اليتامى ومرت باباهم ..قصة فريدة

21

#صفحة_هنا_نحكي_حكايتي
#فريدة
#الحلقة_21
قتلكم جيت من ليكول كي دخلت ضربت عيني في وحد الشكاير عند وحد الدالية منيش مضاري نشوفهم ثم ...رحت قلبتهم صبهم قش يما لعزيز ....ضربني السلك لعينيا ...جريتهم و رجعتهم لشومبرتي وفرغتهم في وسط الشومبرة ....جات ليا وقفت عندي عند الباب قاتلي واش بيك ...قتلها انتي لي واش  بيك في واش ديرونجاوك قش يما ...قاتلي جيت نقيلكم شومبرتكم صبتهم دايين البلاصة خرجتهم برا ...(كي شغل تتمسكن و خاطيها ) ...قتلها هذ قش الغالية و ماشي بهذ الطريقة يترما ...قاتلي مرميتهمش افهمي ...قتلها اسيدي كون ستنيتي العشية و سقسيتني ...قتلها شوفي متقويش معايا لهدرة شمبرتي انا وخواتتي انا لي نرتبها ونسيقها ....قاتلي اوكي و راحت .....كوبينا السوجي و بابا مسمعش لحق رمضان نهار  السبت راح قضالنا بابا و ضليت انا ويها نخملو وونغسلو وبدات الامور عادية .....ونحصي رمضان كان يطيح فالشتا و كنت نقرا فليسي كنت نجي العشية نسيق شومبرتي ونخمل فراشي باسكو مكانتش دليلة تخملنا شمبرتنا من ضربة تاع قش يما ....كان بابا دايمن كي يجي يحمل فيا نسيق فيها ...قلي ا فريدة دليلة مهيش تسيقلكم شمبرتكم ...قتلو لالا راني شايفتها تتعب و راهي دير الفطور منيش نبغي نتعبها حتى جات من الكوزينة قاتلي لا قوليلو الصح ...( ياااا معولة على ليبروبلام ) ...قتلو اسمع بابا صبتها قايسة قش يما برا و مشورتنيش ....قلي وانتي علاه داسة هذاك القش علاه متصدقيهش ولا شوفي كي ديريلو ...نخلعت قتلو بهذ السهولة هانوا عليك حوايج يما ...قلي شوفي ديجا مهمش عاجبني الحال كي راهم مزالو هنا قلي غدوا منصيبهمش هنا ...قتلو شوف ابابا ملي راني مرديتلكش طلب بصح هذ الخطرة اسفة و سمحلي ..ايلا باغي تخرج قش يما خرجني معاه .....زعف و راح لشومبرتو ...رجعت انا نبكي لشومبرتي ...اذن عليا المغرب وانا نبكي ...هوما يفطرو حتى ليا بابا قلي نوضي تفطري قتلو مهيش طالبة منيش جيعانة ..قلي ني نقلك لحقيني ..راح للكوزينة لحقتهم ....كليت هذيك الماكلة تاع من فوق القلب ....من مورا الفطور غسلت ماعن ديت لبنات و رحت عند وحد الجار باه نسهر ...مجمعين يسقسو فيا قاتلي وحد الجوزة افريدة راكي تصدقي على يماك ولالا ...انا كنت صغيرة ..قتلها لالاة..قاتلي صدقي الصدقة مليحة في رمضان .....درتها في راسي وبدا كي يلحق وقت الاذان نروح نقص طبسي شربة ولا زيتون ولا خطرات خبزة كسرة نخرجهم صدقة ....لالة دليلة مبداش يعجبها الحال ..قاتلي ذي الخطرة رواحي انتي طيبي وصدقي .....قتلها واش رايك نزيد نسيقلك شومبرتك ...قتلها من شومبرتي لحقت للكوزينة ...قتلها يما نصدق عليها و هذا من رزق ربي و بابا و متسلينيش ...بدات دير الماكلة قياس و قد قد ..باه منصيش شا نخرج .....وحد الخطرة دارت شوية غير قيسنا حتى جا بابا و جاب المعلم تاعو و صحابو باه يفطرو وذاك الوقت مكان لا تلفون لا والو باه يعلمها بلي راه جايب ضياف ....حتى دخلهم ...نخلعت جات تجري ليا ا فريدة نوضي نوضي عاونيني .........#يتبع .......