Muse [Own Creation]

(၁၆)

Unicode

အပိုင်း - ၁၆ ။ Muse

"အကုန်လုံးပင်ပန်းခဲ့တဲ့အတွက် ကျေးဇူးတင်ပါတယ်!"

ရိုက်ကူးမှုပြီးစီးသည့်အချိန်တွင် ရုပ်ရှင်အဖွဲ့သားများကို ခက်နွယ်သည် ဟိုတယ်ခန်း တစ်ခုတွင် တည်ခင်းကျွေးမွေးလေ၏။ လွှင့်ရင်းတန်းလန်း ရိုက်ကူးသည်ဆိုသော်လည်း ယခု တော့ သူတို့ရိုက်ကူးရေးသည် အလုံးစုံ ပြီးမြောက်သွားခဲ့ပြီ။ ကျန်သည်က ပရိသတ်အကြိုက် လိုက်ပြီး ထပ်ထုတ်သည့် အချပ်ပိုအပိုင်းများသာ ရှိပေလိမ့်မည်။

ဇာတ်လမ်းတွဲ၏ အဓိက သရုပ်ဆောင်များဖြစ်သော လီယိုနှင့်စဝ်မုဒြာသည် ဘေးချင်း ကပ်ထိုင်ရ၏။ လီယိုသည် စဝ်မုဒြာကို ဘေးတွင်ထားကာ အလွန်ဂရုစိုက်သည်။ လက်ကိုင်ပုဝါ ခင်းချင်း၊ ဟင်းထည့်ပေးခြင်း၊ လာတိုက်သည့် သူများကို ကိုယ်စားတားဆီးပေးခြင်း အစရှိသည် တို့ကို သက်တောင့်သက်သာ ဖြစ်စွာ လုပ်ပေးနေ၏။ စဝ်မုဒြာက လီယိုကို ကပ်ပြီး အောင်မြင်ဖို့ အတွက် လုပ်နေရသူတစ်ဦးနှင့် မတူနေဘဲ လီယိုကသာ စဝ်မုဒြာကို သူနှင့်အတူ ရှိနေသေးဖို့ အတွက် ကပ်နေသည့် လူတစ်ယောက်လို။

"သောက်... သောက်..."

စဝ်မုဒြာက သိပ်မသောက်နိုင်သည့်သူမို့ ခက်နွယ်မှ သူ့ကိုစပြီး တစ်ခွက်ပြီးတစ်ခွက် သောက်ခိုင်းနေမှုကြောင့် ရီဝေဝေဖြစ်လာတော့၏။ ဝိုင်သောက်နေသည့် သူ့ပါးများသည် နီရဲနေခဲ့ပြီ။ ဇာတ်လမ်းတွဲတွင် ပါဝင်သူအားလုံးက အသက်ပြည့်ပြီးသူများမို့ သူတို့ဝိုင်းသည် မြိုင်ဆိုင်နေခဲ့သည်။ တစ်ယောက်လာတိုက်လိုက် သူတို့၏ ဇာတ်လမ်းတွဲအကြောင်း ပြောလိုက် သူကသောက်လိုက် နောက်တစ်ယောက်လာလိုက်နှင့် စဝ်မုဒြာတစ်ယောက် မူးဝေလာတော့၏။ လီယိုသည် ထိုသည်ကို ကြည့်ကာ...

"ကျွန်တော်ပဲသောက်လိုက်မယ်..."

စဝ်မုဒြာထံသို့ အတင်းထိုးပေးနေသည့် ခက်နွယ်လက်ထဲမှ ခွက်ကိုလီယို လှမ်းယူ၏။ တစ်ဝိုင်းလုံး၏ စူးစမ်းအကြည့်များက သူ့ထံရောက်လာသည့်အချိန်တွင် လီယိုသည် အပြုံး တစ်ခုနှင့် လက်ထဲက ခွက်ကိုမော့သောက်ကာ ကုန်သွားသည့် ခွက်လေးကို ထောင်ပြလေသည်။ စဝ်မုဒြာသည် ငြိမ်ငြိမ်လေးထိုင်ကာသာ လီယိုကို အကဲခတ်နေခဲ့သည်။ နောက်ဆုံးတွင်တော့ နေ၍မကောင်းလောက်အောင် ရီဝေနေသည်မို့ အမူးပြေရန်အတွက် သူခွင့်တောင်းကာ အပြင် ထွက်၍ လေသာဆောင်တွင် လေညင်းခံနေခဲ့သည်။ သူ့ပါးသည် တရှိန်းရှိန်းပူနေခဲ့၏။ ည ကောင်းကင်ကို ငေးကြည့်ကာ ပြီးခဲ့သည့် အချိန်အကြောင်းကို တွေးနေခဲ့သည်။