#هنا_نحكي_حكايتي
#فريدة
#الحلقة_11
قتلكم قعدت مجمعة مع يما حتى قصت عليا هذاك المنام مقدرتش نوض من الخوف ...قتلها ايما واش معناتها هذ المنام قاتلي يعني راكي رايحة تعاني في حياتك بصح تقدريلها ...بديت نرجف من ركابيا ...قتلها مدام انتي فالحياة ما عندو ما يضرني ....قاتلي تخيلي كون نموت شا دير من موريا ...قتلها والله نلحقك قتلها قاع مكاش منها ....قاتلي وانا راني تاكلة عليك و نجلى و كلثوم شكون يقوم بيهم ..قتلها اما خلينا من هذ الهدرة و شربي دواك ...قاتلي قدمي رواحي حذايا ...وانا خايفة ..قتلها نروح نسيق الكوزينة ..قاتلي ني نقلك رواحي ...رحت حذاها ..قاتلي تصنتي مليح ...وانا مدخلة يديا في تريكويا و نرجف ...قاتلي الله غالب ا فريدة معنديش شا نوصي هاكي تشوفي معندي اخت ما عندي ام ولازملي نوصيك انتي ....حصلتلي في قرجومتي مقدرتش نهدر ...قاتلي انا ما نقلك والو انا راني حاس روحي خاوية من الداخل و منيش مليحة ...لي نقولهالك تهلاي في خاوتك و خوك وسيرتو لبنات وتهلاي في روحك باه تقدري تتهلاي فيهم .....بديت نبكي ...قاتلي علبالي باباك انسان مليح بصح منا للقدام منيش عارفة شا راح يصرا ....قاتلي راني مخليتهملك امانة وكولي عليهم الباردة ويلا مقدرتيش عليهم ...زوجيهم ....بصح متتزوجيش وتخليهم ...وكليهم وانت باتي جيعانة ...لبسيهم وانتي باتي عريانة ......داويهم وانتي بقاي مريضة ....بطلي وخليهم يقراو ايلا قدرتي .....وراني راضية عليك دين و دنيا ...بديت نبكي ونقلها ايما خلاص ايما منيش تاع وصية انا وراني محتاجة واحد يتهلا فيا ....بدات تبكي ...قاتلي روحي سيقي كوزينة ....رحت وعنقي مشمخ بالدمعة .....حسيتها لحقت وقربت .....قعدت نقشر فالبطاطا حتى جاو شيخوتي ويديهم معمرين قضيان دخلتهم عند يما بقاو مجمعين معاها وبدات توصي فيهم ديراكت خلاص دعوة بدات على المكشوف مي مقدرتش رحت للكوزينة ....باسكو تاع الصح مقدرتش مظهر رهيب .....ديتلهم القهوة مبغاويش يشربو ....وجاو رايحين .....كي جيت مخرجتهم حكموني عند الباب كامل وداورو بيا ....قلولي بلي معندك وين تهربي وهذي حقيقة و لازم تقعدي حذا يماك كاش ما تبغي تهدرلك قالولي كوني قوية قدامها وقدام خوتاتك .....عطوني وحد المصروف وراحو ..كي راحو حسيت روحي راني رايح نواجه المشكلة وحدي بديت ميتة بالخوف ..رحت انا غسلت وجهي ودخلت عندها و قلت نسيها فالموضوع شوية ....قعدت مجمعة عادي معها ...حتى شفتها دارت يديها في وذنيها وبدات تنحي في مناقشها ........#يتبع
YOU ARE READING
اليتامى ومرت باباهم ..قصة فريدة
Short Storyعندما تتعرض البراءة الى اغتصاب حقوقها ...وعندما تغيب الرحمة من افئدة البشر ...وعندما يكشف عرينك لصاحب و الغريب ستكون النتيجة #فريدة ......فريدة قصة فتاة جار بها زمن لتجد نفسها في غيابات المجتمع الظالم و المظلم .فريدة قصة فريدة من نوعها ..لم تأبى الا...
