Unparalleld Leveling (Realm - 8) [Myanmar Translation]

Chapter - 49

Unicode

၅၅၇။ အကြီးအကဲအားဦးနှောက်ဆေးခြင်း
_____________________

ကောင်းကင်ဥပဒေဂိုဏ်းအကြီးအကဲက နဉ်ရှုကို တခြားဂိုဏ်းသားတွေနဲ့အုပ်စုပြန်ဖွဲ့ဖို့ခေါ်သွားပြီး သူမ သေပြီလို့ထင်နေတဲ့ဂိုဏ်းသားတွေ အဆင်ပြေပြေရှိနေတာကို နဉ်ရှုတွေ့လိုက်ရသည်။

"မင်းတို့တွေ အဆင်ပြေတယ်?"

နဉ်ရှုက အံ့ဩတကြီးမှတ်ချက်ချသည်။

နဉ်ရှုကိုကြည့်လာတဲ့လျိုချင်းယန်ရဲ့အကြည့်က ရှုပ်ထွေးနေ၏။

"ငါတို့ နန်းတော်ထဲမဝင်လိုက်ဘူး။ ထောင်ချောက်တွေက အရမ်းအန္တရာယ်များလို့ ငါတို့ ပြန်ထွက်လာတာ။"

သူတို့ ဝင်ပေါက်ကိုရွေးလိုက်ချိန်မှာပဲ အရမ်းကိုသန်မာတဲ့ဝိဉာဉ်သားရဲနဲ့တိုးသည်။ နဉ်ရှုမရှိတော့ သူတို့‌တွေမှာ ဝိဉာဉ်သားရဲကို လုံးဝအနိုင်မယူနိုင်တာမို့ ရွေး ချယ်စရာမရှိတော့ဘဲ ပြန်ထွက်လာရသည်။

သူတို့က နန်းတော်အပြင်ကနေ နဉ်ရှုထွက်လာမှာကိုစောင့်နေတာပေမယ့် သတိလစ်သွားပြီး သူတို့နိုးလာချိန်မှာ သူတို့က မသေမျိုးအိမ်တော်အပြင်ကိုရောက်နေပြီဖြစ်၏။ ဒီလိုကိစ္စမျိုးဖြစ်ပြီးတဲ့နောက်မှာ တစ်ယောက်ယောက်က မသေမျိုးအိမ်တော်ကို အောင်အောင်မြင်မြင်ရသွားတယ်ဆိုတာ လူတိုင်းသိလိုက်ကြသည်။

လျိုချင်းယန်က မသေမျိုးအိမ်တော်ကိုရဖို့မျှော်လင့်နေတာပေမယ့် သူ့မှာ နန်းတော်ထဲဝင်ဖို့တောင်အရည်အချင်းမရှိကြောင်းပေါ်လာသည်။ ဒါက တကယ်ကိုရှက်ဖို့ကောင်းပေ၏။

အထဲမှာ လူအတော်များများသေသွားတာမို့ ဒီလူတွေ နန်းတော်ထဲမဝင်တာကံကောင်းတယ်လို့ နဉ်ရှုတွေးလိုက်မိသည်။ အတော်များများက ဝိဉာဉ်တွေဝါးမြိုခံလိုက်ရပြီး ဒါက သူတို့မှာ ထပ်ပြီးဝင်စားခွင့်မရှိတော့ဘူးဆိုတဲ့အဓိပ္ပာယ်ရသည်။ နဉ်ရှုက စိတ်ဝိဉာဉ်လှေပေါ်တက်လိုက်ပြီး ကျန်လူတွေက သူမနောက်ကနေတက်လာသည်။

သူမ နည်းနည်းစိတ်လျှော့လိုက်တာနဲ့ ပင်ပန်းမှုက သူမဆီရောက်လာသည်။ မြေအောက်ခန်းထဲမှာ သူမက မနားတမ်းတိုက်နေရပြီး တစ်ချိန်လုံးစိတ်ဖိစီးနေရသည်။ အခု သူမစိတ်လျှော့လိုက်တော့ သူမတစ်ကိုယ်လုံးကိုက်ခဲနေတာကို ခံစားလိုက်ရတော့သည်။