اليتامى ومرت باباهم ..قصة فريدة

32

#صفحة_هنا_نحكي_حكايتي
#فريدة
#الحلقة_32
قلتلكم بدينا كيما  القط و الفار انا ودليلة و مبديناش كامل نتفاهمو وبابا خطرة معاها ومين ذاك معايا ......وهذاك العام كان عندي التخرج ...وحد الخطرة كانت كلتوم ختي تغسل في طبليتها تحت التاقة تاع مرت بابا ..جات تجري ليا قاتلي ارواحي ارواحي سمعي واش راهم يقولو .(بابا و دليلة)..رحت انا نتصنت و سمعتو يقلها هي سنة واش راهي تقرا وهي تقلو سنة تكمل سنة تكمل (بابا مكانش عارف قاع واش راني نقرا ).....قلها املا خلي حتى تكمل و ربي يعمللها حل ...قاتلو اودي ميستناوهاش تكمل والسيد راه مزروب .....قلها خلي خلي من بعد نهدرو فالسوجي ..وهي مزيرة عليه ....انا تم فهمت بلي راهي جابتلي خطاب ..وباين بلي خطاب و خلاص وهي عارفتني بلي زواج منيش دايراتو قاع في بالي .....فليل ديت لعشا لشومبتي و قاعدة نتعشى انا ولبنات حتى جا لينا بابا قعد يتعشى معانا ومن بعد سقساني على القراية وينت نتخرج ..(عرفتها بلي جا يجبدلي فالسوجي تاع الزواج) ...قتلو سنة بربي ...قلي اسمعي واحد جا هدرلي عليك و راهي ناوي الحلال ...بدون تفكير و بدون تردد قتلو لالا ....قلي اصبري خليني نكمل هدرتي ...قتلو اسمع والله و نعرفو رئيس و نعرفو امام ما نتزوج ....قلي تقدري تفهمني علاه ...قتلو بكل بساطة منقدرش نخلي لبنات وحدهم ....قلي علاه انا شا كي تشوفي فيا ..قلي وديجا كبرو و راهم يعرفو يقضو صوالحهم وحدهم ...جات نجلى تقلي ..ايه ا فريدة حنا كبرنا ...قتلها بلعي انتي ما كي عارفة والو .....ومن بعد بابا ناض قلي شوفي كي تعطيني سبب مقنع ثم ندير رايك بصح باه تقعدي هنا وونهار طول وانتي كيما القط والفار مع دليلة هذي منقبلهاش .  ....قلي ديجا قرايتك ورايحة تكمليها ..معندكش عذر ....قتلو نقلك انا تان هدرت هدرتي منتزوجش ...قلي المهم وحدة من زوج تتزوجي ...ترفدي قشك وبرا ....نخلعت ..قتلو تحاوزني ...قلي باسكو انتي متفهميش ....نضت رحت للكوزينة و مخلوعة كيفاش قدر يقلي هاك .....وبدا لحقني و يقلي المهم الخميس راهم جايين ......بت نبكي ذيك ليلة ....ماصبتش قاع حل و معنديش وين نروح .......غدوا من ذاك رحت نجري لسيام عند الاستاذة باه نخبرها على هذ الخطاب ...كي جيت نسقسيها قاتلي راني عارفة و مصبتش كيفاش نتصل بيك ....قتلها  منيش باغية نتزوج ...قاتلي اسمعي ا بهلولة سيد مشاء الله خدام فالفلاحة و عندهم جنانات و غير هو عند يماه .ويصلي و يخاف ربي ..قتلها كيفاش دليلة تجيبلي واحد كيما هذا ......قاتلي والله كيما راني نقلك ..قاتلي دليلة ميهماش بيمن تتزوحي كيما يهما تخلولها الدار وحدها .....قاتلي و وديجا قرا عندي هنا .....رجعت لدار و قلبي مزير و معرفتش واش ندير ......قلت لكلتوم تروح تقول لبابا اصبر حتى يجي كريم خويا و من بعد نتفاهمو ...ومن حظي جا كريم هذيك السمانة.....وخبرناه بالقصة تاع الزواج ..و  رحب بالفكرة و قلي حاجة مليحة و حتى لبنات جاو معاه يعني كامل جاو ضدي ...قلولي هذيك كي كنا صغار احتجناك بصح ضروك كبرنا ورنا نعرفو ..شوفي حياتك ووعيشيها ....نخلعت بصح قتلهم لالا لالا ....قلولي لبنات صحا شعال تقعدي تستناي فينا .؟..سكت ....ومن بعد قتلهم حتى تتزوجو ...قلولي احنا والله ما نتزوجو حتى نتخرجو و نصيبو خدمة ..تقدري تستناي ؟..قتلهم ايه ..قلي كريم خوياا بديتي تخسري ....انت واش خاسرة تزوجي وك راكي غير هنا حذانا وزيد انتي ولبنات قاع مكمش تتلاقو انتي ضلي فالجامعة ووهوما يجو من العشية للعشية .....غلبوني بالهدرة ..ولي قتلتني كامل نهار قاتلي كلتوم : فريدة رانا محتاجين فرح في هذ الدار وبدات تبكي ...نضنا كامل ندمعو في عينينا ....قاتلي و مذبيا تكوني انتي طرف في هذ الفرح ......قتلهم نخمم .....مصبتش قاع كيفاش ندير تهت بين وصية يما و الواقع و هدرت خاوتي .......#يتبع ......الحلقة الاخيرة اليوم على 21:00