Muse [Own Creation]

(၂)

Unicode

အပိုင်း - ၂ ။ နားလည်ရခက်တယ်

လီယိုသည် ကိုယ်ပိုင်ခြံဝန်းတွင်နေထိုင်သည့် သူတစ်ဦးဖြစ်သည်။ အင်ဂျင်နီယာဖြင့် သေချာဆွဲထားသည့် အိမ်ပုံစံသည်ဆန်းသစ်ပေ၏။ ကားထဲကနေ လီယို၏အိမ်ကို ကြည့်ပြီး စဝ်မုဒြာအနည်းငယ်သဘောကျသွားသည်တော့အမှန်။ မြက်ခင်းစိမ်းများကိုသူသဘောကျသည်။ သူ့အိမ်တွင် မြက်ခင်းစိမ်းများရှိသော်လည်းစဝ်မုဒြာသည် ဘယ်သောအခါမှ အိမ်မပြန်ဖြစ်ခဲ့။ တစ်ယောက်တည်းသာ နေဖြစ်ခဲ့သည်။

လီယိုသည် ဂိုထောင်ထဲတွင် ကားကိုရပ်ပြီးနောက် ဂိုထောင်နှင့်အိမ်အတွင်းပိုင်းသို့ ဆက်သွယ်ထားသည့် အတွင်းတံခါးဆီမှအိမ်ထဲသို့ ကူးလာလေ၏။ အိမ်ရှေ့တံခါး သော့ဖွင့်ဖို့ စိတ်ကူးရှိပုံမပေါ်သည့် လီယိုကြည့်ပြီး စဝ်မုဒြာတစ်ယောက် စကားမဲ့သွားတော့သည်။

ဒါကြောင့်များ ဒီလူကအိမ်မှာမရှိဘူးဆိုပြီး သတင်းသမားတွေက အမြဲတမ်းပြောကြတာ လား။

"ဘာဖြစ်လို့လဲ..."

တစ်ခုခုပြောဖို့အတွက် စဉ်းစားပြီး မပြောတော့သည့် စဝ်မုဒြာကို အသာငဲ့ကြည့်ပြီး လီယိုမေးသည်။ အိမ်တွင်းစီးဖိနပ် အပိုတစ်စုံကို စဝ်မုဒြာအတွက်ချပေးပြီးနောက် သူတို့ အိမ်ထဲသို့ လျှောက်လာကြ၏။ အိမ်အတွင်းပိုင်းပြင်ဆင်မှုကိုကြည့်ရုံဖြင့် လီယိုသည် ပစ္စည်း ကောင်းများကို ကောင်းစွာအသုံးပြုတတ်ပြီး အိမ်အပြင်အဆင်နှင့်ပတ်သက်ပြီး အမြင်ရှိသည့် သူတစ်ယောက်ဖြစ်ကြောင်းသိသာစေသည်။ လှောင်ဖို့အတွက် စဉ်းစားထားသော်လည်း အိမ် အတွင်းပိုင်း၏ ခမ်းနားထည်ဝါမှုကို မြင်ပြီးချိန်တွင် စဝ်မုဒြာ လက်လျှော့လိုက်တော့၏။

သူ မေးသော်လည်းရေငုံနှုတ်ပိတ်ကာ ပြန်မဖြေသည့် စဝ်မုဒြာကြောင့် လီယို ဆက်မမေး နေတော့။ ထိုအစား သူလှေကားရင်းတွင်ရပ်ကာ...

"အပေါ်ထပ်မှာ အခန်းလွတ်တွေရှိတယ်... မင်းကြိုက်တဲ့အခန်းမှာနေလို့ရတယ်... အခန်းတွေကလူအသင့်နေလို့ရတယ် ဒါပေမဲ့..."

လီယိုစကားရပ်သွားမှုကြောင့် စဝ်မုဒြာသည် ထိုသူကိုမော့ကြည့်ရလေ၏။ လီယိုသည် နှုတ်ခမ်းထောင့်စွန်းတစ်ဖက်ကိုသာကော့ညွှတ်၍...