البطل المغمور "شمس الغروب"

الجزء الثالث

💐..
◇خالد..وولاد خالد..وعيلة خالد..
اممم..نقدر نوصف وجودهم في حياتي بالنعمه..ايه يعني نعم ربي مش شرط تكون حاجات محببه للقلب لا مرات الحاجه اللي مانقبلوهاش ولانحبوها تكون احلى النعم..
علاش وصفتهم بالنعمه؟ هههه...اممم...لهلبه اسباب..هلبه..
▪▪▪▪
ماشيه بخطوات سريعه في ممر المستشفى اللي يرفع لقسم النساء والولاده..
وصلت في مكان شافت فيه حماتها وبنت جارتهم اللي امها قاعده في غرفة العمليات توا..
وقفت عليهم وقالت بقلق:شن صار فيها؟
نسيبه بأسف:حالة اجهاض..
ارتسمت ع وجه اسيمه ملامح الوجع شبحت لتهاني لقتها واقفه ع الحيط وسانده راسها عليه ودموعها ينزلوا وهي تشبح في الفراغ..
شبحت لنسيبه..
نسيبه ضمت شواربها لداخل بأسف وقعدت ساكته..
رجعت شافت اسيمه لتهاني بعدين مشتلها..
وقفت قدامها وقالت:الحمد لله ع كل حال المهم امك بخير بنتي..
تهاني شبحتلها شويه بعدين ارتمت في حضنها وشدتها بقوة وقعدت تبكي..
واسيمه حطت ايديها عليها وقعدت تقول بنبرة صوت كلها ألم:يفوت بنتي يفوت كله يفوت..
ونسيبه تشوفلهم بحزن وعيونها معبيات دموع..
•••••°°°°°°•••••°°°°°••••
خشوا التلاته للمركز يجروا..
وصلوا في غرفة ضابط التحقيق..
خالد بخوف:اني خالد بو رفيق..
العنصر اللي واقف قدام الباب من سكات خش للمكتب..
جهاد:باهي شن داير؟!
خليل بضيق ممزوج بالغضب:خوك امس مروح شارب ..
شبحوله جهاد وخالد..
شويه وطلع العنصر وقال وهو يشوف لخالد:انت بس تخش..
خالد هز راسه وخش..
والولاد قعدوا واقفين برا..
🌿داخل..
قعمز خالد قدام ضابط التحقيق وقاله؛خير يافندي ولدي شن داير؟!
شبحله الضابط برفعة حواجب وقال:ولادك ياما دايرين وكان نقدر نشد عليهم حاجه بالدليل والجرم المشهود وراسك وراس من يتشددلك ياخالد مايطلعوا منها لو شن يصير..
رفع خالد حواجبه ونزلهم وهو يتنهد بملل بعدين قال؛شن داير الولد..
الضابط؛ولدك ضارب واحد امس ع راسه فتحهوله والراجل اليوم قدم فيه بلاغ..
خالد رفع حاجبه وقال:اها مدام هو قدم البلاغ بروحه معناها مافيه شي..ساهله..
رفع الضابط حواجبه وقال:كيف ساهله ان شاء الله!؟
ابتسم خالد ع جنب وقال:مادورش يافندي نحلوها بأرواحنا..
وناض من حداه ومشي للباب فتحه وطلع والضابط يشوفله بغيظ..
🌿خالد مدعوم من ناس كبار في الدوله كل مايخش الحبس مايفوتش اسبوع ويطلع طول..وهادي اول مرة ولاده يصير معاهم شي زي هدا..وطبعا زيه هو زي ولاده ليهم نفس الدرجة من الأهميه عند الناس هادم وحتما حيطلعوا رفيق منها زي ماتطلع الشعره من العجين🌿
مجرد ماطلع خالد من مكتب ضابط التحقيق وكلم الناس اللي يعرفهم..
بعد ماأنهى المكالمه جي لولاده وقال:بالكثير بعد العصر يطلع..
خليل هز راسه وقال:باهي..اني ماشي للمستشفى نشوف امي بنخلي معاك جهاد.
خالد هز راسه وهو مضايق..
جهاد: ماتنساش طمنا ع وضعها..
خليل:ان شاء الله..هوينا..
ومشي طول من حداهم..
جهاد شبح لبوه وقال:تعال قعمز بوي..
مشي خالد للكرسي الوحيد الموجود وقعمز عليه وجهاد قعد واقف حداه...
•••••°°°°°•••••°°°°•••••
"اني نبي نعرف هما شن قعدهم غادي رفعوها المستشفى ولا خلاص شكر الله سعيهم يروحوا طول مفروض"
سارة:حتى اني هكي قلت مفروض وصلوها وروحوا.
زياد:امي ربي يهديها مصرة ادير خلطه مع الناس هادي..امس واني طالع في الليل بش ندخل سيارتها لقيت ولدهم هدا اللي شدوه ماشي يدعدع لحوشهم..
ارتسمت ع وجه سارة ملامح الإزدراء..
ع جية التوأم الزوز وقفوا قدامهم وقالوا:جيعانين..
تنهدت سارة وناضت وهي تقول؛تو نسخن الغدي..شبحت لزياد وكملت تقول..جعان..
زياد:نص نص..
هزت راسها ومشت للكوجينه وخواتها الزوز لحقوها..
اما زياد رفع راسه فوق وغمض عيونه...
•••°°°°°••••°°°°°•••••°°°°••••
واقفه في أخر الممر تتكلم بالتليفون..
اسيمه:كيف تبيني نخليهم عيب هيثم!
هيثم:اسيمه حبيبتي عندها راجل وولاد يضربوا الحيط بإيديهم يهدوه كلموهم يجوها..
اسيمه:باهي لما يجو تو نروحوا..
هيثم:اسيمه قبل العصر تكونوا فالحوش
اسيمه؛حاضر..باهي امتى تروح؟
هيثم:بايت في المستشفى الليله
اسيمه هزت راسها وقالت؛باهي
"اسيمه"..
التفتت اسيمه لنسيبه اللي نادتها لقتهم مطلعين عفاف من حجرة العمليات قالت لهيثم بعجله؛تمام هيثم قبل العصر نروحوا..سلام...ونزلت تليفونها وصكرت ومشتلهم بسرعه..
تهاني ببكي:امي مافيها شي ولا؟
الدكتورة:لا اطمني ماما امك حالها باهي...
ومشت الدكتورة مع الممرضات اللي رافعات عفاف بالباريلا..
حطت تهاني يدها ع راسها و غمضت عيونها براحه وهي تقول:الحمد لله..
اسيمه:بنتي تهاني..
نزلت تهاني يدها وشبحت لأسيمه وقالت:نعم
اسيمه:كلمي حد من خوتك ولابوك يجوا..
كيف جت تهاني بتتكلم شافت خليل كيف واصل ووقف في اخر الممر قالت:اهو خليل...ومشتله..
التفتت نسيبه طول وشبحتله عيونهم جو في بعض..
هي طول غيرت عيونها عنه..
اما هو قعد يشبحلها لين وصلت فيه اخته وقالت:شن صار في رفيق؟
خليل شبحلها وقال:امك شن صار فيها؟
نزلت عيونها وقالت:خسرت البنيه لكن حالها باهي..
تنهد خليل بضيق وقعد ساكت
قامت تهاني عيونها فيه وقالت:رفيق شن صار فيه؟
هز راسه وقال:حكايته محلوله يطلع العشيه
تهاني:شن داير؟
خليل؛متعارك هو واحد..المهم توا خالاتك وين؟
تهاني بتهكم:خالات العازة يعرفوا يجوا لما يبوا مصلحه بس..لولا خالتي اسيمه وحماتها الله اعلم شن كان صار في امي..
شبح خليل لنسيبه اللي كانت واقفه ع مرت خوها ويهدرزوا..
مشي ناحيتهم واخته ماشيه وراه..
هو عيونه بس ع نسيبه لعند ماوصلوا فيهم قال وهو يشوف لأسيمه:السلام عليكم..
الزوز ردوا:وعليكم السلام..
خليل:بارك الله فيك خالتي اسيمه ياريت تروحوا ترتاحوا تعبانكم معانا..
اسيمه:تعب شني ياولدي رانا جيران..المهم توا امك حالها باهي وهي محتاجه تقعد في المستشفى اسبوع ع حسب ماقالت الدكتوره..
هز خليل راسه وهو منزل عيونه لوطا..
ونسيبه تشوفله بطرف عينها من فوق لتحت..
اسيمه:شن صار في خوك؟.
خليل:الامور تمام مشكله بسيطه طالع منها ان شاء الله..
اسيمه؛باهي الحمد لله..اني توا بنروح العشيه ان شاء الله موليه..
خليل:بارك الله فيك ربي يحفظك..
ابتسمت اسيمه وقالت؛ويحفظك ولدي..
شبحت لتهاني وقالت:حبيبتي تهاني روحي معاي غيري وكولي حاجه والعشيه نولي بيك..
تهاني بضيق؛مانبيش نخلي امي..
خليل:اني قاعد روحي توا..
تهاني قعدت تشبح لخوها بضيق..
خليل:قلت روحي..
تهاني هزت راسها ونزلت عيونها لوطا وهي مضايقه ع الآخر..
اسيمه؛تمام..شبحت لخليل وقالت..لاباس ع امك..بعدين شبحت لتهاني ونسيبه وقالت؛هيا..
نسيبه مشت طول بدون ماتقول كلمه..
هو ابتسم ابتسامة خفيفه..
اسيمه:السلام عليكم..
ومشت هي وتهاني..
وخليل رد عليها السلام وقعد يشوفلهم وهما يمشوا وعيونه تبتوا ع نسيبه..بعد ادرقت ضحك..بعدين لف ومشي يدور ع حد يفيده في معرفة تفاصيل حالة امه..
•••••°°°°°••••°°°°••••
بعد ماحطت أسيمه تهاني في حوشهم..
ولت لحوشها..
كانت نسيبه سابقتها وخاشه قبلها..
🌿🌿
خشت للحوش سمعت صوت ضحك زياد وسارة وسمعت نسيبه تهدرز..
ابتسمت بعدين صكرت الباب ومشتلهم وين ماهما في الصاله..
خشتلها وقالت:السلام عليكم..
ردوا عليها السلام وزياد قال...
زياد:وين هدا كله يام؟
اسيمه جتهم وهي تقول:اهو جيت..
وقعمزت جنبه..
هو حط راسه ع كتفها وقال؛اول مرة نتغدوا وانتي مهناش..
نسيبه:اكبر يادعوة اكبر وليت طول كونشيلو المدرسه راك..
ضحكوا..
زياد بضحكه:مع امي انا مهما كبرت صغير..
ضحكت امها وقعدت تمسح ع خده بيدها..
نسيبه:مش سامع بأغنية انا صرت كبيرا ياماما هاانا اكبر عاما عاما..والعام فوق العام لين ولوا 18 واني في عمرك ركبت الموطو ودرت بيه طرابلس كلها..
سارة:هيييي!!
نسيبه:لبست حوايج ولد خالي سليم الله يذكره بالخير وهديكا الطاقيه والنظارات تشوفيني وانتي تعرفيني تحلفي تقولي ولد..
زياد بضحكه:هو مش تقولي ع فكره..
خدت المخده وحدفاته بيها وهما يضحكوا..
نسيبه:ناقص الا انت ياوليد ماما..
اسيمه بضحكه:ايه حقه هيثم قالي سيارتك انخنبت وتوا شفتها معاك كيف صار؟
زياد وسارة شبحولها وهما متفاجئين..
نسيبه عقدت حواجبها وقالت:اشبح من دار فيا مقلب خداها وردها..اليوم الصبح لقيناها فم العمارة..
ساوا زياد تقعميزته وقال:كيف كيف!؟
نسيبه حركت يدها من تحت لفوق وهي تقول؛خلاص فوت..
زياد:لا شن نفوت هادي! قولي من دار فيه هكي؟من المدرسه؟
نسيبه شبحت لمرت خوها وقالت:اسيمه..
زياد:اشبحيلي هني وقولي كان تعرفي مني؟
اسيمه؛عنده حق يانوسه كان في حد حاطك في راسه مرات لاقدر الله يديرلك حاجه خطيره..
نسيبه ضحكت بربكه وقالت:كبرتوها ياعيله وهي صغيره هادي فرخه كنت كاسرتلها راسها قبل ايام الكراتي قداش ليها تتحلف فيا..
سارة:هادي شكلها حاطه عليك نوسه..
نسيبه:من الغيرة اللي واكله كبدها خلها ادير مقالب لين تعييا مانيش حاسبتها حتى ذباته تزن..
زياد قعد يشبحلها بشك..
وسارة كذلك مش مصدقتها..
ولا اسيمه اللي غيرت الموضوع وهي تقول: ايه..شنجو خالتي ماجده خيرها معاش تجي زي قبل؟
نسيبه؛اووسكتي..مش ياحنه الفالحه تبي تتزوج..
زياد ضحك نص ضحكه..
وسارة شدت ضحكتها..
اسيمه:معناها في موضوع جديد؟
نسيبه:ايه..بيني وبينكم ان شاء الله تشد معاها المرة هادي  ويصير منها..
اسيمه بإبتسامه:ان شاء الله..
زياد:وانتي؟
عكرشت وجهها وشبحتله بإزدراء من فوق لوطا..
زياد:ههههههه..
اسيمه بضحكه:يعني من جدك نوسه مش مفكرة بكل..
حركت سبابتها بالنفي وهي تقول:ابدااااا..ولايمكن نرضى ناخد واحد متخلف يتحكم فيا ويمشيني ع كيفه..
اسيمه بضحكه:مرات تحصلي واحد زي خوك هيثم..
نسيبه:لاهيثومه مافيش منه زويز وخيي..نوعيته انقرضت..
سارة وزياد شبحوا لبعض..
اسيمه بإبتسامه:انتي كان تنوي تو تلقي..
نسيبه شقلبت عيونها بملل وقعدت ساكته..
وهما يضحكوا عليها...
•••••°°°°°••••••°°°°°•••••
انفتح باب غرفة عمليات طلع منها ونزل الكمامه وهو مبتسم وقال لأهل المريض اللي جوه بلهفتهم:الحمد لله ركبنا الصمام وماصارش للوالد اي مضاعفات..
اهل المريض تنفسوا الصعداء وبنت دعت:الله يبشرك بالخير يادكتور..
هيثم هز راسه وهو مبتسم بعدين قال:بيطلع توا لغرفة العنايه ويقعد تحت المراقبه 48ساعه بش نطمنوا اكثر..
ولد المريض قال:يعني اكيد دكتور مافي شي يخوف...
هيثم ابتسم وقال:بفضل الله مافي شي يخوف...
▪▪▪▪
◇الخوف اللي شفته فيهم ع بوهم خلاني نذكر كلام اسيمه
في اللي تثمر فيهم الربايه والتعب وفي اللي لا..بصدق وصراحه لعند هديكا اللحظه ماكنتش واثق اني حنلقى صغاري مستقبلا مش عارف وقتها علاش هالإحساس عندي كان قوي..
لا..كنت نعرف..السبب كان واضح..اللي يزرع الورد يطلعله ورد واللي يزرع حنضل مش حيطلعله غير الحنضل..
هو احيانا الوالدين اللي يأدوا واجبهم ويحبوا صغارهم من قلوبهم مايحصلوا شي من صغارهم في الكبر غير الخذلان والنسيان والتجاهل..
بس الوالدين اللي قصروا في حق صغارهم وعاملوهم بجفاف وقسوة حتما مش حيلقوا من صغارهم غير المعامله بالمثل..
هو في عبارة نعرفها في من قال حديث نبوي وفي من قال مقوله لسيدنا عمر بن الخطاب
《بروا ابنائكم قبل ان يبروكم》 وان كان حديث ضعيف اولا يصح وان كانت مقوله لأحد الصحابه فهي صحيحة مية فالميه..
الوالدين لازم يبدوا بالبر بش يلقوه..
البر اللي يجي من القلب...مش البر اللي يجي بالغصب
واني كنت من الآباء اللي يبوا البر بالغصب...
▪▪▪▪
بعد العصر...
اول ماطلع جي لبوه طول كب ع يده..
خالد حول يده وحطه ع كتف ولده وقال:شن دارلك الكلب بش ضربته هكي؟
رفيق وهو رافع حاجبه بشي من الغضب:لبز في الكلام..
جهاد:كنت شارب..
رفيق شبح القدام وهو مضايق بدون مايرد..
خالد:خلاص عدت ع خير..
طبطب ع كتفه ومشي وهما الزوز لحقوه..
رفيق:امي صارتلها حاجه بعد خدوني؟
خالد قعد ساكت.
وجهاد قال بضيق:تعبت رفعوها المستشفى..
رفيق بخوف:شن صارلها؟
جهاد بشي من الألم:خسرت العيل..
رفيق شبح القدام وهو حاس بقلبه موجوع ع امه وكره نفسه اللي تسببلها فهالألم..
•••••°°°°°••••°°°°°•••••
في المستشفى..
قدام الباب..
اسيمه:عيب تجي هني وماتخشش داخل..
تهاني قعدت تشوفله بضيق..
زياد:بالله خشي بسرعه وماتقعديش اكثر من ربع ساعه..
فنصت فيه امه..غير عيونه عنها اللي كانوا مدرقات بالنظارات وشبح القدام..
حركت امه راسها يمين ويسار بعدين شبحت لتهاني وقالت:تعالي بنتي..
مشت اسيمه خشت وتهاني وراها...
وهو قعد واقف في ساحة المستشفى..
شوية وجت سيارة خالد..
شبحلها زياد ورفع حاجبه..
درست..وانفتحوا بيبانها..
نزل رفيق ومشي طول بإتجاه الباب ماشبحش زياد وهو خاش..
وزياد كان يشوفله بطرف عينه من ورا النظارات..
اما خالد وجهاد نزلوا وقعدوا واقفين حدا السياره..
■فوق...
وصلوا اسيمه وين ماموجوده عفاف..
خشولها..
وخليل قاعد مقعمز برا..
ع جية رفيق يجري..
شافه خليل لما شبح يمينه ناضله طول..
شده من ذراعه وقال:شن صار بينك وبينه اللي ضربته.
رفيق وهو داهش:قبلها..امي شن حالها؟
خليل هز راسه وقاله:كويسه..قولي شن صار بينك وبينه؟
رفيق تنهد بضيق وقال:التافه وصل في بوك بكلام زي خليقته المغضوب عليها..
خليل هز راسه وقال بغضب:عرفته مني..الطريحه الباهيه مازال ماكلاهاش..
رفيق شبحله شويه وشبه فهم ع خوه بعدين قاله؛عادي نخش لأمي؟
خليل اشر براسه ع الدار اللي فيها امه وقال:عندها خالتي اسيمه واختك..
رفيق برفعة حواجب؛خالتي اسيمه!
خليل بتهكم:خالتك اللي حناك ماجابتهاش
رفيق بإزدراء:تفي..الكلاب لما يبوا حاجه يجوها يجروا
خليل حط ايديه فجيوبه وشبح لباب غرفة امه وهو مبتسم بتهكم..
■داخل..
عفاف بتعب:بارك الله..فيك يااسيمه..
اسيمه بإبتسامه:رانا جيران ياعفاف مش بيناتنا نلقوكم وتلقونا..
تهاني شبحت لأسيمه بإبتسامه..
عفاف ابتسمت بتعب وقعدت ساكته..
اسيمه:مانبوش نكتروا عليك هيثم ديما يقول ع زيارة المريض ارحم من زار وخفف..
ضحكت تهاني..
وعفاف حتى هي..
اسيمه بإبتسامه:ربي يعوضك خير..
عفاف طول حركت راسها بالنفي وهي تقول بصوت متعب:لالا..ماتدعيش هكي..معاش نبي..
تلاشت ابتسامه اسيمه وهي تشوفلها..
اما تهاني ارتسمت ع وجهها ملامح الحزن وعيونها تعبوا دموع..
مابتش اسيمه تناقش عفاف ابتسمت تاني ابتسامه مجامله خفيفه وقالت:الحمد لله ع سلامتك..وغدوة ان شاء الله تو نجي..
ابتسمت عفاف وقالت:الله..يسلمك..
اسيمه هزت راسها وهي مبتسمه بعدين لفت ومشت للباب وتهاني مشت معاها بتسقدها..
طلعوا الزوز وصكروا الباب..
وعفاف قعدت تشبح للباب وعيونها يدمعوا..
فجأة انفتح الباب وخش رفيق لما شافاته ارتسمت ع وجهها ملامح الفرح وهي تقول:ولدي!..
هو صكر الباب وجاها طول وقال:سامحيني يام..وطبس كب ع راسها...
وهي ادمع هالمرة من الفرح..
•••••°°°°•••••°°°°°•••••
وصلت تهاني بأسيمه لبرا المستشفى..
اسيمه:خففي عن امك بنتي ماتزيدهاش..
تهاني بحزن وهي تمسح فدموعها:مش بيدي خالتي اسيمه والله مانقدر..
اسيمه حطت يدها ع ذراع تهاني وهي تقول:عارفه ومقدره الوضع لكن انتي لو فعلا تحبي امك وتبيها تقاوم معاك قويها وأقوي معاها..
تهاني رشفت وهي تهز فراسها وقالت:ان شاء الله..
مسحت اسيمه ع ذراعها بلطف بعدين قالت:الحمد لله ع سلامة ماما مرة تانيه..
تهاني ابتسمت من بيندموعها بعدين ضمت اسيمه وهي تبوس فيها من خدودها..
واسيمه مبتسمه..
تهاني وهي تسلم ع اسيمه بالخد عيونها بنظره عابرة جو ع زياد اللي كان يشبحلهم لما شبحتله طول شبح القدام..
هي ارتبكت بعض الشي..
بعدين بعدت عن اسيمه وقالت؛بارك الله فيك خالتي..
هزت اسيمه راسها وهي مبتسمه..
بعدين مشت..
وزياد مشي قبلها وهو حاط يده في واحد من جيوبه..
تهاني قعدت تشوفله وهو يمشي بعدين قالت:غير شبحاته  يسدوا بش نكره عمري..ومش شبحاته هو بس الناس كلها تشوفلنا بنفس النظره..
شويه وغيرت عيونها جو ع بوها وخوها..
شافت جهاد يأشرلها بيده تجيهم..
هي شبحتلهم بكره بعدين مشتلهم..
🌾في سيارة اسيمه..
اسيمه وهي تشوف لتهاني ماشيه ناحية بوها وخوها قالت:قداش واجعتني البنت هادي حالهم مخليها تحس بالنقص والأصعب من هكي انها كارهه بوها هلبه..برغم انها بنية حساسه وخلوقه ومتفوقه فقرايتها واني متوقعتلها مستقبل حلو لكن خايفه تخسر نفسها وهي فهالسن الحرج من المشاكل اللي قاعده تصير معاهم..
هي تهدرز..
وولدها مركز بنظره ع تهاني..حسها تشبهله في هلبه حاجات ومنها حالة النفور اللي منها تجاه بوها..
حركت اسيمه سيارتها وقالت؛ربي يكون في عون عباده ياولدي
وزياد غير عيونه عن تهاني وشبح القدام وهو مازال محتفظ بصمته
🌾تهاني بحده:كويسه
جهاد؛ردي كويس خير مانعطيك كف..
خالد:جهاد!
جهاد:تنرفز يابوي..
قلبت عيونها وغيرتهم عنهم وشبحت لتركينه تانيه وهي رافعه حاجبها..
خالد:تو نطلعها لعياده خاصه..
شبحتله وقالت بحده؛امي مش طالعه من هني..
جهاد كابت غضبه عنها بالسيف..
خالد تنهد وقال:اني حالف انتي امك مانصرف عليكم كان الحلال ولتوا والله ماصرفت عليكم غير الحلال
هي شبحتله شويه بعدين قالت:دير اللي تبيه..
ولفت ومشت وخلتهم..
جهاد:تبيها الطريحه بنتك هادي..
خالد مط شواربه بملل وهو يشوفله..
جهاد غير عيونه عنه وقعد ساكت..
🌿وفعلا نقل خالد مرته لعياده الخاصه بش تحصل ع اهتمام افضل وبنتها تهاني قعدت معاها مرافق🌿
••••°°°°°•••••°°°°°••••
يوم الجمعه..
الساعه العاشرة صباحا..
وهما يشربوا في القهوة في الكوجينه..
اسيمه:ياريت شفت الموقف ياهيثم..
هيثم بعد رشف من القهوة قال:مش اول مرة..
اسيمه:لكن الموقف هدا غير حال عفاف يقطع القلب..
هيثم؛كان الله في عون عباده.
هزت راسها وهي تشوف لفنجان القهوة وقالت بحزن؛آمين..
هيثم ابتسم وقال:بعيد ع النكد..اليوم العشيه بيجوا ناس يخطبوا مني خالتي ماجده..
اسيمه بضحكه:حكتلي نوسه..
هيثم:برغم اني مش راضي الحق بس هي توا وصلت لسن يخليني نتحشم نبدي اعتراضي يعني هي واعية وناضجه وتتحمل بروحها مسؤولية اختيارها..
اسيمه:باهي هي شن قالتلك عنه؟
هيثم:راجل متزوج وصغاره كبار..ضحك وهو يقول..ولده الكبير بيجي معاه..
اسيمه حطت يدها ع فمها وقالت بصوت مكتوم:تخيلت لو انت تجي وتقول لزياد تعالي معاي اخطبلي..
هيثم مرر سبابته ع رقبته:يذبحني طول فرصه ويراجي فيها..
اسيمه حولت يدها وقالت؛بطل تشوف لولدك بهالنظره ولدك هدا هيثم مش عدوك..
اشر بإبهامه للخلف وهو يقول:قوليله هو الكلام هدا مش اني..
ع خشة سارة عليهم قالت:صباح الخير..
ردوا الزوز:صباح الورد..صباح الخير..
مشت طول صبت ميه في طاسه من شيشة مية معدنيه وشربتها وبوها يشبحلها..
بعد حطت الطاسه قاللها:اقعدي ساعه ماتاكلي شي..
التفتت سارة وشبحت لأمها..
هيثم:اني اللي كلمتك مش امك..
شبحتله وقالت بضيق:حاضر..
ومشت طلعت من حداهم..
شبح لأسيمه وقال:حتى النصيحه من الاكبر منهم مايبوهاش يبوا يديروا مافي روسهم وبس..عليك جيل..بعدين خدي فنجان القهوة ورشف منه..
 واسيمه حطت يدها ع خدها وتنهدت بملل وهي تشبحله..
▪▪▪▪
◇هو الأب لما يقدم النصح هو هكي يقدم في الحب راهو غير الصغار قليل مايستوعبوا شي زي هدا..اني نعرف شن يصير للواحد لما ياكل حاجه بعد يشرب ميه ع الخوا الصبح وبنتي هادي تعشق القهوه بعد تشرب ميه طول تشربها وهالشي يتسبب في اضطرابات للجهاز الهضمي..يعني اني خايف عليها..هي هني فهمتها فهم خاطئ بس شن هو مش عارف المهم ان نصيحتي ماعجبتهاش من مشيتها اللي كلها غضب وهي طالعه من الكوجينه زبطتها
الصراحه..عندها الحق...لأن الأسلوب اللي عطيت بيه النصيحه كان غلط...مافي حد يقبل نصيحه تنعطى بأسلوب فظ وغليظ..حتى لو كانت هالنصيحه من الوالدين
▪▪▪▪
انت صغارك تربوا تربيه مختلفه وفي بيئة تختلف عن غيرهم بهلبه ياهيثم
يعني لو يشوفوا حال صغار عبدالمجيد وبوهم يبلغ فيهم ان حيتزوج
ولا الأسلوب اللي يبلغ فيهم بيه يكتشفوا انك نعمه هما مش حاسين بيها..
🥀بنجيبها فالشقه اللي فوق هادي..
قال الجمله هادي وبناته منزلات عيونهم وشادات دموعهم بالسيف...
لما بوهم شري الشقه اللي فوقهم يحسابوه واخدها لمجاهد بش يتزوج فيها مش بش يتزوج هو فيها..
عبدالمجيد؛العشيه تركبوا الزوز تسيقوها وتنظفوها كويس نبيها تبرق برق
الزوز يسمعوا وقلوبهم تتقطع من الوجع..
عبدالمجيد؛سمعتووني!؟
هزوا روسهم بإيجاب
عبدالمجيد وهو ماشي:كان ماقدرتوش برواحكم قولوا لأمكم تعاونكم ومشي طلع من حداهم..
دانيه بهمس ودموعها ينزلوا قالت بغضب:مشيه بلارجعه.
مسحت رتاج دموعها وقالت:ايه والله..شبحت لأختها وقالت..امي وين؟
دانيه:اتسيق فالكوجينه..
رتاج حطت ايديها ع وجهها وقعدت تبكي بألم ع حال امها..
🥀عارفيها تسيق فالكوجينه وهي تبكي عادتها في كل مرة يبلغ فيها عبدالمجيد عن زواجه..
وهالمرة الوجع اقوى لأن اللي بياخدها حتعيش فوق راسها يعني حتشوف قهرتها بعيونها هالمرة اربعه وعشرين ساعه..
بس اللي كان في موقف صعب فعلا..
الإبن البار بكل معنى الكلمه مجاهد..اللي مايقدرش يعصي بوه ولايعارضه وقلبه موجوع ع امه..يبي يديرلها اي شي بش يجبر كسرها..
وع طول تصرف وماتأخرش وحينفذ بعد مايتم موضوع بوه..
🌿🌿🌿
الساعه السادسه إلا ربع عصرا..
في مربوعة شقة خالة هيثم ماجده..
كانوا مقعمزين هيثم وولد خاله سليم مع عبدالمجيد وولده مجاهد..
هيثم ماحبش عبدالمجيد لكن اعجب هلبه بولده مجاهد..
باسلوبه الجميل وهو يتكلم عن بوه والوعود اللي كان يعطي فيها بش يطمنهم من ناحيتهم هما صغاره انهم مش حيتعرضوا لماجده بأي سوء..
هيثم:والله بالنسبة ليا اني مادام هي عاجبها الموضوع وراضيه ومقتنعه بيه عليا اني نبارك وخلاص
عبدالمجيد بإبتسامه:وبإذن الله مش حتندموا..
سليم رفع حواجبه وقال:ان شاء الله..
ابتسم مجاهد مجامله وشبح لبوه لقاه يشوف لهيثم وسليم بنفس الإبتسامة..
••••°°°°°
منظره يجيب القداد ياخالتي..
شبحتلها ماجده من فوق لتحت وهي توتي في صفرة العصير..
نسيبه بإزدراء:شفتي لحيته والشلاتيت اللي لابسهم داعشي من عند غادي والله لما يكرهك في عيشتك..
مطت ماجده شواربها بملل وكملت شغلها..
نسيبه وهي ترقص فحواجبها:موجي راهو معاش في مسلسلات تركيه..معاش في اغاني معاش في فيس وسناب وهياجه..!
قلبت ماجده عيونها وشبحتلها وقالت؛ياحبيبتي انتي فاهمه غلط اني متعرفه عليه فالفيس وقعدنا تلاته شهور نهدرزوا ع الماسنجر وهو يحب يسمع لكاظم وبوسي..ويموت في قيامة ارطغرل وولده..ومتفرج زمان ع وادي الذئاب.
رفعت نسيبه حاجبها اليسار وقالت:اني هدا وين زدت خفت عليك ياموجي!
ماجده رفعت الصفرة وقالت؛خافي ع روحك وفكري في نفسك بس نواسه..
ومشت طلعت بيها من الكوجينه ونسيبه تشبحلها وتقول:نقعد بروحي طول عمري ولا نطيح طيحتك..
🌿بعد ماضيفوهم..
خشت ماجده للنظرة الشرعيه لما شافها عبدالمجيد هبل فيها هبال وحدد موعد الزواج مع هيثم وسليم بعد شهر وبالسيف خلاه شهر بطلب من ماجده بش تلحق توتي روحها..
🌿🌿🌿🌿
وعدى من هداكا اليوم اسبوع..
طلعت فيه عفاف من العياده..
وتفاجئت بعشية نفس اليوم بجية اغلب جاراتها مع خواتها..
طبعا خواتها جو قطع ملام...
اما الجارات جو بسبب مواصله اسيمه ليها واسيمه معروفه من تكون ومدام هي مازال تواصل في عفاف علاش هما يقطعوها؟!
🥀وحده من الجارات:ربي يعوضك خير ياوخيتي..
عفاف:والنبي معاش تدعولي هالدعوة..اني اصلا فرحانه باللي صار وحده بختها زي بختي مفروض معاش تجيب صغار بالذات البنات..
تهاني نزلت عيونها لوطا وهي شاده دموعها بالسيف..
وأسيمه تشبحلها..
اما باقي الموجودات ماقدروش يقولوا لعفاف شي قعدوا يشبحولها وخلاص..
🌿عندها الحق العيل اللي بتجيبه حيكون ضحية جديده حيخسر مستقبله سواء كان ذكر ولاأنثى..
وفي نساوين فالمجتمع عكس عفاف نساوين عايشين وضعها ومش هامهم شي تجيبهم ورا بعض وكلهم يتربوا اسوأ تربيه ويخشوا ع طريق الإنحراف بكري..يزيدوا في مجتمعنا العاهات وهو مش ناقص!🌿
••••°°°°°••••°°°°••••°°°°°•••••
طلع من داره وهو ينادي:ساارة..سااارة..
"في صاله يازيزو"..
مشي طول للصالة..
خشلها لقي سارة مقعمزة تقرا وخواتها بحداها يكتبوا في واجبات فرضتها عليهم الروضه.
شبحوله وهو يقول:كان نقولك من كلمني توا..
سارة بإبتسامة لهفه؛مني؟
زياد:مدير المدرسه مش نشروا صور المعرض ع الصفحة في من ناس يخدموا في وزراة الثقافه شافوهم وعجبتهم اللوحه متاعي
سارة:الله!
زياد بضحكه:مش هكي بس..بيديروا مسابقة ع مستوى البلاد اختاروني المدرسه نشارك فيها
خواته الصغار الزوز صفقوا مع بعض من الفرحه..
شبحلهم هو وقال بضحكه:فهمتوا شن قلت؟!
ريحان؛ايه بتشارك في مسابقه جديده وتفوز مرة تانيه..
جي لريحان طبس باس راسها وقال:يسمع منك ربي حونه..
جنان بغيرة:حتى اني جيت بنقول زيها..
ضحكت سارة..
جاها وهو يضحك وطبس باس راسها حتى هي..بعدين وقف ع حيله وقال:امي قاعده ماروحتش؟
سارة بإبتسامه؛لالا مازال..
زياد:بوك قاللها عشرة دقايق وروحي وتوا صبحت فربع ساعه..
ضحكت سارة وقالت:هي تساير فيه مسايره لما تقوله باهي..
ابتسم ع جنب بعدين مشي وهو يقول:لما تروح قوليلها تجيني الدار..
سارة:باهي...
طلع من حداهم..
جنان:سارة..
سارة:همم..
جنان:زياد بيفوز ولا؟
سارة:ان شاء الله يارب..
الزوز مع بعض قالوا:يارب..
ضحكت سارة وقالت:كملوا واجبكم هيا..
الزوز:باهي..
ورجعوا يلونوا في كراساتهم...
وهي ولت تقرا..
🌿في نفس الوقت..
في بداية الشارع..
خشت سيارة عمتهم جايبه معاها خالتها..
ماجده وهي تشوف لورشة خالد شافت خليل يصلح في سيارة برا وواقف معاه صاحبها..
قعدت تغني:الزرق عيونو ياولا..الزرق عيونو ياولا..
شبحتلها نسيبه ع جنب وقالت:حتى بعد ماانخطبتي ماتبيش تعقلي!!راهو بعد اسبوعين بتتزوجي!
ماجده بضحكه:صدق من سماه شارون! ياريته شارون كل حبيب يدير بعيونه مذابح صبرا وشاتيلا في قلوب العذارى..شبحتلها ع جنب وقالت..ياااعذارى انتي
نوسة غمضت عيونها وفتحتهم بنفاد صبر..
لما قربوا يوصلوا فالورشه قالت ماجده:وقفي خل نسلم عليه..
نسيبه:سلمي عليه بعيد عني..
ماجده:الله كان ماوقفتي لما نحكي لهيثم ع اللي صار فسيارتك وخله يحنطك فالحوش..
ولأن نسيبه تعرف خالتها كويس..
انجبرت توقف قدام الورشه..
قلبت وجهها الجهة التانيه..
وخالتها نزلت المرش وقالت:خليل..ياخليل..
خليل قام عيونه وشبح ايساره..
هو مجرد جو عيونه ع سيارة نسيبه قلبه قعد يدق بقوة قال للراجل:شويه وجاي..
ومشي طول لماجده..
وقف قربب منها بمسافه وقال بإبتسامه:شن حالك خالتي ماجده..
ماجدة: الحمد لله شن حالك وحال وخيينك وامك..
خليل وهو يسرق في النظر لنسيبه؛تمام الحمد لله..
ماجده:امور الخدمه ماشيه تمام؟
خليل:تمام التمام..
ماجده؛ان شاء الله دوم..والله انتم تستاهلوا كل خير..
خليل:تسلمي بارك الله فيك..
ماجده؛اسمع بنقولك عرس خالتك ماجده بعد اسبوعين.
ضحك وهو متفاجئ وقال:مبارك مبارك..
ماجده:تسلم..والفال ليك ولوخيينك..
خليل وهو يشوف لنسيبه اللي قالبه وجهها:ان شاء الله..
ماجده:المهم نبيك تقيمها بخالتك ماجده عمك هيثم قالي بيعزمكم يغيب منكم حد نهار الفاتحه نطلق عليه نوسه..
التفتت نسيبه لخالتها وهي تفنص فيها..
خليل وخر خطوة والتفت وقعد يضحك..
ماجده بضحكه:المهم تجوا ايوه..
هز راسه بعدين شبحلها وهو يضحك قال:حاضر..
ماجده؛سلمه ياربي..هي برا كمل خدمتك ولدي ربي يفتح عليك..
خليل:بارك الله فيك..ولف ومشي للورشه.
ماجده ساوت تقعميزتها وقالت:هي تحركي..
نسيبه ضمت شواربها بغضب بعدين خبطت بإيديها ع الدومان وتحركت وهي تقول:غير جيتي خالتي بس..
وماجده تضحك عليها..
تحركت نسيبه وهي تحرق في العجل وخليل وقف ع السيارة وقعد يكلم فالراجل ويقوله وعيونه ع نسيبه وهي تسوق بغضب؛ايه هادي تبيلها هلبه خدمه...
•••••°°°°°•••••°°°°°•••••°°°•••••
المرة هادي امي والجايات ان شاء الله انتم..
رتاج وهي مبتسمه بفرح؛مش مهم حني المهم امي..
دانيه:تكلمي ع روحك اني نبي نسافر..
ضحك مجاهد وقال؛ان شاء الله في عطلة الصيف..
دانيه بضحكة فرح:نراجي بفارغ الصبر..
رتاج جبدتها من يدها وقالت:تعالي معاي نوتوا العشي..
دانيه؛وواااك منك يانكد..
ضحك مجاهد عليهم بعدين لف ومشي لداره..
فجأة وقف لما سمع بوه قال:مجاهد.
التفت وقاله:نعم..
وصل فيه وقاله؛راني مش راضي عن سفر امك ع خاطرك بس قلت باهي..
مجاهد ابتسم وقال:حتى امي مش راضيه ومجبورة تقبل ع خاطرنا..وهدا اقل حقوقها اللي درتهولها..كيف ماانت قاعد تعيش حياتك ع راحتك حقها هي تعيش لراحتها..
عبدالمجيد بإنزعاج؛ياودي ديروا اللي يعجبكم المهم تفكوني من نكدكم...
ولف ومشي وخلاه..
اما مجاهد تنهد بضيق بعدين كمل طريقه لداره...
•••••°°°°°°•••••°°°°°••••••
الساعه السابعه والربع مساءا..
"لا والله مادخلي حفلتي فالصاله"
هيثم بضحكه:ديريها حتى في فندق..
ماجده رفعت ايديها وهي ضامة قبضاتهم:يعيش ولد اختي..والموت للمنكدين..
نسيبه بإمتعاض:كانك عليا ديريها حتى في ميدان الشهداء..
ضحكوا..
بعدين هيثم مشي من حداهم وهو يضحك..
وأسيمه طلعت وراه وحتى هي تضحك..
وهي ماشيه خدت صحيفه سارة اللي كانت محطوطه ع الطاوله..
خش لدار النوم..
وهي خشت وراه وصكرت الباب..
حط شنطته لوطا وبدي يحول في دجاكته وهو يشبحلها..
جاته ومدت الصحيفه وقالت؛صحيفة بنتك سارة متاع الفترة التانيه..جايبه الترتيب الأول..
حط الدجاكه ع السرير وخدي الصحيفه وقعد يشوفلها تنهد بعدين قال: خاطري ولو لمرة وحده نلقاها مصكرة الدرجه في الرياضيات ولا العلوم...
اسيمه؛وشن قعدلها ع الدرجه الكامله درجه بس.
هيثم شبحلها وقال:شن ناقصها بش تصكرها وهي احسن المدرسين يدرسوا فيها فكل موادها وانتي امها مدرسة رياضيات شن ناقصها بش تجيبها مصكرة ؟!
تنهدت وقالت:هدا علاش قالتلي اني نعطيهالك توقعها..
تنهد وحرك راسه يمين ويسار وخدي البيرو من جيب سوريته ومشي وقف بيها ع الطاوله ووقع تحت كلمه توقيع ولي الأمر..بعدين مدها لمرته..
خدتها منه..
وهو وقف ع حيله وبدي يفك في أزرار قميصه..
شبحلها لقاها تشوفله مط شواربه بملل وقال:بتقولي حاجه ليها علاقه بولدك؟
اسيمه؛ولدك حتى انت..
نزل ايديه وحطهم فجيوبه وقال؛شن في؟
اسيمه ابتسمت وقالت:اختاراته المدرسة بش يمثلها في مسابقة فنيه دايرتها وزارة الثقافه..
رفع حواجبه ونزلهم وقال:موفق..
اسيمه غمضت عيونها وفتحتهم بضيق بعدين قالت:غدوة يبي يمشي لزردة هو واصحابه هني في *****..
عقد حواجبه وقال:من هما اصحابه هادم؟
اسيمه:نوسه تعرفهم كويس ولاد كويسين..
هيثم:بيتان لا..
اسيمه:لالا من الصبح للمغرب بس..
هيثم:بعد المغرب يكون في الحوش..
اسيمه:هيثم..ولدك السنه الجايه بيخش الجامعه عامله معاملة راجل ارجوك..
بدي يفك فأزرار قيمصه وهو يقول:لما نشوف منه تصرفات راجل تو نعامله ع انه راجل..
اسيمه سكتت شويه بعدين حكت مقدمة انفها وقالت:تمام مانبيش نزيد اناقشك لأنه مش وقته توا..بعدين نتفاهموا..
ولفت ومشت فتحت الباب وطلعت وصكراته وراها..
هو حول قميصه وقعد يشوف للباب بضيق
▪▪▪▪
◇زياد ولدي هداكا الوقت كان في سن حرج مراهق وكنت خايف عليه من اللي يصير برا ونسمعوا عنه ونشوفوا فيه..في الحقيقه الخوف ع الولد اضعاف الخوف ع البنت من المحيط الخارجي..
الولد لو انحرف من الصعب يجي للطريق مرة تانيه..
واني وقتها ما كنتش فاهم ان الحرص الشديد زي الأهمال غالبا نتيجتهم تكون وحده....

...يتبع...