Muse [Own Creation]

(၁၀)

Unicode

အပိုင်း - ၁၀ ။ အပြန်အလှန် ထားရှိတဲ့ မစ္ဆေရစိတ်

သူ့ဖခင်မွေးနေ့ပွဲသည် ဧည့်သည်အများအပြားနှင့် ပြည့်နှက်နေခဲ့သည်။ အိမ်ရှိလူများ သာမက မိတ်ဆွေစီးပွားဖက်များလည်း ရောက်လာကြ၏။ စဝ်မုဒြာမရောက်တာ ကြာသည့် ခြံထဲကို ကားပေါ်က လှမ်းကြည့်သည်။ အိမ်မီးရောင်သည် ထိန်ထိန်လင်းနေခဲ့သည်။ စားပွဲသည် အိမ်ထဲတွင်ရှိပြီး လူကြီးများနှင့်အတူပါလာသည့် လူငယ်အချို့ကတော့ အပြင်တွင်ရပ်ကာ အချိန် ဖြုန်းနေခဲ့ကြသည်။

ဒါပေါ့ ဒီအဖိုးကြီးတွေနဲ့ သူတို့ အကြာကြီးတော့ အတူတူမရှိချင်ပါဘူး။ သူတို့ အပြင်မှာ ရပ်နေတယ်ဆိုတာလည်း နောက်မျိုးဆက်တွေချင်း အလုပ်အတူတူ လုပ်ကြဖို့ မိတ်ဖွဲ့ဖို့ပါပဲ။

"ငါပြန်လာကြိုပေးရမလား..."

မင်းမြတ်နွယ်သည် ခြံထဲသို့ ကားဝင်လိုက်ပြီး စင်ဝင်အောက်တွင် ရပ်ပေးလိုက်၏။ စဝ်မုဒြာခေါင်း အသာယမ်းပြကာ မင်းမြတ်နွယ်ကမ်းပေးလာသည့် လက်ဆောင် ကျောက်စီ ပန်းချီကားကိုလှမ်းယူသည်။

"လီယိုလာကြိုလိမ့်မယ်..."

မင်းမြတ်နွယ်၏ မျက်လုံးများထဲ စိုးရိမ်ခြင်းတို့ဖြတ်ပြေးသွားသောအခါ စဝ်မုဒြာသည် ခပ်တိုးတိုးရယ်သည်။

"စိတ်မပူပါနဲ့ ဘာဖြစ်စရာရှိလို့လဲ... ဒါနဲ့ခဏနေပြီးမှ သွားပါလား ဒီတိုင်းကြီးတော့ တန်းမပြန်ပါနဲ့"

စဝ်မုဒြာ၏ဖခင်က သူ့သားကို လိင်တူချင်းချစ်ကြိုက်သည့် ရုပ်ရှင်ရိုက်တုန်းက အပြင်း အထန် ကန့်ကွက်ခဲ့သည်ကို မင်းမြတ်နွယ်မမေ့သေးပေ။ စဝ်မုဒြာဖခင်သည် စီးပွားရေး နယ်ပယ် တွင် လူသိများသည့်သူတစ်ဦးမို့ အဆက်အသွယ်များနှင့် Fallen ကိုပင် ဖိနှိပ်ရန် ကြိုးပမ်းခဲ့ သေးသည်။ သို့သော်လည်း လီယိုအရှိန်အဝါကြောင့် ထိုဖိနှိပ်မှုကမအောင်မြင်ခဲ့။ မင်းမြတ်နွယ် သည် စဝ်ခွန်းနောင်၏ လုပ်ရပ်များကို သဘောမကျ။ ထို့အတွက် စဝ်မုဒြာအိမ်နှင့် သူ သိပ်ပြီး မပတ်သက်ချင်။ စဝ်မုဒြာ၏ ဖိတ်ခေါ်မှုကိုလည်း သူ မငြင်းနိုင်ပြန်။ တစ်စုံတစ်ယောက်ကို သူ တွေ့နိုင်မည်မဟုတ်လား။