البطل المغمور "شمس الغروب"

الجزء الثالث والعشرين

💐..
في ماليزيا..
الدوله اللي اختار عادل يسافر لها هو وزوجته الجديده رتاج..
كانت ماشيه جنبه وهي لابسه فستان واسع ملون ووشاح ملون بأحد الوان الفستان...
وهو لابس قميص ازرق باهت مع بنطلون جينز ازرق غامق يحاول يصغر فيهم سنه شويه بحداها..
كانوا يتمشوا الزوز...هو يهدرز وهي تسمعله..
عادل:ياستي بنت عمي..او بالأصح بنت عم بوي..خطبوهالي بدون مايرجعولي اساسا..روحت من طرابلس للبلاد بعد كملت دراستي الجامعيه لقيت روحي خاطب..ضحك ضحكه خفيفه وقال..ماكنتش نقدر نخالف بوي هو هكي يبي..وطبعا طاعتي ليه مش خوف..كنت نحبه هلبه ومانقدرش نراجعه في اي شي يديره حتى لو كان يخصني..
ورتاج تسمع فيه بإنتباه وتشوف لتعابير وجهه وهو يتكلم..
تنهد وقال:درت مايبي وتزوجت بنت عمي..ربي فوق مني..المراة ماقصرتش في حقي بكل..لكن اني ماقدرتش نحبها..ع قد ماحاولت ماقدرتش..وهي ماكانش هامها المهم عايشه ومرتاحه وكل ماتبي يوصلها..جبت منها 3ولاد وبنت..
الزوز الكبار زوجتهم..وخوهم اللي بعدهم طلع برا يقرا..والبنت السنه هادي شهاده ثانويه..
رتاج وقفت وهي تقول:شن اللي خلاك تزوجت بعد العمر هدا كله؟
وهو وقف وشبحلها بإبتسامه:بعد وليت اب كان همي صغاري وبس..بعد كبرتهم..التفتت لنفسي وقلت عيش شويه فهالدنيت ياعادل قبل تموت..مشيتلها طول وقلتلها..طبعا هي قلبت الدنيا ع راسي..لكن بعدين رضخت للأمر الواقع عارفه ان نويت واني كان نويت حاجه نديرها..
رتاج:وبوك؟.
عادل بضحكه:بوي متوفي من خمسة سنين الله يرحمه..
رتاج:الله يرحمه...باهي وصغارك؟
عادل شبح القدام وقال:الولاد مادوروش لكن البنت خدت مني موقف..
رتاج هني اذكرت روحها كيف زادت كرهت بوها لما بدي ياخد على امها..وخطرت عليها معاملتها لماجده..
ابتسمت بتهكم وقالت:حتى اني كنت زيها..وسبحان الله...تنهدت وسكتت..
عادل شبحلها وقال:رتاج..نبيك تجاوبيني بصدق..شن اللي خلا بوك يعطيك لواحد في عمري؟!
رتاج بنفس الابتسامه:سؤالك هدا فيه اهانه..
هو عقد حواجبه وقال:اهانة شني؟!
رتاج:قصدي واضح علاش..الا لو انت شاك في شي..
ابتسم وهو يحرك فراسه يمين ويسار:لالا ابدا..اللي في بالك مش فبالي نهائيا..بس اني مستغرب..يعني..عقد حواجبه تاني وقال..نعرف مجيد اني وسامحيني فيها يحب الفلوس..لكن ماكنتش نحسابه لهالدرجه..تنهد وقال..بصراحة اكثر...اني قلت في عقلي..ان يعني ممكن يكون في حد في يعني...
رتاج تشوفله وشبه فهمت قصده..
عادل تنهد تاني وقال:مرات يكون عارف ان في حد فحياتك وهو عطاك بسرعه بش مايصير شي بعدين فهمتي عليا؟
رتاج خافت من كلامه والخوف خلاها تلقائيا ترد عليه:لالا مافي شي من اللي فبالك بكل..غير اللي قلته في الاول..ان بوي يحب الفلوس..ونزلت عيونها وهي محرجه وخايفه..
هو ابتسم وقال:ارفعي راسك رتاج..
رفعت راسه وشبحتله ودموعها نزلوا..
هو وجعه قلبه عليها..مسحلها دموعها وهو يقول:خلاص خلاص..نصكروا ع المواضيع هادي لا وقتها ولامكانها..
ابتسم تاني وقال...جايبك هني نبيك تدهوري وتنسي كل شي..
خدي يدها وقال..جيت هني مرتين..تو نخدملك دليل سياحي ونعرفك على البلاد هيا بكل شي فيها..
ومشي بيها وهي ماشيه معاه وطول ع وجهها ارتسمت ابتسامه من بين دموعها..
وهو فعلا قعد يعرف فيها ع المكان اللي هما فيه ويحكيلها ع المواقف اللي صارتله اول مرة لما جي لماليزيا اللي كان اغلبها طريف..
وهي تضحك...
كل مالها تزيد تحس معاه براحه..لكن مش قادره تطمن ع الآخر...طبيعي جدا..الوضع كله من بدايته مايبعتش ع الطمأنينه...راجل متزوج..صغاره كبار...ومرته رافضه زواجه...!
•••••°°°°°••••••°°°°°°•••••
في المدرسه..
مقعمزة في الممر تتصفح في الفيس بتليفونها..
ع جية ابله وقفت عليها تقول:ابله نسيبه في ولي امر يبيك لوطا...
قامت عيونها وشبحتلها..بعدين قالت..ولي أمر..اممم...
ناضت وهي تقول....ولي امر...شن يدير بأبلة الاشراف ولي الأمر!
الابله بضحكه:الله اعلم..لكن تبي الحق ماشاء الله عليه..
هي ابتسمت ع جنب وهزت راسها بإيجاب وقالت:اممم..اممم..
ومشت للدروج ونزلت..والأبله وراها..
لما وصلت لوطا...
شافت ولي الأمر اللي يراجي فيها ابتسمت بتهكم وقالت في نفسها"توقعته مايعديهاش هكي"..
مشتله..
وهو واقف يشوفلها من ورا النظارات وحاط ايديه ورا ظهره..
وصلت فيه وهي تقول:تفضل نتكلموا برا..
هو هز راسه بإيجاب ومشي طلع..
وهي طلعت وراها..
قعدوا يمشوا لين وصلوا في الساحه..
وقف وهي وقفت..
نسيبه بجديه:تفضل..
راجح ابتسم وقال:السلام عليكم..
نسيبه:وعليكم السلام..
راجح:اول شي كيف حالك وحال الدكتور والاهل..
نسيبه:الحمدلله..ولو سمحت خش في الموضوع طول..ولااني تو نبدا بيه مافيش مشكله..بصدق وبصراحه..اني من البدايه كنت مترددة واساسا مش متقبله الموضوع..وفي الوقت الحالي ظروفي ماتسمحليش اني نفكر بنفسي ولابأي شكل..صغار خوي توا عندي فوق كل شي..
راجح:اها يعني انتي رافضه الموضوع من اساسه!
هزت راسها بإيجاب..
راجح:امممم..
نسيبه:في حاجه تانيه؟
راجح تنهد ونزل عيونه شبح لكندرته بعدين رفع راسه وشبحلها وقال:في اني حنحاول مرة واتنين وتلاته..
نسيبه بتحدي:وحنرفضك مرة واتنين وتلاته..
راجح بضحكة تعجب:انتي شكلك واخده موقف!
سكتت نسيبه وهي معصبه وغيرت عيونها عنه وقالت:هدا اللي عندي..
ومشت وخلاته...
فاللحظه نفسها..
كان جاي خليل بعرفة متأخر للمدرسه نزل بيه من السيارة وخش معاه داخل بش يكلم الاداره..
ولما وصل في الساحه..
شافهم...
نسيبه وهي ماشيه سمعت حركه..شبحت يمينها..
شافاته...
وقفت في مكانها لوقت مايتعداش الخمس ثواني لانها فيسع اذكرت وجود راجح بعدين مشت وخشت بسرعه وهي مرتبكه..
خليل وهو عاقد حواجبه شبح لراجح ع جنب من فوق لتحت..
بعدين غير عيونه عنه وكمل طريقه لداخل..
وراجح يشبحله بحده..ضم شواربه لداخل بعصبيه..
بعدين مشي..
....داخل.....
"لو سمحتي ياأبله"
نسيبه تماسكت وتمالكت نفسها..وقفت..
والتفتت..
هو جاها مع عرفه ووقف قدامها بمسافه وبدي يكلم فيها بدون مايشوفلها:كانت عنده مراجعه اليوم رفعته عاينته..
ومدلها ورقة المراجعه..
نسيبه شبحت لعرفه وقالت:لاباس عليك عرفه..
عرفه:لايوريك باس ياأبله..
مدت يدها وقالت:هي تعال معاي...شد عرفه فيدها..
ومشوا مع بعض..
وخلوا خليل بروحه واقف ويده ممدوده..
قعد يشوفلها برفعة حواجب كيف تركب هي وياه الدروج وهما يهدرزوا وعرفه مرة مرة يضحك..
لين ادرقوا من قدام عيونه..
هو ضحك نص ضحكه بعدين حرك راسه يمين ويسار وقال:لاحول ولاقوة الا بالله..
ولف ومشي..وسرعان ماارتسمت ع وجهه ملامح الحده لما تفكر وقفتها مع راجح..وقعد يتسأئل شن كان يبي فيها بعد مارداته!؟..
عجن الورقه متاع المراجعه بيده وهو يغلي من داخل غضب وغيره..
••••°°°°•••••°°°°°•••••
بعد ماروحت من المدرسه..
وبدلت حوايجها...وصلت صلاتها..خشت للمطبخ بدير الغدي..
وهي معلقه في وذانها السماعات...والتليفون كان في جيب البيجامه...
سارة وهي تحرك في الطنجره..
¤إن الابرار يشربون من كأس كان مزاجها كافورا¤عينا يشرب بيها عباد الله يفجرونها تفجيرا¤
تنهدت وقالت..ربي اجعل امي منهم..ياربي اجعل امي منهم..اجعل امي منهم..
🌷وكملت مراجعه السورة وهي اطيب لين كملت..
بعدين مشت قعمزت ع التلفزيون..
قعدت تقلب في القنوات المحليه بش تشوف الأخبار..
شويه قابلها في وحده من القنوات شريط خبر عاجل..
<<استقالة وزير الصحه هيثم الكاتب من منصبه..وتولي وكيل الوزراة مصطفى ارحومه المنصب لفترة مؤقته لتسيير الأعمال>>
ناضت من مكانها وهي مصدومه...طلعت تليفونها من جيبها وفتحت الفيس..
لقاته مقلوب قلب بخبر الاستقاله..وردود افعال الناس كلها كانت تعبر عن صدمتهم بالخبر...
ومن مالاحظش التغيير الكبير اللي طرا على قطاع الصحه بشكل عام في وجوده...
حتى في التصنيف العالمي البلاد رقي ترتيبها خلال عشر شهور بس من استلامه للمنصب...يعني لو كمل فيها سنينه الأربعه شن كان دار...!؟
دموعها نزلوا تلقائيا وهي تشوف في كلام الناس عن بوها..
كان كله كلام مشرف ويخلي اي بنت تفتخر بهكذا اب غصب عنها..
فجأة..
انفتح باب الحوش الخارجي..
شبحت للروشن..بعدين مشتله طول..
وقفت فيه..وشافت سيارة بوها خاشه...
درس..ونزل منها...ونزل شنطته وبعد صكر بابها..
مشي طول لباب الحوش الدخلاني..
هي وخرت عن الروشن..وقعمزت ع الكنبه اللي تحته..
انفتح باب الحوش..
وخش وهو يقول:بسم الله...السلام عليكم..
شم ريحة التطييب..ابتسم لااراديا..نفس ريحة تطييب اسيمه بالزبط..
صكر الباب ومشي حدا المدخل..رمي كندرته...بعدين كمل طريقه..
وصل في الكوجينه شاف جيهتها لقاها فاضيه..
شبح ايساره..جو عيونه في عيون سارة..
ابتسم وقدمله..لين خش الصاله وقف وقال:السلام عليكم..
سارة وعيونها معبيات دموع قالت بصوت مبحوح:وعليكم السلام..
هيثم:شن غدانا؟.
سارة:احمم..كسكسي..
هيثم:حلو..
نزلوا دموع ساره..
هيثم عقد حواجبه وقال بقلق:خيرك تبكي!؟.
شبحت سارة للتلفزيون..وهو شبحله..شاف الخبر..
ابتسم برفعة حواجب وقال؛كبيرة عليا المسؤولية هادي ماقدرتهاش سيبتها...وشبحلها..
سارة مسحت دموعها وقالت:شن بدير توا؟.
رفع ايديه الزوز افقيا وقال بضحكه:مش عارف..نزلهم وقال..بعدين تو نعرف ان شاء الله..غير نرتاح شويه..اسبوع اتنين تلاته شهر..إلى أن يشاء الله..
وساره تشبحله بحزن..مركزة ع الدموع اللي حابسهم بقوة في عيونه وكان يدرق فيهم بإبتسامه حلوة بس مزيفه..
هيثم بإبتسامه:اشقي بغدانا راهو جعااان موت..
ولف ومشي لممر الديار وخشله..
سارة بعد مشي قالت بصوت مخنوق:بعيد السو عليك..
وشبحت للكوجينه ومشتلها طول...
🍁اول حاجه دارها هيثم بعد بدل حوايجه..
توضا..وقعمز في داره وفتح المصحف وبدي يقرا في سورة آل عمران..
كان يبي يعبي وقود..طاقه..قوة...وهو يقرا فيها كان هايم في عالمها هي وبس...
وماحسش بروحه الا وهو واصل في اخرها..
¤ياأيها الذين أمنوا اصبروا وصابروا ورابطوا واتقوا الله لعلكم تفلحون¤
وقف عند الآية هادي هلبه وحس ان الله سبحانه وتعالى يكلم فيه هو مباشرة..
اصبر ياهيثم..وصابر ياهيثم..ورابط باهيثم عند ثغر عيلتك وصغارك...واتقيني فيهم..لعلك تفلح ياهيثم...
▪▪▪▪
◇القرآن مش بس صالح لكل زمان ومكان..القرآن وهادي اعظم معجزة في نظري..انه يخاطب بقوة الجانب النفسي والعقلي لكل مخلوق..يعني الواحد شن ماكانت حالته..مهموم..حاير..حزين..عاجز..مريض..حتى لو كان سعيد ومرتاح..لما يفتح كتاب ربي ويقراه بعقل قلبه..مش قرايه وخلاص..حيلقى ايه تخاطبه..ياتخفف عنه..ياطلعه من حيرته وادله..يا انها تلهمه الشكر والحمد ع النعمه بش ماتزولش..
اني بعد هالعمر..لقيت انه اعظم ربي انعم بيها ربي عليا وعلى الناس جميعا..القرآن...
▪▪▪▪▪
القرآن اللي بدوا يعاملوا فيه الناس معاملة الحلوى اللي ماتتاكلش الا في رمضان"عسله وزلابيه" ينقرا بس في رمضان وباقي العام يقعد مركون...
ربي نزله بش يكون للبشر منهج حياه..دليل للناس بش يعيشوا صح في الأرض..
يعني لما نشروا اي جهاز جديد لازم يكون مرفق بدليل يورينا كيف نركبوه....وكيف نستعملوه...
في الطرقات..لازم تكون في لوحات ارشاديه توري الناس اللي تسوق طريق الوجهه متاعهم..بش يوصلوا فيها...
هدا هو القرآن...بش نعيشوا الحياة صح لازم نقروه بعقول قلوبنا ونفهموه صح بش نعيشوا صح...
القرآن دليل..ومرشد..القرآن مربي ومعلم..القرآن طبيب..القرآن مستشار.. القرآن منهج حياة...منهج لكل الحياه..
وحني اتخذناه مهجورا..مركونا...في اللي حاطه في حوشه للزينه زيه زي التحف والمزهريات...ولما تعامل القرآن هالمعامله...
وصلنا لهالحال اللي حني عليه...
الخيانه...القتل.. السرقه..اكل اموال الناس بالباطل..الافتراء..القطيعه...الزنا...وغيرهم من البلاوي في منه ماينقالش..
والنتيجه..حروب..اوبئه..حرائق..وغيره...
ومن يهمل الدليل حيسيء الاستعمال..وحيفسد...
الله يرحم حالنا....!
••••••°°°°°°•••••••
خش للكوجينه لقاه كملت تجهيز الطاوله..
ابتسم ومشي قعمز ع الكرسي..
هي مشت قعمزت ع كرسي امها...
هيثم:بسم الله..خل نشوفوا ابداعات سارة هانم..
وبدي ياكل..
هي ابتسمت ابتسامه خفيفه وبدت تاكل..
هيثم:اممم..حلو..حلو..الله يبارك..
هي قعدت تاكل وتشبحله..
قعدوا ساكتين وهما ياكلوا للحظات..بعدين قال هيثم..
هيثم:امم..شن صار في كورس الاتجليزي؟ سجلتي؟
سارة:امم..بنفوته السنه هادي..نبي نتفرغ للقرايه..وان شاء الله في الصيف تو نسجل..
هيثم:كويس..
ورجعوا ياكلوا في صمت بعدين هو قال..
هيثم:خواتك حفظوا التشهد؟
ابتسمت ساره وهي تاكل بعد بلعت قالت:ايه..صبح وليل يسمعوا فيه على عمتي..
ابتسم هيثم وقال:كويس..
ورجع الصمت ساد بيناتهم...لين كمل هيثم..
سارة:نزيدك؟.
هيثم:لالا الحمد لله بنتي هكي ساد..
ناض وهو يقول: كان معاش تبي بري اقري وخليني اني نكسد ع الماعين..
سارة وهي متفاجئة:لالا عادي نغسلهم مش هلبه هما..
هيثم :لالا خليني نشغل روحي بيهم شويه..لازم نتعود ع حياة البطاله شويه..
سارة بضيق:بطاله؟.
هيثم بضحكه:ايه بطالة هالشهر..عندك علم هادي اول اجازة ناخدها في حياتي غير الاجازات الرسميه طبعا..
سارة:ايه واضح اصلا..
ضحك هيثم وخدي صونيته ومشي بيها للاوندينو..
وهي تنهدت..بعدين ناضت وهي تقول؛كان تبي حاجه ناديني..
هيثم وهو يغسل:تمام..
هي لفت بتطلع..بعدين وقفت والتفتت لبوها وقالت:مافيش اخبار عن زياد؟.
هيثم تنهدت وهي يكد في الماعين وقال:اليوم ع الأكيد حيجيني شي عن مكانه...
سارة هزت راسها بعدين لفت بتمشي..
هيثم:حنلقوه يابابا حنلقوه بإذن الله ونرده للحوش..
سارة بحزن:ان شاء الله...ومشت طلعت من الكوجينه..
وخلت بوها يرجع لحالة القلق الشديد على خوها..
•••••••°°°°°°•••••••°°°°°°°••••••
الساعه الخامسه عصرا...
"السلام عليك ياأيها النبي ورحمة الله وبركاته..السلام علينا وعلى عباد الله الصالحين..أشهد أن لاإله الا الله وحده لاشريك له..وأشهد ان محمد عبده ورسوله..."
ونسيبه تسمع فيهم وهما يسمعوا عليها وهي تسوق..وعرفه اللي كان مروح معاهم يشبحلهم..
بعد كملوا قالت نسيبه:لاتمام..حفظتوه صم صم..
ضحكوا...وجنان قالت..
جنان:يارب بابا يولي فاضي بش يعلمنا...
نسيبه:تو نعلمكم اني...
ريحان:نبوا بابا حني..
نسيبه تنهدت بقلة حيله وقالت:ان شاء الله يولي فاضي..
ووخشت بالسيارة للزنقه...
وصلت في حوش خالد..
درست وقالت لعرفه:استنى ننزل معاك..
كانت تبي متأمله تشوف عفاف وتصلح علاقتها بيها بعد اللي صار اخر مرة..
وصلوا في الباب طقت نسيبه..
وطق معاها عرفه...
لحظات وانفتح الباب..واللي فتحه ماكانتش عفاف..
بل...ملاك..
اللي لما شافت عرفه مع نسيبه رفعت حاجبها وهي تقول:خيره خليل ماروحش بيك؟
نسيبه:مادام ع طريقنا وجيران علاش اني مانروحش بيه!؟.
ملاك شبحتلها بإزدراء وقالت:والله اني ماسألتكش انتي..
نسيبه رفعت حاجبها وقالت:خيرك تدوي معاي هكي!؟
ملاك بتصنع الخوف:يامامي!! هدي ياوحش هدي..اذكري مرة مرة انك انثى..
رفعت نسيبه حواجبها وهي مصدومه في اسلوب ملاك الوقح معاها..
وملاك جبدت عرفه وقالت:تعال خش واخر مرة تركب مع حد من الشارع..
ودخلاته وسكرت الباب بقوة في وجه نسيبه..
اللي قعدت واقفه تشبح للباب بصدمه..وعضلاتها تشنجت من الغضب..كورت قبضه يدها بقوة...بعدين لفت ومشت ركبت السيارة وهي معصبه..ووخرت بيها بسرعه لحوش خوها..
••••°°°°•••••°°°°°•••••
"هاه شن عنده مسك الختام من سؤال"
خليل ابتسم وقال:هو محرج شويه..
الشيخ:لاحرج في الدين ياولدي اسأل وماتتحشمش..
خليل تنهد وقال وجهها بادي يكتسي باللون الاحمر:توا ياشيخ يعني...في الدين..الحب حرام؟
الشيخ ابتسم وقال:الدين اساسه الحب ياولدي..قل ان كنتم تحبون الله فأتبعوني يحببكم الله..
ابتسم بإحراج وقال:مش هدا قصدي..
الشيخ بضحكه:عارف وفاهم قصدك..واني قتلك ان الحب شي كبير وطاهر وحلال..لما يكون في طريق الصح..في طريق اتباع الصادق المصدوق..وطاعة الرب المعبود..
خل نحكيلك قصة صايرة زمان في عهد الرسول..
هدا ياسيدي كان في عبد سماه مغيث وآمه سماها بريرة كانوا متزوجين..ومغيث هدا يحب بريره حب ماصارش زي مانقولوا..طلبت بريره من المولى متاعها الراجل اللي يملكها انه يعتقها..عتقها..واول حاجه دارتها بعد ماولت حرة هي انها اطلقت من راجلها..لانه قاعد عبد والحرة ماتتزوجش عبد..بعد الطلاق زي مانقولوا الراجل قريب خش في عقله وطلع ماقدرش يعيش من غيرها..كان يلحق فيها من تركينه لتركينه وهو يترجى فيها ترضى توليله..وهي شي..
والناس غادي وقتها كانوا شاهدين ع حبه ليها والعذاب اللي تعذبه بعد خلاته..
تنهد خليل من قلبه بحزن..
ابتسم الشيخ وكمل يقولوا..المهم ياسيدي في مرة كان الرسول ماشي هو وابن عباس شافوا مغيث يمشي ورا بريره وهو يبكي لين دموع بلت لحيته وهو يترجى فيها توليله..
مشي الرسول قال لابن عباس..
"ياعباس الاتعجب من حب مغيث لبريرة ..ومن بغض بريرة لمغيث!"
المهم...الراجل هدا لما فقد الامل مشي للرسول وطلب منه يكلمها..
فالرسول كلمها وقال"لو راجعته"..يعني لو توليله ..
ركز وشوف هي شن ردت قالتله"اتأمرني؟"
يعني لو كان امر من رسول الله حتنفد بدون تردد..
الرسول رد عليها وقال"إنما انا اشفع" يعني نبي نشفعله عندك بس..
هي ردت وقالت"لاحاجة لي به" يعني مانبيشي..
وقعد مغيث مسكين يعاني من عذاب الفراق..
خليل:يعني هكي نهايتنها مارضتش بيه!؟؟
رفع الشيخ حواجبه ونزلهم وهو ضام شواربه لداخل بأسف..
ارتسمت ع وجه خليل ملامح الاحباط وهو يقول..معناها بيصيرلي زيه..
الشيخ بضحكه:وعلاش!؟
خليل:حالي يشبه حاله..
الشيخ ابتسم وقال:اطلبها من ربي..
خليل:طلبته منه..
الشيخ:الح عليه هو بالطلب مش هي..
خليل عقد حواجبه وهو يفكر في كلام الشيخ..
الشيخ:واعرف ياولدي لو فيها خير ليك ربك حيخليها من نصيبك لو شنو يصير..ولو مافيهاش خير ليك ومش من نصيبك مش حتاخدها لو شن ادير..ماتعلقش قلبك بمخلوق بش ماتتعذبش ياولدي....
خليل نتنهد وغمض عيونه وفتحهم وهو يقول:ان شاء الله...
••••°°°°°••••°°°°°••••
فرش صلايته في الصاله..
وهما فرشوا صلايتهم الصغيره جنبه..
ووقفوا عليها وهما لابسين ملايات لونها وردي صغيره الحجم ع مقاساتهم وكان منظرهم قمة في اللطافه..
وعمتهم واختهم مقعمزات وراهم ع الكنبه يتفرجوا والابتسامه تعلو وجوههم..
هيثم:مستعدين..؟.
الزوز قالوا:ايه..
هيثم خدي نفس وقال:ترا غمضوا عيونكم وتخيلوا..
غمضوا عيونهم هما الزوز..
وسارة ونسيبه منتبهين معاهم..
هيثم غمض عيونه وهو يقول:ان حني توا في الجنه...اشجار خضرا كبيره وحلوه...انهار طويله ميتها صافيه تلمع...عصافير ملونه بألوان حلوة اطير.....
ابتسموا سارة نسيبه..
هيثم:قدامكم...الكعبه...اللي نشوفوا فيها التلفزيون اللي تصلي حواليها الناس..
ريحان:ويدوروا عليها يقولوا لبيك اللهم لبيك..
ابتسم هيثم وقال:ايوه هي هادي..هادي القبله متاعنا..هادي اللي لازم نصلوا في اتجاهها..
جنان:ايه..مرة جتنا مراة قالت لماما وين القبله اسيمه..ماما قالت جيهة الحيط..نحساب الحيط قصدها..
ضحكوا سارة ونسيبه وعيونهم تعبوا دموع..
هيثم بإبتسامه:لا ماما كانت تقصد الاتجاه متاع الكعبه..
ريحان:باهي كيف اتجاه الكعبه؟
هيثم:بعدين نقوللكم كيف..تو نرجعوا للعالم الحلو اللي كنا فيه...شن هو؟.
ريحان:الجنه...
جنان:والكعبه قدامنا...
هيثم:وربي فوق يشبح فينا...ويسمع فينا...
فتح عيونه وقال:افتحوا عيونكم...
فتحوا عيونهم..
هيثم:ارفعوا ايديكم زي مااني توا رفعتهم..
شبحوله..كيف رافع ايديه..شبحوا القدام ورفعوا ايديهم زيه..
هيثم:قولوا...الله أكبر..
البنات الزوز قالوا:الله اكبر..
هيثم:بعد ماتقولوا الله اكبر..تنزلوا وتحطوهم ع صدركم من فوق زي توا..
هما شبحوله...وقلدوه..
هيثم شبحلهم وقال:تمام..اول بعدين يجي وقت صلاة المغرب..وصلاة المغرب كم ركعه؟
الزوز قالوا:تلاته..
هيثم:تلاته...في كل ركعات الصلاه لازم نقروا الفاتحه..وفي صلاة المغرب..اول ركعه..نقروا فيها الفاتحه...وبعد الفاتحه..سورة تانيه...شن تحفظوا من القرآن؟
جنان:الاخلاص..
ريحان:الفلق والناس..
جنان:الكوثر..
ريحان:العصر..
هيثم:كويس...في اول ركعه..بعد الفاتحه اقروا سورة وحده من اللي تحفظوهم...بعد تكملوا...
قولوا...الله اكبر...وانزلوا لوطا هكي..وركع..
وهما شبحوله وقلدوه..
في الركوع نقولوا...سبحان ربي العظيم...سبحان ربي العظيم..سبحان ربي العظيم..تلاته مرات..لما نركعوا شن نقولوا..
الزوز مع بعض:سبحان ربي العظيم..سبحان ربي العظيم سبحان ربي العظيم..
هيثم:ممتاز..بعدين نرجعوا نوقفوا ونقولوا..سمع..الله..لمن حمده..ورجع وقف ع حيله..
هما قلدوه وقالوا:سمع الله لمن حمده..
هيثم :وقولوا بعدها..ربنا ولك الحمد..يعني سمع الله لمن حمده ربنا ولك الحمد..معناها ان ربي يسمع دعاء اللي يقول ربنا ولك الحمد..وتوا لما نوقفوا من الركوع شن نقولوا..
جنان وريحان:سمع الله لمن حمده..ربنا ولك الحمد..
هيثم بإبتسامه:ممتاز..الله يبارك..وتوا نقولوا الله اكبر و ننزلوا لوطا هكي...
ونزل وسجد...وهما قلدوه...
هيثم:ايديكم جنب وجهكم..الخشم يمس الارض..صوابع رجليكم تمس الأرض..
داروا زي ماقال بالزبط..
هيثم:وتوا نقولوا في السجود..سبحان ربي الأعلى ..سبحان ربي الأعلى..سبحان ربي الأعلى..شن نقولوا؟
جنان وريحان:سبحان ربي الأعلى..سبحان ربي الأعلى..سبحان ربي الأعلى...
هيثم:ممتاز الله يبارك...وتوا نوضوا وحني مقعمزين...ناض وقال...الله أكبر..
ناضوا البنات وهما يشوفوله..وقلدوا مادار..
هيثم:نقعدوا شويه..بعدين نقولوا الله اكبر ونرجعوا ننزلوا مرة تانيه...
قلدوه ودارو زي مادار..
هيثم:ونقولوا زي ماقلنا في الأولى..سبحان ربي الأعلى تلاته مرات..
بعدين نرفعوا روسنا ونوقفوا...وناض وقف وهو يقول الله اكبر..
وهما قلدوه....
وعاود نفس الكلام مرة تانيه ووزاد رسخ المعلومات في راسهم..لين وصلوا للتشهد الاول..
هيثم:توا وانتم تقولوا في التشهد..تخيلوا رواحكم تكلموا في الرسول محمد....من هو ؟
جنان:الرسول امه امنه وبوه عبدالله وجده عبدالمطلب..
ريحان:وزوجته خديجه وبناته...ام كلثوم ورقيه وزينب وفاطمه..وولاده عبدالله..وابو القاسم..
ضحكت نسيبه..
هيثم بإبتسامه؛وهو اللي عرفنا بربي..وبالصلاه...وشهر رمضان..والعيد..والجنه اللي نخشوها لما نسمعوا كلام ربي وبعدين بابا وماما..وهلبه حاجات حلوة تانيه تعرفوها مع الوقت...المهم توا نقولوا التشهد..لعند عبده ورسوله بس..ركزوا ع صبعي..
شبحوا الزوز لصبعه..
هيثم:اقروا التشهد...
وبدوا البنات يقروا فيه مع بعض..
وساره تضحك...ونسيبه حاطه يدها تحت خدها وتسمع فيهم وهي تضحك..
"عبده ورسوله"
هيثم:تمام...وتوا نرجعوا نوقفوا مرة تانيه ونقولوا الله اكبر..
قلدوه...
هيثم:في المغرب..الركعه الاولى والتانيه نقروا بصوت عالي شويه..اما الاخيره هادي...نقروا في سرنا..الفاتحه بس..بس..
كيف نديروا الركعه الاخيره؟..
جنان:نقروا في سرنا الفاتحه..
ريحان:بس بس..
ضحكوا وهيثم معاهم...وكمل باقي الركعه..
لين وصلوا في التشهد الأخير...قراه هو ياهم كامل..
بعد كملوا..
هيثم:وتوا نلفوا راسنا يمين ونقولوا:السلام عليكم ورحمة الله وبركاته...شن نديروا ونقولوا..
هما قلدوه وقالوا ماقال..
هيثم:تمام..بعدين نلفوا راسنا يسار ونقول..السلام عليكم ورحمة الله...
شبحوله وقلدوه وقالوا ماقال..
هيثم شبح القدام وقال: وهكي كملنا الصلاة..
شبح جيهتهم وقال:هادي صلاة المغرب..
جنان:اممم..
هيثم ابتسم وقال:حفظتوها ولا؟
ريحان:ايه...لكن بابا بنسألك؟.
هيثم:اسألي بابا؟
ريحان:بابا انت قلت لما نقولوا ربنا ولك الحمد ربي يسمع دعائنا باهي امتى ندعوا؟
هيثم:امم..ندعوا لما نسجدوا...لما نزلوا روسنا للأرض بعد نقولوا سبحان ربي الأعلى تلاته مرات..
جنان؛وشن ندعوا؟
هيثم:اممم..ادعوا باللي تتمنوه..مثلا قولوا يارب..نخشوا الجنه...يارب..ننجحوا...
ريحان؛باهي اي شي نتمناه ؟.
هيثم بإبتسامه؛ايه..
ريحان؛معناها ندعي..ياربي رجع ماما..
تلاشت ابتسامة سارة...وتعكرت ضحكة نسيبه..
اما هيثم اللي تقشعر جلده...وقلبه زاد قوة في النبض..
وكاد يفقد السيطره ع دموعه..
تماسك بقوة وقال بإبتسامه مخنوقه:في دعاء احلى من هدا..قولي يارب نعيشوا حني وماما في الجنه..
شبحت سارة لبوها والدموع يلمعوا في عيونها..
جنان:ماما في الجنه توا؟.
هيثم:ادعولها وقولوا يارب تخش الجنه وحني معاها..
ريحان:باهي هي وين...
هيثم:هي في مكان قريب من الجنه تراجي فينا امتى نجوها بش نخشوا كلنا مع بعض..
ريحان:باهي امتى نمشولها..
هيثم بإبتسامه تخفي ألم كبير:في الوقت المناسب حبيبتي..
ريحان:بعد مانكبر؟.
هيثم بضحكه:بعد ماتكبري هلبه ان شاء الله..
ريحان:باهي..
جنان:باهي اني بندعي ربي ونقول...يارب بابا مايموتش..
نزلوا دموع سارة وقلبها انقبض بقوة..
ونسيبه حطت يدها ع قلبها..
هيثم بلع ريقه وحافظ ع ابتسامته بكل قوة وقال:في دعاء مازال..احلى..قولي.. يارب بابا يعيش معانا هلبه..
ارتسمت ع وجه نسيبه ابتسامه ممزوجه بدموع تنزل بإنهمار..
وسارة تشبح لبوها وبس...
جنان:باهي...
هيثم فتح ايديه وقال:تعالوا تعالوا..
ابتسموا الزوز وناضوله خشوا حضنه وهو ضمهم بقوة..
نسيبه بضحكه ودموعها نزلوا:وووك منكم ياعيله شاعريه ..
ضحكوا هيثم وساره وهما يشبحولها...
وهي تضحك بعصبيه مصطنعه وتمسح في دموعها..
▪▪▪▪▪
◇مش عارف كيف كنت عايش بعيد عن هالشاعريه الفريده...صدقا..مافيش احلى من وجود الانسان مع عيلته...العيله..الاسرة..ترابطها الحب اللي بين افرادها..يزيد يقويهم هلبه..ويعطي شعور بالأمان غير عادي..العيله نعمه عظيمه..سبحانه ربي كل نعمه عظيمه من عظمته...
امم..الصلاه..بش قدرت نعلمهالهم بهالطريقه طريقه تناسب سنهم..قريت هلبه حاجات تخص الموضوع وقعدت نخطط لين وصلت لهالطريقه..وعرفت شي جديد مهم جدا...ان الانسان كل مايكبر يتعلم شي جديد عن دينه.... واولهم الصلاة ..وقلت كل مايكبروا بإذن الله حنعلمهم شي جديد يناسبهم..حنزرع حب الصلاة في قلوبهم زرع..وثبت جدورها تثبيت..لين تولي زي شجرة سدرة المنتهى..اللي شاف الرسول الكريم في رحلة الاسراء والمعراج..الرحله اللي انفرضت فيها الصلاة...
▪▪▪▪▪▪
مقعمزين مع بعض في الصلاة وهو يحكيلهم..
هيثم:قبل ليمشي الرسول الرحله هادي...جاه جبريل الملك الأعظم..ملك الوحي..المهم..لما جاه دار شي عجيب جدا جدا بالنسبه ليا كطبيب جراح..
دار عملية قلب مفتوح..بدون بنج ولانزيف ولاالم..
شق صدر الرسول..وطلع قلبه منه..وخداه وغسله بمية من الجنه جايبها في صونيه ذهب..
بعدين رده من جديده ورجع صدره زي ماكان..
وهما يسمعوا بذهول وانتباه..
هيثم:بعدين خداه معاه وطلعه برا وين مافي حيوان اسمه البراق..قريب من الحصان..وكان ضخم هلبه..
ركب جبريل الرسول عليه..
وانطلق البراق بسرعة البرق..هدا علاش اسمه البراق..
لعند ماوصل للقدس..
بعد وصلوا غادي..ربط جبريل البراق..ومشي خش بالرسول داخل..
نسيبه:علاش ربطه خاف يهرب؟!.
هيثم بإبتسامه:تس مش هكي..الحركه هادي بحد ذاتها كان درس من دروس الأخذ بالأسباب..يعني زي عصا موسى اللي خبطت البحر..ربي يقدر يفلق البحر من غير مايخبطه موسى بالعصا..بس دار هكي بش يعلمنا اننا ناخدوا بالأسباب ونتوكلوا على الله في نفس الوقت..
نسيبه هزت راسها بإيجاب..
هيثم:المهم..تلاقى الرسول في المسجد الاقصى..بالانبياء والرسل كلهم 125 الف واحد..
جنان:هلبه..
ضحك هيثم وقال:وتعرفوا شن دار بعدها؟.
سارة:صلى بيهم..
هيثم ابتسم وقال:الصلاة...صلى بيهم..وبعد ماكملت الصلاه..
خداه جبريل..وطلع بيه فوق لرحله المعراج للسماء..ماطارش بيه راه..سبحان الله العظيم..طلع فجأة سلم في السماء من تلاته درجات ركب بيهم الرسول..لين وصل للسماء الأولى..
وفي كل سماء كان يتلاقى مع نبي من الانبياء وكان يوصل من سماء للاخري عن طريق تلاته درجات..لعند ماوصل للسماء السابعه..عند سدرة المنتهى...شجرة كبيرة هلبه هلبه..يعني جذعها ممتد من السماء الاولى وهي مضلله عليهم كلهم...لونها ذهبي يبرق برق...
بعدين خش للجنه الموجوده فيها..وقعد يدهور فيها ويشوف...وهو في قمة الذهول...بعدين طلع منها....
لما جي طالع..شاف وراق شجرة السدره تتلون بألوان مختلفه....الوان مافيش منها فالدنيا..مانعرفوهاش لكنها كانت جميله تخطف البصر والقلب من جمالها..
طلع من غادي الرسول..وفجأة...جبريل بانله بهيئته الطبيعيه هيئة الملائكه..زاد الرسول انبهر وانذهل من هالمخلوق القوي العجيب الجميل...كل شي شافه الرسول كل شي..كان يدل ع حاجتين..عظمة وقدرة الله الذي مازيه شي...
سارة ونسيبه حسوا روحهم في عالم غير هالعالم..
والصغيرات كانوا يتخيلوا وبوهم يحكي..
هيثم:جبريل قال للرسول لما وصلوا للعرش..قدم..
الرسول قدم....
وهني رب العالمين كلمه..
نسيبه:دقيقه..كلمه كلام عادي زي ماكلم سيدنا موسى؟!
هيثم:ع حسب ماقريت لا..وفي من يقول كلمه زيه..
سارة:باهي شافه؟
هيثم:عندك علم حبيبتي سارة وهالمعلومه فاجئتني حتى اني...ربي ماشافه حد حتى الملايكه..
تفاجئوا...
هيثم:المخلوقات كلها كانت اضعف من انها تقدر تشوف ربي..
يعني لما مرة سيدنا موسى من الشوق سأل ربي يشوفه..
قاله..انت مش حتشوفني لكن شوف للجبل اني حنبان عليه لو ثبت في مكانه..حتشوفني..سبحانه العظيم..بان من نوره بس للجبل مش هو بذاته سبحان..شن صار للجبل..انهد..
سارة :سبحان الله!
هيثم:مستوعبين عظمة الخالق هدا...ربي عظيم لدرجة لاتوصف عالي علو كبير...قادر قدرة مافيش زيها..لم يلد ولم يولد ولم يكن له كفوا احد..فوق قدرة العقول..برا الزمان والمكان...ليس كمثله شيء...ليس كمثله شي..خدي نفس وقال..والله مش عارف كيف في ناس ملحده وناس تعبد في البقر والفيران والقروده..والبشر..سبحان الله البني آدم ظلوم وجهول..
سكتوا وهما يفكروا في كلامه..
هيثم:الشاهد..من كلام الله للرسول فرض عليه الصلاه..في الاول كانت 50..لكن سيدنا موسى قنع الرسول في كل مرة يجي نازل فيها يرجع لربي ويخففها..لعند ماوصلت ل5..وقال الله بعدها..اجرهم الخمسه بأجر 50صلاة..
المغزى هني...ان الصلاة الفرض الوحيد الركن الوحيد اللي انفرض فوق في السماء السابعه..
علاش..لأهميتها..لعظم فضلها..لانها الوحيده اللي توصل العبد وهو واقف في مكانه..للسماء السابعه...وتوصله بربه مباشرة...
هدا علاش اللي مايصليش وقع في حكم الكفر..
اللي مايصليش..لايغسل..ولايكفن..ولايصلى عليه...حد ماركعش لله ركعه في حياته كله..علاش يصلوا عليه!! واول مايتحاسب بيه العبد يوم القيامه...هي...
الصلاة...
سارة ونسيبه حسوا برهبة شديده..
لكن جنان وريحان ماكانوش فاهمين هلبه شن قال...
هيثم تنهد وقال:معاش مازال ع الآذان..وقف وهو يقول..ماتبوا شي..
الزوز شبحوله وحركوا روسهم بالنفي ومازالوا متاثرين باللي سمعوه..
ريحان:جيبلنا معاك شكلاطة الفيل..
هيثم بضحكه استغراب:حاضر..وانتم ماتنسوش تتوضوا وتصلوا مع عمتكم..
الزوز :حاضر..
ابتسم ومشي توجه للباب..
وعيون ساره معاه..لين فتح الباب وطلع..
نسيبه ناضت وهي تصفق بإيديها:هي يانوضوا ياقطاطيس جيبوا ملاياتكم وصلاياتكم وتعالوا..
ومشت..هما خدوا حاجاتهم ومشوا وراها يجروا..
وسارة تبع فيهم بعيونها وهي مبتسمه بعدين ناضت وراهم..
••••••°°°°°••••••
■في نفس الوقت..
في حوش خالد..
كان خليل واقف في بداية الصاله وهو مربع ايديه ويتفرج ع التليفزيون..
وفي الصاله..مقعمزين امه واخته ومرته وحناها..وخوه ومرته..متوسطهم عرفه طارح قدامه كتاباته ويتفرج معاهم ع التلفزيون..
كانوا يشوفوا في النشرة خبر استقاله هيثم المفاجئ ويتناقشوا في تداعيات الخبر..
رفيق:راجل باهي جاي يخدم هدا علاش طيروه..
سجى مطت شورابها بإزدراء..
صالحه:كيف ماقلت ياولدي الباهي يقعدوا وراه لين يطيروه..
تهاني بضيق:خسارة اكبر خساره..
ملاك بضحكه:خلاص توا معاش في بو صاحبتي وزير..
ضحكت سجى..
ورفيق شبح لخليل اللي كان يشبح لملاك بحده..
صالحه شبحتلها وفنصت فيها..
سارة:اني بنسكت وندحر الشيطان..
صالحه شبحت لملاك وفنصت..
ملاك بضحكه:نبصروا حبوبه..
خليل بحده:اني طالع تبوا شي؟
ملاك شبحتله بربع عين..
عفاف تنهدت وقالت:سلامتك..
رفيق:ماشي معاك..
خليل مشي..ورفيق مشي وراه..وسجى تشوفله بغيظ من فوق لتحت...
تهاني:ماما ماسمعتك قلتي شي؟
عفاف:ماعندي مانقول يابنتي..الراجل عنده ظروفه..
تهاني رجعت شافت للتلفزيون بحزن وهي ساكته..
•••••°°°°°•••••°°°°••••
"لازم نمشي ياريقا "
عبدالملك:واني قلت توا لا..افهم في جماعه فاتحين العيون علينا وكله منك راهو..
زياد ضيق عيونه وقال:كله مني!؟
عبدالملك:ايه..بوك شكله يدور عليك..ومكلم ناس من الشرطه..
زياد قعد يشبح لعبدالملك بصدمه..
عبدالملك:الحوازة هادي امان بعيده ع العيون ومافي حد يقدر يقربلها لجماعه من فوق..بنقعدوا فيها الفترة هادي لين يفرج ربي...
زياد بتفكير:باهي...لكن لازم نوقف قيدي..
عبدالملك:اوكي لكن فوت هاليومين...
زياد تنهد بعدين حط يده ع شعره ونكشه بعدين نزلها وقال:ماعندك شي نعدل بيه دماغي..
عبدالملك طلع لفة حشيش وعطهاله..
خداها زياد وحطها في فمه...وعبدالملك قربله ولعهاله..
زياد اتكي ع الكنبه وبدي يدخن فيها..
وعبدالملك ناض من حداه ومشي للحمام....
•••••°°°°°•••••••
الساعه الثامنه مساءا...
في الطريق..
هيثم:لالا يانوسه بنعطل شويه عندي موعد ضروري.......ايه توا فجأة...........تمام............وعليكم السلام..
وطفا الزر اللي السماعه اللي في سيارة موصله بالهاتف..
شويه رن تليفون..شاف في الشاشه متاع السيارة لقي المتصل رقم احدي القنوات..خلاه يرن لين فصل..
وعاود رن وهو تجاهله..لين وصل للمطعم اللي بيشوف فيه واحد من ضباط الشرطه...جايب معلومات عن ولده زياد...
درس السيارة ونزل...ومشي خش بسرعه...
•••••°°°°°°••••••°°°°°°••••••
في احدى اسواق ماليزيا..
كانت رتاج تدهور هي وعادل..
كان يحكيلها عن السوق وشن فيه.
وهي تتفرج وعيونها من هلبه حاجات شافتهم..خاطرها تاخدهم لكن ماقدرتش تتكلم..
كانت خايفه تقول نبي هادي ونبي هديكا..وتحصل الرد اللي ياما سمعاته من بوها"كملتوا عليا..مش راقد ع بنك..اطلعي قدامي اطلعي"ولايمشي ويتجاهلها وكأن ماسمع شي..
لين جو عيونها ع عقد لونه بنفسجى غامق يلمع حلو بالمرة برق في عيونها وخطف عقلها...
وقفت وهي تشوفلها..
عادل وقف وقعد يشوفلها كيف تشبحله قال:خيرك؟
هي استاقظت لنفسها وقالت بإرتباك:شي..هي نمشوا..
هو تنهد بإبتسامه وقال:استني شويه..
ومشي خش داخل..
وهي تشبح للعقد وتفرك في ايديها ببعض..
فجأه اختفي من قدامها...قلبها مشي معاه...
لحظات وطلعها عادل...
جاها وهو مبتسم وقف قدامها ولبسهولها وهي متفاجئة ومحرجه في نفس الوقت..
عادل:ماشي مع الالوان اللي لابستيها..واكيد انتي زدتيهم جمال..
ابتسمت بخجل وقالت بصوت يدوب طالع:شكرا..
ضحك وقال:معاش تشكريني..ومرة تانيه اللي يجي في خاطرك اشري عليه..تلقيه قدامك.
رتاج بإبتسامة خجل:باهي..
ابتسم وخدي يدها وقال:هي توا تعالي قالولي في شن جي خاطرك تاني؟
ورتاج مشت معاه وهي تضحك...
وبدت تقوله ع اكثر من حاجه عجبتها وعادل ياخدلها ومش ولاهمه حاجه غير سعادتها...
••••••°°°°°°•••••••
الساعه التاسعه ليلا...
مروح من الجامع ع رجليه للحوش..
كان في الطريق يفكر في موضوع طلاقه لملاك..
اتفق هو وجارهم ع ايجار الحوش ولازم خلال اسبوع ينتقلوا للعيشه فيه..
خليل في نفسه"هكي خير ليا وليها مانبيش نظلمها معاي خل تشوف حياتها"
وهو ماشي..شبح لوطا...شاف شي خلاه يبتسم ع جنب بعدين شبح القدام وكمل طريقه عادي..
لين خش الزنقه...
وقف في نص الطريق وطبس لسبيدروه ع اساس بيساوي الخيط متاعه..
التفت فجأه..
شاف واحد واقف بدايه الزنقه لما شبحله دار روحه يشبح للطريق..
خليل التفت القدام وناض وقف ع حيله..
حط ايديه في جيوب كبوطه وعقد حواجبه وقعد يمشي لين وصل لحوشهم..
فتح الباب وخش وصكره وراه..
وهو يفكر....هدا اللي ليه مده يلحق فيه تابع لمني؟ وشن يبي منه!؟..
خاف من اجابة هالأسئلة...خاف هلبه..ومشي بيخش للحوش وهوويفكر بخوف...
•••••••°°°°°°°°°•••••••
درس سيارته وهو يسمع في أصوات الأغاني العاليه في الحوازة..
نزل منها ومشي وهو يلعب بمفاتيح سيارته..
يسمع في الأغنيه ويرقص وهو يمشي لين وصل في مكان تجمع جماعه الأنس الشيطاني..
شاف واحد منهم قال:جوجااااا..
جهاد رفع يده وقال:بوخاااا..
ضحكوا...وهو قعد يرقص ع الأغنيه وهما يشجعوا فيه...
وهو يرقص كان يمرر في نظره عليهم...لين جو عيونه ع واحد..
مقعمز بعيد شويه فيده شيشه يشرب فيها...
هو ضيق عيونه وبطل رقيص...
واحد منهم شافه وين يشبح قال:صاحب جديد للريقا..
جهاد:من امتى؟.
:ليهم فتره صحبه..
جهاد قعد يشبح للشاب وهو مش مصدق قال...والله الازياد! شن يدير هني!؟
•••••°°°°°•••••••°°°°°••••••
الساعه الحادية عشر ليلا...
مش قادرة ترقد...
ادور في الحوش وهي تستنى في بوها امتى يخش وقلبها مشغول عليه..عطل هلبه..
مش عارفه علاش مش قادره تنسى جزئيه صارت في حواره مع خواتها..
《 جنان:باهي اني بندعي ربي ونقول...يارب بابا مايموتش..
هيثم بلع ريقه وحافظ ع ابتسامته بكل قوة وقال:في دعاء مازال..احلى..قولي.. يارب بابا يعيش معانا هلبه..》
حطت يدها ع قلبها وهي في قمة القلق..
مشت لدار خواتها فتحتها بهدوء..شافتهم راقدات مع عمتهم..
تنهدت بعدين ردت الباب وهي تذكر في قعدوا مصرين يراجو بوهم لين يروح لكن النوم غلبهم زي ماغلب عمتهم ورقدوا هما وياه...
مشت طول للصاله..وقعمزت ع الكنبه..
وبدت تردد...حسبي الله ونعم الوكيل....
الذكر اللي ينقال وقت الخوف وقوع امر ما...
•••••°°°°°°°•••••••
من لما عرف اللي عرفه..
وهو قاعد يدور بسيارته من غير هدف في الشوارع..
قعد يتردد في وذانه كلام الضابط اللي قال فيه
"مع الأسف دكتور تحرياتنا بينت ان ولد حضرتك كان مقيم مع واحد من ابرز مروجي المخدرات في المنطقه في احدى الفلل المشبوهه في******..وفي شهود من المنطقه قالوا ان ولدك ملازم ليه وين مايمشي...وفي اليوم اللي حني مشينا فيه بش نقبضوا ع "الريقا"اسم الشهره لعبدالملك الفرجاني المروج اللي حكيتلك عنه لقينا الحوش فاضي..وللأسف حاليا ماعندناش عنهم اي معلومه..."
حط يده ع رقبته وهو حاس روحه مخنوق...بيموت...
وين يتذكر قصة اخ رضوان بوكراع...
《 لعند ماعرفت من صديق مقرب ليه في يوم جاني خبرني ان خوي روح وانه موجود في*****..وانه مع الاسف خالط شلة فاسده كانوا كلهم مدمنين..تعرف ع واحد منهم برا وهو جره وراه..هالشخص هدا كان ضمن شبكه لتجارة المخدرات كانت تستهدف في الشباب اللي في عمر خوي..
مجرد ماعرفت هالمعلومات بعتت وحده للمكان هداكا واني كنت ع راسهم...
سكت وغمض عيونه بقوة بعدين فتحهم وقال..لما خشينا غادي...لقيت..مجموعه من الشباب كانوا جثث هامده في الشقه مامتوش بجرعة زايده لا..ماتوا مقتولين بالرصاص》
....في لحظه....
مر قدام عيونه شريط ذكريات سيئة بينه وبين ولده..
اذكر كل خلافاتهم مع بعض..
اسلوبه مع ولده..وكيف كان يتعامل معاه..
لما خلاه يطلع من الحوش ولاهمه..
ولما كانت عنده رغبه انه يولي هو قتلها لما قال..
"اني ماقلت لحد اطلع بش نقوله يقعد"..
هو السبب..هو...لو ماكانش مع ولده هكي..ماكانش وصل لهني...
هو اللي دمر ولده...هو اللي قضي عليه...
واستمر يلوم في نفسه ويجلد فيها بقسوه...كره نفسه...وتمنى لو ماكانش اب..في نظره هو مايستحقش يكون اب..
عيونه فهاللحظات جت ع محل مواد غذائيه مفتوح...
《 ريحان:جيبلنا معاك شكلاطة الفيل..
هيثم بضحكه استغراب:حاضر.》
وقف السيارة فجأة..
فتح الباب ونزل صكره..ومشي للمحل..
خشله..
وقف ع البايع وهو يقول بصوت مرتعش بعض الشي:عندك شكلاطه..الفيل..
البايع هز راسه وقال:ايه...ومشي بيجبهاله..
هو قعد يمرر في نظره ع المكان ومازال قاعد تحت تأثير الصدمه..
لين جاه البايع بشكاره معبيه ومدهاله وقال:هديه مني ليك..
هيثم شبحله شويه..بعدين طلع من جيبه فلوس بدون مايشوفهم حطهم ع الكاصه وخدي الكيسه وطلع..
البايع شاف الفلوس لقاهم زوز ورق 50دينار انصدم..
ع جية زبون قال:كان مش النوم بدي ياخد..اللي طلع من عندك توا وزير الصحه اللي طيروه؟
البايع وهو مندهش:ايه..الله لاتربح من طيره..
•••••°°°°°•••••
واقفه في الروشن ودموعها ينزلوا من القلق والخوف وهي تقول:يارب..يارب...يارب...
لحظات وانفتح الباب الخارجي..
شافت السياره خاشه..
حطت يدها ع قلبها وتنفست بقوة وهي تقول:اوووه الحمد لله...
بعدين شافاته نازل من السيارة..صكرها ومشي للباب..
استغربت مشيته كانت تبان مشية تعب...
مشت من حدا الروشن وطلعت من الصاله...
انفتح الباب وخش..
وهي تشبحله بقلق..
هو شبحلها وقال:خيرك نايضه لتوا؟.
سارة بقلق:عطلت..
سكر الباب...بعدين جاها وعيونه ينفتحوا ويتسكروا بشده..
مدلها الكيسة وقال...دسيها لخواتك غدوة ياكلوها..ان شاء الله..
خدت مته الكيسه وهي تشوفله بخوف..
وهو مشي بطريقه لممر الديار...
لما وصل في بدايته حط يده ع حيط..
سارة ضيقت عيونها بخوف...
هو حاول يرجع يمشي مرة تانيه..لكن ماقدرش..
انسند بكتفه ع الحيط...بعدين طاح زي مايطيح البناء الشامخ المرتفع بعد ماكلاته السنين وعوامل الطبيعه...
طاح ع وجهه...وبنته تشوف....
لوحت اللي فيدها ومشتله تجري وهي تعيط بأعلى صوتها..
"بابا"
~~~~~~~
♡بابا...سندي من بعد الله...الشجره اللي نظلل تحتها...الصدر اللي يأويني..الظهر اللي يحميني..حبي الأول والأخير..
ياه ياهديكا الليله مستحيل ننساها ولاتريح عن بالي..فهديكا الليل بس اكتشفت اني ساره..اني مش بس نحب بابا..لا اني طلعت نتنفس فيه...بابا...ياعمري...يانجمي العالي...يابطلي..المغمور....

....يتبع....