندر تيكر طلع حساس ودموعه ع سبله!
كلهم:ههههههه..
نسيبه برفعة حاجب:لولا الشق اللي فرجلك وريتك الاندر ديكر شن شكله..
ضحكوا عليها..
وهي تشوفلهم بضيق وتقول في نفسها"لازم اذكروني وتنكدوا عليا"..
••••°°°••••°°°°••••
لالا قبل تصكر اسبوع مش حتطلع..
خالد:ماتبوش اطلعوني نطلع بروحي..
رفيق:بوي مش وقت تصكير الراس..
خالد:فديت من المستشفى خلوقي اطبقوا من القعاد فيها نروح للحوش وامكم تعانيني خير منهم..
جهاد:بوي جرحك مش ساهل..
خالد مط شواربه بتهكم وقال:جرحي هدا خبشه قدام اللي صار معاي قبل..
قعدوا يشبحوله بضيق وهما ساكتين..
خالد:بطلعوني ولانطلع بروحي!؟
انفتح باب الغرفه وخش خليل وهو يقول:صباح الخير..
جهاد:باهي اللي جيت تعالى تفاهم مع بوك..
خالد شبح لجهاد برفعة حاجب..
خليل بضحكه:علاش خيره !؟
رفيق:يبي يطلع..
خليل شبح لبوه وقال؛باهي..
خالد ابتسم وقال؛هدا الولد الباهي اللي يبيه بوه يديره..
ضحك خليل..
رفيق:شن تقول انت حالته ماتسمحش!
خليل عقد حواجبه وقال:امي قالت روح بيه
ابتسم خالد ع جنب..
شبح جهاد لبوه وقال:حتى هو هكي يبي قال امي تعانيه خير من المستشفى..
خليل ابتسم وقال:تمام العشيه تطلع..
خالد هز راسه وهو مبتسم بفرح..
رفيق شبحله شويه بعدين قال:رغم انه غلط لكن كان الحاج صكر راسه ع حاجه يديرها يديرها مافيش فايده من المعارضه..
خالد؛وكانك عارف هكي من الاول علاش تشيطلي فالريق..
شبحوله خوته وهما شادين ضحكتهم..
اما هو شبح لبوه وابتسم بملل..
••••°°°°•••••°°°°••••
الساعه الثانية عشر قبل الظهر..
فتحت باب الشقه وهي تقول:مرحبتين مرحبتين يابريكه..
بريكه "ام حسام ونور الدين" مراة بدينه الجسم..ملامح وجهها قاسيه ذقنها موشم وبين حواجبها...
لابسه جلابيه سودا وشاربه رصاصيه فيها ورد كبير قهوي...وفي ايديها الزوز لابسه حدايد ذهب كبار وخاتم فيدها اليمين كبير الحجم..
خشت للحوش وهي تقول بشي من الكبر:رحب بيك..
ومدت روس صباعها لسدينه وسدينه سلمت عليها سلام كويس بالخد وتسأل عن الحال وهي ترد من فوق نفسها..
بعدين صكرت الباب وهي تقول؛شن حال مولى بيتك..
بريكه وهي تحول في كندرتها:خير من حال مولى بيتك اللي عينه ماتعرف تشبع..
بلعتها سدينه وسكتت..
بعد حولت كندرتها خشت سدينه وهي تقول:والله كانهو راجلي راني قداش ليا قاتلاته ومقطعاته وملوحاته في البحر..
وسدينه تشبحلها من فوق لتحت..
خشت بريكه للصاله لقت قدامها ماجده مقعمزة وهي طارحه وطالعه مش عاديه..
كانت مقعمزة تشبح لبريكه برفعة حاجب وهي مبتسمه..
بريكه:هي هادي!؟
سدينه شبحت لماجده..
ماجده ناضت وقالت بضحكه؛ايه ياحنه اني..
قدمتلها بريكه وهي تشوفلها بكبر وصلت فيها ومدت روس اصباعها...
ماجده سلمت عليها بنفس طريقة سلامها..وقعمزت..
التفتت بريكه شبحت لسدينه شويه بعدين قالت:وين البنات..
ماجده:عندهم قرايه وامتحانات..
بريكه رجعت شافت لماجده شويه بعدين مشت قعمزت وقالت:وانتي شن وضعك ارمله ولامطلقه!!
ماجده بإبتسامة استفزاز:صبيه..آنسه..
بريكه ابتسمت بتهكم وقالت؛اممم..
سدينه انسحبت حداهم ومشت للكوجينه..
بريكه:طرابلسيه انتي؟
ماجده:ايه طرابلسيه حرة..
بريكه رفعت حواجبها وقالت:وين طاح فيك مجيد؟
ع خشة سدينه بصفرة العصير..
ماجده:النصيب جابه..ضحكت وكملت تقول..بعدين مجيد بسلامته عنده ذوق والحاجه هادي تأكدت منها منين ريت سدينه..
خدت بريكه العصير وهي تشوف لماجده برفعة حواجب..
سدينه مشت وهي مبتسمه بتعطي عصير لماجده ناضت ماجده خدت منها الصفرة وهي تقول:وانتي شن تقربي لمجيد..
سدينه مشت قعمزت حدا بريكه..
وماجده قعمزت بالصفرة حطتها وخدت طاستها..
بريكه من فوق نفسها:اني وياه صغار عم..
ماجده شربت من العصير وقالت؛اممم..
🌾في دار البنات..
رتاج:الله ماني طالعه لو يقطعوني..
دانيه بقلق:رتاج فكينا من المشاكل مع بوك..
رتاج:اني..حلفت..اطلعي انتي كان بتطلعي..
دانيه بتذمر:افففف..
ومشت للباب فتحاته وطلعت من الدار..
ورتاج ربعت ايديها وهي تهز فرجلها من الغضب..
🌿وطلعت دانيه وسلمت ع عزوزتها المستقبليه اللي كانت في كل جية تتفحص فيها هي واختها بالنظر باك نقصت منهم رجل ولايد ولاعين...
وقعدت تراجي في رتاج اللي صكرت راسها هالمرة مابتش تطلع لدرجة خشت عليها امها وتعاركت هي وياها والبنت شي مابت تغير رايها..
بعد صلاة الجمعه..روح مجيد هو والولاد نور الدين وحسام لشقة سدينه بش يتغدوا..
وع الغدي رتاج مابتش تطلع..
وسدينه ع اعصابها كانت خايفه هلبه وماجده لاحظتها..
وبريكه طول التقعميزة وهي عاقده حواجبها حتى الغدي ماهناك ماتغدت..
بعد الغدي..
في المربوعه..
مجيد؛اني شرطي قلته من قبل ومش مولي فيه ياخدوا شهاديهم بعدين يتزوجوا..
حسام؛ماعندهم مايديروا بيها الشهاده ياعمي مجيد دوة زايده..
مجيد:عندي اني مش دوة زايده ياحسام..وبعدين انت خيرك مستعجل هكي البنات ماعندهم وين يطيروا واني عاطيهم ليك انت وخوك ليكم توا ولابعدين..
نور الدين:قصدك اني بنقعد نراجي خمسه سنين ولامش عارف كم؟
مجيد:هدا اللي عندي يانور الدين ماتبيش مانيش شادك..
نور الدين ضحك وقال:شن مانبيش هادي نبي ونص نسبتك نتمنى فيها اني..تنهد وقال..خلاص نراجو والله غالب..
مجيد:انتم غير تموا حياشكم بالشويه عليكم لاحقين ع العرس..
حسام ابتسم مجامله وقال:ايه عندك حق..
ونورالدين هز راسه وقعد ساكت ومن داخله يسب في مجيد..
••••°°°°••••°°°°••••
الساعه الخامسه عصرا...
فتحت باب الحوش وهي مبتسمه وقالت:جيتوا..
خواتها بأصوات متقطعه:جينا..
ضحكت وقالت:مرحبتين..
وبدت تسلم عليهم سلام حار
🌿عفاف تفرح وين يواصلوها الناس يابال بمواصلة اقربهم ليها..برغم انها تعرف ان خواتها همهم الاول مصلحتهم ومواصلتهم ليها ع خاطر مصالحهم بس لكن ماكانتش تهتم لهالشي..المهم عندها ان خواتها يقعدوا يمشوا عليها ويجوا تحس ان عندها عزوة تحس انها مش بروحها..🌿
بعد رحبت بيهم دخلتهم للصاله..
بنت اختها سجى وهي ادور بعيونها في المكان قالت:وين تهاني؟
عفاف بإبتسامه:عند جيراننا تقرا مع بنتهم..
سماح:حوش الدكتور هيثم؟
عفاف هزت راسها بإيجاب بعدين قالت:قعمزوا..
قعمزوا خواتها وام سجى قالت..
سالمه:خالد طالع اليوم قالوا..
عفاف:ايه..
ارتسمت ع وجه سماح ابتسامه وهي تكتم في تنهيده داخلها..
وعيون سجي عليها..
••••°°°••••°°°•••••
نورتي تاهو..
ضحكت تهاني وقالت:النور نوركم..
سارة بإبتسامه:شويه وجايه..
تهاني:غير قعمزي مانبي شي خلينا نبدوا قرايه..
ساره:ياودي مش معطله..ومشت طول بإتجاه الكوجينه..
ابتسمت تهاني..بعدين قعدت ادور بعيونها فالصاله لين جو ع اللوحه المعلقه فنصها..
عجبتها هلبه قعدت تتأمل فيها..
فهالوقت..
كان زياد طالع من داره يدور ع اخته يبي منها حاجه وماكانش عنده علم ان تهاني بتجيها تقرا معاها..
لهدا كان واخد راحته..
لابس شورت للركبه..وتيشرت ربع كم..ويمشي بالعكاز..
لعند ماوصل للفتحه اللي اطل ع الصاله هدا كله ومالاحظش وجود تهاني..خشلها واتفاجأ بيها مقعمزة تشبح للوحه..
وهو يشوفلها رفع حاجبه اليسار..وابتسم ع جنب ابتسامه خفيفه..
"زياد!"..
انخلعت تهاني والتفتت...
ساره:تبي حاجه زياد؟!
عقد حواجبه وقال بشي من الربكه:شي..ولف ومشي بيولي من وين ماجي..
ساره وهي شاده فيدها صفره فيها ضيافه لتهاني شبحتلها وهي منحرجه..
لقتها تساوي في وشاحها بخجل وارتباك وعيونها لوطا..
قدمتلها وهي تقول:مايعرفش إنك هني..وصلت فيها وقالت..تفضلي..
شبحتلها وابتسمت وخدت فنجان النسكافيه وصونيه الكيكه وهي تقول:صحيتي..
حطت ساره الصفره ع الطاوله وقعمزت جنب تهاني..
شافت للوحه وقالت:شفتيها..
تهاني شافت للوحه وقالت:راسمها خوك؟
شبحتلها سارة وقالت بضحكه:ومن غيره؟!
ضحكت تهاني بعدين شربت من فنجان النسكافيه..
••••°°°°••••°°°°••••
الساعه السادسه مساءا..
"ياوخيتي هدا شنو معقوله ترضي بوحده زي هادي عزوزة لبناتك؟!"
سدينه:خيرها؟! راهو غير تشوفي فيها هكي تقولي عليها واعره لكن قلبها طيب..
ماجده:وحق ربي ما في وحده قلبها طيب هني غيرك انتي..
سدينه ابتسمت وقالت:حتى انتي باين عليك طيبه..
ماجده ضحكت وقالت:اني باهيه ايه لكن مانيش طيبه زيك هكي فيا شويه سم مانطلعه الا للي يبيه..
ضحكت سدينه..
ماجده ابتسمت وقالت:هي امالا اني خل نمشي نركب لشقتي..بالسلامه توا..
سدينه؛بالسلامه تصبحي ع خير..
ماجده التفتت للباب وفتحاته وهي تقول:تصبحي ع خير..
ومشت طلعت..وسدينه صكرت وراها الباب..
بعدين لفت ومشت بغضب لدار بناتها..
وصلت فيها وفتحت الباب بقوة وقالت؛والله ماني مدخله بينك وبين بوك ان شاء الله يقتلك..
رتاج بحده:ان شاء الله يقتلني بش نفتك من هالعيشة السودا..
امها بضيق ممزوج بالألم:بتقتليني انتي يابنت بتقتليني..
ومشت طلعت من حداهم..
دانيه شبحت لرتاج وقالت:تو بوك بينزل في امك مش فيك انتي..
رتاج مسحت دموعها:مش عاطياته فرصه..
دانيه عقدت حواجبها بإستغراب وقالت؛شن بديري؟!
رتاج بعصبيه؛اسكتي عليا توا..اسكتي..
شبحتلها دانيه شويه بعدين حركت راسها يمين ويسار بأسف ورجعت تشوف لكتاباتها..
•••°°°••••°°°••••
ياوخيتي قنانات..
اسيمه بإبتسامه؛حلوات ولا؟
نسيبه:ايه حلوة الجلوة وع جنو وريحونه تزيد حلاوة..
جنان:نبي مكياج هلبه ماما..
ريحان؛وحتى اني ماما..
اسيمه بضحكه:باهي باهي..
نسيبه عقدت حواجبها وهي تقول:من توا تحبوا المكياج ياجريوات!!
ريحان:علاش انتي ماديريش مكياج عمتو مش انتي كبيرة زي ماما؟
عضت اسيمه ع شاربها وهي شاده ضحكتها..
نسيبه رفعت حاجبها وقالت:المكياج للنساوين بس..
جنان:وانتي عمتو راجل!؟
فنصت نسيبه عيونها وقالت:وانتي شن تشوفي فيا!!؟
جنان مطت شواربها للأسفل بعدم معرفه وقالت:مانعرفش..
اسيمه دايرة روحها لاهيه بحوايج الجلوه وهي شاده ضحكتها بالسيف..
نسيبه شبحتلها ع جنب بعدين قالت:ايه هكي احسن ماتعرفيش..
وناضت ومشت طلعت من حداهم وهي معصبه..
اسيمه بضحكه؛عيب..مرة تانيه معاش تسألوا أسئلة زي هادي لعمتو..
جنان وريحان شبحوا لأمهم شويه بعدين قالوا؛حاضر..
فجأة..
رن تليفون اسيمه..
خداته من حداها وشافت المتصل ابتسمت وطول فتحت الخط وردت:حمد لله ع السلامه..
هيثم بنبرة فرح:الله يسلمك سومتي..
اسيمه:مروح من هداكا المكان..
هيثم بضحكه؛ايه..قريب نوصل وتو نحكيلك اللي صار بالتفصيل وطبعا مافيش داعي نوصي تاني..
اسيمه بإبتسامه:اطمن مافي حد يعرف غيري لتوا..
هيثم هز راسه وهو مبتسم بعدين قال:سلام حبيبتي..
اسيمه:سلام..وصكرت..
جنان:هدا بابا ماما؟
اسيمه هزت راسها وقالت:ايه..
ريحان:ماما كلمتيه ع الزرده..
تعكرت ابتسامة اسيمه وين اذكرت حكاية الزردة من قبل كانت شاكه في موافقته وتوا ولت متأكده انه مش حيوافق
والسبب واضح..معاش عنده وقت للحاجات هادي وهو من الأول ماعنداش وقت ليهم...🥀
رفعت حواجبها لما سمعت صوت كلاكس سيارة والعاب ناريه..
جنان:العاب ناريه!
ومشت طلعت تجري واختها معاها وناضت وراهم امهم..
في الوقت اللي فيه تهاني وسارة كانوا طالعات من الحوش..
تهاني بضحكه:بابا روح من المستشفى..
سارة ضحكت وقالت:حمد لله ع سلامته..
فتحت تهاني الباب الخارجي وطلعت وسارة طلعت معاها..
شافوا سيارة خليل مدرسه قدام الباب ووراها سيارة "دبل قابينه" فيها خروف..
تهاني بضحكه:جو خوتي..
ابتسمت ساره..
نزلوا الخروف من السيارة قبل وحطوه قدام الباب..
ونزلوا الولاد وبوهم من السيارة التانيه وهما يشبحوله..
ذبحوا الخروف قدام خالد..
خليل طبطب ع ظهر بوه وقاله:حمد لله ع سلامتك ياحاج..
خالد هز راسه وهو مبتسم..
بعدين مشي خش للحوش وولاده وراه..
تهاني:باي سارة..
سارة:باي...
مشت تهاني لحوشهم..
وسارة كيف جايه بتخش سمعت كلاكس سيارة بوها..
شبحتلها..
بوها اشرلها تخش..
هي طول لفت وخشت بسرعه..
شويه وانفتح الباب..
وخشت سيارة هيثم..
درس في الجنان وهو يشوف لسارة كيف خاشه تجري وكانها شافت "غوله"..
نزل من السيارة وصكر الباب..
بعدين مشي للكوفني فتحه وطلع منه شنطة السفر..
صكره ومشي لباب الحوش الدخلاني وهو يسمع في الألعاب الناريه..
رفع حواجبه ونزلهم..
وصل في الباب وخش للحوش..
وصكر الباب..
مالقي حد واقف يراجي فيه..استغرب..
خلا الشنطه وخش وهو يدور بعيونه..مافي حد..
هيثم:وينهم هادم؟!..
••••°°°°°
في دار نسيبه..
تحديدا البالكونه..
كانوا واقفات نسيبه واسيمه يتفرجوا وحداهم البنات الصغار..
نسيبه:اللي يشوفهم يقول مروح من فلسطين..
ضحكت اسيمه وقالت:بوهم سلامته بالدنيا..
قلبت نسيبه عيونها بملل بعدين شبحتلهم..
ضيقت عيونها وين ركزت خليل وهو يسلم ع مراة كبيرة وجنبها البنت الشقرا اللي رتها معاه في المطعم والولد الصغير واقف معاهم..
قعدت تشوفلهم لين خشوا كلهم داخل..وخليل صكر الباب..
ارتسمت ع وجهها ملامح الضيق وهي تحس بشعور مزعج هلبه يوجع في قلبها..
"أسيمه"
توسعوا عيون اسيمه وهي تقول:هيثم!..
شبحت لبناتها وقالت:هيا ماما تعالوا..
شدتهم من ايديهم ومشت خشت بيهم داخل..
اما نسيبه شبحت جهة حوش خالد شويه..بعدين لفت وخشت داخل..وصكرت باب البالكونه بعصبيه..
🌾نزلت اسيمه هي وبناتها من الدروج وعيونها ع هيثم اللي كانت تقوله وهي مبتسمه:حمد لله ع السلامه..
ابتسم وقال:الله يسلمك..
جنان:بابا غدوة عيد الطفل..
رفع حواجبه وهو مبتسم وقال:اها..حلو حلو..
ريحان:غدوة بنلبسوا جلوة بابا..
ضيق عيونه وشبح لأسيمه..
اسيمه بضحكه:بيلبسوا عربي..
رفع حواجبه تاني وقال:اها..
ريحان:بابا..
اسيمه:ريحونه ماما بابا مروح من السفر تعبان يبي يرتاح باهي ماما..
ريحان شبحتلها بحزن وقالت؛باهي ماما انتي قولي باهي؟
اسيمه:باهي ماما باهي بروا لداركم..
الزوز مع بعضهم مشوا يجروا بطريقهم لدارهم..
هيثم:كنتوا تتفرجوا ع الفرح اللي دايرينه حوش خالد؟
ضحكت اسيمه وقالت:ايه..بعدين خدت يده وقالت..ايه احكيلي شن صار معاك بالتفصيل..
شبك صوابعه فصوابعها ومشي هو وياها الصاله وقال:هدا ياستي وصلت هني الأربعه وخديت سيارتي من المطار ومشيت طول لمقر رئاسة الوزراء...
•••••°°°°•••••°°°°••••
في مربوعة حوش خالد..
كانوا عفاف وخواتها واقفات ع خالد المقعمز فيها..
سالمه؛حمد لله ع سلامتك خالد..
خالد بدون مايشوف جيهتهم:الله يسلمك..
اختها التانيه:حمد لله ع سلامتك..
خالد:الله يسلمك..الله يسلمكم كلكم..
وسماح تشبحله بعيون مليان دموع وقلبها واجعها ع حاله..
سجى وهي تمرر في نظرها بين خالد ورفيق:حمد لله ع سلامتك عمي خالد وان شاء الله هدا حد السو..
خالد:الله يسلمك بنتي..
سالمه:خلاص هي اطلعوا خلوا الراجل يرتاح..
طلعوا وسماح بالسيف طلعت وهي تشوف لاختها عفاف بنظرة غيظ..
خليل شبح لخوته..هما شبحوله..غمزلهم..
فهموا عليه..وطلعوا وهو وراهم..
وصكر رفيق الباب..
خالد قام عيونه وشاف لعفاف..
عفاف بنظرة قاسيه:قالولك خوتك جوك المستشفى؟
خالد غير عيونه عنها وهز راسه بإيجاب..
عفاف:جوك مرة وحده وانت مش واعيلهم ولما وعيت ماجاك منهم واحد عارف علاش ولا..
خالد ابتسم ع جنب وقال:امم عارف..شبحلها وقال..زي مادرتي انتي..
عفاف رفعت حواجبها وقالت؛ماعندناش حق!؟
خالد ضحك بتهكم وحرك راسه يمين ويسار..
عفاف بنظرة أسف:في كل مرة تشوف فيها الموت وتولي منه نقول اهو يتعظ اهو يرجعله عقله ويولي عن طريق الحرام والظلام اللي ماشي فيها..ومانيش عارفه علاش لعند توا مازلت متأمله وانت مقطوع منك امل بعد جريت معاك ولادك لطريقك المسخه..شدت دموعها وهي تقول..الكلام معاك ولى ضياع وقت لكن حاجه وحده قعدت هني ونبي نقولها..اشرت ع صدرها وهي تتكلم..بعدين اشرت ع الباب وقالت..لو واحد من ولادي ياخالد تصيرله حاجه..رفعت سبابتها فوق وهي تقول..ليوم الدين ماني مسامحتك..
قعد مركز بنظرة ع رسمات الفرشه اللي قدامه بعيون الدموع مغرقتهم..
شويه وسمع باب المربوعه انفتح وتصكر..
تنهد بألم بعدين حرك راسه يمين ويسار بأسف..
••••°°°°••••
اما عفاف بعد طلعت من حداها مسحت دموعها اللي طاحوا فيسع..ورسمت ع وجهها ابتسامة مزيفه ومشت لضيوفها...
🌾برا..
رفيق:خلي تليفونك معاك..
جهاد هز راسه وقال:وانتم كان تبوا حاجه اتصلوا..
مسح خليل ع شعره بعدين مشي وهو يقول لرفيق:هيا..
رفيق مسح ع ذراع جهاد ومشي لحق خوه..
جهاد حط ايديه فجيوبه وهو يشوفلهم بضيق لعند ماطلعوا من الحوش وصكروا الباب..
تنهد..بعدين مشي قعمز ع كرسي فم الباب الدخلاني..
••••°°•••••°°••••
الساعه السابعه مساءا...
"والله اني ياعمي مجيد ماجيت بنقولك لكن امي وجعتني الحق تعز وتقدر ودور فيها وهي هكي تتعامل معاها!اني امي عندي فوق كل شي"
مجيد وهو عاقد حواجبه بغضب:ماعليكش فيها ياحسام..
حسام؛اني نفكر لبعدين هادي بتولي بعد وقت ام راجلها وجدة صغارها معقوله تقلل من احترامها!؟ هي جايه لحوشها من باب الأدب تطلع تسلم اقل شي..
مجيد خبط بيده ع الكاصه خبطه خفيفه وقال؛تو نتفاهم معاها..
ومشي طلع من حداه..
وحسام حط يده ع الكاصه وهو يضرب بصوابعه عليها بعصبيه...
🌾وصل مجيد وهو في قمة الغضب للعماره..
ركب الدروج بسرعه..
وصل في الشقه طلع المفتاح وفتح الباب وخش وصكر الباب بقوة وهو ينادي بغضب:رتااج ..رتاااج ياكلبه..
ع جية سدينه تجري وهي تقول؛خيرك يامجيد شن في خيرها رتاج..
مجيد:ضمي فمك انتي وحولي من قدامي..دفها ومشي بطريقه لدار البنات وسدينه وراه وهي تندب وتقول بهمس:ياحليلي بنتي..
وصل فالدار فتحها بقوة..
لقي رتاج ودانيه واقفات مع بعض..
دانيه كانت ترعش من الخوف..
ورتاج زيها بس تحاول تتصنع القوة..
مجيد:معقوله المراة تجي وماتطلعيش تسلمي عليها حتى السلام!؟
رتاج بحده؛كنت نقرا عندي امتحانات..
مجيد وهو يعجب عليها؛تقري وعندك امتحانات! تحضري فالذرة!
رتاج غيرت عيونها عنه وهي رافعه حاجبها..
مجيد:المراة هادي ياكلبه بعد وقت بتولي عزوزك عامليها بإحترام ياعديمة الربايه..
رتاج شبحتله..استجمعت كل قوتها وبجرأة كبيرة قالت:ومن قالك نبيها تولي عزوزي!
فنص فيها..
وامها واختها شبحولها بصدمه..
مجيد:شن هيا!!؟
رتاج بتحدي:ايه لانبيها ولانبي ولدها ولانبي حد من عيلتك..
مجيد قدملها وهو يفنص فيها ويقول؛شني ياحيوانه..
هي قعدت تشبحله بنفس النظره وتبلع فريقها..
سدينه:مش قصدها يامجيد هي هكي قالت كلام وخلاص..
رتاج؛لا مش كلام وخلاص اني هدا حسام والله ماني واخداته لو تطربق الدنيا..
وصل فيها بوها وشدها من شعرها بقوه عيطت..
سدينه بخوف:البنت يامجيد..
ودانيه تشبحلها وهي ترجف من الخوف..
قعد مجيد يهز فيها وهو شاد شعرها ويقول:الكلمه..هني كلمتي اني..واللي نبيه اني يصير..انتي بنتي اني بإسمي اني تمشي كيف مانبي اني..وانتي لاليك كلمه ولارأي مع بوك..
رتاج بعياط؛والله ماني واخداته..والله ننتحر..ننتحر..
طلقها وضربها كف وهو يقول:نقصي صوتك ياكلبه درتي العار..
رتاج وهي شاده خدها قالت بحقد:العار درته انت بس..
دانيه بصدمه:رتاج!!
مجيد وصل لأقصى مراحل الغضب وهو يقول:قلة العصا خلتكم هكي قلة العصا..
ومشي طلع من حداهم..
سدينه عرفاته شن بيدير صكرت الباب بالمفتاح وقعدت شاداته وهي ترعش..
دانيه وهي تبكي وتعيط:ياحمارة شن درتي ياحمارة..
رتاج قعدت شادة خدها وهي تبكي وترجف من الخوف..
شبحوا للباب لما قعد بوهم يحاول يفتح الباب ويخبط عليه بقوة وهو يقول:افتحوا ياحيوانات افتحوا والله اليوم نخلطكم ع بعضكم انتم وامكم..
وسدينه شاده الباب بقوة وهي مغمضه عيونها بشده..
🌿فوق..
كانت ماجده زيها زي الجيران تسمع في العياط والعراك..
قعدت تفكر شن تقدر ادير بش توقف مجيد عند حده..
وبعد تفكير مادامش هلبه لقت حل واحد مافيش غيره..
في هالوقت..
مجيد بدي يدف في الباب بقوه وهو يقول؛والله نربيكم مرة تانيه يامسخات يافاسدات..
الباب بدي يتخلخل..
سدينه انسندت بظهرها عليه وهي تقول؛ياربي ياربي..
والبنات مشولها وشدوا الباب معاها...
••••°°°•••••
تنهدت بضيق وقالت:سومه..
اسيمه وهي تحرك في القلايه:اممم..
نسيبه:استاحشت خالتي..شن رايك نمشولها غدوة..
اسيمه بضحكه:غدوة شنو المراة ماليهاش تلاته ايام متزوجه عروس يابنتي لبعد اسبوعين بش تفكري تزوريها..
نسيبه مطت شواربها بملل وقالت:عروس!! ماظني مع الداعشي هداكا في عرايس..
اسيمه بضحكه:ماتظلميش الراجل ع خاطر مظهره الخارجي..
نسيبه؛صدقيني ياسومه هالنموذج لامظهر ولامخبر..
ضحكت اسيمه وهي تحرك فراسها يمين ويسار..
••••°°°°••••
هديتوا حيلي الله يهد حيلكم ياشيطانات..يامسخات..
قعد ياخد في انفاسه وهو داهش..
•••••
دانيه بخوف:شكله مشي اشبح شن بيجيب..
سدينه بخوف وألم:يارب تقي علينا..
رتاج وهي ترعش:الله يرفعه الله ياخده..
فجأه..
دف الباب بكل قوته..انكسر وانفتح..
هما عيطوا بعدين بكل قوتهم قعدوا يدفوا فيه..
وهو يدف من برا ويقول:تو نوريك ياسدينه تو تشوفي..
وسدينه ادف بقوة هي وبناتها..
لعند ماهو استجمع قوته من جديد ودفه..
هما معاش قدروا خلاص وخروا بقوة للخلف لين قريب طاحوا..
والباب انفتح ع وسعه..
خش عليهم بعصا اشبه بالخيزران منظرها يركب الرعب..
وهو نظراته كانت تخوف اكثر وصوته اكثر واكثر وهو يقوللهم:اني ديرولي هكي يامسخه انتي وياهم!..
سدينه وهي تاخد في انفاسها بصعوبه:حرام عليك..يامجيد..اتقي..الله..
مجيد هز راسه بوعيد وقدملهم وهو مندفع زي الوحش وهما عيطوا ع طول حسهم..
▪▪▪▪
◇مجيد في منه هلبه هلبه..الراجل هدا..استغفر الله وخلاص..بس بصدق امثاله حرام فيهم الذريه..غير لله حكمه فيما كل ما أراد..

...يتبع...