زيَّغه الشَّيطانُ (الجزء الأول/الثاني/الثالث/الرابع)

الفصل الثالث_الجزء الثالث_

الفصل الثالث من #الجزء_الثالث #زيغه_الشيطان
#النجم_والثعلب
-الفصل الثالث والأربعون-
بقلم #twinsfatma
-فاطمة محمد&فاطمة طه سلطان-
____________

- هو جدك عايز بناته تطلق بالجملة ولا إيه يا نجم؟

نطق عامر حيث كانت نبرته ساخرة بعض الشيء وهو يجلس بجانب نجم على الأريكة الموضوعة في حديقة المنزل وأمامه الارجيلة ويمسك مقدمتها بيده، فصاح نجم بغضب مدافعًا عن جده:
- اخوك اللي قل بينا يا عامر .. بعد ما كان ملهوف على الجواز وخلانا نقنع جدي بالعافية.. طلقها ومكملوش خمس شهور جواز ومن غير سبب..

توتر عامر قليلا فرمقه نجم بشك وهو يضيق بصره، فهتف نجم متسائلًا:
- انتَ تعرف سبب طلاقهم ومخبي عليا يا عامر؟..ما هو حتى جدي مش عايز يقول ومتعصب وكده كده انا وهو مش على اتفاق من ساعة ما صفية هانم قعدت في البيت...

تحدث عامر وهو يحاول جعل نبرته ساخرة وأن يزيل الشك من قلبه:
- ده انا معرفش مراتي عايمة على عوم اختها وسايبة البيت وعايزة تطلق ليه هعرف سبب ايمن وياسمين.. وبعدين يا نجم ما تشوف راضية واتكلم معاها انا مش هطلقها لو عملت أيه وانتَ عارف.

هتف نجم بتفسير:
-دماغها أنشف مني ومن أبوها..بقولك ايه اطلع اتكلم معاها مهي مراحتش المستشفى النهاردة وهتلم لسانها علشان عارفة أننا هنا يلا..

قال نجم كلماته الأخيرة وهو يغمز له، فهو يعلم كل العلم عن طباعها الحادة التي بالتأكيد نال منها عامر، فنظر له عامر بمكر وقال:
- تصدق فكرة..

__________

وقفت توحيدة قبل غرفة راضية ببضعة خطوات قائلة محاولة رسم الابتسامة على شفتيها ولكنها فشلت، فكانت تشير بيدها نحو الغرفة:
- اوضتها اهي يا ابني..

حاول عامر أن يكسب ودها مردفًا:
- يا حجة توحيدة أنا عارف أنك واخدة على خاطرك من أيمن ومننا بسببه بس كل شيء قسمة ونصيب وربنا يعلم أنا شاري راضية أزاي ومش عاوز غير راضية وبعدين ربنا مقالش نخرب حياتنا علشان ياسمين وأيمن مكملوش...

ابتسمت له توحيدة قائلة وهي تهز رأسها بايجاب:
- معاك حق يا ابني ربنا يصلح الحال للكل يارب ..

أمسك يدها وقبلها بحنان واحترام قائلا:
- اعتبريني زي أبنك يا حجة او زي نجم انا ميرضنيش زعلك....

تمتمت توحيدة بهدوء وحكمة:
-الاتنين بناتي وأنا عايزة مصلحتهم يا عامر لو انتَ الخير لراضية هدعيلكم بصلاح الحال مع بعض..