زيَّغه الشَّيطانُ (الجزء الأول/الثاني/الثالث/الرابع)

الفصل العاشر

الفصل العاشر من #زيغه_الشيطان
#أضواء_مبعثرة
بقلم فاطمة محمد & فاطمة طه سلطان.

_____

اذكروا الله

_____

'الاعجاب هو التوأم الوسيم للحب.'
- أحلام مستغانمي.

_______

اليوم التالي..

يجلس نجم على المكتب أمام رضوان يشرح له بعض الصفقات والأمور الخاصة بالعمل…

كما وجه رضوان له نصائحه في بعض الأمور وأوامره التي لا تقبل النقاش في أمور أخري فهو صارم مع الجميع ورغم أن أكثر شخص يُحبه نجم لكن مع ذلك هناك بعض الصرامة والحزم بينهم.

وما أن انتهى اجتماعهم ذلك أردف نجم وهو يلملم تلك الأوراق المُبعثرة:
- تمام يا چدي، زي ما انتَ جولت انا هديهم الأوامر النهاردة عشان ينفذوا…

- ماشي، سيبك من الشغل بجى وخلينا نتحدث عنك..

نظر له نجم وهو يحاول أن يبدو جاهل لما سيتحدث به جده ولكنه يعلم أنه سيتحدث عن غرام، فهتف قائلا وهو يضيق ملامحه:
- خير يا چدي في حاجة !!

رمقه رضوان بمكر لا يدري من منهما أكثر فهمًا للآخر، فصاح بعد أن خرجت منه ضحكة ساخرة:
- مشكلتك أنك واعي وفاهم يا نچم بس بتحب تبين أنك مش فاهم، أنا عايز اتحدث عن غرام عامل ايه معاها؟ يعني كيف الأمور ما بينكم بعد كتب الكتاب، ويكون في علمك أنا مش ناوي كتب الكتاب ده نقعد عليه كتير، شهر شهرين بالكتير أوي ونحدد الدخلة، انا عايز أشوف أبن ليك يكون لك سند وضهر، ربنا يخلي سندس بس أحنا عايزين راچل يا ابني…

تنهد نجم بضيق حاول إخفاءه، لا يريد أن يزعج جده أو يخالف أوامره..فمازال يشعر بالانزعاج من نفسه كونه تزوج فتاة قد ولدت أمامه تنفيذًا لوصية عمه حتى أنه هو من أختار أسمها، فالفارق بينهما كبير جدا في العُمر.

فتحدث نجم معقبًا بنبرة هادئة:
- مش مرات عمي جالت لما غرام تخلص چامعة دي لسه فاضلها سنتين…

- مرات عمك تجول اللي تجوله، المهم أنتَ بس تقول الميعاد والعروسة هتجول أمين؛ سنتين إيه يا نچم من امتى و أحنا بنكتب كتب كتاب سنتين…

- بلاش نسبق الأمور يا چدي، أنا لسه بحاول أخد عليها، وكمان كتب الكتاب اتعمل علشانك، لكن الدخلة وكل ده هيكون بمزاچي أنا وبموافقتها برضو مش ده كان كلامك في الأول؟؟

قال نجم كلماته بنبرة جامدة بعض الشيء، فأجاب رضوان بهدوء ونبرة حانية:
- اكيد طبعا بس انت عارف غلاوتك عندي وانا عايز اشوف حفيدي، عارف أنك حفيدي بس الحقيقة أنك بالنسبالي أبني، وأنا عايز أشوف ابنك علشان كده بتكلم؛ القرار قرارك اكيد يا ابني انا بس نفسي اطمن عليكم كلكم قبل ما أموت...