البطل المغمور "شمس الغروب"

الجزء السابع والعشرين "القسم الأول"

وقد قال عن الصلاة.....
(أرحنا بها يابلال) الرسول صلى الله عليه وسلم🌹
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
في سيارة الإسعاف...
يتأمل في وجه ولده وهو حاط يده ع راسه ويقرا بهمس
والدموع تنزل منهم...
والممرضين يشبحوله بنظرات كلها حزن وتعاطف...
كان مرة يمسح في دموعه ومرة يقبل جبهته...
ومره يمسح ع يده ويشدها بقوة..
الممرضه:ربي يشفيه ويعافيه...
شبحلها هيثم وهز راسه وهو مازال يقرا بعدين رجع عيونه لوجع ولده...
والممرضه والممرض اللي معاها شبحوا لبعض بعدين رجعوا يشبحوله...
🍁كانت المسافه طويله...
و على طول المسافه زياد مافاقش نهائيا...
وبوه مش قادر يفارقه بالنظر ولو شويه...
▪▪▪▪▪
◇وكنت خايف نطلق يده...كنت خايف يرجع يهرب مني وهو في حالته هديكا...كنت في هداكا الوقت متمني لو نقدرنشق صدري ونحطه في وسط قلبي من داخل ونسكر عليه بإحكام...كان الشي الوحيد اللي ممكن يخلصني من الفوبيا مش بس خوف فوبيا فقدان زياد...
▪▪▪▪▪
وأخيرا وصلوا....
خشت سيارة الأسعاف للمصحه...
ووراها سيارات الشرطه...
نزلوا زياد وخشوا بيه داخل بسرعه وبوه معاهم..
هيثم:هبوط ضغط..هبوط ضغط حاد..
خشوا بيه لغرفه الطوارئ وهيثم قعد واقف في مكانه بعد مامنعوه يخش...
كان ياخد في انفاسه بصعوبه وهو يشوف لمكان الطوارئ...
ع جية راجح...
حط يده ع ظهره وقاله:تعال قعمز دكتور..
هيثم:حتى هكي باهي..
راجح:الكرسي وراك دكتور قعمز..
هيثم التفت شافه...مشي خطوتين وقعمز وراجح قعمز جنبه..
قعد يشبح لوجهه وهو يقول:حتى انت تبي حد يشوفك..
هيثم:بعدين بعدين..
راجح هز راسه وهو يشوفله بعدين قال:ماقالك شي زياد..بخصوص قضيته يعني الحادث اللي صار..
هيثم حرك راسه يمين ويسار بالنفي..
راجح هز راسه بإيجاب وغير عيونه عن هيثم وشبح القدام..
شويه وفاتت من قدامهم عامله نظافه وهي شاده فيدها صلايه...
هيثم لما شاف الصلايه..
غمض عيونه بشده وضم شواربه لداخل بأسف بعدين قال:المغرب والعشي..
شبحله راجح..
فتح عيونه ووقف وهو يقول:ماشي نصلي..ارجوك خليك هني..
راجح هز راسه بالموافقه وهو يشوفله...
مشي هيثم بسرعه...
وراجح معاه بعيونه وهو يقول:لاحول ولاقوة الا بالله...كان الله في عونك...
•••••••°°°°°°°°••••••••
طلعت من دارها تجري وهي رافعه اسدال الصلاه اللي كانت لابساته بإتجاه الصاله..
وصلت فيها وقالت بلهفه:زياد وبابا وصلوا طرابلس..
ماجده حطت يدها على قلبها وقالت:ااه ياربي الحمد لله..
في نفس الوقت اللي ناضت فيه نسيبه وجت تجري لسارة وهي ملهوفه:شن قالتلك تهاني؟
سارة ودموعها ينزلوا:قالت قال خوها وصلوا توا لطرابلس..
ورفعوا زياد...لمصحة الإدمان..
ماجده بألم:ياحليلي...ياناري..
نسيبه التفتت شبحت لخالتها ودموعها نزلوا بعدين مسحتهم وقالت:ياما منهم شباب ولاد عيلات محترمه جي عليهم وقت ضعفوا فيه وضاعوا وطاحوا في الادمان...لكن ربي هداهم وشفاهم وحالهم ولى احسن من اللي كانوا عليه قبل يولوا مدمنين..
ماجده وهي تبكي:لكن الناس يانوسه حتقعد تقول عليه كان مخروم لو ولى امام جامع...الناس ماتذكر الا الحاجه الكيه بس يابنتي..
نسيبه:طز فيهم الناس والف طز...المهم ربي يكون راضي والواحد يكون راضي عن نفسه صدقيني اللي يقعد واثق من نفسه ويواجههم ويحط عيونه في عيونهم حيغلبهم ويغلب نظرتهم فيه...والمثل يقول....القافله تسير....والباقي تعرفيه..
سارة رشفت وهي تقول:مش هامتني نظرة الناس..اني همي هو بس..حيكون عنده عزم بش يتعالج ويتخلص منه!؟ حيكون عنده عزم يخليه معاش يوليله بكل!؟ وقضيته مع هداكا كيف يصير فيها شن حتكون نهايتها!؟ هدا بس اللي يهمني واللي نفكر فيه..
ماجده بحزن:ايه والله ياسارة يابنتي صدقتي...
نسيبه هزت راسها وقالت:ايه معاك الجاي حيكون صعب هلبه..بس متأكده ان حيعدي ع خير...واللي خلانا نلقوا زياد هو اللي حيطلعنا من هالمصيبه ع خير واثقه ومتأكده..
ساره جت لعمتها وضمتها وهي تقول:خليك ديما هكي عمتو قويني بكلامك هدا..
ضمتها نسيبه وقالت:كلنا لازم نقووا بش نقووا بوك وخوك ياسارة...لازم نقاوموا زي ماقال بابا حبيبتي..
سارة زادت ضمت عمتها وهزت راسها بإيجاب..
وماجده تشوفلهم بإبتسامة ألم....
•••••••°°°°°°°•••••••°°°°°°°•••••••
بعد ماعطاهم الدكتور معلومات عن وضعه الصحي المتردي بسبب الادمان....
قعمز معاه هيثم وقعد يسأل فيه عن المراحل اللي حيمر بيها زياد في رحلة العلاج..
الدكتور:اول شي نحب نطمنك دكتور درنا لزياد تحاليل عن الامراض اللي تصاحب الادمان زي الايدز والهيباتيتس ولقيناه نظيف تماما منها..
هيثم براحه:الحمد لله...الحمد لله رب العالمين..
الدكتور:بالنسبه لمراحل العلاج فهما اربعه مراحل...
مرحلة التقييم والتشخيص وهي المرحله اللي نحددوا من خلالها مدة العلاج والبرنامج العلاجي اللي يناسبه..
والمرحله الثانيه...سحب السموم من الجسم..الانسحاب يعني..ولاأخفيك سرا المرحله هي الأخطر وتعتبر هي الشق العلاجي الداوئي...
والمرحله الثالثه هي الشق العلاجي النفسي...يعني مرحلة تاهيل نفسي وهني يدخل فيها الطب النفسي والاستشاريين النفسيين...
والمرحله الرابعه هي مابعد العلاج لضمان الشفاء وعدم حدوث انتكاسه...لازم يقعد فيها زياد متابع عندنا هني...
هيثم:يعني ع هكي المده اللي ياخدها قداش حتكون؟!
الدكتور:قتلك قبل هدا يعتمد ع التقييم اللي نعرفوا من خلاله نوع العقار اللي كان مدمن عليه والفترة اللي قعد فيها مدمن وكمية الجرعة اللي كان ياخد فيها..
هيثم تنهد بألم وهز راسه وهو يشبح في الفراغ ويفكر..
الدكتور:دكتور هيثم دورك انت ودور العيله مهم جدا جدا...
شبحله...
الدكتور:على حسب ماعرفت ان زياد حالته النفسيه تعبت بعد موت والدته...يعني العامل الرئيسي اللي وصل زياد لهني هو فقدانه للشعور بالأمان والحب...وهالشي توا لازم ياخد منه زياد اضعاف مضاعفه...غالبا الحاله النفسيه تتحكم في مدة العلاج...يعني لو المده تكون من سته لتسعه شهور ممكن زياد ياخدها من شهرين لتلاته لو لقي تعزيز قوي للمعنويات...
▪▪▪▪
◇وقفت عند النقطه هادي هلبه...ولدي زياد حساس..حالته النفسيه تتحكم فيه بقوة...يعني اني هني لازم نخدم ع الحاجه هادي كويس....من بعد ماطلعت من عنده نذكر اني قعمزت مع روحي في باحة المصحه برغم ان الجو كان مصقع...وقعدت نخطط ونرتب لأهم هدف ولى عندي توا وهو شفاء ولدي من الادمان في وقت قصير...بس في عائق كبير ممكن يصعب عليا الوصول لهالهدف....حادثه جلال الوافي....
▪▪▪▪
الساعه العاشرة ليلا...
واقفه ع روشن الصاله اللي يطل ع الجنان تشوف للباب وتستناه امتى ينفتح...
وخالة بوها مقعمزة حداها سانده راسها ع حافة الكنبه ومغمضه عيونها...
وفي دار التوأم..
كانت عمتها ترد في خواتها الصغار...
تتأمل في ملامحهم البريئة وهي تسمح ع شعر ريحان...
سمعت صوت باب الحوش الخارجي انفتح..
ناضت بهدوء من حداهم ومشت طلعت بسرعه من الدار...
وين وصلت في الباب لقاته مفتوح...
طلعت...وقعدت واقفه مع بنت خوها قدامه..
لما شافوا خليل خش بعد ماخشت السيارة..
خشوا الزوز بسرعه لأنهم كانوا من غير حجاب...
سكرت نسيبه الباب...وسارة مشت تجري للشماعه لبست الاسدال وتوجهت للروشن..
اما نسيبه رفعت برنوسها فوق راسه ومشت وقفت معاها...
وهدا كله وماجده غافيه...
...برا....
هيثم وع وجهه باينه ملامح التعب مع الضرب:يعني اللي كلمت الشرطه؟
خليل:ايه بعد تأكدت ان الريقا طلع من غادي..
هيثم هز راسه وقال:مشكور ياخليل مشكور...ديما...وسكت لما حس بدوخه كان حيطيح بس قاوم واتكى ع السيارة..
سارة بخوف:حي بابا..!
ونسيبه مشت تجري طول للباب فتحاته وطلعت لخوها وسارة وراها..
استاقظت ماجده ع الدوشه وهي مخلوعه قالت؛هذا شني!؟ شن في؟!
....وصلوا سارة ونسيبه في هيثم....
خليل بعد ماكان سانده ويسأل فيه عن حاله لما شافهم جو تباعد عنه..
الزوز حاوطوه وكل وحده تسأل وهي مفجوعه..
"بابا شن تحس"....:"هيثم خيره وجهك!"
هيثم وهو يقاوم في شعوره بالتعب:مافي شي..مافي شي...درتوا عشي؟
سارة وهي تشوف في اثار الضرب على وجه بوها:لالا بابا ماحد فينا عنده نيه ياكل..
نسيبه بحزن:عشينا الصغار بس..
هيثم سكت وهو حاط يده ع صدره ويحرك فيه..
خليل بدون مايشوف جيهتهم:تو نجيب اني مادورش..
نسيبه حركت عيونه اتجاهه بدون ماتلتفتله..
هيثم:لالا ولدي ماتعبش روحك صحيت بارك الله فيك..تو ناكل اي شي..
خليل:لالا مادورش..وبعدين انتم توا لازم تهتموا بصحتكم اكثر من قبل بش تقعدوا واقفين ع رجليكم وتقاوموا الجاي مش ساهل راهو..
نسيبه:عارفينه مش ساهل مش ضروري اذكرنا وتزيدنا نكد..
هيثم بصدمه:نسيبه!..
هي شبحت لخوها بإحراج بعدين نزلت عيونها ومشت طول خشت داخل..وسارة بعيونها معاها..
هيثم وهو يشوف لخليل اللي كان باين ع وجهه ملامح الضيق:اني اسف اسف جدا...
سارة شبحتله وقالت:اعصابنا تعبانه ومتوترين وهي اكثر وحده فينا نفسيتها تاعبه من اللي صاير زياد تشوف فيه ولدها مش ولد خوها..
خليل شبح للباب وتنهد بعدين هز راسه وقال:مش مشكله..
توجه للباب وهو يقول...ربع ساعه ومش معطل...
وفتح الباب وطلع وسكره وراه..
هيثن بغضب:عمتك هادي تبيني نتعامل معاها بأسلوب مانحباش..شن شافت منه الراجل بش تتعامل معاه بالأسلوب الفظ هذا!؟ فوق وقفته معانا ومساعدته لينا! شن الوقاحه هادي!
ومشي خش داخل وهو يمشي بشي من التعب..
طلعته ماجده شافاته وقالت:هيثم ولدي..
هو جاها وارتمي فس حضنها وهي ضماته بحنان وقعدت اطبطب عليه وتقول:طيب فيك اللي لقيت ولدك..
هيثم تنهد وحط راسه كتفها وغمض عيونه..
وسارة تشوفلهم...
حست بوها في هاللحظه شافت في خالته امه وكأن ماجده حست بهالشي وتعاملت معاه بحنان الأم...
تمنت وقتها لو كانت عندها خالة تشم عليها ريحة امها تهون عليها وتخفف شويه من آلالام الحزن الفقد والشوق الطويل...
🍁🍁🍁🍁
وعمتها..
كانت تفش غلها في "البوكسنيج"...
تضرب فيها بقوة وهي تبكي بصمت ..
تشوف في روحها فيها وتضرب غضبا منها على نفسها اللي ديما تجرح في الإنسان اللي يحبها بصدق وهي تحبه...
وبدت مش عارفه علاش تتعمد تجرحه بإستمرار....
طلقتها ومشت للسرير...حدفت روحها عليه وغمت راسها بالمخده وكملت بكي..
وسبب بكاها من كانش واحد...
حست روحها تبي تبكي اكثر اكثر بش ترتاح شويه...
'🥀في ناس لولا البكاء لكانوا ماتوا من الحزن...
صدق الحبيب حين قال عنه رحمه🍁
••••••°°°°°°•••••••°°°°°°••••••••
في المربوعه...
صوت شخير مجيد صادح فيها وجنبه ولده رشيد بش ماكانش راقد..
كعادته غارق في وحل العالم الأفتراضي..
وامه حتى هي اتكت حدا بناتها في دار المعيشه وخداها النوم...
وقعدوا هما الزوز فايقات يهدرزوا ويعدوا في الهدرزة بالتسالي...
دانيه وهي تاكل في بذور دوار الشمس:امم..لليوم كلمني وقعد ينشد عليها من فوق...وضحكت..
رتاج وهي تاكل في رقائق البطاطا:اممم...ياعيني ع خونا ياعيني...حط ع وحده اصغر منه قريب بعشرة سنين ومازال ماطلعتش من المدرسه يحسب فيها صح لقدام..
دانيه:عينك..مجاهد مايفكرش هكي..حسيت البنيه عجباته حق...عاجباته شخصيتها..وسارة تمشي معاه هلبه راهو..
رتاج:باهي ماعندها شي فاضيه يعني؟
دانيه:سارة ماعندهاش في جو الشباب والعلاقات نهائيا حتى لما يدوا حدانا البنات في المواضيع هادي تقعد ساكته ولو سألوها عندك حد تقول مانحبهاش الحاجات هادي..
رتاج:حلو...ان شاء الله تقعد هكي ديما..وانتي خليك زيها دنو بالله عليك..
دانيه بضحكه:ماتخافيش يابنتي..صدقيني مش حنعبره..
رتاج ابتسمت وقعدت تاكل..
فجأة رن تليفونه...
كان محطوط جنبها شافت المتصل...حطت اللي فيدها وخداته وناضت..
دانيه:راجلك؟
رتاج هزت راسها بإيجاب ومشت طلعت من الدار..
......فتحت الخط وردت وهي تمشي....
رتاج:ايوه السلام عليكم..
"وعليكم السلام...شن جو"
رتاج ابتسمت وقالت:تمام الحمد لله..شن حال خوك بالله؟
"لا الحمد لله الحادث ماكانش قوي كسر في الذراع وشويه كدمات وباقي اموره تمام...اسأليني اني عن حالي"
ضحكت رتاج وقالت:شن حالك ؟
.....في هالوقت طلع رشيد من المربوعه ومشي بإتجاه الصالون.....
لمحاته رتاج وهو فايت...
استغربت ومشت والتليفون ع وذنها وهي تحاول تركز مع عادل وكلامه..
لما وصلت فم الصالون وقفت وادرقت وهي تسمع في خوها يقول...
"هاه شن توا هكي تمام"...
بينت راسها وهي تشوف...
لقاته حاط التليفون ع الطاوله ومسنده ع المزهريه..
ولما حاولت تشوفه هو...
قلبها قريب وقف....
ادرقت وحطت التليفون ع قلبها وقعدت تتنفس بسرعه من الصدمه..
بعدين هربت وهي تجري بخطوات غير مسموعه لين خشت الكوجينه وسكرت الباب...
رتاج بصدمه وصوت هامس:هدا شنو ياربي هدا شنو!؟ غبارة سودا غبارة مغبرة!...
ونست ان عادل ع الخط...ماسمعش شن قالت..
بس كان يقول وينادي"الو...رتاج.....الو"...
بعدين سكر...
هي من صدمتها مشت حطت التليفون على طاولة المطبخ وقعمزت ع الكرسي بهده وحطت راسها بين ايديها وهي تشوف للفراغ وتذكر في اللي شافاته..
غمضت عيونها بشده ومسحت بيده ع خدودها...بعدين فتحتهم وناضت..
مشت طول للمكان اللي حاطه فيه جهاز النت في الكوجينه ..
خداته وسكراته وهي تقول:هدا اللي كان ناقصنا.!...
سكتت وهي تفكر وتقول....ياربي لمن بنقول...من بنحرش فيه.!؟
شبحت لباب الكوجينه...ومشتله وقفت عليه فتحاته شويه وقعدت تشوف منه لقت خوها طالع من الصالون ومتوجه للمربوعه...
فتحت الكوجينه ع وسعها ع جية دانيه بتشرب..
دانيه:تميتهم الشيش في مازال منهم هني ؟.
رتاج كان واقفه سرحانه ووجهها اصفر..
دانيه بإستغراب:خيرك؟ تعاركتي انتي وراجلك؟
رتاج استاقظت بعد ماسمعت شن قالت دانيه وهي تقول:حيي! نسيته بكل...ومشت تجري لتليفونها...
ودانيه خشت ادور ع الميه ومرة مرة تشبح لأختها بريبه...
••••••°°°°••••••°°°°°••••••
واقفه في روشن دارها وهي تتفرج ع السمي اللي كان مزينها بدر قبل اكتماله باربعه ايام...
كان منظره هو نجم الزهره "كوكب الزهرة" ديما مرافقه حلو هلبه...
والزهره هادي ماتتميزش باقي النجوم الا لما طل جنب البدر...
نسيبه:مش حلو من غيرها...لكن حتى هي ماتبانش الامعاه!
نحس فيه تولي احلا لما تكون معاه...افف..قريب نولي افلاطون وارسطو من الهم...استغفر الله العظيم...لكن بجديات يعني هي علاش لاصقه فيه! هي خير منه مية مرة هي كوكب وهو طار ولانزل يقعد عقاب قمر...!
قالت الجمله الأخيره وهي تحرك فيدها فوق ولوطا...
ربعت ايديها وغيرت عيونها عنهم وشبحت لوطا...
شافت خليل جاي وهو شاد شكاير في يده...
قعدت تبع في بعيونها وهي تشوفله بنظرات مكابره وقالت:مش واكله شي ...
ولفت ومشت لسريرها وقعمزت عليه...
🍁🍁🍁🍁
"هادي ليك انت عارفك ماتاكلش اي شي توا"
هيثم وهو مبتسم:احرجتني ياولدي...مش عارف شن نقولك..بس نرجع نعتذر منك مرة عن الاسلوب اللي تكلمت بيه معاك نسيبه...هي زي ماقالت سارة اعصابها تاعبه...
خليل بإبتسامه:ولايهمك والله مقدر اللي تمروا بيه مش ساهل وليكم عذركم..
هيثم تنهد وقال:بارك الله فيك ياخليل..جد انت رجل حقيقي..
خليل ابتسم بإحراج وحك مقدمة انفه وهو يقول:تسلم...المهم توا..اني مروح...في حالة احتجت شي اي شي بالله عليك كلمني في اي وقت..
هيثم بإبتسامه هز راسه وقال:يرحم والديك..
خليل:والدينا ووالديك...تصبح على خير..
هيثم:قدامك كل خير...
▪▪▪▪
◇ماكانش عندي رغبه في اي شي..بس كلام خليل خلاني نستاقظ وننتبه لحاجه ديما نغفل عنها ونذكر روحي بيها ونرجع نغفل عنها...اني لازم نقوي روحي ونحافظ ع نفسي بش نكمل الطريق مع صغاري في مشوار حياتهم..المشوار المليان هلبه مطبات وحفر.....
▪▪▪▪
سارة:الدجاج ليك انت بابا..
والبيتزا ليا اني وخالتو....
ماجده وهي مبتسمه ابتسامه جانبيه قالت:وسكالوب لنوسه..
سارة شبحت لماجده..
هيثم شبح لساندويتش السكالوب وقال:ايش معنى!؟
سارة شبحت لبوها بإرتباك وقالت:عمتو تحبها..
رفع حواجبه..
ماجده:ايه..نوسه ماعندهاش على هدا كله تحب سكالوب بس..بري ارفيعهولها سارة..
خداته ساره وناضت مشت بسرعه وهي مرتبكه وهيثم يتبع فيها بعيونه..
ماجده شبحتله بريبه وقالت:تعشى ولدي كول انت مريض سكر اللي قدامك كله لازم تكمله..
هو شبح للعشي...وبدي ياكل في صمت..
وماجده حتى هي بدت تاكل وتسرقله في النظر...
••••••فوق••••••••
"قال ان حيخلوه يتعالج قبل "
نسيبه بحزن وتردد:باهي ماقال شي عن حالته؟قصدي عن وضعه...
سارة حركت راسها بالنفي ودموعها ينزلوا..
نسيبه مسحتلها دموعها وقربتها ليها باست راسها وطلقتها وقالت:بري تعشي حبيبتي..
سارة رشفت وقالت:تعشي حتى انتي..
نسيبه رفعت حاجبها وقالت:مانبيش..
سارة ابتسمت من بين دموعها وقالت:جاب لباب دجاج محمر..وجاب بيتزا شكله سأل تهاني وقالتله نحبها..وجاب سكالوب...وانتي تحبي السكالوب هلبه..
نسيبه وجهها ولى احمر وهي تقوللها:شن قصدك؟
سارة خدت يدها وحطت فيها كيس الساندويتش وناضت ومشت طلعت من الدار وسكرت الباب وراها..
نسيبه قعدت تشبح للباب وهي بتتبخر من الخجل..
وقلبها ينبض بقوة...غيرت عيونه عنه وشبحت ليدها...
ارتسمت ع وجهها ابتسامه فيها شي من الغرور...
بعدين قامت الساندويتش فتحت غلافه وكلت منه...
تنهدت من قلبها وهي تاكل وشبحت لجهة الروشن وزادت كبرت على وجهها نفس الإبتسامه...
••••••°°°°°°•••••••°°°°°°•••••••
"هدا كله صار وحني من أخر من يعلم"
خليل:اول ولاأخر من يعلم شن الفرق؟
رفيق:اقل شي يكون عندنا علم...اصلا لو صار حاجه اتفه حاجه مع واحد فينا نجوك طول نحكولك..
عفاف وهي تشبه لخليل:المهم توا ولدي شن بيصير فيه؟بينحبس؟
رفيق شبحلها برفعة حاجب..
خليل:بيتعالج في المصحه قبل بعدين ينحبس..
جهاد:توا بيحققوا معاه وبينحجز في المصحه لين يتعالج بعدين يرفعوه للحبس بش يتحاكم..
خليل:يتحاكم حتى وهو يتعالج..
جهاد:لكن ع هكي بعد ثبتت عليه حكاية الادمان موقفه في القضيه ولى صعب..
رفيق:قول ان شاء الله مايشكوش فيه يبيع..
شبحوله..
رفيق:قعد مع الريقا فترة من قال ماخدماش!.
عفاف وجهاد شبحوا لخليل...
وخليل قعد يشبح لرفيق ويفكر في كلامه بقلق....
🍁🍁🍁🍁
بعد ماتعشى...
جهز نفسه ورفع مع حاجات ضروريه محتاجهم وتوجه طول للمصحه...
....لما وصل غادي......
طلب من الدكتور المسؤول عن حالته يسمحله يقعد معاه في الغرفه وهو وافق...
▪▪▪▪▪
◇اول ماخشيت...وقفت حداه...قعدت نتأمل في ملامح وجهه اللي كان تعبان لدرجه...يعني...شبه ميت...هدا مايدير الادمان...يقتل البنادم بالعرق..يخليه شبح...لين يقضي عليه بالمرة...وولدي كان في هداكا الوقت...في بداية ربيع عمره...اللي تحول لخريف كئيب موحش..احمم..قعدت نفكر شن اللي شافه...وشن اللي عاناه وكيف كان حجم الألم اللي يحس بيه خلال الفترة اللي ماكانش معانا فيها!؟
لمجرد اني فكرت بس...تخايلت...حسيت...بضلوعي تلاقوا على قلبي وطبقوا عليه...
وقتها جدا...كرهت نفسي....
▪▪▪▪▪
قرب منه وطبع قبله ع جبينه...بعدين على خدوده...
وقعد يتأمل في ملامح وجهه وهو يمسح ع خده بحنان...
▪▪▪▪▪
◇كنت نشوف فيه زياد وهو في عمر جنان وريحان هداكا
الوقت...طفل...تصدقوا...وبش تعرفوا ان اني كنت اب سيء بكل معنى الكلمه...مانذكرش اني بست زياد ولاضميته من بعد ماولى عمره سته سنين...والله..مانذكرش...
مانذكرش اني سهرت جنبه ليله وهو مريض..ايه يعني كنت نهتم بس من بعيد لبعيد..لاهو ولاخوته...كنت معتمد اعتماد كلي على امهم وكنت نشوف ان دوري يجي لما الوضع يتأزم ونضطر نرفعهم للمستشفى...اني كنت شايف ان الأب لازم يكون هكي...كنت شايف ان الأبوه هكي...
كنت شايف!؟ ضحك بتهكم وهو يقول... اني كنت اعمى...ماكنت شايف شي...
▪▪▪▪▪
وكمل هديكا الليله وهو يقرا في القرآن....صديقه ورفيقه اللي مستحيل يخذله....وفي وقت الضيق مافيش صديق زيه...
كان يقرا شويه ...ويراقب في حالة زياد شويه...
لعند ماخداه النوم وهو مقعمز ع الكرسي...
وبعد مارقد هو بعشر دقايق...
فاق زياد....
فتح عيونه شويه شويه....
كانت الصورة قدامه مش واضحه كويس...وماكانش واعي للي هو فيه...
غمض عيونه...ورجع فتحهم من جديد...وقعد يوزع في نظره حواليه..
عقد حواجبه بإستغراب....استغرب المكان....
هو وين؟!...وش جابه هني؟!
شن صار اصلا...؟!!
جو عيونه ع الراجل المقعمز ع الكرسي...
قعد مركز عليه بالنظر لين عرفه...
جي بين عيونه اللي صار كله...من اللحظه اللي شافه فيها...لين مافقد وعيه وهو في حضنه..
غرقوا عيونه بالدموع وهو يشبحله ويذكر في كلامه..
《 ...بابا...اني بابا...بوك..نعاهدك قدام الله سبحانه وتعالي اني مش حنخذلك من اليوم لأخر لحظه في حياتي...حنطلعك من اللي انت فيه يابابا صدقني...والله لما نطلعك لو ندفع روحي ثمن لهالشي..》
□□□□□
☆هديكا الأيام....تنهد بعمق وكمل يقول...ايام ع قد ماكانت صعبه كانت حلوة ..فيها حاجات حلوة..لما نذكرها نحس بشعور محبب لقلبي..يعني...
الأيام هديكا خلتني نتعرف على بوي...خلتني نعرف من هو هالرجل العظيم...الرمز ...القدوة...اللي اني متأكد ان في زماننا المعاصر هدا ماكانش في زيها تنين...مش لأنه بوي نقول هكي...لأنه فعلا يستحق..كلام الحب والمدح اللي ينقال في العالم كله...بوي...قداش نحب نقول هالكلمه...ضحك وقال....ع فكرة خليته يدروش من كتر ماقعدت نادي فيه بيها...ابتسم بألم وقال...ممكن لأني كنت نبي نعوض اللي فات...كنت قليل النادر مانقول فيها..نادر جدا....جدا....
□□□□□
نزلت من عينه اليسار دمعه حارقه...وكأنها نزلت ع قلبه وزادت وجعه..
غمض عيونه واذكر كيف ضربه...فتح عيونه وقعد يشبح لوجهه ويشوف لآثار الضرب متاعه عليه..
زياد"مافيش كبيرة من الكبائر مادرتهاش...كله درته...وليت حقير ووضيع لدرجة متمني فيها لو نموت..."
غير عيونه عن بوه وغمضهم وقعد يبكي بصمت...
ومن القهر والحسرة...عبرة من عبراته طلعت غصب عنه..
فيقت بوه...
هيثم فاق مفزوع...
شبحله...فز من مكانه وجاه وهو يقول؛زياد..
زياد فتح عيونه وهو يبكي وماباش يشبح جهة بوه..
هيثم شد يده وقال:خيرك ولدي؟! تحس في حاجه؟
زياد شبحله...
شاف الخوف كان واضح عليه..عيونه كلهم خوف عليه...
زياد بنبرة باكيه:علاش ماخلتنيش نموت...علاش ماخلتنيش نرتاح ونريح!؟
ارتسمت ع وجه هيثم ملامح الجديه الممزوجه بالحزن وهو يشبح لولده...
بعدين تنهد وقال:ترتاح وتريح....عقد حواجبه وقال...بعد الموت انت حترتاح متأكد؟.
زياد غير عيونه بدون مايرد..
هيثم:شوف...انت توا منحت فرصه جديده...ع خاطر نفسك..وع خاطري وع خاطر الناس اللي تحبك اللي مش حيرتاحوا ابدا لو لاقدر الله صار فيك شي...
مسح ع شعره وقال...كلنا عشنا مرارة فقد امك مش انت بروحك...وعرفت ألم الفقد ومعاناته...نهونوا عليك لدرجة انك تعيشنا نفس المرارة بأضعاف...تعذبنا...وتفتت قلوبنا...
زياد شبحله وقال:وتوا شني؟! ماكم عايشين نفس الشي نفسه بالزبط...موتي يخلصكم من العار..العار اطول من العمر.
هيثم بإنفعال:عار! الناس...وكلام الناس ونظرة الناس...طز فيهم كلهم..
مافي حد يهمني لااني ولاخوتك ولاعمتك ولاكل من يحبك ويعزك بصدق غيرك انت...انت وبس...وانت مفروض يكون همك في نفسك وبس..حتى لو طحت من عيون الناس كلها...خلي همك الوحيد ان تكون عالي في عين ربك..
زياد غير عيونه عن بوه وقعد يشبح في الفراغ وهو يسمع في كلامه ويفكر فيه..
هيثم:مافي حد يخلي في الهوا يطلع فيك ويخش غيره..مافي مخلي قلبك قاعد يدق لهاللحظه غيره مافي حد يملك روحك غيره...ولافي حد حيدخلك الجنه ويبعد عن النار غيره....
اللي لما شافك ضعت...بعتلي من يوقضني وينوضني من غفلتي بش نلحق عليك وننقدك من اللي انت....
حرك عيونه وشبح لبوه ومازال دموعه ينزلوا وقال:راهو درت هلبه حاجات...حاجات...لو تعرفها تقولي انت في النار لامحاله..
هيثم وقف ع حيله وقال:حتى اني..
عقد زياد حواجبه بعدم فهم..
هيثم:حتى اني..سلمني امانه ماكنتش قدها...اهملتها ومارعيتهاش حق رعايتها...كنت فاهم اني لو درت اعمال خيريه..عالجت ناس بالمجان..دفعت حق عمليات عن ناس محتاجه...خدمت بكل اخلاص ووفاء بش نقيم قطاع الصحه ع خاطر هالشعب المتبهدل من المرض ومن المصاريف اللي تقسم الظهر بش يتعالجوا في مصحات وعيادات مصاصين الدماء...ولافي بلاد تانيه وضع الصحه فيها خير من وضعنا...
كنت نقول..مسح ع لحيته وقال...كنت نحساب هكي فعلا اني ماشي صح...وهكي ربي حتما راضي عني لأنه يحب المصلحين...هكي كنت نقول....بس بعدين اكتشفت اني ماشي غلط في غلط...مضيع الطريق...قاعد نعصي في ربي ونرتكب في الذنوب بدون مانحس ...كنت نبعد عن ربي بدل مانقرب منه...لأن هو عطاني مهمه....اني تجاهلتها ودرت مهمة غيري...
زي اللي مقعمز قي قاعة ويمتحن وطول الوقت كان يجاوب وهو فرحان وواثق من نفسه لأنه جاوب ع اسئلة الامتحان كلها وفي الأخير يكتشف انه كان واخد ورقة امتحان غيره يحل فيها ومخلي ورقته...
زياد كان مش قادر يتكلم كان يسمع وهو متفاجئ هلبه..
هيثم بلع ريقه وقال:تخيل لو تم الوقت قبل لنستاقظ لورقتي وخليتها فاضيه...شن حيكون مصيري بعدين؟
شبحله بنظرة فهم لمغزى كلامه...
هيثم قربله وقاله:لكن هو عطاني فرصه زي ماعطاك فرصه وقالك مازال عندك الوقت صلح غلطتك وركز في امتحانك وفي اجابتك كويس...فاهم عليا بابا...فهمت شن قلت...
زياد وهو يشوف لعيون بوه قال:نبي منك وعد...كلمة...
هيثم:نوعدك...ونعطيك كلمة من حنولي فيها لين موت...مش حنخذلك...ارجوك ماتخذلنيش...
زياد قعد يشبحله شويه بعدين هز راسه بإيجاب.....
هيثم ابتسم ومسح ع راسه...بعدين وقف ع حيله وقال...توا...لو فيك حيل بابا...نبيك تحكيلي اللي صار معاك بالزبط يوم الحادث...توا نبي نعرف منك هدا بس...وبعدين ان شاء الله حنقعمزوا مع بعض هلبه ونهدرزوا...
زياد بصوت مبحوح:تمام..
مشي هيثم خدي الكرسي وحطه جنب السرير وقعمز وقال:نسمع فيك...
.................
الساعه الرابعه عصرا...
قدام ضابط تحقيق...وزوز عناصر من الشرطه...وراجح...والدكتور المسؤول عن الحاله...
وهيثم...زياد كان يحكي عن اللي صار يوم الحادث بالتفصيل..
زياد:مشيت يومها بنوقف قيدي...وفي حاجه تبي توقيع جلال الوافي...وين سألت عنه قالوا تلقاه في مكتبه ودلوني عليه....مشيت...حك رقبته وقال....وين ماشي خطمت جنب فيراندا كانت مفتوحه سمعت صوت بنت وهي تقول...شن دير..حول..خليني...طلعت نشوف نشوف في...لقيته هو يتحرش بوحده من الطالبات تقرا عنده شفتها مرة معاه قبل اسلوبه معاها وطريقته في الكلام ماعجبتنيش...وبعيوني شفت بعدين...حقارة ووساخه البني آدم هدا...بدون مانفكر طول خلصتها منه وقلتلها تهرب ماكنت نبي حد يشوفها....
♦️لحظه وقوع الحادثه....
جلال جي لزياد وضربه ع صدره وصرخ في وجهه وهو ضاغط ع سنونه بغيظ وقاله لفظ نابي..
زياد ماتحملاش وجاه ضربه بقبضة يده ع وجهه وهو يقول:ياديوث ...
ردله جلال اللكمه واطلق لفظ نابي تاني...
زياد ولى بيضربه ..
وخر جلال وقال:تو نوريك ياواطي ياكلب...كان ماحرمتش عليك تخشها الكليه هادي مانوليش جلال..
زياد بلامبالاة وازدراء:في ستين داهيه انت وكليتك..
ولف بيمشي...
بس جلال اطلق سبه فضيعه في حق ام زياد...خلاته زياد يفقد اعصابه...وجي يجري لجلال قعد يضرب فيه وجلال مع كل ضربه كان يوخر...
لين في الآخر دفعه زياد بقوة وطيحه وراسه انضرب بسياج الفيرندا...
♦️الوقت الحاضر...
زياد بخوف وعصبيه والدموع فعيونه:بعد ماطاح ومعاش تحرك...استاقظت لروحي...خفت خفت هلبه لما شفته طاح ومعاش تحرك...نحساب روحي قتلته...جيته نجري وشفت النبض متاعه...وبعد تأكدت انه عايش...من خوفي هربت...
ضابط التحقيق:هو حكي قصة تشبه قصتك بالزبط بس الأدوار فيها متبدله....
زياد شبح لبوه..
بوه غمض عيونه بعدين فتحهم تطمين لولده...
الضابط:البنت...انت مذكر شكلها كويس...
زياد جت بين عيونه البنت شبح لضابط التحقيق وقال....
لا...ليها مده المشكله صايره...واني وقتها ماركزتش في شكلها كويس..
الضابط:نفس الكلام قاله جلال الوافي...ياهو يكذب ياانت تكذب....
زياد نزل عيونه وشبح ليده اللي كانت باديه تنمل وقعد يحك فيها...
وراجح مركز عليه..
هيثم:عدم المؤاخذة يعني...تو انتم ماقدرتوش تلقوا البنت؟
الضابط:شوف الطب قداش فيها طالبه...حنحققوا معاهم كلهم! طبعا هدا مستحيل...انت تعرف كويس بماانك ليبي وعايش في وسط في مجتمع زي مجتمعنا الوضع هدا يكون صعب ع اي بنت تجي وتقول اني المعنيه اللي حاول يتحرش بيا فلان ولا علان...البنت حتضرر بشكل كبير...اكثر من المتحرش نفسه...
هيثم ابتسم بتعجب متهكما وقال:ع هكي معناها القضيه هادي حتنحسم ظلما لصالح طرف ما لأن حضراتكم حطيتوا القانون ع تركينه وفكرتوا في نظرة المجتمع للبنت ومافكرتوش في نظرته للطرف المظلوم وسمعته وسمعة عيلته كامله!..
الضابط:هدي شويه دكتور..طبعا مش حيصير هكي..اني قتلك الكلام هدا بش نحطك في الصورة ونخليك تعرف ان القضيه مش ساهل وحتاخد وقت..وحني حنديروا اللي علينا وزياده..
هيثم رفع حواجبه وهو يشبحلهم وقال:ان شاء الله...شبح لولده وقال...بإذن الله...
شاف زياد بدت تطلع عليه اعراض الحاجه للجرعه..
الدكتور اللي كان موجود معاهم قال: لو سمحتوا اطلعوا توا..
الضابط ركز ع حالة زياد وقال:تمام...هيا ياابني انت وياه..
ومشي للباب والعناصر لحقوه...
الدكتور:اطلعوا لو سمحتوا...
هيثم قعد يشبح لزياد وقلبه مش مطاوعه يطلع ويخليه..
راجح:دكتور..
زياد وهو يتوجع:اااه..اممم..وقعد يحك...
الدكتور:دكتور هيثم..
راجح جي لهيثم وخداه من ذراعه وقاله:لو سمحت دكتور..
زياد :اااه...ااااه...وبدي يخبط في السرير بجسمه وايديه..
الدكتور ضغط ع زر في السرير...
وراجح خدي هيثم ومشي بيه للباب..
هيثم حط ايديه ع وذانه....
طلعه راجح ع خشت تلاته ممرضين..زوز رجاله وبنت..
"اااااه"
تسكر الباب في اللحظه اللي فيها هيثم التفتله بيرجع يخش..
راجح:دكتور تحمل ارجوك...
"حولوا...حولوا...ااااه...حولوا...."
هيثم سكر وذانه بإيديه بشده ومشي بسرعه هارب...
وراجح مشي وراه وهو يقول:لاحول ولاقوة الا بالله...
معاش قدر هيثم يكمل مشي..
جي عند كرسي وقعمز حط راسه بين ايديه وهو يقول:
لاحول ولاقوة الابالله...لاحول ولاقوة الابالله...لاحول ولاقوة الا بالله...لاحول ولاقوة الابالله..ياالله...ياالله...لاحول ولاقوة الا بالله..
وراجح واقف بحداه وهو يشوفله بنظرات كلها ألم...
•••••°°°°°••••••
في المدرسه الابتدائيه...
كانت نسيبه نازله من الدروج هي بنات خوها بعد ماانتهي الدوام...
كان في في ابلات واقفات تحت يشبحولهم بنظرات كلها ريبه ويتهامسوا..
حتى من الابله اللي كانت قبل يوم تدعم فيها وتقول انها مش مصدقه الكلام اللي انقال على زياد دارت روحها اليوم ماتعرفهاش..
نسيبه كانت حاسه بضيق شديد من تجاهلهم ليها ونظراتهم وكلامهم اللي ماتسمعش فيه بس كانت عارفاته شن هو بالزبط...
كانت تبي تبكي...بش شدت روحها بقوة...
وصلت برا لسيارتها وركبوا هي وبنات خوها وطلعوا من المدرسه...
جنان:عمتو...
نسيبه:نعم حبي..
جنان:اليوم مافي حد يبي يكلمنا ولايلعب معانا..
شدت نسيبه بقوة ع الدومان..
ريحان:حتى صاحبتي اليوم ردتلي القلم اللي عطيتهولها هديه وقالتلي معاش تكلمني..
نسيبه وهي تحاول تتماسك بقوة:طز فيهم..انتم خوات...خليكم صاحبات بعض العبوا مع بعض واقروا مع بعض وماتعدلوش عليهم..
ريحان:باهي وعيد الطفل بنديروه بروحنا؟
تنهدت نسيبه بحرقه وقالت:لا حبيبتي... ياعيوني انتي وياها...تو ديروه مع الفصل كله بإذن الله..
ابتسموا هما الزوز..
ونسيبه بعد شبحت ابتسامتهم ابتسمت وهي شاده دموعها بالغصب..
وصلت قدام المحل القريب للزنقه..
درست سيارتها ونزلت...
وخليل اللي كان واقف قدام الورشه يشرب في الشاهي شافها وهي نازله من السيارة وخاشه للمحل...
....في المحل.....
نسيبه:السلام عليكم..
الشاب اللي يبيع غير عيونه وقال بدون نفس:استغفر الله العظيم...تفضلي اختي..
نسيبه بغضب ودموعها في عيونها:مايشرفنيش اصلا..
ولفت ومشت طلعت من المحل...
البايع:احسن..
🍁وصلت وقفت مسحت دموعها وخدت نفس وجت بتمشي للسيارة..
وقفت لما شافت خليل واقف قدام السيارة ضرب عليها بصوابعه وقال:راجي شويه..
ومشي خش للمحل..
هي مسحت دموعها ومشت ركبت للسياره وقعدت في وسطها..
جنان:حسبتك بتجيبي شكلاطه عمتو...
نسيبه رشفت وشبحت للروشن وهي تمسح في دموعها اللي ينزلوا بالسيف عليها..
شويه وسمعت طرق اصابع ع واحد من رواشن السياره..
شبحت يمينها...
شافت خليل واقف يحي في جنان بحركة اليد وهو يضحك وهي تحي فيه وتقول:خليل عمتو..
هي غيرت عيونه وشبحت للروشن اللي جنبها وضعت ع الزر بش ينزل المرش..
خليل وهو مبتسم:هاه شن جو ياقلوب المشماش..
ضحكوا هما الزوز وقالوا بنبرتهم الطفوليه اللي كلها براءة...تمام...كويس..
هو ضحك وقال:دوم...ورفع يده ومدلهم الشكارة وقال...جبنا الحلو للحلوات..
جنان وريحان شبحوا لنسيبه وقالوا مع بعض:عمتو..
خليل شبحلها..
نسيبه وهي قالبه وجهها عنه؛عادي عادي..
ابتسم ع جنب وحرك راسه يمين ويسار..
جنان خدت الشكارة وقالت:شكرا خليلو..
خليل ضحك وقال؛العفو...
ريحان:شكرا..
خليل:العفو..
نسيبه:شكرا...
خليل ماباش يرد عليها وقال للبنات:سلموا على بابا...السلام عليكم...ومشي...
هما الزوز قالوا: وعليكم السلام..
نسيبه اضايقت انه ماردش عليها بس عاطياته عذره..
حركت السيارة بإتجاه الزنقه...
وخليل قعد يمشي بدون مايشبح للسياره..
بعد ماخشت للزنقه...هو وصل في الورشه دخل طاسة الشاهي بعدين طلع ونزل السرانتي ..
وبعدين مشي بطريقه للمسجد...
..........
نسيبه:خل نوصلكم ونولي للمزينه نعطيها باقي فلوسها..
وصلت لفم لحوش...
دخلت بنات خوها...وبعدين ولت لسيارتها..
ركبتها ومشت بيها لحوش المزينه...
■في حوش المزينه...
"السكوتي تحته كوتي حبيبتي...انتي تعرفي اني علاش اطلقت...ع خاطر اخت الدكتور هيثم اللي اسمها نسيبه هادي"
المزينه بصدمه:نوسه! علاش شن دارت؟
ملاك:لفت ع خليل لين طيحاته وخلاته يطلقني..
المزينه:نوسه وخليل!؟ ضحكت وقال...نوسه تلف واطيح وكيف نوسه اطيح لا وخليل فوقها!؟
ملاك:اهو عندك سجى واسأليها..
سجى بتهكم:العيله كلها عندها فيه مش بس نوسه هادي اللي كانت تلف على خليل...حتى الفرخه سارة حاطه رفيق في راسها ريتها بعيوني وهي تحاول معاه لولا اني مش محرصه ع راجلي وهو بسلامته يحبني ومايشوف معاي حد راهو صار فيا زي ماصار لملاك..
المزينه وهي مصدومه:والله قريب ننشل من اللي نسمع فيه! معقوله!؟
ع جية اخت المزينه الصغيره قالتها:نوسه جت تبيك برا..
ملاك وسجى وجوههم تغيرت..
المزينه:قوليلها تخش..وشبحتلهم...
ملاك:مازال قاعده تتعاملي معاها؟
المزينه:بعد اللي سمعته مستحيل..
شويه وخشت نسيبه وهي تقول:السلام عليكم...انخفضت نبرتها لما شافت ملاك وسجى..
المزينه وهي تشبح لنسيبه من فوق للوطا:خير..
نسيبه وقفت وهي عاقده حواجبها وقالت:جاية نعطيك باقي الفلوس..
المزينه:لا صحيتي مسامحاتك فيهم..واني من اليوم بطلت خدمه معاش نبي نخدم في الحوش مانبيش ندخل فيه كل مو هب ودب .
نسيبه بصدمه:شن قصدك؟.
المزينه:اللي فهمتيه..
نسيبه شبحت لملاك وسجى بحده..
وهما يشبحولها من فوق لتحت...
نسيبه شبحت للمزينه وقالت:ايه عندك حق...من هب ودب زي اللي مقعمزين حداك توا مايشرفوش اي حوش يخشلهم ولايشرفني اني نتعامل مع حد يتعامل معاهم..
ولوحت الفلوس في وجه المزينه ولفت بتمشي..
المزينه:هدا شنو!؟.
ملاك:ان لم تستحي فأفعل ماشئت..
هني نسيبه وصلت عندها حدها..
غمضت عيونها بشده بعدين فتحتهم ولفت ومشت بسرعه لملاك...
جبدتها من شعرها ونوضتها وعطتها كف..
عيطوا سجى والمزينه..
ملاك جت بترد الكف لنسيبه ماخلتهاش...وطاحت فيها ضرب..
والمزينه جت تحز ..وخشوا خواتها وامها يحزوا...وسجى جبدت روحها ومشت طلعت من الحوش..
وماحزوها من نسيبه الا بالسيف..
نسيبه وهي تتحلف:وربي مرة تانيه نكسرك تكسير..
ملاك وهي تبكي:بري يافورتيه يامسترجله..
نسيبه وهي تشوفلها بإزدراء:نعجة بكايه...
ودفت اللي كانت شادتها ومشت..
ملاك قعدت تلبس في وشاحها وهي تقول:والله لمانمشي نشكي فيها هالحقيره تو نوريها...
ومشت بسرعه..
والمزينه وخواتها وامها يشبحولها..
امها:اخر مرة نماذج هادي تخش الحوش ولا والله معاد مخلياتك تخدمي..
المزينه بخوف:حاضر يام حاضر...
......في حوش الكاتب.....
خشت نسيبه للحوش وخبطت بابه بالقوة..
ع طلعة سارة من دارها بعد ما كانت تصلي سمعت تقربيع الباب...
طلعت من ممر الدار شافت شكل عمتها وكيف بادي ع وجهها الغضب....
سارة:خيرك شن صاير!؟.
نسيبه بغضب:الوضيعه اللي اسمها ملاك..
سارة:اللي كان واخدها خليل؟
نسيبه:اللي كان واخدها الزفت..تمشي وتهدرز بينا شكلها والله اعلم شن تقول للناس عليا اني بالذات...حاطتني في راسها الندله...شن دخلي اني شن داخلي كان هو مايبيهاش!؟
شن ذنبي اني كان هو زي الغبي يجري في جرة وحده عمرها ماحتشوفله...يااه قداش نكرهه البنادم هدا قداش نكرهه..
وهو مايبيش يشوف اني كارهاته قاعد عنده امل من يجيب فيه مش عارفه...
قالت كلامها هدا ودموعها تنزل..
وسارة تشبحلها بحزن ع حالتها...
فجأة...
انفتح باب الحوش الدخلاني..
التفت نسيبه وقعدوا يشبحوله هي وساره...
خش هيثم وهو يشوف لنسيبه وحواجبه مرفوعات...
بعدين سكره وقعد واقف يشبحلها....
وهي تشبحله بصدمه ومش قادره تتحرك...
هو تنهد بعمق بعدين عقد حواجبه وقال
" كنتي..تتكلمي على خليل!؟"

....يتبع......