البطل المغمور "شمس الغروب"

الجزء الخامس والعشرين "القسم الرابع"

¤إن الصلاة كانت على المؤمنين كتابا موقوتا¤
احب الأعمال إلى الله الصلاة في وقتها💓
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
من خوفها..
نزلت راسها لوطا ومشت بسرعه خايفه منه..
هو اعترض طريقها...هي هربت للجهة التانيه..
اعترض طريقها مرة تانيه...
قعدت تقول وهي ترجف..
"حول من قدامي شن مازال تبي مني!؟"
جهاد:نبيك انتي..
رفعت عيونها وفنصت فيه..
جهاد:تعرفي كان تسيبي الشيباني اللي واخدتيه ورب العزة ناخدك بالله..
مررت عليه نظرها من فوق لتحت بإزدراء...بعدين مشت وخلاته..
هو قعد يتبع فيها بعيونه بعدين مشي وراها وهو يقول:وربي ماني مخليك وتو تشوفي يارتاج..
هي زادت سرعت خطواتها وهي تقول في نفسها بخوف...
"ياربي شن مازال يبي مني ياربي شن هالمصيبه السودا اللي درتها في عمري!!"
اما هو وقف وقعد يشبحلها لين ادرقت من قدام عيونه..
ولما جي بيلف ويمشي..شاف شي اثار انتباهه..
شاف ملاك جايه هي وواحد وقعمزوا مع بعض...وهالواحد هو يعرفه كويس..
وخر خطوة بعدين لف ومشي وهو يقيم في هاتفه بش يدير اتصال...
🍁🍁🍁🍁
حطت طاسة النسكافيه وقالت:من غير طول سيرة خل نخشوا في الموضوع طول...انت تعرف اني خليل كان قاري فيا فاتحه ولا؟
هو بعد شرب من النسكافيه هز راسه وقال:امم..اها..
ملاك وهي رافعه حاجبها:وتوا طلقني..
فتح عيونه على وسعهم ورفع حواجبه وهو متفاجئ..
ملاك بحقد:خداني ع خاطر بوه وسيبني على خاطر وحده تانيه..سيبني ببساطه ولاهمه لاقلبي ولامشاعري ولاكرامتي..
=مجروحه واجد ياشيتا..
ملاك ودموعها في عيونها:ومقهورة ومحروقه ونبي نحرق قلبه كيف ماحرقتي..
وجعاته لما شاف دموعها نازلات حط الطاسه قدامه ع الكرسي وقال:شن تبي ندير ونا نديره طول..
ملاك تنهدت وهي تمسح في دموعها وتقول:نبيك تحرقله قلبه ع البنت اللي يبيها...مانبيهاش تموت لا..نبي اضيع..معاش تنفع لشي...فاهم عليا؟
هز راسه وقال:كويس...انتي غير عطيني عنها كل المعلومات اللي توصلني فيها وتو تسمعي اللي يشفي غليلك..
رشفت وقالت:اصلي ياكرومه..اسمع هي تخدم في مدرسة......
وكملت ملاك كلامها عن نسيبه وحقدها على خليل وغيرتها من نسيبه عاميين عيونها تماما عن ادراك مدى فداحه الفعل اللي تبي ديره...مستغله ان الشخص اللي قدامها المدعو "مكرم" في بينه وبين خليل مشاكل ويبي يصفي حسابه معاه بس ماكانش يقدر عليه..وتوا جاته الفرصه لعنده...
•••••°°°°°•••••°°°°°•••••
طلعت من الكوجينه بعد ماكلمت ضمانها وترتيبها..
ومشت للصاله..
لقت خوها مقعمز ولاهي بجهازه اللوحي"آيباد"
وحداه بناويته يتفرجوا ع التليفزيون...
ركزت ع ملامح خوها وهو يشوف لشاشه الآيباد..
الدموع مغرقات العيون...وابتسامة خفيفه مرسومه ع وجهه..
ابتسمت وقالت:تقرا في بوست سارة؟
رفع عيونه وشبح لأخته بعدين ضحك وقال:مانحبش المدح..ديما نحس فيه مؤذي اكثر من الذم...لكن توا حبيته هلبه..
قعمزت نسيبه وهي تقول:لأنه من بنتك...شفت نظرتها ليك كيف شكلها..شفت قيمتك عندها شن شكلها؟ هادم المهمين ياهيثم..نظرة الناس اللي تحبك ليك هي المهمه والباقي..طز
ضحك وهو يهز في راسه..بعدين قال بإبتسامه اسف:سليم ولد خالك لادور وعدل..
نسيبه:ماتفاجئتش صراحة ولااستغربت..علاقتنا بيهم مش قوية هلبه..ومن قبل في الأزمات مالقيناهم..
هيثم تنهد وقال:العوض من الله..مسخرلنا اللي خير منهم..
نسيبه شبكت صوابع ايديها وقالت بعد بلعت ريقها:ايه حقه..شن كنت تبي من خليل امس..وعلاش هو اللي كان يسوق في سيارتك..
هيثم حك حاجبه وقال:في الحقيقه مانقدرش نقولك شن نبي منه...لكن نقدر نقولك اني امس تعبت شويه وكلمته يجي يروح بيا..
نسيبه بقلق:شن صارلك بالزبط؟.
شبح لبناته بعدين غير عيونه للتلفزيون وقال:هبوط سكر..
خبطت نسيبه بيدها ع فخدها وقالت:حي عليا! باهي اللي مادرتش حادث..
شبحوا البنات لبوهم وريحان قالت بخوف:حادث!
شبحولها الزوز..
هيثم:مافي شي حبيباتي تفرجوا..
ريحان قعدت تشبح لبوها ودموعها نزلوا..
هيثم:تس..ناض ومشالها...خدي يدها ووقفها وهو قعمز مكانها وهو يقول:مافي شي بابا...قعمزها على رجله وقال..مافي شي ياعمري..وقعد يمسح في دموعها..
وشبح لجنان وضمها وهو يقول:مافي شي..
هما قعدوا شادات فيه وماتكلموش بكل..
وهو يشبح لنسيبه..ونسيبه تشبح للبنات بحزن..
تنهد وشبح للتلفزيون...وهو يفكر...
▪▪▪▪▪
◇فكرت في أن صدمة موت اسيمه مازال لهاللحظه مأثرة في التوأم برغم انهم كانوا صغار وقتها ويقولوا الصغار ينسوا بسرعه..بس اللي شفت في عيونهم لما سمعوا كلمة "حادث" خلتني نكذب المقوله هادي...الصغار يتأثروا هلبه بس مايبينوش زي الكبار...وقتها حسيت بأني لازم نحافظ على نفسي اكثر ع خاطرهم..صح مانقدرش ترد الموت لو حان وقته...لكن حناخد بالأسباب ونحفظ نفسي....ع خاطرهم....
▪▪▪▪▪
قعد معاهم ساعه وهو يحاول يغير جوهم ويطمن قلوبهم...
بعدين خلاهم لعمتهم تجهزهم للمدرسه..
وهو مشي طلع يدير مشوار جدا مهم بالنسبه ليه...
••••••°°°°°••••••°°°°°°••••••
في المدرسه الثانويه للبنات...
في الحصة السادسه لفصل طلبة الثانيه ثانوي علمي...
كان جمعه يعطي في حصته...وطول ماهو يشرع تركيزه في الغالب ع طالبه وحده بس في الفصل..كان تتحاشى تشبحله وعيونها اغلب الوقت ع السبورة..
جمعه:هدا مثال يوضح العمليه..وتوا بنكتب مسألة ونشوف كان فهمتوا ولا لا...
وبدي يكتب في المسأله...وبعد ماكمل حط الخطاط ومشي قعمز ورا طاولته وقال:من يحاول فيها؟
رفعت ازهار يدها مع زوز طالبات تانيات..
هو شبح لدانيه وقال:نوضي دانيه..
شبحتلها صاحبتها هبه..
هي عقدت حواجبها وناضت بالسيف ومشت للسبورة ..
وازهار تشوفلها بكره وغيره..
وصلت دانيه في السبورة وخدت الخطاط..خدت نفس وبلعت ريقها...
وبدت تحل في المسأله وتشرح للطالبات ومابتش تشبحله بكل..
يسأل فيها...ترد...لكن بدون ماتحرك عيونها تجاهه لين كملت..
جمعه:ممتاز...خشي...
حطت الخطاط ومشت ولت لمقعدها وقعمزت بدون ماتشبحله..
وهو ناض من مكانه ومشي للسبورة بش يكمل شرح وتركيزه على دانيه....وأزهار منتبهتله...
.....في الفصل اللي قدامهم....
كان لطلبة الصف أول ثانوي ....
حصة لغة انجليزيه...
الأبله تقرا في القطعه من الكتاب وهي ادور بين الصفوف...
لين وصلت في صفة الحيط....
كانت في بنت مقعمزة في أول مقعد...
مش محجبه..وشعرها طويل وكان مجدلاته على طوله..
فجأه الابله وهي تقرا..
حطت عليه ولفاته ع يدها وجبداته وقالت:امتى تستيره هدا وتتحجبي..
انصدمت سارة في حركة الأبله..
وماكانتش صدمتها اكبر من صدمة الطالبه نفسها اللي ماقدرتش ترد غير بضحكه مرتبكه من الخوف وهي شاد راسها لأن جبدة الأبله لشعرها وجعتها بقوة..
طلقت الابله شعرها وخبطتها ع راسها بالكتاب وقالت:الحجاب فرض وانتم تسكروا في روسكم عليه..شعرك هدا اللي فرحانه بيه تو غدوة ربي يعلقك منه في نار جهنم ويشوشطك..
البنت نزلت عيونها للكتاب وهي محرجه والبنات وزميلاتها يشبحولها..
والأبله رجعت تكمل قراية القطعه..
والطالبات رجعوا انتبهوا معاها...بينما سارة كانت مرة مرة تشبح للبنت وهي مضايقه ع خاطرها..
طق باب الفصل..
الأبله:تفضل..
انفتح الباب وخشت نائبة المديرة...
=السلام عليكم ياأبله..معليشي بناخد منك اقل من خمسة دقايق ..
الأبله:تفضلي..
النائبه خشت ووقفت قدام اول مقعد في الصف الوسطي..
مقعد ساره...
وقالت وهي تمرر عيونها ع الطالبات:زي ماتعرفوا حتبدا المسابقة العلميه بين المدارس بعد اسبوع بإذن الله وحني اخترنا من كل فصل في المدرسة طالبتين يكونوا مجموعه تمثل مدرستنا..من فصلكم اخترنا طالبتين..
دب في سارة الحماس وقعدت تستنى تسمع اسمها..
الأبله قامت الجهاز اللوحي وبدت تسمي منه:الطالبتين هما..
مونيا خليفه الحشاني...
الطالبه هادي كانت زميله سارة في المقعد..ابتسمت بفرح وسارة شبحتلها بإبتسامه اللي تلاشت طول مجرد ماسمعت الابله تنادي بالإسم الثاني...
"رهف عبد السلام المزوغي"..
حست بروحها انطفت مرة وحده..حماسها المتقد انطفي..
حركت عيونها زي مادارو باقي زميلاتها وشبحوا بإتجاه رهف..
اللي كانت هي نفسها مصدومه ومش مصدقة..
نائبة المديرة :استعدوا كويس نبوكم ترفعوا روسنا المرة هادي نبوا نفوزوا ملينا من الترتيب الثاني والثالث..
وحيكون ليكم تكريم خاص من المدرسه لو فزنا بعون الله...شبحت للأبله وقالت..مشكورة ياأبله...السلام عليكم..
الابله وهي متفاجئة:وعليكم السلام..
طلعت نائبة المديرة من الفصل وسكرت الباب..
ورهف تشبح لسارة بضيق..
وسارة تشبح للكتاب وهي شاده دموعها بقوة..
الأبله:معليشي يعني بس سارة الكاتب هي اللي مفروض تخش مسابقه زي هادي مستواك انتي مايجي شي جنب مستواها ياأم قرين انتي..
رهف انحرجت وقعدت ساكته..
وسارة شبحتلها...
الأبله:الله غالب وخلاص ماعندي مانقول..هي نرجعوا لدرسنا قريب اتم الحصه ركزوا معاي..
غيرت سارة عيونها عن رهف وركزت في كتابها ومن داخلها كان كاتمه عاصفة بكاء...لأن عارفه السبب اللي خلاهم يستبعدوها من الدخول في المسابقه...
••••••°°°°°••••••°°°°°°°••••••
الانظار كلها عليهم وهما ماشيين مع بعض..
تحديدا على هو ...نظرات هو ماشافهاش بس يحس بيها..
يحس بيه وكأنها ابر تخز فيه خز..
ومع هدا حاول يتجاهلها..
عميد الكليه:الشرطه جت وعاينت مكان الحادث زي ماقتلك وطبيعي جدا الحكاية السبب يكون مبهم للآن لأن مافي حد من صحاب القصه قدروا يحققوا معاه..وانت ادرى..
هيثم هز راسه وقال:واني زي ماقتلك نبي نشوف مكان الحادث فقط..
خشوا لمكان شبه فاضي..ومظلم بعض الشي..
هيثم قعد مركز عليه....لعند ما سمع العميد قال..
=هو هدا..
وقف هيثم وشبح يساره شاف مكان يشبه الفيرندا..
قدم كم خطوه لين طلعله ووراه العميد..
شبح قدامه...لقاها فيراندا طويله...
قعد يمشي ويمشي والعميد وراه...لين وصلوا لمكان الحادث بالزبط..
وشاف الموقع اللي طاح فيه الأستاذ في اخر الفيرندا..
قام عيونه وشبح فوق جهة اليسار شاف الكاميرا..
بعدين لف وقعد يمشي ويمشي  ويشبح فوق لعند ماوصل للباب اللي طلعوا منه...استغرب ان ماكانش في كاميرا موجوده غير في اخر المكان..
التفت للعميد وقال:مافيش كاميرات هني؟!
العميد:والله شن بنقولك المكان هدا كانت تصيرلنا فيه قصة غريبه..طبعا حني مركبين الكاميرات في الكليه كلها والمكان هادي فيه كامرتين وحده كانت هني ووحده غادي..
في مرة لقيناهم مكسرات...ومرة مقضوضات...واللي كان يدير صوراته الكاميرا شخص ملتم هيئته مش واضحه..
شكنا كله كان في الطلبه لدرجة اننا فترة جبنا من يقعد هني بش يراقب المكان..
اللي يدير في الحركه هادي في النهار ولى يدير في الليل..
دخلنا امن الجامعه الشرطه مافيش فايده...المخرب هدا كان شيطان مايخلي في شي وراه...
الموضوع قعد هكي...وحني ماكانتش عندنا ميزانيه تخلينا نركبوا كاميرات بشكل متواصل..وخسرنا فوق هكي..
فخلينا المكان من غير كاميرات لفترة...ومن اسبوع تقريبا...
ركبنا وحده غادي واكتفينا بيها هي...
هيثم وهو مضيق عيونه بتركيز لما كان يسمع في كلام العميد..شبح لأخر الفيرندا وقال:علاش غادي مش هني؟
العميد شبخ غادي وقال...لأن غالبا الباب هداكا هو اللي يكون مفتوح مش هدا يعني لو بيخش حد حتصوره الكاميرا من غادي...
هيثم رجع شاف للباب التاني وشبح فوق وقال:اممم...التفت للدكتور وقال...ويوم الحادث الكاميرا ماصورتش الا المشكله بس...يعني ماصورتش ولدي والاستاذ وهما خاشين..
العميد:لأن زي ماقتله غالبا الباب هداكا هو يقعد مفتوح مش هدا...ويوم الحادث الظاهر استاذ جلال فتحه وطلع منه لأنه الأقرب لمكتبه..
هيثم:جلال...الوحيد اللي مكتبه هني؟
العميد:ايه...وبارك الله فيه اللي رضي..هلبه ماعجبهمش مكان المكتب ومابوش يقعدوا فيه...وهو قال يقعد فيه ماعنداش مشكله..ضحك وكمل يقول...الشرطه ماسألتش الأسئله هادي كلها دكتور!
هيثم تنهد وقال:اعذرني لكن ولدي اللي ممكن ينلف حبل المشنقه..لاقدر الله..
العميد هز راسه بأسف وقال:للأسف..زياد توقعناله مستقبل باهر..
هيثم بلع ريقه وهو يحاول يخفي وجعه وقال:سؤال اخير..
العميد:تفضل..
هيثم:الفترة اللي كانت يتم فيها تخريب الكاميرات صارت سرقه في الكليه؟
العميد بضحكه قال:هدا الشي اللي كان محيرنا كلنا والشرطه معانا...ماصارتش سرقات نهائي..
هيثم شبح للعميد شويه وهو يفكر...بعدين جاه ومد يده وقال:مشكور جدا لتعاونك..
صافحه العميد وقال:تقعد شخصية ليها احترامها ومعزتها الخاصه مهما صار..
ابتسم هيثم مجامله وقال:شكرا..
.....ومشي هيثم طلع من الكليه والأبر مازال توخز فيه...نظرا  وهمسا...
وكانوا في عيون تشوفله بخوف وحزن...
=قداش واجعني...اه بس لو تقدر رنيم تتكلم...
=موقفها صعب هلبه...والله واجعتني هي اكثر منهم...هي بنت...
=صدقتي...بنت...
•••••°°°°°••••••°°°°°••••••
نهاية الدوام...
كانت سارة طالعه من فصلها بإتجاه فصل دانيه تبي تطلع هي وياها..
وهي ماشيه..
"سارة..سارة...راجي شويه"
التفتت سارة وشبحت للبنت اللي تنادي فيها..
جتها ووقفت عليها وهي تقول:سامحيني بالله عليك..
سارة بتعجب:علي شني؟
رهف بضيق:عارفه روحي مانستاهلش نخش مسابقة زي هادي وانتي موجوده مش عارفه كيف اختاروني وخلوك..
سارة ابتسمت وقالت:من قالك اني خير منك!؟ انتي في حاجات فيها اشطر مني..زي الانجليزي متلا..والرياضيات..انتي خير مني فيهم..
رهف بضيق: حتى لو...لكن نقعد مش زيك ماعنديش شجاعه ادبيه...
سارة حست بإن رهف عندها شي الرهاب الاجتماعي..وان كان مش واصل لمرحلة الرهاب فعلا..ماتقدرش تتكلم في مجمع وماتعرفش ترد على اي حد يهاجمها وينتقدها وتتأثر بشكل كبير..وجعتها رهف..بالذات بعد الموقف السخيف اللي دارتهولها ابلة اللغه الانجليزيه..
للحظه سارة نست كل الوجع اللي كانت تحس بيه لعدم اختيارها بسبب المشكله اللي صارت مع خوها...وقعدت تفكر في حالة رهف..
سارة:انتي تبي تنطلقي شويه بس.....وتعرفي قيمة نفسك وتوثقي فيها..
رهف تنهدت بحزن وقالت:ان شاء الله...
سارة بإبتسامه:عطيني رقمك رهف..
رهف ابتسمت بفرح وقالت:لحظه بس..
نزلت شنطتها وطلعت من جيبها مذكرة صغيرة وبيرو..
ع جية دانيه حطت ايديها ع كتاف سارة وقالت:سارونه..
سارة شبحت لدانيه وباستها من خدها..ودانيه ضحكت وباست سارة من خدها..
ورهف تشوفلهم بإبتسامه ومدت الورقه لسارة:هدا رقمي..
خداته سارة وقالت:تو نبعتلك رساله قبل نكلمك..
رهف ابتسمت وقالت بإستعجال:تمام...بابا يستنى فيا حي عليا..باي..
ولفت ومشت تجري..
دانيه:خيرها؟
سارة تعنقت ذراع دانيه وبدوا يمشوا هما الزوز وهي تقول:شي نبي نتعرف عليها..
دانيه:تعرفي ياحنه لكن ماديريش صاحبات غيري..
ضحكت سارة..
دانيه بضحكه:ايه بنهيجوا اني وياك سبوع الجاي في المسابقه..
سارة ابتسمت بأسف وقالت:مااختارونيش للمسابقه..
دانيه شبحت لسارة بعدم تصديق وقالت:بلابرادة!
سارة ضحكت بحسرة وقالت:والله مااختاروني..
وقفت دانيه وقعدت تشبحلها وهي مصدومه..
مسحت سارة دمعتها اللي نزلت ورجعت ضحكت تاني نفس الضحكه وقالت:قدر الله وماشاء فعل...وبعدين عادي مش اخر الدنيا...ومشت ومشت معاها دانيه وهي تقول..انتم خير وبركه..
ودانيه قعدت ساكته وهي مضايقه وماقدرتش تعلق ع الموضوع بكل..
وقعدوا ساكتات شويه لين قالت سارة:الباص من بكري يستنى شكله مستعجل..
دانيه:حتى حني..
طلعوا الزوز من البوابه..
مع طلعة جيهان وجمعه من باب المدرسه اللي يطلعوا منه المعلمين..
ومن بعيد شويه راجح اللي كان راكب الموطو ولابس خوذة يشبحلهم..
راجح :ايااااه...هدرزة وجو...ربي يهدي بوي وخلاص..
بعدين جو عيونه ع دانيه وهي طالعه..
شافها مع بنت الكاتب وعلاقتهم ببعض بانتله قويه..
راجح وهو يشوفلهم كان مركز مع دانيه بس..
ضحكتها..وكيف تتكلم...وكيف تحرك في ايديها..
وقلبه كل ماله تزيد دقاته تقوى اكثر واكثر...وكأنها اول بنت يشوفها في حياته..
وكأنه قبلها ماكانش يحس بأي شعور اتجاه نسيبه..
لعند ماركبت للباص..
تلقائيا شغل الموطو...ولحق الباص...ونسي اخته وخطيبها..
خطيبها اللي كان بالسيف يسمع فيها شن تقول..
عقله مش معاها وعيونه كانوا يهربوا لدانيه مرة مرة لعند ماركبت باصها والباص مشي...
جمعه:تمام تمام..هي بري اركبي سيارتك..
جيهان:ردي عليا بعدين لما نكلمك..
جمعه لبس نظراته وهو يهز في راسه..ومشي لسيارته..
وهي كذلك مشت لسيارتها وعيونها عليه لين ركبت وشغلت سيارتها وتحركت..وهو تحرك وراها...
•••••°°°°°°•••••°°°°°°••••••
الساعه الخامسة الاربع...
مدرس سيارته وهو فيها يتكلم بالتليفون..
خليل:تمام اول ماتحصل رقمه ابعتهولي طول..
"اسمع خليل لأنك حلفت ماضره بندورلك رقمه الجديد الراجل صاحبي ومأمن فيا ياخليل".
خليل:واني قتلك اقسم بالله ماني ضاره نبي ندوي معاه بس..
"تمام..بعدين ساعتين تو نرد عليك"
خليل:نستنى...ونزل تليفونه وسكر وعيونه ع المدرسه اللي كان واقف حداها..
موعد الانصراف...والطلبه بدو يطلعوا..
....داخل...
"اني نعرف اسيمه الله يرحمها ونعرف تربيتها كويس هدا علاش رأيي في ولدها زياد ماتغيرش..هو بس عيبه الوحيد عصبيته وعناده"
نسيبه بضيق:عناده..عنيد هلبه...
زميلتها:ربي يطلعه من هالمصيبه على خير يارب وتصير حاجه تغير كل شي..
نسيبه بحزن:يارب..يارب...هي خل بنروح وقت صحيتي نجاة..
نجاة:بالسلامه..وسلمي على سارة..
نسيبه:يوصل...بالسلامه..
ومشت لبنات خوها اللي كانوا واقفات حدا السيارة يراجو..
وصلت فيهم وقالت:هي اركبوا قطاطيسي..
وفتحت السيارة..
ركبوا البنات..وهي ركبت معاهم..
بعد شغلت السيارة تحركت وطلعت من المدرسه..
اول ماطلعت خليل شافها شغل السيارة وتحرك وراها بس خلا بينه وبينها مسافه مايبهاش تلاحظه..
قعد وراها..
لين شافها درست السيارة قدام مكتبه جايه في طريق فاضيه...
ونزلت...
درس وقعد يشوف للسيارة..
لحظات وطلعت نسيبه وفيدها كيسه ..
فهاللحظه..
جت سيارة بيضا مسرعه وقفت قدام المكتبه.
انفتح بابها ونزل منها واجد جي لنسيبه بيشدها..
هي انصدمت وقالت:هيي هيي شن في!
وخليل نزل يجري من السيارة..
=تعالي جاي تعالي...
هي عقدت حواجبها ولوحت الكيسه ع طول يدها وبدت اطبق في حركات الكارتيه اللي تعلمته ليوم زي هدا..
خليل لما شافها شن درات فيه وقف يشوفلها وهو مصدوم..
دفعاته بقوة ع السيارة طاح عليها...
نسيبه وهي داهشه:شكلات معفنه..
وبنات خوها يصفقوله في السيارة..شبحتلهم وقعدت تضحك
ع طلعه التاني يجري وفيده موس..
جاه بيه يجري..
شافوه البنات وعيطوا وهما يأشروا عليه..
هي انخلعت وشبحتله لما كان خلاص وصل فيها وحيضربها..
وفجأه..
اختفي من قدام عيونها..
رمشتهم بسرعه من الذعر والخوف وشبحت القدام..
شافت واحد شاده وهو حاط نص جسمه ع مقدمة السيارة وموجه الموس لرقبته وهو مثبت راسه بيده..
خليل:عبد الستار...وليت تخطف في النساوين ياعبد الستار!
=شارون...شورك هي!؟
زاد ضعط ع راسه وقال:من باعتك..؟
ناض صاحبه هداكا بصعوبه وقال بتعب:مكرم ياشارون..مكرم..
خليل قعد يشبح للطريق ويشوف للسيارات اللي تمشي وتجي...
وخر عن اللي شاده وقاله:جربوا تحصلوا معاي مرة تانيه..
من الخوف اسرعوا وهما ماشيين يركبوا السيارة..
حدف خليل الموس للسيارة متاعهم خش من الروشن واستقر داخلها..
وهما طول تحركوا بسرعه يحرقوا في العجل من خوفهم..
"صحابك الشكالات هادم"
رفع حواجبه والتفتلها..
نسيبه بحده:شن يبوا مني هالحثاله وعلاش لما جيت انت هربوا...لشن قاعد تخطط انت...شن في فراسك!؟
خليل شبح للمكتبه لقي صاحبها واقف قدامها يتفرج عليهم..
شبحلها بعدين غير عيونه عنها وقال:بري روحي..بري...
نسيبه :لامش مروحه لين نعرف شن صار توا وعلاش صار!؟
خليل غمض عيونه بشده من الغضب وفتحهم بعدين قدملها وقال:مش وقت تصكير الراس متاعك هدا بري اركبي يابنت الناس بالله عليك..
نسيبه رفعت حاجبها وقعدت واقفه في مكانها..
خليل خايف يفلتوا اعصابه عليها ويغلط فيها بس حاول يتمالك نفسه وقاللها برجاء بدون مايشوفلها:ولو لمرة اعتبريني بنادم واسمعي مني..ولو لمرة..مرة وحدة بس...الناس تتفرج..
نسيبه هزت راسها ومشت ركبت السيارة..
وهو شبحلها لين ركبت...
شبحتله هي من فوق لتحت بعدين شبحت القدام وشغلت سيارتها وتحركت..
وهو طول مشي لسيارته..ركب...ولحقها....
....وهو ماشي وراها بالسيارة لاحظها غيرت طريقها استغرب..
خليل:وين ماشيه هادي؟!
شويه ودرست في مكان شبه فاضي..
وهو درس وراها..
نسيبه:شويه وجايه حبيباتي..
هما الزوز هما روسهم وقعدوا يتبعوا فيها بعيونهم لين نزلت من السيارة...
سكرت الباب وقعدت واقفه حداها..
هو نزل ومشالها وهو ومستغرب..
وقف وخلا مسافه بينه وبينها...
سألها بدون مايشوفلها:خيرك وقفتي هني..!؟
نسيبه بجديه:تعرف..اني من لما عرفتك ولامرة استريحتلك..ولتوا مش مرتاحتلك..وشايفه ان اللي دير فيها هدا جو... كذب...نفاق...خداع...وسيله تبي توصل بيها لغاية في نفسك..
عيونه تعبوا دموع وهو يسمع في كلامها..برغم قوة الألم اللي يحس بيه من ورا كلامها الجارح...لكن خلاها تكمل كلامها..
نسيبه:اني مش عارفه كيف قدرت تمشيه حتى على خوي هيثم....المسكين..من الهم اللي ركبه معاش ولى يفرق بين الصح والغلط..لكن قاعده مصحصحه...ركز هاه مصحصحه كويس واللي صار قبل شويه خلاني شكي فيك يزيد يقوى..وصدقني مش حنخلي خوي معمي على عيونه اكثر من هكي..
قام عيونه وشبحلها..
وهي تشبحله وتشوف لدموع عيونه قلبها يبي يرق وهي تقسي فيه بالسيف..ومازالت محافظه ع ملامح الحدة على وجهها..
رمش عيونها بسرعه وبعدهم عنها وبلع ريقه..وقال وهو رافع سبابته اللي حاط راسه ع راس ابهامه وهو يقول:تعرفي..احمم..تعرفي قبل اللحظه هيا..قبل اللحظه هادي...حط يده ع صدره  وقال...كنتي عندي حاجه كبيرة حاجه غاليه...اكثر حاجه...بلع ريقه وقال..احمم..اكثر حاجه كنت نتمناها من ربي...نتمنى ربي يشكرني بيها لما يعطيهالي..
نزل ويده وقال...لكن توا...شبحلها وقال...معاش تعنيلي شي...ولاحاجه...وليتي عندي ولا حاجه...ماتستاهليش..ماتستاهليش..
قالها بنبرة مخنوقه ومعاش قدر يقول شي بعدها..
ولف ومشي وهو شاد روحه بقوة ويقول في نفسه...
"استغفر الله..استغفر الله العظيم...استغفر الله"
وركب سيارته بدون ما يفكر  يلمحها حتى لمحه..
وشغل سيارته وتحرك..
وهي واقفه تشوفله...
مرسومه ع وجهها ملامح البكاء..وشفايفها يرجفوا وهما يتقوسوا رغم عنها..
خدت نفس...وزفرت بقوة...ولفت للباب...فتحاته وركبت..
شافت ريحان اللي كانت مقعمزة جنبها دموعها وهما ينزلوا..
ريحان:تبكي عمتو؟
جنان:شن قالك خليل؟
نسيبه طلع منها صوت بكي بعدين شدت روحها وقالت:شي شي..حبيباتي شي..
وشغلت سيارتها وتحركت..
والبنات يشبحولها بحزن...
🍁وفي من حب معذب للقلب والروح...
عذاب مستمر.....
كل حد فيهم يبي التاني...
هي مش شايفه ان في امل ليها وليه..مافيش امل انهم يجتمعوا تحت سقف واحد...سقف الارتباط المقدس....
بس هو كان عنده امل....ومازال موجود...
لأنه طلبها بشدة من هو...من اللي وحده يقدر يعطيهاله رغم كل العقبات والمستحيلات...
......في المسجد....
يصلي في راتبة المغرب....
وهو ساجد....
"انت تعرف قداش نحبها ونبيها تكون حلالي..انت بس اللي تشوف في قلبي وتعرف اني صادق...صادق في كل شي...
مش هامتني نظرة الناس ليا...ولايهمني من يصدق ويكذب..
مادام انت شايف وعارف كل شي..بس نبي منك شي واحد ياربي...عطيهالي يارب...وسخرلي قلبها ياربي..عطيهالي وخليها مرتي وام صغاري يارب...يارب...نبيها هي مانبيش غيرها يارب.....خليها تحبني يارب"
كانت دعاء كله رجاء وتوسل متخلط بالدموع..وبنبرة مرتعشه..
وهو عارف وموقن ان ربي مش حيرده من حسن ظنه فيه..
قام راسه من السجود..
حس روحه ولى خفيف بعد ماقاله كل اللي عنده...وقلبه بدي يرتاح بعد ماكان يعتصر من الألم...
 الراحه اللي حسها خليل خلاته يوقن وبكل قوة...ان نسيبه حتكون ليه هو لامحاله....
《أنا عندي ظن عبدي بي》....فماظنكم برب العالمين؟!....
▪▪▪▪▪
◇حسن الظن بالله اعظم عباده....واكثر شي يخلي البنادم يحس بالسلام الداخلي حتى هو في عز المصيبه والمحنه..
حتى وهو في وسط النار..زي ماصار لخليله ابراهيم..
لما لوحوه فوسط النار...وهو قال من وسط قلبه وبكل يقين...وحسن ظن بربه...حسبي الله ونعم الوكيل..
فشوفوا ربي سبحان الله...مانزلش المطر مثلا بش تطفي النار...ولاخلا النار تنطفي من لاشي بدون سبب وهو القادر على كل شي...لالا...هو قاللها...كوني بردا وسلاما..
برد...وسلام..قعدت نار...لكنها خصائصها تغيرت...ولت بردا وسلاما...اااه ياإلهي...سبحانك ماقدرناك حق قدرك....
▪▪▪▪
وهيثم في وسط نار المشاكل والهموم...
كان عنده حسن ظن بالله كبير...كان يقول لنفسه ان كل شي حيفوت ويمر وينتهي على خير مهما طال امد البلاء..
خطرت على باله وهو يسوق في سيارته مروح لحوشه..
كلمة كانت تقول فيها اسيمه "كله يفوت...كله يفوت ويعدي"
وفعلا كان كله يعدي ويفوت وكأنه ماكانش...
وصل لحوشه...
وخشله وهو متعب بعد ماكمل يومه كله وهو يجري ع حكاية ولده زياد...
بعد ماطلع من الجامعه..
توجه لمركز الشرطه وقابل الضابط المسؤول عن القضيه وسمع منه نفس الكلام اللي قالهوله راجح..
بعد ماطلع منه قعد يدور ع محامي يستشيره قانونيا عن قضية ولده..
وبعد لقي محامي قعمز معاه وهدرز معاه ع القضيه بإستفاضه والمحامي عطاه كل الاحتمالات..
وقاله كله يوقف ع اقوال الأستاذ بعد مايحققوا معاه..
ولخجل هيثم من حكاية الإدمان ماباش يصرح بيها للمحامي...
بعد ماطلع من عنده مشي للمستشفى بش يشوف وضع جلال الوافي...
...ع طاوله العشي مقعمزين يهدرزوا...
هيثم:فاق اليوم وقالوا وضعه الصحي في تحسن...وغالبا غدوة يقدروا ياخدوا اقواله..
سارة:ماخلوكش تخشله..تكلمه؟
هيثم:اني مابيتش شفت ان حركة زي هادي ممكن ماتكونش في صالحنا..
سارة:علاش؟
هيثم اشر بعيونه ع خواتها...هي شبحتلهم وسكتت..
كانوا يهدرزوا قدامهم بدون ذكر اسم زياد...وبوهم خاف ينتبهوا اكثر ويعرفوا...
غير عيونه وشبح لنسيبه لقاها تشبح في الفراغ وسرحانه..
عقد حواجبه بإستغراب وقال:نوسه...نوسه..
سارة شبحتلها..حطت يدها ع ذراع عمتها وقالت:عمتي..
استاقظت نسيبه وشبحتلها وهي تقول:نعم!
سارة:بابا يكلم فيك..
شبحتله وقالت:نعم خوي!
هيثم:خيره وجهك شاحب هكي..مريضه؟
نسيبه حركت راسها بالنفي وقالت:لالا..لكن حاسه روحي مرهقه ونبي نرقد..
هيثم:خلاص نوضي بري اركبي لدارك وارقدي اني بنرقد مع البنات الليله..
الزوز صاحوا بفرح وهما يصفقوا:هيييه..ياسلام..
ضحك هيثم وسارة ابتسمت..
نسيبه:ريت المعفنات ريت! شن مش عاجبتكم !؟
ريحان بضحكه:بابا مايشخرش عمتو..
جنان:ومايضربش فيا في الليل وهو راقد..
نسيبه شهقت بصدمه وقالت:اني!!! اني نشخر  و....ضم شواربها لداخل بغضب وقالت...انسوها شكلاطة الفيل...معااااش في بكل..وناضت ومشت بتطلع ضربت رجلها برجلها الطاوله عيطت وقالت...وااااك..واك..واك..
ضحكوا كلهم عليها..
وهي مشت طلعت زعلانه وهي تقول:زيدوا اضحكوا زيدوا..
وهما مازالوا يضحكوا...
🌷فسحة بسيطه بعيد عن التخميم والحزن والخوف...فسح من ربي يخفف بيها شويه علينا...ويعلمنا بيها شي مهم..
انه زي ماجت ايام بكتنا وتعبتنا...حتجينا ايام تضحكنا وتفرحنا...ماحال يدوم.....
فإن مع االعسر يسرا...إن مع العسر يسرا.....
••••••°°°°°°••••••°°°°°°••••••
"والله لما تقعمزي ماك نايضتها"
سدينه:غير علاش تحلفي ياماجده!
ماجده:ساد انتي درتيه العشي..ومشت بإتجاه الكوجينه..
سدينه:ربي يهديك..
فجأة طق باب الحوش..
ناضت سدينه بتفتحه..
وصلت فيه وفتحاته خش رشيد..
سدينه:وينك لتوا؟
رشيد وهو ماشي لداره:مع الولاد في الشارع..
سدينه  تنهدت وولت للصاله..
اما رشيد وهو ماشي لداره فات من قدام الكوجينه..
شافاته ماجده وهي مضايقه..
بعدين قعدت تلم في الماعين وهي تقول بصوت منخفض:ياربي كيف ندير قلبي مش مطاوعني نقعد ساكته ع اللي ريته..لكن لمني بنقول..لمني!..
.....في دار دانيه....
كانت تكلم في اختها رتاج ع التليفون..
دانيه بقلق:صراحه يارتاج جاني للمدرسه يسأل عنك ويهدد..
رتاج خبطت بيدها على وجهها وقالت:حي عليا حي! تي شن مازال يبي مني..هو بروحه قال انسيني ومعاش نبي نعرفك!شن غير رايه توا!؟
دانيه:في هلبه زيه يارتاج..عندهم حب تملك مايبوش الحاجه اللي كانت ليهم تولي لغيرهم حتى لو ماخدوهاش..
رتاج:حي عليا اني ياغبارتي شن درت في عمري اني بس شن درت...ياريتني لاشفته ولاعرفته..
دانيه قعدت ساكته لكن تقول لنفسها"ياما نصحتك يارتاج "
رتاج بخوف:اسمعي عادل جي بنصكر... وسكرت ع اختها..
وحطت تليفونها ع الزيانه..
ساوت هيئيتها ع المرايه..
غ خشته هو قال:السلام عليكم..
هي تصنعت ابتسامه والتفتت تقوله:وعليكم السلام..شويه ويكون العشي واتي...
••••••°°°°°°••••••°°°°°°•••••••
"مانيش قده من الأخير ياملاك"
ملاك بغيظ:اني الغبيه اللي عبيت عليك اصلا من يوم يومك زي الفار قدام خليل..عمرك ماحتولي راجل..وسكرت في وجهه ولوحت تليفونها ع المندار..
وخدت الورقه اللي كانت شادتها فيدها وقعدت تمزق فيها بغيظ وهي تبكي..
ورقة طلاقها....
وحناها وخوها يسمعوا في صوت بكاها ...
صالحه واجعها حاله...اما عرفه كان يبي يعرف السبب اللي خلا اخته تخش لهالحاله...
مازال صغير ومش فاهم اللي قاعد يصير مزبوط...
🍁🍁🍁🍁
بس في كبار...
ماكانوش يبوا لايفهموا ولايستعبوا اللي صار معاهم  حاليا لما جتهم امهم بورقة الطلاق اللي جتها اليوم العشيه..
رفيق بغضب:تي خيركم خير بلاكم كبرتوا وهبلتوا!
خليل:هييييه..
رفيق شبحله وقال:عادي عندك انت عادي امك بعد هالعمر تطلق..!
جهاد خدي مزهريه من ع الطاوله خبطها ع الحيط ..
امه واخته وسجى عيطوا..
وهو مشي طلع....
رفيق بغضب شديد:اني توا تبي نهد حيوط هالحوش هد..
عفاف:اللي يسمع يقول طلعنا من الاسلام! لانا اول ولااخر ناس يطلقوا في هالعمر..انتم اكثر من يعرف اللي كان بيني وبين بوكم تحملت بما فيه الكفايه..
رفيق:كملتي جميلك وتحملتي اهو  ولى في الحبس توا  مش قاعد في وجهك..
عفاف:تكلم كويس وما تخلنيش نطيح قيمتك قدام مرتك..
رفيق:القيمه خلاص طاحت بعملكم الأسود هدا..
خليل:رفيق...قاعد...نتكلم...
رفيق جاه وشده من ياقة كبوطه وقاله:شن بدير ترا وريني شن بدير...
عفاف بفجعه:حي عليا..اطلق خوك ياولد!
وسجى وتهاني يرعشوا..
خليل حط يدها ع يد خوه وهو يشبح لعيونه بحده ونزلها بقوة وقال:رفيق اسبقني للورشه..
رفيق:مش طالع من هني..مش متحرك من مكاني.
قعد يشبحله خليل وهو ساكت...
رفيق خبط بيده ع جبهته اكثر مرة وهو يقول:هاه..هاه..هاه..هاااه..
ومشي بغضب للباب فتح وطلع وسكره وراه بقوة..
انتفضوا عفاف وتهاني وسجى من الصوت..
خليل شبح لأمه وهو عاقد حواجبه وقال:يوم الزياره تو نمشيله ونعرف شن اللي خلاه يدير هكي..
عفاف غيرت عيونها عنه وقعدت ساكته..
وهو لف ومشي بيطلع..
وتهاني وهي تبكي مشت بسرعه لدارها...
التفتت عفاف لسجى وشبحتلها من فوق لتحت بعدين ابتسمت بتهكم وقالت..بري بشري خالتك..
توسعوا عيون سجى وهي تشوف لخالتها بصدمه..
عفاف مشت عنها وخلتها...وسجى قاعده واقفه في مكانها تحاول تستوعب اللي سمعاته....
سجى"خالتي تعرف!"..
لفت طول ومشت لجناحها بسرعه بش تكلم سماح ....
••••••°°°°°•••••°°°°°•••••••
الساعه العاشرة ليلا..
في دارهم..
كان راقد وسطهم ع سرير وحده فيهم والزوز متوسدات صدره...
ريحان:وبعدين مشيت؟.
هيثم بضحكه:ايه مشيت..
جنان:جدو كان واعر شكله..
هيثم:امم..شويه مش هلبه..
ريحان:باهي حني كان دارولنا رحله تخلينا نمشوا؟
هيثم:اممم...مش عارف..نفكر قبل..
جنان:لالا بابا بالله عليك خلينا نمشوا ارجوك ارجوك ارجوك..
هيثم بضحكه:تي باهي باهي..غير يقولوا بيرفعوكم رحلة قبل..
جنان:تمشي معانا عمتو..
ريحان رفعت راسها وقالت:ايه بابا حقه اليوم عمتو تعاركت هي وراجل وقعدت تضرب فيه لين طاح..
هيثم انصدم..
ناضت جنان وقالت:مشي جاها واحد تاني جي بيضربها بموس مشي جي خليل ضربه..
هيثم بصدمه ناض وقعمز وهو يقول:شني!!؟
ريحان:بعدين تعاركت هي وعمو خليل وقعدت تبكي..
هيثم قعد يمرر في نظره عليهم وهو مصدوم...
بعدين قال...ترا شويه بابا...بعدهم...وناض من ع السرير ومشي طلع من الدار..
وهما الزوز مقعمزات ع السرير ويشبحوا للباب..
.......في دار سارة.....
كانت تكلم في زميلتها بالتليفون..
سارة:من قالك مانتوترش؟...لكن كنت نقول لروحي مش حياكلوك ياسارة هادم ناس زيك زيهم تكلمي قدامهم عادي وكأنك مع عيلتك وهكي يبدا يمشي التوتر ونتكلم عادي واني واثقه ان اللي نقول فيه صح..
رهف:سعدودك ياسارة..ياريتني زيك..
سارة: تقدري تولي زيي واحسن مني..
رهف ابتسمت وقالت:نسألك سؤال وتجاوبيني بصراحه
سارة:اسألي.
رهف:قاعده مضايقه لأنهم اختاروني في مكانك..
ابتسمت سارة وقالت:في البدايه ايه وهلبه مش شويه...بس بعدين عرفت ان هادي فرصتك انتي وليك من قبل ماتجيك...ولازم تستغليها رهوفه...
رهف:محلاك سارة ومحلا كلامك..طلعتي حلوة حتى في الحقيقه مش بس كتاباتك..
سارة  بضحكه:الله قصدك قريتي تخربيشي وعجبك حتى انتي؟
رهف:تخربيش!! تتسهوكي؟!
سارة ضحكت وقالت:ايه الناس كلها تشكر فيها بس اني لتوا نحس فيها حاجات بسيطه هلبه..نعترفلك اعتراف ماقلت لحد قبلك انتي...نحلم اني نكتب روايه ماصارش زيها من قبل وموضوعها مميز ماكتب عنه حد من قبل....نبيها روايه مؤثرة ومفيده في نفس الوقت...
رهف:حلو هلبه..
سارة:بس مش توا..نبي تولي عندي خبرة اكثر نقرا انت نكون ملمه باللغة العربيه اكثر والنحو حتى...ونتعلم كيف تنكتب الروايه ونتعلم اصولها...كان ربي عطاني عمر ناويه تكتبها في عمر متقدم 27 ولا28سنه..
رهف بإبتسامه؛ربي يوصلك للي تبيه..
سارة:آمين..ويفرج علينا كربنا..
رهف:اللهم آمين يارب عاجلا غير آجل...نستأذنك سارة وسامحيني خديت هلبه من وقتك..
سارة:ولايهمك رهوفه...تصبحي على خير...السلام عليكم..
رهف:وانتي من اهله...وعليكم السلام...
سكرت سارة وحطت التليفون ع الكومادينو..
وتمددت ع سريرها ...تغطت وطلعت يدها اليمين من تحت الغطا...وبدت تسبح....
■في نفس الوقت..
في دار نسيبه...
نسيبه وهي واقفه قدام خوها متوترة:مانعرفش مرات كام طريقه على طريقنا..
هيثم هز راسه وقال:من اليوم وبرا غادي اني نرفعكم واني نروح بيكم..
نسيبه:ياهي..
قاطعها وهو رافع يده وقال:تم النقاش..
ولف ومشي طلع...
هي مشت سكرت الباب وقالت...وااك منكم ياجنان وريحان...اني الغبيه مفروض نبهت عليهم مايدووش..
شبحت" للإن بوكس"...
ومشتلها...ضربتها ...
وخرت شويه....
جي بين عيون خليل وهي تشوفلها..
واذكرت كلامه...
《 معاش تعنيلي شي...ولاحاجه...وليتي عندي ولا حاجه...ماتستاهليش..ماتستاهليش..》
وبدت تضرب في تضرب بكل قوتها ودموعها ينزلوا بروحهم..
ولما ايديها وجعوها وقفت وضمتها وقعدت تبكي...
🍁🍁🍁🍁
وعدا من هداكا اليوم...يومين...
ماقدرتش الشرطه تحقق فيهم مع جلال بعد مامنعوهم الاطباء لأن حالته مازال ماتسمحش..
وهيثم كان يستنى من خليل في خبر يرد فيه الروح..
وخليل نفسه كان يستنى فيه لأنه الراجل اللي عابي عليه يوصله لريقه معاش كلمه من يومها...وخليل لما يتصل بيه مايردش عليه...لهذا قرر يدور ع حد تاني يوصله لعبدالملك...
من جهة تانيه..
كان راجح ع راس عمله مباشرة وعمليات بحثهم عن الريقا ولت مكثفه بشكل اكبر وفي اشارة وصلتهم انه موجود في وحده من المدن القريبه على طرابلس..
وهما حاليا يحاولوا يتأكدوا من المعلومه...
وفي وسط زحمه هالمشاغل العقل كان يزرق منه مرة مرة ويفكر في بنت المجذوب...
اللي كانت تستعد للمسابقه وعقلها معاها هي وبس..
اما اختها...فكانت عايشه حالة من الخوف والقلق بسبب جهاد اللي كانت تشوف فيه الكليه لما تجي ولما تروح..
وهو مابطلش تهديد ليها حتى بنظرات بعيونه....
وحتى بعيونه خليل مايبيش يشبح لأمه مقاطعها وخدي منها موقف زي ماخدي من بوه...طلاقهم خلاها يولي شخص عصبي مايتحاكاش بكل..وسجى طول وقت قعاده في الحوش تتجنب تحتك بيه..
اما عفاف فكانت مش مهتمه الا لنفسها هالمرة...لأنها ولأول مرة من سنين تحس روحها خفيفه ومرتاحه بعد مازال عن قلبها هم ثقيل تعبه وآذاه....
•••••°°°°°•••••°°°°°•••••
يوم الثلاثاء...
الساعه الثانيه ظهرا...
"تقدروا تخشوا"
انفتح باب الحجره اللي قاعد فيها جلال الوافي..
وخشوا ضابط التحقيق ومعاه زوز عناصر...
واخ جلال معاهم...
كان جلال مقعمز وهو يشبح للباب..
راسه مغطي...ووجهه شاحب...
لما شاف ضباط الشرطه حس بخوف بس اخفاه ...
ضابط التحقيق:حمد لله ع سلامتك استاد جلال..
جلال هز راسه وهو يقول:الله يسلمك..
الضابط:جاهز تحكي اللي صار بالزبط يوم الحادث.
جلال هز راسه وهو ساكت..
الضابط:تمام...شن صار بالزبط..
جلال شبح لخوه وبعدين شبح للضابط وقال:يومها...كنت زي ماتعودت يوميا..وقت الدوام في الكليه..ناخد وقت لراحه نطلع فيه للفيرندا المكان اللي كنت نحب نقعد فيه بروحي وندخن...المهم...لما وصلت غادي...شفت واحد كان يحاول يتحرش بطالبه غادي....اني لما شفت الموقف معاش تحملت..طلعتله...طول..ااه..
خوه:خيرك!
هو غمض عيونه وقال:مافي شي غير انفعلت شويه..لما نذكر الموقف...دمي يقعد يفور ويغلي..
الضابط:كمل..
جلال:ايه...طلعتله وخلصت البنت منه واضاربنا وصار اللي صار..
الضابط:تعرفها البنت! بعني تذكر شكلها..
جلال:تس تس..ماركزتش فيها بكل ماشفتش وجهها..
الضابط:اممم...هدا كل شي عندك..
جلال:لا...نبي ندعي عليه المجرم هدا حقي مش متنازل عنه خله يكمل عمره في الحبس ويخلص المجتمع من شره ..
خوه قعد يشبحله بأسف..
والضابط التحقيق هز راسه وقال:حقك....وكون على يقين ان القانون في البلاد حياخدوهلك كون مطمن..لاباس عليك..
جلال:لايوريك باس..
ومشي الضابط طلع ومعاه العناصر وخوه طلع وراهم..
لحظات وولاله...
=تو بتحرج منك امي هلبه..
جلال؛تو ترضى...واني مش حنتنازل عنه لو شني يصير...
تنهد خوه وحط ايديه في جيوبه وهو يشبحله..
وجلال شبح للروشن كان برغم خوف يحس بشي من الراحه لأن كل شي في القضيه هادي ماشي لصالحه هو ....

.....يتبع....