اليتامى ومرت باباهم ..قصة فريدة

8

#هنا_نحكي_حكايتي
#فريدة
#الحلقة_8
قتلكم داتني الاستاذة لقاعة الاساتذة وقاتلهم شوفو راكم تعرفو حالة تلميذتنا وبتتنا فريدة الحالة لي راهي عيشتها علبالي بلي كاين بزاف بنات كيما هي ومكنتش رايحة نقصدكم كنت داير وعد قدام ربي بلي انا رايح نتكفل بيها وحدي  بصح الله غالب خرج الامر من يدي واليوم عرفت من عندها بلي يماها راهي مريضة بسرطان الكبد عفانا الله واياكم ...الله غالب ربي بعثلنا فريدة و راه يشوف ايلا نوقفو معاها لهذا ايلا بغيتو تعاونوها وديجا لازم نعونوها ونشوفو مع الاطباء يديرولها عملية بلك تنجح باسكو كيما تعرفو فريدة هي الكبيرة و خاوتها كامل صغار ..(.هي تهدر وانا نبكي )...وقاتلهم علبالي بلي شهريتنا قليلة بصح نخصو نصفها لصالح فريدة وربي يعوضنا ....قلولها ماشي مشكل وكي تدخل لاباي نفروها نشالله ....زادت راحت عند المدير و قاتلو كون تسمحلي هذ العشية منخدمش باغية ندور على المؤسسات عندي بزاف زملاء نكلفهم باه يلمولي لي كتبها ربي ..قلها روحي ...في هذيك دقيقة مسكينة خرجت بطبليتها داتني معاها  ضلينا ندور على المؤسسات ونهدرو معاهم والحمد لله كامل قلولها نعاونوك و قلولها نشالله من مورها لاباي بنهار نجوك حنا لسيام تاعكم و نجيبلو المكتوب لي كتبو ربي ....وصلتني لدارنا بصح مدخلتش وصاتني قاتلي شوفي بلاكي بلاكي تخبري يماك بواش رانا نديرو قاتلي لازم تكون مهيئة روحها للعملية ايلا كانت صح كاين عملية و قاتلي غدوا متجيش انا نهدر مع الاساتذة باه ميمركوكش مع الغياب خليها عليا .....دخلت لدار صبت يما في حالة متعجبش و زاد عليها الحال ....كرهت حياتي و. كرهت وجودي و كرهت كل شيء يتنفس قدامي ....مبديتش متخيلة نجي من لي كول ومنصيبش يما هنا .....قعدت حذاها  ودرت روحي معلباليش وهي تسقسي فيا ايلا كليت ولالا ....وانا نقلها غير امم ممم باسكو البكية كانت لاسقتلي في قرجومتي كون نهدر نفضح روحي ....قعدت وحد شوية و قتلها امااا مروحتيش لطبيب ..قاتلي وحد الورق كانو عندي وتودرولي على هذيك مرحتش ..قتلها راهم فوق طابلة تاع كريم وك البارح انتي كيما دخلتي حطيتيهم ثم .....قاتلي مشفيتش الله غالب ...قتلها غدوا انا نديهم لطبيب يقراهملك ...قاتلي لالا لااا انا نديهم انتي روحي تقراي قتلها منقراوش غدوا الاساتذة عندهم ندوة ....قاتلي املا قعدي فالدار وانا نروح لطبيب ....غدوا من ذاك نضت انا طيبت القهوة لخاوتي و بابا (من تم بدات مسؤوليتي و بديت نتعلم في شغل الدار ) المهم  راحت عند طبيب وانا قعدت من مورها نخمل و نصلح و نخلط مكنتش عارفة و زاد تخمام قتلني ....كي جات وفتحت عليها الباب جا وجها مخطوف و كحل ....وعرفت بلي طبيب خبرها ولا رحت لطبيب خلاف هو لي خبرها  باسكو يما ذكية بالرغم انا ماشي قارية بصح تفهم ......المهم قاع مسقسيتهاش هي عارفة وانا عارفة بصح مناش واضحين لبعضانا ..........المشكل بقا كيفاش نخليها تقولي بلي لازملها عملية باه نخبرها بالموضوع تاع الدراهم لي راني نلم فيهم بدون علمها ....عاودت رحت لهذيك لورقة تاع طبيب لي فوتت عندو قريت الاسم و غدوا من ذاك  قتلو ايلا كاين عملية ولالا ..قلي بيانسور كاين بصح مهيش هنا لازم تروح للعاصمة قلي بصح نسبة النجاح ضئيلة و من الاحسن انها تكمل شهر ولا شهرين بالدوا بلاك تقرحنا النتائج ويلا مكان حتى نتيجة نلجؤ للعملية .........#يتبع .......