البطل المغمور "شمس الغروب"

الجزء الرابع عشر"القسم الاول"

💐..
مقعمزة في مقعدها ادير في الإختبار..
كان وقت الآستراحه..
والفصل فاضي مافيه حد غيرها هي واستاذ الماده..
وخطيبه استاذ الماده اللي كانت مركزة عليها بنظراتها الحاقده..
اما الأستاذ فكان لاهي باللاب توب متاعه يرصد في درجات اعمال السنه..
هي...
حست بروحها عطشانه..قامت راسها وخدت شيشة الميه بتشرب..
ولانها درات حركه فيها صوت هو شبحلها..
لما شافها كيف تشرب في الميه...حس بوجع ضمير قوي..
جمعه:خيرك في حاجه؟!
دانيه يدوب شبحتله بعدين شبحت لورقتها وحطت الشيشه وهي تحرك في راسها يمين ويسار نفيا..
هو قعد يشوفلها..
شبحتله جيهان وقالت موجهه الكلام لدانيه:بسرعة سقدي معاش في وقت..
شبحولها دانيه وجمعه...
جمعه فنص فيها..
هي غيرت عيونها عنه جو فعيون دانيه لقتها تشبحلها بحده..
ودانيه نزلت عيونها طول اول ماجو عيون جيهان عليها..
رفعت جيهان حاجبها وربعت ايديها وهي تهز في رجلها..
وجمعه قلب عيونه بملل بعدين رجع شبح للاب توب..
وشويه ودانيه حطت البيرو وخدت الورقه وناضت من مكانها..
جتها جيهان بسرعه وهي تقول:كملتي؟.
جمعه شبح لدانيه .
دانيه مدت الورقه لجيهان وقالت:ايه..
جمعه:بسرعه هكي!!
دانيه شبحتله وقالت:ايه..الأسئله تافهه ماتاخدش وقت..
جيهان التفتت لجمعه وهي رافعه حواجبها بإستنكار..
وهو قعد يشبح لدانيه بحده وقال لجيهان:ترا هاتي الورقه..
دانيه ابتسمت بتهكم..
وجيهان شبحتلها من فوق لتحت بعدين مشت لجمعه عطاته الورقة..
هو خداها وشافها...قعد يمرر في نظره ع الإجابات بعدين ابتسم بتهكم وقال:اني سهلتها عليك مراعاة لظروفك..
جيهان شبحت لدانيه وهي مبتسمه بشماته..
دانيه وهي من داخل مصدومه في اللي قاله بس مابتش تبين بكل برود مصطنع قالت:قصدك سهتلها عليا بش تريح ضميرك..
هو اختفت ابتسامه..
وجيهان تبدلت ابتسامتها لملامح حده..
دانيه قعدت تشبحله بنظرات حاده مليانه دموع محبوسه بقوة..
هو عقد حواجبه وغير عيونه عنها وقال:بري اطلعي..
هي مشت خدت شيشة الميه وطلعت بسرعه بش تتفادى نزول دموعها قدامهم..
جيهان:وحده وقحه زي هادي حلال عليك تسقطها...
جمعه:جيهان بري حتى انتي..
جيهان قعدت واقفه تشبحله برفعة حاجب..
رفع عيونه فيها وقال:قتلك بري..
جيهان ضمت شورابها القدام شويه بعصبيه بعدين هزت راسها ومشت طلعت من حداه...
وهو بعد طلعت شبح للورقه...بعدين غمض عيونه شويه محاوله منه لتهدئة اعصابه...بعدين خدي نفس وفتحهم وزفر وحط ورقة دانيه قدامه وخدي بيرو احمر وبدي يصلح فيها...
•••••°°°°°°••••••°°°°°°••••••
"رحلة شني يابابا انت وياه ان شاء الله نلموكم في المدرسة حني تبونا نطلقوكم في الخلا زي قطيع الثيران شن يشدكم بعدين"
:ياأبله انتم اعرفونا لمكان قنين هكي وطبيعه صدقيني نديروا جو مليح ونروحوا مع بعض..
نسيبه:اللي يسمع يقول محبوسين في حياشكم لطلعه لاخشة وتراجو في رحلة زي هادي وانتم كل سبوع تزردوا في مكان شكل!
:باهي ياأبله توا احني نبوا نديروا رحلة للذكرى هكي..بش وين نتفرجوا ع صورها بعدين نذكروك وندعولك بالخير..
ضحكوا الولاد..
نسيبه:مانراجي غير في دعاويك انت وياه ياصالحين يامتقين...اسمع انت مادرهوليش كبدي ايوه..اني اصلا مافي يدي شي تبوا رحله بروا للمدير هونيا مقعمز في مكتبه لوطا..
زياد:نبوك تخشي واسطه ياأبله...
شبحوله بعدين شبحولها وهما شادين الضحكه..
نسيبه برفعة حاجب وتضييقة عيون:تعرفني كويس مانحبش جو الواسطات..
هو خاف مش نظرتها هادي لأنها نظرة تهديد..حده ابتسم ابتسامة ربكه وقال:معناها فوتوا الموضوع الولاد..
ضحكوا...
هي خبطت بيدها ع الطاوله وقالت:اصصص..انت وياه...بدال ماقاعد يريح علينا الوقت هكي ع الفاضي خل نحكوا في حاجه مفيده..
:بالله عليك مراجعه لا ياأبله ماصدقنا كملنا المنهج..
نسيبه:تس مش في المنهج..اني بروحي ماصدقت كملته..
مررت نظرها عليهم وقالت..عندي سؤال...والجرئ فيكم يجاوب عليه..
كلهم بحماس:شن هو..اسألي ترا..
هي ابتسمت ع جنب وقالت:تصلوا؟
سؤال كان وقعه صعب ع اغلبهم منهم من احرجه السؤال وفي من صدمه..
نسيبه:باهي الحمد لله مادام ماجاوبتوش طول معناها حاسين بغلطكم..
:الحق ياأبله نصلي ونقطع..
:واني ننسى الحق كان تفكرت نصلي..
:اني مانصليش..
نسيبه:علاش ماتصليش؟
:مش عارف...الحق نحس فيها ثقيله هلبه..
نسيبه:اهلك في الحوش محافظين عليها؟
الولد بآحراج:اسئلة خصوصية هادي ياأبله..
نسيبه:اسفه..بس واضحه الإجابه...ع العموم اني هني مش شيخه ولاداعيه..لكن ندير في واجبي كامسلمه..الامر بالمعروف...وواجبي كامعلمه ننتمي لمؤسسه اسمها وزارة التربيه والتعليم..التربيه قبل التعليم..بس حني توا مع الأسف التعليم وبالسيف نعلموا فيه...المهم..ولأنكم تهموني هلبه والله نشوف فيكم زي وخييني..ولو تبوا ولادي مافيش مشكله..
الصلاة فرض وربي فرضها..واني نعرف ان ربي مايفرض شي ع البني آدم الا وفي منفعة ليه هو بالدرجه الاولى
الصلاة من اسمها..صله..تواصل..وهني بين البنادم وربه..البنادم في امس الحاجه للصلاه..تعرفوا علاش!؟
قعدوا يشبحولها وهما ساكتين ابتسمت وقالت:ولايهمكم تو نقوللكم علاش..ريتوا الروح اللي فيكم..اللي انتم عايشين بيها توا..هادي من ربي...هو قال سبحانه للملائكه لما خلق آدم..
¤فإذا نفخت فيه من روحي فقعوا له ساجدين¤
والروح هادي ديما ترجع لأصلها وتتصل بيه..بش ترتاح..وبش ترتاح حتى انت...
الصلاه راهو مش مجرد حركات وخلاص اركع اسجد نوض قعمز ..الصلاة..هادي حياة ليك ولروحك..
بيها ترتاح..بيها تتأدب وتتربى..بيها تتوفق..وبيها ترزق...وبيها تشفى..وبيها تقوى...حتى لو كنت دير في ذنوب صبح وليل صل..ايه صل وصل...لأنها حتتمشي تمشي وتردك للطريق...
هما كانوا يسمعوا في كلامها ويفكروا فيه...كلهم عارفين وموقنين انه حق..
لكن النفوس البعيده عن ربي تسثقل كلام زي هدا...ومايخشش قلوبهم اللي بسبب كثرة الاخطاء والزلات والذنوب غلفها غشاء اسمه" الران" الران هدا يخلي القلب مايتأثر بأي شي سوي يشوفه صاحبه..او اي نصيحة خير يسمعها...لهدا كلام نسيبه وصل لفم باب قلوب اغلبهم اصطدم بيه ورجع...
🥀وهكي كانت قلوب هلبه منا وفي من لازالوا كلام زي هادي ثقيل عليهم وصعب يقبلوه🥀
نسيبه يإبتسامه:في الأخير نقوللكم اللي يقطع صلته باللي فوق..مش حيرتاح في حياته نهائي مهما كان النعيم اللي عايش فيه..ولو ارتاح فعلا معناها راحت عليه...
رن الجرس..
ناضت نسيبه وهي تقول:ربي يفتح عليكم ان شاء الله ويوفقكم كلكم..بعدين فنصت عيونها واشرت عليهم بساببتها وهي تمرر في نظرها عليكم..وياويلكم نشبح واحد منكم هني السنه الجايه..
ضحكوا وهي ضحكت معاهم..
وهما يقولوا...منورة ياأبله..ربي يحفظك...
نسيبه وهي متوجهه للباب وابتسامتها ع وجهها:ربي يحفظكم..
وزياد يشوفلها بإبتسامه وهو نايض يلم في ادواته شويه نخصه صاحبه وقاله:برا كلمها..
زياد ضيق عيونه بشده وقال:نسيت بكل..
بعدين خدي شنطته و مشي بسرعه بيلحق ع عمته والطلبه يطلعوا وراه..
زياد:ابله نسيبه..ابله..
وقفت نسيبه والتفتت وهي تشوفله كيف يمشي لين وصل فيها..
زياد:بنمشي لحوش نعيم نتغدا غادي..
نسيبه ضيقت عيونها وقالت:كثرت مشياتك لنعيم!
زياد:علاش وين المشكله..
رفعت حواجبها ومررت نظرها عليه بعدين شبحتله وقالت:تمام..لكن ليش ماتاخدش اذن امك المرة هادي!؟.
زياد تنهد بملل وقال:امي وتعرفيها بتفتحلي تحقيق قبل تعطي الموافقه..
نسيبه شبحتله شويه بعدين قالت:باهي...
زياد ابتسم وقال:منورة ياأبله..
ابتسمت بعدين لفت ومشت..
وهو كيف جي بيولي لصحابه لقاهم جايينه..
:هاشنو خديت اذن!؟
زياد:ماتخلنيش نديرها معاك انت..
نعيم:خلاص فكونا من دوشتكم وهيا تحركوا قدامي..
ومشي زياد هو وثلاته من زملائه لمكان تقام فيها سباقات سيارات غير قانونيه...ومش اول مرة يمشيله..
••••••°°°°°
طلعوا مع بعض..
ركب زياد مع نعيم والزوز التانيين ركبوا في سيارة تانيه وتحركوا ورا بعض...
لحظات...ولحقتهم نسيبه بسيارتها...
ماارتاحتش لمرافقه زياد ونعيم..وكانت حاسه ان زياد كان يكذب عليها...لكن ماقدرتش تمنعه...لهذا قررت تلحقه وتعرف بروحها صدقه من كذبه...
في الطريق..
نسيبه وهي تسوق كانت مركزة ع سيارات الولاد ومش منتبهه ان في سيارة تلاحق فيها...
لعند ماصاحب السيارة لفت انتباهها بأضوائها..
هي شبحت للمرايه وقالت:وقتكم يادراهات الكبد..
وسرعت مشيتها شويه...لحقتها السيارة وركزت ان صاحبها يبي يجي جنبها..
نسيبه:شن يبي المصيبه هدا!!
بعدين شبحت القدام انصدمت لما لقت السيارات راحو منها..
خبطت ع الدومان بقوة وقالت:ااوووففف..
شويه سمعت كلاكس..
شبحت جنبها لقت السيارة نفسها..شبحت القدام وحاولت تزيد السرعه...وانتابها شعور بالخوف..
السيارة اللي جنبها زادت سرعتها اكثر..وسبقتها..
وقطعت عليها الطريق..
هي شدت فرينو بقوة ووقفت السيارة...
وخدت الحديده من تحت الكرسي وقعدت في السيارة مانزلتش..
انفتح باب السيارة اللي قدامها ونزل منها صاحبها..
نسيبه بغيظ:بنقتله اني عارفه روحي بنقتله..
فتحت باب السيارة ونزلت من غير الحديده وهي تقول:ترا شن تبي قاطع عليا الطريق زي المجارم..
هو ضحك بسخريه وقال متعجب:زي..المجارم!! مش ع اساس اني مجرم في نظرك!
نسيبه بمكابرة:مش في نظري بس في نظر الناس كلها..
ضحك وقال:اوكي..قدملها وهو يقول..تمام..هو كله سؤال نبي ناخد جوابه ونمشي ع حالي .
نسيبه برفعة حاحب:اللي هو؟
مسج حواجبه بعدين ضيقهم وبلع ريقه وحط ايديه في نصه وقال:هداكا الضابط شن كان يبي جايكم يومها!؟
نسيبه:وانت شن دخلك!؟
خليل غمض عيونه بنفاد صبر بعدين فتحهم وقال:يابنت الناس جاوبي ع قد السؤال ارجوك..
نسيبه رفعت حاجبها وقالت:امم..تمام اكيد مش جايينا ع خاطركم..لو يبي منكم كان جاكم طول جية تليق بيكم..لكن انت شفت كيف جانا...وابتسمت بسخريه وهي تقول..يعني شي مايخصكش تمام..
وبدلت ابتسامتها بملامح حاده وشبحتله من فوق للوطا وقالت..وتوا ترا حول من طريقي..
ولفت بتمشي لسيارتها..
"يحسابك معانا"
وقفت في مكانها والتفتت وهي تشوفله بتضييقة عيون مستغربه..
خليل:هو اللي حقق معاي وسألني عنك..شاك فيك معانا وكان ناوي يجيبك قبل..قدملها وقال..قريب هبلت لما شفته قدام حوشكم..قولي شن كان يبي..
مدت يدها قدامه وقالت:اوقف في مكانك..
هو وقف وقعد يشبحلها بقلق..
هي شبحتله بجديه وقال:شفت كيف جبتلي الشبهه!! لهدا اخر مرة تتعرضلي ولاتجي في طريقي..ماتخلنيش نقوله..لاني لو قتله هالمرة يقدر يحسبك بتهمة التحرش في خطيبته...
تبدلت ملامح وجهه للصدمه وهو يشبحلها..
وحس بحمم اشبه بالحمم البركانيه قاعده تفور في صدره...
على عكس باقي جسده اللي بدت البرودة القارسه تتسلله من أطرافه...
وهي كملت عليه وقالت بقسوة...ايه جاي يخطبني واني وافقت عليه..لهدا خليك بعيد عني افضلك...
وشبحتله من فوق لتحت بنظرة ازدراء ممزوجه بالقسوة..
بعدين لفت ومشت لسيارتها بسرعه..
هو قعد يرمش فعيونه ببطء..يحاول يستوعب اللي سمعه..
قعد يشبح في الفراغ وهو حاس بروحه وكانه دايخ..
وكأن فقد الجاذبيه الأرضيه وقاعد يطفو في فراغ كبير اسود موحش...يشوف في الدنيا كلها سواد فسواد..
بدي هالسواد يتلاشى لما انتبه لسيارتها وهي تتحرك..
غيرت اتجاهها ومشت من الجهة التانيه...
وقعدوا عيونه مع السيارة وهي تمشي لين ادرقت..
وقعد واقف في مكانه يشبح لنفس الجهه ومازال زي التايه وكلامها يتردد في وذنه..
مااستاقضش الا لما سمع صوت منبه سيارة كان قمة في الأزعاج..
التفت وشاف واحد يأشر ويكلم فيه يجي يحول سيارته من الطريق..
هو ماكان يسمع في شي من كلامه..لكن مشي طول للسيارة..
ركب...وتحرك طول...
كان يسوق وبين عيونه شكلها وهي تكلم فيها بتكبر واحتقار..
يرن في وذانها كلامها الجارح..بس اللي كان حارقه...قاتله بالعرق...اللي قالاته عن خطبة راجح ليها...
وان هي وافقت عليه..وحتولي لراجح...لراجل تاني...مش ليه هو..
قداش حاول يهرب من التفكير فهاليوم...
كان يبي يحبها بدون مايفكر في المستقبل وفي قلبه مدرق امنيته الأشبه بالمعجزة في الإرتباط بيها هداكا الأرتباط المقدس..
لكن ياخليل هالأمنيه شبه مستحيله...
بكل المقاييس مستحيله...
انت وين...ونسيبه وين ياخليل...
نزلوا دموعه ..شد الدومان بإيديه الزوز بقوة...
ولحظات..وصرخ صرخة قهر...من وسط قلبه المجروح طالعه..
🍁هي نفس الصرخه المكتومه في صدر رفيق..
اللي كان مقعمز في وسط حوشهم..وهو موطي راسه من الخجل ووذانه يسمعوا في كلام انسانه جدا يقدرها ويعزها...ويعشق بنتها..
أسيمه:انت تعرف ان اللي درته غلط كبير..غلط كبير في حق ربك..وفي حق نفسك..وفي حقك امك وعيلتك كلها..
والبنادم مش معصوم من الغلط ولدي..ويقدر يصلحه..انت لازم تتزوج بنت خالتك يارفيق ياولدي..لازم تكون راجل قد حتى الغلط اللي يغلطه..وماتنساش ان عندك اخت يارفيق..
شبك صوابعه في بعض بقوة من القهر والخجل..
اسيمه:رفيق ولدي اشبحلي..
ماقدرش يقيم عيونه وامه تشوفله بحقد ودموعها ينزلوا..
اسيمه:رفيق..
قام عيونه بالسيف وشبحلها..
اسيمه:اليوم امك بتخطبلك بنت خالتك ولدي..وانت لازم تمشي تكلم بوها..وطبعا كل شي لازم يبان طبيعي...وصر عليهم اصرار بش يوافقو..وان لزم الامر هددهم..ايه هددهم..امك قالتلي انهم يخافوا منكم هلبه..وحيعطوك ..
رفيق نزل راسه ومسح بإيديه ع وجهه وتنهد بحرقه..
عفاف:انت درت المصيبه تحملها..خليك ولو لمرة وحده راجل في حياتك..
اسيمه:رفيق راجل واني نعرفه كويس ياعفاف..
قام عيونه وشبح لأسيمه..
ابتسمت بحزن ..
غمض عيونه بألم ونزل راسه لوطا..وقعد يهز فيه بإيجاب..
اسيمه شبحت لعفاف وحطت يدها ع يدها..
عفاف شدتها وهي تغمض في عيونها وتفتح فيهم ودموعها ينزلوا....
•••••••°°°°°°•••••••°°°°°°°•••••••
الساعه 2:30بعد الظهر..
مقعمزين يتغدوا ع صفرة وحده..
دانيه:جابها ساهله ع اساس يساعد فيا..
مجاهد:غصب عنه مش بجميله يحمد ربه اللي هدا مادرنا معاه..
سدينه:منه لربه ياخد فيه الحق هو واللفعه متاعه..
ضحكوا البنات..
بعدين مجاهد قال وهو مبتسم: شفت خالتي ماجده طالعه هي وبوي..
سدينه:ابصر من عازمه مسكينه كبدها زاهقه من صحابه ونساوينهم..
رتاج:حتى انتي مسكينه تصدقي فيها..
مجاهد شبحلها وقال:مش عارف شن ريتي منها بش تقعدي واخده هالموقف..
رتاج:ساد جت ضرة ع امي..
ضحكت سدينه:ع خاطر بوك اول مرة ياخد عليا..وبعدين المراة كويسه مافي يوم سمعت كلمه وجعتني..
دانيه:تعاول معاها وتساعد فيها وتنزل تغير في جوها تقول اختها مش ضرتها..
سدينه:نشهد بالله هي وعيلتها ناس طيبه ماعرفتش زيهم..
دانيه:ايه يهبلوا بالذات سارة..
رتاج ابتسمت وقالت:ايه حتى اني حبيت سارة وامها الحق..
سدينه:سارة ماشاء الله عليها ماتقولش تقرا تالته اعدادي بكل..هكي كيف تتكلم وكيف مؤدبه..
دانيه بلعت لقمتها بعدين قالت:احلا انها بتقرا في مدرستنا السنه الجايه..
مجاهد ياكل ومكتفي بالسماع..
رتاج:حقه هي ماكانتش متحجبه؟
دانيه:اممم..اني كنت معاهم يوم اللي مشينا للسوق مشيت تشري لبس محجبات اول مرة لبست فيها الحجاب هداكا اليوم..
شبح مجاهد لدانيه...
دانيه بإبتسامه:قداش فرحتها اثرت فيا هكي تقول لبست بدلة التخرج..
مجاهد ابتسم ابتسامه خفيفه وهو يشوف للصونيه..
سدينه:ربي يكملها بعقلها..
مجاهد:رشيد لأمتى بيقعد راقد..
سدينه:تو ينوض قبل تمشي ان شاء الله..
مجاهد هز راسه وكمل ماكله..
وخواته يشوفوله بضيق جي اليوم اللي بيولي فيه مجاهد لعمله..هاليوم ديما يتمنوه مايجيش..والزوز في قلوبهم خوف من اللي جاي...
وامهم أكثر خوف منهم...
•••••°°°°••••°°°°°•••••
ماشين بطريقهم للسيارات وهما يهدرزوا..
:الخميس الجاي زي هالوقت..وكانك راجل جيب سيارة وتعالى..
زياد وقف وجبده من ياقة سوريته وقاله بغضب:راجل غصب عن خشمك..وحط صبعه ع خشمه..
زميله نزل يد زياد بقوة ودفه وهو يقول:تمام يازيزو موعدنا يوم الخميس..
زياد هز راسه وهو يتوعد فيه..
نعيم جي بيناتهم وقال:خلاص خلاااص.. انت وياه...
وجبد زياد لسيارته وركبه وزياد مازال يشبح لزميله اللي يستفز فيه بضحكاته الساخره...
بعدين تحركت السيارات كل وحده لوجهتها..
•••••°°°°°•••••°°°°°°•••••°°°°°••••°°°°°••••
الساعه السادسه عصرا..
مقعمزين في الجنان يشربوا في القهوة..
هيثم:امم..لالا الفترة الجايه لا..
اسيمه بإبتسامه:كويس..في بالي نمشوا مع بعضنا لأي مكان قنين وهادي نديروا زردة تانيه يعني تعويض عن اللي فاتت..
هيثم:امم..اوكي مافيش مشكله..يوم الجمعه جدا مناسب..
اسيمه بإبتسامه:حلو..بعدين ضحكت وقالت..نفكر في اليوم اللي بيجوا فيه الناس اللي بيخطبوا نوسه..
هيثم بضحكه:الا حقه هي وينها نبي نهدرز معاها في الموضوع..
اسيمه:اليوم مروحه تعبانه تغدت وصلت العصر ورقدت طول..
هيثم:والباقي؟!
اسيمه:زياد روح من حوش صاحبه قبل العصر بشويه بعد صلى العصر رقد..اما سارة اكيد تقرا..
هيثم:قاعده تتعامل مع بنت خالد!؟
اسيمه وجهها تغير وقعدت تشبحله وهي ساكته..
هيثم رفع حواجبه وقال..امم شنو؟!
اسيمه:صعب هكي ع طول ياهيثم..
هيثم بصرامه:لاطول لاعرض يااسيمه هي كلمه تقطع علاقتها بيها نهائيا...
اسيمه سكتت وهي تهز فراسها بإيجاب وعيونها ع فنجان القهوة..
هيثم:من بعد اللي عرفته عنهم مانبيش نعرفهم بكل..
وخدي فنجانه وشرب القهوة..
واسيمه خدت فنجانها وشربت منه وهي متوترة وخايفه لأنها مدرقه ع هيثم اللي صار بينها وبين عفاف وتدخلها في حل مشكله رفيق...ومش متخيله كيف حتكون ردة فعله لما يعرف..
•••••°°°°°°••••••°°°°°•••••
الساعه الثامنه والنص مساءا...
في حوش اخت عفاف...
كانت مقعمزة مع خواتها اللي كانوا متفاجئات ع الآخر في طلبها من وحده منهم..
عفاف بإبتسامه مصطنعه:اللي تبيها فيها نعطوه المقدم المؤخر الكسوة..حتى بتاتها خليه علينا..وخيتي ولدي بيهبل عليها البنت قال ياهي ياالموت..والعرس نبيه بعد رمضان يام..
وسجى تسمع فيها وهي بطير من الفرحه..
وسماح تشبحلها بصدمه ومش قادرة تستوعب اللي قاعد يصير..
عفاف:هاه ياوخيتي شن قلتي؟
اختها وهي تشبح لبنتها:والله كان بوها عطاها اني عطيتها..
عفاف ابتسمت براحه وقالت:بإذن الله يعطيها..يعطيها...
وسجى تقول بهمس:نديرله العار كان ماعطانيش..
شبحتلها بنت وحده من خالاتها وضحكوا الزوز..
🍁اما عند الرجاله..
فكان رفيق اللي مقعمز حدا بوه يكلم في راجل خالته ماانجبرش يصرف طاقة زياده في اقناعه مجرد ماقاله انه حيتكفل بكل شي..طول عطاه...
خالد نهائي ماكانش راضي ع هالنسب ومستغرب في ولده هلبه عارفه مايطيقش عيلة امه شن اللي غير موقفه منهم لدرجة انه يبي يناسبهم مرة وحده!..
.........
وهو ماشيين بطريقهم للحوش..
خالد:قدام وجهك ليها سنين هدا وين طبيت في حبها!؟
تنهد رفيق بحسرة وهو يشوف لحوش هيثم وقال:هدا اللي صار يابوي..هدا النصيب..
شبحله بوه بعدين شبح وين يشبح..ورجع يشوفله مرة تانيه بنظرات شك...
شبحله رفيق بعدين ضحك نص ضحكه وقال:خش يابوي..
خالد هز راسه وهو مازال يشوفله بنفس النظرة..
وخش وراه رفيق وصكر الباب...
وهما خاشين سمعوا صوت نغمات القيتار..
خالد:خليل روح!
رفيق:ايه خلا الحوازة لجهاد وصحابه..
خالد:امم..
وخشوا الزوز للحوش..
شافوا القطوسه مقعمزة فم باب الدار..
طبس عليها خالد خداها وهو يشوف لخليل كيف يعزف ع القيتار...
ورفيق حتى هو قعد يشوفله..
شويه وبدي خليل يغني...
اوقات يادنيا معاك بعيش..
وساعات مابفهمكيش..
وانت ولافهماني..
اوقات بحس ان انا مجروح..
عايش حلاوة الروح..
ودمعتي محاوطاني...
خشوله داخل وهما يشبحوله..لاحظوا ان دموعه كانوا ينزلوا..
خالد شبح لرفيق ورفيق يشبح لخوه وهو مستغرب..
رفع خليل راسه وهو يغني بحرقه..
صابر ع اللي بيجرالي..
وانتي لاليكي عزيز ولاغالي..
صابر ع اللي بيقرالي وانتي لاليكي عزيز ولاغالي...
ليه ليه..
خالد بصدمه:خليل..انت شارب!؟
ابتسم بتهكم وكمل يغني وهو يعزف..
اوقات في عز العتمه بشوف..
وساعات بموت من الخوف..
وغصب عني بداري..
بحلم يعدي علي الليل..
من غير عذاب ولاويل..
وتحسي مرة بناري..ناري..
ااااه...
وشبح لبوه وخوه وقال ...صابر..
وكمل يغني..
صابر ع اللي بيجرالي...
وانتي لاليكي عزيز ولاغالي....
صابر ع اللي بيجرالي..
وانتي لاليكي عزيز..ولاغالي...
ونزل بيده ع اوتار القيتار بقوة..
وشبح لرفيق وقال:احسن مادرت...عين..العقل..
ناض وقف وقفه مهزوزه وهو شاد القيتار ويقول بنبرة صوت مترنحه:اللي زينا هدا نصيبهم راهو...مفروض..مايشبحوش فوق...فوق...واشر بصبعه جهة حوش هيثم..فوق...غادي..اللي يشبح فوق..زي مايقولوا رقبه..تنكسر...حط يده ع رقبته من الخلف وخبطها بقوة وقال..تنكسر ياخوي..
خالد:خير بلاك انت التاني!..
ضحك خليل..
ورفيق يشبحله بحزن...
خالد يشبحله بصدمه ومش مصدق الحاله اللي شايفه فيها...
ع خشة امه ومعاها اخته..
لما شافت حالته انصدمت وقالت:شن هدا!! خليل..شارب!!..شبحتلهم وقالت..خليل شارب!!
وتهاني تشبحله ومش مصدقه..
خليل:ايه ايه..شارب ايه شارب..مش انتي ديما تقولي فيها..حني ضالين...فاسدين...شن متوقعه من الفاسد والضال يعني...غير انه يكون فاسد وضال...الناس كلها تقول هكي...
وماكذبوش...ايه...ماكذبوش..
عفاف وهي تشوفله بصدمه ودموعها ينزلوا:لالا مافيكمش رجا انتم..مافيكمش رجا..
خليل قعد يهز في راسه بإيجاب بسرعه وهو يقول:ايه..ايه...ايه..ايه...ايه..
ورفع القيتار وخبطه ع الحيط..
عيطت تهاني..
خليل:ايه وخبطه مرة تانيه..
عفاف:حي عليا خيره الولد!!
خالد طلق القطوسه وجاه وهو يقول:خليل..خليل..مش هكي..خليل..
وشده بقوة...
طاح منه بقايا القيتار شبح لبوه وقاله ودموع منه ينزلوا:علاش هكي..علاش يابوي..علاش..علاش قولي..علاش درت فينا هكي قولي..قول..
خالد قعد يشبحله بألم..
شد خليل وجه بوه وهو يقول بصوت عالي:قول..قولي علاش يابوي...علاش...علاش خديت امي..ومرمدتها..علاش جبتونا...علاش نهيتنا نهيتنا من قبل مانجوا علاش..علاش قولي...علاش...
خالد جبد ولده وضمه بقوه ودموعه ينزلوا..
وخليل انهار وقعد يبكي وهو يقول:علاش..
تهاني ماقدرتش تتحمل مشت طول تجري لدارها وهي تبكي..
اما رفيق اللي كان يبكي حتى هو طلع امه برا وصكر الباب..
عفاف انهارت بالبكي..
ورفيق ضمها لحضنه وقعد يبكي معاها...
وصوت بكي خليل كان الأعلى صوتا...
اول مرة من لما كان صغير يبكي خليل...دمعته كانت صعبه هلبه مايشوفوش فيها بكل..
وعمرهم ماشافوه بهالحاله...
بالذات خالد اللي كانت يستمد في قوته منه كان يشوفله عن انه هو بوه مش العكس...
وحالته هادي زادت كسرت خالد اكثر اكثر...وبدي وجع قلبه ع صغاره يزيد اكثر واكثر...
••••••°°°°°
فهالوقت...
كانت نسيبه في دارها..
تصلي في صلاة الإستخاره بخصوص موضوع راجح..
بعد ماكملت الصلاة..
دموعها نزلوا... غمضت عيونها بشده بعدين تنهدت وشبحت فوق وهي تقول..
ياربي..انت تعرف كل شي..انت بس اللي تعرف شن بيصير بعدين..تعرف الخيره وين ياربي...يارب وتعرف الوجع اللي نحس بيه هني..وحطت يده ع قلبها...يارب...وبصوت مخنوق قالت...ريحني يارب..ريحني باللي فيه خيرتي يارب...
ونزلت راسها وقعدت تبكي بصمت....
🥀البعض يقول:ليس لنا الا الدعاء..
عجيب..وهل هناك قوة اعظم من الشي الذي ليس معك غيره!؟🥀

.....يتبع ...