البطل المغمور "شمس الغروب"

الجزء الخامس

💐..
وصلوا قدام العمارة اللي يسكن فيها عبدالمجيد اللي لما شافها جهاد اتفاجئ ع الآخر..
جهاد وهو يشوف للعمارة برفعة حواجب:ساكن هني؟!
رفيق اللي كان مقعمز جنبه قال:علاش شن في؟
جهاد ابتسم ع جنب وعقد حواجبه وقال:كل خير ان شاء الله..
رفيق رفع حاجبه ومط شواربه للأسفل بعدم فهم..
بعدين غير عيونه لسيارة هيثم شاف سارة نازله وماشيه مع امها بش يساعدوا ماجده فالركوب لشقتها..
كانت سارة لابسه قفطان مناسبات ملائم لعمرها لونها زيتي هافت كمه طول وطوله لتحت الركبه بشوي ضيق من فوق لعند وسطها وبعدين يبدا واسع ومنفوخ شويه..
وصندل اسود فرجليها..وشعرها رافعاته فوق ومنزله خصلات..
كانت شاده طرحة خالتها ماجده ومرة مرة تسرق في النظر لمجاهد اللي كان راكب قدامهم بش يفتحلهم الشقه..
لما وصلوا فيها..
وقف قدامها وحط المفتاح فيها وفتحها ..
دف الباب انفتح ع وسعه بعدين شبح لأسيمه وقال بإبتسامه:تفضلوا..
اسيمه بإبتسامه:شكرا..
وخر عن الباب مسافه..
واسيمه قعدت تركب في ماجده لين وصلتها للباب دخلتها..
وسارة كانت اخر من ركب..
شبحت لمجاهد لقاته منزل عيونه..
ابتسمت ابتسامه خفيفه بعدين مشت خشت وراهم..
بعدين جت بتصكر الباب فاللحظه اللي هو جاي بياخد فيها المفتاح
قام عيونه جو فعيونها
هي عيونها توسعوا وين شافت شكل عيونه ولونهم ونظرتهم..
هو نزل عيونه طول وقال:معليشي المفتاح..
هي وجهها ولى احمر..صكرت الباب بهدوء..
اما هو ضحك ضحكه خفيفه وخدي المفتاح من الباب ومشي نزل...
وهو نازل فات من حدا الشقه اللي فيها عيلته ارسمت ع وجهه ملامح الضيق بعدين كمل نزول...
•••••°°°°°
قدام العمارة..
عبدالمجيد وهو يكلم في هيثم:كون هاني ياخوي هيثم واطمن عليها وماتخممش بكل راهي ومن غير شكرانيه فروحي طاحت في راجل يتقي الله..
هيثم ابتسم مجامله وقال:ان شاء الله ان شاء الله..
ع جية مجاهد جاهم ومد لبوه المفتاح وهو يقول:تفضل بوي..
خداه عبدالمجيد وقال:الله يرضى عليك ويبارك فيك..
هيثم وهو يشوف لمجاهد:قال الوالد غدوة مولي لراس لانوف..
مجاهد وهو يشوفله بإبتسامه:ايه ان شاء الله اجازتي تمت خلاص..
عبدالمجيد:الحمد لله الفتره الجايه يقعد 15 يوم ب15 يوم خدمه واجازة مش زي قبل بسته شهور مرات مانشوفوش فيه..
هيثم بإبتسامه:هادي خدمة مهندس النفط غربه وجهاد..
مجاهد ضحك ضحكه خفيفه وقال:اختصرت معاناتنا في كلمتين..
هيثم هز راسه بإبتسامه وقال:ربي يهون عليكم..
مجاهد:امين..
وعبدالمجيد مش معاهم بكل عقله عند ماجده وخلاص..
شبح فم العمارة لقي اسيمه وساره طالعات...
مشوا طول لسيارة  هيثم
وعيون رفيق علي ساره شويه عقد حواجبه لما لاحظ نظراتها لمجاهد..
دقق في مجاهد لاحظه لاهي بالهدرزة مع هيثم ماشبحش جيهتها بكل..
غير عيونه ليها لقي سارة ركبت قعد مركز بنظره ع السياره وقلبه ولعت فيه النار..
جهاد شغل السيارة لما شاف هيثم ماشي لسيارته..
بعدين غير عيونه وشبح للعمارة ابتسم ابتسامه خفيفه..
شويه فاتت من قدامهم سيارة هيثم..
وبعدها سيارة بوه ومعاه خليل..
وهو تحرك وراهم...
••••°°°°
في سيارة هيثم..
هيثم:اني لعند هاللحظه الراجل لااستريحتله ولاقبلته عكس ولده قداش عاجبني ياأسيمه ماتقولش ولده بكل..
سارة شبحت لبوها وابتسمت..
اسيمه؛الحق حتى اني عجبني الوليد حسيته خلوق ومحترم ووجهه مريح..
غيرت سارة عيونها لأمها وزادت كبرت ابتسامتها..
هيثم:مهندس نفط..
اسيمه:ماشاء الله..
🌷وهما يهدرزوا عليه..وقلب سارة يرف رفان وهي تسمع في كلامهم عنه وتذكر فعيونه وجمالهم وجمال نظراتهم..
الشعور اللي تحس بيه غمرها...انغمرت فيه بكل معنى الكلمه..
ومعروفه العاطفه عند المراهقين تكون جارفه لايمكن السيطره عليها..
البنيه اول مرة تعرف معنى الإعجاب وتحس بيه ولأنه اول مرة كان شعور حلو هلبه هلبه بالنسبه ليها..
•••••°°°°°••••°°°°••••°°°°•••
وصل في باب الشقه فتح الباب وخش وصكره وراه..
حول من رجليه وهو يسمع فصوت التلفزيون مفتوح مع ضحك امه وخواته..
ابتسم ومشالهم طول..
خش وسط الحوش لقاهم حاطين ع مسلسل كوميدي مصري..
ضحك وقال:السلام عليكم..
شبحوله وقالوا:وعليكم السلام..
مشي طول لأمه..
تمدد حداها وحط راسه ع رجلها وقعد يشبحلها..
هي مسحت ع شعره وقالت بإبتسامه:سلم هالعوينات ياربي..
رتاج فنصت عيونها وقالت:مش غير هو امي اهااا..
دانيه قلدتها وقالت بضحكه:حتى اني اهااا..
ضحكوا كلهم..
سدينه بضحكه؛ياودي نجيكم كلكم وسلمكم كلكم..لكن هدا فيه الزايد عليكم معليشي غلاه مايجي حداه حد..
تصنعوا البنات شهقة صدمه..
اما هو ضحك بعدين خدي يد امه وباسها وقال:هدا علاش لتوا مانبيش نتزوج..مش حنلقى وحده تحبني ربع حبك ياقمر انت..
سدينه:لا وليدي تلقى تلقى انت غير قول نبي نتزوج بس..
رتاج:هي مرة وصلتني فيها الجامعه خليت بنات الكليه كلهم يصاحبوني..
دانيه؛مالا اني في المدرسه..
سدينه:خلاص مالا شوفوا لخوكم..
مجاهد:لالالا يام الموضوع هدا مانبيش ندير فيه شي قبل نوتي روحي ونكون جاهز..
سدينه شبحتله وقالت:صح عندك حق..
رتاج:ايه خير مايقعد معلق بنات الناس بالعام والعامين والتلاته..
مجاهد:هو هدا مانبي نشحط معاي حد ولانحط روحي في مواقف بايخه..
سدينه:باهي يما براحتك ربي ييسرلك أمرك ولدي ويعطيك مافي بالك..
كلهم قالوا بأصوات متقطعه:آمين..
بعدين قال مجاهد:وين رشيد..
رتاج:راقد في داره..
مجاهد هز راسه وقعد ساكت..بعدين شبح لأمه لقاها تتفرج ع التلفزيون وهي حابسه دموعها فعيونها..
خدي يدها وباسها..
وهي شبحتله وضحكت بعدين هزت راسها بإبتسامه وولت تتفرج..
وهو قعد يشوفلها بإبتسامة ألم..
•••••°°°°•••••°°°°°••••
في صالة حوش هيثم..
اسيمه:قنينه الشقه وكل شي فيها يبان جديد..
نسيبه بضيق:مش عارفه علاش خلوقي مطبقات ومش مستريحه..
اسيمه بضحكه:انتي مش متقبله زواجها تبيها تقعد معاك وخلاص..
نسيبه تنهدت وقالت:باهي مش خير من الزواج ونكد الزواج والله تندم وتو تشوفي ياسومه..
اسيمه شبحتلها وهي مبتسمه بعدين قال:نوسه حلوة الحياه اكثر لما يكونلك فيها شريك لقلبك ولنفسك تكبري معاه تكملي عمرك معاه ديري منه صغار وعيله صدقيني هادو حاجات حلوة هلبه هلبه يانوسه..المهم الأختيار يكون صح..
وهي تتكلم نسيبه قعدت تشوفلها وتسمعلها وع وجهها ملامح قلق ممزوجه بالحزن..
خايفه مش شي حاساته بادي يقرب منها وحتما حيخش حياتها مهما حاولت تمنعه..
وحزينه ع نفسها لأنها ماقدرتش تحقق شي شبه مستحيل هي انها تعيش عمرها كله بدون ماتتحرك في داخلها مشاعر هي رافضتها رفض تام..
وياريتها غير جتها في حد عادي..لا جتها في خليل وماادراك ماخليل..
🌾بعد كملوا هدرزة هي ومرت خوها ركبت لدارها في حوش خوها..
خشتلها وهي سرحانه وتفكر في كل شي مرت بيه مؤخرا..
فاقت من سرحانها لما شافت للبوكسينج مشتله طول..
ولبست القفازات..
وبدت تنهال عليه باللكمات وهي تشوف في نظرات عيون خليل..
وعيون خليل..
وتسمع في كلام خليل..
وتذكر في كل شي صار بينها وبينه فهالخمسه سنين
وكل لكمه ليها تكون اقوى من التانيه لان غضبها من حالتها اللي هي فيها يزيد كل ماقوي هداكا الشعور..
《اني مكبد فيك》
نسيبه بغضب:حيواان..وضربت البوكسينج بقوة..
بعدين شداته وحطت جبهتها عليه وهي مغمضة عيونها بشده من التعب وهي تاخد في انفاسها بصعوبه..
لحظات..ووخرت عنه.
حولت القفازات ولوحتهم ع السرير..
بعدين مشت للروشن بتفتحه بش تاخد نفس..
مجرد مافتحاته..
جو عيونها عليه وهو ماشي في الزنقه بروحه..لما سمع صوت الروشن قام عيونه فوق طول..
وقف في مكانه وهو يشوفلها..
ماكانتش مستاقظه لروحها انها قاعده من غير حجاب ورافعه شعرها فوق كعكه مبعثره ولابسه بدي نص كم...
هو قعد واقف يشبحلها وهو منسته..
وهي قعدت تشبحله وخلاص..
وقعدوا لحظات وهما هكي..
لعند ما استاقظ خليل وين سمع صوت سيارة جايه..
عقد حواجبه بغضب واشرلها براسه تخش..
هي رفعت حاجبها بمعنى والله!..
هو فنص واشرلها تخش براسه مرة تانيه..
مطت شواربها بإزدراء وهي رافعه حواجبها..
السياره خشت للزنقه..
هو اشرلها بيده تخش ووجهه من الغضب ولى لونه احمر..
ربعت ايديها وقعدت تمرر فنظرها حواليها بإستفزاز..
هو معاش عرف شن يدير معاها ماكانش في قدامه  غير حل وحيد..
طبس خدي رشاده من الوطى وهو يقول بصوت عالي:اهيااا اهياااا..
شبحتله..
حدفها..
فنصت عيونها وطول خشت وصكرت الروشن...
الرشاده جت ع السور ماجتش ع الروشن..
وهو ضحك عليها لما خشت تجري..
ع فوتة سيارة واحد من جيرانهم كلكسله..
هو رفع يده وحياه بعدين مشي وراه للحوش..
نسيبه؛غبو يانوسه خفتي منه وطول خشيتي ياحماره!؟
وكيف جت بتفتح الروشن مرة تانيه لمحت المرايه..
توسعوا عيونها ع الآخر..
شافتلها كويس وشافت الحاله اللي كانت فيها..
شهقت بصدمه وهي تقول:نهارك الاحرش يانوسه!! حي عليا خير بلاي شن جاني اني!!..
حطت ايديها ع وجهها شويه بعدين مسحاته بيهم..
بعدها التفتت ع سريرها مشتله طول ارتمت عليه وهي دافنه وجهها في المخده..
 💓اما هو..
خش للحوش وهو سرحان يفكر في اللي صار وبين عيونه شكلها الفوضوي العفوي..
وهو يذكر وابتسامة حلوة مرسومه ع وجهه والعيون الزرقا تلمع بلمعه مميزة..
قعد يمشي وهو فهالحاله لين خش الدار..
لقي خوته متلوحين في اسرتهم وراقدين بالنوم..
هو حول دجاكته ولوحها ع سريره..
بعدين مشاله وتمدد عليه...
وغمض عيونه طول..مايبيش يفكر في شي ينغص عليه اللحظات الحلوة اللي عاشها يبي يرقد وهو فرحان💓
•••••°°°°°••••°°°°•••••
اليوم اللي بعده كان يوم اربعاء
المفروض دانيه ورتاج ماشيات لقرايتهم لكن بوهم قاللهم مايمشوش..علاش!؟
🌾يعطيك الصحه ياعسل ع هالفطور القنين عمري مافطرت زيه
ماجده بضحكه:صحتين..
عبدالمجيد ابتسملها و قال:الغدي يجيك واتي من لوطا..
ماجده عقدت حواجبها بإستغراب وهي تقول:كيف من لوطا مافهمتش!؟
عبدالمجيد:البنات والمراة بيديروه..
قعدت تحرك فراسها يمين ويسار وتقول:تس تس تس..لالالا مجوده ماناكلش منهم حاجه..
عبدالمجيد؛عندك حق تخافي ياعسله مرات يديرولنا فيه حاجه..
ماجده:مش هدا قصدي..قصدي ان هما مش ملزومين يطيبولي لو نبي ماكلة حوش راني وصيت مرت ولد اختي ولااني نضت طيبت بروحي..لكن اني عروسه مجوده عروسه من حقي اول ايامي نتغدا من المطاعم ومش اي مطاعم ايوه..
عبدالمجيد"بدينا":باهي حاضر تو نبعت يجيبولنا غدي من برا..
هي تصنعت ملامح الزعل وقالت:من فوق نفسك واضح شكلك مستخسر فيا..
وناضت ومشت من حداه بزعل في نفس الوقت..
وهو ناض طول وراها وهو يقول؛لا عسلتي فهمتيني غلط..غير تعالي هني وين مشيتي ياعبمبرة..
🌿وزيه زي الراجل الطيب وصى ع غدي من احسن المطاعم المهم ترضى عليه ماجده اللي تعرف من أين تؤكل الكتف🌿
••••°°°°•••••°°°°•••••
في احدي مدارس التعليم الأساسي للبنات..
في وقت الإستراحه..
كانوا تهاني وساره مقعمزة مع بعض ع الارض وهما ياكلوا في تسالي"شيبس" ويهدرزوا..
سارة:يهبل ياتهاني يهبل..عيونه محلاهم كبار وحادات شويه ولونهم ارزق قراب من عيون خوك الصغير..هدا غير باقي شكله زي الغزال..ولا شخصيته..ولا مشيته ولالما يتكلم صوته كيف ياتهاني..محلاها ياتهاني محلاااه..
ضحكت تهاني وهي تقول:شوقتيني نشوفه..
تنهدت سارة وقالت:ياريت اني نقدر نشوفه مرة تانيه بس..
تهاني بضحكه:اول مرة تعدلي ع حاجات هادي لما يحكوا البنات في الفصل ع الاولاد انتي تقولي عليهم تافهات ومش متربيات..
سارة:شن جاب اللي هما يحكوا عنهم للي نحكي عنه اني!! وبعدين هما يديروا في علاقات وعار معرعر واني مستحيل ندير هكي..
تهاني بإبتسامه:باهي شن بديري كانك مش دايره هكي..
رفعت كتافها ونزلتهم وهي تقول:شي..نبي نقعد نشوفه وخلاص وابتسمت بخجل..
وتهاني حطت في فمها بطاطا وقعدت تاكل وتضحك عليها
•••°°°°••••°°°°°••••°°°°•••
في احدى المدارس الثانويه للبنين..
"المسابقه يوم 1\4"
زياد:كويس مازال في وقت..
مدرسة الفنون:ركز ع الفكره زياد فكرة الرسمه لازم تكون مميزة جدا ومختلفه..
ضيق عيونه شويه وهز راسه وهو يشوف للمدرسه...
🌿في الممر اللي فيه معمل الرسم والنحت فالمدرسه
نسيبه:خلاص استاذ رجب نعبى عليك..
رجب:كوني هانيه بنتي..
نسيبه ابتسمت وقالت:السلام عليكم..
ومشت طول بطريقها لباب المدرسه..
طلعت منها وتوجهت لسيارتها ركبتها وتحركت..
•••••°°°°••••°°°°•••••
بطول هلبه المرة هادي..
هيثم وهو يلبس في ساعته:مؤتمر كبير هدا يااسيمه..
تنهدت وهزت راسها وقعدت ساكته..
بعد كمل تجهيز نفسه جي لشنطته وخداها ومشي طلع بيها..
وهي وراه بشنطة اليد متاعه..
وصلوا في الباب..
هو فتحه وطلع بالشنطه بيحطها في السيارة..
وهي قعدت واقفه في مكانها تراجي فيه..
شويه وخش وقال:اسيمه حبيبتي..
جاته سلمت عليه وهوقال:بنكلمك كل ساعه..
ضحكت وقالت:حتى كل ساعتين كويس..
هيثم:مالا بنكلمك كل نص ساعه..
اسيمه:هههههه..
هو ضحك بعدين بعد شويه وطبع قبله ع جبينها وقال:استودعكم الله..
اسيمه:وإياك..في أمان الله..
قرص خدها وهو مبتسم..بعدين خدي شنطته منها ومشي طلع..
وهي طلعت وراه قعدت واقفه في الباب تشوفله وهو يركب السيارة بعدين طلع بيها من الحوش..
بعد طلع تنهدت ومشت خشت داخل..
•••°°°°••••°°°•••••°°°°••••
في واحد من اشهر المطاعم في العاصمه..
كانوا جهاد وخليل موجودين فيه..
جهاد واقف ع صديقه يخدم في ادارة المطعم ..
اما خليل كان مقعمز ع وحده من الطاولات ومعاه ملاك وخوها اللي تحججت بيه تقول انه يبي يطلع معاه ويبيه ومن هالكلام وخليل جبر بخاطر الوليد وطلعه وهي لصقت روحها معاهم..
جهاد:قتلك اني نعرفها نعرفها العماره خليني اليوم بس في خدمة التوصيل وشن ماتبي نعطيك
صاحبه ضحك وقال:انت اللي بتخدم وانت اللي بتعطي الفلوس!
جهاد بضحكه وهو عاقد حواجبه:ياودي شن قلت..
الراجل:اوكي مافيش مشكله..تعالى معاي..
جهاد بإبتسامه فرح؛تي منور بالهلبه..
ومشي خش معاه..
🌿اللي صار ان جهاد صدفة كان واقف ع صديقه يهدرز عليه بحدا واحد من الموظفين اللي تلقى اتصال عبدالمجيد وخدي منه الطلبيه والعنوان..لما سمعه ماصدق طول خطرت ع باله فكرة وبسرعه سارع لتنفيدها🌿
في هالوقت..
درست سيارة نسيبه قدام نفس المطعم كانت عاطية وعد لعيلة خوها ان اول غدي ليها معاهم ع حسابها..
نزلت ومشت خشت للمطعم...
وقفت في المكان اللي فيه يعطوا الطلبات..
قالت للعامل شن تبي..
العامل:تمام..
نسيبه؛بالله استعجلوا شويه..
هز راسه ومشي خش داخل..
اما هي مشت قعمزت ع كرسي وقعدت تراجي..
درات بعيونها في المطعم وهي تشوف لديكوره والناس اللي فيه..
شويه تبتوا عيونها ع طاوله محدده..
شافتهم وهما مقعمزين مقابلين بعض يهدرزوا ويضحكوا وهما منسجمين ع الآخر..
ركزت ع شكل البنت وهيئتها هلبه..بعدين حركت راسها بشي من البطئ وشبحت لروحها..
بعدها رجعت شافتلها تلقائيا عيونها تعبوا دموع وهي تقول:باك بنصدق..اصلا ماصدقتش هو يبي يكسر  خشمي بس لكن باهي..
شبحت القدام شافت قرسون ناداته بإشارة اليد..
هو جاها طول..
•••••°°°°°
ملاك بضحكه:باهي انتم تعالوا مرة تانيه وانت ذوق واحكم بروحك..
خليل وهو مبتسم ع جنب قال:تو نشوفوا..غير عيونه لخوها وقال..شني يابرنس..
ابتسم الولد وقال:جعان..
خليل:هي شويه ويجيبوا الغدي..
مجرد كمل كلمته جو بطلبتاهم..
حطوا الغدي ع الطاوله..وبعد كملوا واحد منهم قال:حسابكم مدفوع استاذي..
شبحت ملاك لخليل..
وهو عقد حواجبه بإستغراب وقال:مدفوع؟!متأكد؟!
القرسون:ايه..شبح القدام  وقال..الاخت دفعاته..
شبحت ملاك وين مايشبح القرسون..
وخليل التفت..
جو عيونه عليها وهي طالعه ومعاها واحد بطلباتها..
قعد معاها بعيونه لين طلعت..
كان يحاول يفهم قصدها من الحركه..
بعدين ناض ومشي طول للباب...
طلع..
ع ركبتها هي للسيارة...
خليل وهو يقدملها:هيي..انزلي..تعالي جاي..
طول شغلت السيارة وتحركت طول وهي تحرق فالعجل...
هو وقف وقعد يشوف للسياره وهو عاقد حواجبه بغضب وضيق في نفس الوقت بعدين مشي خش داخل..
🌾لما وصل في الطاوله قعمز بعصبيه..
ملاك:من هي هادي..
حط سبابته ع فمه وقال:اصص..
هي سكتت وعيونها عليه تشبحله بضيق وبتموت وتعرف من تكون اللي دفعت حساب غداهم..
🌿في نفس اللحظه..
طلع جهاد من المطعم وهو شاد طلبية عبدالمجيد..
مشي حطها في سيارة التوصيل الخاصه بالمطعم..
وركب وتحرك طول لعمارة "رتوجه💓"..
••••°°°°°••••°°°••••••
حطت الحوايج في الغساله وولعت عليهم..
بعدين مشت للكوجينه بش دير حلو للعصر..
وقفت قبل تخشلها لما سمعت هاتفها رن..
مشت للطاوله الموجوده في الممر اللي يرفع للصاله..
وصلت فيها وخدت الهاتف لما شافت المتصل قلبها انقبض..
كانت مديرة روضة بناتها..
فتحت الخط وردت تقول بخوف:ايوه!!................باهي باهي..جايه توا..
لوحت الهاتف ع الطاوله ومشت تجري لدار النوم..
حطت عليها عبايه ووشاح وخدت مفتاح سيارتها ومشت تجري للباب وهي لابسه شبشب الحوش وطلعت بيه من الحوش وهي مذعورة..
••••°°°°••••°°°••••
ركب الدروج وهو يقول بصوت منخفض:نطق ع الباب اللي يجي قدامي ونجرب حظي..
واقف في مستراح بين شقتين..
بعدين قعد يمرر فنظره عليهم وهو يعد من الواحد للعشرة..
وجي رقم عشرة ع الشقه اللي ع اليسار..
خدي نفس ومشالها بعدين قال:وكان يفتحلي واحد من خوتها! يللا مش مشكله المهم عرفت حوشها..امم باهي كيف بنزبط ان اللي بيفتحلي واحد من خوتها!؟ساهله من الشكل تبان اكيده العيله كلها حلويات مشكله..ضحك بعدين طق ع الباب..
💓داخل..
في الكوجينه..
سدينه:حس الباب يطق ولا؟
دانيه:ايه..
سدينه:اكيد حسام جاب البضاعه وراس رتوجه بري افتحي..
رتاج:لااا مانيش طالعه تطلع دانيه..
دانيه:مانيش طالعه..
سدينه:نطلع اني معناها عند اللاش ماعندي حد..
رتاج بضيق:تس..باهي خلاص يام هاني طالعه..
ومشت طلعت من وراهم وهي معصبه ع الآخر..
سدينه:مش عارفه علاش مش عاجبها حسام شن ناقصه الوليد؟
دانيه:ناقصه هلبه يام هلللبه..
سدينه؛زي شني؟
ضحكت دانيه وهي تشوف لأمها..
💓اما رتاج..
غمت روحها بالوشاح مش باين منها شي كان شويه من عينها اليمين.
وجت للباب وفتحاته بغضب..
وتجيها صدمه..
هو ضحك لما شاف منظرها وقال:هادي شقة عبدالمجيد مجدوب؟
هي طول فكت الوشاح ونزلاته عن وجهها ولفاته ع رقبتها..
وهو يتأمل فيها بعيونه...
بعدين شبحتله وقالت بصوت هادي:ايه هادي بس اكيد انت جاي للفوق..
جهاد عقد حواجبه وقال:قصدك بوك اللي تزوج جارتنا البارح!؟
رتاج بصدمه:جارتكم!!!
فجأة سمعت صوت باب الشقه اللي فوقهم انفتح من الخوف صكرت في وجهه الباب..
هو استغرب..
ع نزلة بوها من فوق لما شافه واقف قدام شقته التانيه وفيده الحاجات قاله:الشقه اللي فوق هادي مش هادي تعال وراي..
ركب..
وجهاد ركب وراه
مازبطش مجيد جهاد لإنه ماركزش عليه نهار الفاتحه..
وصلوا فوق..
مد جهاد كياس الطلبيه لمجيد وقاله:250..
مجيد:بي بي بي..250!! غير شنهو اللي خديناه !!لو جبتلهم داروه فالحوش مايوصلش ل70دينار..
جهاد قعد يشبحله بشي من الإزدراء..
مدله مجيد الفلوس بدون مايشوفله وقال:توكل..
ولف ومشي خش شقته وصكر الباب..
جهاد:شن النموذج الخارب هدا!؟ معقوله هدا بنته العسوله هديكا!!! سبحان الله وخلاص..
ونزل من الدروج شبح لشقتهم وقال:ااخ وخلاص..
بعدين كمل طريقه وهو يتنهد...
🌾في الشقه..
في دار البنات..
رتاج:مش عارفه شكله طلع يخدم دليفري!
دانيه:خسااارة ياريتني طلعت معاك..
رتاج ضحكت بعدين قالت؛باهي تعالي نمشوا لأمي الكوجينه قبل دورنا ومشت طلعت من الدار ودانيه وراها وهي تضحك..
•••••°°°°••••°°°°•••°°°••••
البنت اللي اعتدت ع ريحان بالضرب ضربتها جنان..
اسيمه وهي قايمه ريحان في غمرها؛وانتم وين كنتوا اللي مخليين الصغار يتعاركوا بالضرب!!
المديره:عندك حق تسألي السؤال هدا..اني درت اللازم مع المشرفات..
اسيمه بحده:بناتي لو صارتلهم حاجه كنت اني اللي درت معاكم اللازم يااستاذة
المديرة بشي من التوتر:نكرر اعتذراي مدام اسيمه جدا اسفه..
🌾طلعت اسيمه ببناتها وقلبها موجوع ع حال ريحانه اللي ماتتحملش الجهد الزايد والانفعالات طول تفقد وعيها
وجنان تنجن وين تشوف توأمها فهالحاله تولي عدوانيه وعنيفه ويصعب التحكم فيها
ركبتهم السيارة الزوز حدا بعض وقالت:شن رايكم ماما نمشوا ل**** تلعبوا شويه بعدين نروحوا؟
ريحان ابتسمت بفرح وقالت:ايه نمشوا نمشوا ماما..
اسيمه بإبتسامه:وانتي جنجون؟
جنان:ماما..فالروضه طلبت منا الميس نديروا واجب عن نزهة عائليه نرسموها كلها..
اسيمه:امتى تبيه المس؟!
ريحان:قالت مازال شهر..
هزت اسيمه راسها بإيجاب وقالت؛ان شاء الله ماما..يروح بابا من السفر ونقوله وهو يرفعنا..
الزوز قالوا:باهي..
اسيمه:هي توا خلونا نمشوا ل****
ابتسموا بفرح...وهي تحركت طول..
▪▪▪▪
◇مش اول مرة يصير مع ريحان وجنان مشكله زي هادي وامهم هي اللي تجري بش تحلها..
مشكلة ريحان الصحية كانت من صلب اختصاصي لكن من الصعب وهي فهالعمر يندارلها حل...
ريحان بالذات وين نشوفلها نحس اني اعجز وافشل أب فالدنيا اللي بنتي تعاني من الم اني الأدرى بيه لكن مش قادر نديرلها أي شي..
▪▪▪▪
•••••°°°°°••••°°°°••••
لسه الدنيا بخير ياحبيبي..لسه الدنيا بخير
اصلي بحب الخير ياحبيبي واتمناه للغير..
خش للحوش وهو مروح من الورشه سمع صوت جورج وسوف ممزوج بصوت زوجته وهما يغنوا فهالأغنيه..
صوتها كان حلو..وصغارها كلهم ورثوا جمال هالصوت بالذات كبيرهم كان صوته حلو هلبه..
صكر الباب وهو حاس اتجاهها بشوق جارف وفي نفس الوقت كان خايف منها ومن ردة فعلها..
مشي وهو يتبع في مصدر الصوت..
وصل في وسط الحوش لقاها مقعمزة تفرط في البازلياء والراديو حداها..
جوها يبان رايق لهدا هو تشجع وقال:شن ديري..
انتفضت من الخلعه وقالت:امتى جيت؟!
خالد وهو عاقد حواجبه قال:توا..في ماناكلوا..
 نفضت ايديها وناضت وهي تقول:ايه..
ومشت بتطلع للكوجينه لما فاتت من جنبه شد ذراعها..
هي رعشت ونفضت يده طول وقالت:ماتمسنيش..
هو قعد يشبحلها بصدمه..
وهي بدون ماتشوفله وعيونها معبيات دموع:خلاص اني راهو معاد عندي ليك بكل..
خالد بصدمه:عفاف!
عفاف شبحلته وقالت بإنفعال:عفاف شنو عفاف!من هي عفاف عندك انت غير المراة اللي اضم واطيب وتغسل وتعطيك حاجتك وتجيب الصغار وتحمل همهم بروحها! اني عايشه معاك بلا قيمه ولاقدر حتى الضرب ضربتني وانت فايق وانت سكران قطعتني من الدنيا والناس خوتك اللي هما خوتك قولي امتى اخر مرة اتصلوا بيك وسألوا عنك!!
خواتك!! اللي قطعوك وقطعونا في جراير فعايلك السود وهمك الاغبر..حتى خواتي وخوتي لحقوا عليهم..اختي الوحيده سماح اللي كانت يوميا تمشي عليا وتجي بدت تقطع فيا من ورا فضايحك هدا كله غير قهرتي ع ولادي اللي خليتهم يتبعوا ضلالك..اني عايشه معاك بالسيف ع خاطر تهاني بنتي لولاها راني من زمان ماشيه ومسيبتهولك..
خالد وهو يسمع فكلامها كان يحاول يكبت غضبه..
يقدر يرد عليها بالكلام والضرب زي مايتعامل معاها فالعاده لما ترد عليه وهما برواحهم لكن هالمرة قلبه رقلها بسبب الحالة اللي مرت بيها..
حده سحب نفسه ومشي طول لباب الحوش فتحه وطلع..
هي قعدت تمسح فدموعها وتقول:تمشي معاد تولي..
🌾وصل في الباب الخارجي وهو معصب فتحه..
طلعت في وجهه سماح اختها..
سماح؛كيف حالك خالد..
شبحلها من فوق لتحت بعدين قال:مازال تذكري اسمي ع لسانك المسخ نقطعه..
عيونها تعبوا دموع وهي تشوفله..
وهو مشي طلع من حداها..
قعدت واقفه تشوفله وهو ماشي بعدين خشت للحوش وصكرت الباب..
🌿🌿
وين خشت داخل الحوش قعدت تنادي:عفاف..ياعفاف..
طلعتلها عفاف وهي تقول:سماح جيتي..
وجو لبعضهم وسلموا ع بعض بالخد بعدين قالت سماح:متعاركه انتي وخالد؟
عفاف بضيق:والنبي معاد تدويلي عنه..
سماح:كان تسمعي نصيحتي وخيتي اطلبي الطلاق وجيبي تهاني واقعدوا في حوش بوك معززة مكرمه..
عفاف:لالا طلاق مانبيش وضعي هدا مازال اهون..حركت راسها يمين ويسار وهي تقول..خلاص صكري ع هالسيره..وتعالي..
مشت عفاف واختها مشت وراها وهي تشوفلها بنظرة قهر وغيظ..
••••°°°°•••••°°°°°•••°°°°•••••
في مدينة الألعاب اللي رفعت اسيمه بناتها ليها..
كانوا البنات يلعبوا مع عمتهم اللي كلمت مرت خوها تسأل فيها ع هيثم كان سافر ولا لا..وعرفت منها هي وين مشتلهم طول..
اسيمه وهي تضحك قالت بصوت عالي:ردي بالك يانوسه..
نسيبه وهي راكبه مع بنات خوها في وحده من الالعاب ضمتهم ليها بقوة وقالت:ماتخافيش..
ضحكت اسيمه..
واللعبه بدت تتحرك وادور ونسيبه تعيط بحماس وهي شاده بنات خوها اللي كانوا يضحكوا..
شويه رن تليفون اسيمه..
قاماته وفتحت الخط وردت:ها ماما سارة.........لامش فالحوش شن الباص ماجاش؟..............ايه عادي مافيش مشكله......تمام في امان الله...باي..نزلت التليفون وهي تشوف لحماتها وبناتها بعدين ضحكت ع نسيبه اللي كانت قالبتها عياطات وضحك..
••••°°••••
نزلوا سارة وتهاني من الباص وسارة تقول..
سارة:قالت ماما عادي تهاني..
تهاني بشي من الإحراج:ع خاطر الامتحان بس والله كان هدا ماضايقتكم توا بكل..
سارة:اسكتي اسكتي بلا دوة فاضيه..
ضحكت تهاني
وكملوا طريقهم بالهدرزة
وهما ماشيات كان في زوز ولاد واقفين فراس الشارع شافوهم لما نزلوا من الباص قعدوا يمشوا وراهم
لما قربوا منهم بدوا يناشبوا فيهم ويسموا في ارقامهم..
وهما الزوز قعدوا يمشوا بسرعه وخوف
سارة:منين طلعوا !؟
تهاني:خفي روحك بسرعه ان شاء الله خليل مش فالورشه ياربي..
🌾فهالوقت..
كان زياد واصل بدايه الشارع..
شافهم من بعيد وهما ماشيات والولاد وراهم..
طول مشالهم جري...
وفي نفس الوقت..
رفيق كان واقف قدام الورشه يستنى فيهم..
لما شافهم جايات ووراهم الولاد عقله طار..
طول قدملهم يمشي بسرعه وغضب..
تهاني:حي ياحي..
جبدت سارة من يدها وقالت..تعالي بسرعه..
وقعدوا يجروا..
واحد من اللي يناشبوا فيهم قال:تي غير لا مش هكي..
التاني قال بضحكه:نجي البيبي كيوت ياااربي..
وقعدوا يضحكوا..
وهما مش منتبهين لرفيق اللي جاي مندفع بغضب..
ولا عارفين بزياد اللي جاي وراهم حتى هويجري ومندفع بنفس الغضب..
زياد شد واحد من الخلف..
ورفيق دف التاني من صدره وهو يقول بغضب:شن دير هني ياولد### انت وياه..
:شارع بوك ياولد####
ويسمع رفيق السبه في امه ويتحول لغول من الغضب هجم ع الولد وقعد يضرب فيه بغل غله..
اما زياد بعد شد التاني من برنوس التوب متاعه من الخلف جبده ودفه بعيد عنه وقال:اقلب وجهك ياكلب..
:برا ياولد ####
وكانت السبه نفسها اللي انقالت في ام رفيق..
وزياد بعد سمعها ولى معاش يفرز في شي طول قدمله وطاح فيه ضرب..
سارة بذعر:حي عليا حي زياد..
تهاني بخوف:تعالي تعالي.
جبدتها وخشوا الزنقه وسارة بدت تبكي..
وهما خاشات شافوا خالد جاي..
تهاني لما شافاته قالت :بابا عركه يابابا رفيق وزياد ولد جيرانا..
خالد انصدم يحساب رفيق وزياد يضاربوا مشي طول يجري...
تهاني لما شافاته ماشي يجري..طلقت سارة ولحقاته..
وساره وهي تبكي لحقتهم..
🌾خالد طلع من الزنقه لقي زحمه قدام الورشه ناس التمت ع العركه بش تحز..
وصل فيهم وخش فالعركه شبح لولده شويه عارفه قد روحه ماخافش عليه لكن وين شاف لزياد وهو عارفه كويس مشاله طول وقعد يحز مع الناس اللي تحز وهو يقول:خلاص يازياد برا روح..
وزياد شي مايبيش يمشي كل مايسمع سبة من الولد يزيد يضرب فيه والولد يضرب والناس اللي تحز غلبت..
اضطر خالد يجي بيناتهم..
في نفس الوقت طلع الولد موس"بو خوصه" بيضرب بيه زياد
جي في جنب خالد..
واحد من الموجودين قال:خالد!
رفيق التفت لبوه لما شافه شاد جنبه ويتوجع طلع اللي كان يضرب فيه ومشاله يجري وهو يقول:بوي..بوي!!
اما زياد وين شاف اللي صار لخالد انصدم بقوة..
قعد واقف يشبحله وخلاص..
والناس التموا ع خالد..
تهاني وسارة وهما يتفرجوا من بعيد ماكانتش الرؤية عندهم واضحه..
تهاني بخوف:في حد صارتله حاجه!
ساره خبطت بإيديها ع وجهها وقالت:زياد!
في هاللحظه..
الولد اللي ضرب خالد هرب..
اما تاني قبل ليهرب استغل انشغال الناس بخالد
وجي لزياد اللي كان مازال مصدوم من اللي صار..طعنه في فخده..وهرب يجري...
وزياد حط يده ع فخده من قوة الألم صرخ بصوت عالي...
سارة شافاته وسمعت صوته عيطت وهي تقول...
"زياد!"
•••••°°°°•••••°°°°°••••
بروحه يفديني..وصدره يحميني..
وكلما قلت ابي..بعطفه يرضيني..
ابي سلام عليه..
نسيبه قعدت تصفق وهي تقول:ماشاء الله ماشاء الله ع قلوب المشماش..
ضحكت اسيمه وقالت:هيا خلاص خل نوضوا وقت سارة وزياد وتهاني يراجو فالغدي..
نسيبه بضحكه؛حتى اني نراجي فيه معاهم..
ضحكوا..
بعدين ناضوا وتوجهوا للسيارة..
وريحان قالت:خل نكملوا النشيد ماما..
نسيبه:ماشاء الله حافظينه كله!نذكر زمان كانوا يعطوا فيه لصغار صف تاني وتالت ابتدائي..
اسيمه:في الروضه متاعهم معلمينهم هلبه حاجات كانوايتعلموا فيها الصغار فالمدرسه زمان..
نسيبه:هو كل جيل تزيد عندهم  قدرة الاستيعاب والفهم اكثر من اللي قبله..
اسيمه:صح...بعدين شبحت لبناتها وقالت:هيا كملوا..
ريحان وجنان مع بعض..
بروحه يفديني..وصدره يحميني..
وكلما قلت ابي..بعطفه يرضيني..
ابي سلام عليه..
▪▪▪▪
◇كم قص لي من حكايا..وجاءني بالهدايا..
ههه..واني لاجيت بالهدايا ولاكان عند بال واسع لقص الحكايا..ولاكنت نقدر نكون اب متفهم لصغاري..
بالذات بعد سمعت اللي صار لزياد وقتها...ااه ع فكره ماسمعتش بيه لامن اسيمه ولامن نسيبه ولامن اي حد في عيلتي..وهدا اللي زادني غضب ع غضبي....

...يتبع...