Muse [Own Creation]

(၂၂)

Unicode

အပိုင်း - ၂၂ ။ အိမ်ပိုင်ရှင်ကို မေ့

"မင်းမြတ်နွယ်!"

အော်ဟစ်ကန်ကျောက် ထုရိုက်နေသော်လည်း သူ့ကို ပြုတ်တူကဲ့သို့ ညှပ်ထားသည့် လက်တစ်စုံမှ ဝေဟင်သော် မရုန်းထွက်နိုင်။

"မင်း ခွေး... မ..."

ဆဲရေးမည့် စကားလုံးထွက်လာတိုင်း သူ့နှုတ်ခမ်းတို့သည် ဒဏ်ပေးခြင်းကို ခံရရှာ၏။ အောက်နှုတ်ခမ်းပေါက်သွားသည်အထိ အကိုက်ခံလိုက်ရပြီးနောက် သူ့ပါးနှစ်ဖက်ကို လက်တစ် ဖက်တည်းဖြင့် ဖျစ်ဆုတ်ကိုင်ထားသည့် မင်းမြတ်နွယ်ကို ဝေဟင်သော် စူးစူးရဲရဲပြန်ကြည့်သည်။

"ထပ်ဆဲရင် အစ်ကို အသက်ရှူလို့မရနိုင်အောင် အနမ်းခံရမှာ... မယုံမရှိနဲ့ အစ်ကိုမေ့ သွားမှာ ကျွန်တော် လွှတ်ပေးမှာ"

မင်းမြတ်နွယ် စကားက ခြိမ်းခြောက်ခြင်းမဟုတ်ဘဲ အမှန်တကယ်ဖြစ်သည်ကို သူ ကောင်းကောင်းသိ၏။

"ဘာလို့ အခုလိုမျိုး ထွက်သွားရတာလဲ ကျွန်တော့်ကို မြင်နေသားနဲ့"

"မင်းရဲ့အချိန်ကောင်းလေးကို မဖျက်ဆီးချင်ဘူးလေ"

"ဘာက အချိန်ကောင်းလဲ"

"စဝ်မုဒြာကို မရတာနဲ့ ငါ့ကိုလာ အစားမထိုးစမ်းပါနဲ့"

ဒေါသတကြီးပြောနေရင်းနှင့် ဝေဟင်သော်၏ မျက်ရည်သည် တပေါက်ပေါက်ကျလာလေ သည်။ ထိုစကားကို သူ ကြားရလိမ့်မည်ဟု မထင်ထားသည်မို့ မင်းမြတ်နွယ် ဝေဟင်သော်၏ ပါးကို ဖျစ်ဆုတ်ကိုင်ထားသည့် သူ့လက်ကို လွှတ်လိုက်မိသည်အထိ အံ့အားသင့်သွားရသည်။

"ဘယ်လိုမျိုး ပြောလိုက်တာလဲ ကျွန်တော့်ကို နောက်တစ်ခေါက်ပြန်ပြောပါဦး"

"ဘယ်လိုအလိမ်အညာတွေနဲ့ငါ့ကို မင်းလာပြီး လှည့်စားဦးမှာလဲ!"

"ကျွန်တော်က ဘာ လှည့်စားလို့လဲ"

"စဝ်မုဒြာက လီယိုကို သဘောကျနေတာကြောင့် ငါ့ကို စဝ်မုဒြာနေရာမှာ အစားထိုးဖို့ လုပ်နေတာလေ"

"အစ်ကိုတို့က ဘယ်နေရာမှာများ တူကြလို့လဲ"

မင်းမြတ်နွယ်သည် စိတ်ပျက်လက်ပျက်ဖြင့် ဝေဟင်သော်ကို ပြန်မေး၏။ ဝေဟင်သော်နှင့် စဝ်မုဒြာက ဘယ်နေရာမှာများ တူကြလို့ သူက စဝ်မုဒြာနေရာတွင် အစားထိုးပါသည် ဆိုပြီး ဝေဟင်သော် အထင်လွဲသွားရတာလဲလေ။