Muse [Own Creation]

(၈)

Unicode

အပိုင်း - ၈ ။ စိတ်၏လေးလံခြင်းပိတ်လှောင်ခြင်းနှင့်ပေါ့ပါးလွတ်မြောက်မှုကို ရှာဖွေခြင်း

ခက်နွယ် ကြိုတင်တွက်ချက်ထားသည့်အတိုင်း လီယို၏ ရုပ်ရှင်ကားထွက်လာခြင်းက ပရိသတ်များအကြား မိုးမီးလောင်စေခဲ့သည်။ နှစ်ဖက်ပရိသတ်များက တစ်ဖက်နှင့်တစ်ဖက် ကျေသွားကြောင်း အငြင်းပွားနေချိန်တွင် စဝ်မုဒြာသည် မဂ္ဂဇင်းမျက်နှာဖုံးတစ်ခု ရိုက်ကွင်းတွင် ရှိနေခဲ့၏။ မင်းမြတ်နွယ်သည် စဝ်မုဒြာကို စောင်းရင်း ဖုန်းကိုကြည့်ကာ သတင်းများကို အချိန်နှင့်တပြေးညီ ဖတ်ရှုနေခဲ့သည်။

လီယို၏ ဆင်ဆာကြန့်ကြာနေသည့် ထိုရုပ်ရှင်ကားကို လူတို့စိတ်ဝင်စားရန်အတွက် မင်းသားနှင့် မင်းသမီး၏ ဆွဲဆောင်မှုအရှိဆုံးအခန်းများနှင့် ဇာတ်လမ်းကိုစိတ်ဝင်စားမည့် အက်ရှင်ဇာတ်ဝင်ခန်းအချို့ကို အမြည်းအနေနှင့် ပြသခဲ့သည်။ ထိုဇာတ်ကားထဲတွင် လီယိုက ရဲအရာရှိတစ်ဦးဖြစ်ကာ မင်းသမီးဖြစ်သူသည် မြေအောက်ဘိန်းရာဇာ၏ လူယုံလက်ပါးစေ တစ်ဦးဖြစ်သည်။ တစ်ယောက်နှင့်တစ်ယောက်သည် မေတ္တာရှိနေသည့်တိုင် သူတို့၏ လမ်းများ သည် မတူခဲ့။

စဝ်မုဒြာသည် ဖုန်းကိုချကာအနည်းငယ်တင်းမာသည့်အသံဖြင့် ရေရွတ်၏။

"ဒါက မင်းသားမင်းသမီးကို သက်သက်ကြီး အသားပေးထားတာဟမ့် Fan Service တစ်သိန်းနဲ့ ကားကြီး..."

သူလုံးဝမနာလိုဘူး! မင်းသမီးရဲ့လှနေတဲ့ ကောက်ကြောင်းတွေကို လီယိုက အနီးကပ်ကြီး မြင်ရ၊ ကိုင်တွယ်နေရတာကို သူလုံးဝမနာလိုဘူး! ဒီမင်းသမီးက သူတို့နိုင်ငံမှာ ကောက်ကြောင်း အလှဆုံးလို့ နာမည်ကြီးတဲ့ နတ်ဘုရားမလေ! နောက်ပြီးဘာကို ဝမ်းဗိုက်ကြွက်သားတွေ ပြရ တာလဲ! လီယိုကအလကားကြွားလုံးထုတ်နေတာပဲ! သူ့ကြွက်သားတွေကို ဘယ်သူက စိတ်ဝင် စားမှာလဲ! မင်းသမီးရဲ့ ပေါက်စီတွေထက် လီယိုရဲ့ ဝမ်းဗိုက်ကြွက်သားတွေ ရင်အုပ်ကြီးကြီး တွေကို သူ ပိုကြည့်ဖြစ်တယ်ဆိုတာကို လုံးဝ ဝန်မခံချင်ပါဘူး!

စဝ်မုဒြာ၏ ဒေါသတကြီးခပ်တိုးတိုး ရေရွတ်နေမှုကို မိတ်ကပ်ပြင်ပေးနေသည့် ကောင်ကလေးသည် ရယ်လေ၏။