اليتامى ومرت باباهم ..قصة فريدة

9

#هنا_نحكي_حكايتي
#فريدة
#الحلقة_9
قلي طبيب خلينا نشوفو مع دوا ايلا مجابش نتيجة رانا نشوفو مع العملية قلي بصح منخبيش عليك يماك لازملها راحة متخلوهاش تتعب وداوم على دواها ...قتلو معليش نجيبلك بابا تقلو هذ الهدرة قلي ايه من الاحسن ..المهم رحت لبابا وخبرتو بكلش راح لطبيب وفهم من عندو كلش ....المهم باه نقنعو يما عودنا دينها لطبيب اخرى  وتفاهمنا معاه باه تقلها عفسة خلاف باه يجبرها على انها تريح و متخدمش ....وبالطبيعة الحال دينها لطبيبة وقتلها بلي كلاويك راهم عينانين من الماكلة العشوائية لازم تنظمي اوقاتك و اهم شي لازملك الراحة ...بدات يما داوم على دوا وبدينا حارصين عليها باه تريح ..كنت نوووض الفجر نصلي و نطيب القهوة و نخبز ونخمل ونوض خاوتي ونروح نقرا هذاك العام تعلمت كلش ....كنا فالفصل الثاني ديت المعدل 11 ادني معدل في حياتي دراسية وخوتاتي لخرين لزوج داو 8 كانو يقراو سنة الرابعة وكريم كان عندو سيزيام كان يقرا سنة سادسة ....وفي نفس الوقت كانت الاستاذة تلملي فالدراهم تاع العملية وكانت مين ذاك تعطيني قضيان نديه لدار ...المهم كنا على ابواب الصيف ويما بدا يزيد عليها الحال و بدات تضعاف ...احساس بزاف صعيب يماك تذوب قدام عينيك ....والحاجة لي بدات مخوفتني بداو ناس يجو لينا وانا الفصل الثالث تقريب مرحتش كامل وليت قاعدة فالدار نمد ليما دواها و كاش ما تحتاج ....ولي محكيتلكمش عليها هي لافامي تاعنا ....فحقيقة الامر مبغيتش نجبدلكم عليهم لانهم بكل بساطة ميستحقوش باه نجبدو عليهم بصح علبالي راكم تتسألو ..المهم كي لافاي تاع بابا كي لافامي تاع يما ولا واحد سقسا علينا جاو ليما مرة برك كي مرضت ......ومع العلم كامل بخير عليهم ويقدرو يوقفو معانا..لانو على حساب ما حكاولي .....خوالي و عمامي مكانوش متفاهين على زواجهم وكلا طرفين مهمش قابلين على هذيك بقينا منبوذين و لي زادت الطين بلة هو الفقر تاعنا يعني يحشمو بينا ...المهم نرجعو للمفيد ...يما بدات طريحة الفراش ودوا مجابش نتيجة ...ومبداتش تتجاوب مع الدوا ولي خلتها تفشل مبداتش تاكل ....قلت لبابا اوواه لازم نديرولها عملية .....قلي غدوا ندوها لطبيب يشوفها ....دينها صباح ....فوتلها في زوج دقايق وحكمنا لزوج قلنا اسمعو .......#يتبع......