البطل المغمور "شمس الغروب"

الجزء التاسع عشر القسم الاول..

💐...
فتحت عيونها وغمضتهم بعدين رجعت من جديد..
وبدت توعى وهي تسمع في صوته ينادي فيها بإسمها..
"رتاج"
وكان الخوف بادي ع وجهه..بل ذعر مش بس خوف..
وقبلها حست بشي يخبط ع خدودها وهدا اللي نوضها..
نوضها من شنو؟!
حلم!
هي تمنت يكون حلم..كابوس...
لكن للأسف ماكانش كابوس..
كان واقع اسود هي مشتله برجليها..
لما وعت تماما واذكرت كل اللي صار..انفزعت ودفاته بعداته عنها وهي تقول..
رتاج وهي مرعوبه وترعش:شن درت فيا ياواطي شن درت فيا ياحقير..
جهاد بغضب:صكري فمك صكريه ماطلعنيش عن طوري..
رتاج بعياط:شن درت فيا!!
جهاد بصوت عالي:مادرت شي ياحيوانه مادرت شي..
رتاج قعدت تشبحله وهي مصدومه .
بعدين انتبهت انهم مازال قاعدين في السياره..
حركت عيونها لملايتها لقتها مازال قاعده عليها...شبحتله تاني ومش مستوعبه شي..
هو شبح القدام وقال بضيق:مش عارف شن صار لجد اصلك اغمى عليك ولادختي..نحسابك متي..
رتاج بلعت ريقها بعدين قالت بتوسل:روح بيا بالله عليك الله يستر على ولاياك يارب روح بيا..
شد دومان بقوة ..بعدين شغل السيارة وهو يهز في راسه بإيجاب وقال:معاش تبي نعرفك ولاتعرفيني فاهمه..
رتاج قريب طارت من فرحتها قالت وهي تضحك:من توا اعتبرني مانعرفكش..غير روح بيا..
عقد حواجبه بضيق..
وبدي يتحرك بالسيارة...
بعدين لف بيها مولي للعمارة..
رتاج تنفست براحه ورفعت عيونها فوق وضمت كفوفها لبعض وهي تقول بصوت اشبه بالهمس..
"الحمد لله..الحمد لله..الحمد لله"
وجهاد مرة مرة يسرقلها في النظر وهو مضايق ع الآخر..
بعد طول مسافه..
وصل بيها لراس الشارع..
هي شافت من الروشن كان في حد..
بعدين فتحت الباب ونزلت...
وقعدت تمشي وهي خايفه  وتتلفت هني وهني..
هو قعد يشبحلها شويه..بعدين فتح الباب ونزل وتبعها من بعيد..
لعند ماوصلت لباب العماره وطول خشتلها..
وهو طول ولى لسيارته بعد شافها خشت...
....بعد ماخشت رتاج للعماره...
مشت وقفت تحت الدروج ..طلعت تليفونها واتصلت بدانيه...
🍁دانيه في هالوقت كانت في الصاله..
مقعمزة ع الصلايه..ورافعه ايديها لله سبحانه لفوق راسه..
وهالطريقه كان يدير فيها الرسول عليه الصلاة والسلام لما يدعي دعاء مضطر ويكون في قمة التضرع...
ودانيه هني في كرب شديد..ومضطرة لأبعد حد...
من لما عرفت اللي صار من خوفها لقت روحها ماشيه تجري للحمام..توضت وطلعت لبست اسدال الصلاة وفرشت الصلايه وبدت تصلي..
دانيه في هديكا اللحظه قلبها هو اللي دلها ع سبيل النجاه لما فيه من ايمان..
وهي عارفه ان فهالوقت ربي اقرب لخلقه مسافه..لأنه نازل للسماء الدنيا سبحانه...
وهو اللي ينادي هالمرة..لوفي حد عنده حاجه اولو في حد يبي يستغفر لذنوبه...
ودانيه من الناس اللي لبت النداء في عز الفزع من المصيبه اللي نزلت بيها...
ولأنه حيي كريم..رحيم..ولطيف...يجيب المضطر اذا دعاء ويكشف السوء...
استجاب برحمته لدعاء دانيه..
دانيه نزلت ايديها وحطتهم ع وجهها وهي تبكي بقهر بكاء صامت..
فجأة رن تليفونه...
نزلت ايديها وناضت تجري لتليفونها اللي كان في الدار..
وصلت فيها وخشت..
خداته من ع الطاوله شافت اسم اختها ردت طول..
دانيه:رتاج!
رتاج بنبرة باكيه وصوت منخفض:افتحيلي الباب دانيه افتحي..
دانيه بلعت ريقها وقالت:باهي..
وصكرت..ومشت تجري طول طلعت من الدار لباب الحوش..
وصلت فيه..فتحاته بالشويه...
بعدين بعتت رساله لأختها وهي ترعش ودموعها تنزل..
وقعدت واقفه في الباب تستنى..
لحظات..
واندف الباب..وخشت رتاج..
صكرت دانيه الباب..وعطتها كف بكل قوتها ع وجهها..
رتاج شدت خدها وهي تبكي..بعدين مشت تجري للدار..
ودانيه لحقتها وهي في قمة الغضب..
وصلوا للدار خشوا وصكرت دانيه الباب..
وقالت بصوت هامس غاضب:كنتي معاه ياكلبه ولا كنتي معاه!
رتاج ببكي:قبل بنهرب معاه..
دانيه ضحكت بسخريه وقالت:رخي بيك حتى فالهربه ياهديوقا..
رتاج ببكي:طلع احقر من هكي يادانيه احقر..
دانيه فنصت وقالت:شن دار فيك!؟
رتاج بذعر:لالا مادار فيا شي..مادار شي...بلعت ريقها وقالت..جي بيدير لكن ربي..سترني يادانيه..ربي سترني...
وبدت تحكيلها اللي صار في السيارة بالتفصيل..
ودانيه تبكي وتهزب فيها...بس من داخلها تحمد في ربي اللي استجاب لدعائها..وسترهم كلهم وانقذهم من فضيحه كبيرة..
🥀بس في بنات للأسف مشوا فهالطريق لأخره
في اللي هاربه..وفي اللي مشت تلبية لطلب ذئب بشري موهمها بالحب وضاحك ع عقلها بكلمتين وهو يقوللها انتي مرتي..وانتي ليا ومستحيل نفرط فيك وهي تبيع عقلها وشرفها ودينها فلحظه وتصدق...وتضيع روحها..
وهو بعد ياخد منها مايبي يبدا ينسحب من حياتها شويه شويه وبعدين يخليها بروحها مع الكارثه اللي دارتها في عمرها....وممكن في النهايه توصل بالبنت مرحلة الانتحار..
او يعرفوا اهلها باللي صار وتنفضح فضيحه كبيرة....
او تنخطب وتتزوج ويكتشف الزوج الحقيقه ومش كل وحده يحالفها الحظ وطيح في ولد ناس يخاف ربي..في اللي فضحوهم...وحتى اللي ماانفضحتش قعدت مخزيه قدام نفسها وقدام الراجل اللي تكفي نظرات ازدراء ليها من عيونه تخليها تتمنى لو ربي ماخلقها...
هدا بين الناس في الدنيا...لكن مع ربي وفي الآخره!!؟
حكاية تانيه...
ممكن تكون ليها فرصه مع الله سبحانه لوتابت..
لكن لو ماتت قبل التوبه وهي مرتكبه هالكبيره اللي تجي بعد الشرك وعقوق الوالدين!!؟
اااخ..الله يجيرنا ويستر علينا وعليكم وعلى بنات المسلمين..
ويهدينا اجمعين...
•••••°°°°°•••••°°°°°••••°°°°°••••
في الجنان كانوا الزوز ساهرين..
يفضفضوا لبعض...
وفي من كان يسمع في كلامهم وهما مش عارفين...
تنهد من قلبه وقال:كاره حياتي كلها يارفيق..والله عايش من قلة الموت اقسم بالله..
رفيق:هدا كله ع خاطرها هي ولا؟
خليل قعد يشبح للسمي وهو ساكت..
رفيق ابتسم بحزن وقال:حالي مش خير من حالك..
خليل شبحله وقال:انت بالذات متأكد في ورا زواجك من هادي سجى إن.
رفيق تنهد وقعد ساكت..
خليل:واضح عليك قاعد تبي بنت الدكتور..
رفيق بحسرة:واكثر من قبل..
خليل ابتسم بتهكم وقال:وخديت هادي بش تنساها صار العكس..
رفيق بألم:اني مانبيش ننساها..مانقدرش ننساها..
خليل بإستغراب:باهي علاش خديت بنت خالتك..
رفيق:امي هكي تبي.
خليل قعد يشبحله بشك وولى من داخله متأكد ان في شي صاير هما مايعرفوشي..
تحت روشن دار ملاك وعيلتها..
ملاك وهي مقعمزة ومربعه رجليها قالت بهمس:حتى اني نقول ان في حاجه خلاته ياخد الضبعه هديكا كان نعرف شن هي بس.!
بعدين ضيقت عيونها وهي تسمع لباقي كلامهم..
رفيق:قول الحق خليل..ماتحنش لأيام شارون؟
خليل:نحن لشني؟! اني نادم عليها كان نلقى نمسحها من حياتي مسح..برغم ان بوي مش هاين عليا..لكن باللي داره خلاني نشوفه أب مافيش منه بكل..اللي عرف غلطه وضحى بحريته بش يصلحه...رفع حاجبه وقال..راك تقول انت حنيت!؟
رفيق حرك راسه بالنفي وقال:تس..بالعكس..عطيت لروحي امل..قلت بالك يصيرلي من بنت الدكتور بعدين..
خليل:قصدك تبي تتغير ع خاطرها؟!
رفيق اتكى ع الكرسي وهو سرحان قال:ندير ع خاطرها ع كل شي غير ترضى عليا بس..
خليل قعد يشبحله وهو يفكر...
شن حيستفيد لو تغير ع خاطر حد في الدنيا وفي النهايه ماحصلش عليه..ولانال رضاه!
شبح القدام وهو يفكر في نسيبه..برغم اللي داره ماسعمش منه كلمة شكر..
بالعكس جرحاته اليوم بكلام مهين صعب ع نفسه...
حسساته فيه انه مايسواش في نظرها...
بعدين وقف عند سؤالها...
"علاش انت مش مسلم؟!"
 مسلم؟!
اني مسلم بالهويه بس...لكن ولاعمري درت حاجه تأكد اني مسلم..
بالعكس كل اللي داره في حياته ضد هويته تماما...
ولاعمره ركع لله...حتى وهو صغير...
🥀وياما منهم اللي زي خليل 🥀
طول نفسه تبررله..انه تربى في بيئة بعيده كل البعد عن الدين..
لا هدا مش مبرر..خيرها اختهم..عمرها مافوتت فرض..وكانت ديما تنكر في افعالهم...وتكرههم بسبب فسادهم..
وامهم....من لما حلوا عيونهم ع الدنيا وهما يشوفوا فيها تصلي وتصيم والمصحف ملازمها في اغلب يومها وديما تنصح وتعارك وتحاول ع قد ماتقدر تبعد بينهم وبين الحرام...
تس...
مافيش مبررات ياخليل...انتم اللي اخترتوا تمشوا في طريق الغلط وماكانتش عندكم رغبة حقيقيه في داخلكم تخليكم تبعدوا عنه...
🍁وهلبه ناس في هالحياة هكي...يعرفوا الحلال من الحرام..يعرفوا الغلط من الصح..لكن عايشين بهواهم نفوسهم الفت الغلط وتعودت عليه ورافضه تبعد عنه...🍁
"خليل"
استاقظ وشبحله وقال:هاه..
رفيق ضيق عيونه وقال:شكلك ماكنتش معاي بكل!
ابتسم خليل بإحراج وقاله؛سرحت شويه..شن كنت تقول؟
فجأة انفتح الباب...
شبحوله..
خش جهاد..لما شافهم انخلع..
جهاد؛خيركم قاعدين فايقين لتوا؟صارت حاجه؟!
خليل:لالا مافي شي..انت خيرك مروح توا مش قلت بايت برا؟
صكر جهاد الباب وقال:ماصارليش..
بعدين حط ايديه في جيوب كبوطه ومشي لدار الدروج..
فتحها وركب فوق..
وخوته معاه بعيونهم...
بعدين شبحوا لبعض بعدم فهم..
بعدين تنهد رفيق وقال:بنخش نرقد خلاص...وناض..
خليل هز راسه وقال:تمام..
رفيق:مازال مش راقد انت؟
خليل:تس تس..
رفيق هز راسه ومشي خش داخل..
وخليل حط ايديه ورا راسه وهو يشبح للسمي ويفكر في نفس الموضوع اللي شاغل عقله اليوم كله...
وملاك داخل حطت السماعات فوذنها ومشت رقدت في سريرها...
•••••°°°°°°••••••°°°°°•••••
بعد اذان الفجر...
صلت سارة...وقرت قرآن..
بعدين اتصلت بعمتها تطمن عليهم هي واختها...ونسيبه كذلك سألت عنهم..واكدتلها انها حتروح بريحان الساعه عشره...
ماطولتش سارة في المكالمه..
صكرت...
بعدين مشت دارت دورة ع الحوش..
ضماته كله...ولقت في حوايج يبوا الغسل حطتهم في الغساله..
بعدها..طلعت للجنان...
مشت لورد امها..شافت وضعه..بعدين سقاته هو والنعناع والعطر...
وخدت بعدين المكنسه وبدت تكنس في الجنان..
هدا كله وهي تسبح..
زي ماكانت امها ادير بالزبط كل صبح...
بعد كملت مشت خشت داخل للكوجينه بش ادير قهوة..
وين وقفت في الكوجينه اذكرت حاجه مش عارفه علاش خطرت على بالها...
《ردوا الزوز:صباح الورد..صباح الخير..
مشت طول صبت ميه في طاسه من شيشة مية معدنيه وشربتها وبوها يشبحلها..
بعد حطت الطاسه قاللها:اقعدي ساعه ماتاكلي شي..
التفتت التفتت سارة وشبحت لأمها..
هيثم:اني اللي كلمتك مش امك..
شبحتله وقالت بضيق:حاضر..》
عيونها تعبوا دموع...بعدين غيرت رايها مابتش ادير القهوة ولفت وطلعت من الكوجينه..
•••••°°°°°°••••••°°°°°•••••
في احد مراكز العلاج الطبيعي التابعه للدوله في البلد الأوروبي اللي قاعد فيه هيثم..
كان يدهور فيه ومعاه وزير صحة هديكا البلد..
وهيثم يتفرج ع اخلاصهم وتفانيهم في خدمة المواطنين في بلادهم..
الأمكانيات الممتازة..والخدمه المتقنه واللي تبان بضمير من الاطباء او العاملين..
اخر مكان دارو فيه جوله كان مسبح خاص باللي عندهم اعاقات في الاطراف...
قعد مركز ع لطف اخصائيين العلاج الطبيعي مع الاطفال وتعاملهم الودود..
بس اكثر شي لفت انتباهه..
ولد صغير يبان في عمر 6سنوات..وبحداه واحد شداه ويشجع فيه ويقول..
"هيا عزيزي هيا يابطلي الخارق...احسنت احسنت..رائع...ياالهى كم احبك..انت ولد رائع وقوي جدا كم انا محظوظ"
هيثم:يعملون بتفانى مثير للدهشه..
مدير المركز شبح وين مايشبح هيثم ووزير بلاده..ابتسم وقال:انه والده...
وزير البلاد:اوو..رائع..
اهما هيثم شبح لمدير المركز بعدين شبح للراجل وقعد مركز مع الولد الصغير كيف يحاول يحرك رجليه في الميه وهو يشبح لبوه بنظرات عيون تلمع وضحكه واسعه كلها سعاده..
وبوه يقوله:هيا هيا احسنت..احسنت..ابني القوي...
انتاب هيثم شعور غريب..وقلبه انقبض قبضه قويه بعدين قعد يدق بقوة لدرجة انه حس به وجعه..
ومافهمش شن سبب هالشعور اللي حسه..
شبح لمدير المركز فجاة لما قال:لدينا نشاطات جديده اضفناها مؤخرا..ارجو ان تأتوا معي لإلقاء نظرة..
هيثم هز راسه وهو مبتسم بشي من التوتر..
بعدين مشوا مع المدير هو ونظيره....
•••••°°°°°••••••°°°°•••••
"زياد"
نزل زياد من الدروج بسرعه وصل لوطا وقال:سامحني عطلتك..
عبدالملك:ع شن بتعطلني ع الشركات مالا!؟ ضحك وقال..هيا تحرك قدامي تحرك..
ضحك زياد ومشي..وعبدالملك وراه..
🍁طلعوا من الحوش وركبوا السيارة..
واول حاجه دارها عبدالملك قبل يشغل السيارة الدخان..
خدي واحد وعطي لزياد واحد..
وتحرك بعدين..وفتح المسجل ع اغاني مغربيه تحكي عن الأم..
وهما الزوز يسمعوا وكل واحد سرحان ويذكر في امه..
الدموع غلبت زياد..وكانت كل ماتنزل يمسحها بقوة..
شويه ركز عليه عبدالملك...غير الاغنيه طول وحط اغاني تانيه مصريه وقعد يعني معاهم ويدير في حركات..
وزياد انقلب بكاه ضحك..
بعدين بدي يغني معاه...
وقعدوا ع هالحاله لين وصل عبدالملك قدام كلية الطب
حط زياد..
بعدين مشي...
وزياد خش للكليه..اللي ماكانش عنده اصدقاء فيها...
توجه طول للمدرج اللي عنده فيه محاضرة..
وقف خداه وهو يراجي في الدكتور..
شويه وجي الدكتور وكانت معاه تكلم فيه..
شبحلهم زياد..
لاحظ ان البنت وكأنها تترجى فيه ع شي يخص القرايه..
والدكتور يكلم فيها بأسلوب بايخ استفز زياد هلبه..
كان يضحك بشي من السخريه ونظراته للبنت نظرات خبيثه..
الدكتور:تمام تمام..بري توا وبعدين تعاليلي المكتب نتفاهموا..
الطالبه قالت وع وجها مازالت ملامح الرجاء موجوده:حاضر دكتور.
ابتسم على جنب بعدين مشي خش المدرج..
والطلبه خشوا من بعده ومن ضمنهم زياد اللي كان مش طايقه..
•••••°°°°°••••••°°°°°°••••••
الساعه العاشرة والنصف صباحا..
خشت سيارة نسيبه للحوش..
ومن فوق سطح حوش خالد كانوا عفاف وملاك ينشروا في الحوايج شافوها...
عفاف:شكلها روحت ببنية خوها..خل نمشي نشوفهم..
ومشت...وخلت ملاك واقفه تنفض في الحوايج بغيظ..
....في حوش هيثم...
فتحت ساره الباب من جهة ريحان..
نزلتها وضمتها ليها بقوة..وريحان حضنتها بقوة حتى هي..
سارة:ريحونه حبيبتي..حياتي..
جنان وهي تنقز:واني اني..
ضحكت سارة ونزلت ريحان لجنان...
وطول جنان حضنت ريحان وريحان حضنتها..
نسيبه بضحكه:قلوب لوز..
ضحكت سارة...نسيبه شبحتلها وابتسمت بعدين شبحت للبنات وقالت:هيا خشوا داخل صقع...
جنان:هيا تعالي ريحان..وشدت يدها ومشوا مع بعض..
ونسيبه معاهم بعيونها وهي مبتسمه..
جتها سارة وقالت:عمتي ماحصلتيش زياد؟
تلاشت ابتسامة نسيبه وقالت:تس..
سارة بضيق:خيره هكي مولي هدا؟!معقوله هنا عليه لهالدرجه ليه اسبوعين لاشفناه ولاكلمنا..
نسيبه:هو غير زياد..هيثم ليه شهر لتوا مسافر..
سارة بتهكم:لالا بابا متعودين عليه من زمان هدا حاله..
ومشت خشت داخل...ونسيبه تشوفلها بضيق...
وكيف جت بتلحقها رن جرس الحوش..
استغربت ولفت ومشت للباب وهي تقول:منو؟
"اني عفاف"
ابتسمت نسيبه وفتحت الباب...
عفاف بابتسامه:صباح الخير نوسه كيف حالك..
نسيبه:صباح النور ابله عفاف تفضلي خشي..
خشت عفاف وهي تقول:يزيد فضلك..
صكرت نسيبه الباب وقالت:خشي خشي..
عفاف:لا والله بنيتي مستعجله عندي ماندير..غير بننشدك ع حال بنية خوك شن صار فيها؟.
نسيبه:لا ولت باهيه الحمد لله..
عفاف تنهدت وقالت:الحمدلله..هما يابنتي يبوا تغييرت جو يطلعوا شويه من هالحال..صح مستحيل ينسوا اميمتهم الله يرحمها..لكن يعيشوا حياتهم ويتعودوا...
نسيبه بحزن:والله قاعده نحاول ابله عفاف..بس
الموضوع مش ساهل بكل..غيرهم هما بوهم اللي واخد وجهه الله يسامحه ويهديه..
عفاف بحزن:معذور راهو يكون في علمك هو بالذات صعبه عليه اكثر منهم...الراجل لما يفقد رفيقة عمره اللي عاش معاها سنين طويله وماري منها الا كل خير موتها كسرة قويه ليه..
نسيبه:باهي اني فاهمه..لكن صغاره صغاره اللي محتاجينه هو اكثر من اي حد في الدنيا لمني مخليهم..خلاهم يحسوا انهم ولوا ايتام من الجيهتين من غير سو..
عفاف تأثرت بكلام نسيبه وقعدت ساكته شويه بعدين قالت:نهار الجمعه بنديروا حفلة عيد ميلاد لوخيي ملاك مرت خليل..جييبهم وتعالي...
نسيبه لما سمعت جملة"ملاك مرت خليل"..
حست بصهد يضرب في ضلوعها...
عفاف:جيبيهم يغيروا جو شويه..
نسيبه هزت راسها وقالت:تو نشوف..
عفاف ابتسمت وقالت:تفرحونا حتى حني بجيتكم نراجو فيكم...هي بالسلامه توا..
نسيبه بإبتسامه:صحيتي ابله عفاف..بالسلامه..
فتحت عفاف الباب ومشت طلعت ونسيبه صكرت الباب..
بعدين تلاشت ابتسامتها ولفت ومشت خشت داخل...
••••••°°°°°°••••••°°°°°°•••••
الساعه الثانية عشر الا ربع..
ركبت تجري وهي شاده كتاب النحو في يدها..
وين وصلت الدوبر تاني قعدت تقرا وهي تمشي..
وحواليها الطالبات يمشوا بعد ماركبوا من الاستراحه..
وهي في عز انسجامها مع الكتاب..
وقفت لما ضرب كتابها جسم صلب..
شبحت قدامها ورفعت عيونها بعدين طول نزلتهم ومشت من الجهة التانيه بسرعة..
هو قعد معاها بعيونه وقال:حتى اسف ماقالتها..
التفت فجأة لما سمع صوت خطيبته..
جيهان:هيا استاذ جمعه..
جمعه:هيا..
ومشوا مع بعض للفصل..وين وصلوا فيه خشوله..
جيهان:هيا قيموا اللي قدامكم انتي وياها..
الطالبات دسوا كتاباتهم...
وجمعه يمرر في نظره عليهم..جو عيونه ع دانيه لقاها تشرب الميه..
بعدين حطت الشيشة ع تركينه وقعدت تشبح لجيهان..
لحظات..
وبدت جيهان توزع في الوراق...
لين وصلت في دانيه حطت الورقه قدامها وهي تشبح للطالبات وتقول:عيونك في ورقتك انتي وياها..
ومشت من حداها..
خدت دانيه الورقه وبتبدا تحل..
انصدمت في الاسئله..
هو سؤال واحد..
اعرب مايأتي...وكانوا 15 بيت شعر..
مطلوب منها تعربهم...
وكانت اشعار عربيه قديمه..اللي جاهلي..واللي في عصر صدر الاسلام...والاندلسي حتى..
شبحت دانيه حواليها لقت البنات يحلوا عادي شي..
رجعت شبحت للورقه وهي مصدومه...
ومش قادره تحل منها حاجه...
جمعه كان ملاحظ ارتباكها...
وجيهان كذلك وهي تشوفلها بإبتسامة مكر..
دانيه ماقدرتش تتكلم بكل مادام ماتكلم حد قبلها..
هي افضل طالبه في المدرسة كلها..كيف توا من بين بنات فصلها تعترض وتقول ان  الاسئله تعجيزيه هي مش قادره تحلها..هدا وين بتحصل فيها جيهان فرصه بالذات قدام جمعه..
قعدت ساكته وهي ترحي في داخلها...
حاولت تعرب ماقدرتش صعبه جدا الأبيات...
فات نص الوقت وهي تشرب ميه وخلاص..لعند ماحست روحها تبي الحمام..وزاد الضغط النفسي عليها..
رفعت يدها فوق..
شبحولها الزوز..
هي شبحت لجيهان وقالت:نبي الحمام..
جيهان برفعة حاجب:اطلعي..
ناضت طول ومشت طلعت وعيون جمعه معاها..بعد طلعت شبح لجيهان..
جيهان شبحت طول للطالبات..
رفع جمعه حاجبه وهو يشوفلها بشك..
بعد سبعه دقايق جت دانيه..
ولت قعمزت في مقعدها..
جتها جيهان وهي تمشي بكبر..
وقفت ع مقعدها جبدت الورقه وحطت مكانها وحده تانيه..
ودانيه تشوفلها بتعجب..
والطالبات وجمعه كذلك..
مشت لطاولتها وهي تشوف للورقه وهي تقول بغرور:يهدرزوا هلبه ع ذكائك وشطارتك وتفوقك وقلت خل نتأكد بروحي..
ودرتلك اختبار بسط..تأكدت منه توا انك من جماعة نقرا ونحفظ وبس..مش نبوغ  يعني..مزقت الورقه وقالت..يعني مستواك واحد انتي وباقي الطالبات..
مشت لوحت الورقه في القمامه وهي تقول:ابدي حلي قريب اتم الحصه..
هدا كله وجمعه يشبح لجيهان بصدمه..
ودانيه كانت بادية تحل في الورقه وهي تسمع في كلامها ومن داخل تاكل في بعضها..
والطالبات يسرقولها في النظر..
برغم سهولة الاسئله
اللي دارتها جيهان لكن المقلب داراته في دانيه خلاها مش مركزة..
وماقدرتش تحل كل شي..
لعند مارن الجرس..
جيهان:هيا حطوا بيرواتكم..اللي ماتحطش البيرو تخلي الورقه عندها..
ومشت تلم في الوراقي...
لين وصلت في مقعد دانيه..
دانيه مدت الورقه لهبه..
خدتهم جيهان وهي مبتسمه بمكر..
بعد جمعت الوراق كلهم طلعت وهي تقول:شكرا استاذ جمعه..
ومشت طلعت...
وجمعه يشوف لدانيه وهو ماشي للطاوله..
حط قعمز ع الكرسي وقال:طلعوا كتاباتكم وكراسات الحصه..
ودانيه اطلع فيهم وهي ترعش...
وكيف جت بتحطهم ع الطاوله طاحوا من يدها..
جمعه بتلقائيه وخوف:خيرك؟!
البنات كلهم شبحوله..
دانيه طبست خدت حاجاتها وقالت:شي شي..
بعد قامتهم حطتهم ع الطاوله..
جمعه ناض وقال:شن شي متاعك هادي ..واضح اشبح شن فيك..
ومشي طلع برا الفصل بيمشي للأخصائيه..
بعد طلع دانيه انهارت بالبكي..
البنات جوها..
:ماتعدليش عليها دانيه..
:كلنا عارفينها..
هبه:حقيرة بشكل الابله هادي..
كريمه:شيطانة رجيم هادي..شيطانه..
ع خشة جمعه مع الأبله..
الابله:دنون خيرك..
بعدوا البنات عن دانيه..
بانت ع جمعة وهي تبكي اذكر اليوم المشؤوم اللي يتمنى لو انه ماكانش...
الابله:نوضي دنون نوضي معاي حبيبتي..
شبحت لجمعه وقالت:بعد اذنك استاذ..
جمعه:احمم..مافيش مشكله..
ناضت دانيه ومشت مع الأبله وطلعوا..
والبنات اللي هادي ولت لمقعدها...وجمعه بدي يعطي فيهم الحصه وعقله مش معاه..
••••°°°°•••••°°°°•••••
"حي عليك هبلتي!؟"
رتاج؛لالا عقلت..
ماجده بصدمه؛كيف عقلتي ياغبارتك السودا..تاخدي راجل نديد بوك هدا شن فيه من عقل؟!
رتاج:هدا عين العقل..
حطت ماجده يدها ع ذقنها وهي مصدومه في رتاج..
سدينه بحزن:قال اليوم بيجي يشوفك الراجل يبي يعرف شروطك..
هزت رتاج راسها بإيجاب وقالت:باهي..خل نمشي نوتي روحي..
ومشت طلعت من حداهم..
ماجده؛بنتك هبلت رسمي!بتوتي روحها لمني..
سدينه بقلة حيلها:الله غالب ياوخيتي هدا نصيبها ماعندها مادير..
ماجده شبحت لسدينه بضيق وقالت:لاحول ولاقوة الا بالله..كان مجاهد هني راهو ماصار شي من هدا كله..لكن عرف امتى يديرها مجيد..
سدينه تنهدت بضيق والتفتت للادوندينو وقعدت تغسل في الماعين ودموعها في عيونها..
•••••°°°°°•••••°°°°°••••••
بعد العصر...
في دار رتاج ودانيه..
"تي والله لما ننتقم منها شر انتقام وتو تشوف"
رتاج بعد مالبست الوشاح ع راسها قالت:ديرلها زي مادارتلك..
دانيه:واحرف..
رتاج:ايوه هكي خليك..باهي قوليلي شن رايك؟
دانيه بحزن؛رتاج انتي مرتاحه؟
رتاج تنهدت من قلبها وقالت؛بعد اللي صار امس اني حسيت روحي انولدت مرة تانيه يادانيه وربي عطاني فرصه تانيه..صح اللي اني فيه توا كلنا نشوفوا شر..لكن اني مفوضه امري لله..وهو قال..وعسى تحبوا شيئا وهو شر لكم..وهادي شفتها بعيني امس..وعسى ان تكرهوا شيئا وهو خير لكم بنشوفها بعيني من اليوم لبعدين...
ابتسمت دانيه تلقائيا كلام اختها ريحها وخلاها تفهم ان رتاج تربت من اللي صار معاها..بس خافت عليها من اللي جاي..
"رتاج"
رتاج:هيا يام...
ومشت للباب فتحاته وطلعت...
وسدينه تشبحلها بألم مستخسرتها فاللي جايها ومتحسره ع بنتها  زي الوردة المفتحه بتريح احلى سنين عمرها مع واحد في عمر بوها..
لما وصلت للمربوعه وخشت..
دعت سدينه بصوت هامس"ربي يجعل خيرتك فيها يابنتي"
داخل..
اول ماخشت رتاج قالت:السلام عليكم..
رفع الراجل عيونه فيها...
انصدم..ماتوقعش تكون صغيره وجميله لهالدرجه..
اما رتاج مابتش ترفع عيونها بكل..
ناض مجيد وهو يقول:لحظه وجاي..عن اذنك ياعادل..
عادل بإبتسامه؛اذنك معاك..
ومشي مجيد وطلع من المربوعه..
رتاج رفعت عيونها وشافلته...
بعدين نزلت عيونها طول...
صح كبير في العمر..بس كانت فيه جاذبيه ووسامه...
هو ابتسم وقال؛رتاج..كيف حالك يارتاج؟
رتاج؛الحمد لله..
عادل:الحمد لله..قاعده تقري قالي بوك..
رتاج:احم..ايه..
عادل:امم..باهي عندك علم بظروفي كلها..اني راجل متزوج وعندي صغار ولا خبرك بوك؟
رتاج:ايه..
عقد حواجبه وهو مبتسم قال؛رتاج..انتي ماشاء الله عليك بنت جميله جدا وصغيره في السن..شن اللي خلاك توافقي تاخدي راجل بينك وبينه قريب 30عام ومتزوج وعنده صغار؟!
شبحتله وقالت؛الظروف..وممكن القدر..
عادل:مجبورة معناها!
رتاج؛نقولوا مسيرة..
عادل:مسيرة!؟
رتاج؛ايه..
عادل شبحلها شويه وقال؛رتاج قبل ليخش بوك..قولي اذا كنتي موافقه بإرداتك او غصب عنك..صدقيني لو كنتي ماتبيش مستحيل نتمه الموضوع...ماناخدش وحده غصب عنها..
قعدت تشبحله وهي تفكر..
وهو يشوفلها..منبهر بجمالها..وبرغم ذلك وجعاته ومايبيش يظلمها معاه...
خدت رتاج نفس ...بعدين قالت...
"موافقه..بكامل ارادتي"
ونزلت عيونها...
ع خشة بوها..
اشر لرتاج بيده  تطلع..
هي شافت يده وناضت طول مشت طلعت...
عبدالمجيد قعمز وهو يقول؛هاه شنو تأكدت بروحك ان موافقه؟
ابتسم عادل وقال؛ايه تأكدت وتريحت...
........
"تريحتي!؟"
رتاج وهي مندهشه:ايه..مش عارفه علاش..حسيته راجل حق..والكبر مش باين عليه صراحة..
دانيه بضحكه:معقوله!
سدينه بضحكه استغراب:سبحان الله!
رتاج تنهدت من قلبها براحه وهي تمرر في نظرها عليهم..
وقعدت تتخيل لو انها امس كملت الطريق مع جهاد شن كان صاير فيها وفي عيلتها اليوم..
حمدت ربها من قلبها..ورضيت تماما بإختيار الله اللي اكيد كيف ماكان حيكون افضل مية مرة من اختيارها لنفسها..
بل لايقارن...
🍁🍁🍁🍁
وعدوا يومين..
دارت فيهم رتاج تحاليل الزواج واستعدت هي وعيلتها بش يديروا عزومه بسيطه يحضروا فيها معارفهم..
ولانها كانت عزومه بدون مظاهر احتفال..عزموا نسيبه وسارة...
ونسيبه خدت راي سارة اللي وافقت ع خاطر خواتها بش يطلعوا شويه من جو الحزن بمخالطة الناس..
وكذلك وافقت سارة انها تمشي لحفلة ذكرى ميلاد خو ملاك لكن بشرط بوها يوافق..
بوها...اللي عيت نسيبه تتصل بيه وهو مايبيش يرد..
وصنعة الولد صنعة بوه..زياد..اللي كان يتجاهل في مكالماته متعمد..
وقاعد لاهي بعالم عبدالملك وحياته واصحابه..
عرفه عليهم..وكانوا يطلعوا من بعض للقهاوي..
كانوا نوعية غريبه عليه من الشباب...كان لما يسمع عنهم يزدريهم..زي ولاد خالد..
بس توا حس روحه ان عنده رغبه كبيرة يخش عالمهم ويولي زيهم...
لسبب واحد بس..يبي ينسى عالم الفضيله اللي امه صنعتهوله..
اللي شاف انه انتهي بموتها...تعلق زياد الكبير بأمه خلاه يشوف الدنيا كلها امه...وبعد غابت امه..انتهت الدنيا بالنسبه ليه..
الشي الوحيد اللي مخليه مازال متابع قرايتها هو وصيتها ليه في اليوم اللي يسبق يوم موتها..يبي ينفد وصيتها وبس...
وناسي او متناسي ان مازال  في ناس تحبه وتهمها مصلحته وتموت من خوفها عليه..
زي عمته نسيبه...اللي مشت للشقه وانصدمت لما لقاته لام حوايجه ومسيبها..
هبلت هبال..ماخلت من كلمت وسألت عنه وماحصلتش ولامعلومه...
ولأنها مش قادرة توصل في بوه...اتصلت بالوزارة وسألت عن موعد مرواحه وهما بلغوها...
يوم الأربعاء في الليل...
استنيت الليل كله ومع الأسف هيثم ماجاش...
وهي هني وصلت لأقصى مراحل الغضب...
ثاني يوم الصبح..اتصلت بلجين تسأل وين تلقاه ولجين بلغتها بمكان تواجده...
••••••°°°°°°•••••••°°°°°°•••••
"اغنيتها الجديده روعه تجنن"
:ايه تفرجت ع كليب متاعها عطيها دعوة لبسها يجلط..
:تسمعولها دانيه وساره..
دانيه وهي تتني في الكتاب بخجل قالت:لا الحق نسمعها فيها بالصدفه مرة مرة..حني تلفزيون ممنوع علينا..
:وانتي سارة..لمن تحبي تسمعي..
سارة بإبتسامه؛مانسمعش في الاغاني مانحبهمش..
:اها...
:يومها شفتك حاطه سماعات في ودانك شن تسمعي؟
سارة:قرآن..الصراحه هو اللي مخليني نكره الاغاني ومانتقبلهمش..قلبي ينغم او مانسمعهم..
دانيه قعدت تشبحلها بحب..
والبنات وجوههم تغيرت ووحده منهم قالت:اممم..
بعدين سكتوا شويه...وقالت وحده لدانيه؛مانكش مدايرة شي دانيه لوجهك اليوم فاتحه اختك؟
دانيه:تس ماعندي ماندير..
مست وحده منهم حاجبها وقالت:وبساط الريح هدا نقصتيه منه شويه..
سارة:مولي موضه الحاجب الكثيف والصراحه مش مشيتها دانيه جميله من غير مادير شي..
دانيه:تسلمي سوسو..
ضحكت سارة..
:ماقلنا شي لكن تزيد جمال لو نقصت فيهم شويه..
دانيه؛لالا وخيتي مانبيه الجمال اللي يطلعني من رحمة ربي الواحد يدور فيها دوارة..
:الله غفور رحيم..
سارة:وشديد العقاب..اللي يعرف الغلط ويديره حيتعاقب لو ماتابش..
:ايااه عاد تو يتوب علينا بعدين...
سارة:صار ضامنه تقعدي عايشه لهداكا الوقت سعدودك!
ضحكت دانيه..
:طلعتي دعشوشه ياسارة..
سارة بضحكه:كان الدواعش هكي ربي يكثر من امثالهم..
دانيه ضحكت وطقت في يد سارة وهي تضحك..
:هازيين علينا!؟
سارة بإبتسامه:لا والله حبيبتي ماهكي بكل..باك تحسابيني اني شيخه ويصلوا ع طرفي!؟ بالعكس ربي مايطلع كان في الباهي..قاعده نتعارك مع نفسي وياني ياهي وبإذن الله غالبتها غالبتها..
البنات ابتسموا..
دانيه:تهبلي يافرخه..وقرصتها من خدها..وساره تضحك..
ع خطمة جيهان وهي ماشيه لوحده من زميلاتها في الساحه..
:احقر مخلوقه نشوفها في حياتي..
سارة:بالله فكونا من القرمه نشحت في الحسنات شحاته راني..
:ههههه..صدقتي تخيلي نلقطوا الحسنات عمرنا كله بش في الاخير نعطوهم لجيهان..
البنات ضحكوا..
بعدين قالت دانيه بمكر؛ياناويتلها ع نيه..كان ماخليتهاش تندم فيه ع النهار اللي ولت فيه ابله عربي مانبداش اني دانيه المجذوب..
سارة بعقد حواجب:شوقتيني نعرف..
البنات:حتى حني...
دانيه وهي تشوف لجيهان برفعة حاجب؛كل شي في وقته حلو...
•••••°°°°°•••••°°°°°•••••
في المستشفى العام في العاصمه..
كان هيثم واقف يشوف تجهيزات غرف العمليات اللي جددوهم مؤخرا..
بعد ماكمل جولته عليهم...
مشي بيطلع من المستشفى..
جاه اتصال من راجح..
هيثم؛مش وقته بكل..صحيح وجه بجديات لو كلمني فموضوعه هو ونسيبه..
داره صامت وحط التليفون في جيبه..
فجأة..
وقفاته مراة في منتصف الأربعينيات..
المراة بتوسل:بالله عليك يادكتور شويه شويه بش ارجوك..
جو المرافقه بيبعدوا المراة..هو بعدهم وقال..
هيثم:تفضلي قعمزي..
المراة بفرحه؛بارك الله فيك يادكتور..
مشوا لكراسي الانتظار وقعمزوا..
بيناتهم كرسي فاضي...
هيثم ؛تفضلي شن مشكلتك..
المراة بلعت ريقها وقالت:يادكتور اني نعاني من اعراض ماعرفتش شن سببها رغم اني درت كل الفحوصات والتحاليل حتى الشيوخ مشيتلهم ومافيش فايده..
هيثم:شن هي الأعراض؟
المراة؛قلبي يادكتور يدق بسرعه لين نحسه بيوقف مرات..عظامي ومفاصلي يوجعوا فيا...ديما نحس بدوخه..وفشل..تعبانه ع الآخر...ماعرفتش السبب ع قد ماعاينت..
هيثم:متأكده ماعندكش ضغط ولاسكر..
المراة:لالا يادكتور مافيش..
هيثم؛باهي درتي تحاليل هرمونات الغده الدرقيه وفيتامين دال؟
المراة:ايه تحاليل الغده سليمه وفيتامين دال ناقص..خدت عليه ايباري تلاته شهور..وبعدين حبوب حبه كل اسبوع..لكن ماتغير شي..
هيثم:امم..تمام..اسمعيني كويس وركزي معاي...في حاجه هلبه مايعرفوش ان الغده غالبا لما يكون فيها مشكله ماتطلعش في التحاليل..يعني لازم بعد اسبوعين من اول تحليل درتيه تعاوديه وتتأكدي..اما بالنسبه لفيتامين دال هلبه من الناس يطيحوا في غلطه كبيره لما يحللوا عليه..يحللوا وتطلع نتيجه التحليل يطلع في نقص يمشوا طول للصيدليه تاخدوا الجرعات هكي من روسكم..
لازم تعرفوا حاجه مهمه..مش الكل تمشي معاه نفس الجرعه..في اللي يحتاج اكثر وفي الأقل..والكورس العلاجي المده تختلف فيه في اللي يبي تلاته شهور وفي اللي خمسه بعد المخافظه ع نظام صحي معين..كله لازم بتوصيات الطبيب من روسكم معاش اديروا شي..
المراة:بارك الله فيك يادكتور..معناها  نعاود التحاليل متاعاتهم لكن وين نمشي بيهم..
هيثم؛تعاليلي اني بعد يومين بإذن الله للمستشفى هادي تلقيني نستنى فيك..
المراة بفرحه:بارك الله فيك يادكتور..ربي يبارك في عمرك وفي صغويرتك  ويرحم اميمتهم..
ابتسم ابتسامة ألم وقال:اللهم آمين..
ناضت المراة وناض هيثم معاه..
مشت بعدين وهي تدعيله وهو كمل طريقه مع المرافقه لعند ماوقف فجأة وهما وقفوا وراه ..
لما شاف قدامه اخته نسيبه جايه ناحيته وع وجهه ملامح غضب..عمره ماشافهم زيهم على وجهها....

...يتبع...