Muse [Own Creation]

(၂၆)

Unicode

အပိုင်း - ၂၆ ။ ခလောက်ဆန်မှု

"ဝေဟင်သော် ဘယ်မှာလဲ"

"တွေ့တွေ့ချင်း ငါ့ကို မေးတာက ဒါလား"

စဝ်မုဒြာသည် ဖခင်ဖြစ်သူကို စူးစူးရဲရဲကြည့်၏။ ကြင်နာတတ်သည့် ဖခင်သည် သူချစ်သော အမျိုးသမီးနှင့် သွေးသားဖြစ်သည့် သူ့အပေါ်တွင်သာ ကြင်နာခြင်းကို ပေးပုံရ၏။ စိတ်မရှည်စွာဖြင့် ဖခင်၏ ရုံးခန်းရှိ ခုံတစ်ခုံပေါ်တွင် ခြေပစ်လက်ပစ် သူ ထိုင်ချလိုက်ချိန်တွင် အလုပ်နှင့်ပတ်သက်သည့် စာရွက်စာတမ်းများကို ဖတ်ရှုနေသည့် ဖခင်သည် လက်ထဲက အလုပ် ကို ချပြီး သူ့ကို အာရုံစိုက်၏။

"ဝက်သားပေါင်းတစ်ပွဲနဲ့ လိမ္မော်အသီးဖျော်ရည်တစ်ခွက်ကို ချက်ချင်းသွားဝယ်ပြီး အခန်းထဲကို လာပို့"

Intercall ကတစ်ဆင့် ကိုယ်ရေးအရာရှိစားပွဲကို ဖုန်းဆက်ပြီး သူ နှစ်သက်သည့် အစား အသောက်လှမ်းမှာပေးနေသည့် ဖခင်ကို စဝ်မုဒြာကြည့်သည်။ သူ့စိတ်ထဲတွင် ရှုပ်ထွေးမွန်းကြပ် နေ၏။ ဖခင်က အခုချိန်ထိ သူ့အကြိုက်ကို မမေ့သေး။

"ဝေဟင်သော်နဲ့က ဘယ်တုန်းက ဒီလောက်ရင်းနှီးသွားရတာလဲ"

"ဝေဟင်သော် ဘယ်မှာလဲ သူ့ကို ဘာလုပ်ထားလဲ"

မေးသည်ကို မဖြေသည့် သားဖြစ်သူကို စဝ်ခွန်းနောင်ကြည့်သည်။

"စဝ်မင်းမြတ်နွယ်ကို ဖေဖေသိလား"

"စဝ်မင်းမြတ်နွယ်က အပေါင်းအသင်း လုပ်လို့ကောင်းတဲ့လူထဲမပါဘူး မင်းက ဘာလို့ သူ့နာမည် သိနေရတာလဲ"

"ဓာတ်ပုံထဲမှာ ဝေဟင်သော်နဲ့အတူရှိနေတဲ့လူက ဘယ်သူလို့ထင်လို့လဲ"

အစပိုင်းတွင် မင်းမြတ်နွယ်၏ အကြောင်းကို သိသည့်တိုင် ချဲ့ကားပြောဆို ခြိမ်းခြောက် ခြင်းဟုသာ စဝ်မုဒြာ စိတ်ထဲထားထားသော်လည်း မင်းမြတ်နွယ်၏ အမည်အပြည့်အစုံကို ကြားသည်နှင့် အလေးအနက် စကားပြောလာသည့် ဖခင်၏ အပြုအမူကို ကြည့်ပြီး စဝ်မုဒြာ သည် မင်းမြတ်နွယ်က အမှန်တကယ် အန္တရာယ်များသည့် လူတစ်ဦးဟု လက်ခံလိုက်တော့ သည်။ သူ့အဖေ၏ ထောင်လွှားမှုကို သူ အသိဆုံးမို့ သေချာပေါက် သတိထားရမည့် လူတစ်ဦးမို့ သူ့ဖခင်က သူ့ကို ရှောင်ဖို့အတွက် ပြောဆိုခြင်းဖြစ်သည်ကို စဝ်မုဒြာ နားလည်လိုက်သည်။