البطل المغمور "شمس الغروب"

الجزء الثاني والعشرين القسم الثاني

💐...
في الطريق..
يسوق في سيارته متوجه لمكان ما..ومازال قاعد يراجع نفسه ويفكر في القرار اللي خداه...
شبح للخريطه اللي في شاشة سيارته بعد سمعها تنطق بقرب وصوله للهدف..
تنهد وقال:ربي آتني من لدنك رحمة وهيئ لي من أمري رشدا...
وصل للمكان المقصود..
قعد يشوف جنبه في الحياش ماعرفش اما واحد فيهم اللي يبيه..
لقي قدامه شاب وقفله وهو يقول:لو سمحت ياشاب..
الشاب التفتله ووقف طبس ع روشن السيارة وقال:تفضل..
هيثم:بالله بنسألك على حوش سامي ابوبكر..
الشاب:شبح ايمينه واشر بسبابته وقال:هداكا..
شبح هيثم وين مااشر الراجل وقال:باهي مشكور جدا...
الشاب:كاني مش غالط انت وزير الصحه ولا؟.
هيثم شبحله برفعة حواجب وقال بشي من الربكه:اها..ايه..
الشاب ابتسم وقال:قلت شايفك قبل..
هيثم هز راسه وهو مبتسم مجامله..
الشاب وخر وقال وهو مبتسم:تفضل..
هيثم رفع يده وحياه ومشي طول للحوش...
وصل فيه ودرس...خدي نفس عميق..بعدين قال:يارب..
وفتح باب السيارة ونزل...
صكر الباب ومشي لباب الحوش ووقف قدامه وطق الباب..
داخل...
:نوض افتح الباب عيدو..
:حاضر...
خلا كتاباته وناض ومشي طول طلع..
وامه مقعمزة اطبق في الحوايج وهي تشبح القدام وتفكر بقلق..
واحد من ولادها قاللها:يما شن صار في 5جني؟.
شبحتله وقالت:باهي تونعطيك بعدين..
ع خشة ولدها وهو يقول بلهفه:يما يما..الراجل هداكا جي..
طلقت اللي فيدها وقالت بقلق:مسعود؟!
الولد:لالا يما هداكا اللي مشيناله الوزير..
امه جت واقفه من صدمه..بعدين طول مشت طلعت وولادها لحقوها..
برا..
كان هيثم واقف فم الباب يدور بعيونه في الشارع لين جو ع الشاب اللي دله لقاه واقف يشبحله..
غير عيونه عمه ورفع حواجبه ونزلهم..
بعدين توسعوا عيونه لما سمع صوت المراة تقول..
"دكتور هيثم!"
هيثم:السلام عليكم اختي..
المراة من ورا الباب :وعليكم السلام..
هيثم:اختي في معاك حد في الحوش غير صغارك؟يعني خوك ولد خوك او اختك حد محرم ليك..
المراة :لالا..
هيثم شبح جهة الشاب لقاه مازال عيونه عليه..تنهد وقال:بالله اختي كلمي حد من عيلتك يجي نبي نتكلم في وجوده..
المراة فهمت قصده وقالت:باهي...
هيثم:نستنى في سيارتي..
ومشي طول لسيارته...
والمراة صكرت الباب...
قعمز هيثم في سيارته يستنى شبح للسمي..
شاف الشمس باديه تنزل...
قعد يلهج لسانه تلقائيا..بالتسبيح مرة وبالصلاة ع النبي مرة...
لحظات وانفتح باب الحوش..
وطلع الولد الكبير وفي يده صفرة فيها عصير..
هيثم لما شاف الولد ابتسم..وفتح باب السيارة ونزل وجاه..
الولد مدله الصفره وقاله:تفضل..
خداها هيثم وقال:شكرا يا....اسمك؟
الولد:عدي..
ابتسم برفعة حواجب وقال:اسم مميز..كم عمرك..
عدي:سبعه سنين..
هيثم حط الصفره ع السيارة وخدي طاسة العصير وهو يقول:ماشاء الله..
عدي:بتسامح بوي..
هيثم شبح القدام شويه..مصمص شواربه بعدين قال:اممم..تو نهدرزوا ياعدي..
شبح يمينه ولقي الشاب واقف يدخن وعيونه عليهم..
شرب من العصير وشبح لعدي وابتسمله..
وعدي ردله الابتسامه...
شويه وجت سيارة دبل قابينه درست ورا سيارة هيثم بالزبط..
نزل منها جي بعد صكر باب سيارته جي طول لهيثم وهويقول:اهلا وسهلا..اهلا..مرحبتين..
مد يده...وهيثم صافحه..والراجل صافحه بإيديه الزوز وهويقول:اني خال الصغار..
هيثم حد الطاسه في الصفره وقال:كويس..نبي نتكلم مع اختك في حضورك..
الراجل هز راسه بإيجاب وقال:حاضر..هي تفضل تفضل...
هيثم خدي الصفره من فوق سيارته..ومدها لعدي وهو مبتسم..
عدي خدي الصفره ومشي خش داخل وخشوا بعده خاله وهيثم...
•••••°°°°°•••••°°°°°°••••••
زايرات عندها خواتها الزوز..
وهي تحوس وتجري على عشاهم..
كعادتها تفرح بجية خواتها وديما تقدر فيهم..
وأي وحده وين يجوها خواتها تفرح بيهم وتقدرهم ودير كل شي عندها ع خاطر جيتهم..
بس احيانا..وفي وقتنا الحالي بالذات..ماتجيك الموجعه وطعنة الظهر الا من القريب عليك...للأسف..
والمصيبه..لما تكون من الاخ او الاخت اللي مفروض يكونوا هما السند والعضد والمعين بعد الله..
🥀طالعه للجنان بش تقطف شوية نعناع بديره للشربه في العشي...
عفاف:الله محلا ريحة العطر..قداش يريح النفسيه..يفوح ريحتك الباهيه دنيا وآخره ياأسيمه...
'هي عاطيتها من العطر اللي عندها بش تزرعه عفاف في جنانها'
وقفت عفاف ع حيلها ومشت بتخش للكوجينه..
وهي خاطمه من تحدت روشن دار سجى ورفيق..وقفت لما سمعت...
"مشيتي للحبس!"
سماح وهي ادمع:ايه مشيت..
سجى بصدمه:وشفتيه!؟
سماح:ايه شفته..نزلوا دموعها وهي تقول..قطعلي قلبي تقطيع حاله..
سجى:اني مش مصدقاتك الحق..معقوله لهالدرجه تحبي واحد زي هدا..فوق من اللي صارلك منه هدا كله مازال تحبيه..
سماح رشفت وقالت:هو مادارلي شي بقصد ماكانش بوعيه..واني...اني نحبه هلبه  وانتي تعرفي..
سجى:وشن دارلك ماهو نكرك ونكر العيل وقالك ماليش بيك علاقه..وبسببه صارت فينا ايام سود وهربنا بيك لتونس اني وامي وخوي الصافي بش طيحتي العيل وتنستري من الفضايح..وتنجي من الذبح..
سماح وهي تبكي:خلاص ياسجى..
سجى:لا مش ساكته لين تحطي عقلك في راسك..خالد وولاده يحبوا يذلوا المراة اللي تحبهم يديروا فيها مايبوا وبعدين يلوحوها زي مايلوحوا الطاسه المكسوره في الكناسه..
سماح بدموع:خيرك سجى!؟.
سجى ودموعها ينزلوا:نادمه بنموت ياسماح..ياريت ماصار اللي صار ولاخديته..
وقعدت تبكي..
وسماح حطت يدها ع ذراع سجى وهي تمسح عليه..
🍁بس اللي كانت واقفه برا في عز الصقع والريح تضرب
هي كانت اكثر وحده محتاجه للمواساة والتخفيف فهاللحظه..
صدمه...ضربه قويه..طعنه مسمومه اخترقت القلب ومزقاته تمزيق....
بين عيونها يمر شريط سنين فاتت...
كيف كانت مع اختها سماح بالذات ام مش اخت..
ياساده...قصة سماح مع خالد ممكن صاير منها هلبه..وممكن مازال يصير..
لما مانديروش ضوابط لعلاقتنا الأسريه والاجتماعيه..
الضوابط الاخلاقيه اللي جي عززها الاسلام وخلاها اكثر حزما درأ لمفاسد عظمى...
راجل الاخت..عمره ماكان أخ...
خو الزوج...عمره ماكان اخ..
هادم بالذات الدين والعرف مشدد الضوابط في التعامل معاهم..
جعل معاملتهم كمعاملة الرجل الاجنبي بالزبط..
..ايه في ناس حتقول صفي النيه زي ماحني مصفيينها عشنا عمر مع رجالة خواتنا..ولاخوت رجالتنا زي الخوت وعمرنا مافكرنا بغير هكي..
حتى لو كانت الصافيه..شيطان موجود...والنفس أمارة بالسوء..
ولتجنب الوقوع في الحرام..لازم نبعدوا على مابين الحلال والحرام...حتى لانقع في المحضور..
وكم من قصص...كوارث سمعناها...عن الخيانات اللي تصير في العيله وحده...اخ خان خوه.... واخت خانت اختها
زي ماصار مع عفاف..
اللي كانت فاتحه حوشها لأختها الصغيره االلي كانت تعتبر فيها بنتها..
في سنين القرايا لما كانت سماح تقرا في الثانوي قعدت عند اختها...
وكان يوميا يوصل فيها خالد للمدرسه مع ولاده..
كانت يشوف فيها زي اخته..يهدرز عليها يبصر معاها وجوه كان حلو...وهي فهداكا العمر مشاعرها الهايجه اللي مالقتش رادع يردعها..خلوها تشوفله بنظرة تانيه..الشيطان زينها هلبه وخلاها تكبر معاها وطاحت في الحب المحرم..
وعفاف طول هالوقت في عقلها زي هلبه غيرها..
عادي زي وخيها..عادي زي وخيته...ومسيبه الحبل ع الغارب.
وبعد تخرجت سماح من الثانويه بدوا يجوها هلبه خطابه بس هي قعدت ترد فيهم ع خاطر خالد....
لين في يوم..
عفاف بضيق:هالبنت بتهبلني..
خالد وهو يلبس في كبوطه بش بيطلع يسهر:من هي؟!
عفاف وهي ادس في اليبرة والسلك في درج الزيانه:من غيرها سماح..اللي يجيها تقول عليه لا مش عارفه شن في فراسها..التفتت شبحتله بعدين قالت بتهكم:وين ع خير!
خالد سكت وهو يلبس في الطاقيه ع راسه..
عفاف بتهكم:ياريت الليله تبات برا خلي تمر علينا وحده من غير فضايح..
شبحلها وهو يفنص قال:ضمي فمك خير مانبدا فيك..
شبحتله من فوق لتحت وابتسمت بتهكم بعدين مشت طلعت من الدار..
استفزاته..جي بيلحقها ويضربها..لكن في اخر لحظه تمالك اعصابه..
ومشي طلع من الدار..ومنها من الحوش..
وهو طالع شاف سماح مقعمزة تحت شجرة الكرم ناضت لما شافاته..
هو جاها وقال:تعاركتي انتي وياها؟.
سماح بدموع:تبيني نتزوج بالسيف..
خالد:هي تبي مصلحتك..خوتك اللي قالوا جامعه مافيش تتزوج طول..
سماح:واني مانبيش..
خالد:علاش!؟
سماح قعدت تشبحله وهي ساكته..
خالد:اسمعيني جاي..لو جاك واحد كويس تزوجي..خير من العيشه اللي عايشتيها مع خوتك..
سماح:مانقدرش..
خالد باستغراب:كيف ماتقدريش!؟فنص عيونه وقال..في حد قصدك؟!
سماح هزت راسها بإيجاب ودموعها ينزلوا..
خالد بعقدة حواجب:لو كانه راجل يمشي لخوتك طول..كان غير هكي فوتيه ياسماح..
سماح بنبرة باكيه:صعب
خالد بقلق:سماح من الاخير قولي شن في؟!
سكتت سماح..
خالد:ماتخافيش مني..كان في حاجه قولي اني نتصرف..
مازالت سماح ساكته وهي تبكي بصمت..
خالد بعصبيه:تي تكلمي الزفت قولي شن في!؟.
سماح شبحتله طول  وقالت:نحبك...
هو جمد في مكانه...الكلمه اللي قالتها خشت في وذنه زي السيف...طول جبد روحه وانسحب بسرعه بدون مايقول كلمه..
وليلتها ماروحش..وتبعت هالليله تلاته ليالي بات فيهم برا حوشه..
ولو يبي يجيب شي للحوش يبعته مع الولاد...
وكان طول الوقت يفكر في طريقه يقطع بيها رجل سماح من الحوش..
ولقاها...افتعل مشكله مع من خوتها خلاهم يجوا يرفعوها ويحرموا عليها وعلى ارواحهم مواصلة عفاف اللي زادت نقمت ع خالد بعد اللي صار..
وبرغم هكي خالد ارتاح لما بعد سماح عن حياته..
لكن سماح اللي كانت مهووسه بخالد ماأرتاحتش وقعدت عايشه في عذاب وهي بعيده عنه..
لعند ماجي يوم وتوفى خال لعفاف...
حالة الوفاة هادي خلت عفاف ليل نهار في حوش خالها...
وهالشي استغلاته سماح في ليله ومشت لحوش اختها بش تشوف خالد..
ولأن الحوش فاضي..خالد قعد يشرب فيه هديكا الليله..
وهي لأن عندها نسخه من مفاتيح الحوش خشتله بسهوله..
واللي صار مع رفيق وسجى كان تكرار لنفس الحادثه اللي صارت ليلتها...
خالد بعد هكي..زاد عاش في عذابي نفسي خلاه مايسيبش الخمر اغلب وقته ليل ونهار..ودار مشاكل هلبه مع الناس واولهم اهل مرته بش يقطعها منهم نهائيا...
اما سماح..اللي كانو هوى نفسها وشيطانها مسيطرين عليها تأملت ان بعد اللي صار تقدر تحصل خالد لو هربت معاه..
ومحاولتها باءت بالفشل لما جت لخالد مرة في الورشه ولزها شر لزها ونكر كل شي....
وهي طاحت في شر اعمالها ومعاش عرفت كيف تخلص روحها...حكت لاختها ام سجى اللي صار معاها بدون ماتجيب سيرة خالد...
واختها اللي قريب هبلت بعد ماعرفت فكرت هلبه بطريقه تنجي فيها روحها وعيلتها من الفضايح..
لهدا كلمت واحد من ولادها اللي كان جدا لين ومتفهم..برغم كرهه لخالته بعد عرف..اقترح ع امه تتمارض وهو يرفعها لتونس بش تتعالج وسماح تمشي معاهم بش تعانيها..
وفعلا مشوا لتونس...وصار اللي صار....
وهدا كله اللي اندس سنين طويله..اراد الله انه يطلعه فهاليوم..
بش تعرف عفاف الخبيث من الطيب...
🍁خشت للكوجينه وهي ترعش مع بعضها..
حطت النعناع ع الرخامه بعدين مشت للحمام..وقعدت ترجع...
في دار تهاني..
تهاني:من يرجع هكي!؟
مشت طلعت من دارها...
لقت صالحه ماشيه للحمام ومعاها خالتها ام سجى والزوز يقولوا..
"عفاف خيرك..عفاف شن جاك!"
تهاني قلبها قريب وقف..مشت تجري وين وصلت في الحمام..
فتحاته وخشت..لقت امها مقعمزة ع حاشية البانيو وهي تبكي بالعبره..
خشتلها وقالت بخوف:ماما..امي خيرك..
عفاف لما شبحت لتهاني اذكرت كلامها ليها عن خالتها..
زادت انقهرت لما عرفت ان بنتها الصغيره زابطه كل شي وهي الساذجه المغفله..اللي كانت الميه تمشي من تحت رجليها وهي مش حاسه ..
ضمت بنتها وانهارت بالبكي...وتهاني اضم فيها وهي مش فاهمه شي..
ع جية سماح وسجى..
سماح؛خيركم!!؟.
شدت عفاف ع وسط بنتها بقوة..ووقفت بكي..
بعدين بعدت عنها وناضت وقفت وهي تمسح في دموعها..
تهاني بقلق:امي مريضه..تحسي في حاجه!؟
عفاف:احمم..لالا..غير..خطرعليا بوك..مستاحشاته..وشبحت لسماح..
سماح رفعت حاجبها وغيرت عيونها عنها..
صالحه بحزن:الله غالب يابنتي..
عفاف مشت بتطلع وهي تقول:تو نمشيله يوم الزيارة الجاي ..طلعت من الحمام وهي تقول..ان شاء الله..
لحقتها ام سجى وقالت:يفرج الله ياوخيتي..
وصالحه لحقتهم حتى هي..
وسماح وهي منغاظه مشت لجناح سجى وسجى لحقتها..
اما تهاني طلعت من الحمام وهي تفكر بقلق...
•••••°°°°°••••••°°°°°•••••
"تبي قهوة سارونه"
سارة وهي مقعمزة ع الكرسي في الكوجينه:ايه..
وبدت نسيبه ادير في القهوة..
سارة بحزن:قلبي واكلني ع زياد ياعمتي..معقوله هدا كله مانعرفوا عنه شي..وهو لايتصل ولايدور معقوله هنا عليه!؟
نسيبه تنهدت بألم وقالت:مانكذبش عليك ياسارة انتي كبيرة وواعيه توا...حتى اني زيك خايفه هلبه..بس في نفس الوقت عارفه ان موت اسيمه الله يرحمها اثر في هو بزياده ع الكل..
ظلمت الدنيا في عيونه بمعنى الكلمه من بعدها..هو توا هارب من كل شي يذكره بيها..
سارة ودموعها ينزلوا:لكن لعند امتى ياعمتي باهي؟!..مسحت دموعها وقالت..كلنا بعد موت ماما ظلمت الدنيا في عيوننا لكن قاعدين نقاوموا مادام مازلنا حيين لازم نقاوموا..ماما بيها ومن غيرها تبينا نعيشوا حياتنا صح وننجحوا فيها من كل النواحي..ماربتش وتعبت وعلمت وكبرت بش في الاخير نضيعوا من بعدها!
نسيبه رشفت وهي تقول:صح كلامك كله مزبوط..ياريت زياد سمعه..
سارة بدموع:لازم نلقوا زياد عمتي..
نسيبه:حاسه بوك عارف وينه..
ساره :كان يعرف علاش ماروحش بيه!؟
نسيبه بحزن :مانعرفش!؟.ولفت تشوف البكرج..
سارة سكتت شويه بعدين قالت:لما يروح نسأله..
نسيبه قعدت ساكته وهي تحرك في القهوة وتفكر بخوف...
•••••°°°°°••••••°°°°°•••••
"راجلك بسببه..انحرموا صغاري من امهم..خشوا في حالة نفسيه ربي العالم بيها"
ام عدي وصغارها وخوها يشبحولها كيف يتكلم بحرقه ودموعه فعيونه..
هيثم بصوت مخنوق:عندك علم ان ولدي الكبير بعد موتها سيب كل شي..سيبنا وسيب قرايته للآن مانعرفلاش طريق..
عندك علم ان عند بنت في عمر ولدك هدا مريضه بالقلب في كل ليله تحلم بأمها وتبكي وهي راقده..من الحزن قريب خسرتها بعد خسرت امها!
ام عدي دموعها نزلوا...
هيثم رشف وهو يمسح في دموعه قبل تنزل وقال:اللي داره راجلك اني لو سامحت عليه مش حنقدر نسامح نفسي عمري كله...ولو الناس عرفت اني سامحت مرات يديروني قدوة ويسامحوا ويبدا الموضوع عادي واي حد مستهتر يدير مايبي كان غلط يلقى من يسامحه...
خال الصغار قعد يشبحلهم بضيق وهو ساكت
هيثم:مانقدرش نسامح راجلك ونتنازل..راجلك لازم ياخد العقاب اللي يستاهله...
الخال:معليشي يعني..كان ماتبيش تتنازل علاش جيت؟
هيثم شبح للولاد وقال:امهم قالت مالهمش حد الا بوهم..
شبحلها خوها..
هي قاطعت هيثم وقالت:ايه..مالهمش حد غيره..عمامهم ليه وقت مايندروش علينا حيين ولاميتين وقضيه خوهم قعدت نجري عليها بروحي..اجار الحوش بعد حديده من ذهبي بش ندفعه..مصاريف القرايه متاعهم ماكلتهم وشرابهم...قاعده نصرف عليهم من فلوس خلاهم بوهم قريب يتموا..وانتم ياخوي ماعندكمش قدره بش تصرفوا عليهم..صغاري ماعندهم حد..بعد ربي غير بوهم بس..
هيثم حط يده ع صدره  وقال:اعتبريني بوهم..
شبحوله وهما متفاجئين...
هيثم:مانعرضش عليك عرض..اني الزمت نفسي بيهم الزام مدام مافيش ليهم معيل مش حنخلي ذنب بوهم يضيعهم..
خال الصغار شبح لأخته وهو مضايق ع الاخر وملتزم الصمت..
ام عدي:اني مانبي شي..غير حاجه وحده خدمه..
هيثم ضيق عيونه وهو يشوفلها ..
ام عدي رشفت وقالت:انتي كنت ممرضه وليا 4سنين مبطله خدمه..نبي منك ادبرلي خدمه..
ارتخوا عيون هيثم وهو يقول:باهي جيبلي ملفك...
ناضت طول وهي تقول:لحظه شويه...
ومشت طلعت من المربوعه..
هيثم شبح للصغار وابتسملهم وقال:انت اسمك عدي..وانتم؟.
:اني اسمي ابراهيم..
:واني محمد..
هيثم بإبتسامه:عدي..وابراهيم..ومحمد..
خالهم قال:رد بالك تحسابنا مقصرين بقصد..
شبحله هيثم..
:الظروف صعبه والحال بالدف ماشي..ان شاء الله نقدروا ندبروا حق ماكلتنا وشراب..
هيثم تنهد وهز راسه وهو يقول:فاهم ومقدر...لاعليك..
ع خشة ام عدي بالملف متاعها..جت بيه لهيثم طول وقالت:هدا هو..
خداه هيثم..وهي مشت قعمزت..
ناض وقف وهو يقول:تو ناخد رقم خوك..او مايتم موضوع التعيين نتصل بيه يبلغك..
ام عدي :ان شاء الله..
هيثم:ان شاء الله..مرر نظره ع الصغار..ابتسملهم وحياهم بحركة اليد..
هما ردوله التحيه..
تنهد..بعدين لف ومشي للباب وخالهم معاه..
▪▪▪▪▪
◇طلعت من غادي واني راضي عن نفسي وضميري مرتاح ع الآخر..مافرطتش في حق حبيبتي وام صغاري اسيمه...وفي نفس الوقت ماخليتش اخدي لحق زوجتي يعود بالضرر ع اطفال ماليهمش اي ذنب...وفي قلبي كانت عندي امنيه رفعتها لربي..اني زي مامضيعتهمش..مايخليش ولدي ويضيع وسبحان الله اخر حاجه نطقت بيها قبل آذان المغرب بلحظات..
▪▪▪▪▪
هيثم وهو يسوق:اللهم اني استودعك زياد وانت لاتضيع ودائعك...
••••••••°°°°°°°°
بعد ماصلى المغرب في الجامع..
روح للحوش...
وين خش..شاف البنات الصغار مقعمزات يكتبوا في الواجب في الصاله...
لما شافوه خاش ابتسموا من قلوبهم وقالوا:بابا..
هيثم بإبتسامه:السلام عليكم..
الزوز:وعليكم السلام..
هيثم:وين عمتكم وساره؟
ع جية ساره وهي تقول:معليشي بابا..
شبحلها..
سارة:احمم نبيك شويه..
هيثم:خير ان شاء الله!
ساره:تعالى شويه..
هيثم مشي معاها لين خشوا لممر الديار..
وقفت وهو وقف معاها..
ساره حطت خصلات شعرها ورا وذانها وقالت بشي من التوتر:بابا..ماسمعت شي عن زياد؟
هيثم حط ايده في جيوبه وهو يتنهد بعدين قال:شفته اول امس..
سارة شبحتله بلهفه وقالت:وينه!؟
هيثم بأسف والدموع عبوا عيونه:مانعرفش..
سارة بآستغراب:كيف ماتعرفش!؟
هيثم بضيق:مشيت الكليه..شفته غادي..وللأسف لما شافني هرب مني ..
سارة قعدت تشبح لبوها وعيونها تعبوا دموع..
هيثم تنهد بألم وقال:قاعد ندور عليه وبإذن الله حنلقاه عن قريب..
سارة ابتسمت بأسف والدمعه نزلت من عينها:كان هرب معناها مش حتلقاه..
هيثم قعد يشبحلها وهو ساكت...
سارة بإبتسامة أسف:انت خليته بهرب منك..وحيقعد ديما هارب منك..
ارتسمت ع وجه هيثم ملامح صدمه ممزوجه بالحزن...
سارة نزلت عيونها ولفت ومشت لدارها خشتلها وسكرت الباب..
وهو قعد واقف في مكانه يشبح في الفراغ وهو يفكر في اللي قالاته...
《 انت خليته بهرب منك..وحيقعد ديما هارب منك..》
▪▪▪▪
◇كلامها اصاب كبد الحقيقه..حط يد ع مكان الوجع..كلامها حطني قدام نفسي في مواجهه...فعلا زياد بعد موت امه حس ان الدنيا كلها معاش ليها معنى وحياته ملهاش اهميه..لانها بالنسبه ليها كانت الداعم..والحضن الحنون..والانسان الوحيد المؤمن بيه...اقصد الايمان بامكانياته بمواهبه بقدرته ع النجاح...فلما راحت امه..هو خسر هادم كلهم..وحس انه انتهي قبل يبدا...لو كنت موجود في حياته وجود يشبه وجود امه فيها..ماكانش ممكن ضاع بعد موتها..كان ممكن جي حط راسه ع كتفي..واسيته..مديته بالقوة ورجع وقف ع رجليه واني شاد بايديه..نساعد يرجع يمشي خطوة خطوة لين يعتمد على نفسه ويكمل طريقه بروحه..ضحك نص ضحكه وكمل يقول....حتى لما تعلم يمشي وهو صغير ماكنتش معاه...ولاعرفت كيف تعلم..الا لما شفته يمشي مره واني مروح من الخدمه...ههههه...شي مؤلم لدرجة الضحك....
▪▪▪▪
الساعه الثانية بعد منتصف الليل..
كان النوم مجافي عيون عفاف..وكيف يجيها النوم بعد اللي عرفاته..
البكي اللي بكاته ليلتها مابكتش زيه في عمرها كله...
باهي اللي ماماتتش...
🥀والنوم كان مجافي ملاك وهي تذكر في كلام خليل..
ودموعها ماجفوش من لما روحت..وقلبها زاد كرهه وحقده على نسيبه..
🌸بس في نفس الحوش..
كان هو نفسه..خليل مجافي للنوم..
في المربوعه...
كان حاضر في موعد مع الصاحب الذي ليس كمثله شيء..
اللي لما رجعله...وشاف كيف يجاهد فيه بش يوصله زاده هدايه وهو قربله اكثر..
وخلاه من اول ايام التوبه..من اصحاب اللقاء اللذيذ والموعد الفريد..
قيام الليل...
هو اللي قال...من أتاني مشيا اتيته هروله...
من تقرب إليا ذراعا تقربت له باعا...
اللي يخطي لله خطوه ربي يقدمله بعشرة...
في ارحم..واحن..والطف من هكي...
رب وآله عظيم..ملك ملوك..في يده كل شي وتحت سلطانه كل شي نعرفوه ومانعرفوشي..وعنده من يغنيه عن عبادتنا لكنه يفرح برجوعنا ليه فرح...ويقربلنا اكثر ماحني نقربوله..ماحرمش علينا شي الا لأنه حيودينا للمهالك..مامنعش علينا شي الا لأنه عالم وعارف ان فيه شر لينا وفساد كبير....في كل قانون حطه..وفي كل سنة سنها خير لينا..ورب الخير لايأتي الا بالخير..
مسكين والله مسكين..اللي اعرض عن ربه وعن طريق..محروم...ربي لايجعلنا من المحرومين...
المحرومين اللي انحرموا من السكون والراحه اللي عايشهم خليل فهاللحظات...
🥀واللي عاش نفسهم هيثم توا وهو بين ايدين الله..
يشكيله ويحكيله ويستخير فيه ويبي منه يدله للصح في كل شي في قادم الأيام...🥀
بعد ماكمل هيثم صلاته..
ناض من مصلاه..ومشي لكتب اسيمه خدي منهم واحد وقعمز فتحه وقعد يقرا فيه..
لين وصل لفقرة شداته ليها بكل حواسه
《القرآن حياة لاتهجره مهما كثرت اشغالك..واختلطت مواعيدك واشتدت امراضك..
القرآن فرج من لافرج له وتثبيت للفؤاد اذا تهشم..
القرآن قوة تهزم جيوش الضعف..ورحمة تنتشل المهموم من بحر أحزانه..
القرآن عافية لمن كثر مرضه..وقل داؤوه وانقطعت اسبابه..
القرآن..عين اليقين..ومدد اليقين..وأقوى مسبب لليقين..وأكثر مايثبت به اليقين》
كانت هالمرة مضللتها اسيمه..وكاتبه على هامش الصفحه حديث نبوي شريف...
قعد يقرا فيه..
قال النبي صلى الله عليه وسلم : ( اقْرَءُوا الْقُرْآنَ فَإِنَّهُ يَأْتِي يَوْمَ الْقِيَامَةِ شَفِيعًا لِأَصْحَابِهِ اقْرَءُوا الزَّهْرَاوَيْنِ الْبَقَرَةَ وَسُورَةَ آلِ عِمْرَانَ فَإِنَّهُمَا تَأْتِيَانِ يَوْمَ الْقِيَامَةِ كَأَنَّهُمَا غَمَامَتَانِ أَوْ كَأَنَّهُمَا غَيَايَتَانِ أَوْ كَأَنَّهُمَا فِرْقَانِ مِنْ طَيْرٍ صَوَافَّ تُحَاجَّانِ عَنْ أَصْحَابِهِمَا اقْرَءُوا سُورَةَ الْبَقَرَةِ فَإِنَّ أَخْذَهَا بَرَكَةٌ وَتَرْكَهَا حَسْرَةٌ وَلَا تَسْتَطِيعُهَا الْبَطَلَةُ ) رواه مسلم...
بعد ماقري الحديث..رجع شاف للفقرة اللي مظللتها..
واكثر جملتين لمسوه بقوة الجمله الأخيره...والجمله الثانيه..
قام عيونه وشبح للطاوله اللي كان عليها المصحف..
ناض..ومشاله حط  الكتاب اللي كان يقرا فيه..
قعمز ع الكرسي وخدي المصحف..
وفتحه...وبدي يقرا في الفاتحه...
برغم انه يقرا في القرآن قبل..
بس هالمرة قراه بمفهوم مختلف وروح مختلفه...
قراه وهو يشوف فيه سبب للشفاء والفرج والثبات والقوة...
سبب..والمسبب هو صاحب هذا الكتاب الذى لاريب فيه هدى للمتقين..
وصل للآيه هادي في سورة البقرة وقف عندها شويه..بعدين تابع قراية ولقي روحه عايش في عالم هالسورة...
وقعدت تمر الدقايق ورا بعضها..
وخليل يقرا في نفس السورة..وفيه حاجات فيها قعد مركز عليها..يبي يزيد يفهمها ويعرفها ويتعمق فيها اكثر لهذا خلاها في عقله بش يسأل عنها الشيخ لما يلقاه في صلاة الفجر..
••••°°°°
"اااه..سبحانك اللهم وبحمدك اشهد ان لاإله انت استغفرك واتوب اليك"
وصكر المصحف...تنهد براحه..
بعدين شبح للمفكره متاعه...خداها وفتحها..
وخدي بيروا وبدي يكتب فيها..
تحت صلاة الفجر..
 التسبيح...
الصلاة على النبي...
سورة البقره...
بعدين صكر المفكرة وحطها ع تركينه..
وناض...ومشي وين ماموجود الآيباد متاعه..
فتحه وقعد يشوف في جدول اعماله ليوم السبت..
لقاه معبي هلبه...ارتسمت ع وجهه ملامح الضيق وهو يشبحله...
هيثم"ع هكي مش مروح اليوم بكل لليل!"
《 ريحان:بابا انتم كلكم تصلوا الا حني علمنا..》
نزل الايباد بإحباط..وغمض عيونه بأسف..
بعدين فتحهم وقام الآيباد وقعد يشوف للجدول متاعه..
وهو يفكر...
ويفكر...ويفكر...
قام عيونه وهو يمرر في نظره القدام بعدين حط الايباد ومشي ولى للمفكره مرة تانيه...
كتب فيها شي معين..
بعدين مشي لسريره تلوح عليه..وغمض عيونه وهو يقرا في الأذكار...
لين خداه النوم...
•••••°°°°°°••••••
"وينه هدا وينه!!"
وخدي شيشه خمره فاضيه ولوحها ع الحيط كسرها..
بعدين قعد يمشي زي المجنون يمين ويسار وهو شاد راسه ويتوجع بشده..
زياد بألم؛اممم..امممم..ااااه...هاااااع..وضرب الطاوله برجله طاحت باللي فيها ع خشة عبدالملك للحوش..
جاه زياد يجري جبده من كبوطه وقال بعصبيه شديده؛وين كنت انت وين!!؟
عبدالملك بضيق:برا هوينا تلقاه في القجر متاع الكوجينه..
طلقه ومشي يجري وين ماقاله زي المجنون..
وعبدالملك قال:غير شن عرفني عليه جابلي وجع راس!
شويه وطلع زياد..ومشي تلوح ع الكنبه وهو رايح في عالم تاني..
عبدالملك:اسمع بنسيب الحوش غدوة..
زياد مش معاه بكل..
عبدالملك:وتي روحك..
ومشي لداره..
وزياد مش منتبه لولا حاجه...هايم في عالم غير هالعالم..
•••••°°°°°°••••••
"الله أكبر...الله أكبر"
فتح عيونه طول..
شويه ناض قعمز وهو يسمع في الآذان...
هيثم تنهد وقال:صدق الحق..وزهق الباطل..
وناض من السرير...
جهز نفسه...توضا..ولبس...ومشي طول طلع...
وحتى اليوم ناوي يمشي لرجليه برغم ان الدنيا ظلام والجو مصقع..
لكن اللي لقاه امس من هالمشيه خلاه معاش يقدر يفرط فيها..
لما فتح الحوش وطلع...
سمع باب حوش خالد انفتح حتى هو وشاف خليل طالع..
ابتسم..
صكر الباب..
شبحله خليل وابتسم..
قدموا لبعض...
وصلوا في بعض...
وصافحوا بعض..
هيثم:الصحبه؟.
خليل بضحكه:اكيد..
هيثم ابتسم وطبطب ع كتف خليل ومشوا مع بعض وهما يهدرزوا...
ونسيبه اللي كانت واقفه في روشن دارها شافتهم...وتفاجئت هلبه باللي شافاته..وبرغم كل شي صار حست بفرح ملي قلبها اللي كان ينبض بشده..
🍁🍁🍁
وتمر من هدا اليوم..
تلاته ايام..
كان وضع حياة هيثم يتعقد هلبه..
ماعرف شي عن زياد..وخدمته ومسؤولياته في الوزارة اجبروه يرجع يبعد عن عيلته..ولأول مرة في حياة هيثم العمليه يكون موجوده بالجثه متاعه بس وقلبه وعقله مع عيلته...
وفي اللي أخر همه عيلته وصغاره..
واول همه راحة نفسه وانبساطها زي مجيد..اللي استفاد هلبه من زواج بنته رتاج...وعطاها وهو يضحك فرحان لراجل في عمره هو..
عطاها وماشافش لدموع عيونها وهي طالعه من حوشه..
كل همه البنك اللي تزوجاته واللي حيغرقهم في خيره بعد ماولى نسيبهم..
تزوجت رتاج..البكر..الصغيره..بدون لاعرس ولازفه....
مافيش بنت تتمنى تنحط في مكان رتاج..ولو كان مهرها مال قرون..وسكنها قصر سلطان او ملك...ودارت العالم كله...
لعله..خير...
بس حال جهاد كان بالويل..
بالذات بعد عرف انها تزوجت خلاص....
••••••°°°°°
الساعه الواحده ظهرا...
قدام المدرسة الثانويه للبنات..
وقت الانصراف..
دانيه بضحكه:تو نجيبهالك غدوة ان شاء الله تشوفيها..
سارة بضحكه:ان شاء الله..يللا سلام..
دانيه:سلام..
ومشت كل وحده فيهم لباصها..
دانيه قبل توصل في باصها وقفت في مكانها..
لما جي جهاد واقف قدامها..
في الوقت اللي طلعوا فيه جمعه وجيهان من الباب التاني للمدرسه..
شبحت جيهان جهة البوابه..جو عيونها ع دانيه وجهاد واقف عليها..
فتحت عيونها ع وسعهم وهي متفاجئة..بعدين شبحت لجمعه وقالت:جومعه..
جمعه:امم..
جيهان:شوف غادي..
شبح وين ماتشبح انصدم..
جيهان:اول ما شفته شبهت عليه بعدين اذكرت وين شفته..هدا يكون جار الوزير اللي قبل بنخطبوا اخته لخوي راجح..راجح قال انهم ناس مش مزبوطين ..
جمعه يسمع فيها شن تقول وهو يشبح لدانيه..
قبل شافلها موقف مع خليل...وتوا واقفه مع جهاد..
ولاد عمه وعارف خدمتهم...
وعاد عقل جمعه اتجاه دانيه مايجيبش في خير بكل..
جمعه بحده:بري اركبي سيارتك..
ابتسمت بمكر وقالت:اوكي..
ومشت لسيارتها..
وجمعه مشي لسيارته وعيونه ع دانيه ومش عارف علاش حاس بروحه قاعد ينحرق...!
...دانيه بخوف:تزوجت قتلك تزوجت خلاص..
ومشت لباصها..
جهاد؛مالا قوليلها كان تهنت هدا وجهي..
ومشي بعصبيه...
ودانيه ركبت للباص وهي ترعش..
هبه:من هو هدا!؟.
دانيه بضيق:ماعنديش نيه ندوي هبه..
سكتت هبه وهي تشوف لدانيه بإستغراب..
ودانيه شاده دمعتها بالسيف وكلها خوف من تهديد جهاد..
••••••°°°°°••••••°°°°°°•••••••
كان واقف في مكتبه وهو شاد شنطته ويشبحله...
يمرر في نظره عليه..
ع حلم ياما حلم بيه...وطموح ياما تعب بش يحققه..
وخطط هلبه بش ينفد بعد مايلقى روحه فيه..
وبعد ولى الحلم واقع..والطموح تحقق..
وبدي بتنفيد اللي قعد سنين طويله يخططله..
لقي روحه مجبر..يتخلى عن كل شي وهو مازال في اول طريق...
خدي نفس وقال:تأتي الرياح بما لاتشتهي السفن..ولعل ماجائت به الرياح افضل مما اشتهت السفن...
ابتسم برضا..
بعدين لف ومشي للباب..
فتحه وطلع..
ماتفاجئش باللي شافه بعدين طلع..
الموظفين كانوا واقفين في الممر واول ماشافوه بدوا يصفقوا...
هو قعد يمشي وابتسامته ع وجهه ويحي فيهم بحركة الراس..
وقعد التصفيق مستمر..
وكل مايمشي يقابل موظف يصفقله..
وهو يحي فيهم..وقلبه موجوع...
نزل من الدروج..
وصل تحت وطلع من باب الوزراه وقفه التحيه من الموظفين استمرت للخارج...
وقف والتفت لقاهم كلهم طلعوا ووقفوا برا..
 مرر نظره عليهم كلهم..ابتسم ورفع يده..
وقفوا تصفيق..
هيثم بصوت عالي شويه:ماعندي مانقوللكم غير وصيه وحده..واتقوا يوما ترجعون فيه إلى الله...
حطت لجين يدها ع فمها وهي تبكي بحرقه وبصمت..
وهما رجعوا يصفقوا...
حتى من المرافقه اللي كانت ديما معاه..
رفع يده وحياهم كلهم...بعدين مشي طلع من بوابة الوزاره على رجليه...مشي للطريق...
وقف تاكسي وركبها...وتحركت بيه بعيد عن اهم احلامه واكبر انجازاته...
▪▪▪▪▪
◇كنت نمشي ونجي بسيارة الوزاره..اما مشاويري الخاصه فكنت نقضي فيها بسيارتي الخاصه..وهدا عزائي الوحيد انب حتى لو ماقعدتش فيها 4سنوات..حسبي اني خدمت فيها بضمير وماحنتش الامانه ولو ببيرو محطوط في المكتب...
ماكانش قرار ساهل ويعلم الله اني خديته واني نتقطع من داخل..حاول فيا رئيس الحكومه لكن اني قتله مش حنقدر نعطي اكثر ماعطيت..ظروفي حتمنعني نأدي واجبي ع اكمل وجه...
في الحقيقه..اني حسيت ان في تكليف اشرف من هالتكليف..
تكليف من الله سبحانه وتعالى بتحمل مسؤولية عيلتي بس..
هما اولى..هما الرعيه اللي لازم نسخر وقتي وجهدي كله ليهم..
والأقربون اولى بالمعروف..
وصدقا..اني توا ولى همي الوحيد زهرات دوار الشمس الأربعه..اللي فقدوا امهم في عز حاجتهم ليها..وحاجتهم ليا توا اضعاف اضعاف حاجتهم ليها...
وكان عندي احساس وقتها..ان اللي جاي اصعب
بهلبه من اللي ريته وشفته في الوزاره طول العشره شهور اللي خدمتهم فيها....
▪▪▪▪▪▪

....يتبع...