زيَّغه الشَّيطانُ (الجزء الأول/الثاني/الثالث/الرابع)

الفصل الأخير

الفصل الأخير من #زيغه_الشيطان.
#الجزء_الرابع.
#إنصاف_قلوب_أهلكها_الهوى.
#twinsfatma.
____________________________

بعد مرور شهر.
وداخل بيت رضوان النجم، كانت ياسمين تجلس بجانب والدتها على الاريكة وعلى الأريكة الآخرى يجلس عامر بين راضية وأيمن الذي أتى ليكسب رضاء زوجته التي ذهبت منذ شهر وكلما يأتي ويحاول معها كي تعود إلى المنزل، ترفض الذهاب معه بسبب وجود هبة في المنزل وعلى المقعد القابع على الطرف، يجلس محمد والد عامر وأيمن.

نهض أيمن وأقترب من ياسمين وقبل رأسها متمتمًا:
-حقك عليا ياستي قدامهم كلهم أهو والله أنا مفيش حاجة في أيدي أعملها ومعملتهاش والله هي للأسف ده بيت العيلة ومحدش يقدر يمشيها منه.

أجابته ياسمين بانزعاج:
-وأنا مش هقعد في بيت هى فيه.

هنا وتحدث عامر في نبرة هادئة:
-وأحنا يا بنت عم رضوان جايين علشان نحل المشكلة وكلمنا نجم في التلفون وعرف كل حاجة...أنا وأيمن اشترينا بيت يعتبر فيه تحت المضيفة وفوق في شقتين منفصلين واحدة لأيمن وواحده ليا.

عقبت راضية على حديث زوجها في نبرة جدية عاقلة:
-هوا أنا برضو مش هقعد معاها في بيت واحد...والشهر ده كان عامر وأيمن كل يوم بيدورا على بيت وخلاص بيجهزوه أهو.

أردف أيمن بحماس وعينيه مسلطة عليها:
-وياستي أنا مش هطلعك من هنا غير على بيتك هناك...وأنا بجهز كل حاجة فيه...أنا جيت أراضيكي النهاردة وأعرفك أحنا بنعمل إيه  علشان متفتكريش أني مكبر دماغي عشان بكرة كتب كتاب نجم وهنمشي كلنا على الفجر ومينفعش نروح وأنتِ شايلة مني كدة.

تحدثت توحيدة مازحة معهم:
-هى كده ملهاش حجة يا ابني أنت عملت اللي عليك وزيادة وعداك العيب ولا إيه يا ياسمين جوزك والحاج محمد جم علشان يراضوكي أهو.

تلفظ عامر في نبرة مرحة:
-جرا إيه يا حماتي أنتِ مش واخده بالك مني ولا إيه؟!

تمتمت توحيدة بعدما ارتسم على ثغرها إبتسامة هادئة:
-لا أنت حبيبي يا عامر ووجودك على رأسي.

ابتسم لها وتحدث في أدب:
-ربنا يخليكي ليا يا حماتي يارب ويطول في عمرك، أصلك بتحبيني مش زي ناس.

قاطعته راضية في غضب:
-هو أنت بتلقح عليا ولا أنا مش واخده بالي.

رد عليها كابحًا ضحكته:
-أنا كلمتك يا بنتي ولا هو لازم نفضح نفسنا قصاد الناس بقى لمي الليلة بقى.

أجابته راضية في عِند:
-وإن ملمتهاش؟

زفر محمد وتدخل قائلًا:
-اهدي يا راضية يا بنتي هو أنتِ لسه ماخديش على طبع عامر...هو طريقة هزاره كده هو أحنا جايين نصالح واحدة علشان نغضب التانية أكبروا شوية....المهم يا ياسمين يا بنتي أنتِ خلاص صفيتي علشان الواد ده مش على بعضه وصدعنا صالحيه بقى.