البطل المغمور "شمس الغروب"

الجزء السابع

💐..
أسيمه قعدت فالحوش يومها خدت اذن عن طريق الهاتف وبسبب ظرفها عطوها اجازة يومين زياده..
يعني خميس وسبت واحد..
برغم ان زياد حاول فيها تمشي بما ان دوامها محدود بوقت الحصص اللي تعطيهم وغالبا ماتفوتش الساعه 11..
لكن هي اصرت تقعد ع خاطره..
ع خاطره مش بسبب اصابته لا..بل خوفا من غضب بوه اللي جاي فالطريق..
▪▪▪▪
◇هو الأب رمز الهيبه فالحوش...لازم صغاره يهابوه ويديروا كنترول لرواحهم وتصرفاتهم وكلامهم معاه..
يعني مثلا زمان وحني صغيرين بوي لما يجي يقيل قريب حتى نفس نقطعوه سوا اني في طفولتي ومراهقتي ولااختي نسيبه..
هدا مثال بسيط..
وفي غيره هلبه امثله حني فيها نضبطوا انفسنا خوف من الأب..ولاخل نبدلوا كلمة خوف بمهابه..
الأب مفروض يكون مهاب..مش مصدر خوف لصغاره وزوجته..
واني معروف انسان لما نوصل لمرحلة الغضب مانعرفش شن نقول ولاشن ندير المهم نعبر عن غضبي وبس..
واسيمه زوجتي تعرف هالشي كويس وكذلك صغاري عرفوه مع الوقت..
▪▪▪▪▪
كانت اسيمه تمشي وتجي في الصاله وهي فقمة التوتر..
وقفت لما سمعت صوت الباب الخارجي انفتح..
خدت نفس وقعدت واقفه في مكانها وقالت..
اسيمه بقلق:يارب نزل عليه الهدوء يارب اكبح غضبه ياربي..
شبحت للباب الدخلاني لما سمعت حركة المفتاح ع الباب..
بعدين انفتح وخش هيثم حط شنطته..وبدي يحول في كندرته وصكر الباب..
قدمتله اسيمه وقالت:الحمد لله ع سلامتك..
شبحلها شويه وهو رافع حاجبه..
بعد حول كندرته مشي طول وفات من حداها بدون مايرد عليها..
هي تنهدت بضيق ومشت وراه..
وصل في دار زياد لقاها مفتوحه خش عليه..
لقاه مقعمز ع السرير وهو لابس شورت وتيشرت نص كم وفيده دفتر الرسم متاعه كان يرسم فيه لما شاف بوه صكره وقال بنبرة فيها شي من التهكم؛حمد لله ع سلامتك..
هيثم شبحله شويه..تجاهل اسلوب كلامه..بعدين جاه وقف ع يمينه وطبس ع رجله قعد يشوف في الجرح المخيط..
واسيمه تشبحله وزياد يشبح لملامح وجه بوه كلها غضب وقسوة وهو يشوف للجرح..
▪▪▪▪
◇وماشافش الدموع اللي كنت حابسهم فعيوني لما شفت حالة رجله..اني راجل مايتحمل في صغاره شي مرات نتمنى لو نقدر نحطلهم حراسات وين مايمشوا معاهم..لو نقدر اني بروحي نكون هالحارس..بس في نفس الوقت ماينفعش لازم يتعلموا يواجهوا الحياة بكل شي فيها المؤذي والمسالم...
المهم..اني في وقتها شفت ان زياد هو الغالط بنسبة مليون في الميه...
▪▪▪▪
وقف ع حيله وشبحله بغضب وقال:اني نبي نعرف انت امتى ادير عقل قولي امتى؟
زياد شبح لأمه وامه غمضت عيونها وفتحهم بمعنى"معليشي فوت"..
هيثم بعصبيه:اشبحلي هني..اني نكلم فيك ..
شبحله زياد بحده وقال:اني مادرت شي غلط..
هيثم:ايه تصرفات البلطجيه والعراك والضرب فالشارع اللي وصلوك لهني مافيه شي غلط..!!
زياد:باهي انت اسألني قبل شن سبب العركه علاش اني درت هكي!؟
هيثم :وعلاش بنسألك واني عارف الجواب سلفا استعراض عضلات تحساب هادي هيا الرجوله كان خشيت عركه وضربت وانضربت..
زياد ضحك بتهكم..
هيثم :وقح وقليل أدب..ماندري انت يصير منك كان قعدت هكي..ماندري..
اسيمه؛هيثم..
قاطعها وقال بصوت عالي:اسيمه ارجوك..نقص صوته شويه وهو يقول..ارجوك معاش تدخلي بيني وبين صغاري لما نجي نحاسبهم معاش اطلعيني قدامهم الأب السيء اللي يكرههم..وانتي امهم الباهيه المتفهمه اللي تحبهم..
اسيمه شبحتله بصدمه..
وهو قعد يشوفلها بنظره جاده وحواجبه مرفوعات..
زياد شبح لأمه بعدين شبح لبوه وقال بغضب:حتى امي توا بتطلع ماتنفعش وهي اللي تلمع فصورتها ع حسابك!..اشر عليها وهو يقول..المراة هادي هي اللي مخليتنا لتوا نقولولك..
"بوي"..
شبحوا الزوز لزياد..
نظرات هيثم لزياد كانت تبان نظرات غضب شديد نابع من الداخل لكن في الحقيقه هي ستار يخفي بيه حجم الألم اللي حس بيه من قوة وقع كلمات زياد القاسيه عليه..
ماباش يرد عليه..حده سحب نفسه ومشي بيطلع من حداهم..
فات من جنب اسيمه اللي كانت مضايقه منه وعليه هلبه وطلع..
شبحت اسيمه لزياد..
وزياد شبحلها وقال بتهكم:ريتي يام وين وصلت بيه..ريتيه؟!
اسيمه تنهدت بألم وشدت دموعها وهي تقول:بوك اني اللي نعرفه نادم ع كل كلمه قالها توا..البني آدم لما يملكه الغضب يقول اي كلام بعدين يندم عليه..
ابتسم بتهكم وحرك راسه يمين ويسار..
بعدين خدي الدفتر متاعه فتحه وخدي القلم الاسود ومتاعه ورجع يرسم من جديد..
امه قعدت واقفه تشوفله بحزن بعدين مشت طلعت من حداه..
قعدت تمشي بطريقها للصاله لما وصلت فيها سمعت باب الحوش انفتح وتصكر...
ابتسمت بأسف..بعدين تنهدت وخشت للصاله..
••••°°°°••••°°°°°•••°°°°•••
في مدرسة سارة الإعداديه..
تحديدا فصلها..وقت كانت تاخد في حصة احياء..
كانت جدا شاطرة في الماده هادي وتحبها هلبه وديما تنسجم مع المدرسة وهي تشرح..
الا هالمرة عقلها كان مشغول بحاجتين..
بخوها زياد واللي حيصير بينه وبين بوها..وبإختبار الرياضيات اللي بديره الحصه الرابعه..
وفي الوقت اللي كانت فيه سارة سرحانه..
طق باب الفصل وانفتح وخشت أبله النشاط الثقافي
الابله:سامحيني ياأبله بناخد منك طالبه ضروري..
ابلة الأحياء بإبتسامه:مافيش مشكله..
ابله النشاط:شكرا..شبحت للطالبات عيونها جو ع تهاني ابتسموا لبعض بعدين شبحت لسارة وقالت..سارة..
نخصتها تهاني بش انتبهت..
شبحت ساره لتهاني..
تهاني:ابله النشاط..
شبحت سارة للباب وناضت وقفت وقالت:نعم ياأبله..
ابلة الاحياء:شكلك ماكنتيش معانا بكل ياساره..
ساره وجهها ولى احمر من الإحراج وماعرفتش بشن ترد.
ابلة النشاط:اكيد تفكر فوخيها معليشي معذورة..
ابله الأحياء:علي سلامة خوك..
سارة:الله يسلمك..
ابلة النشاط:تعالي سارة مانبوش نعطلوا الأبله اكثر من هكي..
طلعت سارة من المقعد وهي مستغربه ومشت للباب..
وسعتلها الأبله طلعت..بعدين قالت:سامحيني ياأبله..وطلعت وصكرت الباب..
سارة:في حاجه ياابله؟
الأبله بإبتسامه؛في حاجه ياسارونه..
ابتسمت بإستغراب..
مشت وسارة معاها..
الأبله:تو نوصلوا لفصل النشاط وتعرفي يامبدعه..
سارة عقدت حواجبها بإستغراب وقالت:مبدعه!
ضحكت الأبله وكملت بسارة لحجرة النشاط الثقافي وهي ساكته وسارة تفكر في كلامها..
وصلوا الحجرة..
فتحت الابله الباب وخشت وسارة وراها..
مشت قعمزت ورا مكتبها وقالت لسارة:قعمزي ساره..
قعمزت سارة مقابله الأبله وهي تشوفلها بعدم فهم..
الأبله ابتسمت وقالت:يامبدعه..علاش قتلك مبدعه..تو نقولك..امم..هدا ياسارة من شهرين تقريبا جتني تهاني جايبه معاها مسودة تخصك انتي كاتبه فيها قصة قصيره..
سارة بدهشه:تهاني!!
الأبله:ايه تهاني..قالتلي ياأبله سارة كاتبه قصة قصيرة حلوة هلبه تقريها تقولي كاتبتها اديبه..بيني وبينك اني قلت تهاني تبالغ لين قريتها بروحي وتفاجئت بكميه الإبداع اللي فيها..كموضوع كسرد وباللغه العربيه الفصحي المفردات فيها كانت جدا ممتازة..ماصدقتش انك كاتبتيها بروحك بدون مساعده..
سارة بشي من الضيق:كاتبتها بروحي..
الأبله ابتسمت بمفاجأة وقالت:ماشاء الله..لااني مفروض صدقت من الأول وماأستغربتش بنت ابله اسيمه والدكتور هيثم اللي امس شرفنا كلنا ك ليبين مش انتم بس..حتى في اللقاء ماتكلمش الا باللغة العربيه الفصحى بإتقان يتكلم طبيعي جدا بنته تبدع في الكتابه باللغه الفصحى رغم صغر سنها..
سارة ابتسمت مجامله وقالت:شكرا..
الأبله ضحكت وقالت؛ماتزعليش من تهاني راهو تحبك هلبه وقالتلي ان سارة مش مقدرة موهبتها تقول ع اللي كاتباته تخربيش!
سارة:عادي يعني من الكساد كتبت مش حاجه كبيره..
الأبله:هههه...سارة حبيبتي اني دخلت قصتك هادي مسابقة بإسمك ع وحده من المنصات الأدبيه الإلكترونيه العربيه وفازت قصتك من بين 15 قصة من مختلف الدول العربيه..مصر وتونس والعراق والأردن وسوريا كل القصص كانوا كتابها من عمرك وإنتي اللي فزتي..
سارة قعدت تشوف للابله بإندهاش..مش مصدقه اللي تسمع فيه..
الأبله:واني حبيت نديرهالك مفاجأة مجرد ما وصلتني النتيجه نزلتها ع صفحتي وصفحة المدرسة ودرت بيها تاق لأبله أسيمه..ههه..واظني حتى في الصفحات العامه انتشر الخبر..
هي لما سمعت الكلام الأخير اللي قالاته الأبله..تبدلت ملامح دهشتها للقلق...
علاش؟!
الأبله عقدت حواجبها وقالت:بس في فبالي سؤال من لما قريت القصة واني نراجي امتى نحصل الفرصة ونسألهولك..في القصة البطله "محابر" لكن البطل مالاش اسم..وماقدرتش نفهم هو شن بالنسبه ليها..زوجها..صديقها..خوها..بوها..كل مرة نشوفه بشكل وغير هكي انتي مش موضحه صفاته لاشكليا ولامعنويا...حسيت انك تبي كل من تقرا القصه تسقطها ع نفسها..زوجه..حبيبه..اخت..ابنه..ولا؟
سارة قعدت تشبحلها شويه بعدين قالت:هو خيال شاطح ياابله وخلاص مش قاصده نوصل من وراه شي..ماكنتش نعرف ان في حد غير تهاني حيقراها..
الابله بإبتسامه:واهو قروها المئات غير تهاني..ايه وع فكرة العنوان بروحه قصه..الرجل المغمور..
ارتسمت ع وجه سارة ابتسامة مجامله وربكه في نفس الوقت وهي تفكر..وياكثر ماتفكر سارة وهي فهالعمر..
▪▪▪▪
◇هههه هي..سارة بنتي ديما تفكر ديما تخمم ديما قبل وتوا..
اااه..بس فهداكا الوقت ربما كانت تفكر فيا اني وبس..اني لو قريت قصتها القصيره..اللي كنت فيها اني البطل المغمور..اللي لاليه اسم ولامعالم واضحه في قصتها..اني الرجل المغمور اللي تكلمت عنه فيها..اني بوها في حياة بنتي..
"رجل مغمور"
▪▪▪▪
••••°°°°••••°°°°•••••
في حديقه عامه جنب مدرسة زياد الثانويه...
ع كرسي طويل كان مقعمز هيثم هو واخته نسيبه..
نسيبه:اللي صار لزياد ياهيثم مش خطير هلبه وعدا ع خير واسيمه مابتش تخبرك وقتها بش ماتريحش عليك فرصه كبيرة بحضورك المؤتمر
هيثم:فرصة شني يانسيبه بس! لاقدرالله لو هداكا الحيط صارت فيه حاجه شن تنفعني الفرص اللي تحكي عنها
نسيبه بضحكه:الحيط هداكا ياما تجداك وخلا امه تتجداك بش تجي تحضرله تكريم ولامعرض ولامسابقه..
مط شواربه بملل وقال:اني ندوي ع امر حياة وموت وانتي تقوليلي معارض وكلام فراغ..
نسيبه؛وحق ربي بوي ناسخه نسخ..زمان كان يقولي شن صار فالدنيا لو خوك المتعجرف خدي الحزام الاسود وبعدين ولى دكتور ولابرفيسور غير خوك بلعاني فيا يبي يعاندني وخلاص حيط..
رفع حواجبه وقال بضحكه:بالله! هكي كان يقول؟!
نسيبه بضحكه:والله زي مانحكيلك..
ضحك وشبح القدام وقال:الله يرحمه وخلاص..عمري ماقصدت نعانده القصه ومافيها اني ماكنتش نحب العنف والرياضات هادي..من واني صغير كنت نميل للقراية وبس..
نسيبه:هو هدا ياهيثم..الميول..ميول زياد انت لازم تحترمه..ورد بالك تفكر ان الرسم خلاه يوخر فقرايته بالعكس ولدك متفوق بالعلامه اخر الشهر هدا بيكرموه المدرسه هو ومجموعه معاه ع تفوقهم في التلاته سنين اللي فاتوا..
عقد حواجبه وقال:غير دقيقه!..شبحلها وقال..قصدك زياد السنه هادي تالته تانوي؟!
خبطت نسيبه بيدها ع وجهها..
هيثم بضحكه وهو يشوفلها:واني اللي ينشدني عنه نقول سنه تانيه.
نزلت يدها وقالت وهي تشوفله بإمتعاض:ومرة نشدك سليم ع عمره قتله 19..
شبح القدام وحك جبهته بأطراف اصابعه وهو يضحك بإحراج..
نسيبه هزت راسها وقالت:اممم..وخيي..خبطت ع ركبته خبطتين بعدين قالت..ركز معاي..زياد بيخش 18 السنه هادي شهاده ثانويه..هدا زياد..زياد خيره شهاده تانويه بيخش 18..
نجو لسارة سارة بنتك اللي جت بعد زياد بتلاته سنين ناقصات..سارة هادي شهاده اعداديه بتخش 16 باهي..
هز راسه وهو يضحك..
نسيبه؛اما ريحان وجنان مواليد ليبيا كم عمرهم ترا؟!
هيثم:لااا عاد هني انتي تسكتي 5سنوات..
نسيبه ابتسمت بسخريه وهي تقول:طيب فينا الحمد لله..وتقولي زياد....ولابلاش..
ضربها بتليفونه ع ركبتها وهو يضحك..
وهي تحرك فراسها يمين ويسار وتقول:ع قولة مرت خوي..ربي يهديك ياهيثم..ربي يهديك..
ابتسم بتنهيده بعدين قال:لبزت معاها فالدوة..
نسيبه:سومه ماتعرفش تزعل منك..
هيثم:عارفها واني هدا اللي مضايقني..شبح لأخته وقال..الا قوليلي شن سبب العركه بالزبط؟
نسيبه تنهدت وقالت:سارة وبنت خالد وهما مروحات في الطريق للحوش لحقوهم صياع وقعدوا يناشبوا فيهم شافوهم زياد ورفيق ولد خالد وطاحوا فيهم ضرب...اااخ ياريتني كنت معاهم..
شبحلها ع جنب بعدين قلب عيونه وشبح القدام وقال:حتى لو كان لسبب يستاهل مفروض حكم عقله..
نسيبه:الحمد لله ع كل حال قدر ولطف..لولا خالد كانت حالة زياد توا اصعب..
شبحلها بإستغراب وقال:خالد!
نسيبه؛ايه خالد تلقى عنه ضربه كان ناويها واحد من المفرخ هادم في بطنه جت في جنب خالد..
هيثم حرك راسه القدام بشي من البطئ وهو مصدوم..
واخته نسيبه تشبحله بضيق..
شويه شبحلها تاني وقال:باهي شن صار فيه؟!
نسيبه؛لاعدتله ع خير حتى هو داروله عمليه امس واليوم فاق واموره تمام قالوا..
هيثم غير عيونه عنها وهو يفكر بعدين ناض وقف وقال:نوضي معاي..
نسيبه ناضت وهي تقول:وين؟!
••••°°°°°••••°°°°••••
لما يسمحولك بالماكله تو نجيبلك اللي خاطرك فيه..
مط خالد شواربه بملل بعدين قال؛وامتى يسمحوا ان شاء الله!
رفيق بضحكه:ياوحش ماليكش تلاته ساعات فايق راهو!؟
خالد:اياااه..صار فيا احرف من هكي زمان وانتم صغيرين ونضت منها زي الجن..ع قولة المصاروة"عمر الشقي بقي"..
ضحكوا ولاده..
بعدين قدمله خليل وطبس باس راسه وقال:واحلى شقي..
ابتسم بوه ع جنب وحرك راسه يمين ويسار..
وخوته يضحكوا..
خالد تنهد وارتسمت ع وجهه ملامح الوجع بعدين قال:امكم مش جايه؟..
تعكرت ضحكتهم..
بعدين جهاد قال:امس اليوم كله وهي هني ماروحتش الا بالعراك
رفيق:كان ريتها ياحاج وهي خايفه عليك قريب هبلت
خليل:تي واني وجهاد ريناها طالعه تجري فالزنقه وتعيط وتقول خالد..
جهاد:ماي ماذر طلعت ميته في دبادبيك غير تتغلى..
رفيق ضرب جهاد بوكس ع ذراعه وهو يضحك..
خليل بضحكه وهو يشوف لبوه:حي تي غير تعالوا شوفوا الحاج وجهه ولى احمر!
خالد:يا####
الولاد:هههههههه..
فجأة..
طق باب الغرفه..
شبحوله التلاته بعدين خليل قال:تفضل..
انفتح الباب وخش هيثم..
اللي لما شافوه الولاد تفاجئوا ع الآخر..
قبل ليصكر هيثم الباب لمح خليل نسيبه واقفه برا..
قلبه قعد يدق بقوة💓..
هيثم:السلام عليكم..
ردوا عليه كلهم:وعليكم السلام..
قدم لخالد وقال:حمد لله ع سلامتك خوي خالد..
خالد ابتسم ابتسامه خفيفه وقال:الله يسلمك..
هيثم حط ايديه ع بعض وقال:مش عارف شن نقولك بجديات ماعنديش كلام نقوله اللي انت فيه توا بسبب ولدي..
خالد:لالا..مادخلاش..ربك قدر وفعل..
هيثم ضم شواربه لداخل بعدين قال:مع هكي..جميلك هدا حيقعد فرقبتي ياخوي خالد..
خالد:لاجميل لاشي..رانا..جيران..
ابتسم هيثم مجامله وهز راسه..
فجأة رن تليفون خليل ماصدق طول قال:نستاذن..
هيثم بنفس الإبتسامه هز راسه مرة تانيه وهو يشوف لخليل..
خليل مشي للباب وهو يطلع في تليفونه من جيب الدجاكه متاعه..
وصل في الباب فتحه وطلع..
نسيبه كانت تمشي وتجي في الممر وهي تراجي..
لما سمعت صوت الباب التفتت..
شافاته طالع وهو يشوفلها..
تلخبطت هلبه..مع هدا حاولت تبين العكس وكملت لفتها عادي..
هو رفع حاجبه وجاها..
نسيبه"كان جي وقف قدامي بنعطيهوله طياري"..
لما جي بيوقف قدامها..
لفت ومشت من الجهة التانيه..
هو ضحك بعدين عض ع شاربه ومشي بسرعه وقف قدامها..
خليل:من شن هاربه!
نسيبه:هاربه!!!وعلاش بنهرب مادرت شي نهرب منه..
حط ايديه ورا ظهره ورفع حاجبه اليسار وقال:شن قصدك بيها الحركه اللي درتيها امس..
نسيبه حطت يدها فنصها ورفعت حاجبها وقالت:اما حركه..
رفع حاجبه اليمين وقال:الحركه اللي درتيهالي في المطعم واني مقعمز مع الطرف هديكا..غمز بعينه وقال..الشقرا..
عقدت حواجبها وقالت:لابابا لاولدي..شن شقرا وبقرا..وتغمزلي بعيونك!!وين شطحت بخيالك الجامح ياهوو!؟
ضحك نص ضحكه وقال:خيرك ولعتي انتي شن قلنالك!!؟
نسيبه ووجهها احمر وملامح الغضب مسيطره عليه:اني نقولك انت ماتقول شي..تبي تعرف قصدي من هديكا الحركه ولا!؟..نبيك تعرف من هي نوسه الكاتب مش نماذجك انت اللي يضحكوا عليها ولايكسرولها خشمها..
ابتسم وهو يشوفلها بنظره:نكسر اللي يفكر يكسره غرورك هدا..
تبدلت ملامح وجهها للإرتباك وقلبها بدي يدق بقوة وسرعه💓..
خليل:حتى لو كسرتيني مستحيل نكسرك..
عيونها تعبوا دموع وهي تشوف لعيونه..
ركز فيهم وقال بإبتسامه:اني غارق فيهم الصغيرات اهما..
واشر بصوابعه الزوز الوسطى والسبابه ع عيونها..
نسيبه حست روحها تبي تعيط فهديكا اللحظه تبي تصكها عيطه ع طول رقبتها من قوة الشعور اللي كانت تحس بيه الشعور اللي منرفزها لأبعد حد..
ضمت شواربها لداخل بغضب وهي تتنفس بسرعه..بعدين مشت من حداه بسرعه وعصبيه..
هو لف وقعد معاها بعيونه وع وجهه ابتسامه فرح..
المراة لما يأثر فيها راجل وترتبك وتتلبك قدامه بشكل مبالغ فيه..معناها الراجل هدا يعنيلها حاجه..وقدر يحرك فيها شي من داخل...
وخليل تأكد من الحاجه هادي كويس توا بس..
من فرحته..قلبه قعد يدق بقوة بقوة..حسه قريب يطلع من رقبته...
استاقظ من الحالة اللي كان فيها ع صوت هيثم وهو يقول:الحمد لله ع سلامة الوالد..
شبحله خليل وهو رافع حواجبه وقال:الله يسلمك دكتور..
هيثم:لو تبو اي حاجه اني حاضر..لو تبو ننقل الوالد للمشفى الخاص اللي نخدم فيه مستعد..وحنكون ممنون ليكم جدا..
خليل:لالا مش لازم كل شي متوفر هني بارك الله فيك..
هيثم:باهي اي شي تاني نرد بيه ولو شويه من جميل الوالد..
خليل ابتسم ع جنب وقال:مش جميل يادكتور..هدا واجب الجيران على بعضها.
رفع هيثم حاجبه وهو يشوف لخليل بنظرة فيها شي من الإعجاب.. بعدين هز راسه وقال..بارك الله فيكم..هي اني نستأذن..
هز خليل راسه وهو مبتسم..
هيثم مشي وهو يقول: السلام عليكم..
خليل وهو يشوفله رد:وعليكم السلام..
قعد معاها بعيونه لين ادرق من قدامه..بعدين قال:غريب حق الراجل هدا..ابتسم ع جنب وهو يقول..لكن اخته..اااه ياقلبي..
رفع حواجبه ونزلهم وتنهد من وسط قلبه بعدين لف ومشي للدار...
••••°°°°°
وصل هيثم لباب المستشفى وتوجه طول لسيارته اللي توقع اخته تكون موجوده فيها..
وفعلا نسيبه كانت فيها..تبكي..لما شافاته جاي مسحت دموعها بسرعه..
فتح الباب وركب وهو يقول:وليتي هني..
نسيبه بدون ماتشوفله:احمم..ايه ماعندي ماندير غادي..
هز راسه وصكر الباب بعدين شغل السيارة وتحرك وهو يقول:بجديات محظوظ خالد بذريته برغم البلي اللي يدير فيه..وين خشيت عليهم لقيتهم محاوطينه وواقفين ع راسه..
نسيبه:بوهم ياهيثم طبيعي بيديروله هكي..
هيثم؛مش كل الصغار هكي يانوسه..
نسيبه؛لاكلهم هكي انت غير انضرب بموس وشوف صغارك شن يصير فيهم..
هيثم:هههههه..لالامانبي نشوف شي..
ضحكت من بين ملامح الضيق اللي ع وجهها بس فيسع تلاشت ضحكتها لما سمعت خوها يقول:الصراحه ولده الكبير عاجبني من زمان مش زي خوته التانيين هكي نشوف فيه راجل عاقل ورزين ومحترم برغم اللي نسمع فيه عنه لكن مابانلي منه الا الشي الباهي..
نسيبه"ناقصاتك ياهيثم اني ناقصاتك..ياربي بنبكي خلاص.."
وقعدت تحاول تشد روحها بالسيف بش دموعها ماتنزلش بعدين قالت لخوها؛حطني في المدرسه سيارتي قاعده غادي..
هيثم؛ايه بنحطك غادي وبنقعد نستنى فيك تاخدي سيارتك وتمشي للحوش تجبيلي شنطتي وتجي..
شبحتله برفعة حواجب وهي تقول:بتولي!!
هيثم هز راسه بإيجاب وهو يسوق..
شبحت القدام وقعدت ساكته مابتش تناقشه...
فهمت انه هالمرة حس روحه غلط هلبه في مرته وماعنداش عين بش يواجهها ولايعتذر...
🌾عكسه خالد..
اللي برغم كل شي داره في عفاف الا انه يبي يشوفها في كل وقت ويعتذر منها ألف مرة المهم تقعد معاه...
كان كل مايدق حد باب غرفته يقول هي ووللأسف يطلع اي حد الاهي..
حتى خوته وخواته ماجي منهم حد..لما عرفوا انه فاق وحاله باهي اكتفوا بهكي ومابوش يمشوله..
حتى تهاني لما جابها خوها رفيق جت في الوقت اللي كان فيه بوها راقد..خشت شويه شافاته وهي ادمع حزنا ع حالته بعدين طلعت وروح بيها خوها للحوش...
•••••°°°°•••••°°°°°•••••
ماشيه بطريقها للحوش بعد نزلت من باص الجامعه وقفت لما سمعت صوت اختها ينادي فيها..
"رتاج اوقفي"
التفتت وهي تضحك..جتها اختها وقفت جنبها وقالت:واخيرا تصادفنا في المرواح..روحتي بكري اليوم..
رتاج:ايه المحاضره متاع الساعه واحد التغت لقيت الباص مدرس 12 حدا الكليه قلت روحي ارقدي يابنت خيرلك..
دانيه بضحكه؛احسن مادرتي..
وقعدوا ماشيات الزوز بطريقهم للحوش وهما ساكتات لعند ما..
رتاج:حي حي يادنون اهوا اهوا...
شبحت دانيه قدامها شافت جهاد واقف لابس تيشرت رصاصي نص كم وسروال جينز ارزق غامق ونظارات..
غيرت عيونها عنه وقالت:عندك حق فرخة رتاج!
فاتوا من قدامه وهما يمشوا وعيون جهاد من ورا النظارات عليهم وهو يشوف لرتاج بإبتسامه جانبيه..
ع طلعة حسام من المحل
لما راهم جاهم طول وقال؛بنات عمي بالك تبوا حاجه..
شبحله جهاد برفعة حاجب
رتاج"نبيك تموت بس"
دانيه؛لا شكرا صحيت..
مدلهم شكارة معبيه تسالي وشكلاطه وقال:حاجات بسيطه مشوا بيها الوقت..
دانيه خدتهم بسرعه..
ومشت ورا اختها اللي كانت ماشيه تجري..
قعد حسام معاهم بعيونه لين خشوا المحل بعدين التفت لجهاد لقاه واقف يشوفله..
ابتسم حسام بتهكم ومشي خش لمحله..
اما جهاد عقد حواجبه بغضب ومشي وهو معصب..
•••••°°°°
في دروج العمارة..
رتاج:عطيك مايرفعك ياحسام ياربي ارفعه عليا ياربي كرهني في عيشتي راهو..
دانيه بضحكه:حرام عليك هدا فوق ماتفكرنا بالحاجات الحلوة..
رتاج:الله ماحاطه منهم حاجه في فم..
دانيه:هههههه..احسن..
وصلوا في الباب..
طلعت رتاج مفتاح الباب فتحاته وخشت واختها وراها وصكرت الباب...
🌾في الشقه اللي فوقهم..
وليش عازم قبيلة قريش هدوما كلهم!!
عبدالمجيد:هكي متعودين ياعبمبرة اللي يتزوج تاني يوم يدير عزومة عشي فحوشه والعروس هي اللي طيب..لكن اني ياعسله مش مخليك اديري شي كل شي بنقول للي لوطا يديروه
ماجده؛لوى هما اللي يديروه؟جيب من برا..
عبدالمجيد؛لالاالالا من برا لا تطييب حوشي..
ماجده شبحت بتضييقة عيون بعدين قالت؛باهي..
وناضت من حداه..
عبدالمجيد:وين ياعبمبرة!!
ماجده:تو تعرف..
ومشت بطريقها لدار النوم..
هو ابتسم بإستغراب ومسح ع لحيته...
🌿لحظات..
وطلعت ماجده وهي لابسه العبايه ووشاح..
وماسحه المكياج الا مكياج عيونها..
هو لما راها اتفاجئ وقال:وين وين؟
ماجده:بننزل للعويله لوطا نعاونهم..
وقف وقاللها:تي شن تحسابيهم شويه تلاته راهم..
ماجده:خليهم يولوا اربعه فيسع فيسع نكملوا..
ومشت للباب..
مجيد:ماجده!!راك عروسه..
ماجده وهي ماشيه للباب:والله كان عارفني عروسه راك ماعزمت حد لبعد الشهر..
مجيد:تي قتلك غيرك بيطيب مش انتي..
ماجده:شن قالولك عليا وحده قليلة واجب وربايه بش نخلي مرتك وبناتك يطيبوا عشي فرحي اني..
مجيد قعد واقف يشبحلها وهي تفتح في الباب وتطلع بعدين صكراته وراها بعدين قال:اني الغالط اللي تزوجت هنايا..
خبط بيده ع راسه من الغيط بعدين لف وخش داخل..
•••••°°••°°•••••
في شقته التانيه..
رتاج؛وعلاش مش هي اللي اطيبه مش العزومه هادي ع خاطر عزاهم!
سدينه؛المراة عروس شن بطيب..
دانيه بغيظ:بتجلطني امك..
رتاج؛يام بكل انتي بكل..
سدينه بحده:تبوا تعاونوا باهي ماتبوش انتلفوا لداركم وفكوني من قطافكم..
شبحولها الزوز بضيق وغضب..
وهي تغسل في اللحم بعصبيه..
فجأة..
سمعوا صوت الباب طق..
رتاج بغضب:بنمسح بيه الأرض اليوم حسام الشياطين هدا..
ومشت طالعه بغضب..
سدينه؛حي عليا!!..ومشت طلعت وراها..
ودانيه لحقتهم..
وصلت في الباب فتحاته وكيف جت بتفصل وقفت في مكانها وهي تشوف قدامها بإستغراب..
ماجده بإبتسامه عريضه:ماشاء الله ماشاء الله..تبارك الرحمن..
ع جية دانيه وامها..
عيون ماجده لما جو ع سدينه وشافت ملامحها الجميله اللي الهم مذبلهم قالت:ياودي كانت هادي النحله طبيعي ماتنتج كان العسل..
رتاج بإستغراب:معليشي من انتي!؟.
ضحكت بإرتباك بعدين رفعت عيونها فوق وسبابتها واشرت ع الشقه...
التلاته ارتسمت ع وجوههم ملامح الإندهاش..
نزلت يدها وقالت:اسمي ماجده..جيت نعاونكم في العشي..ولانقوللكم اني نديره وانتم كان تبوا تعاونوا مش حنقول لا..
رفعت رتاج حاجبها وهي تشبحلها..
ودانيه تشبحلها من فوق لتحت..
سدينه ساوت محرمته وقدمت دفت بنتها رتاج عن الباب وقالت:تفضلي..
ماجده؛يزيد فضلك وخيتي..
خشت ماجده وقعدت تمرر في نظرها ع الشقه اللي بان فيها كل شي قديم هلبه..عكس شقتها..زادت تأكدت اكثر من صفة البخل اللي عند عبدالمجيد..
صكرت سدينه الباب وقالت؛مجيد بعتك؟
شبحتلها شويه بعدين ابتسمت وقالت:ايه..قالي انزلي عاونيهم..
رتاج بلؤم؛لا انتي ديريه وحني نعاونوك كان نبوا طبعا..
سدينه فنصت فيها..
شبحتلها ماجده شويه بعدين قالت بضحكه:ربي يسلم هالعوينات اللي يفنصوا..
رفعت رتاج حواجبها وهي تشوفلها من فوق لتحت..
ماجده شبحت لسدينه وقالت؛هيا معاش في وقت وين الكوجينه..
سدينه؛تعالي معاي..
مشت سدينه وماجده وراها..
والبنات يشبحولها..
دانيه؛مش مستريحتلها..
رتاج:ولا اني..بنقعد فوق دماغها مرات اديرلنا حاجه..
دانيه :واني معاك..
ومشوا لحقوهم..
••••°°°°••••°°°••••
الساعه الثالثه ظهرا..
العمه وبنت خوها مقعمزات يتغدوا..
نسيبه بضحكه:بروا يافرخه..
سارة بضحكه؛والله هكي جتني مفاجأة ماكنتش مفكرة نوصل هني.. كله من تهاني..في الأول تعاركت اني وياها قتلها كيف تاخدي حاجتي من وراي..
نسيبه؛ماانتبهتيش بيها رايحه ؟
سارة؛لا انتبهت وقلبت عليها الدنيا بعدين فوتتها
وقلت احسن اللي راحت..
نسيبه؛علاش!؟
سارة وهي تحاول تخفي ربكتها:هكي وخلاص..ماكانتش عاجبتني..
نسيبه:واهوا اللي مش عاجباتك شوفي وين وصلاتك قدري موهبتك وديري زي زياد..
سارة ابتسمت بعدين حطت الكاشيك في فمها..
🌾في دار زياد..
كانت امه جايبتله الغدي..
ومقعمزة حداه...
لكن ماكانش يتغدا..كان هو امه يقروا في قصة سارة..
هو من ايباده وهي من تليفونها..
زياد كان يقرا بإعجاب..اما اسيمه كانت تقرا ودموعها فعيونها وهي متفاجئة في حجم المشاعر اللي بنت في عمر بنتها حاستهم وقاعده تكتم فيهم..
🌾كذلك كانت تهاني تعاود وتقرا في القصه..
وتحاول تفهم مشاعر صاحبتها وفي نفس الوقت حست ان في شي يمسها من اللي تقرا فيه..
🌿ومش هما بس كانوا يقروا...
في من كان يحاول يقرا ويفهم..
مقعمز بروحه وفيده تليفونه يشبحله وهو مضيق عيونه وعاقد حواجبه..
وخوته يتفرجوا عليه من بعيد ويضحكوا..
خليل بضحكه:مايعرفش يقرا جمله ع بعضها شن بيفهمه فالقصص القصيره..
شبحله جهاد وقال:انت فاهم!!
خليل ميل راسه شويه يمين وشويه يسار وقال؛اهو نقرا شويه مرات..
جهاد شبح لخوه بحسره..خليل عقله مفتوح مثقف اكثر منهم ويحب القرايه لكن الظروف اللي هما فيها اجباراته يخليها بعد ماخدي الشهاده الثانويه اللي معدله فيها يدخله طب..
عكسهم هما الزوز..مش ليهم القرايه ولاراغبينها..
شويه وناض رفيق من مكانه وجاهم..
هما الزوز شبحوله وضحكوا..
رفيق؛معقوله وحده في عمرها تكتب كلام زي هدا!؟
رفع خليل حاجبه اليسار وقال؛علاش شن كاتبه!؟
رفيق حك راسه من الخلف وقال بإحراج:ورب العزه مافهمت منها حاجه..
جهاد وخليل:ههههههه...
وهو حرك راسه يمين ويسار وقعد يضحك بإحراج...
🌿🌿🌿
لكن في شرق البلاد...
تحديدا راس لانوف..
في واحد من حياش هديكا المنطقه اللي كان صاحبها عازم المهندسين فيه ع الغدي..
كان مجاهد اللي مقعمز يراجي في الغدي مكسد ع تليفونه يشوف في الفيس..
جي قدامه منشور لوحده من الصفحات العامه يتكلم عن فوز قصة سارة..
قراه..وقعد مركز ع اسم سارة هيثم الكاتب..
لعند ماوصل في اخر المنشور المكتوب فيه..
"والجدير بالذكر كذلك ان سارة تكون ابنة الجراح الليبي المعروف..هيثم الكاتب"
خش ع الصور..
شاف صورة لغلاف القصه اللي صمامته الأبله..
وصورة فيها نتيجة التصويت وصورة فيها مقتطف من القصه..وصورة لهيثم واخدينها من الندوة الأخيره اللي حضرها..
ابتسم وهو عاقد حواجبه لما ذاكرته جابتله اللي صار ليلة زواج بوه..
اذكر كيف شبحتله..
اذكر نظراتها ووجهها البريء..ضحك نص ضحكه بإستغراب وقال في نفسه"في عمرها هدا وعندها حس ادبي!؟"..
فتح ع الصورة اللي فيها جزئيه من القصه..
قراه شويه شويه قعد يرفع فحواجبه وهو متفاجئ..
"باش مهندس مجاهد"
قام عيونه وشبح للي ينادي فيه قال:نعم..
الراجل اللي عازمهم قال بضحكه؛الغدي ياهوو..
شبح قدامه لقي الصفر متاع الغدي وزملائه ملمومين حواليهم ويشوفوله ويضحكوا...
ابتسم بإحراج وناض قربلهم وهو يقول؛سامحني كنت لاهي..
وقعمز ع وحده منهم..
صاحب العزومه:اللي واخد عقلك ياسي..
ضحك وهو متحشم..
الراجل:وكان عندي بنات كبار ماخليتك لها هدي اللي شغلاتك عن غدانا..
كلهم ضحكوا..
وهو قال بضحكه احراج:والله مافي حاجه من اللي فبالك ياعمي رزق الله..
رزق الله بعدم تصديق:ايه مافي مافي..صدقتك..
اخ صاحب العزومه:لو تحلف ع المصحف ماهو مصدقك..
ضحكوا..
رزق الله بضحكه:تغدوا تغدوا...
وبدوا يتغدوا من الخيرات المحطوطه قدامهم اللي تبين كرم وجود اهل هديكا المدينه..
🌾فهالوقت..
هو توا مايبيش قال لين نوتي روحي..
ماجده وهي تحبب فالكسكسي:لا فهادي عنده الحق هكي المفروض الشاب لازم يوتي روحه بعدين يمشي يخطب مش يبدا ماعنده باش يصرف ع روحه واول حاجه ينط يبيها الزواج..
سدينه:صدقتي..
غطت ماجده الكسكاس وقالت:والغزيلات هادم اكيد كل اسبوع دايريلك مواويل خطابه..
شبحولها الزوز من فوق لتحت...
سدينه؛لاهادم متسميات ع شباب من العيله..
رتاج ودانيه شبحوا لأمهم بضيق بعدين مشت رتاج طلعت ودانيه لحقتها..
ماجده لاحظتهم وقالت:يبوهم اللي متسميين عليهم..
سدينه؛قريب يهبلوا عليهم يراجو امتى يكملوا قرايتهم..
ماجده:اني قصدي البنات يبوهم ؟!
سدينه وهي تحاول تخفي ارتباكها:ايه مال شنو..هما وليدات ماشاء الله خدامين ع روسهم واحد منهم عنده محل تحت العماره اللي جنبنا...
ضيقت ماجده عيونها وهي تحاول تذكر ولما تفكراته وين جي امس سلم عليهم فنصت عيونها بصدمه وقالت:نهار مطيلس!!!!
••••••°°°°
في دار البنات..
رتاج ببكي:ننتحر ولاناخده والله ننتحر..
دانيه بضيق:عليك قهرة..علاش ياربي هكي حظنا بس..
رتاج؛مش من ربي يادانيه من العبد من بوك حسبي الله فيه ديما قاهرنا..
دانيه سكتت وهي تفكر فأستاذ الفيزياء الجديد وقالت في نفسها"يعني حرام ياربي ناخد واحد زيه!!"...
بعدين مسحت بإيديها ع وجهها وهي تتأفف واختها حداها تبكي وترشف...
•••••°°°°°•••••
بري طيري من قدامي..
سارة بضحكه؛والله حتى تهاني قرتها صدفه صدقني..
رفع حاجبه وقال:تهاني هادي ماخلتلنا شي..
ساره بضحكه:حي عليك تغار من صاحبتي!
زياد:قبل حني صحابك ومافي شي درقيه علينا وتوا كل شي تعرفه هادي تهاني ولامش عارف من هي وحني اخر من يعلم..
سارة:هههههه..باهي وانت مش عندك صحاب اسرارك كلها عندهم..
زياد؛مافي شي مدرقه عليك..
سارة؛لافي ماقتليش شن صار بينك وبين بابا..
ارتسمت ع وجهه ملامح الإنزعاج وهو يقول:شي عيط شويه بعدين طلع..
سارة بضيق:تعاركتوا؟
زياد بنفس الملامح:فوتي بالله وغيري الموضوع..تبدلت ملامح وجهه للإبتسامه وهو يقول..خلينا في القصة متاعك عجبني اسمها هلبه..
سارة رفعت حواجبها وقالت:فهمتها انت زياد؟!
ابتسم ع جنب وهز راسه بإيجاب..
••••°°°°••••
وفي الدار اللي جنب دارهم بمسافه..
"ياودي خلاص فاهمه وعارفه مش بالقصد"
هيثم بضيق:صراحة اسيمه..اني نضايق من تدخلك في نقاشاتي اني وياهم...
اسيمه؛اني ندخل بش نهديكم بش ماديروش حاجات تندموا عليها..
هيثم سكت شويه بعدين قال:عندك حق..عندك حق..
اسيمه ابتسمت وقالت:هيثم..
هيثم ابتسم وقال:حبيبتي..
ضحكت بعدين قالت:حبيبي حاول ماتزيدش تكبر الفجوة بينك وبين زياد الناس في الامثال يقولوا..لو كبر ولدك خاويه زي مانقولوا حني صاحبه.. صاحبه ياهيثم تلقاه بعدين..يكون في ظهرك...
▪▪▪▪
◇تلقاه في كبرتك..سندك يعاونك..وما الى ذلك من الكلام اللي كانت تعيد وتزيد فيه اسيمه وبصراحة وقتها كنت نقول ايه وخلاص..
هما الأمهات والزوجات هكي..يعني كأم تلقاها تشد ولدها وتنصح فيه هدا بوك معليشي تحمله هو خايف عليك هو وهو وهو..وتجي لراجلها وتقوله في نفس الكلام اللي تقولي فيه اسيمه...
ومش ديما الابن والاب ياخدوا في كلامهم ع محمل الجد..
واني وزياد كنا هكي نسايروا في أسيمه مسايره وكل واحد فينا من داخله متمسك بفكرته عن التاني..
▪▪▪▪
🌾زي ماعفاف متمسكه بفكرتها عن خالد ونظرتها ليه مش قادرة تغيرها وهالشي مش مخليها واعيه للي قاعد يصير حواليها..
مش مدركه لحقيقة اقرب الناس ليها تشوف في الظاهر منهم وبس..
عفاف بعصبيه:فوق ماانها قاعده معاك ومسيبه كل شي وراها خدمتها والحوش تخليها بروحها وتخشي دارك وتصكري عليك!
تهاني بحده؛قتلك يام كنت نقرا امس كان عندي اختبار وبعدين من قاللها تقعد معاي!!
عفاف:قليلة ربايه طلعتي زيك زي خوتك..
تهاني بغضب:اني اللي طلعت قليلة ربايه توا!!خالتي هادي اللي تهزبي فيا ع خاطرها لما رميتي ورقدتي في العياده ماقعدتش معاي ليلة وحده ولما انضرب بوي خلت كل شي وراها وقعدت في حوشنا..علاش زعما على خاطري اني!؟
عفاف عقدت حواجبها وهي تشوف لبنتها تبي تفهم شن تقصد تهاني بكلامها.. عقلها رافض يفسره صح..مابتش حتى تفسره اصلا وقالت لبنتها:انتلفي لدارك درقي وجهك..
شبحتلها تهاني شويه بعدين لفت ومشت لدارها..
أما عفاف اللي قعدت مع روحها رجعت تفكر في كلام بنتها لما حست روحها بتفهمه..سارعت بطرد الأفكار اللي جتها من راسها ومشت لوسط الحوش بش تتفرج ع التلفزيون وتشغل نفسها...
••••°°••••°°••••
الساعه الثامنه مساءا...
في ممر الشقه متاع عبدالمجيد الأولى..
كانوا محطوطات تلاته صفر في الممر اللي يرفع للباب..
كان يخش مجيد ياخد بالصفرة ويرفع فوق..
وبعد كمل صكر باب الشقه..
فالكوجينه..
سدينه:خلاص بري قعمزي تو نقول للبنات يضموا الكوجينه..
ماجده:لالا خليهم يقروا قرايتهم واني وياك يد بيد نكملوها فيسع..
سدينه ابتسمت وقالت:باهي..
وبدوا الزوز يضموا في الكوجينه ومرة مرة الزوز يشبحوا لبعض..
سدينه"الباين عليها مراة طيبه"
ماجده"واضح عليها الهم مكبرها ومريح زينها "
🥀في دار البنات..
كانت دانيه مقعمزة تقرا وهي تاكل في البطاطا وحداها انواع الشكلاطه مطرحه..
ورتاج حتى هي تقرا ومرة مرة تشبحلها بغيظ خاطرها تاكل لكن اللي من حسام مستحيل تاكله..
شبحتلها دانيه وقالت:نحدفلك شكلاطه..
رتاج قلبت عيونها ودرقتهم بالشيت ودانيه تضحك عليها..
فجأة..
سمعوا باب الحوش يطق..
"نوضوا يابنات افتحوا الباب"
رتاج نزلت الشيت وقالت:وخيره البي رشيد مايفتحاش..
دانيه:الهم ليا اني وياك بس..
"يارتاااج"..
رتاج لوحت الشيت وقالت:ارزيكم فيها رتاج..
وناضت مشت للباب فتحاته وطلعت وهي معصبه..
وهي ماشيه جبدت الوشاح من ع الشماعه حطاته ع راسها ولفاته ع رقبتها ..
وصلت في الباب فتحاته بعصبيه..
لما شافت اللي واقف فالباب جمدت فمكانها..
كان واقف لابس سروال حمالات لونه رصاصي ع تيشرت كم ابيض وطاقيه رصاصيه والنظارات فوقها...
وفإيديه شكاير شبحلها بإبتسامه وقال:هدا اللي طلبتيه ياابله مقلوبه وشاورما وهامبورغا وسكالوب وطابونه مع بيبسي وميرندا وكوكا كولا..
هي تشبحله بصدمه وخلاص..
غمز بعينه وقال:جبت هدا كله لأني مانعرفش انتي شن تحبي بالزبط..
"مني يارتاج"..
رتاج بخوف:هات هات بسرعه..
مدهم وهو يضحك وهي قعدت تاخد منه...
بعد خدت منه الحاجات قالت بخجل:شكرا...
وخشت صكرت الباب..
هو قعد واقف شويه يشوف للباب بضحكه بعدين
مشي للدروج بينزل..
أما هي...
خشت تجري وهي شاده الحاجات هادم كلهم خافت حد يشوفها..
"تي مني يارتاج"
وصلت في باب الدار وقالت:واحد غالط يام..
وخشت وصكرت الباب برجلها..
ودانيه تشبحلها بإندهاش وهي شاده طرف بطاطا "شيبس" فيدها..
رتاج شبحتلها وقالت وهي تضحك:شوفي بالله شوفي فرق السمي عن الوطا..
ناضت دانيه وجتها وهي تقول بدهشه:هدا شني!؟
رتاج:هدا عشي جابهولي الدليفري..
دانيه حطت يدها ع فمها وهي تقول:كذابه!!
رتاج بضحكه:والله العظيم..
جت بتاخد منها دانيه جبدتهم وقالت:بري كملي البطاطا والشكلاطه بري..
دانيه:احلمي..
وجبدت منها شكارة ومشت تجري بيها للدولاب خشت فوسطه وصكراته عليها..
رتاج:دانيه ياكلبه ياحيوانه..
وجت للدولاب تجري وقفت قدام الباب فتحاته لقتها حاطه في فمها الشاورما وباديه تفتح في الهامبورغا..
رتاج بتفنيصه:سم سااام.!!
ودانيه تاكل وتضحك..
••••°°°°°••••
حطت قدامه صفرة العشي وقالت:هاه شن جو اول يوم خدمه..
جمعه:ماشيه..
عيشه"امه":المدرسه كويسه؟
جمعه وهو ياكل:اممم..وهز راسه بإيجاب..
عيشه:باهي كويس..المهم توا..بنقولك الناس كلمونا وقالوا باهي..
جمعه:ناس مني وباهي شني؟
عيشه؛كيف!!نسيت انك مشيت خطبت ودرت نظرة شرعيه..
جمعه:اها..باهي باهي..صار عطوا الموافقه..
عيشه:خيرك تقول فيها من غير نيه؟
جمعه شبحلها وقال:نقول فيها عادي يام..رجع شاف لصفرة عشاه وقال..تمي الموضوع بمعرفتك..
عيشه:باهي معناها الاسبوع الجاي نفضوا فيها..
جمعه هز راسه وهو ياكل..
وامه تشبحله بعدم رضا لأنه مش متحمس للموضوع وكأنه مايعنيشي لكن مع هدا بتكمل فيه المهم تزوجه وتشوف صغاره ماعندهاش غيره ولاد هو الولد الوحيد ع تلاته بنات..
•••••°°°°°••••
دانيه وهي تاكل:شكله طاح فيك رسمي..يادعوه..
رتاج ابتسمت بغرور وقالت:اكيد حبيبتي..
دانيه بلعت وقالت:حتى هو يهبل..
رتاج ابتسمت بخجل..
ضحكت دانيه بعدين تلاشت ضحكتها وتبدلت لإبتسامه وسرحت بتفكيرها..
رتاج شبحتلها وقالت؛اسمعي فكينا من نكدك..
دانيه شبحتلها وضحكت بعدين قالت:تعرفي توجي..جانا اليوم استاذ في الفيزيا في مكان ابله سهام..طرف مش عادي ياتوجي طويل وعريض ويبان نظيف وقنين قنين غير عويناته سادات خضر عسليات ماتفهميش كيف..
رتاج وهي فاتحه عيونها ع وسعهم:حيي..شكله عجبك تحكي عليه وعيونك قلوب قلوب..
ضحكت دانيه وقالت:المدرسه كلها عجبهم مش غير اني..
رتاج ابتسمت بخبث وقالت:باهي تفلحني وطيحيه..
دانيه؛وشن بندير بيه كان طيحته باك بناخده!؟.
رتاج بإنزعاج:خلاص اسكتي معاش نبي نسمع شي اسكتي..
ابتسمت دانيه بأسف..بعدين شبحت للشاورما وخدت منها نتشه اكبر من فمها وحصلت فيها..
رتاج ضحكت بعصبيه وقالت:هايشه..
ودانيه تاكل وتضحك..
••••°°°°°••••
في ساحة المشفى العام اللي قاعد فيه خالد..
كانوا خالد ورفيق مقعمزين يدخنوا..
رفيق:قصدك طلعت بنت هداكا اللي واخد خالتي ماجده!؟
جهاد:ريت بالله..
رفيق:وااك عليك علقه دخلت روحك فيها..
ضيق جهاد عيونه وهو يسحب في نفس دخان بعدين طلعه وقال:باك تحسابني ناوي نتزوج!؟
رفيق رفع حواجبه وقال:مال شن ناوي!؟
جهاد شبح القدام وقال: الزواج مش لينا يارفيق مافيش حوش عيله يفتحلنا بابه حني..
رفيق قلب وجهه عنه وقال:والنبي فكني منه كلامك وكلام امك هدا..
جهاد:مش كلامي وكلام امي بس هدا كلام الناس..هدا الواقع متاعنا يارفيق واني نحب نعيش الواقع مانحبش نعيش فالأحلام..
رفيق شبحله وقال بغضب:باهي مدام ماتحبش تعيش في الاحلام علاش تعشم في بنت الناس !!؟
جهاد:ماعشمت حد..لاعطيتها وعود ولااملتها بشي..
رفيق شبحله شويه بشي من الإزدراء وقال:طحت من عيني ياجهاد..
جهاد ابتسم بتهكم..
ورفيق لوح طرف الدخان بعد تم بعصبيه بعدين لف ومشي بيخش للمبنى..
وقف لما شاف خليل واقف وهو حاط ايديه ورا ظهره ويشبح لجهاد بنظره ماقدرش يفهمها رفيق..
نظرة غضب ولاحزن...
بعدين غير عيونه عنه وشبح لرفيق اشرله براسه يجي وراه..
مشي ورفيق لحقه...
رفيق جي جنبه وقال:شن في؟
خليل وهو يمشي ويوزع فنظره القدام؛تو كلمني الزلفي وقال معاش تتعاملوا مع الأجدم..
رفيق عقد حواجبه وقال:ماقالش علاش؟
خليل حرك راسه يمين ويسار..
رفيق مط شواربه لداخل وهو يفكر..
خليل وقف ورفيق وقف قدامه..
حط خليل يده ع كتف خوه وقال:غدوة بنمشي نصفي الحساب مع الاجدم..وفي نفس اليوم في بضاعه بتوصل ل**** انت امشي استلمها واني نقولك كيف..
رفيق هز راسه وهو يشوف لخوه بإنتباه..
وجهاد من بعيد يراقب فيهم والدموع فعيونه كان ديما برا خدمة بوه...خليل بالقصد يبعد فيه ومايبي يدخله فشي معاهم ورفيق كذلك ماكانش يدوي معاه بكل في خدمتهم التانيه..
كان فاهم ان خوته يبوه يقعد نظيف لعل وعسى واحد فيهم يضمن مستقبله
🌿لكن لا مستقبل مضمون مع صيت سو يقعد لاحق صاحبه لولد ولده..هدا علاش يقولوا اغلى مايورث الأب لأبنائه السمعه الباهيه والسيرة الحسنه🌿
▪▪▪▪▪
◇ايه صح....ممكن يكون اغلى مايورث..لكن لو ماقدرش الاب هدا يحمي صغاره من انفسهم..من انهم يرتكبوا افعال يسيئوا بيها لسمعتهم وسمعة عيله كامله..يكون زيه زي خالد بالزبط..ااخ..لو نقدر نمسح هديكا الفترة من ذاكرتي بس...لكن هديكا الفترة بالذات هي اهم فترة مريت بيها فحياتي كلها..واصعب فترة..
وهالفتره الصعبه سبقتها فتره كنت فيها في عز..عز نجاحي وصلت للقمه فعلا هداكا الوقت...
▪▪▪▪
🌿صوت هاتف يرن في ساعه متأخره...
فاق وهو مخلوع ناض قعمز وخدي التليفون..
شاف المتصل قرب ليه الشاشه بعدين بعدها..فتح الخط وحطه ع وذنه وقال:ايوه..!
"دكتور هيثم سامحني كلمتك في وقت متأخر"
هيثم مسح عينه وقال:لا مافيش مشكله دكتور احمد لكن بنقولك اني راهو مش ليبيا..
"ههههه..عارف عارف وكان فيها كيف روح غدوة ضروري جدا"
هيثم عقد حواجبه بإستغراب وقال:علاش ان شاء الله خير!
"خير خير ياهيثم..احجز غدوة وروح وتعالى طول لمقر رئاسة الوزراء"..
ضياقوا عيون هيثم وهو يقول؛وين!!؟
"لمقر رئاسة الوزراء ياهيثم..رئاسة الوزراء"..
توسعوا عيونه وارتسمت ع وجهه ابتسامه ذهول..
اللي فباله معقول يكون صح..معقول يكون وصل لاهم هدف خططله من خمسة سنين فاتوا!؟
▪▪▪▪
◇خططت نوصله بعد عشر سنوات لكن ربك جابها لطريقي بعجلة صدمتني وفرحتني هلبه في نفس الوقت...
وعاد هيثم من زمان ماواصل فيه حد..يابال بعد هداكا اليوم...يوم 20 مارس◇

...يتبع...