#هنا_نحكي_حكايتي
#فريدة
#الحلقة_7
قلتلكم ديت هذوك ليزانليس تاع يما ورحت صباح بكري لاكلينيك دخلت عند طبيبة و عطيتهلما باه تقراهملي وكنت مخبرتها بلي تاع جارتنا ...قاتلي وعلاه مجاتش هيا قتلها مسكينة راهي مريضة ومعندهاش ذراري لي تبعثهم ...قاتلي ابنتي هذي راه عندها سرطان الكبد ...انا مكنتش نعرف واش هذ السرطان يعني اول مرة نسمع بيه ....قتلها كيفاش سرطان ..قاتلي الكبد تاعها راه يتفتت يوم بعد يوم يعني مرض خطير ....ذيك اللحظة جامي ويلا ننساها في حياتي لحظة وحدها ....بقيت نشوف فيها ورايحة دمعة تهبط ....فاقتلي بلي مهيش جارتي ....قاتلي كيفاه تجيك هذي ....بديت نمسح فالدمعة قتلها يما ....قاتلي شوفي انتي راكي رايحة تعرفي ليوم ولا غدوا ...بصح يماك لازم تخبي عليها ...قتلها بصح طبيب تاعها غدوا ولا ليوم يقلها ..قاتلي لالا يقول لبويك ولا خوك الكبير ..قتلها انا الكبيرة ...بقات تشوف فيا قاتلي شا باغية نقلك ربي معاك وصايي ...قتلها كيفاه صار متبراش ..قاتلي نسبة الكبيرة تاع الشفاء تبقى عند ربي سبحانو و تعالي .....جيت خارجة و لرض دوور بيا و ماني فاهمة والو و منيش متخيلة الحياة بلا يما مكاش قاع منها ...رحت ليكول دخلت صبتهم يقراو خلاوني دخلت فت نيشان لبلاصتي الجثة حاضرة بصح العقل وااااااالو ...وتحجرتلي الدمعة في عيني ...و كامل بداو ملاحظين حالتي .....جات الساعة تاع الاستاذة لي مضاري تعاوني دخلت وبدات نيشان فالدرس ....بقيت نشوف فيها ما شفتش قاع فيا ونهار شافت فيا طاحت عيني في عينها و بديت نبكي ....قاتلي فريدة خرجي برا قعدي عند الباب ......خرجت ومن بعد هي لحقتني ..قاتلي واش بيك ...كي سقساتني عنقتها وحطيت راسي على صدرها وحكمتها بذراعتيا لزوج من ظهرها وبديت نشهق ...قتلها اما رايحة تموت ااا ستاذة يما رايحة تموت ..كل ما بغات تحاول باه تبعدني عليها بديت نزيد نزير عليها و نا نقلها ااا ستاذة انا كي ندير بلا يما ...استاذة انامزلت صغيرة على هذ شي .....ااا ستاذة انا شا نقول لخوتاتي و خويا .....حتى بكيتها معايا حكمتني بيديها لزوج من راسي قاتلي فريدة اسمعي اسمعي و لازم تفهميني شا كاين ...خبرتها بكلش ....قاتلي اصبري نشوفو الاطباء شا يقلونا بلاك بالعملية تبرا ....قاتلي شوفي ضروك كل حاجة معتامدة على القوة و الصبر تاعك مكانش واحد راح يرفد هذ الهم من غيرك لازم تصبري ولازم نبدوا نتحركو هذا وين بدا الاختبار ..قاتلي روحي غسلي وجهك ورجعي لبلاصتك و لازم تخبي في قلبك و على 12 نحكو وفيها خير نشالله .........على 12 داتني لقاعة الاساتذة نستناو فالاساتذة يتلمو كامل .........#يتبع......
YOU ARE READING
اليتامى ومرت باباهم ..قصة فريدة
Short Storyعندما تتعرض البراءة الى اغتصاب حقوقها ...وعندما تغيب الرحمة من افئدة البشر ...وعندما يكشف عرينك لصاحب و الغريب ستكون النتيجة #فريدة ......فريدة قصة فتاة جار بها زمن لتجد نفسها في غيابات المجتمع الظالم و المظلم .فريدة قصة فريدة من نوعها ..لم تأبى الا...
