Unparalleld Leveling (Realm - 8) [Myanmar Translation]

Chapter - 45

Unicode

၅၅၃။ ကျောက်တုံးနဲ့ပေါက်ဖို့ အကောင်းမွန်ဆုံးအခွင့်အရေး
____________________

နောက်ဆုံးမှာတော့ နဉ်ရှု systemနဲ့သဘောတူညီချက်ရသွားသည်။ သူမက သူ့ကို မူလပထမသဏ္ဍာန်မဲ့ကျောက်ပေးပြီး သူက သူမကို ကမ္ဘာတွေပျိုးထောင်တဲ့နေရာခေါ်သွားပေးဖို့ သဘောတူသည်။

ရှဲ့ယွီက တစ္ဆေကောင်နဲ့တိုက်နေဆဲ‌ဖြစ်၏။ ယခုအချိန်မှာတော့ သူက သွေးအန်နေရုံတင်မကတော့ဘဲ သူ့မျက်လုံးတွေကနေပါ သွေးတွေစီးကျလာနေသည်။ သူက ပြင်းထန်တဲ့တိုက်ပွဲတစ်ခုကိုတိုက်နေတာမှန်းသိသာသည်။

မီးခိုးရောင်ဝိဉာဉ်တစ်ခုက ရှဲ့ယွီရဲ့ဝိဉာဉ်အသိစိတ်ထဲရောက်နေပြီး ရှဲ့ယွီကို သူ့ခန္ဓာကိုယ်ကိုပေးအပ်လိုက်ဖို့ မောက်မာစွာဆို၏။ သူက အရင်ကမဖြစ်ဖူးသေးတဲ့ဒဏ္ဍာရီတစ်ခုဖန်တီးဖို့ ရှဲ့ယွီရဲ့ကိုယ်ကိုသုံးချင်နေသည်။ သို့သော်ငြား ရှဲ့ယွီက အင်မတန်ထောင်လွှားကာ ခေါင်းမာသူဖြစ်တာမို့ သူ့ခန္ဓာကိုယ်ကိုပေးအပ်ဖို့ ငြင်းဆန်သည်။ သူက ဒီမိစ္ဆာအိုကြီးကိုသတ်ချင်ပြီး မသေမျိုးအိမ်တော်ရဲ့ထိန်းချုပ်ခွင့်ရဖို့ တိုက်ခိုက်နေသည်။

ရှဲ့ယွီက ခေါင်းငဲ့ကာအော်၏။

"ခင်ဗျားက ကျုပ်ခန္ဓာကိုယ်ကို လိုချင်တယ်ပေါ့!? အိပ်မက်ဆက်မက်နေ! သေလိုက်တော့!"

ရှဲ့ယွီက ပါးစပ်အပြည့်သွေးတစ်လုတ်အန်လိုက်သည်။ သူ့မျက်နှာက ဆိုးဆိုးဝါးဝါးရှုံ့မဲ့နေပြီး သူခံစားနေရတဲ့နာကျင်မှုကြောင့် သူ့နဖူးပေါ်ရှိ‌သွေးကြောတွေက ထောင်ထနေ၏။

သူ့ကို ဒီလိုပုံစံနဲ့မြင်လိုက်ရတဲ့အခါ ဒါက ရေတွင်းထဲကျနေတဲ့လူကို ကျောက်တုံးနဲ့ပေါက်ဖို့အကောင်းဆုံးအခွင့်အရေးပဲလို့ နဉ်ရှုတွေးလိုက်မိတာကြောင့် သူမက သူ့ခေါင်းကို လက်သီးနဲ့အလျင်အမြန်ထိုးလိုက်တော့သည်။ လျိုယွမ်ယွမ်က ရှဲ့ယွီ တိုက်ခံမှုမခံရအောင်ကူညီဖို့ ချက်ချင်းလှုပ်ရှားလိုက်သော်ငြား ရှဲ့ယွီတစ်ယောက် အထိုးခံလိုက်ရဆဲဖြစ်ပြီး နောက်ထပ် သွေးတစ်လုတ်အန်လိုက်ရ၏။