Unparalleld Leveling (Realm - 8) [Myanmar Translation]

Chapter - 33

Unicode

၅၄၁။ အညီအမျှခွဲဝေတာ
_________________

လျိုချင်းယန်က ကျန်တဲ့လူတွေကို ဘာပြောလိုက်မှန်း နဉ်ရှုမသိပေမယ့် သူတို့က သူမကိုအနှောင့်အယှက်ပေးတာကို ရပ်လိုက်ကြပြီး များသောအားဖြင့် သူမကို လျစ်လျူသာရှုထားကြတော့သည်။

အဓိကကိစ္စက ဒီအဖြစ်မှန်ကို သူတို့ လက်မခံနိုင်ခြင်းဖြစ်ပေ၏။ သူတို့ အားနည်းတယ်လို့အမြဲမြင်ခဲ့တဲ့သူက အခု သူတို့ထက် ပိုအထင်ကြီးချင်စရာကောင်းနေပြီး သူတို့က ဒီလူ့ကိုတောင် မှီခိုနေ‌ရသေးသည်။ သူတို့က ကောင်းကင်ဥပဒေဂိုဏ်းရဲ့အလေးစားခံရဆုံးဂိုဏ်းသားတွေဖြစ်ပေမယ့် အခုတော့ အမှိုက်ကောင်နဲ့အတူနေ,နေရသည်။ သူတို့ဟန်ပန်တွေက ထောင်လွှားနေပြီး ဝေ့လျန်ယွဲ့က သူတို့ကို လေးစားသင့်တယ်လို့ ခံစားနေကြရတာက သူတို့အတွက် ပုံမှန်သာဖြစ်ပေ၏။

လက်ရှိဝေ့လျန်ယွဲ့က သိသိသာသာကိုသန်မာတယ်ဆိုပေမယ့်လည်း သူက အသုံးမကျတဲ့အမှိုက်ဆိုတဲ့အတွေးက သူ့တို့စိတ်ထဲ နက်နက်ရှိုင်းရှိုင်းအမြစ်တွယ်နေခဲ့ပြီဖြစ်ရာ သူနဲ့အတူနေရတာက အစော်ကားခံနေရသလိုပဲလို့ သူတို့ကတွေးသည်။

နဉ်ရှုက ဒီဂိုဏ်းသားတွေကို လေ့လာကြည့်လိုက်ပြီးနောက် လျိုချင်းယန်က ဉာဏ်အများဆုံးဖြစ်လောက်တယ်လို့ ကောက်ချက်ချလိုက်သည်။ သူ့မှာ လုံးဝိုင်းပြီးဖော်ရွေတဲ့မျက်နှာကလေးရှိကာ သူ တစ်စုံတစ်ယောက်ဆီက အကူအညီလိုချင်တဲ့အခါမှာ သူ့ဟန်ပန်က အထူးပင်နှစ်လိုဖွယ်ကောင်းလှသည်။ ကျန်တဲ့ဂိုဏ်းသားသုံးယောက်က အလျှော့မပေးဘဲထောင်လွှားနေကြပြီး သူမကို စကားပြောခဲသော်ငြား လျိုချင်းယန်ကတော့ လုံးဝကွဲပြားကာ သူ စကားပြောချိန်မှာ အင်မတန်စိတ်ရင်းမှန်သည့်လေသံဖြင့်ဖြစ်၏။

သူမမှာ နန်းတော်ဆီသွားရမယ့်မြေပုံမရှိလို့သာမဟုတ်ရင် သူမလည်း ဒီလူတွေနဲ့ခရီးဆန့်ဖို့ရွေးချယ်မှာမဟုတ်ပေ။

သူမမှာရှိတဲ့တစ်ခုတည်းသောမြေပုံက ဝေ့မင်ပေးခဲ့တဲ့တစ်ခုသာဖြစ်၏။ အဲ့မြေပုံမှာက နန်းတော်ရဲ့နေရာကို လုံးဝမှတ်သားမထားချေ။ ဝေ့မင်က သူ့သားရဲ့အရည်အချင်းကို ကောင်းကောင်းကြီးနားလည်ထားသည်မှာ သေချာလို့နေကာ သူ့သားကို မသေမျိုးအိမ်တော်အတွက်ယှဉ်ပြိုင်တိုက်ခိုက်စေဖို့စိတ်ကူးက အိပ်မက်ထဲမှာပင်ပေါ်လာလိမ့်မည်မဟုတ်ပေ။