البطل المغمور "شمس الغروب"

الجزء الثلاثون"القسم الأول"

الصلاة أولا🌸🌸🌸🌸
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
وهو يجري..
شاف زحمه قدام وحده من الغرف...
خش فيها..
جو عيونه ع ولده...تلقائيا من خوفه الشديد عليه وفرحته لما شافه واقف قدامه ع رجليه..
جبده من ذراعه وضمه بقوة وهو يقول:الحمد لله..الحمد لله..
زياد قعد جامد في مكانه من الصدمه..
بعد عنه وقعد يتلمس في وجهه وكتافه وذرعانه وهو يشوفله ويقول:كويس ولدي..انت كويس مافيك شي ولا؟
زياد وهو يشبحله بنظرات كلها دهشه:مافيا شي...كويس..
التفت هيثم لما سمع واحد تاني من الممرضين:واحد تاني اللي جي بينتحر ولدك لحق عليه في آخر لحظه..
رجع شبح هيثم لولده..ابتسم..وخبط بيده خبطات خفيفه ع خد ولده وهو يشوفله بفخر..
"حولوا خلوني..نبي نموت..نبي نموت الله يلعنكم ويلعنه نبي نموت"..
هيثم شبح للمكان اللي جاي منه الصوت عقد حواجبه وقال:غادي هو؟
زياد شبح وين مايشبح بوه وقال:ايه...
سمعوا من جديد صوت صراخه الغاضب وهالمرة قاعد يسب ويلعن بألفاظ نابيه...
هيثم لقي رجليه ياخدوا فيه للمكان الموجود فيه الشاب..
وزياد معاه بعيونه...
وصل هيثم في الباب وفتحه..
شاف الشاب قاعد يقاوم فيه وهما يشدوا فيه بقوة ...
عيونه عليه كيف يصرخ بكل قوة لين برزوا عروق رقبته وجبهته وجهه ولى لونه مايل للأزرق الغامق...
ركز في رقبته لقي عليها اثر..فهم انه كان يحاول يشنق روحه...
واخيرا...تكمنوا منه وعطوه اليبرة المنومه...
وقعدوا يربطوا فيه...
وهيثم يشبحله كيف يعيط ويبكي...
وفيسع مابدي تأثير المنوم عليه ..
ثقل لسانه..وصوته بدي يختفي وعيونه بدوا يتسكروا...
لعند ماغاب تماما عن الدنيا..
الدكتور:لازم يكون في حرص ومراقبة اكثر لولا ولد الدكتور هيثم فقدناه..
هيثم:اول محاولة انتحار تصير هني؟
الدكتور شبحله وقال:ايه دكتور هادي الاولى من بعد مارجعنا فتحنا المصحه..
هيثم قعد يشبح للشاب...
يبان جميل الصورة...وبنية جسمه قويه...بس الأدمان دمر فيه المواصفات الخارجيه المميزة...
جاه الدكتور وقاله:زياد لحق عليه في اخر لحظه..
هيثم شبح للدكتور وهز راسه بإيجاب...
••••••°°°°°°°•••••••
في باحة المصحه..
المخصصه لساعات تنفس النزلاء...
كان مقعمز هو وولده ع كرسي فيها ويتكلموا..
زياد وهو يشبح القدام:هو كان ناوي ولمح بهالشي قدامنا وحسيته بيديرها..
هيثم وهو يشبحله:مايبيش يتعالج هو؟
زياد ابتسم بتهكم وقال:مايبيش يعيش..
هيثم:تعرف قصته؟
زياد تنهد وقال:اللي فهمته منه انه ضحية فراغ....لمعوا عيون زياد وهو يشوف للشجر قدامه وبدي يتخيل...لما يحكي في قصته تخيلته...يعوم في بحر من الفراغ...وفجأة طاح في دوامه بدت تجبد فيه وتجبد لين غرقاته....بحر الفراغ لونه اسود غامق...ظلام في ظلام وضياع...وموت...
هيثم ضيق عيونه وابتسم وهو يقول:تفكر ترسم اللي تخيلته ؟
شبح زياد لبوه..
هيثم بإبتسامه:اني تخيلت وصفك مرسوم..
زياد بلهفه:ايه نبي نرسم...
كبرت ابتسامه هيثم حط يده ع ذراع ولده وقال:نص ساعه ويكون عندك اللي تبيه بإذن الله..
زياد شبح لبوه شويه بعدين غير عيونه عنه ورجع يشوف القدام..
هيثم تنهد بإبتسامه وطلع تليفونه بيدير اتصال بعدين تفكر حاجه وقال ...ايه حقه...
شبحله زياد بطرف عينه..
هيثم مشغول بتليفونه وهو يضحك بعدين مده لزياد..
"زيزو"..
قلب زياد دق بعنف...وعيونه تعبوا دموع..
خدي التليفون بيده اللي ترجف وشاف الفيديو...
شاف خواته الصغار...اللي كانوا زي الفراشات الملونه بجمال طلتهم...
الزوز يوجهوله في الكلام..
الزوز قالوا مع بعض...
"استاحشناك زيزو"
جنان؛روح زيزو بسرعه نبوك معانا..
ريحان؛نبي نوريك رسماتي ابله الرسم ديما تقولي بتطلعي فنانه واني نقوللها زي خويا..
جنان:اليوم عيد الطفل زيزو..
ريحان:ايه ايه..شوف شعري قصيته وليت احلى من جنان..
جنان:عينك..
ريحان:عينك انتي..
هيثم:هييه هييه..
سكتوا الزوز وهما يشبحوا لبوهم..
نسيبه طلعت في الصورة وهي تقول بضحكه:هي خلاص وقت علينا هي قولوا مع السلامه زيزو...
الزوز قالوا:مع السلامه زيزو
نسيبه:ليك وحشة بصغارها ياوحش...شد حيلك وخليك زي ماعرفتك بطل طالع لعمتك...بعتتله قبله وقالت...سلام ياقلبي...
ريحان وحنان قلدوها وقالوا مع بعض..
"سلام ياقلبي"...
وانتهي المقطع...
زياد وهو يتفرج عليه كانوا دموعه ينهمروا انهمار...
ولما وقف...بدي يبكي بألم...وحرقه...
خدي منه بوه التليفون...وحط يده ورا راسه..
وضمه جي راسه مدفون في رقبة بوه....
زاد بكي اكثر ...وشد فيه بقوة...
اصابعه كانت حتحفر الجاكيت حفر...
كان هيثم يحس بألم بسيط من قوة شد اصابع زياد عليه..
بس هالألم يقعد بسيط قدام الالم اللي يحس بيه في قلبه ع ولده..
يسمع في صوت بكاه وعبراته وكأنهم نار تحرق في روحه حرق..
مسح بيده ع شعر ولده وبدي يقرا في آيات في السكينه....
••••••°°°°°°°°••••••••°°°°°••••••
في ساحة المدرسه الابتدائيه..
كانوا مقعمزين الطلبه مع امهاتهم بش يحضروا العروض اللي محضرتها المدرسه بمناسبه يوم الطفل..
اغلب الطلبه معاهم امهاتهم...
وقله منهم جو معاهم اقارب ليهم..
جده
خاله...
عمه زي بنات هيثم...
واخت زي رشيد اللي جت معاه ملاك...
كانت ملاك مقعمزة تشوف لنسيبه اللي كانت مشرفه ع النظام كيف تتحرك وتتكلم وتنظم في المكان...
وتذكر في اللي صار اخر مرة لما انحرقت الورشه..
ماكانتش حاطه في بالها حتى بالكذب ان نسيبه تكن مشاعر حب لخليل...
وفاجئها اللي شافاته منها هداكا اليوم..
برغم وجع الغيره اللي حست بيه...بس فرحت لخليل...
ايه فرحتله...ان اللي يحبها وعايش العذاب بسبب حبها تبادله نفس الشعور..يعني عنده امل ينتهي عذابه ويعيش سعيد..
واللي فاجئ ملاك اكثر هو شكل حبها لخليل ماتوقعتش روحها تحب خليل لهالدرجة..لدرجة انها تتمناله السعاده مع غيرها!....
غيرت عيونها عنها وشبحت للمديرة وهي تمسح في دموعها..
المديرة كانت شاده كيس كبير معبي العاب ومعاها زوز ابلات شادين كياس بنفس الحجم..
المديرة وهي تتكلم بالمايك....
"في يوم زي هدا...مستحيل ننسى الأبله الفاضله اسيمه اللي كانت ادرس في الفترة الصباحيه ومع بداية العام الدراسي اختارت ادرس الفترة المسائيه ع خاطر بناتها...
ابله اسيمه كانت في كل عام في يوم الطفل...تبعت العاب وحلويات للمدرسه وفي سنوات حضرت معانا ...
وهالعام هي الحاضر الغايب..رحمة الله عليها..
نسيبه قعدت تشوف لبنات خوها وعيونها مليانات دموع..
كانوا مقعمزات يشبحوا للمديرة ويسمعولها بس..
المديرة تابعت تقول...
"واليوم وصلتنا الهدايا والحلويات للصغار بس اللي بعتهم مانعرفوشي...جتنا عن طريق مندوب وقال انه مايعرفش من بعتهم..بس قال انه صدقة عن ابله اسيمه الله يغفرلها ويرحمها وان شاء الله يتقبل ويكون في ميزان حسناتها"
نسيبه ابتسمت وهي تمسح في دموعها..
طول عقلها جابلها خوها المحب المخلص الوفي....هو في غيره بيدير حاجه زي هادي لأسيمه؟!
🍁🍁🍁🍁
ايه صح...هيثم يعشق زوجته عشق كبير...
بس هالحركة الحلوة مش هو اللي دراها....
اللي دارها تعود بأسيمه ادير هكي كل عام وشاركها...
زي ماتعود في يوم الطفل يمشي لدار الأيتام حامل ومحمل بالهدايا وبالحاجات الحلوة...
يفرح بيها قلوب صغيره...فقدت عطف الأب وحنان الام بالحياة والموت....
وكان لما يشوف سعادتهم باللي يجيبلهم فيه...ينشرح صدره ويسعد قلبه...في عز همه وحزنه وحيرته...
كانت ضحكاتهم البريئة تنتشل فيه من كل شي يكدره...
ويولي يضحك معاهم وعيونه تراقب في فرحتهم .....
قبل لما كان يدير هكي...كانت تحرك فيه طيبة قلبه والحب المدفون داخله لعمل الخير...
وتوا الحوافز زادت...واللي بدي يحرك فيه شي اكبر واعظم واعلى....
....وهو طالع من دار الأيتام....
توجه لسيارته وركبها...
لما سكر بابها سمع صوت نغمة رساله جاي من هاتفه..
طلعه من جيب البالطو....
فتح الرساله كان مكتوب فيها
(1)....
عقد حواجبه بغضب...ورجع التليفون وين ماكان وشغل السيارة وتحرك...
°°°°°°°•••••••••°°°°°°°
بعد ماوقف بكي وهدي...
وخر عن حضن بوه وقعمز ع حيله...
كانوا هو وبوه ساكتين ..فاتوا عشرة دقايق وهما ساكتين..
انقطع هالصمت لما تكلم هو...
زياد وهو يشبح القدام:علاش سيبت الوزارة؟
هيثم:سيبتها قبل..
زياد:عارف..واني سألتك علاش سيبتها؟
هيثم شبحله شويه بعدين شبح القدام وقال:ماقدرتش نكمل فيها...معاش نقدر نعطي اكثر من هكي..
زياد؛والخدمه؟
هيثم:اهو نخدم..
زياد شبحله...
هو حس بيه يشوفله شبحله...
زياد:نعرفك صادق..
هيثم ضحك وقال:واني نعرف لسانك طويل لكن مش لدرجة تقولي كذاب..
زياد:ماقلتش كذاب..
هيثم:قصدتها..
زياد غير عيونه عنه وشبح القدام ضيق عيونه وهويقول:اللي نقصده..انك صريح ماتعرفش تجامل ولاتعرف ادرق ولاتقول اجابات ناقصه..
هيثم ابتسم وشبح القدام...
زياد شبحله وقال:نبي الاجابه كامله..
هيثم شبحله وقال:تبي اجابه كامله...غير عيونه عنه وشبح القدام وقال...بإختصار انتم الأولى بكل وقتي حاليا...
زياد ابتسم بتهكم وشبح القدام..
شبحله هيثم وقال:ماعجبتاكش الإجابه!؟
زياد تنهد وقال:تس..مش هكي...بس مش عارف علاش تخيلتك بعد كم سنه حتذكرنا باللي درته..يعني تقول اني ضحيت ودرت ع خاطركم وفعلت وتركت وهكي..
هيثم :نتمنن عليكم يعني...
زياد:يعني..
بدي يضحك هيثم...
زياد قعد يشبحله وهو يضحك بعدين قال:اللي قلته يضحك؟
هيثم وهو يضحك حرك راسه بالنفي بعدين قال...خليها للوقت..
زياد:شن هي؟
هيثم:اللي قلت عليه توا خليه للوقت وهو يورينا بعدين...كان عطانا المولى العمر...
زياد:هازي ع كلامي؟.
هيثم ابتسم وقال:ابدا...وراهو مش كل الضحك ييكون من فرح ولاع شي يضحك انقال ولاهزوة...في ضحك يكون من وجع..ومن قهر وحسرة..
زياد:وعلى شني متحسر ومنقهر؟
هيثم ابتسم بأسف وقال:ع نظرة ولدي ليا اللي شكلتها اني بروحي في عقله..
غير زياد عيونه عنه وقال:اسف..بس مش قادر نوثق فيك...لأني ماتعلمتش نوثق فيك من قبل...ع  قولتك انت خليتني هكي..
هيثم تنهد وقال:معذور...ونرجع ونقولك خليها للوقت ان شاء الله...
سكت زياد...وهيثم كذلك ومرة مرة يسرقله في النظر...
بعدين خبط ع جبهته..
شبحله زياد..
هيثم :نسيت حكاية اللوحه والألوان...
وقام تليفونه وبدي يضرب ع رقم محدد..
حط التليفون ع وذنه...ولحظات وبدي يتكلم..
وزياد يشبحله بنظرات..استغراب واسكتشاف في نفس الوقت..
وكأنه لأول مرة يشوف بوه ويتكلم معاه...
•••••°°°°°°••••••
¤ومن يتق الله يجعل له مخرجا○ويرزقه من حيث لايحتسب ومن يتوكل على الله فهو حسبه إن الله بالغ أمره قد جعل الله لكل شيء قدرا¤
🌷تردد سارة في هالآيات وهي تتنقل في الكوجينه من حاجه لحاجه توتي في الغدي
السماعات في وذانها تسمع وتردد
¤ومن يتق الله يكفر عنه سيئاته ويعظم له اجرا¤
وطت النار ع الطنجرة وهي تردد ورا القارئ بش تتأكد من حفظها...
دارت بعيونها في الكوجينه ولما تأكدت ان كل شي تمام..
لفت وطلعت وهي تقرا لعند ماوصلت في ..
¤سيجعل الله بعد عسر يسرا¤..
سكتت وقعدت تفكر وهي تمشي بإتجاه الصاله...
لين خشتلها..
جو عيونها على لوحة زياد...
ابتسمت وعيونها معبيات دموع  هي تقول..
سيجعل الله بعد عسر يسرا.....
فجأة سكت القارئ ورن تليفونها..
فتحت الخط ...
"الو سارة"
سارة قعمزت وهي تقول بإبتسامه:السلام عليكم رهوفه..
"وعليكم السلام..شن جو"
سارة:تموم  والحمد لله..شن جوك انتي احكيلي بالتفاصيل شن صار معاك اليوم..
ضحكت رهف وهي تقول بحماس..
"حتى اني هدا علاش متصله"
ابتسمت سارة وهي تسمع في رهف شن تحكي..
كانت رهف زي الطفله الصغيره وهي تشرح لسارة اللي صار اليوم في المسابقه وكيف انها كانت متوترة لأبعد حد ومن قوة التوتر كانت تعطي في الاجابه ع الاسئله بسرعه وتطلع صح...
وانها سؤال ورا سؤال كانت تجاوب فيهم صح..
خف توترها وحست بشعور ثقة كبير خلاها تجاوب ع كل الأسئله بأريحيه تامه..
سارة بضحكه:قالتلي دنون كنتي وحش المسابقه كلهم تفاجئوا فيك..
ضحكت رهف وهي تقول..
"حتى اني تفاجئت في روحي"..
سارة:ماك بديتي تعرفي روحك..تعرفي من هي رهف حق..
ردت رهف وهي تقول
" تصدقي..والله صح"
ابتسمت سارة....
•••••°°°°°°••••••
"الوقت اللي خداه في مرحلة الانسحاب كان قياسي وهذا يرجع لقصر فترة الأدمان ونوع المخدر اللي كان ياخد فيه..
اني نفضل انه يكمل فترة السته شهور كامله هني في المصحه ومايطلعش بكل..."
هيثم:موعد جلسه المحكمه متاعه بعد شهر دكتور..
الدكتور:مش مشكله يحضرها ويولي..اساسا الشرطه موجوده في المصحه هو يعتبر معتقل في كل الحالات..
هيثم:ع هكي مش رافعينه للحبس لو حاكموه؟
الدكتور:ايه..في ماده في القانون انضافت مؤخرا ان المدمن مايخشش السجن قبل يتعالج تماما...
هيثم هز راسه وقال:ان شاء الله خير....بعدين ضيق عيونه وقال...نبي نسألك عن الحاله اللي اقدمت ع الانتحار اليوم...عيلته ماعطيتوهمش علم؟
ابتسم الدكتور بأسف وقال:تبروا منه..
ارتسمت ع وجه هيثم ملامح الآسى ..
الدكتور:اسمه فاتح شرف الدين...عمره 24 سنه..كان يقرا في كلية القانون وسيبها مانفعش فيها...الولد  الصغير في عيلته مدلل ومرفه جدا...لدرجة الفساد وهادي النتيجه.
هيثم:اهله بعد فسدوه تبروا منه!
الدكتور ابتسم بتهكم..
هيثم بأسف:الله المستعان...
••••••°°°°°°••••••°°°°°°••••••
"لو تشوفيه يابابا شاب زي الوردة...كلهم اللي غادي صغار في السن وفي ربيع عمرهم زي مايقولوا...المخدرات هادي دمار لمستقبل بلاد بحالها...الله ينتقم من صحابها واللي يتاجروا فيها "
سارة بكره ممزوج بالألم:يارب ويخلصنا منها ومنهم..
هيثم:اللهم آمين...بعدين ابتسم وقال...كان تشوفي خوك لما شاف اللوحه والالوان شن صار فيه..
سارة ابتسمت وهي تقول:عشقه..
هيثم تنهد وقال:يارب...
سارة :سيجعل الله بعد عسر يسرا..
هيثم قعد يشبحلها لحظات بعدين ابتسم وقال:لاإله إلا الله..
سارة بإبتسامه:تغدا بابا..
هيثم خدي الكاشيك وهو مبتسم ورجع ياكل..
فجأة سمعوا باب الحوش انفتح...
سارة:روحوا..
هيثم بصدمه:كيف!! يروحوا توا هما!؟
سارة وهي تشبحله بإستغراب:ايه بابا اليوم مافيش قرايه يحضروا الاحتفال ويروحوا..
ناض  هيثم من مكانه ومشي طلع من الكوجينه..
وصل في الباب فتحه لقاهم قدامه..
نسيبه:انت هني!؟
هيثم:اسف جدا جدا..والله نحسابكم تروحوا في نفس الوقت..
خشوا نسيبه والبنات وهي تقول:لا الحمد لله كان هكي اني خفت نحساب في حاجه اتصلت بيك ماتردش وعطلت ماجيتش قلت ناخد تاكسي ونروحوا ونشوف شن صاير..
هيثم سكر الباب وقال:التليفون في الدار اسف جدا
نسيبه بضحكه:خلاص عاد ماصار شي هانا روحنا
ريحان:بابا شوف..
وراته الهدايا اللي خدتهم...
جنان:حتى اني شوف..
هيثم قربلهم وهو مبتسم يقول:ماشاء الله ماشاء الله..
ريحان:الابلات كلهم قالولي طالعه حلوة..
جنان:حتى اني..
قعمز قدامهم ع رووس صباعه وضمهم ليه وهو يقول:بناتي حتى هما..
نسيبه بضحكه:العبد الواثق...
التفت شبحلها برفعه حواجب..
نسيبه بإرتباك:نبصر نبصر..
وسارة وهي واقفه ع رخامة البار تشبحلهم وهي شاده ضحكتها..
غير عيونه عنها وشبح لبناته وقال:بروا بدلوا وتوضوا وصلوا وبعدين تعالوا تغدوا..
الزوز قالوا:حاضر..
ومشوا يجروا مع بعض..
هيثم مشي وراهم للكوجينه ونسيبه وراه..
وساره ولت لكرسيها..
خش هيثم للكوجينه واخته وراه وهي تقول:الحركه اللي درتها اليوم تهبل..
هيثم قعمز وهو يقول:حركة شني؟.
نسيبه قعمزت وهي تقول بإبتسامه:من غير جو عاد...الهدايا اللي بعتتها للمدرسه بإسم اسيمه الله يرحمها..
سارة شبحت لبوها وهي متفاجئه..
وهيثم كان متفاجئ اكثر منها وهو يقول:هدايا بإسم اسيمه؟
نسيبه عقدت حواجبها بإستغراب وقالت:هيثم بلاجو..انت باعتهم ولا صدقه عنها ولا؟!!
هيثم وهو مصدوم؛لاوالله ابدا..وياريت درتها اني حاجه زي هادي..
سارة وهي مصدومه:باهي مني !؟
نسيبه وهي مستغربه؛ع هكي صديقه ليها بالك ولاحد قريبها..
هيثم وهو يفكر:من بيكون يعني!؟
سارة ودموعها في عيونها:مش مهم مني المهم انه تفكر ماما الله يرحمها بحركه حلوة زي هادي ربي يجعلها في ميزان حسناته وحسناتها..
هيثم شبح لسارة وقال: اللهم آمين..صح..عندك حق..بس بجديات نبي نعرفه مني بش نشكره..
سارة:يشكره ربي...
هيثم ابتسم وقال:صحين..
ضحكت سارة من بين دموعها..وهو قرصها من خدها..
نسيبه ناضت وهي مبتسمه قالت:خل نمشي نبدل ونجي جعانه..
ولفت ومشت طلعت..
وهما الزوز رجعوا ياكلوا وهما يفكروا في اللي قالاته نسيبه..
وهيثم عنده فضول كبير يعرف من صاحب هاللفته الحلوة في حق زوجته..
••••°°°°°°•••••°°°°°°•••••
في احدي الطرق المؤديه لجامعه طرابلس القاطع الثاني...
كان يسوق في سيارته وهو يتكلم بالهاتف..
عادل:لا ماتمشيش اني ماشي نروح بيها..........وعليكم السلام..
سكر...وركز تماما في الطريق....
■فهالوقت...
ماشيه بطريقها للبوابه...
وهو جاي بسيارته...درس جنبها ونزل..
وهي قعدت تمشي بسرعه من خوفها وهي تقول بهمس:ياربي ..
وقفت في مكانها مخلوعه لما لقاته واقف قدامها..
رتاج دموعها نزلوا وهي تقول:والله العظيم حرام عليك اللي دير فيه معيشني في رعب راك بتقتلني من الخوف..
جهاد:اطلقي منه..اطلبي الطلاق وربي المعبود ناخدك بعد العده طول..
رتاج:شن غيرك توا فهمني شن غيرك قول!؟ اني ياما جريت في جرتك وقتلك تعالى اخطب وانت كنت مدايرني لعبه..واخر مرة قتلي معاش نبي نعرفك..شن خطرلك توا هاه قولي شن خطرلك!؟
....فهاللحظه ....
خش عادل للكليه...
جو عيونه عليهم بالضبط..
وقف بالسيارة وهو يشوفلهم..
شد جهاد يد رتاج وهو يقول:كنت حمار حمار ...رتاج بالله اطلقي منه..ماتخلنيش نقتله...ياتطلقي يانرملك..
رتاج جبدت يدها بقوة وهي تقول:برا عليا غادي يامريض
جت بتمشي وقف قدامها تاني وهو يقول بتهديد:رتاج
"رتاج"
هي لما سمعت اسمها بصوت تاني غير جهاد صوت تعرفه كويس
دب في قلبها الرعب..
شبحت لمصدر الصوت وجهاد معاها..
عادل وهو عاقد حواجبه بغضب اشرلها بيدها تجيه...
هي طول مشت تجري من الخوف لين وصلت في السيارة وركبت..
وعادل يشبح لجهاد..وجهاد يشبحله بحقد..
رتاج بخوف:اسمعني عادل..
عادل حط سبابه ع فمه..
هي سكتت وبدت تبكي...
وهو تحرك طول...
وجهاد قعد واقف في مكانه بعيونه يتبع في السيارة وهو مبتسم بمكر بعدين ولى ركب سيارته...
....وطول الطريق....
رتاج تبكي وتحاول تبرر وعادل يسكت فيها..
لين وصلوا للحوش...
لما خش بالسيارة قال:تنزلي توا تجيبي حاجاتك اللي جيتي بيهم وماتاخديش يبرا من اللي جبته اني..حتى اللي لابستيه توا حوليه..
هي قعدت تشبحله لحظات بعدين مسحت دموعها وقالت:باهي..
فتحت الباب ونزلت...
ومشت للباب..
هو قعد شاد روحه في السيارة يتمالك في اعصابه بس ماقدرش..
مشي لحقها...
....وهي كانت في الدار....
تبكي وتلم في حاجتها...
خش عليها وهو يقول بعصبيه:سألتك قبل...قتلك احكي ولاماقلتش...قتلك خليك صريحه خليك صادقه خليك واضحه..
رتاج وهي تبكي قالت بإنفعال:شن تبيني نقولك هاه...بشن نصارحك..بإني من غبائي بش نهرب من الواقع متاعي درت علاقه مع واحد حقير كذب عليا وصدقت كلامه...تبيني نقولك ان بوي لما قالي في واحد في عمره جي بيخطبني جيت بنهرب معاه...لكن خوفي ع سمعة عيلتي ولطف ربي هما اللي ردوني عن اللي جيت بنديره بش ماناخدكش..تبيني نقول ان هالمنحط الواطي لما عرف ان تزوجت قعد وراي بش يخرب عليا علاش مانعرفش برغم انه لايحبني ولايبيني...واهو وصل للي يبيه اهو وصل..وبدت تخبط ع وجهها وهي تقول..وصل للي يبيه..وصله..
عادل اللي كادت الصدمه تجلطه قال:اتصلي بخوك يجي يرفعك...نبي نروح مانلقاكش..لو لقيتك حتندمي..
ومشي طلع من حداها بسرعه...وخلاها تبكي بالعبرة...
......بعد نص ساعه....
كانت تبكي وتفكر فيهم شن دير...
لمت حوايجها اللي جابتهم معاها وغيرت اللي لابساته وحولت كل الذهب اللي كانت لابساته..
واتصلت بخوها مجاهد يجيها...
وماإن مرت ربع ساعه الا ومجاهد قدام الباب..
كلمها....وطلعتله...
•••••••••°°°°°°°
في الطريق..
مجاهد وهو منفعل:وتقوليلي مرتاحه في حياتك يارتاج!
رتاج وهي تبكي:خلاص وخيي بالله عليك مش ناقصه راني بروحي نفكر في بوي والمشكله اللي بيديرهالي..
مجاهد:بوي..خبط بيده ع الدومان وقال..بوي الله يسامحه طالع زردة هو وجماعته سبوع...اليوم مشي..
هي مسحت دموعها وقعدت ترشف وماعلقتش..
مجاهد:غير يروح تو نتفاهم اني وياه..
ورتاج قاعده ساكته وهي تبكي بصمت وقلبها يدق بقوة من الخوف....
.....ولما وصلوا للحوش....
انفجعوا امها واختها بجيتها بهالشكل...حاولوا يعرفوا منها اللي صار وهي مابت تحكي لحد حاجه..
خشت طول للدار...خدت تركينه وغمت روحها بالبطانيه...
وخلت القلق ياكل في امها واختها...
▪▪▪▪▪
◇يومها عقلي كان يفكر في الف حاجه..بس اكثر حاجه قعدت مسيطره ع عقلي الهدايا اللي وصلت للمدرسة بإسم أسيمه..من بعتهم...
المهم...بعد صليت العصر في الجامع قعدت قريت قرآن...
ع فكرة...خلال زحمه حياتي كنت نقطع في وقت لقراية القرآن..ولو ماقريتش نسمع..معاش نقدر نعيش حياتي من غيره..دواي وقوتي معاه ومنه...
زي ماقال ابن الجوزي..
..تلاوة القرآن تعمل في امراض الفؤاد مايعمله العسل في علل الجسد...
امراض الفؤاد يعني النفسيه..زي الحزن والهم والآكتئاب...
مفعوله عليهم زي مفعول العسل مع امراض الجسد العضويه..
والزوز قال عنهم عز وجل...شفاء للناس..شفاء لما فالصدور..
يعني اني للحظه هادي قاعد صامد وثابت بسببه من بعد حول الله وقوته وعونه..
ايه...بعد كملت قراية...نضت بنطلع لقيت خليل سابقني ومستعجل..
خطر ع بالي شي لحقته بسرعه بش نستفسر منه عنه....
▪▪▪▪▪
"خليل"
خليل وهو يلبس التفت شبحله وقال بإبتسامه:سامحني دكتور والله مستعجل العمال جايين للحوش مانبيش نعطل عليهم..
هيثم:مش معطلك هو بس استفسار بسيط..
خليل عقد حواجبه وهو مبتسم قال:تفضل..
هيثم:الوالده بعتت حاجه للمدرسة بإسم زوجتي الله يرحمها؟
خليل ابتسم وقال:اني مش امي..
ارتسمت ع وجه هيثم ملامح المفاجأة..
حط خليل ايديه في جيوبه وقال:نعرفها تحب ادير الحاجه هادي..امي حكتلي عنها قبل...والعام اللي فات بعتت معاهاحاجات اني واخدهم توزعهم في روضة بناتك الصغار...الله يرحمها خلتني ندير نفس الشي لدار الأيتام...عمري مارضيت ع نفسي كان فهداكا اليوم ..ممكن بسبب الشي هدا ربي قربني ليه وخلاني نتوب
هيثم حط يده ع كتف خليل وقال:مش حيضيعك ربي صدقني ياخليل..
خليل بإبتسامه:ان شاء الله...بعدين رفع حواجبه وقال..عطلت ع الجماعه...هي السلام عليكم..
ومشي بسرعه
وهيثم ماشي وراه وهو يشوفله بإبتسامه وعقله يفكر في اتخاذ قرار مهم جدا ومصيري
•••••°°°°°•••••••°°°°°••••••
الساعه العاشرة ليلا...
فتح الباب وخش للحوش...
سمع صوت هدرزة نسيبه وسارة..
سكر الباب ومشالهم الصاله..
خش وهو يقول:السلام عليكم..
الزوز ردوا:وعليكم السلام..
سارة ناضت وهي نقول:نحطلك عشي بابا؟
هيثم:لا بابا تعشيت..مرر نظره عليهم وقال...رقدوا التوامه..
نسيبه بإبتسامه:بعد مانفخوا روسنا وهما يهدرزوا ع حفلة اليوم..
ضحكت سارة..
هيثم ابتسم وقال:ايه حقه..عرفت من بعت الهدايا بإسم المرحومه بإذن الله..
عقدت نسيبه حواجبها وهي تقول:منو؟
وسارة تشوف لبوها وتراجي في اجابته..
هيثم :خليل..
سارة شبحت لعمتها وهي متفاجئة..
ونسيبه قعدت تشبح لخوها وهي مصدومه...
وجهها بدت تكسوه حمرة الخجل..
هيثم :بري ارقدي وراك مدرسه بكري..
سارة فهمت ان بوها يبي عمتها ع انفراد...ابتسمت وقالت:حاضر...تصبحوا على خير..ومشت..
هيثم:قدامك كل خير..
نسيبه ناضت بتمشي وهي تقول بتوتر:تصبح ع خير..
هيثم:ولي قعمزي نبيك..
هي ولت قعمزت بالسيف...
قعمز جنبها هيثم...حط يده ع راسها وقال:حبيبتي..نوسه..بنتي حتى انتي راهو مش اختي بس.. مربيك وعارفك كويس..عارف انك مراة بمية راجل..قويه وقد روحك..تحملتي معاي المسؤوليه وساعدتيني هلبه...صح مرات ماتفلتي في الستريسو وتعفلقي فيا..لكن مع هذا ولامرة درتي حاجه وطت راسي ديما مخلتيه مرفوع...
نسيبه وهي تسمع في كلامه كانت منزله عيونها وهي مبتسمه بحب وعيونها معبيات دموع..
هيثم تابع يقول...انتي بنتي..قطعه من قلبي...نخاف عليك اكثر من روحي..وواثق فيك اكثر من روحي كذلك..واثق اني لو عطيتك لراجل حتكوني ليه احسن واحلى واغلي هديه تجيه من ربي..نعمه وعمل خير داره في حياته ولقاه..
شبحتله نسيبه بتوتر..وقلبها بدي يدق بسرعه..
هيثم؛واني مش حنعطيك الا لراجل...كلمني عليك عبرلي عن مشاعره اتجاهك بطريقه خليتني فرحان بيك وفخور...راجل شفتلك في عيونه قيمه كبيرة هلبه...راجل يحترمك ويقدرك قبل كل شي..راجل عاشرته في اصعب ظروفي وعرفت معدنه كويس...ومستعد نعطيه بدون تفكير...لكن الامر كله في النهايه يرجعلك انتي..
نسيبه بلعت ريقها وحست روحها بدت تعرق من التوتر..
هيثم:خليل طلبك مني...
نزلت عيونها استحياءا مع دمعه طول مسحتها بسرعه..
مسح ع شعرها وقال...خودي وقتك وفكري عندك الاسبوع هدا بطوله...استخيري واستشيري...واعطيني رد يوم الخميس بإذن الله في الليل في نفس الساعه..
وناض وقف...طبس ع راسها وطبع عليه قبله..
بعدين مشي متوجه لداره...
وهي تبع فيه بعيونها لين ادرق من قدامهم...
حطت يدها ع قلبها ودموعها بدوا ينزلوا...
مسحتهم بإيديها وناضت ومشت بتتوجه لدارها.....
......في دارها.....
صلت اول صلاة استخاره...
وبعدها خدت المصحف وقعدت تقرا فيه ...
بعد ماكملت قرايه...خشت سريرها وقعدت تفكر في كلام خوها..ودموعها مابطلوش نزول...
🍁🍁🍁🍁
وتمر ايام هالأسبوع...
يوم ورا يوم....
كان فيهم زياد يخضع للعلاج النفسي السلوكي برغبة كبيرة في الشفاء...
وفي لحظات الفراغ اللي تجيه تخليه يفكر في المخدرات..
كان يقبل ع لوحته وادواته ويرسم...
وبوه يراقب في وضعه...ووضع فاتح اللي آثار شفقته وفضوله...
كانوا حابسينه في دار بروحه وكانت لما تجيه النوبات يعطوه الأدويه...يهدا ويرقد...
وهيثم عنده رغبه شديده يعرفه عن قرب ويحاول يساعده بس كان متردد...
🌸التردد
اللي كان مرافق دانيه في احساسها اتجاه المجهول اللي يلحق فيها وهي تشوف في حالة اختها ماتبيش تنجرف ورا شعورها واطيح في نفس الغلط...
وهالمجهول...
كان يتحول من عاشق لرجل شرطه بإمتياز وقت خدمته اللي قاعد يصير فيها تطورات سريعه وكبيرة..
ولاتطور في قضية زياد...
غير انه جلال الوافي ولى لشغله في الكليه وفهالفترة قرر يلبس ثوب العفه والطهارة مؤقتا لبعد ماتم المحاكمه الي كان  متأكد ان الحكم فيها حيكون لصالحه...
🍁الحكم الظالم...
اللي خايف ياخده عادل في حق رتاج اللي طاح في حبها للغرق....في غيابها تأكد انها ملكاته بكل مافيه...لكن صعب عليه يتقبل يرجعها تعيش معاه بعد اللي عرفه صعب جدا...
واللي دار فيها هكي..
رجع لحياة العربدة مرة تانيه ونساها بالمرة ولاكأنه يعرفها ولاكأنه دار حاجه....
اما خوته...
فكانوا الزوز يجروا بين صيانة الورشه والحوش...
🌸ونسيبه..
تراقب في كبيرهم من بعيد وعقلها مابطلش تفكير..
ويوميا كانت تصلي في الإستخاره...وتدعي في كل صلاة..وفي كل سجده...ان ربي يختارلها ولايخيرها فهو خير من يختار....
🌸اللي اختار لرهف تكون في المسابقه في مكان سارة لأن هالشي فيه خيرتهم هما الزوز..
لرهف بش تتغير شخصيتها للأفضل وتنعم بصداقه سارة اللي فتحت عيونها عن هلبه حاجات كانت غافله عنهم بالذات في دينها..
ولسارة فإنها تكسب اجر رهف في مساعدتها ليها والأخذ بيدها ...
🌷ويابخت من حبب عباد الله في الله 🌷
🍁🍁🍁🍁🍁
يوم الخميس...
الساعه العاشرة ليلا....
خش للحوش بعد ماروح من المصحه...
بعد سكر الباب..
مشي حدا المدخل رمي اللي فرجليه ..
والتفت بيمشي...شاف اخته واقفه قدامه...
قعدت يشبحلها يراجي في ردها..
وهي واقفه مشبكه ايديها في بعض وتشوفله بنظرات حازمه استعدادا للبوح بردها ع طلب خليل....
•••••••°°°°°°°•••••••°°°°°°°•••••••
اليوم التالي...
بعد صلاة الجمعه...
طلع خليل من الجامع وهو يطلع في هاتفه من جيبه بش بيغير وضعه من الصامت للعام..
لقي رساله..
فتحها ...
(حلو خليك هكي رد بالك تسيب اللي دير فيه...الليله تعالى للمكان المعلوم)
نزل التليفون وحرك عيونه وشبح للجامع بطرفهم بنظرات كلها خجل..بعدين شبح القدام بسرعه ومشي لسيارته..
وصل فيها بيفتح الباب..
"خليل"..
شبح يمينه وقال بإبتسامه؛شفتك لاهي مع الشيخ ماقدرتش نكلمك..
هيثم بإبتسامه:مش مشكله..احمم..عقد حواجبه وحط يده ع كتف خليل...مصمص شواربه بعدين قال..امم..خليل..
خليل وهو مستغرب:نعم..
هيثم:قاعد تبي اختي..
فتح عيونه على وسعهم وقلبه قريب طار من مكانه...
هيثم:سمعتني؟قاعد عند طلبك؟
خليل وانفاسه بدت تتسارع:رجاء مش طلب قاعد زي قبل واكثر..
ابتسم هيثم وهو يقول:مالا ابعت امك العشيه...
خليل قعد يشبح لهيثم بصدمه مش قادر حتى يرمش..
وهيثم طبطب ع كتفه وهو يضحك بعدين لف ومشي لسيارته...
ركبها...شغلها ...وتحرك...
وخليل يتبع فيه بنظرات مصدومه ومش قادر يستوعب اللي صار قبل شويه...حلم يقظه ولانوم...خيال...ولاهذيان...
مش قادر يفكر ان اللي صار ليه علاقه بالواقع والحقيقه...
••••••••°°°°°°°
فكت عصابة محرمتها من ع راسها ورجعت ربطتها وهي تقول:تهاني شوفي الغدي..
تهاني وهي تنشف في الممر:حاضر..
سيبت السياقه وخشت للكوجينه..
وعفاف في الصاله تمسح في الرواشن
اليوم اول يوم في الحوش بعد الصيانه قاعدين ينظفوا فيه ويضموا..
...طلعت تهاني من الكوجينه....
ع خشة خوها للحوش وهو يقول بصوت عالي فجعها..
"ياااام...يمااا"...
عفاف من الصاله:خليل..خيره ينادي هكي!..
ومشت بسرعه طلعت من الصاله وهي تقول:خيرك!..
خليل جاها وهو يضحك ضمها ورفعها فوق وبدي يدور بيها وهو يقول بصياح:نحبك نحبك نحباااك..نحبك..
وتهاني تشوفله وهي تضحك بصدمه..
وامه تقول؛ووك عليا...ياحليلي الولد هبل..من وين جيت.. نزلني نزل..
ع طلعة خوه ومرته من جناحهم..
شافوه شن يدير وقفوا يتفرجوا مستغربين..
نزل خليل امه وهو يقول بضحكه:قداش تعطيني قولي..
عفاف وهي حاطه ايديها ع راسها ...ووك عليا دخت..شن بنعطيك ماعندي شي..
خليل بضحكه:يااام الخبر اللي جايبه ماينقالش هكي..
رفيق :خبر شني تكلم!؟.
عفاف ضرباته ع كتفه وهي تقول:قول هيا..
خليل ضحك وقال:وتي روحك ياسمح ياحب قلبي وعمري...وتي روحك العشيه بتمشي تخطبي لولدك..
عفاف بصدمه حطت ايديها ع فمها وقالت:من حوش جيرانا ولا..
خليل؛تي مالا منو ياسمح بروحه جاني قالي ابعت امك العشيه..
عفاف:ياربي...ياربي..ضمت ولدها وقالت بفرحه شديده؛االحمد لله ياربي
الحمد لله..
تهاني بفرحه:ابله نوسه..
بعد خليل عن امه وجي لأخته وقال وهو رافع حاجبه اليسار بضحكه:ابله نوسه! زعمه ترضى تقوليهالها بعدين..
تهاني صفقت بفرحة وهي تقول:معناها هي..
ضحك وضم تهاني وطبها وقعد يدور بيها وهو يقول:ايه هي هي..
وتهاني تضحك بعياط...
وامه تشوفله وهي تضحك ودموع الفرح ينزلوا..
وسجى تشوف لرفيق اللي يشبح لخوه بنظرات عيون تلمع بأمل كبير انه ينول مراده زي ماناله خوه....

....يتبع.....