#صفحة_هنا_نحكي_حكايتي
#فريدة
#الحلقة_22
قلتلكم جاب باب صحابو باه يفطرو عندنا و دليلة كانت دايرة قد قد دايرة حساب ....كي شافتهم نخلعت جات تجري ليا افريدة نوضي نوضي عونيني بويك جاب صحابو وانا والله مادرت حاجة ...مرديتهلهاش نضت رحت عند الجيران ...رحت جبت منعندهم كامل طبسي طبسي من كل نوع ...وجبتولها حطيتهملها قتلها متعيي روحك ما والو هذو هوما لجيران كون نطلبهم فالعمر يعطوهاي ...ايا رحت صنعت الشلادة و ستيكينا طابلة و حطينالهم ...واحنا كلينا لي كتبها ربي ...فاتت هذيك ليلة نورمال .....بقات يمات للعيد راحت هي وبابا داو لبنات نجلى وكلتوم وراحو كساو راوحهم بكل صراحة كساتهم كسوة شابة ..وانا كان عندي وحد الفريكات رحت انا و كريم خويا وحدنا كسينا رواحنا ...كي بقا نهار للعيد صنعتلنا القاطو من كل نوع ...،(هي الواحد يقول الصح من ناحية الخدمة والله لا تخدم و متحاسبنيش بصح البروبلام الحاجة لي تصرا بيني و بينها تخبر بابا لابغا هي ضالمة تخبرو )....معليناش بدينا مين ذاك ندابزو و مين ذاك نرجعو .....فات لعيد و فات مليح على العموم بصح كي رحت لقبر يما شبعت بكا ......لي كانو فالمقبرة نخلعو تقول هذاك وين ماتت ....رجعت لدار مع العشية راحت دليلة لدارهم ودات نجلى و كلتوم معاها ..فلحق والله ما بغيتهم يرحو خفت عليهم بصح قلت معليش خليني نشوف كيفاش يعاملوهم .....والحمد لله جاو زاهيين و جايبهم معمرين بالدراهم .....قلت في قلبي الله ينعلك يا بليس مدام راهي تعامل في خواتي هاكا دنيا و مافيها ..انا راني كبير ونعرف و مخصنيش واحد يتهلا فيا ......بديت نأفيتيها المكسيمو خطرات حتى نبغو نقابضو و من بعد نتفكر .....فات عام طلعت لدوزايم ليسي و كريم لطروزايم و لبنات جابو السيزيام ...وبدا المستوى تاعنا مشاء الله ......و بدات تحوس دليلة على الذرية بصح مكان والو ...وحد الخطرة فالصيف قاعدين عيطت دليلة لكريم خويا باه يحول معاها الخزانة تاعها...هو جاي شوي مليح في لاطاي تاعو راح على نيتو حولها معاها .....غدوا منذاك قلت لبوبي ديني لطبيب بدات غير مع طبا باه ترفد الكرش ...كي رجعت العشية فات بابا نيشان للكوزينة كان جيعان بديت نحطلو ياكل وهي فاتت لشومبرتها قاعدة نسقسي في بابا على دليلة حتى سمعناها تعيط و تضرب في ركبيها ...رحنا نجرو بدا يسقسي فيها بابا و مخلوع ....قاتلو سلسلتي سلسلتي حطيتها هنا و مصبتهاش ......انا قلبي طاح .....قلها زيدي شوفي زيدي شوفي احصي ...قاتلو لالا ...هذ يد رفدتها .....وانا شفت في بابا وبابا شاف فيا ......#تصبحون_على_خير
YOU ARE READING
اليتامى ومرت باباهم ..قصة فريدة
Short Storyعندما تتعرض البراءة الى اغتصاب حقوقها ...وعندما تغيب الرحمة من افئدة البشر ...وعندما يكشف عرينك لصاحب و الغريب ستكون النتيجة #فريدة ......فريدة قصة فتاة جار بها زمن لتجد نفسها في غيابات المجتمع الظالم و المظلم .فريدة قصة فريدة من نوعها ..لم تأبى الا...
