البطل المغمور "شمس الغروب"

الجزء الحادي والعشرين

💐..
مقابل العمارة..
كان مدرس سيارته ويشوف لشقتها وهو بيموت من القهر..
دموعه معبيات عيونه اللي كان يتناثر منهم شرار الغيره..
مش معروف اذا كان هذا مجرد حب تملك..
ام حب كان مدفون او متنكر بشعور تاني غير بريئ!..
المهم انه مش قادر يتحرك من قدام العمارة..وهو حاس في ببراكين قاعده تفور في صدره وحممها تذوب في ضلوعه...
🥀اما هي..
فكانت راقده في فراشها من غير نوم..سرحانه وهي تفكر في اللي فات واللي جاي من عمرها..
وين تفكر في الزوز دموعها مايبطلوش نزول...حسرة ع روحها وعلى حظها...
بينما اختها اللي في جنبها كانت راقده في سابع نومه رقدت بلهفتها ليوم غدوة بش تنفد انتقامها...
🍁🍁🍁
فالوقت اللي فيه كان هيثم ضام بنات الزوز لصدره وهو يفكر في زياد...تتردد في عقله قصة خو رضوان بوكراع..
مش عارف علاش مش خاطر في باله غير هالسيناريو انه صاير مع ولده..
ممكن لأنه من اول مرة سمع فيها قصته قلبه قبضه وحش بشعور مخيف وخانق...
تنهد من اعماق من قلبه...وين جت بين عيونه مرته اللي كان محتاج لوجودها هلبه...تخفف عنه وتمده بالقوة وتحسسه بشوية طمأنينه..
بس توا خلاص زوجته معاش موجوده...
وهو حاس بدونها انه وحيد..يتيم ..زيه زي صغارهم...
ومن كثر التفكير...رحم ربي حاله...وخلا النوم يغشيه...ورقد طول بدون مايحس...
💎💎💎💎
فتح باب مكتب التحقيقات وخش...
ومشي قعمز ع كرسيه وهو يقول:سامحنا خالد باشا نوضناك من نومك..
خالد ابتسم تهكما وقال:لامافيش مشكله من لما جيت هني معاش وليت اني والنوم صحبه.
راجح:من الخوف..
خالد بضحكه متهكمه:خوف!
راجح هز راسه وقال:اها..خوف...يعني انت كنت واحد من اهم رجالة تشكيل عصابي كبير واكيد راجل زيك ليه عمر في هالمجال عنده معلومات اكثر من اللي عطاها..
خالد قعد يشبحله وهو ساكت بعدين ضحك نص ضحكه وقال:ولاربع معلومه زياده..اني مشيت ولا جيت كنت تبع لناس تانيه هما نفسهم تبع لناس تانيه.
اشر عليه راجح بسبابته وهو رافع حواجبه وقال:ايوه اهما اللي قلت عليهم الناس اللي تبعهم انت اللي فوقك مستحيل مايكونش عندك عليهم خلفيه..
خالد:والله لا..نهائيا..حتى القابهم ماتذكرش قدامنا..يعني لما يتكلموا عنهم قدامنا يقولوا الجماعه وبس..
راجح ضحك بعدين شبك صوابعه في بعض وقال وهو يهز في راسه بإيجاب:تمام تمام...تنهد بعدين قال..ياسيدي سامحناك فجعناك فهالليل..غير كسدنا وقلنا ندردشوا مع خلودة شويه هكي يعني حديث ذكريات لكن خسارة ماطلعش عندك ذكرى تنفعنا...
خالد ابتسم سخريه..
وراجح ناض وهو يقول:تصبح ع خير...
ومشي للباب فتحه والتفت لخالد وقال..نتلاقوا..
خالد رفع يده وحياه وهو يقول:في أي وقت..
شبحله راجح بحده وطلع وصكر الباب..
ومشي ورا الزجاج العازل وهو يقول:شن رايك سيادتك؟
تنهد رضوان بوكراع وقال؛واضح انه مايعرف شي مهم لو عنده معلومات تنفعنا ماخلوشي حي بعد ماسلم نفسه يوم زياده..
العقيد:ويمكن هما اللي يخلوه يسلم نفسه ويعترف على ناس تانيه معاه بش يحولوا العيون عنهم.
رضوان:كله وارد..تنهد وقال..اني القضيه هادي عندي قضيه حياة او موت..والخونه اللي يخدموا في الدوله وباعوها لمجموعة سفلة ومجرمين زي هادوا حينكشفوا ويطيحوا واحد واحد..شبح لراجح وقال..نبي عيونكم تقعد ع ولد خالد الكبير..الولد هدا كان مهم هلبه عندهم واكيد مش حيخلوه في حاله..حيرجعوه لجماعتهم ويخلوه يخلف بوها عاجلا او آجلا..
ابتسم راجح ع جنب وقال:حاضر سيادتك..
رضوان هز راسه بإيجاب ومشي..
والعقيد مشي وراه...وراجح يفكر في المهمه اللي كلفهم بيها وزير الداخليه..وعقله طول جابله نسيبه اللي رفضاته بدون سبب مقنع في نظره...ومن يوم رفضها ليه وهو حتى النوم مش قادر يرقده...
•••••••°°°°°•••••••°°°°°°°••••••
تاني يوم الصبح...
هيثم بعد ماصلى الفجر لبس وجهز نفسه وتوجه طول للوزارة...جدول اعماله فيها معبي...
بعد ماطلع نزلت نسيبه اللي شبه مارقدتش بكل..
نوضت بنات خوها...
وفطروا مع بعض..بعدين سقدت سارة للمدرسه..
وقعدت تراجع للبنات الصغار في دروسهم وعقلها مش معاها..
🥀زي عفاف..
اللي كان خليل ولدها مركز عليها انها انهمت هلبه من بعد الحديث اللي دار بينها وبين نسيبه زي ماانهم هو..
وكل حد فيهم كان يسرق في النظر للتاني مش قادر يحكي معاه...
خليل:الحمد لله..سلم ايديك يام..
عفاف:صحتين حبيبي..
ناض وهو يقول:هيا ملاك..ومشي..
ناضت ملاك وهي شاده طرف بريوشه خدت شنطتها ومشت لحقاته بسرعه..
عفاف:ووك عليا بساط الصاله يبي الغسل شن بيعانيهولي حتى جهاد ماهناش..
رفيق:وشن قاعده ادير هادي!
الحاجه صالحه شبحت لسجى اللي كانت تفنص في رفيق..
عفاف:لالا مرتك حامل مش باهي ليها..
رفيق:انتي لما تحملي ماتخلي ماديري..حتى بنابل الغاز تقيمي فيهم...فكيني من الدلع يام..تنوض تعانيه معاك ولا فالحه كان تاكل وترقد..
سجى وهي تحاول تكتم غضبها:حاضر..
رفيق:وغصب عنك..فاهمه..حط يده ع راسها ونزله شويه وقال..غصب عنك..
صالحه:صل ع النبي وليدي..
ناض رفيق وقال:عليه الصلاة والسلام..ماتبي شي يام..
عفاف هزت راسها سلامتك بس ولدي..
هز راسه ومشي طلع من الصاله..
وسجى ناضت بعده وهي تتحرك بعصبيه ومشت لدارها..
صالحه:تو نعاونك فيك..
عفاف:لالانهاري..تو نعانده بروحي..انتي كان تبي اديري حاجه طيبيلنا غدي قنين من تحت ايدياتك..
ابتسمت صالحه وقالت:ندير مقطع..
عفاف بضحكه:ياريت والله هالجو مايبي كان المقطع..
صالحه:في قديد ولا؟.
عفاف:ايه فيه فازوا كبير تلقيه في الفريز..
صالحه هزت راسها بعدين ناضت قامت صفرة الفطور..
عفاف:خلي عنك تو نغسلهم..
صالحه:شن طريقهم هما صفره وطواسي..
ومشت بالصفره وطلعت من الصاله..
عفاف ابتسمت وقالت:ربي يهديك ياحاجه..بعدين شبحت لعرفه وقالت..نوض اقرا عروفه شويه امس راح عليك اليوم..
عرفه:حاضر..وناض ومشي طلع من الصاله..
وعفاف ناضت وهي تقول...يامعين...
وبدت تحوس ع الحوش...
•••••°°°°°•••••°°°°°•••••
الساعه العاشرة والنصف..
في مدرسة البنات الثانويه..
في فصل ثانيه/1 علمي..
خشت ابله العربي جيهان بش تعطي حصتها..
وقفوا الطالبات تحية ليها..
هي اشرت بيدها فوق وتحت بش يقعمزوا وقعمزت ع طاولتها..
ودانيه تشوفلها بمكر...
هبه بهمس:كان نعرف ع شن ناويه بس..
دانيه بهمس:اصبري تو تعرفي..
جيهان شبحتلهم رفعت حاجبها وقالت:امنعوا الصوت..
شبحولها وسكتوا..
قلبت عيونها وقالت:وين وقفنا اخر مرة ازهار..
فجأة طق باب الفصل..
بعدين انفتح...كانت نائبة المديره:ترا ابله جيهان شويه..
جيهان ناضت ومشت طلعت من الفصل وراها..
دانيه:زعمه شن في؟!
هبه:باك بيلزوها..
دانيه بضحكه:منين طلعتي بيها حكايه اللزة..ابتسمت بمكر وقالت..يارب مايلزوها قبل ماناخد بتاري..
شويه وخشت جيهان وهي مبتسمه بربكه تقول:تفضل..
خش معاها راجل كبير في العمر ومظهره وقور..
شاد فيده شنطه سودا ومشي طول لأخر مقعد في الفصل..
دانيه فتحت عيونها ع وسعهم وقالت بهمس:موجه!! الله ياما انت كريم يارب..
بلعت جيهان ريقها وبدت تتكلم بلباقة مصطنعه وهي تقول:ايه من يقولي شن خدينا اخر حصه؟
دانيه:المعرب والمبني واقسامهم..
جيهان ابتسمت بالسيف وقالت:كويس..احمم..اليوم بإذن الله حنكملوا باقي اقسام المعرب والمبني من الأفعال..
وبدت جيهان تشرح..ودانيه تشارك..
والموجه مركز مع دانيه وعجباته مشاركتها ماكانت مزعجه بالعكس تشارك في الوقت المناسب..
وجيهان تغلي غلي قريب تموت من الغيظ..
ودانيه مستحلية اللي صاير وحاسه بشعور اللي في عز النو والضي هارب فجأة جي الضي وانفتح عليه المكيف...
مافيش وصف ابلغ من هدا لحالة دانيه توا!
جيهان:في حد عنده سؤال..
رفعت دانيه يدها..
جيهان من ورا سنونها وهي مبتسمه بتصنع:شن هو سؤالك..
دانيه نزلت يدها وقالت:جبتلك سؤال برا المنهج ابله لأنك تحبي توسعي مساحة المعرفه متاعنا وتجبيلنا هلبه حاجات برا المنهج..
الموجه ناض وقال وهو متسائل:كيف برا المنهج؟
جيهان تبلع في ريقها وخلاص..
دانيه التفتت للموجه وقالت:الابله تحب تجيبلنا ابيات شعر من الشعر القديم..يعني زي الشعر الجاهلي وتعرب فيه..
الطالبات كلهم يشبحوا لدانيه بصدمه..
وجيهان قريب يغمى عليها من التوتر اللي سببتهولها..
الموجه بإعجاب:ممتاز جدا..نهينك ياابله..شبح لدانيه وقال..باهي شن هو سؤالك؟
دانيه شبحت لجيهان وهي تتصنع في ملامح البراءة:نبي نعرف ياابله بما ان عندك خلفيه قويه عن النحو..
شن اعراب.."آلم" اللي بدت بيها سور هلبه في القرآن!؟
جيهان تنحت في دانيه..
والموجه ابتسم وشبح لجيهان ويراجي في اجابتها..
جيهان رمشت عيونها وقالت:آلم....اعتقد ماليها اعراب لانها حروف وخلاص يعني حتى تفسير ماعندهاش..
الموجه رفع حواجبه وقدم كم خطوه وجي وقف قدام الطلبه وقال...
سؤال ذكي جدا..ويبين ان عندنا طلبه همهم طلب العلم والمعرفه مش غير يقروا وخلاص..آلم..ليها اعراب...
﴿الم﴾: حروف مبنية، في محل رفع خبر لمبتدأ محذوف، والتقدير -والله أعلم-: هذه «الم».
كما يجوز في إعرابها الأوجه التالية:
أن تكون «مبتدأ» وما بعدها خبرها.
أن تكون في محل «نصب»، على أنها مفعول به لفعل محذوف، تقديره: «اقرأ/اتل».
أن تكون في محل «نصب»، على تقدير حذف حرف القسم، والناصب فعل محذوف.
أن تكون في محل جر، على تقدير حرف قسم محذوف مع بقاء عمله: «وحق، الم».
أن تعد أسماء للحروف مسرودة على نمط التعديد، على الحكاية، ويكون كل حرف فيها كأنه بعض اسم، ولا يستحق الاسم الإعراب إلا بعد كماله؛ وعليه فلا محل لها؛ لأنها غير مركبة، فلا عامل لها. وهو مذهب الخليل وسيبويه...
شبح لدانيه وقال...هذا كل شي عن اعراب الم...
ابتسمت دانيه وهزت راسها بإيجاب وشبحت لجيهان..٠
وهو التفت وقاللها:
ألا يابيت بالعلياء بيت...ولولا حب اهلك مااتيت..اعربيلي البيت هدا؟.
جيهان وقفت تشبح للموجه وقلبها قريب يوقف...ساكته وبس مش قادرة تتكلم..
دانيه ضحكت بدون صوت بعدين رفعت يدها وقالت:نعربه اني استاذ..
جيهان شبحت لدانيه وعيونها قريب يطلعوا..
الأستاذ:شن اسمك ياطالبه..
دانيه؛دانيه..
الاستاذ:قطوفها دانيه..ودانيه قطوفها..شن معنى اسمك يادانيه؟
دانيه يإبتسامه:القريبه او او النازله..في الجنه اصحابها لما يقعمزوا تحت شجره مثمرة من شجرها الاغصان متاعها تتدنى ليهم بش يقطفوا منها وياكلوا...
الموجه:نعيم ورغد الجنه...ربي يجعلني واياكم من اهلها..
كلهم بأصوات متقطعه قالوا:آمين..
الموجه ابتسم وقال:ترا اعربي يادانيه..
دانيه وقفت وقالت:ألا...حرف استفتاح مبني على مسكون لامحل له من الاعراب..
يا..حرف نداء مبني على السكون لامحل له من الاعراب حتى هو..
بيت..منادى نكره مقصودة..مبني ع الضم في محل نصب على النداء..
بالعلياء:باء حرف جر..العلياء اسم مجرور وعلامة جره الكسرة الظاهره وعلامة جره الكسرة الظاهره والجار والمجرور متعلقان بخبر محذوف..
الموجه وهو يضحك:ممتاز يادانيه ممتاز..احسنتي خلاص قعمزي..
قعمزت دانيه وهي فرحانه بطير...
خدت شيشة الميه وبدت تشرب..
رن جرس نهايه الحصه..
الموجه توجه طول للمقعد الاخير خدي شنطته ومشي طالع وهو يقول..حفظكم الله ورعاكم..وفتح الباب وطلع..
وجيهان خدت شنطتها وطلعت وراه وهي تشبح لدانيه بحقد..
وصكرت الباب وراها بقوة..
كريمه: بص شوف..دونه بتعمل ايه..
قعدت تضحك دانيه...
والبنات يردوا ورا كريمه..بص شوف دونه بتعمل ايه..
ماعدا طالبه وحده اسمها ازهار تشوف لدانيه بغيره..
ودانيه تضحك ع صاحباتها..بعدين رفعت ايديها فوق وضمتهم لبعض وهي تحرك فيهم..
والبنات لما شافوها هكي قعدوا يهتفوا..
زيد تحدى زيد...ياالصقر الوحيد.
فتحت دانيه ايديه وكورتهم في تحرك فيهم للأمام والخلف..
فجأه...
انفتح الباب وخش جمعه..
البنات سكتوا مرة وحده وناضوا وقفوا..
ودانيه وقفت وهي رافعه ايديها بعدين نزلتهم..
هو مرر نظرهم عليهم وقال:قعمزوا...بعدين ركز بنظره ع دانيه وحرك راسه يمين ويسار وهي نزلت عيونها لوطا بخجل ووجهها مولي احمر...
طلع اللاب توب وقال...هي طلعوا كراسات الحصه...
وخدي خطاط ومشي للسبورة...
•••••°°°°°••••••°°°°°••••
الساعه الثانية عشر قبل الظهر..
هيثم وهو متوجه لخارج مبنى الوزارة وكان يتكلم بالتليفون..
هيثم:اني في طريقي للمركز توا..تو نشوف شن يصير......استنى تليفون ..وصكر..
لما وصل في سيارته بيفتح الباب جاه اتصال..
شاف المتصل فتح الباب وركب ورد طول..
هيثم:السلام عليكم ولدي نعيم كيف حالك..
"الحمد لله عمي هيثم شن حالك انت"
هيثم:الحمد لله..هاه شن صار معاك..
"والله شن بنقولك ياعمي هيثم..اني مشيت لكليته ماليقتاش ودورت في كان في حد يعرفه لقيت زوز شباب..قالوا يغيب هلبه واخر مرة جي تقريبا الخميس ولاالاربعاء قالوا متغير هلبه ومصاحب واحد عدم المؤاخذة ياعمي"رديف"..
هيثم عقد حواجبه وقعد ساكت..
"حاولت ندور اكثر من هكي مالقيت شي..غير اللي قتلك عليه.."
هيثم هز راسه وقال بصوت يدوب طالع؛تمام..تمام..صحيت ولدي..
"واجبي ياعمي وزياد خوي كان عرفت كيف نوصل فيه تو نخبرك"
هيثم:احمم..ياريت..ياريت ياولدي..
"بإذن الله..تبي شي عمي"
هيثم:احمم..صحيت ولدي بارك الله فيك..
نزل هيثم التليفون وحط يده ع رقبته وهو يفكر بخوف..
بعدين تنحنح تاني..وجبد باب السيارة وصكره..
خدي نفس عميق حس روحه انخنق بيه..كح كحتين..
بعدين شغل السيارة وتحرك..
•••••°°°°°•••••°°°°°••••••
في الطريق..
كان زياد متكي بيده ع روشن السيارة وسرحان..
وعبدالملك مرة مرة يشبحله بعدين قال:اليوم بنغديك في مكان مش عادي..
زياد ماردش عليه..
عبدالملك خبط ع فخد زياد..
زياد استاقظ وشبحله بعدين قال:هاه..
عبدالملك:وين سافرت؟
زياد تنهد وقال:فهالدنيا المعفنه الباهي فيها مايقعدش..اصلا الباهي مش مكانه الدنيا..
عبدالملك:صدقت ياصاحبي..هدا علاش اني قاعد فيها لتوا..وضحك..
شبحله زياد وضحك..بعدين حرك راسه يمين ويسار..
عبدالملك بضحكه:اليوم بنغديك في مكان مليح..
هز زياد وهو ساكت وابتسامة بائسة مرسومه ع وجهه شاحب اللون..تعيس الملامح..
•••••°°°°°••••••°°°°°••••••
في الإستراحه..
"تي خليتها بيزا ماتسوى ع قولت الخليجين"
سارة بضحكه:مقواك يابنت..
دانيه ضحكت..
هبه بضحكه:اني بس خاطري نعرف كيف اعربتي الشعر اللي قاله الموجه.
دانيه:المنجوهه هادي حرقتلي دمي يومها مشيت خدت النت من خوي مجاهد وفتحت الغوغل وقعدت ندور واول شعر طلع قدامي هدا..قعد نقرا فيه وقريته غيره هلبه عالم يابنات معقد الله يرحمكم يافراهيدي وسيبويه وكل علماء النحو...كانوا فاضيين هلبه الحق..
ضحكوا البنات..
سارة بضحكه:هدا علم يابنتي وينفع هلبه في تفسير القرآن ..
دانيه:ايه عارفه بس صعب هلبه هلبه..احرف من الفيزياء والجبر..
🌹ودانيه وهي تهدرز كان جمعه واقف في الروشن يشرب في القهوة ويراقب فيها..مثيرة هلبه لفضوله لبنت هادي ومش عارف علاش خاطره يكتشفها اكثر واكثر..
شويه عقد حواجبه لما شاف جيهان طالعه للساحه وماشيه ناحيتها..
وقفت جيهان وقالت:تعرفي ع اللي درتيه لما نخليك تكرهيها القرايه..
دانيه بإستعباط:علاش ياابله شن درت!؟
شدوا البنات ضحكتهم وساره تشبح لجيهان وهي مضيقه عيونها ..
جيهان ودمها محروق:وتتسهوكي فوقها!..رفعت حاجبها ومشت بيدها ع ذقنها وهي تقول..هدا وجهي
كان نجحتي..
"ابله جيهان"
فنصت جيهان والتفتت..
لقت الأخصائية واقفه ومعاها جمعه يشوفلها بإمتعاض..
الأبله:تعالي معاي ابله جيهان..
جيهان غمضت عيونها بنفاد صبر وفتحتهم ومشت ورا الابله..
وجمعه شبح لدانيه بتضييقه عيون بعدين وخر خطوة ولف ومشي .
دانيه ارتبكت من نظرته بعدين وزعت نظرها ع الساحه لقت الانظار عليها قالت للبنات:تعالوا نمشوا غادي..
ومشت..
وهما مشوا لحقوها وسارة تقول:لما كنت نشوف فيها في عزي امي الله يرحمها..
البنات قالوا:الله يرحمها..
سارة بلعت ريقها مع عبرتها وقالت:كانت تبان بنت عاقله ورزينه..
كريمه:المظاهر خداعه..
دانيه:اني والله ماكنت نبي الامور توصل لهني لكن هي مش مخليتني في حالي..
سارة:معذورة دنو....
ابتسمت دانيه بعدين تعنقت ذراع سارة..
...........
داخل..
طلعت جيهان من غرفة الاخصائيه وهي معصبه مشي معاها جمعه وقال:خلي البنت في حالها جيهان وريحي روحك..
وقفت وهي تشوفله برفعة حاجب:شن قصدك..
جمعه:قصدي عارفتيه وفاهمتيه كويس..ماتخلنيش نمشي لبوك وخوتك نقوللهم يحولوك لمدرسة تانيه ..ابتسم ابتسامه صفرا..ومشي وخلاها..
وجيهان معاه بعيونها وهي تقول:صار هكي ياجمعه!...باااهي..
ومشت للدروج راكبه لحجرة المدرسات وهي في قمة الغضب..
••••••°°°°°••••••°°°°°°••••••
الساعه الواحده الا خمس دقائق..
في الطريق..
"اني ياخالتي مانقدر نجبرهم ع شي شن ماكان قرارهم واختيارهم شرط انه مايكونش فيه شي يضرهم"
ماجده:قصدي زواج اختك من واحد نديد بوها مافيشي مضرة ليها..
تنهد وقعد ساكت..
ماجده:تو تشوف شن يصير فيها بعدين من مرته التانيه وصغاره..
مجاهد:في حالة تعرضت لأي شي يضايقها يضايقها بس مش يضرها ناخدها طول تبي ولاماتبيش..
ماجده:وتراجي لين يصير شي يضايقها!؟
مجاهد:ياخالتي هدا يقعد مجرد احتمال لااكثر..مرات يصير العكس..
ماجده تنهدت وقالت:يارب..يارب يصير العكس..
مجاهد ضم شواربه لداخل بعدين قال:إن شاء الله..
فاتوا من قدام ورشة ولاد خالد..
شافوا خليل ورفيق السياره..
خليل ولى لهي خدمته عادي..لكن رفيق قعد مع السياره بعيونه لين فاتت...
💎درس مجاهد بالسيارة قدام حوش هيثم..
نزلت ماجده..وهو نزل بعدها ومشي للباب الخلفي فتحه وطلع الساكو وجي لماجده بيه وقال:امي بتقعد بروحها اليومين هادو..
ابتسمت ماجده وقالت:سلم ونيساتها ياربي ان شاء الله ماتفقدهم حتى اني من توا استاحشتهم كلهم يومين مش معطله..
ابتسم مجاهد وقال:تمام..سلمي ع الدكتور وزياد..
ماجدة:يوصل صحيت ولدي..وخدت منه الشنطه بعدين فتحت الباب وخشت..
بعد صكرت الباب مجاهد مشي للباب السيارة بش يركب..
🌸فهالوقت..
كانت سيارة من بدايه الزنقه..
تمشي وهي تشبح لوطا..
ومجاهد صدفه قبل يفتح الباب شاف يمينه لقاها جايه..
قعد واقف يشبحلها..
كيف تمشي مشية معتدله كلها حياء..وزيها المدرسي طويل ومحتشم ولابسه عليه بالطوا شتوي طويل للركبه..
رفعت عيونها القدام فجأة شافاته..
ولما شافاته تفاجئت...ارتبكت..توترت..
وبسبب حالة الربكه اللي ولت فيها انعقدوا رجليها وعترت وجت طايحه ع ركابها..
مشالها طول يجري..
ومن بعيد كان رفيق واقف يشوفلها لما شافها طاحت مشالها يجري لما شاف مجاهد سبقه وقف مكانه..
ع خشة تهاني للزنقه شافت قدامها اللي صاير..
...مجاهد وصل سارة وقال:سارة!..
سارة قلبها قريب طلع من مكانه لما قال اسمها..
بدت توقف وهي تنفض في ايديها وقالت بإستحياء شديد:ماصار شي..وقعدت تنفض في ايديها..
هو وخر عنها وقعد يشبحلها..
هي لما وقفت ع حيلها جت عينها في عينه
هو نزل عيونه وقال:ماتحسي في شي..
حركت راسها يمين ويسار ومشت بسرعه...
هو ابتسم ابتسامه خفيفه دون مايشوفلها..
وهو يشوف لوطا لقي حديده طايحه..
طبس خداها وشبح لسارة..لحقها وهو يقول:اختي سارة..
سارة في قلبها"ياربي ساعدني"..
وقفت وهو وقف مدلها الحديده وقال:ليك هادي..
شافت جنبها ليده لقت حديدتها شافت ليدها مالقت فيها شي..
بعدين مدت يدها..
هو ابتسم وحطلها الحديده من فوق متجنب يده تلامس يدها..
وهي كانت احرص منه لما مدت يدها وماخدتهاش طول..
لما جت الحديده فيدها مشت طول للباب دون ماتتكلم..
وهو مشي طول لباب السيارة وعيونه عليها لين فتحت باب الحوش وخشت وصكرت الباب..
وهو ابتسم ومشي ركب السيارة..
ع خطمة تهاني من جنبه وهي مضايقه لأنها شافت حالة خوها وهو يشوفلهم قبل شويه..
وهي كذلك تعرف كويس الشاب هدا شن يعني لسارة..
وصلت في حوشهم وقفت في الباب..
شافت سيارة مجاهد ماشيه وخوها جاي وهو معصب..
فتحت الباب وخشت طول...
لقت امها تغسل في البساط في الجنان..
تهاني:امي فهالصقع!..
وحولت شنطتها وكندرتها..
عفاف:مولي حاله يابنتي من حفلة البارح..
لوحت تهاني شخشيرها وجتها وخدت منها المكنسه..
عفاف:تي غير علاش خلاص بنكمل اني.!
تهاني بدت تكد وهي تقول:خشي يما..خشي..
ع خشة رفيق شاف اخته تكد في البساط بحوايج المدرسه..
وشاف امه واقفه وهي لابسه ماليه ع قفطانها وفوق راسها محرمه مربوطه..
رفيق:سجى وين؟!
عفاف بضيق:مراة حامل وتعبانه ولدي..
رفيق عاد من غير شي اعصابه تالفات وزادت حركة سجى اللي كسرت كلامه استفزاته..
خش طول زي الاعصار بسرعه..
تهاني:الحقيه ياماما قبل يقتلها!
خشت في جرته عفاف تجري وهي تقول:تعال هني وين ماشي تعال..
رفيق بصوت زي الرعد:سجى .
صالحه طلعت من الكوجينه مخلوعه..
شدت عفاف يده وقالت:تعال هني..
نفض يدها بقوة وهو يقول:كان ماوريتش فية اصلها اليوم مانوليش راجل..
ع طلعتها هي من جناحهم ترعش من الخوف...
جبدها من يدها وعطاها كف وهو يقول:اني لما نقول كلمة اديريها..
عطاها كف تاني وقال:فاهمه..
عفاف بعياط:يارفيق خليها قتلك..
سجى وهي تعيط:اني مش خدامه هني مش خدامه..
عطاها كف تاني لين جت طايحه وهو يشوف لبطنها..
في عقله يقول ان استمراره في زواجه الغلط من سجى هو وجود هالحمل...وبدونه يخلص منها بسهوله..
وعدو الله وعدوه كان يزيد يحرض فيه ويخلي فيه يذكر في موقف سارة ومجاهد..ويزيد يولع نار غضبه..
قدم وهو مايشوف في شي غير بطنها بش يعفس عليها..
عيطت امها بأعلى صوتها تقول..
"لاولدي ولانعرفك كان درتها"..
كانت عفاف تقول في كلامها وهي مغمضه عيونها بشده..
وسجى تقي ع روحها وهي تعيط ..
هو وقف في اخر لحظه..كلمة امه ليه كان رادع كافي عن الجريمه اللي جاي بيرتكبها..
وخر خطوة بعدين مشي طول بيطلع..
صالحه وهي ترعش:تستور ياربي تستور ياسيدي..
وتهاني واقفه جنب الباب تشوفله بحزن..
فات من جنبها..بعدين وقف ووخر خطوة لين وقف قدام اخته وقال وهو ينهج من الغضب:هو هدا؟
تهاني بخوف:من هو؟..
رفيق بعصيبه:الزفت اللي كان واقف قدام حوش الدكتور..
تهاني من خوفها اضطرت تكذب وقالت:اه..لالا..مش هدا..مش هدا..
يسأل هني رفيق لو كان هو هدا نفسه الشاب اللي تبيه سارة لانه في مرة تهاني بش تخليه ينساها قالتله ان في حد في حياتها وهو كذب اخته وقتها..بس اللي شافه قبل شويه خلاه يصدق..
وتوا مش مصدق اخته وهي تقوله مش هدا..
شبحلها شويه..بعدين هز راسه بإيجاب ومشي للباب طول..
طلع وصكر وراه الباب بقوة..
وتهاني زفرت بخوف..بعدين ولت تكد في البساط..
وامها داخل تعاني في سجى ومعاه صالحه..
ولطف الله حال بين انه يصير لسجى والجنين اي شي...
•••••°°°°°••••••°°°°°°••••••
الساعه الخامسه عصرا..
كانت نسيبه خاطمه بسيارتها من قدام الجامع وهي مروحه من المدرسه مع بنات خوها..
شافتله.. لقت خليل طالع يلبس في رجليه ومعاه واحد يهدرز هو وياه..
شبحت القدام وهي تذكر في كلام امه ..تنهدت بحزن من قلبها...
اما عنده هو...
خليل:نبي شيخ نسفتيه في حاجه مش قادر نرتاح واني مش محصل فتوة تحول الهم اللي قاعد زي جبل ع قلبي..
الامام: نعرف شيخ يسكن في اخر الشارع لكن الفترة هادي صايرة عنده حالة وفاه ولده متوفي..
خليل بأسف:باهي مافيش غيره..
الامام:لالا امشيله هو مايرد حد شن ماكان ظرفه..قبل سنه توفت امه وفي العزي كان يستقبل الناس اللي جايه تطلب الفتوى...ديما يقول العلم مانقدرش ندسه ولو كنت ع فراش الموت..
خليل:باهي وين حوشه بالزبط؟
الامام:بدايه الشارع هدا...اسأل وانت ماشي عن حوش الشيخ عطيه شعبان يدلوك..
مد يده خليل وصافح الإمام وهو يقول:بارك الله فيك..
الامام:فيك بارك الله..
مشي خليل..
والامام يشبحله وهو يدعي:اللهم ثبته يارب وانفعه وانفع به..
حط خليل ايديه في جيوب كبوطه وطلع من بوابة الجامع..
ومن بعيد..
كان في واحد ماشي وراه يلحق فيه..
ومن جهة تانيه سيارة سوداء ماشيه وراه...
•••••°°°°°••••••
"تي اليوم ماظنها تموت ههههه"
رتاج بضحكه:صحه ليك..لكن هاه ردي بالك منها اكيد حترد عليك..
دانيه بقلق:لا ان شاء الله مش قدها اني مانقدرش نرد عليها ديما..
رتاج:ربي يكفيك شرها..ولبست خمارها..
"هيا رتاج"
رتاج:هيا يام واتيه..
خدت شنطتها ومشت طلعت..
ودانيه حطت ع راسها شاربه ومشت وقفت فالروشن..
شافت سيارة راجل اختها الفخمه مدرسه مقابله العماره..
شويه وشافت مجاهد جاه سلم عليه..بعدين ركبوا الزوز السيارة وجوا سدينه ورتاج ركبوا من الخلف..
ولحظات وتحركت السيارة...
غيرت عيونها لخوها رشيد المقعمز مع صحابه..وكلهم لاهيين بالتليفونات...غطا عليها منظرهم سيارة تعرفها كويس لحقت سيارة عادل راجل رتاج..
خبطت بيدها ع خدها وقالت:حي غبارة!!؟
••••••°°°°°°•••••°°°°°°••••••
"ياحنه ماشي زردة هو وقروبه"
ضحكت ساره..
نسيبه:مرات يطلع ماشي يثلت..
سارة ضحكت تاني..
ماجد:لايتلت لايسبع ريحي جمالك بعدي معاش يشوف..
نسيبه تنهدت وهي تقول:ان شاء الله..
ع جية البنات بش يتغدوا..
ريحان:بابا ماروحش؟.
اختفت ضحكة سارة..
ماجده:لالا حبي بابا مشغول..هي تعالوا تغدوا كسكسي خالتكم ماجده..
مشوا البنات وهما مضايقات للطاوله..
نسيبه قعمزت معاهم بش تتغدى..
وماجده قالت لسارة:حبيبتي زيني الكيكه ترا..
سارة:حاضر خويله..
ومشت لطاجين الكيكه وخدت فازوا الشكلاطه وبدت تزين فيها..
مررت ماجده نظرها عليهم بحزن..
بعدين التفتت بدير قهوة جو عيونها ع رسمة زياد المعلقه فالصاله..
ع صورة اسيمه تحديدا..
شدت دموعها بقوة بعدين طبست طلعت البكرج من الدولاب ومشت بدير القهوة..
▪▪▪▪
◇يعني هي الأم...قصدي..هي شي مقدس هكي مخلوق رب العالمين عطاه قيمه كبيرة...الرسول..امك ثم امك ثم امك..الزم قدمها فثم الجنه..
الام في كل الاعراف والديانات في كل العصور ليها نفس القيمه نفس العظمه..لسبب واحد..لانها اكثر كائن معطاء على الاطلاق..اكثر كائن حنون على الاطلاق..اكثر كائن محب على الاطلاق..ريتوا مسمى نبع الحنان اللي استخدمناه للطرف مؤخرا..هو مسمى جدا عميق اطلق ع الأم..نبع الحنان اللي يروي حوشها كله صغارها وراجلها..
لهذا تلقى البنت والولد اول مايخشوا للحوش اول من يسألوا عنه...الأم...امي وينك..ماما ياماما..
وكأنهم يعني كان مخليين روحهم في الحوش ورجعولها بش يعيشوا من جديد..باهي..لما هالنبع ينضب..لما هالروح ترقى لمولاها...
كيف حتولي شكل حياتهم كلهم...الحوش نفسه بحيوطه وسقفه وبيباته...بكل شي فيه..
حيكون اشبه بالبيوت المجهوره..اهلها عايشين فيها اجساد حيه لكن في نفس الوقت لاحياة فيها..
هدا اللي صارلي وصار لزياد وسارة وحتى ريحان وجنان اللي كانوا صغار لما فقدوها..
السؤال الآن..تعتقدوا ان المهمه حتكون ساهله ع الأب اللي هو نفسه قاعد يعاني من فقد روح الحياة متاعهم..
كيف يقدر يملا فراغها..او يحل محلها؟!
في اباء مع الاسف همهم انفسهم...اول حاجه يديرها يتزوج ويعيش حياته واخر همه صغاره وشن يصير فيهم..
وبش مانكونش ظالم..في اللي يتزوج لأنه مايقدرش يعاني صغار صغيرين بروحه وهدا حقه وواجب عليه احيانا..
بس اللي زي حالاتي اني..اللي لايمكن يخلي مراة تحل محل زوجته السابقه وحب عمره حتى لوشكليا..
اللي زيي كيف حيقدر يتحمل مسؤوليه كان محولها بكل ثقلها لرفيقة حياته اللي خلاته ورحلت..بدون سابق انذار..
خلاته تايه..وضايع..ومش عارف كيف يتصرف..
ضحك وهو يقول..والراجل هدا وزير..مسؤول في دوله زياده..اووف..استغفر الله..صعب صعب جدا والله..
▪▪▪▪▪
كان في سيارته بطريقه للحوش وعقله مايكفر في شي غير في ولده زياد..هو بس اللي ولى شغله الشاغل من امس لليوم..
هيثم تنهد بعدين قال:مافيش حل قدامي غير اني نمشي لكليته غدوة ونسأل عليه ولانستناه..ايه اني ماني باعت حد..هادي مسؤوليتي اني..اني بس..
••••••°°°°°
ومن اب مهموم بولده وكله خوف عليه...
لأب مكلوم..فقد ولده من فترة قريبه جدا...وفقد الأبن كفقد قطعه من القلب..فقد مؤلم للموت...
خش خليل للخيمه وقعد يدور بين عيون الموجودين على الشيخ..
لعند ماشافه وعرفه..من هيئته عرفه...
مشاله طول..
مد يده وقال:عظم الله اجرك..
رفع عيونه فيه وناض صافحه وقال:شكر الله سعيك..صديق لولدي انت؟
خليل:لا..اني جيتك نبي فتوى ياشيخ..
الشيخ شد على يده وقال:تعال معاي..
شبح لواحد من ولاده..بعدين مشي هو وياه وخشوا داخل للحوش..
دخله لدار صغيره وصكر الباب..
مرر خليل نظره ع الدار لقي فيها مكتبه صغيره..وطاوله وكرسي...
الشيخ خدي كرسي محطوط ع تركينه..قعمز وقال لخليل قعمز تفضل...
قعمز خليل على الكرسي متاع المكتب..
الشيخ:شن سؤالك؟
خليل خدي نفس بعدين قال:اني..اني ياشيخ كنت نخدم فث تجارة المخدرات..
عقد الشيخ حواجبه..وخليل شاف ردة فعله من ملامح وجهه سكت من الخوف..
خوف انه يلزه..
الشيخ:كمل..
خليل:احمم..اني..تبت لله من مده قصيره من يوم ونص هكي..بس مازال في شي في داخلي يقولي ان ربي مش قابل توبتي..برغم كل الاحاديث اللي سمعتهم عن مغفرة ربي.والقصص..في حاجه..حط يده ع صدره وهويقول..حاجه هني تقولي..انت ضيعت ناس وفي من مات وانت تسبب في موته..ذنوبك كبيره كيف تبي ربي يسامحك بسهوله..كيف تبي يغفرلك كل شي درته..حتى الناس نظرتها ليا مازالت نفس النظرة..احمم..خايف..مهما ندير ربي يطردني من رحمته..خايف نكون ملعون ياشيخ..فاهم عليا..
ابتسم الشيخ وقال:فاهم عليك ياولدي فاهم..وهدا حال كل تائب راهو الشيطان مش حيخليه في حاله اللي يتوب يخسر الشيطان هلبه ويضيع جهده اللي بذله في سبيل اغراقك في الذنوب والظلام...فهو حيحارب بش مايخسرش نهائيا..الحاجه اللي تقولك من داخل في كلام ييأسك من رحمة ربي هادي منه هو راهو..شوف اول ماتسمع كلام في داخلك..يخليك تسيء الظن في ربك..اعرف طول انه من الشيطان لهدا طنشه..ربي لو مايبكيش ولايبي يتوب عليه راهو ماساعدكش بش ترجعله ياولدي وتوب...
خليل ابتسم براحه بعدين قال:باهي كيف نقدر نكفر عن ذنوبي اللي درتها كيف نقدر نثبت..
الشيخ:امم..زاحمها بالصالحات...من الاعمال الصالحه اللي تعود بالمنفعه ع الناس..كثر الخبيئه..دير اعمال صالحه تقعد سر بينك وبين ربي بس..الخبيئة فضلها عظيم وتقربك لربك اكثر واكثر..والثبات..عن طريق حاجتين..دعاء كان الرسول اللي هو الرسول يقول فيه ديما..يامقلب القلوب ثبت قلبي على دينك..والحاجه التانيه الصحبه الصالحه..
خليل بإبتسامه:الصحبه الصالحه..في وليد عمري ماننسى جميله معاي لولاه هو من بعد ربي راهو قاعد زي ماكنت...تعرفت عليه في الجامع..
وحكي خليل اللي صار معاه للشيخ..لعند ماودع الشاب اللي كان سبب في ثباته ع التوبه..
ضيق الشيخ عيونه وقال:كم عمره قتلي؟
خليل:نعطيه 16..17سنه..
الشيخ بصوت مخنوق:استنى ياولدي..
طلع نقاله ويده ترجف وحط ع حاجه وراها لخليل وقال:هدا؟.
خليل بصدمه:ايه هو هدا اسمه يزن..
الشيخ صاح وقال بنبرة باكيه:الله اكبر..الله اكبر..وحط ايديه ع وجهه وقعد يبكي بالعبره..
خليل قعد يشوفله بصدمه ودموعه فعيونه وقال:ياشيخ فهمني شن في؟!
الشيخ حول ايديه من ع وجهه وقال:هدا ولدي..ولدي اللي توفى..توفى في نفس الليله اللي حكيت عنها..
يومتها..كانت ماشي في حاجه صديقه امه مريضه وحالتها تاعبه هلبه هو دفع حق قعادها في العياده وانشغاله بيه خلا صلاة العشاء تفوته..كلمني وقتها..وقالي يابوي اني درت ذنب كبير ضيعت صلاة العشي في جماعه..كان يكلم فيا بصوت حد هموم الدنيا كلها ع راسه..قتله..احمم...قتله توب لله واستغفر لذنبك وبرا للجامع وشوف كان في حد بيصلي صلي معاه بش تاخد اجر صلاة الجماعه..رد عليا يقول..ان شاء الله ربي يقبلها ربي يقبلها..اخر حاجه قالهالي..بعد نصلي بنولي لصاحبي في العيادة ونقعد معاه بالك يحتاجوا حاجه يابوي..
لكن مالحقش يوصل فيه..التاكسي اللي ركبه دار حادث وهو وياه توفاهم الله..عز وجل..وقعد يبكي..
خليل كانت ملامح وجهه جامد يسمع في الراجل شن يقول ودموعه في عيونه..
ناض الشيخ وجي لخليل وضمه وهو يقول:انت عمل ولدي الصالح اللي ختم بيه حياته...رد بالك ياولدي ردبالك تخلي الشيطان يتمكن منك ربي اللي ردك ياولدي ربي..وخلا اخر اعمال ولدي الصالحه...انت حسنات ولدي الجاريه..رد بالك تولي في توبتك رد بالك ياولدي ارجوك...
وخليل يبكي وهو يسمع في اب قلبه مفطور من الحزن ع فقد ولده..ويبيه يتنعم في قبره ليوم القيامه وبعدها ينال النعيم الأكبر..
وهني سأل نفسه..معقوله ربي يحبه لهالدرجه اللي وصله لهدا كله..اللي حول حاله لحال ماكانش يحلم بيه...
🌷رحمة الله وسعت كل شي..واللي ربي يشوف في قلبه خير ويريد بيه خير يشرح صدره ويهديه ويقربه...رب يامن رحمته وسعت كل شيء اجعلنا شيئا تسعه رحمتك..🌷
•••••••°°°°°°°•••••••°°°°°°°••••••••
"شن رايك رتاج"
رتاج وهي دور بعيونها في الحوش:شن رايك امي..
سدينه:الله يبارك بنيتي...
رتاج شبحت لمجاهد وقالت:وانت وخيي شن رايك؟
مجاهد :كان عجبك انتي اني عاجبني..
ابتسم عادل..
شبحت رتاج لعادل وقالت:كله حلو..
عادل بإبتسامه:كويس...المهم لو متلا بعد روحتي للحوش وقعمزتي مع روحك وحسيتي ان فيه شي مش عاجبك خبريني طول نغيره..
رتاج هزت راسها بإيجاب..
مجاهد:بناتنا عيونهم مش واسعه...
عادل ضحك وقال:اسف لو وصلك هالمعنى من كلامي..زي ماتعرف الحوش هدا حوش رتاج وحتى عقد ملكيتخ عندها يعني يحقلها ادير في اللي يعجبها واني عليا انفد بس..
ابتسمت رتاج وهي تشوفله..
مجاهد :مفهوم..رفع حواجبه وقال..كان مافي شي تاني خل نروحوا..
عادل هز راسه وهو مبتسم:تمام..زي ماتبي..
مجاهد شبح لأمه واخته..
نزلوا خماراتهم ..وهو مشي وهما وراه..
وعادل مشي وراهم..
بعد ماطلعوا..
ركبوا سيارة عادل..وعادل تحرك طول..
وجهاد لحقهم...
•••••°°°°•••••°°°°°°•••••
الساعه السادسه والنصف..
في الجامع..
بعد صلاة المغرب..
كان خليل يصلي في سنة المغرب..
وهو ساجد..طول هلبه وهو يدعي ويبكي..وكل دعائه كان طلب المغفرة وقبول التوبه..وكان يدعي يزن ان ربي يجعل مكانه الجنه باللي داره معاه..
في الجامع اللي كان شبه فاضي..كان من جهة تانيه..
هيثم مقعمز وهو رافع ايديه ويدعي لربي يقويه ويعينه ..ويدله ع مكان ولده زياد..ويحفظه ومايخليشي يضيع منه..
هيثم:برحمتك ياأرحم الراحمين...
نزل ايديه ..بعدين ناض ولف بيمشي جو عيونه ع خليل اللي كان ساجد..
قعد يشبحله شويه..بعدين تنهد ومشي كمل طريقه للباب..
وطلع...
رفع خليل راسه ودموعه كانوا سيل يسيل ع خدوده..
قعد يقرا في التشهد....
بعد ماكمل سلم...
بعدين مسح بيده ع وجهه..وخدي نفس والتفت للمكان اللي صلى فيه مع يزن..
يزن الشاب اليافع..اللي معاشش في الدنيا اكثر من نص عمر خليل..كانت سنين عمره كلها لله لأخر لحظه في حياته..
وهو واني وانت وانتي وغيرنا من الناس ممكن عشنا 30ولا 40 ولا50سنه..وماعشناش لله بكل..او ممكن عشنا لله كم يوم او كم اسبوع او كم ساعه او كم شهر...
مش شرط الانسان يدير شي كبير بش يعيش حياته لله...
المراة لو نوت تخدم راجلها وصغارها لله..تبدا عاشت لله..
والراجل كذلك لو ابتغى في كل ماانفق وصرف ع مرته وصغاره وجه الله يبدا عاش لله..
البنت لو حفظت نفسها وصانتها عن الحرام كله صغيره وكبيره وتركت اي شي ربي مايحباش لوجهه الكريم..تبدا عاشت لله..
والشاب لوعف نفسه ونزهها عن كل المحرمات لوجه لله يبدا عاش لله..
الطالب اللي يقرا وهو حاط هدف في راسه ان بعد التحرج حيخدم خدمه فيهل نفس للناس يبتغي فيها وجه الله يبدا عاش لله..
اي عمل صغير او كبير نديروه وحني نبتغوا بيه رضا الله ولوجهه الكريم ويكون هالعمل ملازمنا العمر كله يعني حني عشنت العمر لله..
ويعيش عمر لله...رب حيكافئه مكافأة ماتخطرش ع باله سواء دنيا ولاآخره...
¤فلا تعلم نفس ماأخفي لهم من قرة أعين جزاء بما كانوا يعملون¤
ومن اوفى بالعهد مثل الله سبحانه وتعالى علوا كبيرا🌷
💎خليل وهو ماشي بطريقه للحوش كيف يفكر في حياته كلها واللي جاي منها كان ربي مد في عمره..
كان يراجع في حساباته كلها وعلى هالمراجعه ناوي يرسم خط حياته الجديده..
لما خش للزنقه.
اللي كانوا يراقبوا فيه..
اللي ماشي ع رجليه واللي في السياره..كملوا طريقهم بس بحدود المنطقه المتواجد فيها خليل...
🍁🍁🍁🍁
هديكا الليله..
كان هيثم مع عيلته ومش معاهم يساير فيهم مسايره وعقله مشغوله بزياد..
لعند ماجي وقت النوم..
وكالعاده خدوه معاه البنات الصغار ..رقدهم لكن هو قعد سهران..
🍁وتاني يوم..
غير في هيئته شويه بش تبدا غير معروفه..
ومشي للجامعه..
لما وصل كلية الطب..خشلها وهو يدور بعيونه ع ولده...
وولأسف مالقالاش اي اثر..
سأل عنه..واللي يسألهم يقولوا ماشفناشي من مده..
........
حاول اليوم اللي بعده يجي يستنى ساعتين تلاته بعدين يمشي يشوف اشغاله...
......
واستمر ع هالحال لمدة تلاته ايام..
وفي يوم..
قرر يمشي بعد الظهر..
وهو طالع من الوزاره..
لقي قدامه مراه ومعاها ولادها التلاته يراجو فيه..
المراة جاته تجري وهي تقول برجاء:بالله عليك شويه بالله عليك..
بالسيف وقف وقال:تفضلي وياريت تستعجلي مشغول جدا..
المراة:اني مانبي منك شي..غير انك اطلع راجلي من الحبس ع خاطر هالصغويره..
هيثم بآستغراب:نطلع راجلك من الحبس!؟هني وزاره الصحه مش العدل اختي..
المراة ودموعها ينزلوا:اني..مرت الراجل..اللي دار الحادث مع المرحومه مرتك..
تبدلت ملامح وجه هيثم للحقد..شبح للمراة بنظرة تخوف..
بعدين مشي عنها وخلاها..
المراة بتوسل:ع خاطر هالصغويره..والله ماكان يقصد والله..بالله عليك مالينا حد غيره بعد ربي.ع خاطر هالوليدات..
المرافقه وقفوها..
وهو ركب سيارته وتحرك طول...ودموعه ينزلوا..
بعد قطع مسافه لاباس بيها..
وقف السياره..حول دجاكة البدله..ولبس بالطو اسود..وطاقيه صوف..ونظارات سود وشال اسود..
وشغل السيارة وتحرك باتجاه الجامعه..
▪▪▪▪
◇مش خوف ع" برستيجي" بين ظفرين..لا ابدا والله..ماكنتش نبي ننشغل بأي شي عن ولدي..لأن عارف ان وجهي معروف ولو شافوني غادي مش حيخلوني في حالي..
▪▪▪▪
في كلية الطب..
كان زياد واقف يدخن وهو يراجي امتى تبدا المحاضرة..
فهاللحظه..
خش هيثم للكليه وقعد يدور بعيونه بين الطلبه..
لعند ماطاحو عيونه ع واحد يشبه لزياد..ومايبيش يصدق انه هو نفسه زياد من منظره..وشكله كيف مولي..واللي يدير فيه..يدخن!
حول نظاراته يبي يتأكد من اللي يشوف فيه!
زياد كمل تدخين ولوح السيجارة ومرر عيونه يمينه..
وطاحوا على بوه...توسعوا ع الآخر...
والقلب بدي يدق بقوة...من الخوف..
وخر خطوه..وراها خطوه..
وبوه قدم خطوه..وراها خطوه..
هو لف وطول مشي يجري...
وبوه بدون وعي قعد يجري وراه..
والكليه تتفرج..
كان زياد يتخطى في الطلبه ويدف فيهم..
وبوه نفس الشي...
ولأنه زياد يعرف الكليه وحافظها اكثر من بوه اللي ناسيها..
قعد يخش من مكان ويطلع من مكان وبوه وراه..
زياد وهو يجري..عتر طاح..
وقف هيثم وقال بخوف:زياد!
زياد وقف ع حيله وكمل جري..
وهيثم فات يجري وراه..
وكل مرة يقابلوا ياعامل نظافه..
ياأستاذ ياأستاذه..او حد من الطلبه..
لعند ماهيثم حس بتعب شديد...لأنه شبه ماكلي شي فهاليوم واساسا ليه وقت مجافي الماكله..
كان يجري بتعب..
وزياد يجري بقوة من الخوف..طلع تليفونه واتصل بعبدالملك..
وهيثم وراه ينادي فيه:زياد..زياد!
لعند ماطلع للطريق لقي قدامه سيارة عبدالملك ركبها..
زياد:تحرك فيسع..
عبدالملك:من هو هدا!!؟.
زياد بعصبيه:بوي..بوووي..
عبدالملك هز راسه وتحرك بسرعه...
وهيثم وصل فيهم بعد تحركت السيارة ..
وهو داهش قعد ينادي:زيا...زياد..زياد..ولدي...ولدي..
ومشي بتعب قعمز ع الرصيف وهو يشوف للطريق اللي مشت منها السيارة...وهو يقول...زياد...
🍁🍁🍁🍁🍁🍁🍁🍁🍁🍁🍁🍁🍁🍁
الساعه العاشره ليلا..
"غير خشوا ارقدوا ياريحان وجنان لما بابا يروح يرقد معاكم"
ريحان:لا مش راقده لين يجي..
جنان:حتى اني..
سارة بقلق:حسني خفت عمتي وينه لتوا؟!
نسيبه تنهدت بقلق وقعدت ساكته..
فجأة انفتح باب الحوش الخارجي..
نسيبه تنفست براحه:اهو روح..
ساره حطت يدها ع صدرها وقالت بصوت هامس الحمد لله..
جنان وريحان مشوا وقفوا قدام الباب يراجو فيه امتى يخش..
انفتح الباب وخش..
جوه يجروا وشدوا رجليه..
هيثم وهو مضايق ع الأخر:خيركم مش راقدين!!؟تعالي يانسيبه خوديهم رقديهم..
نسيبه وهي تشوفله بقلق:تعالوا حبيباتي..
ريحان:لا نبوا نرقدوا معاك..
هيثم بضيق:خوديهم يانسيبه..
سارة خافت..
نسيبه جتهم وقالت:هي تعالوا حبيباتي تعالوا بابا تعبان..
ريحان بدموع:نبي نرقد مع بابا اني..
جنان بدموع:حتى اني..
هيثم معاش تحملوا اعصابه بأعلى صوته قال:اييييه علينا..اسمعوا الكلام وبروا مع عمتكم ماتكسروليش الراس...
البنات من فجعتهم طلقوه ووخروا..
خدتهم عمتهم ومشت بيهم طول لدارهم وهي خايفه وقلقه في نفس الوقت..
هيثم تلفت وصكر الباب بقوة من غضبه..
بعدين التفت وشبح لساره..
لقاها تشبحله بنظرة استنكار..ودموعها ينزلوا..
قعد يشوفلها وهو ساكت..
اما هي مشت بسرعه لدارها وهي تبكي..
وهوسمع صوت باب دارها تصكر بقوة..
غمض عيونه بشده...بعدين..فتحهم وقعد يمشي بخطوات ثقيله لين وصل لفم الصاله..
وقف..وشبح للوحه متاع زياد..
قعد يشبحلها وهو يتأمل في ملامح فقيدته...
ارتسمت ع وجهه ملامح الحزن..
نزلوا دموعه...بعدين غير عيونه عنها ومشي..
وين خش ممر الديار..
فات من جنب دار سارة سمع صوت بكاها..
قلبه وجعه....وقعد يمشي لين فات من جنب دار البنات الصغار سمع اصوات بكاهم وعمتهم تسكت فيهم..
قلبه زاد وجعه..
وكمل يمشي لين وصل في دار النوم..
فتحه وخش..ولما جي بيصكره جو عيونه ع دار زياد واذكر كيف كان شكله لما شافه...قلبه انفطر..
سكر الباب..
بعدين مشي للسرير..قعمز عليه بهده وشبح قدامه..
شاف عطر اسيمه ع الزيانه...وشاف صورة الشماعه ع المرايه قاعدات معلقات فيه عباية لأسيمه وشاربه ليها..
هيثم بصوت مخنوق:اااه ياأسيمه..لو تعرفي قداش كسرنا غيابك..هدنا..دمرنا...دمرنا ياأسيمه...وحط يده ع راسه وقال ببكي..دمرنا...بعدين حط ايديه الزوز قدام عيونه وقعد يبكي بالعبرة..

.....يتبع...