البطل المغمور "شمس الغروب"

الجزء التاسع

💐..
خش عليهم بعصا اشبه بالخيزران منظرها يركب الرعب..
وهو نظراته كانت تخوف اكثر وصوته اكثر واكثر وهو يقوللهم:اني ديرولي هكي يامسخه انتي وياهم!..
سدينه وهي تاخد في انفاسها بصعوبه:حرام عليك..يامجيد..اتقي..الله..
مجيد هز راسه بوعيد وقدملهم وهو مندفع زي الوحش وهما عيطوا ع طول حسهم..
جي طول لرتاج اللي كانت متكمشه في بعضها وهي ترجف وتعيط..
تراجي في الجلدة اللي ألمها قاتل امتى تنزل عليها...
لكن لما سمعت صوت عيطه امها عرفت انها جت في الشخص الغلط..
دانيه وهي تعيط:امي!
سدينه برغم قوة الخبطه اللي نزلت منها لكن قعدت تحامي وهي تحاول تشد العصا وتقول بعياط :اتقي الله...خاف ربي ياراجل..حرام عليك..
مجيد بكل غل:اهاااه..وخبطها خبطة تانيه..
جاته دانيه وقعدت ادف فيه وهي تقول:حول..حول..
جبدها من شعرها وبدي يضرب فيها عيطت من قوة الألم وامها عيطت معاها وقعدت تحاول تحامي عليها حتى هي..
والراجل..اللي مفروض يكون ليهم الأمن والأمان والسند والصدر اللي يحميهم قاعد يضرب بقسوة بقلب كالحجر مافيشي ذرة رحمه..
🌾ماجده معاش قدرت تقعد في الشقه..
لبست عبايتها ووشاحها وطلعت من شقتها ونزلت تجري..
لقت الجيران واقفين قدام البيبان ويسمعوا وهما متألمين..
طاحت في وذنها جمله قالها جارهم اللي قدامهم..
"الراجل هدا يبي الحرق"..
زادت تأكدت ان مجيد انسان مافيشي حاجه وحده باهيه والندم بدي ياكل فيها ماكله..
وصلت في باب الشقه وبدت ادق فيه بقوة وهي تقول:مجيد يامجيد..
والجيران يشبحولها...
🌿قدام اول عمارة في الشارع..
كان رشيد مقعمز هو وولاد من عمره
فيد واحد منهم هاتف ويتفرجوا ع فيديو وعيونهم مفتوحه ع وسعها
بعد تم قعدوا يتكلموا عن محتوى الفيديو بكلام مقرف يقرف وذن تسمعه واصابع تكتبه وفم يقوله الا هما وأمثالهم.. وهما زي هلبه مراهقين مافيش من يراقب سلوكهم وتصرفاتهم ويعلمهم الصح من الغلط والحلال من الحرام..
رشيد:ابعتهولي
الولد:هات هاتفك..
عطاهوله خداه..
فجأة..
سمعوا صوت سيارة شرطه..
كلهم انتفضوا من الخلعه والخوف..
بعدين ناضوا وقفوا وشافوها وهي خاشه للشارع..
مشوا وراها وقعدوا يتبعوا فيها..
وكذلك..حسام طلع من المحل وهو يشبحلها بإستغراب..
وقفت قدام العمارة الاخيره..
ونزلوا منها العناصر يجروا..
طول لحقهم رشيد يجري..ووراه حسام..
وصلوا الشرطه قدام الشقه..
بعدت ماجده اللي كانوا دموعها ينزلوا من خوفها ع البنات وامهم..
بدوا يطقوا الباب بقوة وواحد منهم يقول:افتح الباب افتح..
وصوت العياط مازالوا يسمعوا فيه..
ماجده:شن تراجو لين يقتلهم!!..
جارهم :راهو الراجل هدا كان بدي يضرب مايبطلش لين يدوخوا تحت ايديه..
ماجده شبحت للجار بصدمه..
وعناصر الشرطه مالقوش قدامهم حل غير انهم يكسروا الباب..
بدوا يدفعوا فيه بقوة لين انكسر وانفتح..
وخشوا طول ووراهم ماجده..
ورشيد كيف وصل خش يجري طول وهو مفجوع..
اما حسام قعد واقف قدام الباب وهو متوتر..
🌾لما وصلوا للدار..
لقوهم طايحات ع ركابهم ويأنوا ويبكوا من الألم..
ومجيد بغل غله يضرب..
جوه طول شدوه وواحد منهم قال:تعال معانا يامجرم..يامجرم..
طاحت من مجيد العصا وهو يقول:حولوا حولوا..راجل يأدب في مرته وبناته مادخلكمش..
واحد رد عليه يقول:صكر فمك واسكت..
وطلعوا بيه من الدار..
ماجده قعدت تشبحله بقرف وقعدت معاه بعيونه لين طلعوا بيه برا الحوش..
هي طول مشت للباب شافتهم لما نزلوا بيه وهو مازال يعيط..بعدين شافت حسام واقف يشبحله بعدها شبحلها وقال:خير يامرت عمي شن صاير؟!
شبحتله من فوق لتحت بعدين خبطت في وجهه الباب بكل قوة...
هو انصدم وقال:خيرها هادي؟!
الجار قال:لاحول ولاقوة الا بالله..وخشوا هو وزوجته وصكر الباب..
حسام التفت شاف لباب شقتهم..
مط شواربه ع جنب بإمتعاض وبعدها مشي نزل..
🌾داخل..
بعد صكرت ماجده الباب مشت بسرعه للدار..
خشتلها لقتهم مقعمزات حاضنات امهم والتلاته يبكوا..
ورشيد واقف يشوفلهم ودموعه فعيونه..
جت لرشيد وقالت؛ترا اطلع شويه ولدي..
الولد شبحلها بعدين لف ومشي طلع من الدار..
وهي صكرت الباب وجتهم...
قعمزت ع ركابها حداهم قعدت تشوف في آثار الضرب وتتفحص في سدينه وهي تقول:عطيه كسرة..
رتاج بنبرة باكيه مرتجفه:ريتيه..عرفتيه توا..هدا مصيرك..حتى انتي..
ماجده قعدت تشبحلها وهي تمسح فدموعها بعدين قالت:وحده فيكم لازم تنوض تمشي معاي توا للمركز وتشكي فيه..
سدينه بتعب؛لا..لا ياوخيتي..لا..مانبوش العار..سادنا هالفضيحه..
ماجده:ياسدينه كان ماشكيتوش فيه بيعاودها الف مرة..
دانيه بألم ووجع:تعودنا..خلاص..
ماجده مررت نظرها عليهم وقلبها قاعد يتقطع..
سدينه؛وراس..وخيتي..بري وراه..طلعيه...بالله عليك..
ماجده قعدت تشوف لسدينه ودموعها تنزل..بعدين ناضت وقفت وهي تقول:الله ينتقم منه..
ومشت للباب..وهما يشبحولها..
وفتحت الباب وطلعت...
ورشيد خش لأمه وخواته..
جي لامه طول قعمز حداها وخش لحضنها وهو يرجف..
سدينه:مافي شي..مافي شي ياامي..
ورتاج ودانيه يبكوا...
فجأه..رن تليفون رتاج..
رشفت ومدت يدها للطاوله اللي فوقها وقعدت تتلاحق فيه لين شداته وخداته..
نزلاته وشافت المتصل قامت عيونها للصورة المعلقه ع حيط دارهم وقالت:مجاهد..
سدينه بألم؛وليدي اكيد اتصل بيا هلبه..هاتيه هاتي..
عطتها رتاج التليفون..
خداته سدينه وهي تمسح فدموعها بعدين خدت نفس وفتحت الخط وردت..
سدينه بضحكه مصطنعه؛ايوه جهوده..
مجاهد:امي..وينك من بكري نتصل بيك قريب تلاتين مرة..
سدينه ضحكت وقالت؛مقعمزة اني وخواتك نتفرجوا ع مسلسل احداثه تسحن الكبد من بكري واني نبكي..
مجاهد بضحكه؛هدا علاش صوتك هكي..ياودي اليوم عيد الأم قولي للمهبولات بناتك يفرفشوك مش ينكدوا عليك..
سدينه بلعت ريقها وقالت بضحكه؛اني نحبه المسلسل.
مجاهد بإبتسامه؛باهي تحبي مجاهد؟
ضحكت وقالت:مانحب غيره..
مجاهد:هههههه غير راهو يسمعوك قوم حاسد اذا حسد..
سدينه بضحكه:لالا..
مجاهد ابتسم وقال:تمام..امي شويه ويدق الباب عليكم..
ارتسمت ع وجه سدينه ملامح الخوف وهي تقول؛مروح!!
مجاهد:لالا يام وين مروح!؟ باعتلكم حاجه بس..
سدينه بإستغراب:حاجة شني؟!
وجاها الجواب لما دق الباب..
سدينه:الباب يدق..
رشيد؛تو نمشي نفتح..
وناض وطلع يجري من الدار..
وخواته يشبحوله..
سدينه:شن بعتت مجاهد.؟
مجاهد بإبتسامه:شوفي بروحك اني توا بنصكر وراي خدمه..في امان الله يام وسلمي ع البنات..
سدينه:في حفظ الله ولدي..
نزلت الهاتف وناضت وقفت بصعوبه وهي تتوجع..
رتاج:شن في يام؟
سدينه؛خوك ابصر شن باعت..
ومشت بإتجاه الباب والبنات ناضوا بصعوبه حتى هما ومشوا وراها..
وين طلعوا من الدار..
جاهم رشيد وهو شاد بوكس..يشبح لامه بإبتسامه..
البنات وامهم قعدوا يشوفوا لبوكس الهديه المغلف ب"التول"..
كان فيه لبسه وكندره وورد وحنه شعر وحنة ايدين ورجلين وباكو عطر غالي..
البنات ضحكوا ودموعهم تنزل..
وسدينه قعدت تشوف للحاجات وهي مبتسمه بحب ودموعها ينهمروا انهمار..
مسح مجاهد بدون مايعلم الم ووجع امه وخواته فلحظه..
وغمر قلبهم بسعاده نستهم تعاسة اللحظات اللي قبلها..
سدينه:ربي يحميك ويعليك ويعطيك الخير ويفتحلك بيبانه ياولدي وين ماتمشي..
ودانيه ورتاج حطوا روسهم ع كتاف امهم وهما مبتسمات بحب..
🌷🌷🌷🌷
ماأجمل ذلك الحلم الذي رأيتك فيه ليلة البارحه..
بدوت فيه جميلة جدا لأنني رأيتك فيه بفستاني الأحمر وهيئتي المكتملة الأنوثه وانا اجلس ع تلك الأرجوحه الجميله في جنة انت صاحبها..
اظن بأن تلك الجنه كانت قلبك..وخضرتها هي بريق عينيك وصفائها هو صفاء روحك وذاتك..
لكم وددت ان احادثك حتى في الحلم..
اريد فقط ان اقول لك جملة واحده..
"لم أر رجلا جميلا مثلك في حياتي"...
حطت البيرو وتنهدت من قلبها ..بعدين سرحت وهي تفكر فيه..
قطع عليها سرحانها صوت الباب لما طق..
سارة التفتت وقالت:تفضل.
انفتح الباب وخش شخص غير متوقع بالنسبه ليها..
ناضت وقفت طول..
هيثم:شن ديري؟!
سارة؛شي..
هيثم قدم وشبح لطاولتها شاف مذكرة وردية وبيرو..
وسارة تشبحله وقلبها يرتعد من الخوف..
غير عيونها ليها وقال:قالتلي امك ع القصة القصيره اللي فزتي بيها في مسابقه..
سارة فتحت عيونها ع وسعهم وهي تشوفله..
هيثم؛مش عارف على شن تحكي..لكن مدحوا فيها هلبه ناس..هو كويس اللي سمعته عنها..عن اللغة متاعك ومفرداتك..بس المهم عندي ان دراستك ماتتأثرش..اي شي غيرها..دوة فارغه..
سارة نزلت عيونها وهزت راسها بإيجاب..
شبحلها شويه بعدين قال:انتي السنه هادي شهاده زي ماقالت امك نبيك من الأوائل في البلاد مش بس العاصمه..
قامت عيونها وشبحتله..
هيثم:شني هلبه عليك!
سارة حركت راسها يمين ويسار بالنفي..
هيثم؛باهي خليني نشوف بعيوني ونسمع عنك فقرايتك اللي سمعته عن القصة..
سارة:واحسن..
هيثم هز راسه وقال:كويس..رفع حاجبه وقال..تبي حاجه ناقصاتك حاجه!؟
حركت راسها يمين ويسار بالنفي..
هيثم:كويس..كويس..
ولف ومشي للباب وطلع وصكره وراه..
زفرت سارة بعدين الفتت للمذكرة..صكرتها ودستها في القجره وصكراته بالمفتاح..
••••°°°°••••°°°°••••°°°°••••
الساعه التاسعه والنصف...
كان متكي وهو يشوف لهاتفه يراجي في اتصال واحد من ولاده وهو في قمة القلق..
طق باب المربوعه..
خالد:من؟
"أني"..
ابتسم وقال؛خشي..
انفتح الباب وخشت تهاني وفيدها صفرة العشي..
خالد:اياه كبيرة بنتي تهاني جابتلي العشي..
ابتسمت تهاني وجاته وحطت الصفره قدامه..
بعدين قربت منه وباست ع راسه..
وقلبه بيطير من الفرح...
بعدت عنه وقالت:حمد لله ع سلامتك بابا..
خالد وهو يشوفلها بإبتسامه؛الله يسلمك بنتي..شن دايرة في قرايتك..
تهاني:كويسه..
خالد:مافي شي صعب عليك؟
تهاني:لالا..
خالد:باهي باهي. بالنجاح..
تهاني:يارب..شبحتله شويه وقالت..تقدر تاكل بروحك؟
خالد شبحلها شويه وقال:لا..
تهاني ابتسمت وقالت:باهي تو نوكلك اني..
خالد بإبتسامه؛مانعطل فيك ع شي ولا؟
تهاني:لالا..
وقربت من الصفرة وخدت الكاشيك وبدت توكل في بوها..
وبوها ياكل من يدها وهو فرحان ع الآخر اول مرة تهاني بنته تهتم بيه هكي..
شويه وبدي يهدرز عليها ويبصر وهي تهدرز معاه وتضحك ع بصارته..
وفي عز هاللحظه الحلوة..
"انتي هني تاهو"..
سكتت ضحكات البنت وبوها..
شبحت تهاني للباب وقالت؛شن تبي؟
سماح؛تعالي تعشي..
تهاني:قلت لأمي مانبيش..
سماح وهي تسرق في النظر لخالد:تعالي كولي حتى شويه..
تهاني بحده:قلت مانبيش..
سماح:باه..براحتك..شبحت لخالد وقالت..صحتين خالد..
شبحت تهاني لبوها..
هز خالد راسه بدون مايشوفلها..
تنهدت سماح وطلعت صكرت الباب..
تهاني:حقيرة...
شبحتلها بوها وهو رافع حواجبه..
تهاني شبحتله وقالت بشي من الأنفعال:خالاتي كلهم نكرههم..
خالد نزل عيونه للصفرة وقعد ساكت..
تهاني تأففت بعدين رجعت بتوكل بوها..
وقفها بيده وقال:خلاص..
حطت الكاشيك وهي تشبحله..بعدين خدت الصفره وناضت وهي تقول:ماتبي شي تاني..
خالد؛تس..
تنهدت تهاني بضيق ومشت للباب فتحاته وطلعت..
خالد شبح للباب وقال:عيلة امك كلها كان نلقى معاش نشبح منهم واحد..
🌾وعيلة امها اللي هي عفاف وهما ملمومين حداها ع الصفره كانت تمرر فنظرها عليهم وهي مبتسمه بحب فرحانه بوجودهم معاها ولمتهم حواليها..وحتى عيلة صاحب خالد امه وبنته وولده تحبهم ويحبوها وعلاقتهم ببعض كويسه...
هو هدا اللي تبيه عفاف ماتبيش الناس تنبذها تبي تعيش بيناتهم حياة طبيعيه زيها زي غيرها بين اهل وصحاب وجيران تواصلهم ويواصلوها...
•••••°°°°
عكسها سدينه..اللي بسبب طباع راجلها السيئة اهلها قطعوها وكتر خيرهم كان اتصلوا مرة مرة وسألوا عليها
لكن هي ماكانتش مهتمه..كل همها صغارها وبس
هدا علاش مشت مع ضرتها للمركز بش اطلعه..ع خاطر صغارها سمعة بوهم سمعتهم..
وفي النهاية هو بوهم لازم يقعد موجود فوق روسهم كيف ماكان..
🌾يافندي حني مانبوش نشكوا فيه وهادي شؤون خاصه مانبوا ندخلوا حد فيها
الضابط عقد حواجبه وهو يقول:والله كان انتم تقولوا هكي معناها مافيش داعي من قعاده هني..
ماجده شبحت لسدينه بعدم رضا..
وسدينه تشوف للضابط وهو يتكلم بالتليفون وفي عيونها نظرة انكسار واضحه..
🌿🌿🌿
طلعوا عبدالمجيد وروح مع نساوينه..
طول الوقت كان ساكت وملامح الغضب مسيطرة ع وجهه..
خدوا تاكسي وروحوا..
وكل حد مشي ع حاله...سدينه لشقتها..وماجده ومجيد لشقتهم..
•••°°°•••
خبط كفوفه في بعض بغضب وهو يقول:كان نعرف من هو ولد الكلب اللي بلغ عني..
ماجده رفعت حاجبها وقالت؛حاشا وبيي الله يرحمه الراجل الباهي اللي مافيش منه اتنين..
مجيد بصدمه؛انتي!؟
ماجده بغضب تخفي بيه مكرها:ايه اني بدون مانعرف ان الصوت جاي من الشقة اللي تحتي..ولايخطر عليا حتى الخطور يامجيد عابيه عليك في الجامع تصلي اتصلت بالشرطه وقلتلهم تعالوا في خانب نقز لوحده من شقق العمارة ومتهجم ع صحابها..ناري عليا قداش طلعت درويشه في الاخير طلعت انت تضرب في مرتك وبناتك..
مجيد غير عيونه عنها وقال بضيق:هما اللي طلعوني ع طوري..
ماجده:مهما كان ماديريش فيهم هكي..شن هدا معقوله!!ماتوقعتكش هكي بكل!!صدمتي صدمه فيك صدمتي صدمه..
ولفت ومشت لدار النوم..
مجيد بتذمر:تس...الله يلعنهم ويلعن الساعه اللي خديت فيها هالشقه..
•••°°°•••°°°•••°°°•••
"لالا هبو مانقدرش نجي"..
رتاج قعدت تشبح لأختها وهي واقفه ع المراية كيف تكلم في صاحبتها بعدين شبحت لوجهها فالمرايه وتنهدت بحزن..
دانيه:خلاص غدوة نبعت خوي للباص يعطيك كراسات كريمه......باهي......تصبحي ع خير..باي..
نزلت تليفونها وصكرت..
رتاج التفتت وقالت:والله لو مكان امي خليتهم يحبسوه مؤبد..
دانيه:ايه وتولي فضيحتنا فضيحه بين الناس حتى حسام ونور الدين يفوتونا..
رتاج :عادي المهم يفوتونا هالمناظر المقلبه..
دانيه مطت شواربها بملل وهي تشوفلها..
رتاج قلبت عيونها..بعدين حطت يدها ع ضربه في وجهها وقالت بوجع:شلل..
دانيه:رتاج خلاص ماتنسيش ربي عاد..
رتاج بضيق:استغفر الله..استغفر الله..
•••••°°°•••••
الساعه الحادية عشر ليلا..
ماشي في الطريق بالسيارة وهو يتكلم بالتليفون..
خليل:ايه الامور كلها تمام.......لالا الأجدم جوه كان تمام بالذات بعد صفينا الحساب...........لالاتمام التمام غير في حاجه صغيره بنعطيك بيها علم.....هدا الفرخ متاع الشرطه اللي اسمه ضياء مش مهني روحه.............عارفه مايقدر يدير شي لكن رقهالي وخايف نتهور ...........اوكي اوكي....تصرفوا انتم...........تم....وصكر وحط التليفون قدامه وشبح من المرايه للخلف بعدين شبح القدام وقال..بيخليني نحط فرقبتي رقبه..
عفس ع الفرامل وزاد السرعه...
والسيارة اللي وراه تبعاته...
وقعدت وراه لين خدي طريق حوشهم...بعدين ولت لمركز الشرطه...
اما هو...بعد خش بسيارته للحوش لقي خوته فم الباب يراجو فيه..
نزل من السيارة وصكر الباب وجاهم..
رفيق:شن صار!؟
خليل غمض عيونه وفتحهم وهز راسه بإيجاب بعدين خش للحوش وهما وراه..
وقف في مكانه لما شاف امه واقفه تراجي..
خليل:امي قاعده فايقه!؟
شبحتله من تحت لفوق بعدين حركت راسها يمين ويسار بأسف ولفت ومشت لدارها..
هو رفع حواجبه بعدين تنهد..حط يده ع عينه اليسار وقعد يمسح فيها وهو يقول؛بوي راقد؟
جهاد:ايه الدوا رقده..
هز راسه ومشي للدار..
رفيق:جعان..
جهاد:حتى اني برا قدامي للكوجينه نشوفوا كان في حاجه فاضله..
رفيق؛لالا نوض تهاني اديرلنا حاجه..
دفه جهاد وهو يقول:غدوة عندها قرايه اختك برا للكوجينه برا..
رفيق خطرت عليه سارة ابتسم ع جنب بعدين مشي الكوجينه وجهاد وراه وهو يضحك..
••••°°°°••••°°°°•••••
تاني يوم...الصبح..
الساعه الثامنه الا ربع...
رشيد كان ماشي للمدرسه وع طريقه بيوصل الكراسات لصاحبة اخته..
لقاها واقفه قدام الباص تراجي فيه..
وقف عليها وقال ؛صباح الخير..
هبه ابتسمت وقالت:صباح الخيرات..
مدلها الكراسات خدتهم منه..
هبه بدلتها الثانويه كانت ضيقه شويه ومفصلة جسمها والولد عيونه يتفحصوا فيها..
هي لأنه صغير ماركزتش عليه خدت الكراسات ومشت ركبت الباص والولد يفصل فيها تفصيل..
بعد مشي الباص..
هو مشي للمدرسه وعقله يفكر في حاجات كلها برا الطريق..
••••°°°°••••°°°°••••
"قهوتي واتيه"
اسيمه وهي ماشيه لدار التوأم:ايه تلقاها ع طاولة البار
هو مشي من حداها للكوجينه وصل فيها خدي قهوته ومشي للصاله..
وهو ماشي فاتت من قدامه سارة اللي قالت؛صباح الخير..
هو تبعها بعيونه وقال:صباح الخير..ورشف من القهوة..
قعد يشبحلها لين طلعت من الحوش وصكرت الباب..
شبح القدام وكمل طريقه لين وصل الصاله..
شبح فوق لمكان الساعه..
اتفاجئ لما شاف فمكانها اللوحه..قعد يتأمل فيها...
ع خشة نسيبه للصاله شافاته ضحكت ومشتله..
حاوطت كتافه بإيديها وقالت:عجباتك؟
هيثم وهو يشوف للوحه:ناقصه..
نزلت يدها وشبحت بربع عين وقالت:شن ناقصها يافنان!
هيثم شبحلها وابتسم بعدين شبح للوحه وقال:مفروض رسم خمسة من دوار الشمس مش اربعه..
ارتسمت ع وجهها ابتسامه وهي تشوفله..
"صباح الخير"..
هيثم رشف من القهوة وماباش يرد..
ونسيبه تعكرت ابتسامتها التفتت لولد خوها وقالت:صباح الفل..هيا زيزو ..
ومشتله..
هو سبقها وهي لحقاته..
اما هيثم مشي قعمز ع الصالون بفنجان قهوته وقعد يرشف فيها وبدي يفكر في المقبل عليه من حياته..
••••°°°°••••
فهالوقت..
كانت سارة ماشية مع تهاني للباص ووراهم رفيق بمسافه بسيطه وعيونه عليها..
وصلوا في الباص ركبوا هما الزوز..ورفيق وقف ومازالو عيونه هايمات في سارة لين مشي الباص..
تنهد من قلبه..بعدين لفت ومشي متوجه للورشه..
☆قدام الورشه..
كان خليل واقف يشرب في القهوة وهو يشوف للساحه الفاضيه قدامه بسرحان..
فاق من سرحانه لما سمع صوت سيارة نسيبه اللي يميزه من بين مية سيارة..
شبحلها وهي تسوق وتهدرز ع ولد خوها والزوز يضحكوا..
ابتسم وهو يشوف لضحكتها قداش متمني هالضحكه تجي فوجهه عن قصد..
ممكن عند خليل حاليا مافيش أغلى من هالأمنيه..
فاتت السيارة من حدا رفيق اللي كان ماشي للورشه..
شافلها شويه بعدين شاف خوه لقاه كيف ناض وخش الورشه..
ابتسم بتهكم..بعدين وصل فيها وخش حتى هو..
•••••
الساعه التاسعه الا ثلث...
"ركزوا ع القانون كويس القانون هو المفتاح لحل اي مسألة مفهوم"..
البنات بأصوات متقطعه:ايه..مفهوم..
طق الباب..
شبحله جمعه وقال:تفضل..
خشت الأبله اللي تاخد في الحضور والغياب وع وجهها ابتسامة عريضه وهي تقول:صباح الخير استاذ جمعه..
جمعه غير عيونه عنها وشبح للسبورة وهويقول:صباح الخير..
الأبله:بعد اذنك يااستاذ بناخد الحضور والغياب..
هز راسه بالموافقه..
الأبله شبحتله شويه بعدين شبحت للبنات وقعدت تعد بعدين قالت:ناقصه وحده..شبحت للمقعد التاني من الصف الوسطي وقالت..دانيه غايبه! غريبه اول مرة اديرها..
هبه:مريضه ياابله..
الأبله:لاباس عليها..
جمعه التفت وشبح لمقعد دانيه..ضيق عيونه واذكرها بعدين شبح للأبله..
الأبله كتبت اسم دانيه عندها في قائمة الغياب..بعدين شبحت للأستاذ وقالت:سامحني استاذ..
هز راسه مرة تانيه..
هي ابتسمت مجامله وطلعت صكرت الباب..
جمعه صفق بإيديه وقال:ركزوا معاي اخر مسأله..
والبنات كلهم وجهوا نظرهم ليه بتركيز شديد وكلهم آذان صاغيه...
••••°°°°••••
الساعه التاسعه صباحا..
هيثم كان مقعمز وفيده الآيباد مركز فيه..يطلع ع ابحاث ومجلات علمية جديده صادرة الفترة الأخيره..
ع جية اسيمه هي والبنات التوام بعد لبستهم الجلوة وزينتهم لأجمل يوم عند الاطفال..عيدهم..
وقفوا وهما يشبحوا لبوهم..
اسيمه"يارب مايكسر بخاطرهم"..
ريحان:بابا..
مش معاهم بكل..
جنان:بااابا..
انزعج من الصوت العالي وقام عيونه وشبحلهم..
جاي بينت فيهم..لكن لما شافهم بهيئتهم الجميله..
ارتسمت ع وجهه ابتسامه حلوة ورفع حواجبه وهو مبهور بيهم..
اسيمه ابتسمت لما شافت ابتسامته..
ريحان:حلوات بابا؟..
هو حول نظاراته وميل راسه وهو يشوفلهم..
ضحكت اسيمه..
جنان:شنو بابا قول حلوات؟
رجع راسه زي ماكان واشرلهم بيده يجوه..
هما الزوز مشوله بمساعدة امهم...
وهو عيونه عليهم وابتسامته ع وجهه..
وصلوا فيه..
حط ايديه ع روسهم وقال:حلوات بابا حلوات..
وغمض عيونه وبدي يقرا..
واسيمه تشوفله بضحكه
لحظات وكمل نزل ايديه وقال:بروا مع ماما..
ريحان جت بتقوله حاجه لكن امها خلتها تتراجع لما قالت:هيا وقت عطلنا..بعدين شبحت لهيثم وقالت:امتى تطلع...
هيثم:ونص..
شبحت لساعتها بعدين شبحتله وهزت راسها بإبتسامه ومشت مع بناتهم..
هو قعد معاهم بعيونه لين ادرقوا من قدامه..
تنهد..ورجع خدي نظاراته ولبسهم وشاف للآيباد..
•••°°°°•••••°°°••••
قدام الورشه..
والولاد يخدموا ويهدرزوا..
رفيق:#### ياراجل..
خليل:قلت للزلفي يديرله حل..خير مانديره اني معاه..
قام رفيق راسه بيرد ع خوه شاف سيارة اسيمه طالعه من الزنقه....
قربت منهم ووقفت..
نزلت المرش وقالت:صباح الخير..
خليل التفتلها ووقف ع حيله وابتسم..
والزوز ردوا:صباح النور..
وقربوا كم خطوه من السيارة ووقفوا..
اسيمه:كيف حالكم وحال العيله..
الزوز:الحمدلله..تمام..
اسيمه:بالله الوالد شن حاله بعد طلع؟
خليل:الحمد لله اموره طيبه..
اسيمه:الحمد لله..الحمد لله ع سلامته..
الزوز ردوا عليها:الله يسلمك..
خليل غير عيونه للبنات وقال:ماشاء الله ماشاءالله..رجع شاف لامهم وقال:بالله راجي شويه خالتي اسيمه..
ولف ومشي خش للورشه..
اسيمه هزت راسها وقالت: باهي..بعدين شبحت لرفيق وقالت..الخدمه ماشيه تمام؟
رفيق بإبتسامه:الحمد لله..
اسيمه ابتسمت بأسف وهي تشوفله..
ع طلعة خليل بكيسة متوسطة الحجم معبية شكلاطه..جي لأسيمه وقال:فرقوها ع الصغار..
ابتسمت وقالت:بارك الله فيك ياخليل..وخدتها منه
خليل:فيك بارك الله..
اسيمه بعد حطت الكيسة داخل قالت: هي..نستأذن..السلام عليكم..
الزوز ردوا عليها وقالوا:وعليكم السلام..
تحركت اسيمه وهما مع السيارة بعيونهم لين ادرقت..
خليل:المراة هادي زي الملايكه..
رفيق:تعرف..
شبحله خليل..
رفيق:لو بوك خدي مراة زيها كان حاله احسن من هكي..
خليل التفتله بجسمه كله وقال:وخيرها امك؟
رفيق:ايه امي ونحب تراب رجليها..لكن مش منسجمه مع بوي لاتبي تفهمه ولاعرفت تعيش معاه..
خليل شبحله شويه بعدين غير عيونه عنه ومشي للسيارة هو يقول:امك مراة مافيش منها ياريفو..واللي يده في المية مش زي اللي يده فالنار..
رفيق غير عيونه وهو يفكر فكلامه بعدين مط شواربه ع جنب ورجع طبس ع سيارته وكمل خدمته..
🌿🌿🌿🌿
ايه صح اللي يده في المية مش زي اللي يده فالنار..
عفاف اللي مازالت لتوا قاعده مع خالد وهي تقدر تمشي وتخليه اصلها الباهي وحبها ليه خلوها تقعد معاه برغم كل شي..
كانت تحاول تصلح تحاول..وداخليا كان عندها امل ان الحال ينصلح..
🌾مروا اربعه أيام..
وهي تعاني فيه لكن مقاطعته...
اما هو فكل همه وجودها معاه وحواليه هدا مايبي..
🌿بس في من فهالأربعه ايام قلبه يغلي من القلق ع البنية اللي خداته..
اربعه ايام معاش شافها لا فالصبح ولاالمرواح...
لهدا مالقاش قدامه غير انه يشد اختها في وقت المرواح وينشدها عنها..
يوم الإربعاء...
🌷في مدرسة دانيه..
الحصة الخامسه كانت فاضيه..
والبنات في الفصل كانوا دايرات عرس..
كريمه ادربك ودانيه تغني..
دانيه:ولد عمي...
البنات:لالا..لالا..
دانيه:ولد خالي..
البنات:لالا..لالا
دانيه:البراني..
كلهم مع بعضهم:اها...اها..اها اها اها....
هايمات ماهامتهم حاجه...
والإشراف فاضي مافيه حد...
رن الجرس وتمت الحصه والبنات مكملات العرس ونسوا حصة الفيزياء الاخيره ومايجي منها..
واللي يجي منها..
كان راكب فالدروج وصل فوق..
كمل طريقه وهو يسمع في الغني والدوشه..
فاتت من حداه ابلة العربي وهي تمشي بسرعه قالت بضحكه؛دانيه قايمتها اليوم..
وكملت طريقها وهي تضحك..
وجمعه يشوفلها وحواجبه مرفوعات..
وين وصل فالفصل..شاف الأبله كيف خشت فصلها ..
حرك راسه يمين ويسار..بعدين شبح لفصله..
سمع صوت زغروطة..وصلت عنده حدها..
فتح الباب ودفه برجله بقوة قريب طيره..
البنات كادوا يموتوا من الفجعه..
مشوا يجروا لمقاعدهم....
ودانيه نزلت من فوق المقعد ووقفت فوسطه مع باقي بنات الفصل..
هو قعد يشوفلهم بنظرة تخوف..شويه جت عينه ع دانيه..
هي نزلت عيونها بخوف..
هو قال:انتي..
شبحوله كلهم..
ودانيه معاهم لقاته يأشرلها بصبعه وهو يقول:اطلعي برا..
البنات انصدموا مع دانيه..
دانيه بصدمه:علاش ياأستاذ..
جمعه خش وقال؛انتي زمزامة مش طالبه..لما تولي طالبه نخليك تحضري الحصه..
وقف ورا طاولته وحط شنطته..قام عيونه وشبحلها لقاها قاعده واقفه قاللها بعصبيه:اطلعي..
دانيه نزلت عيونها وهي شاده دموعها بالسيف..طلعت من مقعدها ومشت لباب الفصل وطلعت..
هو مشي وراها وخدي الباب وصكره..
بعدين ولى وهو يقول:هادي مدرسه مكان علم..
وقف ورا الطاوله وهو يقول..زي مالجامع مكان للعباده..كل مكان ليه قدسيته الخاصه...الغني واللعب والهياجه حتى هما ليهم مكان وزمان معين..ولكل مقام مقال..رفع سبابته وقال..قبل حصتي اني المهزله هادي مانبيش نشوفها ولانسمعها اشر ع نفسه وقال...واني نحذر مرة وحده بس..
البنات قعدوا يشبحوله بريبه وقلوبهم واجعتهم ع دانيه اللي كانت واقفه برا تبكي..
اول مرة يصيرلها موقف زي هدا..عمرها في حياتها الدراسيه ماانحرمت من الحصه ولانها بنيه مجتهده وشاطره وديما من الأوائل وجعها اللي صار ع الآخر..
🌾وقعدت دانيه برا لين تمت الحصه ودموعها مابوش يوقفوا..
شويه انفتح باب الفصل
وطلع جمعه و هو لاهي يشوف لتليفونه
دانيه طول مشت وقفت قدامه وقالت؛استاذ..
غير عيونه وشبحلها..
نظرات عيونها اللي كانوا غارقات بالدموع والحزن..
والبكي مغير لونهم من الأزرق للأخضر الفيروزي..
غير نظرة عيونه للحده..
دانيه بتوسل:اسفه والله اسفه..رغم اني مش عارفه شن درت لكن اسفه بالله عليك خليني نحضر غدوة بالله عليك انت بس قولي غلطي واني والله معاد نعاوده.
ضيق عيونه وقال:قصدك حتى بعد قلت عليك زمزامه ماعرفتيش غلطك؟!
نزلت عيونها بإحراج وقالت؛باهي اني اسفه خلاص والله معاد نعاودها
رفع حواجبه وقال:مرة تانيه نستدعي ولي امرك..
قامت عيونها وشافتله..
غير عيونه عنها ومشي وهو يقول؛واني نحذر مرة وحده بس
هي قعدت معاه بعيونها لين ادرق من قدامهم..
ع طلعة هبه من الفصل وفيدها شنطة صاحبتها وهي تسأل:سامحك؟
دانيه شبحتلها وقالت:إيه..بعدين خدت منها الشنطة
هبه ابتسمت بفرح وقالت:هيا بسرعه الباص جي
دانيه لبست شنطتها وهي مضايقه ومشت هي وصاحبتها..
لحقوهم بنات الفصل وجو لدانيه يسألوا فيها سامحها الاستاذ ولا لا
ودانيه تجاوب فيهم وهي تفكر فكلامه لما قال..
《مرة تانيه نستدعي ولي امرك》
حست بشعور ضايقها هلبه لما سمعتها واذكرت من يكون ولي أمرها..
•••••°°°°••••°°°°••••
في مساحة ارض فاضيه ..
كان واقف حدا سيارته يراجي في حد..
استنى لمدة نص ساعه..
وبعدها جي الشخص اللي يستنى فيه..
درس سيارته ونزل صكر الباب بقوة يبين فيها انها غاضب.
جي لخليل وقاله:مانعرفكش غدار..
خليل برفعة حواجب:غدار!
الراجل وقف قدامه وهو يقول:خدمتنا كانت مع بعض والمربح بينا بالنص..فجأة..ومن غير سابق انذار قطعت كل شي بيني وبينك..
خليل:اللي قطع ياصاحبي الزلفي مع الراس اللي تخدم تحته والحسابات اللي بيناتنا صفيناها بالتراضي..وين الغدر فهدا !؟
الراجل:تي كيف وين الغدر!؟..انت بروحك قايلي قبل خدمتنا مع بعض مالهاش علاقه بالزلفي والاجدم..
خليل حرك سبابته يمين ويسار بالنفي وهو يقول:تس تس تس..اشر بإبهامه ع نفسه وهو يقول..اني قتلك نخدم تحت الزلفي وخدمتي اني وياك هو عنده علم بيها لكن ماادخلش فيها...حرك يده من اليسار لليمين وقال..هدا ماقلت..
الراجل شبحله شويه بعدين قال:يعني كيف توا..
حط ايديه فجيوبه وضيق عيونه وهو يقول:يعني ياغالي نقعدوا احباب وصحاب..لكن الخدمه تمت..
رفع حاجبه وهو يشوفله..
وخليل يشبحله..
غير الراجل عيونه وقعد يمرر فيهم ايمينه حوالين المكان..بعدين هز راسه وقال...تمام..تمام...
ركز نظره ع سيارته وبين انه ناوي يمشيله..وهدا كان تمويه منه...في لمح البصر طلع "البوخوصه" وفتحها وجي لخليل بيها..
وخليل اللي قري نظرات الحقد والغضب والغدر فعيونه كان مستعد لاي حركه مفاجئة..
شد يده قبل توصل فيه وضغط عليها بقوة وهو يلوي فيها بش يطيح الموس
والراجل كان متوجع ويحاول يكتم وجعه...
بين لخليل انه مش قادر يقاوم..
خليل:الغدر جي منك مش مني..
شبحله..وفي لحظه خبط راس خليل براسه خبطه قويه
خلت خليل يطلقه ويوخر وهو يتوجع..
الراجل عطي الموس بيده اليمين ليده اليسار وقدمله بيطعنه..
•••••
"مروحه توا ياسومه....اممم...امم..استعجلي سومه بالله عليك نكلم فيك واني نسوق خايفه نخش مكان فيه كاميرات تصورني ونكح 300 دينار لجماعة المرور.....ايه....باهي باهي.."
فجأة سكتت لما شافاته يضارب هو واحد..
وقفت السيارة...وهي تشوفلهم...
شافت خليل طاح والراجل جاه يجري بش يطعنه..
"نوسه..الو..نوسه"
••••
وين خلاص كان الراجل حيطعن خليل طعنة موت..
خليل انقلب..والطعنه جت فذراعه..
نسي الوجع وناض طول شد ذراعه وقال:عيل..
الراجل:تو نوريك شن يدير فيك العيل..
وقدمله بسرعه بيطعنه من جديد..
خليل كان حيقاومه...
بس هي سبقاته...لما نزلت بطرف حديده ع راس الراجل من الخلف..خلاته فلحظه يغيب ع الدنيا..
ويجي طايح ع وجهه عند رجل خليل...
خليل شبحله بصدمه..بعدين قام عيونه وشافها..
انصدم الف مرة في مرة...
نسيبه وهي شاده الحديده وداهشه:مامتش..
عقد حواجبه وقاللها بعصبيه:بري روحي..
رفعت حاجبها وقالت:شن هيااا!؟
خليل:روحي..قدملها وهو شاد ذراعها وقال بإنفعال..تحركي..روحي..
حطت يدها فنصها وقالت:مانيش متحركه..
غير عيونه عنها وضم شواربه لداخل بغضب..
بعدين شدها من ذراعها وجبدها وقعد يكر فيها..
وهي ماشيه معاه ومصدومه تقول:حي عليه اهوا حي!! من يحساب روحه هدا!!من يحساب روحه!!
خليل بضجر:تس..اااخ..
نسيبه :واااخ فوقها اخ!!
وصل بيها للسيارة وطلقها وقال:روحي..
ولف ومشي وخلاها..
نسيبه بصدمه:انت..انت هيييه...في من نكلم اني!!!
وهو ماشي وابتسامته ع وجهه وحواجبه معقودات..
نسيبه بصوت عالي:تعرف الحق مش فييك الحق فالجحشة اللي دارت فواحد زيك جميل..
ضحك..
نسيبه عيطت عيطه مكتومه بغيظ..
بعدين لفت ومشت لسيارتها فتحت الباب ولوحت الحديده
داخل وهي تسب فروحها..صكرت الباب بقوة قريب قلعاته..
وهي تقول:تفو عليك يانوسه ياهبله ياغبو..تفو..
عيونها تعبوا دموع ونزلوا وهي تقول بغيظ:ديري جو الغباء بعدين اقعدي ابكي يامختله..
وتحركت طول بالسيارة وهي تحرق فالعجل...
•••••°°°°°•••••°°°°••••••
وفي مكان تاني..
كان خوه واقف في بداية واحد من الشوارع..
شاف الباص جي شبحله بلهفه..
درس..شويه ونزلت دانيه..
مشالها طول وصل فيها وقال:مسا الخير..
دانيه خافت مشت طول بدون ماترد عليه..
هو لحقها وقال:بننشدك ع اختك وينها بالله طمنيني خيرها مغيبه؟! مريضه؟.
دانيه بخوف:ايه ايه مريضه..بالله عليك برا..
جهاد بخوف:خيرها!! من شن تشكي؟
دانيه شبحت القدام وهي فقمة التوتر والخوف..
شافت حسام جاي ماتت من خوفها..
سرعت مشيتها..وجهاد مازال وراها..
جهاد:بالله عليك ريحي بالي..
حسام لاحظهم من بعيد جاهم بسرعه وهو يقول لجهاد؛تفضل ياشاب شن تبي..
دفه جهاد وقال:فوتني ترا..
شده حسام من كتفه وقال:قتلك تفضل..شن تبي..
وقف جهاد..التفتله بشي من البطئ شبح ليد حسام بعدين شبحله وقال بصوت هادي مخيف:حول يدك..
حسام رفع حاجبه وماباش يحولها..
جهاد:قتلك..حول..يدك..
حسام زاد ضغط ع كتف جهاد..
غمض جهاد عيونه وابتسم بتهكم وقال:ماتبيش..
حسام:اممم.
فتح جهاد عيونه وهز راسه وهو رافع حواجبه..
بعدين رفع قبضة يده ونزل بيها ع يد حسام بقوة نزلها..
حسام شد يده وهو يحاول يخفي المه قال:قدها الحركه هادي!
جهاد:قدها وقدود..انت اللي مش قد حركاتك..
وصل حسام لأقصى مراحل الغضب جي لجهاد بيعطيه بوكس..
جهاد شد قبضة يده ولواها وخلاها ورا ظهره..وقعد يضغط عليها بقوة..
حسام معاش قدر يتحمل وقال بوجع شديد:اااه..
جهاد:قتلك مش قدهم..
طلقه..
وحسام لف عليه بيضربه..سبقه جهاد وعطاه بوكس ع بطنه بعدين خبط راسه براسه..
وحط رجله ع بطنه ودفه طيحه...
معاش قدر ينوض..
جهاد ساوا حواجبه برووس صوابعه وقال؛تعاودهم مرة تانيه نرقدك فالتلاجه..
نزل ايديه وشبح القدام شاف دانيه ماشيه تجري..
تنهد بضيق..بعدين لف ومشي وهو يساوي فحوايجه..
وخلا حسام طايح يتوجع ويأن..
••••°°°°
"طاح طيحة زقرلو "..
رتاج:ههههههههههه..
دانيه:اااه قداش مسح ع كبدي الله يمسح عدوينه..
رتاج هدت ضحك وقالت:خسااارة ياريتني كنت حاضرة وشفت بطولات الكراش تبعي..
دانيه بضحكه:ياعليك كراش يادعوه يهبل يهبل..
قرصتها من خدها وقال بتفنيصه:نغار يافرخه..
دانيه بضحكه وهي تتوجع:تي حولي ياختشة حولي...
طلقتها وقالت:اخر مرة تتغزلي فيه..
دانيه وهي تتحسس فخدها ارتسمت ع وجهها ملامح الضيق:كان نقولك شن صار معاي اليوم..
رتاج بإنتباه وفضول:شن صار!؟
••••°°°°°•••••°°°°•••••
الساعه الثالثة ظهرا...
فالكوجينه...
الام وبنتها يغسلوا فالماعين..
اسيمه:صايرة معاها حاجه ملخبطه جوها...
سارة:زي شنو ماما!؟.
اسيمه مطت شواربها للأسفل بعدم معرفه..
•••••°°°°°
في الصاله..
كانت هي وولد خوها مقعمزين قدام التلفزيون..
هي سرحانه ومضايقه..
اما زياد فكان يتفرج ع برنامج فالتلفزيون..
فجأه..
طلع شريط احمر كبير اسفل الشاشه مكتوب عليه...
"عاجل"..
وبدت اقسام الخبر توالى..
اجراء تعديل وزاري من قبل رئيس الحكومه ***** ****..
الوزرات هي...
وزارة العدل ...وزارة الداخليه..وزارة السياحة..وزارة الصحه...
القسم اللي بعده انذكر اسم وزير العدل..
بعده وزير الداخليه..."رضوان بوكراع"
وبعده وزير السياحه..
واخيرا..
وزير الصحه...الدكتور..هيثم عبدالحكيم الكاتب..
توسعوا عيون زياد بدهشه وقال:نوسه..نوسة شوفي!
نسيبه شبحتله بعدين شبحت للتلفزيون بعدين قالت:ايااح يازياد اول مرة يديروا تعديل!؟
زياد:شوفي التعديل من فيه!
ضيقت عيونها وهي تشوف الخبر وهو ينعاد..
قرت اسماء الوزرات اللي اجروا عليها التعديلات..
ركزت ع وزارة الصحه..
فتحت عيونها بدهشة..
قرت اسماء الوزراء الجدد..
لين وصلت في وزير الصحه..
نسيبه بذهول:هيثم عبدالحكيم الكاتب!!..يااسيمااا تعاااالي..يااسيمااا...
▪▪▪▪
◇هههههه..ااخ...المناصب هادي مش تشريف تكليف وحمل ثقيل..
اصلا اسم وزير مشتق من كلمة الوزر..
يعني حمل ثقيل..
يانحمله بشرف ونزاهة واني حاط ربي بين عيوني ويكونلي وزر حسنات..
يااما نلعب فيها لعب ونحط ميزاينتها فجيبي ونطيح القطاع الصحي..ويكونلي وزر سيئات يهد حيلي هد يوم غدوة..
▪▪▪▪▪

.....يتبع....