#هنا_نحكي_حكايتي
#فريدة
#الحلقة_13
قتلكم نوضت كريم خويا راح يشوف النتيجة وانا سخنت القهوة وديت فنجان ليما كي لعادة حطيتولها عند راسها وبقيت نخلط في هذاك تلفزيون باه نشعلو وبقيت نقلها اأما نوضي شربي قهوتك نوضي هي تبرد ...وتلفزيون مبغلش يشعل و نا نقلها اما ها نوضي هذاك الفطور والله ما علبالي شا نديرو .....حتى ضربني الموس للقلب و مبداتش تتجاوب معايا ...مبيغتيش نزيد نهدر و مبغيتش نصد من موريا و يدي وحدة فالتلفزيون تنقرش فيه و لخرا مفيكسيا ..وقلبي حبس ....درت ليها غير بلعقلي صبتها مدورا راسها على ليمنا ...رحت ليها غير بلعقل و خايفة خاااااايفة اصعب مسافة كانت بيني و بينها هذاك نهار ..كي وصلت ليها و بقيت نشوف في كرشها ايلا راهي تطلع وتهبط (يعني ايلا تتنفس ولالا ) بصح والو ...طحت بركابيا عندها وتوشيت خدها صبتها باااااااردة ....وبديت نضرب فيها بلطراف تاع صباعي على خدها و نقلها أما نوضي انا بنتك نوضي ....امااا نوضي شربي غير القهوة تاعك وعاودي رقدي ...بصح للاسف والو ..بديت نشم في نيفها ونتحسس ايلا راهي تتنفس ولالالا ...بصح والو ...عرفت بلي ربي دا امانتو ....بعدت شوية وذراعتيا طاحو وبديت نبكي بصح نبكي فابل ....اماا نوضي انا كيفاه ندير منيش عارفة ....اماا لمن نقول و شا نقول و وين نروح ...اماا نجلى و كلثوم راهم راقدين شا نقلهم ....امااا كريم راح يشوف ايلا جاب سيزيام ولالا ......امااا قسمتني و كسرتيني و خليتني قفة بلا يدين .......اماا مازلت صغيرة وعلاه وعلاه ...(معرفتش قاع شا نتصرف ) نضت غير بلعقل و بقيت نشوف فيها ومنيش قادرة نروح ونخليها ....جيت رايحة نوض نجلى و كلتوم بصح خفت نخلعهم ....رحت نحوس على شال باه نديرو على راسي ...وبدت نبكي ونقول ياربي انا كي ندير ضروك ..انا كي ندير خرجت عند الجيران ودخلت عليهم وبديت نبكي لحقو وحد العجايز و حد نسا كبار راحو ليها بدلولها حوايجها وحولها و راحو خبرو بابا ...ناضو لبنات خوتاتي مسكين ما راهم فاهمين والو ...وزاد لحق كريم مخلوع ........والله ماسمعت بلي جاب السيزيام حتى من بعد ...كي عرفو و استوعبو بلي يما ماتت بداو يبكو وبداو شادين فيا ماصبت لا نسكتهم ولا نبكي انا .....ولي قاتلهم ريحو لافامي تاعنا حتى واحد.ما لحق وبداو ناس يعزو فيا وانا في هذاك اللاج مكنتش عارفة مومبا واش نردلهم ...المهم بدا الغاشي يجي ...حتى لحقو شيوختي رجال و نسا بالطعام و اللحم و القضيان زوج طومبلات معمرين ...دخلو نحاو حجابتهم وجدو كلش مساكين ......وانا قاعدة غير نشوف صرا فيا الباطل ....تقريب ساعتين باه جات خالتي ( لي منسمحهاش مدامني حية و غدوا نقعدلها حفرة في طريق الجنة ) ...جات ودارت روحها تبكي و تنوح وزادو لحقو عماتي و عمامي المنافقين ...ليصونصيال قبل ماويغسلوها دخلوني انا و خاوتي ...وحدة العجوزة قاتلهم خلوهم متخرجوهمش خلوهم يبكو ...تقريب ساعة واحنا لداخل عندها ...خرجو خواتتي وانا راقدة على كرشها ..وك ما جاو يخرجوني حتى بسيف منكذبش عليك بصح بكيت بكا تاع جهالة الله غالب مقدرتش نتحكم في روحي ...وهذيك النظرة التالية كي جاو مخرجيني وانا نشوف فيها مننساهاش ...غسلوها وكفنوها ....وجاو دايينها .....كي جاو مخرجينها طحت تغاشيت....داو دفنو لعزيزة ..داو دفنو حبيبة القلب ....داو دفنو عينيا .....داو دفنو شمسي و قمري ...داو دفنو انفاسي .........................#تصبحون_على_خير.........
YOU ARE READING
اليتامى ومرت باباهم ..قصة فريدة
Short Storyعندما تتعرض البراءة الى اغتصاب حقوقها ...وعندما تغيب الرحمة من افئدة البشر ...وعندما يكشف عرينك لصاحب و الغريب ستكون النتيجة #فريدة ......فريدة قصة فتاة جار بها زمن لتجد نفسها في غيابات المجتمع الظالم و المظلم .فريدة قصة فريدة من نوعها ..لم تأبى الا...
