زيَّغه الشَّيطانُ (الجزء الأول/الثاني/الثالث/الرابع)

الفصل السابع-الجزء الثالث

الفصل السابع من #الجزء_الثالث.
#زيغه_الشيطان.
#النجم_والثعلب.

الفصل السابع والأربعون.

بقلم #twinsfatma
فاطمة محمد & فاطمة طه سلطان.

_____________

- إيه يا غرام هتفضلي مطنشاني ومش بتردي عليا انا بالذات مع ان لسانك شغال مع الكل.

قال نجم كلماته وهو يجلس بجانبها على الفراش، كانت تعبث في هاتفها لا تجيب عليه مثلما كانت تفعل طوال اليوم تتجاهله، فهتفت بنبرة جافة:
- عايزني أرد أقول إيه يا نجم .. ممكن تكون مش متأثر زيي .. هتتاثر ليه من اساسه أنا اللي أول حمل ليا نزل .. لكن انتَ مش فارق معاك كده كده سندس موجودة ومش هيهمك .. ولا أقولك عيال أمجد يتربوا في عزك…

جز على اسنانه قاذفًا الكوب المتواجد على (الكومدينو) ليتهشم إلى قطع صغيرة ليصبح كحبات الرمل..

ذعرت غرام من فعلته ولكنه ردد في نبرة حاول جعلها هادئة بقدر الإمكان:
- بصي يا غرام انا مش جديد عليكي .. انا اللي مربيكي كمان من قبل ما اتجوزك وعارفة أني مش هسمحلك تقلي مني تحت أي ظرف .. انا اشيلك فوق رأسي وفي عيني انتِ مراتي وبنت عمي .. لكن كلام ماسخ هيتقال مش هسمح بيه..

- اومال تسمح أني أفوق في وسط الليل الاقيك واقف معاها ده مش تقليل مني يا نجم؟

- واقف معاها اه فعلا.. ياتري كنت في اوضتها ؟؟ .. ولا كنت واخدها بالحضن .. ده اوضه امي وامي كانت نايمة و اتفاجئت انها ورايا .. بلاش تجرحيني في موضوع أمي وأي حد من طرفها ربنا وحده يعلم الفترة دي أنا مش طايق نفسي أزاي ولا فاهم حاجة في حياتي…

تجاهلت كل ما تفوه به فما شأنها بكل ذلك سؤال واحد كانت تريد أن يجيب عليه ولم تترد في طرحه فهتفت مترقبة:
- نجم انتَ زعلان أني سقطت ؟؟

- لا مش زعلان يا غرام مبسوط أوي مش باين عليا؟

قال كلماته بسخرية شديدة ثم استغفر ربه وهو يمسك بكف يدها مُقبلا إياه مستشعرًا برودتها وشحوبها:
- اولا انا مكنتش اعرف انك حامل ولا انتِ يعني مكناش متعشمين فيه .. ثانيا ده مش نصيبنا يا غرام بكرة هتحملي تاني..

- أنا موجوعة يا نجم وعايزة أنام وزعلانة منك أوي لدرجة اني حساك السبب .. مش عارفة اسمعك ولا اسمع حد.. سبني أنام ونتكلم لما اكون قادرة اتكلم ونتناقش..

سحبت يدها من يده ببطء، ثم أخذت وضعية النوم ليتنهد تنهيدة مطولة ثم نهض ليغلق الضوء.

_______________

اليوم التالي..