اليتامى ومرت باباهم ..قصة فريدة

الاخيرة

#صفحة_هنا_نحكي_حكايتي
#فريدة
#الحلقة_33_والاخيرة:
قتلكم نحطيت في موقف لا يحسد عليه من جهة بابا و من جهة خاوتتي بصح كامل جاو ضدي وقالولي لازم تتزوجي ...مصبتش حل من غير اني نشور الشيخ تاع الجامع و نخبرو على وصيت يما العزيزة...غدوا من ذاك كي اذن الظهر رحت للجامع كي صلاو وكملو حكمتو وحكيتلو كامل القصة ...قلي شوفي ابنتي انتي الحاجة لي راكي رايحة ديرها مهيش حرام و مدام مهيش حرام تقدري تتكلي على الله ..قتلو و وصاية يما كيفاش ...قلي صحا خوتاتك انتي واش راكي دايرتلهم ضروك قتلو والو .قتلو يغسلو ويطيبو لرواحهم .....قلي و علاه مكيش باغية تتزوجي .....قلي تخيلي كون مجيتيش معاهم ...تخيلي كون تموتي انتي ثان ...قلي شوفي ابنتي هذي هي سنة الحياة وانتي وين عارفتهم بلي يتزوجو ضروك ..وبلاك قاع ميتزوجوش ...قلي تكلي على ربي ......مدام قلي الشيخ هاكك قلت نتكل على الله وصايي ....عاودت شورت خوتاتي قلولي راكي مسامحة ....قلت لبويي خلاص ني قابلة ....قتلو لازم يجو قبل ما يروح كريم لخدمتو  و لازم يجمع مع السيد و مام انا لازم نشوفو....المهم عاودو  بدلو لادات وقدموها شوية وجاو بالثلاثا ...جا غير هو و يماه ستقبلتهم دليلة مرت بابا  ...رحت انا لوحدة كانت تقرا معايا بطلت ودورتها حفافة ...رحت عندها ستيكاتني وجيت ...دخلت عليهم و بلا ما نتفصل فالموضوع عجبتهم على حساب هدرتهم وكون صابو يدوني معاهم ...ليصونصيال السيد جاني نورمال حشام طويل عريض ما فيه حتى عيب ....خرج هو و كريم خويا وجمعو غاية ...وزاد دخل جمعت معاه وحدنا ..واول سؤال سألولي قلي يخي مهمش مسيفين عليك ...قتلو علاه يسيفو عليا ...قلي بلاك انت قارية و جاية لواحد.فلاح وبدا يضحك ..عرفتو بلي انسان مليح ...اعطيتلو غير رؤوس اقلام على حياتي  ..قلي شرطك واش هو ..قتلو انا ماني طالبة لا جاه لا مال ..قتلو شرط واحد.برك ...قلي قولي ...قتلو مترفدنيش ضروك ستناني عام ...قلي ا لالا ..قتلو غير يفوتو خوتاتي الباك غدوا من ذاك نديرو العرس ..فلول شوية عارض بصح فالتالي قلي خلاص ماشي مشكل نزيد نصبر.....و قتلو لازم انت تقلهم بلي انا راني باغي نبعد.العرس ...قلي و المهر شعال قتلو ميهمنيش تفاهم مع الرجال ....قلي خلاص .....تفهمت انا وياه و هو تفاهمو على الشرط ....وعطاوني المهر تاعي ..(مبغيتش نتفصل فالامور تاع الخطبة باسكو عاديين )...المهم بديت نجهز و في نفس الوقت خوتاتي يقراو للباك وخويا مع خدمتو ....كل واحد.بدا لاهي في اموراتو ...الحمد لله ...وجااا نهار لي ربحت نجلى ووكلتوم الباك و جابو معدلات لي خلاتهم يديرو استاذات  وحدة لونgلي و حدة علوم ..لي طمنتني شوية انهم خرجو من الولاية وراحو للمدرسة العليا ..اوموا يبعدو على دليلة شوية ..المهم هذاك الصيف فرحة مننساهش ...من مورا ااباك حددنا لادات تاع العرس ....المهم لحقت ليلة عرسي لي ماصبت نفرح ولا نبكي وفاتت غير بكا تفكرنا يما لعزيزة ...وبغيتها تشوفنا كبرنا وتعرف بلي جابت 3 نسا و راجل في كتافنا و تسقمتلنا ليام ....درنا عرس واش عليا و ما جيت نروحي لداري حتى بديت نطيح فيهم دموع دموع ...منحكيلكمش على العرس راكم تعرفو عروسات بكري ....ليصونصيال رحت لداري .والحمد لله الحمد لله ...صبتو راجل و فحل و كون جات لعبادة لغير الله كون عبدتو ...انسان ما شاء الله كنت خايفة كي مهوش قاري يخرج ميفهمش ..بصح بلعكس انسان مكاش مثيلو صبت فيه الاب و الام و الاخ والزوج ....ويماه عوضتني في كلش لحقت وين بدات تجيبلي السني تاع الماكلة لشومبرة ...كنت انا نادي السني ليما و من بعد صبت شكون لي يجيبولي  ..تخرجني معاها  لافامي تاعها و تزوخ بيا ....منحكيلكمش .....المهم بدات دنيا تضحكلنا ....منقدرش نحكيلكم على خوتاتي ضروك لانها خصوصياتهم على ذيك منقدرش تنتجاوزها  حاليا كلتوم تزوجت وفي ولاية خلاف وراهي تقري ثم وعندها بنتين  ...ونجلى كذلك تزوجت غير حذيا وراهي خدامة وعندها زوج ولاد و طفلة  ازواجهم  ازواج ما شاء الله ....و خويا كريم انا لي زوجتو جبتلو انسانة طيبة و عايشين الحب ووالسعادة وعندو طفل ...بصح مهناش مع بابا ومرتو  و متفاهموش ....كان لازم عليه يسكن وحدو بصح مقدرش يشري سكنة  وين ضطريت و جبدت الدراهم تاع العملية كنت داستهم عند استاذتي ايلا راكم شافيين قلتلكم عليهم في الحلقات لولا وزاد عاونو رجالي شوية  ....شرا فالبطيمات f3 كي يروح يخدم يديها لاهلها وكي يجي برميسيو يجيبها ...استاذتي لي وقفت معايا  خرجت بملف طبي وراهي مريحة في دارها  .....اما دليلة للاسف ما عيات تجري على الثراية بصح مكتبلهاش ربي قلولها الاطباء فاتك الوقت  ....مع انو دارت فينا و حقرتنا بصح والله متمنيتلها هذ الشي و ربي راه عالم ....انا مخلانيش الزوج تاعي  نخدم فالحقيقة هو مقليش متخدميش بصح قلي وك الدراهم قاع راهم عندك فالكوفر وحاجة مهيش خاصتك ودي واش حتجتي صبت عندو الحق ... المهم راني عايشة في نعمة بطوموبيلتنا و سكنتي ...وعجوزتي ماتت بعدي ما جيت عندهم بسبع سنين ماتت بنفس مرض يما و منحكيلكمشو شعال تأثرت بوفاتها ...بصح من موت يما بديت نتوقع كلش ....حاليا كي يجي خويا برميسيو دايمن نتلاقو عندو انا و خوتاتي و ولادهم ورانا نروحو لبعضانا و زدنا تحبينا كثر .......بابا كبر بزاف و راه شيباني بصح سمحناه ولازم علينا نسامحون الله غالب الوالدين ....حاليا انا طفلة كبيرة  و زوج ذراري من مورها .....عيشتنا راهي ولا في الاحلام الحمد لله ........مناقش يما رانا داسينهم ذكرى و رايحين نهدوهم هدية لاول وحدة في بناتنا لي تتزوج لولا ....واش نقلكم هذي هيا. قصتي ....عنييييت وشربت لمر و فت كامل محطات الياس و الكره و الحزن ..بصح فالتالي ربي مخيبنيش وعوضني بالدوبل ...الحمد لله يارب ....هذي هي قصتي و من هذا المنبر نشكركم على حسن اصغائكم و على صدق مشاعركم ...وكل وحدة طيحت دمعة تاع حزن نشالله تعاودي طيحها تاع فرح .....واخيرا نشكر فطوووووم ختي و وحبيبتي و وسمحيلي عذبتك معايا بصح بغيت نقلك انت اطيب مخلوقة عرفتها في مواقع تواصل الاجتماعي ...شكرا بزااااف بزاااف .............الوداع