#هنا_نحكي_حكايتي
#فريدة
#الحلقة_2
قلتلكم شفت يما تتقيأ هاكك وتبان مضرورة كي رحت لبلاصتها صبتها معمرة دم ...الدنيا دارت بيا و خفت خفت من هذيك الضلمة وبديت نتخيل فالموت عندنا ..رجعت نجري لفراشي و حكمت ركابيا بيديا ودخلت راسي في كرشي وحكمتني الرعشة ...فهذيك اللحظة مجانيش البكا جاني شعور وحدو شعور جامي حسيت بيه ...بت ليلة كاملة حالة عينيا و نقرا فالمستقبل .....مرقدتش حتى للفجر نضت توضيت وصليت ودعيت ربي باه ميكونش لي في بالي صحيح ..ناضت يما من موريا مسكينة رحت للكوزينة لحقتها .... ...هي مربعة كرعيها تخبزلنا فالخبيز باسكو كنا نبغوه بالقهوة وكانت الحاجة الوحيدة لي المكونات تاعها رخيسة و بنينة .....مريضة و مكانتش مخليتنا نروحو هاكك ..هي تخبز وانا نتأمل فيها و نتأمل فالتفاصيل تاع وجها وحتى صباعتين تاع رجليها ...وغست فيها وسرحت ..حتى قاتلي ها نوضي روحي نوضي خاوتك راح عليهم الحال نوضي ....نضت نوض فيهم بلعقل وحالي مهوش عندي كامل وبقيت نشوف فيهم راقدين مساكن و غايضيني (وجاني وحد الشعور تاع رايحة نعاني من للقدام ) ..لبست وجيت رايحة بلا قهوة قاتلي يما رواحي تستقهواي قتلها لالا منيش قادرة قاتلي لالا ستقهاوي باه متجيش من بعد ..قتلها علاه ...قاتلي الفطور ميكفيناش حنونتي باغية نسخن لخواتك هذاك العدس تاع البارح قاتلي هوما يقراو غير هنا قاتلي روحي عند خالتك نعيمة فطري عندها انتي راكي بعيدة و نورمال كي تروحي عندها ...( مسكينة كنت متفهمة الوضع وكان علبالي بكلش ).....بصح في قلبي بغيت نقلها ني باغية نجي نشوفك معليش مانكلش كي نشوفك نشبع ..المهم خزرت فيها وقتلها في روحي عندي قراية نقعد نقرا مع صحباتي .....رحت لهذاك السيام و عقلي كامل مهوش عندي وكي دخلت للكلاصة بقيت نشوف فالاستاذة ...الاستاذة لي كانت تخليني انا الحل الاخير كي يعجزو لخرين باه يحلو كاش مسألة ولا يحصلو ....المهم لاحظت بلي منيش في حالي وهذاك نهار مرفعتش صبعي اطلاقا .....في نهاية الحصة جينا خارجين قاتلي الاستاذة متخرجيش فريدة محتجاتك ....كي جات قاتلي واش بيك ليوم هي مكملتش وانا بديت نبكي ...قاتلي مالكي مالكي شا كين .....تقريب 5 دقايق باه قدرت نحكي غلبتني الدمعة ...حكيتلها كلش ...قاتلي ليوم العشية ستنايني نروح معاك اوكي ...قتلها لالا لالا يما متبغيش ...باسكو يما معلمتنا قتلنا بالكم تمدو يديكيم بالكم دايمن توصي و تعاود ...قاتلي خليها عليا المهم ستنايني العشية على 3 نجي نخرجك من الكلاصة و نروحو لداركم ...قعدت بلا فطور هذاك نهار والعشية جات الاستاذة داتني رحنا فالنقل كي وصلنا .....#تصبحون_على_خير....
YOU ARE READING
اليتامى ومرت باباهم ..قصة فريدة
Short Storyعندما تتعرض البراءة الى اغتصاب حقوقها ...وعندما تغيب الرحمة من افئدة البشر ...وعندما يكشف عرينك لصاحب و الغريب ستكون النتيجة #فريدة ......فريدة قصة فتاة جار بها زمن لتجد نفسها في غيابات المجتمع الظالم و المظلم .فريدة قصة فريدة من نوعها ..لم تأبى الا...
