Muse [Own Creation]

(၂၁)

Unicode

အပိုင်း - ၂၁ ။ ရှောင်ပေးလိုက်ရတဲ့ အိမ်ပိုင်ရှင်

ရေချိုးခန်းထဲတွင် ရေချိုးနေသည့် ဝေဟင်သော်သည် ရေပန်းအောက်ထဲ ခေါင်းထည့် နေသည့်တိုင် စဝ်မုဒြာ၏ ရှက်ရှက်နှင့် သူ့ကို မေးလာသည့် ဟန်ကို အတွေးထဲက မထုတ်နိုင်ခဲ့။ တစ်ချိန်လုံးကို သူ့ကို မုန်းတီးရွံရှာနေသည့် စဝ်မုဒြာက ယခုလိုမျိုး ကိုယ့်ကိုယ်ကိုယ် မာန်လျှော့ ပြီး သူ့ကို အကူအညီတောင်းလာလိမ့်မည်ဟု ဝေဟင်သော် တစ်ကြိမ်လေးပင် မမျှော်လင့်ပေ။ ဦးစဝ်ခွန်းနောင်၏ မွေးနေ့တွင် စဝ်မုဒြာက လီယိုနှင့်လက်ထပ်မည်ဖြစ်ကြောင်း ပြောလိုက်သည့် အချိန်က စဝ်မုဒြာ၏ အရွဲ့တိုက်မှုဖြစ်ကြောင်း သူ သိရှိပြီးသားပင်။ ထိုအရွဲ့တိုက်မှုကို လီယိုက ကူညီလိုက်သည့်အချိန်တွင် ဝေဟင်သော် ပေါက်ကွဲခဲ့ရ၏။

သူကအရင် လီယိုနှင့်တွေ့သူဖြစ်ပြီး စဝ်မုဒြာထက်အရင် သူက လီယိုကို သဘောကျခဲ့သူ ဖြစ်သည်။ လီယို၏ ငြင်သာသည့်အပြုအမူ ရိုဆန်လွန်းသော စကားတို့က သူ့စိတ်ကို ခုန်လှုပ်စေ သည်။ သို့သော် လီယို၏ Muse က သူ မဟုတ်ခဲ့။ စဝ်မုဒြာသည် လီယို၏ Muse ဖြစ်ပြီး လီယိုက စဝ်မုဒြာကြောင့် ဖြောင့်ဖြူးနေသည့် တက်လမ်းကိုပစ်ပြီး မြန်မာနိုင်ငံသို့ ပြန်လာခဲ့ခြင်းဖြစ်သည်။ လီယိုကို မြန်မာပြည်တွင်တွေ့ရှိလိုက်ရချိန်တွင် ဝေဟင်သော်သည် စိတ်ထဲမပြောပြတတ်အောင် ပျော်ရွှင်ခဲ့ရ၏။

သူတို့နှစ်ဦးလုံးက အနုပညာမေဂျာကို တက်ရောက်ခဲ့သူများဖြစ်ကြသည်မို့ တစ်ဦးနှင့် တစ်ဦးရင်းနှီးပြီးသည့်အချိန်တွင် တိုင်းတစ်ပါးတွင် အားငယ်ရသည့် သူ့ကို လီယိုက ဖေးမခဲ့ပြီး သူ့စိတ်သည် လီယိုအပေါ်တွင် ယိမ်းယိုင်ခဲ့ရ၏။ အနောက်နိုင်ငံတွင် အခြေချနေကြသော သူတို့ သားအမိဆီသို့ ဦးစဝ်ခွန်းနောင်သည် ရောက်ရှိလာခဲ့သည်။ ထို့နောက် မိခင်သည် ထိုအမျိုးသား ကို လက်ခံပြီး မြန်မာပြည်သို့ ပြန်လိုက်ပါသွား၏။ မိခင်နှင့်အမြဲအတူတူ နေဖို့တွေးထားသည့် သူသည် လီယိုကို နှုတ်ဆက်ကာ မြန်မာပြည်သို့ ပြန်သွားဖြစ်ခဲ့သည်။ ထို့နောက်တွင်တော့ အနုပညာလောကတွင် သူ ခြေချဖြစ်၏။ အတော်လေးရုန်းကန်ပြီး နှစ်နှစ်အကြာတွင် လီယိုကို သူ တွေ့ရှိခဲ့ရသည်။