البطل المغمور "شمس الغروب"

الجزء الثاني عشر"القسم الثاني"

💐..
لبست ملاية الصلاة ومشت للدروج راكبه للسطوح..
وصلت فوق ومشت وقفت ع السياج وهي تشوف وتقول بقلق:ياحليلي الساعه واحد الولد وين مشي!؟
فهاللحظه شافت سيارة جارها الوزير خاشة للزنقه..
قعدت مركزة معاها لين خشت للحوش..
عفاف:مابعده مسكين مايفضاش بكل..بعدين خطر عليها ولدها قالت..حيي عليا وينه ياربي..يارب في ودايعك حطيته..
"يما"
التفتت وقالت:هاه شنو كلمك خوك؟
خليل جاها حاوطها من كتافها وقال:ايه يام بايت عند صاحبه..تعالي انزلي..
مشت عفاف وهي تسأل بقلق:زعمه خيره ياكبدي خوي مايباتش برا الحوش الا كانهو مضايق..
خليل:لا يام..مرات يبي يكسد مع صحابه..
وصلوا للدروج وبدوا ينزلوا وعفاف تقول:ايه يكسدوا ع المنكر والسم الهاري..غير امتى بتوبوا لربي امتى يتوب عليكم ربي..ياربي توب عليهم يارب..
وخليل ينزل فيها وهو ساكت كلامها واجعه وماعنده مايرد بيه عليها..
■في نفس الوقت..
هيثم خش لحوشه وكالعاده كان الجو هادي..
لعند ماجي حدا الكوجينه سمع صوت بكي..
استغرب وخاف..وخش للكوجينه..
لقي نسيبه حاطه راسها ع الطاوله وتبكي..
تفاجا هلبه..فتح الضي..
هي انخلعت رفعت راسها طول وشافاته قالت:هيثم!
هيثم بقلق:خيرك تبكي شن في؟!
هي مسحت دموعها وقالت بإرتباك:خطرت عليا ماما..
هيثم رفع حواجبه..
ناضت نسيبه وقالت:بنركب نرقد تبي شي؟
هو شبحلها شويه بعدين حرك راسه يمين ويسار بالرفض.
هي هزت راسها ومشت وهي تقول:تصبح ع خير..
وطلعت من حداه..
وهو قعد واقف في مكانه ويفكر في حال اخته اللي تغير هلبه..
تنهد بعمق..بعدين لف بيطلع وقف في مكانه..
اسيمه بقلق:عطلت هلبه اليوم؟
هو تنهد تاني وقال:انشغلت هلبه..كويس انك فايقه..
جاها وشد يدها وقال:تعالي..
هي بأستغراب مشت معاه..
قعمزها ع الكرسي..وهو قعمز مقابلها وقال..
هيثم حك عينه وهو يقول:اليوم كانت في عندنا اجتماع في مقر الحكومه..وصار كلام بيني وبين وزير الداخليه وسألني عن علاقتي بخالد وعيلته..وقالي اقطعها..
اسيمه بضيق:علاش!!؟
هيثم:واضح ياأسيمه علاش ماتبيش اتنين يحكوا فيها..
اسيمه هزت راسها وقالت:اللي فيه مصلحتك حنديروه..
هيثم:اسيمه..عزيزة قلبي..مش لمصلحتي بس هالشي لمصلحتنا كلنا..المهم حرصي ع سارة بالذات قوليلها بوك معاش يبيك تتعاملي مع بنتهم بأي شكل..
اسيمه بضيق:سارة تحب تهاني هلبه والحق البنيه عاقله ومؤدبه ومحترمه ع الآخر ياهيثم..
هيثم ناض وقف وقال:للأسف اتاخدت بجريرة اهلها كله يتبع بعضه..المهم قوليلها تنفد بدون نقاش..اني يااسيمه المنطقه هادي نحبها مانبيش نخليها..لكن في حالة لقيت ان وجودنا فيها حيضرنا حنطلع منها طول..
اسيمه ناضت وقالت بعد تنهدت:خلاص اطمن حيصير اللي تبيه..
هيثم هز راسه ومشي بيطلع من الكوجينه وهي مشت وراه..
قبل ليوصلوا للدار..
"اصبر ع الشدايد....الرب رايد"
هيثم رفع حاجبه اليسار وقال:تفضلي..
اسيمه حركت راسها يمين ويسار وقالت:لاحول ولاقوة الابالله..
خش هيثم  هي لحقاته..
وبرا...
كان خالد اللي شارب لحد الثماله يدعدع في الزنقه ويغني ومرات يتكلم..
ونسيبه تتفرج عليه من فوق وهي تشوفله بنظرات كره..
خالد:اني...خالد...عبدالناصر...تاجر حشيش وكوكا..وهيرو...ايه ايه..ايه..وسكار ونكار...ايه ايه...لكن قلبي انظف منكم كلكم...ياكمشة منافقين..كذابه...
ع طلعة جهاد وخليل..
شدوه وقعدوا يدخلوا فيه وهو يقول..وولادي..بستين راجل منكم...لالالا بألف..
خليل بضيق:خش يابوي خش..
ودخلوه داخل..
وكيف جاي خليل صكر الباب..تلامح نسيبه واقفه فم البلاكونه متاعها تتفرج عليكم..
نزل عيونه وصكر الباب..
وهي نزلت دموعها وصكرت باب البلاكونه جبدت الستار..
•••••••°°°°°°°••••••••°°°°°°••••••••
اليوم التالي..
الساعه الثامنه الا ربع..
سارة شربت العصير بعدين قالت:طالعه ماما..
اسيمه وهي ادير في تست للصغيرات قالت:سارة..
وقفت سارة وقالت:نعم..
سكتت شويه امها بعدين شبحتلها وقالت:موفقه ماما..
سارة ابتسمت وقال:آمين..تسلميلي حبيبتي..وبعتتلها بوسه من بعيد..واسيمه ردتها وهي ضحكت..
بعدين طلعت سارة..وبعد طلعت تلاشت ضحكتها وهي تفكر في قالهولها هيثم في الليل..
وشويه وسقدت حتى نسيبه وزياد..
بعدين جهزت بناتها بترفعهم للروضه..
في الدار النوم..
كان هيثم مقعمز يقرا من الأيباد..
اسيمه:متأخر اليوم؟
هيثم شبحلها وقال:اه نسيت ماقتلكش ماشي لبنغازي اليوم بعد العصر..
اسيمه:قصدك بتقعد في الحوش لبعد العصر!؟
هيثم:اها..وطبعا بنقعد غادي الليله مش مروح..
اسيمه ابتسمت وقالت:باهي..معناها نعطي حصتي ونروح طول وفي طريقي نجيب معاي رشدة كسكاس..
هو ضحك...وهي ضحكت بعدين قالت..هي السلام عليكم..
هيثم:وعليكم السلام..
وقعد معاها بعيونه لين طلعت بعدين تنهدت وسرح وين مايشبح..
▪▪▪▪▪
◇أسيمه..المراة هادي..أاا..قصدي يعني..كيف بنوصفها..مش عارف هي شني بالزبط..الجسد جسد بني آدم زينا..لكن الطباع طباع ملايكه...اسيمه لما تعرفت عليها نذكر وقتها كانت عايشه مع بوها رحمة الله عليه ماكانش ليهم غير بعض من بعد الله..ولما حبيتها وقررت نرتبط بيها بوها ماعطهاليش بالساهل...في الحقيقه بوها ردني تلاته مرات..ولولا اصراري الشديد ماكانش عطهالي بكل..نذكر يوم عقد القرآن..هددني لو مرة جرحتها او كسرتها او زعلتها مش حيردهالي لو تطلع روحي قدامه..وقالي لو ربي خدي امانته مانيش مسامحك دنيا وآخره..
اااه..بوها الله يرحمه توفى بعد زواجنا بسنه..بعد تزوجنا قعدنا يوميا نزوروا فيه وفي كل يوم كان يستقبل فيها استقبال حار تقول ليه سنين ماشفهاش..وديما يقول وين يشوفها"قلبي مايفرحش الا بيك"
واني هكي..قلبي وروحي وكياني كله..مايرتاحوش ولايفرحوا الا بهالمراة ومعاها..والله لدرجة اني حاسها طالعه من تحت ضلعي فعلا من قلبي طالعه..مش بطن امها زي باقي البشر..
نحبها حب ربي بس يعلم بيه..والله مانلوم صغاري اللي فضلوها عليا سنين من عمرهم...
▪▪▪▪▪▪
في المدرسة الثانويه للبنات..
في الإستراحه..
كان واقف في الروشن يشرب في النسكافيه ويتفرج ع الساحه..لعند ماعيونه جو عليها بالصدفه..
مدايرين البنات عليها دايرة وهي تشرحلهم..
رجع يفكر من جديد في اقتراحها..
وهو يفكر..
كانت خطيبته في الساحه مع وحده من زمليتها مرة تشوفله وين يشبح..وحتى هي تشبح وين يشبح وتزيد تنغاض منها اكثر وأكثر..
عند اللي يشبحولها..
دانيه:هي هادي..
:سعدودك فرخه دانيه ع دماغك...
ضحكت دانيه..
فجأة..رن الجرس معلن نهاية الإستراحه..
طول ناضوا ومشوا بإتجاه طابورهم..
هبه صديقتها شدتها من ذراعها وخدتها ع تركينه وقالت:دانيه بالله عليك سميلي..
دانيه بخوف:لالا هبه مش مع هدا والله نخاف منه..
هبه بتوسل:ارجوك دنو بالله عليك والله مانقدر تجيب لاام ولابو وانتي تعرفي بلييييز..
دانيه بضيق:اففف..باهي تو نحاول لكن مانعطيكش وعد..
هبه شدت يدها وقالت:غير حاولي انتي بس ع خاطري حبابه..
دانيه تنهدت وقالت:باهي هي تعالي..
ومشوا هما الزوز للطابور وجيهان عيونها عليهم..
••••••••°°°°°°
في المدرسة الأعداديه..
عند سارة وتهاني في اخر الإستراحه..
ساره:خلاص تهاني عاد خيرك!؟ انتي ماليكش دخل بيه خوك..انتي عندي في كفة بروحك وانتي تعرفي تاهو..
تهاني بإبتسامه:مانتحملش نخسرك سارة بكل عارفه روحي والله ماني لاقيه زيك بكل..مش صاحبتي انتي وخيتي..
قرصتها سارة من خدها وقالت:وحتى اني نحبك في الله هلبه ياحلوة..
ضحكت تهاني بعدين قالت:واااك الاستراحه تمت..
سارة :ههههه..
ومشوا لطابورهم...
••••••••°°°°°°°•••••••••°°°°°°••••••
اصوات ضحكاتهم مسموعه في جنان حوشهم..
كانت طالعه من الكوجينه تحديدا..
هي واقفه اطيب في الغدي وهو مقعمز يشرب في الشاهي الأخضر..
هيثم بضحكه:ريحان بنتي هادي بتطلع هبله شويه..
اسيمه بضحكه:حرام عليك..
هيثم:هدا الحق..عكس جنان نحس فيها اعقل..
اسيمه:ايه ونقدروا نقولوا ان ريحان مرحة اكثر..
هيثم بإبتسامه:اللي تبيه..
هي ابتسمت بعدين حطت الكسكاس ع الطنجره..
هيثم:سومه..
التفت وهي تحول في مريول الكوجينه قالت:نعم..
هيثم:تمشي معاي لبنغازي؟
اسيمه رفعت حواجبها وقعدت ساكته..
هيثم:نبيك تسايرني..ونبي نعرف اللي يخدموا معاي ع الالماسه اللي متزوجها..
ضحكت بخجل وقالت:فاجئتني الحق..يعني كان مشينا بنخلوا الصغار بروحهم!
هيثم:نوسة معاهم..
اسيمه:ايه نوسه معاهم حاسبتها من الصغار اني..
هيثم:ههههههه..
ضحكت اسيمه وقالت:كيف يصير؟
هيثم:امم..نقول لخالتي ماجده تجي تبات عندهم..
اسيمه:زعمه راجلها يخليها؟!
هيثم:نقولك تو نتصل بيه اني..
اسيمه:باهي..
هيثم ناض ومشي طلع من حداها للدار تليفونه فيها...
واسيمه تفكر...
•••••••°°°°°°°•••••••
فهالوقت درست سيارة تاكسي في اول الشارع..
نزلت منها نسيبه وكملت ع رجليها..
وقفت ع المحل خدت منه حاجات بعدين طلعت..
بانت عليها الورشه من بعيد..
وبان عليها واحد مقعمز قدامها مازبطتاش في البدايه..
لعند مابدت تقرب بان عليها زين..
خدت نفس..ودارت روحها عاديه..
لاحظت انه حامل بين ايديه قطوسه يلعب فيها..
خليل:شن ديري فشفشه اااه قولي..بتخبشيني!!
"احممم.."
قلبه بدي يرجف..شبحلها بطرف عينه بعدين ناض بالقطوسه وخش داخل..
وهي تشبح للطريق تبي تتجاهله..
شويه وطلع قعد يشبحلها..
هي لما سمعت صوت خطواته شبحتله..
غير عيونه طول ومدلها المفتاح وقال:امورها تمام..
خدت منه المفتاح..
ومشت للسيارة اللي كانت مدرسه قدام الورشه..
هو كان يشوفلها كيف تفتح فيها وادخل في الحاجات..
ابتسم برفعة حاجب ونزل القطوسه..
القطوسه مشت تجري خشت تحت السيارة..
خليل:نوسة يامعفنه تعالي جاي..
نسيبه رفعت حاجبها والتفتتله وقالت:نعم!!!!!؟
هو شد ضحكته بدون مايشوفلها قال:تعالي هني شفشه..
ومشي للسيارة من الجهة التانيه وطبس لوطا:نوسة ياقرده تعالي..
نسيبه بتفنيصه قالت في نفسها"معاش لقي مايسميها!!"
خليل:هي تعالي ياهمي يامصيبتي السودا...نوووسه..
نسيبه كانت تغمض في عيونها بعصبيه وهي تحاول تتمالك نفسها..
خليل:نوااااسه هي تعالي تعاااالي...بش بش بش..هي بنيتي الشينه..
نسيبه :مطول خونا انتي وياها!؟
خليل:لحظه شويه ياابله..اهي طلعت..نوسه يامعفنه ياقرده ياحجشه ياأشين وحده..علاش هاربه..
وخداها ورفعها فوق وقال....نوسة الشينه..
وبحركه غير متوقعه من نوسه القطوسه انقضت بمخابشها ع وجهه خلاته خريطه..
خليل:ااااااه...يااا....وزمط كلمته..
ونسيبه ركبت السيارة وهي شاده ضحكتها..
شغلت سيارتها وتحركت وهي تضحك..
وخليل يشوفلها وهو مبتسم قال:هكي يانوستي تشمتي فيا الأعداء..
مجرد مادرقت سيارة نسيبه شبح للقطوسه قال:مافيش غدي يامعفنه اقعدي موتي بالشر..
وشدها من رقبتها ودخلها للورشه...
•••••°°°°°°•••••°°°°°•••••••
"هيا حولوا اللي قدامكم بسرعه"
البنات بدوا يضموا في كتاباتهم وكراساتهم فيسع..
جمعه:هيا معاش في وقت..
شبح لجيهان وقال:ابله جيهان من فضلك ديري لفة ع المقاعد..
جيهان:تمام..
ومشت بدت تلف ع المقاعد..
دانيه "حتى هني لحقاته عليك دراه كبد"
لفت ع المقاعد كلهم لعند ماوصلت في مقعد دانيه..
طبست عليه وقعدت تشوف..
ودانيه وهبه متفاجئات..
جمعه شافها وقال:خير ابله جيهان لقيتي شي!؟
جيهان شبحت لدانيه بطرف عينها بعدين وقفت ع حيلها وقالت:تس مافي شي..
جمعه:تمام..ومشي بش يوزع الوراقي ع الطالبات..
وجيهان وقفت القدام وعيونه بس ع دانيه..
لعند ماوصل فيها جمعه قال:بعد اتم الحصه نبيك..
وحطلها الوراقي هي وصاحبتها ومشي كمل باقي التوزيع..
هبه ودانيه شبحوا لبعض..
"ياطالبه انتي وياها عيونك في ورقتك"
هما الزوز انخلعوا وشبحولها..
وهي شبحت لدانيه من فوق لتحت..
دانيه غيرت عيونها عنها وشبحت للورقه..
جمعه بعد كمل توزيع وقف حدا جيهان وقال:زي ماقلت مش راضي بأقل من نص الدرجه..اسئله ساهله وبسيطه تنحل في نص ساعه بس...
والبنات بدوا منهمكين في الحل..
لكن هبه صاحبة دانيه ماقرتش وشبه مش عارفه شي..
قعدت تشوف مرة لجيهان ومرة لجمعه والزوز جو حدا بعض وقعدوا يهدرزوا..
جمعه:عندي جدول الامتحانات النهائيه..
جيهان:ترا نشوفه..
جمعه مرر نظره ع البنات لقي هبه تشبح لدانيه:يااطاالبه..
قاموا روسهم البنات..
جمعه:عيونك في ورقتك..اخر مرة راهو..
هي طول شبحت لورقتها..وهولهي بشنطة اللاب..
هبه قامت راسها لقت جمعه لاهي بالشنطه وجيهان تشوف لتليفونها..
نخصت دانيه..
دانيه نطت وشبحتلها..
هبه بحركة الشفاه:وريني الورقه..
دانيه:لالا..وشبحت لورقتها..نخصتها هبه مرة تانيه..
قامت دانيه عيونها لقت جمعه يدور في الشنطه..بعدين شبحت لجيهان لقتها تشوفلها..
شبحت طول للورقه..
نخصتها هبه من جديد..دانيه رقتلها منها وقالت بهمس:فوتيني..
جيهان:انتي وياها..
التفت جمعه وقال:مني ومني!؟.
جيهان:اللي في الصفه الوسطيه المقعد التاني يسموا لبعض..
دانيه:لالا والله لا..
جيهان:شفتك بعيني تعطي فيها في الإجابه.
دانيه وجهها انخطف لونه:لالا ياأبله اقسم بالله لا..
جمعه جاها ووقال:اصصص..
وجبد ورقة دانيه وهي تقول:لا ياأستاذ اقسم بالله ماكلمتها نترزى في صحتي كان عطيتها حاجه..
وهو مش مدور جبد ورقة هبه وقال:نوضوا اطلعوا والامتحان نهائي صفر..وعاودوا السنه..
دانيه بصدمه:ياأستاذ حرام عليك والله ظلم وحق ربي والله ماعطيتها حاجه الله..
جيهان:شني نكذب عليك اني!!؟
جمعه:خودي شنطك واطلعي انتي وياها..اللي يديرلكم قيمه انتم يندم..
هبه خدت شطنتها ومشت بتطلع وهي مضايقه..
اما دانيه قعدت مقعمزة في مقعدها..
جيهان:اشي!!
جمعه عقد حواجبه وقال:شني انتي باش تفهمي!! نوضي اطلعي برا..
دانيه بملامح وجه حاده ومتحديه ودموع تنزل:مش طالعه..مادرت شي غلط بش نطلع..
جيهان:قليلة ادب البنت هادي..
جمعه استفزه تحدي دانيه وقال:مالا والله المادة هادي مانك ناجحه فيها..ونعرف نتفاهم كويس مع امثالك..
وقام تليفونه بيدير اتصال..
ودانيه مازالت ع وضعها..
جمعه:ايوه ابله مهره..
ومشي طلع من الفصل..
جيهان:مش خايفه بكل مصح وجهك..
دانيه:مادرت شي نخاف منه..ومانيش طالعه من هني لين يردلي ورقتي..
والبنات كلهم يشبحولها..
ع خشته قال:مازال مصكرة راسك! تمام تو تشوفي شن يصير فيك..
جيهان:ماشفتش طالبه بالوقاحه هادي ع قد ماقريت قالت مانيش طالعه لين يردلي ورقتي..
جمعه:تو نردها باهي..غير راجي..
ودانيه مازالت ثابته ودموعها مابطلوش نزول..
ع خشة المديرة ومعاها الإخصائيه..
جمعه:شوفوا شغلكم بالله..
المديرة:دانيه خودي شنطتك واطلعي..
دانيه ببكي:اقسم بالله ياأبله ماغشيت ولاماعطيت حد حاجه اقسم بالله..
جيهان:ريتك بعيوني ياكذابه..
دانيه بغيظ:انتي الكذابه..
كلهم انصدموا في دانيه..
جمعه وصلت عنده حدها قال:الطالبه هادي معاش نبيها تحضرلي حصه..
جيهان:قليلة ادب عديمة ربايه..
دانيه:احترمي نفسك..
المديره بصوت عالي:دانيه..لو ماطلعتيش توا نفصلك من المدرسه فصل نهائي..
دانيه قعدت تشبح لجيهان بحقد..وبعدين شبحت لجمعه نفس الشبحه..بعدها خدت شنطتها وقالت:حسبي الله ونعم الوكيل..
ومشت طلعت بسرعه وهي منزله عيونها لوطا..
والأبلات وراها وصكروا الباب..
جمعه بعصبيه:ألهي بإمتحانك انتي ويااها..
وجيهان قعدت تساوي في قصتها اللي طالعه من الوشاح وهي رافعه حاجبها وتمرر في نظراتها المتكبره عليهم..
برا..
دانيه مجرد وصلت للدروج قعمزت عليهم بهده وانهارت بالبكي..
المديرة؛دانيه بنتي اهدي اني تو نتصرف..
الأخصائيه:دانيه خلاص نوضي..
دانيه بالعبرة:والل..والله..مادرت..حاجه..والله..يا..ابل..الله..
وقعدت تبكي لين فمها يرجف من قوة البكي..
ع جية استاذ وزوز ابلات...
الابله:خيرها دانيه!!
والمديرة:في حد عنده ميه!؟
مشي الاستاذ يجري..
ودانيه تبكي بالعبره..وفمها يرجف..
المديرة:والله يادانيه حتنصرف والله يابنتي انتي الاولى ع المدرسه واني نعرفك كويس ونعرف اخلاقك..
ودانيه تبكي وبس.
ع جية الأستاذ بالميه..
عطاها للأبله جت بيها لدانيه وقالت:هاك اشربي بنتي اشربي
دانيه خدت الشيشه وهي تشهق بالعبره..كيف جت بتاخدها فشلت مع بعضها..وداخت..
🥀الظلم حار...وع وحده زي دانيه مسكينه عايشه حياة كلها ظلم في ظلم وطاقة الاحتمال عندها نفدت بعد الموقف الصعب اللي انحطت فيه اليوم🥀

....يتبع...