#هنا_نحكي_حكايتي
#فريدة
#الحلقة_12
قتلكم بعدما خرجت استاذاتي من الدار رجعت نجمع مع يما كنت نحاول قدر الامكان باه نجمع معاها اكثر وقت ممكن المهم قعدنا مجمعين ...حتى شفتها دايرة يديها في وذنيها وتنحي في منقشها انا كنت صغير مكنتش عارف شا رايحة دير قتلها اما هذو علاه راكي تنحي فيهم ...بدات تضحك (هذوك ليام داخلتها غير ضحك و بسمة و مكانتش تتوجع حتى عمبالي راهي تبرا )...المهم قاتلي ني خايفة يسرقوهملي فالسبيطار ...قتلها شكون ذو (كانت قاصدة كي تموت ينحوهملها كيما راني نشوف هذ الظاهرة ضروك فالسبيطارت )...قاتلي شدي دسيهم ...شديتهم عليها بصح ما جا في بالي والو ...قعدت وحد شوية نتفرجو على وحد التلفزيون تاع بكري يحصراه ....قاتلي ا فريدة .....كلما تعيطلي باسمي نموت ونبرد و بديت نخاف من هدرتها ...بلا ما نصد ليها قتلها اه ؟ قاتلي اسمعي بنيتي هذوك المناقش هذاك ما عندي في رزقي ...دسيهم لوقت الشدة ....مقلبتهالهاش بغيتها تسكت ...قاتلي بلاكي بلاكي تصرفيهم هاك وصايي شديهم و كي تنضري و تنقطع بيك بيعهم ....نضت وخليتها تهدر ...باسكو نضريت بزاااف مباقش عندي استعداد باه نزيد نسمع كلام كبير عليا .....رحت للكوزينة وبقيت نخمم دسيت هذوك المناقش ...حتى جاو خاوتي من ليكول فطرتهم وديتهم عند يما باه تشبع منهم ( وانا عارفة بلي هوما ما يشبعو منها و هي متشبع منهم ) ...مساكين يحكولها على ليكول وما راهم فاهمين والو وخويا يقلها اما كي نجيب السيزيام والله غير ديرلي حفلة ....وهي تقولي ايه ايه هاي فريدة ديرهالك بصح متعذبوهاش ...كي شغل حسيتها بلاعني تودع فينا باه تحضرني نفسيا و جسديا للمصيبة (حسيتها تقلي وجدي روحك دبري راسك )....خويا كريم كان هذيك سمانة راح يفوت السيزيام تاعو ....بقات يما في هذيك الحالة ...حتى وين لحقت بيها مكانتش قادر تروح لتولات باسكو مين نتوشيها تنظر خلاص معادش تقاوم ...حتى بدا بويي مسكين يضلي رايح وجاي للخدمة غير باه يبدللها حوايجها لي حشاكم توسخهم ....و خطرات انا نبدللها و كنت نموت من الحشمة اكم تعرفو الدعوة .....المهم الجثة تاعها بدات كيما الفراشية مرخية كامل بصح الهدرة تهدر نورمال ....وحد ليلة 23ماي...كان كريم خويا بايتة حي يستنى فالنتيجة تاع السيزيام وكان متاكد بلي يجيبو كان يقرا مليح بصح كان يستنى فالمعدل و خوتاتي مكانوش يقراو كانو كملو ...بدا يقلي افريدة صباح نوضيني بكري وانا نقلو هيه ارقد انا نوضك ....صباح كي لعادة منضتش بكري حتى ل 9 صبت بابا مطيب القهوة ستقهوى وراح ..وانا رحت نوض في كريم قهويتو وقتلو روح شوف شعال جبت ..رجعت انا نحمي في وحد الخبز و عاودت سخنت هذيك القهوة و جيت رايحة ندي ليما الفنجان تاعها كيما موالف .....#يتبع .....
YOU ARE READING
اليتامى ومرت باباهم ..قصة فريدة
Short Storyعندما تتعرض البراءة الى اغتصاب حقوقها ...وعندما تغيب الرحمة من افئدة البشر ...وعندما يكشف عرينك لصاحب و الغريب ستكون النتيجة #فريدة ......فريدة قصة فتاة جار بها زمن لتجد نفسها في غيابات المجتمع الظالم و المظلم .فريدة قصة فريدة من نوعها ..لم تأبى الا...
