زيَّغه الشَّيطانُ (الجزء الأول/الثاني/الثالث/الرابع)

الفصل الثالث-الجزء الرابع

الفصل الثالث من #الجزء_الرابع
#زيغه الشيطان
#إنصاف_قلوب_أهلكها_الهوي

-الفصل الثالث والستون-

بقلم

-فاطمة محمد& فاطمة طه سلطان-
___________

دنت منها وقالت وهي تحدق بوالدتها وعلى مقربة منها:
-اديني قومت وجيت يارب تكوني مبسوطة...

وصلت رائحة الأرجيلة والدخان إلى أنف داليا ..دنت منها اكتر تتأكد من حدسها ...مستنشقة ابنتها وعلى الفور صاحت بأعين متسعة:
-أنتِ بتشربي شيشة؟؟؟؟؟

ردت ببساطة شديدة:
-ايوة.

وعلى الفور رفعت يدها وصفعتها بدون تردد وبقسوة متأملة أن تفوق من تلك الحالة...رمقتها "بتول" بصدمة، مستمعة إلى صراخها عليها التي أضافته عقب صفعها:
-أيوة في عينك..ايه البجاحة اللي أنتِ بقيتي فيها دي...هو أنتِ واقفة قدام واحدة صاحبتك؟؟ انا أمك لو أنتِ نسيتي..والحال المايل ده ميعجبنيش ومش هسيبك تغرقي فيه..الحمدلله أن ابوكي مات ومشافش القرف اللي أنتِ بقيتي فيه

سارع "تيم" بالتعقيب على فعلتها وحديثها:
-براحه يا ماما شوية في ايه مهي من زمان كانت بتشربها وبطلتها ورجعت تاني ايه المشكلة.. وبعدين دي شيشة اومال لو جتلك سكرانة هتعملي فيها إيه؟
-اخرس أنت كمان بدل ما الطشك مش ناقصة استفزاز…

رددتها داليا بعصبية..فآتاها صوت بتول أخيرًا متلفظة بقوة:
-ويخرس ليه؟؟ انا معملتش حاجة غلط ولا مبتتعملش...والأهم من ده كله اني مش صغيرة..وعارفة كويس اوي انا بعمل ايه..

-لا صغيرة ومدام في بيتي يبقى كلمتي انا اللي هتمشي عليكي..وسهر بعد كدة مفيش أنتِ سامعة..والقرف ده تنسيه بقا اتصرفي زي الناس الكبيرة

هزت راسها تنفي لها هذا،.قائلة بتحدي واستفزاز:
-اعتبريني مش سامعة.. وبيتك ده مش هقعدلك فيه..واشبعي بيه...انا هغور في ستين داهية..

انتهت منطلقة من مكانها متجهه للاعلى كي تلملم أغراضها…تابعتها والدتها بصدمة..فهذا اخر ما كانت تتخيل حدوثه…وما أن غابت بتول حتى تحدث تيم بسأم:
-عجبك كدة..حصل ايه يعني لما اتاخرت شوية.. وايه يعني شيشة..أجرمت هي؟؟خلاص هتسيبلك البيت علشان ترتاحي

-واد انت متكلمش عشان بتعصبني وهتشلني ببرودك ده...وبعدين ايه اللي ايه يعني؟! ما تسترجل شوية وخلي عندك نخوه ودم….ده بدل ما تقولها كلمتين في عضمها..بتقف معاها في الغلط…انتَ ايه كنت بتاكل برة لحم خنزير؟!!