البطل المغمور "شمس الغروب"

الجزء الاخير"القسم الأول"

الصلاة اولا حبيباتي💕
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
"وانا قاعد ناطر الموت...عيوني اجت صدقه ع شجرة صغيره متخبي تحتها قطه ومعها قطط صغيره...كانت حاضنه ولادها وعم تحاول ادفيهم وبنفس الوقت هني كانوا عم بيطالعوا صوت مواء مثل الإستنجاد او الاستغاثه واضح كانوا متلي الجوع رح يقلتون..القطه الأم كانت عم بتطلع فيهن بس نظراتها كانت مثل نظرات الشفقه والعجز..او يمكن حقيقي كانت هيك..فجأة لقيتها تركتن وراحت انا مااستغربت قلت ان القطط الأم يعني اذا الجوع تمكن منها بتاكل ولادها كثر خيرها هي اللي تركتن وراحت..
لما كنت عم راقبا اكتشفت انو عقلي سيء وتفكيري اسوأ المسكينه عم ادور على شي تاكلوا..وكانت عم تموء طول الوقت..والقطط الصغار نفس الشي..قلت لحالي بوقتا رح نموت كلنا سوا بهالمكان بس الله أعلم من اللي بدوا يسبق التاني...وظليت عم استنا اني وياهن الموت..
بس القطه الأم كانت عم ادور بدون ملل...بس ياحسرة شو بدها تلاقي بمكان فاضي بعز البرد مافي مخلوق رح يجي ويشوفها ويتعطف عليها بشي...
ضحك وقال..بدي اعترفلكن بشي بوقتا من الجوع خطر عبالي اكلن..
ضحكوا...
ريان بضحكه:والله العظيم الجوع كافر مثل مابيقولوا..بس كان في بقلبي لسا شويه رحمه منعتني اني اعمل هيك...
بعز انتظارنا لملك الموت...
مرقت سيارة...وقفت...انا خفت فكرت انو من الأمن يعني رح يجوا وياخدوني من هالمكان ممنوع وجود المشردين فيه...
بس ماطلعوا من الأمن..السيارة وقفت ونزلت منها مرا وكانت عم تحكي بعصبيه عن سيارتها اللي وقفت فيها بنص الطريق وكانت خايفه تجي شرطة المرور وتاخد السيارة لأنها ممنوع توقف بهيك مكان...
راحت بسرعه وقفت ورا السيارة مشان تدفشها..بس ماقدرت فنادت ع اللي راكب معا السيارة...نزل منها صبي ممكن عمروا 11 12سنه..كان حامل بإيدوا سندويتش كبير وراح يركض لعندا..وهو عم يركض وقعت منه قطعه لحمه...ع طول ركضت القطه الام اخدتها وهربت وبلشت تاكلها....
وانا عم بطلع عليها ويزيد جوعي اكثر واكثر...بعدين سمعت صوت المراه وهي عم تركض وركبت سيارتها والصبي يدفش لعند مااشتغلت السيارة..قام الولد رجع وهو عم يركض لحتى يركب معها و
هو عم يركض كمان وقعت منوا قطعه لحمه وكمان راحت القطه بسرعة البرق لاتاخدها ..
الولد شافها...وتحركت بقلبوا مشاعر الشفقه...حكى مع المراة اللي معوا بالسيارة بعدين نزلها بسرعه..عطاها كل اللحمه الموجوده بالخبز...ورجع ركض للسيارة...
وراحو...والقطه كانت عم تاكل لحتى خلصت كل اللحمه..ورجعت من جديد لعند القطط الصغيره وبلشت ترضعهن...
انا اللي كانت معدتي تصرخ من الجوع...ظليت عم اطلع عليهن وعم فكر...شو اللي خلا السيارة توقف بهدا المكان ويصير هالشي بس مشان هالقطه تلاقي رزقها ورزق ولادها...
رجعت طرحت ع حالي السؤال وغيرت الصيغه تبعوا...مين...من اللي خلا السيارة توقف بهيك مكان ممنوع توقف فيه السيارات وشو اللي خلا الأمن المروري اللي بالعاده بيعرف بهيك مخالفات فورا مايعرف بهالمخالفه ويصادر السيارة وتروح بسلام هي وصحابها.؟!
مين؟!....
مرر نظره عليهم بعدين قال جواب السؤال كان واضح...الله...
الله اللي عليه رزق المخلوقات كلها..بشر..حيوانات..حشرات اي مخلوق حي ...
رزق هالقطه اللي كانت عم بتسعى مشان ولادها هو بعتلها الرزق لعندها....
بعدين سألت حالي ليش صار هالموقف قدامي انا بالذات وبهالوقت بالذات وانا بهديك الحاله!؟
 ع طول اجتني الاجابه...الموقف اللي صار كلوا كان رساله الي...حط يده ع صدره وقال...رزق القطه باللي يشبعها هي وولادها..ورزقني انا...ابتسم وقال...الهدايه...
ابتسموا الموجودين...ماعدا فاتح اللي عيونه تعبوا دموع..
ريان تابع يقول:اهتديت للطريقه الصحيحه اللي بقدر فيها عيش حياتي صح...الايمان...الانسان المؤمن بيعيش حياة حلوة حتى ولو كان بعز هموا ومصيبتوا..بتعرفوا ليش لأنو واثق ومتأكد ان الله...الإله للي بيؤمن فيه مارح يتركوا لحالو..رح يساعدوا ويساندوا ويطالعوا منها وهو ربحان..
اولا خبرة للتعامل مع الأزمه اللي كان فيها لو تعرضلها مرة تانيه...تانيا..اجر صبروا ورضاه بقدروا...واخيرا رفعه بالدرجات بالحياة التانيه الاصليه الأبديه الآخرة...
انا بهداك الوقت صحيت ع حالي وفهمت وعرفت...حملت حالي وظليت عم بمشي وعم دور ع مكان اشتغل فيه وانا واثق ومتاكد اني رح لاقيه ولقيتوا..وموبس مكان شغل ومأوى كمان..مطعم صغير...نظف وامسح واجلي ورتب وبات فيه مشان افتحوا الصبح قبل صاحبو مايجي...
اموري مشيت فيه...بعدين دورت ع شغل تاني وتالت...اشتغلت تلات شغلات...بمغسلة سيارات بعد الظهر...وحمال بضاعه بسوبر ماركت كبير من اول المسا لليل وبعدين ارجع للمطعم اشتغل فيه ونام...صحيح كان حيلي ينهد كنت اتعب كثير..بس ايماني اللي كان بيزيد يوم عن يوم بأنو الله واقف معاي وعم بيساعدني لحتى ارجع وقف ع رجلي حلا هالحياة المتعبه بعيوني وزادني حماس...
صرت عم صلي...وعم بعمل فروض الدين اللي كنت مفكرها مجرد عبادات عاديه نعملها بس بهالأزمه
عرفت انو الله فرضها علينا مشانا لأنها عم تقوينا عم تكون حياة لروحنا...عم تنظف نفوسنا وطهرها من كل شي عم يأذينا...
والحمد لله...الله فتح علي..واستأجرت بيت..وتركت المطعم وقدمت اوراقي لوحده من الشركات الكبيره وعملت مقابله وقبلوني...واشتغلت..وكنت كتير متحمس ونفسي مفتوحه ع ع الحياة بس بشكل تاني هالمرة...والله وفقني ونجحت وكبرت...لحتى وصلت لمركز مهم بهالشركه ومنها عملت شغل لحالي وتشاركت فيه مع الشركه نفسها وكبرنا بفضل الله سوا ووصلت لحلمي وصرت من اهم رجال المال والأعمال بهديك البلد...
كلهم صفقوله بحرارة وحماس ...
وهو كان يمرر عليهم في نظره بإبتسامه...
بعد هدوا تصفيق فاتح رفع يده ..
ريان اشر عليه وقال:تفضل..
فاتح:وأهلك شن صار فيهم؟
ابتسم وقال؛رجعت ع البلد بعد 5سنين غياب..وحكيتلون كل شي صار معي...طبعا ماتقبلوا بالبدايه اللي عرفوه بس بعدين مشي الحال...كل همون اني بخير واموري كلها تمام..
رفع واحد تاني يده..
ريان:تفضل..
:علاش حكيتلهم!؟ماخفتش بعدين يعزروك؟
ريان بإستغراب:شو يعني يعزروك؟
واحد منهم قال:يعايروك...
ريان ضحك وقال:بصراحه مافكرت بهالشي..لإنو بوقتا كان همي شي اكبر من هيك..اني احكي قصتي للآلاف من الناس اللي ممكن تستفيد منه..ناس ممكن تكونلهم قصتي حافز ودافع كبير ليكملوا هالحياة ويعيشوها بالحلو فيها مو بس المر..
زياد رفع يده..
ابتسمله ريان وهز راسه بمعنى اسأل..
زياد:ماخفتش من كلام الناس ورايهم فيك اكيد مش كلهم صفقولك زي ماحني درنا..
ريان بضحكة:اكيد..ياما شفت وسمعت..في كلام جارح وقاسي مابينحمل...بكذب عليك اذا قلتلك مااثر فيني..مبلا اثر وآذاني كثير..بس بالآخر تجاهلتوا وماخليتوا يرجعني لورا...لأني تعلمت اني ماخلي نظره الناس وكلامن يتحكم بحياتي ويقرر مصيري ويمشيني مثل ماهن بدن...كل همي نظرة الله الي...والمكانه اللي انا وصلتلها بعد مادرت ظهري لكل شي ممكن يحبطني او يحبط عزيمتي..وع فكرة رح تلاقي الناس اللي بتحبك وتشجعك اكثر بكتير من الناس اللي بتسبك وتأذيك بالكلام..مشان هيك خليك ايجابي ومثل النحلة مابدور غير الريحه الحلوة مشان اطالع عسل..
فاتح؛تي والله انت العسل بالله..
ضحكوا...
وريان قعد يضحك معاهم...
•••••••°°°°°°°••••••
في قعده مليانه نساوين من الاقارب فيها اللي يكرهها اكثر من اللي يحبها بس الوجوه كلها كله تضحك ولسانات تنقط عسل...
العسل المدسوس فيه سم اللي كان في سؤال  وحده من قريباتها ليها..
:جيجي حبيبتي مازال العرس؟
رسمت جيهان ع وجهها ابتسامه مزيفه وقالت؛والله شن بنقولك هو يبي وقبل ناويه في عطلة نص السنه لكن اني قتله مازال شويه اقلها نزيدوا نتعرفوا على بعض..
:ليكم 6شهور مع بعض مازال ماتعرفتوش!؟
عواطف شبحت لبنتها ومن داخل ترحي وتسحن..
جيهان ردت بإبتسامه:ايه مازال وماعندي علاش نستعجل مانبيش ندير زي هلبه خلال شهر تموا كل شي بعدين حصلوا...
وحتى هي جيهان مايغلبها حد..عطتهم الاجابه اللي تخليهم يغيروا الموضوع بعد مالقحت ع وحده تخص اللي تسأل...
وهكي انمسح ع كبد عواطف..
بس مع هكي جيهان من داخلها الموضوع هدا كان متعب نفسيتها ومخوفها هلبه...
••••••°°°°°°
والطرف التاني في الموضوع اللي كان في عالم تاني بعيد عن عالمها مشاعره قاعده تجرفه ليه جرف..
وخلاته من العشاق...يوقف بسيارته تحت حوش المحبوبه مش مهم تبانله ويشوفها...المهم يكون قريب من مكان هي موجوده فيه...
واحب على قلبه لو تبان عليه بالغلط ويلمحها...
....والمحبوبه.....
في دارها واقفه ورا بابها تسمع في النقاش اللي يدور بين بوها وخوها...
مجاهد:خودها مني نصيحه طلقها بالحسنى خير ماتخش المحاكم وانت اللي عمرك ماعرفتها...ع خاطرك يابوي..
عبد المجيد قعد ساكت وهو مضايق ويفكر في كلام ولده اللي اقنعه بعدين قاله بصوت مخنوق:وهدا اللي بيصير...
حط مجاهد يده ع كتف بوه وقاله:الموضوع هدا تعبك هلبه قاعد ياخد من صحتك لو تفوته يابوي ومعاش تفكر فيه مرة تانيه..
عقد حواجبه وقال بشي من الانفعال:مازلت بصحتي واشب منك...صدقني بعد مانطلق ماجده هادي في نفس اليوم..في نفس اليوم حناخد غيرها...
مجاهد نزل يده وقال بقلة حيلة:اللي يريحك..دير اللي يريحك...
مجيد شبحله شويه بعدين مش للمربوعه...
ومجاهد مشي بطريقه لدار رشيد....
ع طلعت سدينه من الكوجينه بعد سمعت الكلام اللي صار بين ولدها وبوه...
كانوا  دموع قهرة وحسرة على عمرها اللي ضاع مع راجل زي مجيد...
ودانيه كذلك كانت تذرف في دموع الحزن ع حالهم....
••••••°°°°°°••••••••
" هي راقدة توا لكن مرة مرة خشي شوفيها بابا"
سارة وع وجهها ملامح الحزن:حاضر بابا..
هيثم مسح بيده ع شعرها وقال:مش معطل بابا..
سارة:باهي ردبالك على روحك..
ابتسلمها هيثم بعدين مشي....
وهي تبعاته بعيونها لين ادرق من قدامها...طول نزلوا دموعها اللي كانت شادتهم ع خاطر بوها ومشت خشت لدار خواتها التوأم...
لقت ريحان راقده وجنبها جنان راقده وهي شادتها..
ارتسمت ع وجهها ابتسامه حزن والدموع تنزل منهم سيل...
🍁🍁🍁
الدموع اللي بوها اطلقلهم العنان بش ينزلوا ويخففوا عن قلبه الألم اللي يحس بيه...
وشريط الذكريات في عقله رجعه لسنين فاتت...
🔺️قبل سنوات..
اسيمه ودموعها ينزلوا:متأكد هيثم ان الدواء ينفعها ماتبيش عمليه؟
هيثم وهو يمسح ع شعرها؛صدقيني ياأسيمه الدواء يمشي مع حالتها مع الوقت لما تكبر حتخف عليها وتنتهي مشكله الثقب هادي..
اسيمه غمضت عيونها وتنهدت بحرقه بعدين قالت:انا لله وإنا اليه راجعون..
هيثم شد يدها وقال بإبتسامه تخفي حزنه:حبيبتي صدقيني الموضوع بسيط مع الوقت ومع الدوا حتولي طبيعيه زيها زي اختها زي الصغار اللي في عمرها..
اسيمه مسحت دموعها وهي تهز في راسها وتقول:إن شاء الله..إن شاء الله..يارب..
▪▪▪▪▪
◇اكتشفنا المرض وريحان عمرها تلاته سنوات..واني اللي فحصتها وشفتها ع حسب ماكان واضح قدامي ان الحاله ماتستدعيش عمليه ومع الدوا والرعايه حتختفي المشكله مع الوقت...
لكن للأسف الوضع كان اخطر مما بدالي ولامفر من اجراء العمليه اللي ماكنتش نبي بنتي اديرها..
فكرة انت صغاري يكونوا تحت المشرط وادوات الجراحه وتنشق اجسادهم كانت عندي مش مقبوله وكنت نخاف منها هلبه..بس توا خلاص..سلمت الامر لله عزوجل ..لامفر بش نحافظ ع روح بنتي لازم نرضى انها تولي بين ايدين الجراحين بمشارطهم ونعيش مشاعر ياما عاشوها اهالي مرضى كانوا تحت ادواتي ومشارطي يوم من الايام...
▪▪▪▪▪
قبل ليوصل للمصح...
تلقى اتصال من احسان رد عليه فورا..
هيثم في السيارة؛السلام عليكم..
"وعليكم السلام ان شاء الله ماعطلتك عن شي؟"
هيثم:لا ابدا..شن في ان شاء الله خير!
"خير خير..غير نبي منك تشوفلي موعد قريب مع زياد نبي نهدرز عليه شويه"
هيثم سكت شويه بعدين قال:ان شاء الله نشوف ونرد عليك..
"ان شاء الله...لكن خيره صوتك مش تمام"
هيثم تنهد وقعد ساكت.
"اسف لو ادخلت في امور خاصه بدون قصد"
هيثم مسح ع حاجبه وقال:لا ابدا...تنهد تاني وقال...نعطلك على شي لو طلبت منك نشوفك في مكان برا المكتب..
"امم..ابدا...وين تحب"
هيثم:في قهوة...قهوة البيرق لو سامع بيها..
إحسان:ايه نعرفها نعرفها..
هيثم؛بعد المغرب بإذن الله نشوفك غادي..
احسان:إن شاء الله...السلام عليكم..
هيثم:وعليكم السلام...سكر...بعدين تنهد...
قعد يمرر في نظره قدامه...بعدين شبح لباب المصح شويه...
تنهد تاني بحزن...فتح الباب ونزل..وسكره ومشي خش...
••••••••°°°°°°°•••••••••°°°°°°°••••••
"مسكر راسه وقال يبي يتزوج نهار يطلقها"
رتاج بإبتسامة تهكم:اول وحده تطلب الطلاق قبل هو بعد يمل يطلق..
دانيه:واجعتني امك يارتاج من بكري وهي تبكي تقول بيطلقها هي..
رتاج:تبكي ع بختها الاسود والله ماني عارفه كيف قعدت متحمله لتوا كان اني من زمان ميته..
دانيه:بعيد السو عليها ربي يعوضها خير فينا يارب..
رتاج:آمين..
دانيه:شن صار فيك انتي؟
رتاج:اهو كل نخمم ونفكر شن بيصير لما بنمشيلهم خايفه هلبه يادانيه..
دانيه:ربي يسترها معاك..اهم شي انتي ماديري شي يشدوه عليك..
رتاج:ربي يشد فيا بالذات مع الفرخه بنته ترفع الضغط مدلعه هلبه وهو مايقدر يقوللها شي..
دانيه:حتى هي بنته ياماما..
رتاج بتهكم؛ماطايح كان سعدنا حني..
دانيه ضحكت وقالت:ايه والله راقد رقاد...
🍁🍁🍁
مش انتم بس يادانيه ورتاج انبليتوا بأب اناني مايفكر في شي غير نفسه..في من يعاني اكثر منكم...
"شن غير رايه توا؟مش ديما يقولي فكري في قرايتك وبس ومركبني الرعب ع خاطرها"..
هادي رهف تكلم في امها وهي متسائله ومصدومه..
ردت عليها امها وهي تقول:وهو بوك يقدر يقول لعمامك لا..
رهف بصدمه:شن تقولي ياماما! لاهادي حياتي اني واني مانبيش نتزوج توا مانبيش نبي نقرا نبي نكمل قرايتي..
امها ردت بقلة حيلة وهي تقول:الله غالب يابنتي بوك حكم...
رهف حطت يدها ع صدرها وتسارعت انفاسها وبدت تبكي وهي تقول بصوت يدوب طالع:مانبيش..نبي...نقرا...
وامها ناضت ومشت من حداها وهي تبكي...حاسه بالعجز مش قادرة تساعدها ولاتوقف معاها..
اب رهف شديد جدا ومايقدر حد يتفاهم معاه طبعا مع عيلته طبعه هدا..لكن مع خوته مايقدر يدير شي..لايعترض ولايخالف واللي يبوه هما يصير واللي يقرروه يمشي عليه وعلى عيلته...
وتوا واحد فيهم يبي رهف لولده ومجرد ماعرض طلبه على اب رهف هو طول وافق بدون تفكير ولاسؤال....ومش مهتم ابدا لرأي صاحبة الشأن ولاصاحبة الشأن نفسها...
🍁🍁🍁🍁
"شن ديري سارة؟"
ساره في الكوجينه وهي منهمكه في شغلها:كيكة وحده لينا ووحده لزياد..
ضحكت ماجده وهي تقول:محلاك يابنية انتي..
ضحكت سارة وهي تصب في خليط الكيكه في الطواجين..
تنهدت بعدين قالت؛بوك ماقالش امتى بيروح؟
سارة وهي ماشيه تحط الطواجين في الكوجينه؛قال مش معطل..
ماجده:ربي يكون في عونه ولدي من حاجه لحاجه واني زايدته بقعادي هني..
سكرت سارة الكوشه والتفتت تقول:شن تقولي خويله!
ماجده:هدا الحق بنتي مشكلتي زادت بوك ع مابيه وهو مش ناقص نفكر نولي لمجيد وخلاص..
سارة؛خويله!بابا مستحيل يرضالك بيه..
ماجده:كان اني راضيه يرضى..وبعدين اكيد مجيد عرفت غلطه وشعف..
سارة:خويله بالله عليك معاش تفكري هكي..هو توا سعالك في القضيه ودارلك محاميه معاش تقدري تتراجعي..
تنهدت ماجده بحزن وهي تقول:اني واجعني وبيك بنتي قداش منه قداش بيعاني..
سارة ترقرقوا بالدموع وهي تقول:معاه ربي خويله ماتفكري في شي..اصلا العمليه احسن لريحان هكي معاش تعاني من شي وتولي طبيعيه زيها زي جنان..وقضية زياد اني متفائله فيها خير وواثقه ان ربي حيفرجها عن قريب..
ماجده؛وهالحيوان اللي طلع في التلفزيون وماخلا ماقال..تخافي يأثر ع القاضي اللي داره..
سارة مسحت دموعها:ربي يرد كيده في نحره والله ماهو رابح واحد زيه..
ماجده:يارب..يارب يولي عليه اللي داره وينفضح فضيحه ليها اول ماليهاش اخر...
..........
في مقهى البيرق...
كان مقعمز يستنى في صاحبه وهو يتكلم في التليفون..
محامي جلال:صحيت ياغالي
رد عليه يقول..
"ضمه لقائمة المعروفات متاعي معاك"
ضحك وهو يقول:سفتول..
ضحك بعدين قاله..
"لكن بيني وبينك صاحبك الباين عليه مش تمام شفت عليه حركات خليتني نشك"
تلاشت ضحكة المحامي وهو يقول:حركات شني؟!
"مش عارف..مش مزبوط وخلاص"
ضحك بآرتباك وقال:شن بدير بيه انت بتناسبه! ..
"ع قولتك"
.....برا المقهى.....
درست سيارة هيثم ونزل منها ومشي خش المطعم...
شافه محامي جلال تبعه بعيونه لين قعمز...نهي المكالمه مع صديقه الاعلامي في احدي القنوات...وقعد يراقب في هيثم ويشرب في قهوته...
وهيثم يستنى في احسان...
فهاللحظه احسان وصل...
لما جي نازل من السيارة شبح لمرش المقهى اللي يوري شن في داخله...عيونه جو ع محامي جلال...
طول ولى لسيارته ركبها واتصل بهيثم...
....في المقهى....
رن تليفون هيثم قامه ورد..
هيثم:ايوه..اني في المقهى توا..
"اطلع "
هيثم عقد حواجبه بإستغراب وقال:نطلع!
"ايه اطلع توا تلقاني في سيارتي قدام المقهى وتو نشرحلك"
هيثم ناض وهو مستغرب قال:تمام...
سكر ومشي طلع برا المقهى...
وعيون محامي جلال اتبع فيه...شافه جي لسياره...ركبها بعدين تحركت وماقدرش يشوف من فيه معاه...
رفع حواجبه ونزلهم بعدين كمل شراب القهوة...
...............
في الطريق...
احسان:محامي جلال موجود في القهوة..
هيثم:باهي وين المشكله!
احسان:مانبيشي يعرف اني استلمت القضيه اني متكتم ع الموضوع اصلا مانبيهمش ياخدوا احتياطهم..
هيثم غير عيونه القدام وهو يفكر في كلام هيثم..
احسان:في قهوة قريبه من هني كويسه حتى هي..
هيثم شبحله وقال؛تمام..لكن في شن تبي زياد!
احسان:نوصلوا غادي ونحكيلك..
هيثم شبح القدام وهز راسه يآيجاب...
••••••°°°°°°•••••°°°°°°••••••
"باهي باهي ان شاء الله وخيتي.......قدامك كل خير"
سكرت الحاجه صالحه الهاتف بعد كملت مكالمتها مع جارتها عفاف...شبحت لبنت ولدها المقعمزة قدامها قالتلها:غدوة ان شاء الله الناس بيجوا..
تنهدت ملاك بدون ماتعلق..
صالحه:خيرك يابنت زي اللي ماتبيش..
ملاك؛كان مانبيش ياحناي راني سكرت الموضوع لكن مش عارفه علاش خايفه..
صالحه:حاجه عاديه البنات كلهم يخافوا وين ينخطبوا مادام خليل مدحلك فيه وامه مدحت في اماليه ماعندك ليش تخافي..
هزت راسها بإيجاب وهي ساكته ومن داخل قلبها موجوع ومش حاسه بأي شعور ليه علاقه بفرح...
🍁ويقعد اصعب انواع الارتباط..هو اللي يكون فيه واحد من الطرفين بعقله وقلبه مع حد تاني..صعب ع الطرفين🍁
•••••°°°°°°•••••••°°°°°°••••••
"كانت كل شي فحياتي..كانت ايديا ورجليا..كانت مهنيتني ع كل شي....لما راحت هي تزعزع استقرار حياتنا..قول راح بالمرة"
ابتسم بألم وقال:فاهم عليك لأني عشت نفس الاحساس..اني ليا 12 سنه متزوج اول عشرة سنين كانوا احلى سنين مع زوجتي وولدي كانت حياة هاديه حلوة مرتبه..كانت جنه وبدون مبالغه..بس اخر سنتين تغير كل شي بعد مرضت زوجتي الله يرحمها بالمرض الخبيث حاولت تقاومه ع قد ماتقدر بس مع الاسف قضاء الله كان اقوى من مقاومتها...
بعد وفاتها مريت بمرحلة صعبه وقاعد لتوا نمر بيها بالذات مع ولدي اللي عمره 11سنه..
هيثم:اني ولدي راجل عمره19 سنه وشفت شن صار فيه بعد موت امه...مش غير هو بس خوته..واني..اني اللي كل شي فيها منهار..برحمة ربي قاعد واقف ع رجليا ونحاول نقاوم..
سبحان من خلق المراة..وعطاها قدرة تحمل تخليها تتحملنا حني بالصغار بمشاكلنا وطلباتنا وحالتنا النفسيه...
احسان:فعلا..المراة عندها قدرة كبيرة ع التحمل والاحتواء مش موجوده عند الراجل..لكن مع هدا في حاجات ماتقدرش عليها بروحها محتاجه وجودنا معاها..زي ماحني توا محتاجين وجودها..
هيثم ابتسم وقال:تفكر تتزوج بعد وقت..
احسان:مش عارف...ممكن بس مش توا..
هيثم غير عيونه وشبح للفنجان وقعد ساكت وهو يفكر..
احسان؛الراجل صعب عليه يقعد وحداني طول عمره..الراجل مايقدرش من غير المراة...زي هي تقدر من غير الراجل..
شبحله احسان وقال بإبتسامه:ممكن..
احسان:اكيد ..
ضحك هيثم..
واحسان ابتسم ع جنب وخدي الفنجان متاعه وشرب منه..
هيثم هدا ضحك وتنهد بعدين قال:بنتي الصغيرة تبي عملية ع االقلب..
احسان:لاباس خيرها؟
هيثم؛عندها ثقب في القلب..
احسان شبحله شويه بنظرات اسف بعدين قال:الوضع مش خطير هلبه وانت ادرى بعد العمليه حيكون حالها افضل..
هيثم هز راسه وقال:عارف..بس..مش قادر نستوعب ان بنتي حتخش عمليه جراحيه وينشق صدرها وتمس المشارط وادوات الجراحه قلبها الصغير..سكت..
حط ايديه ع وجهها..
احسان ربع ايديه وهو يشوفله بحزن..
هيثم مسح بيده ع وجهه وعيونه ترقرقت بالدموع وهو يقول:صبر جميل والله المستعان..صبر جميل والله المستعان..
احسان:فشدة الإبتلاء الانبياء الاولين بعدين الامثل فالأمثل دكتور..
تنهد هيثم من قلبه بعدين هز راسه وقال:الله المستعان...الله المستعان...
🍁🍁
ويقولوا من ابلغ ماقيل في حسن الظن بالله...
ماقاله يعقوب عليه السلام...
《انما اشكو بثي وحزني الى الله واعلم من الله مالاتعلمون》
المؤمن الحقيقي يعلم من الله مالايعلم غيره من اصحاب الايمان الضعيف او معدومي الايمان..
اللي يعرف الله والعالم بيه...يعرف ان كل قضاء ينزله الله عليه..
اما يكون...درس للتأديب والتهذيب..
او تطهير ورفعة في الدرجات..
او صقل لشخصية العبد نفسه..
عكس اللي مايعرفش ربي...اللي يعتبر القضاء اللي فيه شر..هو ظلم ويعترض عليه ويرفضه..وحاشاه ربي اللي حرم على نفسه الظلم وجعله بين عباده حراما...
في النهايه...
الدنيا هادي محطه لينا حني المسافرين حيجينا يوم ونخلوها وهي حيجيها يوم وتفنى...مافي شي فيها مستاهل اللي نديروا فيه ع خاطرها...
لكن جيب من يقتنع بهالكلام ويحسه..
"من شويه كان هني بعدين طلع"
جلال:شافك؟
المحامي:تس..
جلال تأفف بعدين قال:مش عارف علاش مش مرتاح..
المحامي:تعالى جاي قولي شن ملبز انت في اللقاء اللي داروه معاك!
جلال عقد حواجبه وقال:شن ملبز! مادرت شي انت متابع بروحك وشكرتني ع الكلام اللي قلته شن اللي غير رايك توا!
تنهد بعصبيه بعدين قال؛اسمع جلال شد روحك شويه لين اتم القضيه ارجوك...اعقل هالفترة بس..
مط شواربه بملل بعدين قال:تريح الوضع تحت السيطره..
شويه ناضوا من الطاوله اللي وراهم زوز بنات وفاتوا من حداهم..
جلال نلقائيا قعد يتبع فيهم بعيونه وهو يقول بصوت هامس؛سكود...
المحامي شبحله وهو يفنص بعدين غمض عيونه و حط يده ع وجهه بيأس...
🍁اللي فيه طبع مايخليه🍁
•••••°°°°°•••••°°°°°••••••
الساعه الحادية عشر ليلا..
خش للحوش اللي كان هادي...
توجه طول للصاله وقعمز فيها بتعب...
اتكى وغمض عيونه...وهو يردد بهمس...
"لاحول ولاقوة الابالله"
بنته اللي حست بجيته..طلعت من دارها وتوجهت للصاله..
شافاته فيها..
جاته بهدوء ومشت قعمزت بحداه..
اتفاجئت لما سمعاته قال بنبرة ضاحكه..
"كالعاده مارقدتيش"
فتح عيونه وقعمز كويس وهو يقول:وراك مدرسة ولا؟
سارة:تو نرقد بابا قبل انت قولي شن حالك توا؟
ابتسم وقال:الحمد لله على كل حال..
سارة؛الحمد لله...بكري قعمزنا اني وعمتو وهدرزنا ع ريحان وفهمناها حالتها...ضحكت وكملت تقول..معناها معاش بنمشي المدرسه احسن..
ضحك هيثم..
سارة بضحكه:وجنان قالت حتى اني نبي زيها..
هيثم بضحكه:ماصدقوا..
سارة بضحكه:ماكنتش نعرف انهم مش طايقين المدرسه..وعاد عمتو نزلت فيهم هما الزوز بعدين قالت عندهم الحق من اللي يحبها المدرسه كان خوي هيثم
هيثم قعد يضحك..وسارة تتأمل في ضحكته وهي مبتسمه..
هدا هيثم ضحك ومسح على وجهه وقال:عليك نسيبه وخلاص مش عارف كيف داير معاها خليل..
ضحكت سارة...
ابتسم بعدين قاللها؛نوضي بابا ارقدي نوضي وماتفكري في شي غير قرايتك..
سارة ناضت وقالت:حاضر..ايه حقه بابا درت كيكه نبيك ترفعها لزياد مسموح ولا؟
هيثم؛كان تسد زياد واللي معاه مسموح..
سارة بإبتسامه:ايه تسدهم..بعدين بدلت ابتسامتها بملامح الامتعاض وقالت..المهم هداكا الفزلاك ماياكلش منهم..
هيثم عقد حواجبه وقال:قصدك فاتح!
سارة:مانعرفش اسمه..المهم ماتعطوشي منها..
رفع هيثم حاجبه اليسار وهو مستغرب..
سارة :تصبح على خير بابا..
ومشت طول...
وهيثم تبعها بعيونه وهو مازال مستغرب فيها..
▪▪▪▪▪
◇ ضحك وهو يقول...عيب سارة الوحيد..ماتحبش حد يعرف حاجه تحبها اكثر منها ممكن لهالسبب خدت هالموقف من فاتح...
▪▪▪▪▪
🍁🍁🍁🍁
وجي اليوم اللي بعده...
وخدي هيثم كيكة سارة ورفعها للمصح...
وكان متفق مع احسان يجي لزياد الصبح بش يهدرز معاه ع رواق...
............
زياد وهو ياكل في الكيكه ركز ع فاتح متسمر قدام الطرف متاعه ويشبحله..
بلع بعدين قال:خيرك تشبحلها هكي..
خميس وهو ياكل قعد يشبحله..
فاتح ماردش عليه لانه مش معاه بكل..
زياد؛فاتح..
استاقض فاتح وقاله:نعم!
زياد:خير ماتاكلش ماعجبكش شكلها!؟
فاتح ابتسم وقال:تس..
خميس وهو ياكل:تو بيفتيلك فيها...
زياد ابتسم بتهكم وقال:ماعنده مايفتي..عمره في حياته ماحيذوق زيها ولااحلى منها..
فاتح رفع حاجبه وهو مبتسم بعدين شبح للكيكه خداه بيده وبدي ياكل فيها بنهم..
زياد وخميس انصدموا..
كلاها كلها في مرة وحده..واشر ع طرف زياد وقاله بفمه المعبي:ماتبيش!..
زياد خدي صونيته وناض من بحداه هارب..
قعد يضحك خميس..
وفاتح كذلك وهو يمضع كان يضحك..
بعد بلع قال...اللهم ادمها نعمه واحفظها من الزواج..
خميس::من شني!؟
فاتح بضحكه:من الزوال....الزوااال..
خميس وهي يشبحلها بشك قال بضحكه:اها نحساب روحي سمعت غلط..
فاتح:لا سمعت صح ..
فنص خميس وهو يضحك..
وفاتح ضحك وقاله؛في المرة التانيه..
خميس:اهااا..
طلع فاتح من جيبه حبة لوز خزايني كلاها وهو مبتسم والحاجب مرفوع...
••••••°°°°°•••••°°°°°•••••
في المدرسة الثانويه للبنات...
في الفصل....
كانوا الطالبات ياخدوا في حصة لمادة الاحياء...
وسارة كان مشتت انتباهها بين شرح الأبله وبين رهف اللي كانت حالتها مقلقه ..ملامح الكآبه محتله وجهها...وعيونها باين فيهم اثار البكاء...مالحقتش سارة تعرف منها شي...
لهدا كانت تراجي في الاستراحه بفارغ الصبر..
🍁هي هادي الصداقه قلوب الاصدقاء فيها ع بعض يحسوا ببعض زي الخوت واكثر🍁
.....وهدا اللي كان يحس بيه فاتح اتجاه زياد....
اللي يشبح فيه مقعمز مع المحامي احسان في باحة المصحه ويتمنى يسمع زياد من المحامي مايريح قلبه......
"عرفتها!"
احسان هز راسه بإيجاب وهو يقول:ايه..وحاولت نكلمها وهي رفضت تسمعني وهربت...
زياد تنهد بضيق وقعد يمرر في نظره حواليه..
احسان:شوف زياد..اني احترمت وجهة نظرك في الموضوع لكن مش حنسكت عنها ونخالف القانون..هي لو رفضت تجي تشهد بإرداتها المحكمه حتجيبها بالقوة..
زياد شبح لإحسان..
احسان:مش حضيع سمعتك ومستقبلك ع خاطر شيطان اخرس يازياد...
زياد نزل عيونه وتنهد بعدين رفعهم فيه وقال:وانت قلتها شيطان اخرس...
حط احسان يده ع كتف زياد وقال:ابشر الجلسة الجايه بحول الله كل شي حيكون لصالحك..
زياد ابتسم ابتسامه باهته وهو يقول:إن شاء الله..
............
"وكان قالت اني لاريت ولاسمعت"
زياد بإنزعاج؛ماتسكرهاش في وجهي ياراجل..
فاتح:ماسكرتهاش في وجهك اني نبيك تحط الاحتمالات كلها في راسك...
زياد خدي نفس وزفر بضيق بعدين قال؛لاحول ولاقوة الا بالله..وقعد يشبح في الفراغ ويفكر..
وفاتح يشبحله ويفكر...ومرت لحظات وهو يفكر..
ارتسمت ع وجهه ابتسامه جانبيه وقال:من أعمالهم سلط عليهم..
شبحله زياد...
فاتح غمزله وقال:خليها عليا..
عقد زياد حواجبه بإستغراب...
فاتح ضحك وعض ع شاربه..
وزياد قعد يضحك برغم مش فاهم ولاعارف شن كان يدور في دماغ فاتح....

....يتبع.....